“Dí nuxmijná kaʼyoo Jeobá”

Rígi̱ nirígá nákha tsiguʼ 1999, índo̱ xa̱bu̱ ñajunʼ bi̱ xtáa náa Francia nindu̱ʼu̱u̱n a̱ngiu̱lú bi̱ kúwá náa sucursal dí rígá náa Francia dí muni̱ numáá ga̱jma̱a̱ mbújkha̱a̱ rí nijuixná nákha tsiguʼ 1993 ga̱jma̱a̱ 1996. Ni̱jkuáxu náa Tribunal dí rígá náa Francia mu mu̱ni̱ mbánííxu xkujndu, mú xa̱bu̱ ñajunʼ táʼdxawun dí ni̱taxu, ga̱jma̱a̱ nirígú kaʼyuxu̱ mbá 4,500,000 euros ($99,514,000, nagixnuu xóo 99 millones quinientos catorce mil pesos) mbújkha̱a̱ rí nijuixná náa sucursal. Ikha jngóo ndiyóoʼ mu̱ʼguáxu náa Tribunal Europeo. Mú ikhiin nindúún dí abogados ndrígóo xa̱bu̱ ñajunʼ Francia ga̱jma̱a̱ ikháanʼxu̱ magimbáanʼ gajmiúxu mbáa a̱ʼgú ñajunʼ bi̱ naʼtáñajunʼ náa Tribunal Europeo mu mutamijnáxu nákha xóó tsémbánuu xkujndu.

Niku̱mu̱xu rí a̱ʼgú ñajunʼ bugi̱ maxtumáanʼxu muxna mbújkha̱a̱ dí nandu̱ʼu̱xu xa̱bu̱ ñajunʼ Francia mu xúʼko̱ mambanúu xkujndu. Mú ikháanʼxu̱ ndi̱ya̱a̱ dí á mu nuxna̱ʼxu mbújkha̱a̱ maski ajndu kááʼ mbá chíʼgíiʼ na̱nguá kuwáanʼ ru̱ni̱ mbáníí rí niʼthí Jesús náa Mateo 22:​21, numuu dí a̱ngiu̱lú nixna mbújkha̱a̱ rígi̱ mu mumbayíí Xa̱bu̱ Ñajunʼ ndrígóo Dios, raʼkháa mbáa xa̱bu̱ ñajunʼ náa numbaaʼ. Maski ajndu xúʼko̱ ni̱jkuáxu mu makuwáanʼ náa reunión rúʼko̱, numuu dí nduyamajkuíí xa̱bu̱ ñajunʼ.

Reunión nirígá náa mbá sala dí rígá náa Tribunal Europeo dí ra̱ʼkhá tháan nagui̱i̱. Ga̱jma̱a̱ nirígá xó má nidxa̱ʼwa̱míjnaxu, ginii kayuuʼ a̱ʼgú ñajunʼ niʼthí dí ndayóoʼ dí testigos de Jeobá muni̱ numa mbújkha̱a̱ náa inuu xa̱bu̱ ñajunʼ bi̱ xtáa náa Francia. Ikhú mbá nacha̱ nirajxi̱i̱xu: “Lá natayáá má dí xa̱bu̱ ñajunʼ nirigú kaʼyuxu̱ mbá cuatro millones y medio de euros mbújkha̱a̱ dí kuaʼdááxu̱ náa banco ráʼ.”

A̱ʼgú ñajunʼ asndu tsiánguá niʼni inuu numuu dí na̱nguá eʼyoo. Índo̱ abogados ndrígóo xa̱bu̱ ñajunʼ Francia nithi dí gajkhun nindxu̱u̱, ikhaa ra̱ʼkhá tháan nikiʼnáa ga̱jma̱a̱ niríñúún. Ikhú niʼthí dí aʼkui̱ín má eguámbá reunión, ndi̱yo̱o̱ dí Jeobá niʼni marigá xígi̱ kaʼnii mu a̱ʼgú ñajunʼ maʼtámbáyuxu. Ikháanʼ ra̱ʼkhá tháan edxu̱xu̱ʼ nigájnáa náa reunión rúʼko̱, asndu tándoo gúnimbuxu̱.

Nákha 30 ñajunʼ gu̱nʼ junio tsiguʼ 2011, Tribunal Europeo niʼtámbáyuxu, niʼthí dí ní xáʼyóoʼ mu̱ni̱ núma mbújkha̱a̱ ga̱jma̱a̱ niʼthún xa̱bu̱ ñajunʼ Francia dí martanga̱a̱ mbújkha̱a̱ dí niríyaʼ kaʼyuxu̱ ga̱jma̱a̱ dí maxnúxuʼ itháan mbújkha̱a̱. Rígi̱ nambáñúún má xúʼko̱ asndu dí mbiʼi xúgi̱ a̱ngiu̱lú bi̱ kúwá náa Francia. Grajxe̱ dí ninii a̱ʼgú ñajunʼ rí asndu túndxaʼwamíjna̱ mu̱nixu̱, ninindxu̱u̱ xóo itsí rí nixiyáa Goliat ga̱jma̱a̱ niʼni rí ikháanʼ majuiʼtámbáyuxu̱. Náá numuu rá. Numuu dí xó má David niʼthúu̱n Goliat, “dí nuxmijná kaʼyoo Jeobá” (1 Sam. 17:​45-47).

Mú raʼkháa i̱ndó rígi̱, mbaʼa nuthu má dí naʼnguxu náa xkujndu dí narígá náa inuu xa̱bu̱ ñajunʼ, maski ajndu ndxajkun bi̱ kúwá náa eʼwáʼ religión ga̱jma̱a̱ xa̱bu̱ ñajunʼ bi̱ guáʼdáá tsiaki̱i̱ nakiʼníin kuyulú, niʼnguxu náa mbá 1,225 xkujndu dí nimbánuu náa inún xa̱bu̱ ñajunʼ náa itháan rí 70 xuajin mba̱ʼu̱ ga̱jma̱a̱ náa iʼwáʼ xuajin, rígi̱ nambáyulú mu xúʼko̱ ma̱ndoo mu̱ʼni̱ ñajuunʼ Jeobá, mu muʼtáraʼa náa mámbá guʼwá, mu xúʼni̱i̱ saludar bandera ma̱ngaa mu ma̱ndoo muʼthá rí xúta̱ʼa̱a̱lú eʼdi.

Mú xóo niʼni dí ikhúún, rí xtáá rayambáá náa guʼwá dí phú na̱ʼkha̱ ikha ndrígu̱ún testigos de Jeobá (Nueva York, Estados Unidos), nijkhánú ninindxu̱ʼ abogado gajmíi̱n eʼwíinʼ a̱ngiu̱lú náa Europa rá.

NIʼNI MBA̱JU̱U̱N ANU̱ʼ GA̱JMA̱A̱ RU̱DÚʼ BI̱ NANIGU̱U̱Nʼ MUTARAʼA

Anu̱ʼ George ga̱jma̱a̱ ru̱dúʼ Lucille nikúwá náa clase número 12 náa Escuela ndrígóo Galaad ga̱jma̱a̱ nákha tsiguʼ 1956 nikúwá ruyambáá náa Etiopía ga̱jma̱a̱ ikhí nixtáá ikhúún. Nixna mbiʼyuʼ Philip ga̱jma̱a̱ numuu “Felipe bi̱ naʼtáraʼa” (Hech. 21:8). Mbá tsiguʼ nda̱wa̱á xa̱bu̱ ñajunʼ bi̱ xtáa náa Etiopía nánguá niniñuuʼ dí miʼtáraʼa, maski ajndu kaʼníí chíʼgiúúnʼ, mú narmáʼáan a̱jkiu̱nʼ dí familioʼ nagún reunión ga̱jma̱a̱ nagún gúʼtaraʼa ngu̱ʼwa̱á. Naniguʼ rígi̱ ikhúún nákha chíʼgiúúnʼ. Mú nákha tsiguʼ 1960 nituxu̱ dí mbaʼyóoʼ magajnúxu náa xuajin rúʼko̱.

Ni̱jkuá gákuwáanʼxu náa Wichita (Kansas, Estados Unidos). Anu̱ʼ ga̱jma̱a̱ ru̱dúʼ ninigu̱u̱nʼ mutaraʼa má xúʼko̱. Ikhiin nuni̱ ñajuunʼ Jeobá ga̱jma̱a̱ xúgíʼ a̱jkiu̱ún. Rígi̱ niʼni dí ikhúún mangúún manigu̱ʼ mataraʼa, ma̱ngaa rígi̱ nimbáyúu ndxájuʼ dxáʼgú Judy ga̱jma̱a̱ gi̱ʼtio̱ʼ Leslie bi̱ mangiin nigumiin náa Etiopía. Nijngúnʼ iyááʼ índo̱ gúʼdoo 13 tsiguʼ ga̱jma̱a̱ ajtsú tsiguʼ nda̱wa̱á ni̱jkuá gákuwáanʼxu náa Arequipa (Perú), náa ndiyóoʼ mixtiembáá miʼtáraʼa.

Nákha 1974 índo̱ ikhúún gúʼdoo 18 tsiguʼ. Sucursal dí rígá náa Perú niʼthí dí manindxuxuʼ precursores especiales, ikhúún gajmíʼ a̱jkhui̱i̱n a̱ngiu̱lú nixuʼmáanʼxu mutaraʼa náa xuajin dí xóó tséjuiʼtáraʼa náa kúbá dí mbiʼyuu cordillera de los Andes. Ikhí ma̱ngaa nitarúʼún xa̱bu̱ bi̱ kúwá náa xuajin dí nuthi ajngáa quechua ga̱jma̱a̱ aimara. Ni̱jkuáxu ga̱jma̱a̱ mbá carro náa ma̱ndoo maguanúxu munúʼ dí nixna mbiʼíí arca ndrígóo Noé, numuu dí xóo caja kaʼnii. Niniguʼ wéñuuʼ majmuʼ Biblia mu mathu̱u̱n xa̱bu̱ bi̱ nuthi i̱mba̱ ajngáa rí inu má Jeobá maʼni gámbáa tsingíná, nandii ga̱jma̱a̱ rí nakháñún xa̱bu̱ (Apoc. 21:​3, 4). Mbaʼin dí ikhiin nidxawíín dí nitaráʼaxu.

NITHU̱Nʼ MAʼGÁ NÁA GUʼWÁ DÍ PHÚ NA̱ʼKHA̱ IKHA

Nákha tsiguʼ 1977, ndxájulú Albert Schroeder bi̱ nindxu̱u̱ cuerpo gobernante ni̱jkha̱ náa Perú. Ikhaa niʼthúnʼ dí ma̱ni̱ majtíí solicitud mu maʼgá náa guʼwá dí phú na̱ʼkha̱ ikha. Ga̱jma̱a̱ xúʼko̱ má ni̱ni̱. Tájyúuʼ má mba̱yu̱u̱ʼ, 17 ñajunʼ gu̱nʼ junio tsiguʼ 1977 nigíʼdu̱u̱ niyambáá náa Betel dí nirígá náa Brooklyn. Mbá a̱jkhu̱ tsiguʼ niyambáá náa departamento rí naʼni kaʼwii ga̱jma̱a̱ naʼni májáanʼ.

Nákha junio tsiguʼ 1978 niniʼniiʼ Elizabeth Avallone náa mbá asamblea internacional dí nirígá náa Nueva Orleans (Luisiana). Xó má anu̱u̱ ga̱jma̱a̱ ru̱dúu̱ ikhaa ma̱ngaa anu̱ʼ ga̱jma̱a̱ ru̱dúʼ nuni̱ ñajuunʼ Jeobá ga̱jma̱a̱ xúgíʼ a̱jkiu̱ún. Naʼni má a̱jkhu̱ tsiguʼ dí Elizabeth nindxu̱u̱ precursora regular ga̱jma̱a̱ nindoo maʼni kájxi̱ ñajuunʼ Jeobá náa xúgíʼ mbiʼi dí gáxtáa. Nininumíjnáxu itháan májánʼ ga̱jma̱a̱ tájyúuʼ má ninduxu̱ʼ kuyamíjna̱. Nidámíjnáxu nákha 20 ñajunʼ gu̱nʼ octubre tsiguʼ 1979 ga̱jma̱a̱ niguáʼdi̱i̱ niyambáá mbóó náa Betel.

Náa timbá congregación dí nikúwáanʼxu nigumbiʼyuu Brooklyn Spanish, a̱ngiu̱lú ra̱ʼkhá tháan nindúún ku̱yuxu̱. Ga̱jma̱a̱ nikúwáanʼxu náa mbá ajtsú congregación, ikhí ma̱ngaa nikúwá a̱ngiu̱lú bi̱ májáanʼ wéñuuʼ a̱jkiu̱ún ga̱jma̱a̱ nuxnuxú tsiaki̱i̱ muyambáá má xúʼko̱ náa Betel. Nuxni̱i̱xu wéñuuʼ núma̱aʼ numuu dí nimbayúxu, xó má bi̱ nambájxuxu gajmiúxu ma̱ngaa bi̱ ku̱ñu̱u̱n numuu dí niñewa̱a̱n anu̱ʼ ga̱jma̱a̱ ru̱dúʼ xó má anu̱u̱ ga̱jma̱a̱ ru̱dúu̱ Elizabeth índo̱ niʼni wanii.

NININDXU̱ʼ ABOGADO MU MAMBÁYÚU XUAJÑUU JEOBÁ

Enero tsiguʼ 1982 nithu̱nʼ dí mayambáá náa Departamento bi̱ nunimbánii xkujndu gajmiún Xa̱bu̱ Ñajunʼ. Ajtsú tsiguʼ nda̱wa̱á nixuʼmún maʼgá náa universidad mu mani̱ndxu̱ʼ abogado. Índo̱ xtáá ranigajma̱a̱, niniguʼ índo̱ ndi̱yo̱o̱ dí xkujndu dí niʼngu̱u̱n testigos de Jeobá náa inún xa̱bu̱ ñajunʼ, niyambáá mu marigá xtángoo dí mambáñún xa̱bu̱ bi̱ kúwá náa Estados Unidos ga̱jma̱a̱ náa i̱ʼwáʼ xuajin, mu ma̱ndoo muraʼwi̱i̱ dí muni̱ o náá religión magún. Mba̱yu̱u̱ʼ ejyúxu mu munigajma̱a̱ ga̱jma̱a̱ numuu rígi̱ dí ra̱ʼkhá tháan gíʼdoo numuu.

Tsiguʼ 1986 índo̱ gúʼdoo 30 tsiguʼ, nigiuún mu mbaya̱ edxu̱u̱ náa departamento bi̱ nunimbánii xkujndu. Nidxu̱ʼ ga̱jma̱a̱ numuu rí nikumu̱ún kuyoʼ maski ajndu kaʼníí dxámá nindxu̱ʼ. Mú ndi̱yo̱o̱ dí ñajunʼ rígi̱ gíʼdoo wéñuuʼ numuu, ma̱ngaa dí maʼniuʼ gakhi̱i̱ numuu dí tséyóo xóo gáni̱.

Ni̱jkha̱nú ninindxu̱ʼ abogado nákha 1988, mú na̱nguá niku̱mu̱ʼ dí manigajma̱a̱ náa universidad maʼni gachúu dí nambájxu̱ʼ ga̱jmu̱ʼ Jeobá. Índo̱ mbáa xa̱bu̱ naʼnigajma̱a̱ universidad na̱jkha̱nú naku̱mu̱u̱ dí ikhaa najmañuu itháan ki xóo eʼwíinʼ bi̱ tsénigajma̱a̱. Mú Elizabeth nimbáyúʼ mu matangu̱ún mambaxúʼ mbu̱júu̱ ga̱jmu̱ʼ Jeobá. Rí xúgi̱ ikhúún nda̱yo̱o̱ dí itháan gíʼdoo numuu dí mambajxáaʼ májánʼ ga̱jma̱a̱ʼ Jeobá, dí maʼndaaʼ xtayáá ikhaa ga̱jma̱a̱ xa̱bi̱i̱ raʼkháa dí majmañaaʼ wéñuuʼ.

NITAMBÁYÍÍ AJNGÁA RÍ MÁJÁNʼ MU NIMBÁ XÁRIKOO RÍ MAJUIʼTÁRAʼA

Nda̱wa̱á dí nirámuʼ náa universidad nindoo ninimbánuu ñajunʼ dí nigúʼdoo náa Betel, ma̱ngaa nindoo nitambáyúu ajngáa rí májánʼ. Niniguʼ ñajunʼ rí ni̱ni̱, mú ma̱ngaa niʼniuʼ gakhi̱i̱ numuu dí mbá nacha̱ ejkha̱ raxtiʼkhuu ñajunʼ dí naguma náa xuajñuu Jeobá. Mbá xkri̱da, nákha niʼníí nunda̱ʼa̱ mbújkha̱a̱ índo̱ nuxnáraʼa i̱yi̱i̱ʼ ndrígulú, mú nákha 1990 nithúún bi̱ kúwá náa departamento dí ikhúún xtáá rayambáá dí muniraʼmáʼ mbá i̱yi̱i̱ʼ náa maʼthí rí maxtiʼku̱u̱ awan rúʼko̱. Dí testigos de Jeobá ní xúnda̱ʼa̱ mbújkha̱a̱ índo̱ gúxnaraʼa i̱yi̱i̱ʼ. Rígi̱ niʼni dí ní xárígá wéñuuʼ ñajunʼ náa Betel ga̱jma̱a̱ náa congregación, ma̱ngaa niʼni dí xa̱bu̱ ñajunʼ xúruma mbaʼ muruma mbújkha̱a̱. Mbaʼin nikumu̱ún dí rígi̱ maʼni dí ní xúguaʼdáá mba̱a̱ mbújkha̱a̱ ga̱jma̱a̱ dí ní xagájnuu i̱yi̱i̱ʼ dí majmulú náa muʼtáraʼa. Mú tárígá xúʼko̱, numuu dí xúgi̱ kúwá itháan mbaʼin xa̱bi̱i̱ Jeobá ki xóo nákha tsiguʼ 1990. Ga̱jma̱a̱ xa̱bu̱ nakhánún i̱yi̱i̱ʼ muraxnuu ma̱ngaa tséyóo má muni̱ numaʼ. Nijkhánú ndi̱yo̱o̱ dí xúgíʼ dí nariʼkhu̱u̱ xuajñuu Jeobá nagájnuu májánʼ, núma̱aʼ má ga̱jma̱a̱ numuu dí ikhaa nambáyulú ma̱ngaa ga̱jma̱a̱ numuu ikha dí nundrígú náa a̱ngiu̱lú bi̱ nuxna ikha (Éx. 15:2; Mat. 24:45).

Dí májáanʼ wéñuuʼ a̱jkiu̱ún a̱ngiu̱lú niyambáá mu maʼngulú náa tikhuu xkujndu dí niguáʼdáá náa inún xa̱bu̱ ñajunʼ. Mbá xkri̱da, ajtsíin a̱ngiu̱lú Cuerpo Gobernante gajmiún guʼñu̱ún nikúwá náa asamblea kiejuunʼ dí nirígá náa Cuba, nákha tsiguʼ 1998. Rí májáanʼ a̱jkiu̱ún ga̱jma̱a̱ rí nindxu̱u̱ xa̱bu̱ gamajkuiin niʼni dí xa̱bu̱ ñajunʼ bi̱ kúwá náa xuajin rúʼko̱ munimbu̱ún dí ikháanʼ tséxuʼdamíjná náa política ki xóo dí nithu̱u̱nʼxu ikháanʼ nákha niguáʼdáá gajmiúxu reunión.

Maski ajndu xúʼko̱, nguáná má ndayóoʼ tsiaki̱i̱ mu̱ʼgua̱ náa inún xa̱bu̱ ñajunʼ mu muʼtambáyíí ajngáa rí májánʼ mu nimbá xárikoo rí majuiʼtáraʼa (Filip. 1:7). Mbá xkri̱da, náa mba̱yu̱u̱ʼ tsiguʼ tikhuu xuajin dí rígá náa Europa ga̱jma̱a̱ xa̱bu̱ ñajunʼ bi̱ xtáa náa Corea del Sur, túyamajkuíí índo̱ a̱ngiu̱lú nithi dí xágún gúyambáá náa ejército. Rígi̱ niʼni dí mbá 18,000 a̱ngiu̱lú bi̱ kúwá náa Europa ga̱jma̱a̱ itháan dí 19,000 bi̱ kúwá náa Corea del Sur, nixudi̱i̱nʼ guʼwá ejua̱a̱nʼ numuu dí táʼndún gúyambáá náa ejército.

Nda̱wa̱á, nákha 7 ñajunʼ gu̱nʼ julio tsiguʼ 2011, Tribunal Europeo niʼnimbánuu mbá xkujndu dí nigumbiʼyuu Bayatyan contra Armenia. Ikhí niʼthún xa̱bu̱ ñajunʼ bi̱ kúwá náa xúgíʼ Europa dí muxnún i̱ʼwáʼ ñajunʼ muni̱ bi̱ tsíñún gúyambáá náa ejército. Itháan nda̱wa̱á nákha 28 ñajunʼ gu̱nʼ junio tsiguʼ 2018, Tribunal Constitucional de Corea niraʼwíí maʼni ikha̱á kayuuʼ xó má rígi̱. Á mu tikhuun a̱ngiu̱lú jiámá táguájun jmbu, mbáa táʼga̱nú marigá rígi̱.

Xó má departamento bi̱ nunimbánii xkujndu dí rígá náa Guʼwá dí phú na̱ʼkha̱ ikha ga̱jma̱a̱ dí rígá náa i̱ʼwáʼ sucursal, nuñajunʼ gakhi̱i̱ mu xúʼko̱ xa̱bu̱ ñajunʼ muniñu̱lúʼ muʼtáraʼa. Nadxu̱ʼ wéñuuʼ dí nambáñún a̱ngiu̱lú bi̱ naguma ngíníin eni̱ xa̱bu̱ ñajunʼ. Tséʼniuu á mu naʼngulú náa xkujndu o na̱nguá, mú nandoo nuʼthúún xa̱bu̱ ñajunʼ ma̱ngaa xa̱bu̱ xuajin ga̱jma̱a̱ numuu Jeobá (Mat. 10:18). Abogados ga̱jma̱a̱ xúgíinʼ xa̱bu̱ ndayóoʼ dí muraxnuu texto dí nuʼniraʼmáʼ náa i̱yi̱i̱ʼ dí nu̱ʼni̱ ratháá mu majmulú. Ga̱jma̱a̱ nudxawíín texto dí najmuxu̱ náa inún xa̱bu̱ ñajunʼ. Xa̱bu̱ bi̱ gajkhun nanigu̱u̱nʼ majmañún naguánú nuniʼnuuʼ testigos de Jeobá, ga̱jma̱a̱ nduyáá dí nuʼnimbulú na̱ʼkha̱ náa Biblia. Asndu tikhuun dí ikhiin niguáʼdi̱i̱ ninigajma̱a̱.

¡NÚMA̱Aʼ JEOBÁ!

Náa mbá 40 tsiguʼ dí ninújngoo, nindoo niyambáá náa mbaʼa sucursal dí rígá náa xúgíʼ numbaaʼ mu munimbáníí xkujndu. Ni̱jkhá náa inún xa̱bu̱ ñajunʼ ga̱jma̱a̱ nixtáá gajmíʼ xa̱bu̱ bi̱ guáʼdáá numún. Nandoʼ ka̱ñu̱u̱n ga̱jma̱a̱ nadxuʼ ka̱ñu̱u̱n bi̱ nañajunʼ gajmíʼ náa departamento rígi̱, ga̱jma̱a̱ a̱ngiu̱lú abogados bi̱ kúwá náa xúgíʼ numbaaʼ. Ra̱ʼkhá tháan mbaʼa xóo niguma tsajkurámúúnʼ ga̱jma̱a̱ ra̱ʼkhá tháan edxunʼ.

Elizabeth nixtáa má xúʼko̱ ga̱jma̱a̱ nindxu̱ʼ náa mbá 45 tsiguʼ dí ninújngoo xó má índo̱ nikúwáanʼxu májánʼ ga̱jma̱a̱ índo̱ niguáʼdááxu̱ xkujndu. Maski ajndu ikhaa namínuuʼ ga̱jma̱a̱ numuu nandii rí gíʼdoo.

Elizabeth ga̱jma̱a̱ ikhúún ndi̱ya̱a̱xu̱ dí niguáʼdáá tsiaki̱i̱ ma̱ngaa dí niʼnguxu náa xkujndu, numuu dí xó má niʼthí David: “Jeobá naxnún tsiaki̱i̱ xa̱bu̱ xuajñuu” (Sal. 28:8). Phú gajkhun dí Jeobá kaʼyoo dí nuxmijná.