“Aguajúnla jmbu, xúbangayimíjna̱la”

1, 2. Ndíjkha nuʼthá dí nindxu̱lú xóo mbá guʼwá mitsídánʼ rá. (1 Corintios 15:58.)

NÁA Tokio, Japón nákha tsiguʼ 1978 niguma mbá guʼwá mitsídánʼ dí nigiʼdoo mbá 60 pisos. Índo̱ xa̱bu̱ kúwíin ranújngún nduyáá guʼwá rígi̱, niraximíjna̱ á mu maʼngo̱o̱ mawi̱ji̱ numuu rí náa xuajin rígi̱ seguro eʼxma. Ndiéjunʼ nini̱ ingeniero mu mutsiji jxa̱ʼ rá. Nini̱ májáanʼ guʼwá mu mawi̱ji̱ gújkhúʼ ga̱jma̱a̱ índo̱ gaʼxma maʼba̱a̱n wáa kayuʼ. Ikháán nindxu̱lú xígi̱ kaʼnii. Ndíjkha jngóo rá.

² Mbáa xa̱bu̱ bi̱ naʼni ñajuunʼ Jeobá gíʼmaa mbaʼyoo awa̱án mu mawi̱ji̱ jmbu ga̱jma̱a̱ dí makro̱ʼo̱o̱ kaʼñún eʼwíinʼ índo̱ guruguambáá ikha ga̱jma̱a̱ xtángoo ndrígóo Jeobá (atraxnuu 1 Corintios 15:58). Gíʼmaa maxtáa “xawii mu maʼnimbo̱o̱” ga̱jma̱a̱ xánújngurámu ikha ndrígóo Dios. Mú ma̱ngaa gíʼmaa maʼni “gua̱ba̱ʼ a̱jkiu̱u̱n”, xó muʼthá, gíʼmaa makro̱ʼo̱o̱ kaʼñún eʼwíinʼ asndu náá máʼ eʼngo̱o̱ o á mu ndayóoʼ (Sant. 3:17). Á mu nindxu̱lú xígi̱ kaʼnii, xúnda̱ʼa̱ itháan dí kaʼyoo ni má xúniʼñáánʼ dí maguma dí raʼkhí. Náa artículo rígi̱ muʼnigajmaa náa rí mbaʼyóoʼ muguajún jmbu ga̱jma̱a̱ xúʼmbagayimijnálú. Ma̱ngaa mbuʼyáá witsu enii náa Gixa̱a̱ naʼni dí makáguabáanʼ mu xúguajunlú jmbu ma̱ngaa mbuʼyáá ndiéjunʼ gándoo guʼni.

NÁÁ GUSNGAJMÁ DÍ NUGUAJÚNLU JMBU RÁ.

3. Ndiéjunʼ xtángoo naxnúlú Jeobá náa Hechos 15:28, 29 rá.

³ Jeobá nindxu̱u̱ bi̱ Naxnulu Xtángoo, ikhaa phú kaʼyoo maʼthúlú dí gíʼma muʼni ga̱jma̱a̱ xtángoo ndrígóo tséʼniulú miʼskhaa makru̱ʼu̱lú (Is. 33:22). Mbá xkri̱da, cuerpo gobernante bi̱ nikúwíin nákha siglo timbá nithi mbá ajtsú enii rí cristianos gíʼma muguajún jmbu. Timbá, guʼni gaʼduunʼ dí mbuʼyamajkún xándú ga̱jma̱a̱ i̱ndó guʼyamajkuíí Jeobá, ragajma, guʼyamajkuíí eʼdi xó mbá dí mitsúʼkháan, ragajtsú, guʼnimbánii dí na̱ʼkha̱ raʼthí náa Biblia ga̱jma̱a̱ numuu dí xúʼbulú xkawiʼ kayuʼ gajmiulúʼ eʼwíinʼ (atraxnuu Hechos 15:28, 29). Xú káʼnii gándoo gusngajmá dí nuguajúnlú jmbu náa ajtsú enii rígi̱ rá.

4. Ndiéjunʼ eyoo gáthúu̱n rí i̱ndó mbuʼyamajkuíí Jeobá rá. (Apocalipsis 4:11.)

⁴ Nuʼni gaʼduunʼ dí mbuʼyamajkún xándú ga̱jma̱a̱ i̱ndó guʼyamajkuíí Jeobá. Dios niʼthúún israelitas dí i̱ndó gíʼmaa mbuyamajkuíí ikhaa (Deut. 5:6-10). Índo̱ Jesús niraʼnuu tsáʼkhá dí nigruiga̱ Gixa̱a̱, ikhaa niʼthí dí i̱ndó gíʼmaa mbuyamajkuííʼlu Jeobá (Mat. 4:8-10). Ikha jngóo tséʼyamajkhún xándú dí rígá náa guʼwá ndxajkun, ni má tséʼyamajkhún xa̱bu̱ numbaaʼ xóo mbá dios, tséʼniuu á mu nindxu̱u̱ bi̱ kayá edxu̱u̱, mbáa político, bi̱ gíʼdoo numuu náa deporte o náa ajmúú. Ikháanʼlu i̱ndó nduʼyamajkuíí Jeobá, bi̱ niʼniwíi xúgíʼ dí rígá (atraxnuu Apocalipsis 4:11).

5. Ndíjkha nduʼyamajkuíí eʼdi ga̱jma̱a̱ vida xó mbá rí mitsúʼkháan rá.

⁵ Nduʼyamajkuíí vida ga̱jma̱a̱ eʼdi xó mbá dí mitsúʼkháan. Ndíjkha rá. Numuu dí Jeobá naʼthí dí eʼdi nindxu̱u̱ vida. Rígi̱ nindxu̱u̱ mbá dí mitsaan dí naxnúlú Jeobá (Lev. 17:14). Timbá miʼtsu dí Jeobá niʼthún xa̱bu̱ dí ma̱ndoo muphu xúñún xujkhú ma̱ngaa niʼthún dí ragíʼmaa muphu eʼdi (Gén. 9:4). Nda̱wa̱á niʼthún mbu̱júu̱ rígi̱ israelitas índo̱ nixnúún Xtángoo ndrígóo (Lev. 17:10). Ma̱ngaa nákha siglo timbá niʼni dí cuerpo gobernante muthúún xúgíinʼ cristianos dí ragíʼmaa muphu eʼdi (Hech. 15:28, 29). Mangáanʼ nuʼnimbulú rígi̱ índo̱ nuraʼwíí xú káʼnii gíʼmaa maguma thanulú.b

6. Ndiéjunʼ gámbáyulú muʼnimbánii mu makuwáánʼ xó má e̱nda̱ʼa̱ Jeobá rá.

⁶ Nuʼnimbánii dí naʼthí náa Biblia ga̱jma̱a̱ numuu dí xúʼbulú xkawiʼ kayuʼ gajmiulúʼ eʼwíinʼ (Heb. 13:4). Apóstol Pablo naxnúlú consejo rígi̱: “Gunigámbaa xúgíʼ rí naguʼuun naʼni xuyala”. Ga̱jma̱a̱ ajngáa rígi̱ apóstol Pablo naʼthúlú dí gíʼmaa muguajún jmbu mu muʼnigámbáa xúgíʼ dí raʼkhí dí nagua̱ʼa̱ maʼni xuyulúʼ. Ikha jngóo, mbájkhu tséʼyalú o tséʼni mbá dí maʼni magua̱ʼa̱ muʼbúlú xkawiʼ kayuuʼ gajmiúlú mbáa (Col. 3:5; Job 31:1). Índo̱ nuraʼníí mbá tsáʼkhá xóo rígi̱, mbá nache̱ nuʼni gaʼduunʼ dí raʼkhí dí nundxaʼwamíjná o dí nuʼnilú rí maʼni muʼni gachíí xóo embájxulú gajmiúlú Dios.

7. Ndiéjunʼ gíʼmaa muʼni ga̱jma̱a̱ náa numuu rá.

⁷ Jeobá nandoo dí ‹muʼnimbulú ga̱jma̱a̱ xúgíʼ a̱jkiu̱lú› (Rom. 6:17). Ikha ga̱jma̱a̱ xtángoo mambáyulú má xúʼko̱ ga̱jma̱a̱ xándoo muraʼwíí ndiéjunʼ dí muʼnimbulú ga̱jma̱a̱ ndiéjunʼ dí na̱nguá (Is. 48:17, 18; 1 Cor. 6:9, 10). Nandulú muʼni xúgíʼ dí nanigu̱u̱ʼ Jeobá ga̱jma̱a̱ nandulú makumulú xóo nikumu̱u̱ bi̱ niʼnirámáʼ salmo rígi̱: “Nimbánuminaʼ rí manimbánuu má xúʼko̱ xtángoo ndrígáaʼ, asndu náa iwáá mbiʼi” (Sal. 119:112). Mú, Gixa̱a̱ mbaʼyaʼ má xúʼko̱ dí makáguabáanʼ mu xúguajúnlu jmbu ga̱jma̱a̱ dí niraʼwíí muʼni. Ndiéjunʼ eʼni rá.

NDIÉJUNʼ EJMUU GIXA̱A̱ MU MA̱NDOO MAKÁGUABÁANʼ RÁ.

8. Náa numuu dí Gixa̱a̱ naʼni dí xa̱bu̱ muxkulú rá.

⁸ Dí muxkulú. Mu makáguabáanʼ ga̱jma̱a̱ numuu dí niraʼwíí muʼnilú, Gixa̱a̱ najmuu dí muni gínáanʼlu ga̱jma̱a̱ dí mutsudáanʼlu. Ikhaa nandoo míkhulú, dí maʼni gachúu xóo embájxulú gajmiúlú Jeobá (1 Ped. 5:8). Numuu dí cristianos bi̱ nikúwá timbá siglo niraʼwíi muguajún jmbu, nithúún dí muradíin, nini gawúúnʼ asndu tikhun niradíin (Hech. 5:27, 28, 40; 7:54-60). Asndu má mbiʼi xúgi̱ Gixa̱a̱ naʼni dí muxkulú. Guáʼdaa xkri̱da dí nuraʼníí a̱ngiu̱lú bi̱ kúwíin náa Rusia ga̱jma̱a̱ náa i̱ʼwáʼ xuajin. Ma̱ngaa a̱ngiu̱lú nuraʼníí dí muxkhúún o nuraʼníí i̱ʼwáʼ xkujndu.

9. Atagíʼ mbá xkri̱da náa nasngájma dí gíʼmaa muraʼwíí tsumáá dí muʼni índo̱ tsékujmaa dí nutsudánʼ.

⁹ Dí tsékujmaa rí nutsudánʼ. Gixa̱a̱ raʼkháa i̱ndó naʼni dí muxkulú ma̱ngaa nagrui̱ga̱ tsáʼkhá rí tsékujmaa (Efes. 6:11). Guʼyáá xkridoo Bob, ikhaa nixtáa náa hospital numuu rí ndiyóoʼ maguma mbá operación mba̱a̱. Ikhaa niʼthúún médicos dí xáto̱ʼo̱o̱ kayuuʼ eʼdi. Bi̱ maʼniuu operar niʼthúu̱n dí mbaʼyamajkuu dí niraʼwíí. Mú dí wakhííʼ índo̱ bi̱ kaʼñúún nigúun, imba̱a̱ doctor nijkha gáʼyoo mu maʼthúu̱n dí muguaʼdáá xawii eʼdi á mu nariʼkhu̱u̱ xóo endxa̱ʼwáminaʼ. Mbáa doctor bugi̱ nikumu̱u̱ dí Bob mariʼkhuu xóo endxa̱ʼwáminaʼ á mu ndáwa̱a̱ mijngii mbáa bi̱ kaʼyoo. Mú Bob táriʼkhuu dí niraʼwíí maʼni, niwi̱ji̱ jmbu ga̱jma̱a̱ niʼthúu̱n dí tsíyoo mata̱ʼa̱a̱ʼ eʼdi tséʼniuu asndu ndiéjunʼ má gárígá nda̱wa̱á.

10. Ndíjkha rí gamíi endxaʼwamíjna̱ bi̱ tséni dí naniguʼ Jeobá rá. (1 Corintios 3:19, 20.)

¹⁰ Xóo endxaʼwamíjna̱ xa̱bu̱ numbaaʼ. Á mu nugíʼdi̱ nundxaʼwamíjna̱ xóo endxaʼwamíjna̱ xa̱bu̱ numbaaʼ ma̱ndoo maʼni dí xúʼni dí nandoo Jeobá ga̱jma̱a̱ manujnguramulú ikha ndrígóo (atraxnuu 1 Corintios 3:19, 20). “Ku̱ma̱ dí rígá náa numbaaʼ” naʼni dí xa̱bu̱ xúnimbu̱ún kuyáá Jeobá, nuni̱ i̱ndó rí nandún ikhiin. Guʼyáá dí nigíʼnuu congregación dí nirígá náa xuajin Pérgamo ga̱jma̱a̱ Tiatira. Tikhun cristianos niguáʼdiin nindxaʼwamíjna̱ xóo endxaʼwamíjna̱ bi̱ kúwíin mijngii, bi̱ nubúúnʼ xkawiʼ kayuuʼ gajmiún eʼwíinʼ ga̱jma̱a̱ nduyamajkhún xándú. Jesús nixnún mbá consejo gujkhuʼ a̱jma̱ congregación bugi̱, numuu rí niniña̱a̱nʼ dí makuwíin xa̱bu̱ náa nagimbíi̱n bi̱ mubúúnʼ xkawiʼ kayuuʼ gajmiún eʼwíinʼ (Apoc. 2:14, 20). Xúgi̱ ma̱ngaa, xa̱bu̱ numbaaʼ nuni̱ dí mundxaʼwamíjna̱ xóo ikhiin. Mbáa asndu bi̱ kuʼñúún o bi̱ nuniʼnúuʼ muthulú dí guʼni xó má nandoo a̱jkiu̱lú ga̱jma̱a̱ dí manújngurámulú ikha ndrígóo Jeobá. Mbáa asndu muthulú dí na̱nguá má nindxu̱u̱ raʼkhí rí nagua̱ʼa̱ maʼni xuyulú ga̱jma̱a̱ ikha dí na̱ʼkha̱ náa Biblia nindxu̱u̱ wayuu.

11. Ndiéjunʼ dí ragíʼmaa muʼnilú rá.

¹¹ Nguáná makumulú dí ikha rí naxnúlú Jeobá ndayóoʼ maʼni itháan kaʼwu. Mbáa asndu maʼndulú manujngurámulú “rí kiʼnirámáʼ ” (1 Cor. 4:6). Índo̱ nixtáá Jesús náa ku̱ba̱ʼ, bi̱ kuya̱ edxu̱u̱ nijngutíguíin náa tsáʼkhá rígi̱. Nixna ikha dí na̱nguá e̱ʼkha̱ náa Xtángoo rígi̱ niʼni dí xa̱bu̱ maku̱mu̱ún dí ra̱ʼkhá tháán gakhi̱i̱ munimbánii xtángoo ndrígóo Dios (Mat. 23:4). Mú Jeobá naʼthúlú kaʼwu náa ajngóo ga̱jma̱a̱ xuajñuu naʼthúlú kaʼwu dí gíʼmaa muʼni. Na̱nguá má eyóoʼ dí ikháanʼ muʼniraʼmáʼ imbo̱o̱ (Prov. 3:5-7). Ikha jngóo tsénujnguramulú itháan dí kiʼniraʼmáʼ náa Biblia ni má tséʼthalú imba̱a̱ ikha dí xóo nakumulú ikháanʼ dí gíʼmaa muni eʼwíinʼ.

12. Xú káʼnii ejmuu Gixa̱a̱ ku̱ma̱ rí minduwaʼ rá.

¹² Ku̱ma̱ rí minduwaʼ. Gixa̱a̱ najmuu “ku̱ma̱ minduwaʼ dí ragíʼdoo numuu” ma̱ngaa “dí narígá náa numbaaʼ rígi̱” mu maʼninduwiinʼ ga̱jma̱a̱ maʼniwaʼjíin xa̱bu̱ (Col. 2:8). Mbá xkri̱da, náa siglo timbá Gixa̱a̱ nijmuu ku̱ma̱ ndrígu̱ún xa̱bu̱ ga̱jma̱a̱ i̱ʼwáʼ xóo endxaʼwamíjna̱, dí nusngáa judíos rí na̱nguá e̱ʼkha̱ raʼthí náa Biblia ga̱jma̱a̱ dí cristianos gíʼmaa munimbánii xóó dí naʼthí náa Xtángoo ndrígóo Moisés. Rígi̱ nindxu̱u̱ ku̱ma̱ minduwaʼ numuu dí niʼni rí xa̱bu̱ xúyáá ndiéjunʼ dí itháán gíʼdoo numuu, rí mbuyáaʼ Jeobá náa phú na̱ʼkha̱ ku̱ma̱ rí gajkhun. Mbiʼi xúgi̱, Gixa̱a̱ najmuu tele, radio, Internet o náa redes sociales mu muthi dí xa̱bu̱ ñajunʼ xtáa kidxuuʼ náa xkujndu dí rígá ga̱jma̱a̱ nuthi dí raʼkhí ga̱jma̱a̱ numuu xa̱bu̱ ñajunʼ. Índo̱ nikuwáanʼ náa awúnʼ nandii COVID-19 nithi mbaʼa dí minduwaʼ.c Bi̱ nindxu̱lú testigos de Jeobá niʼni mbáníí ikha dí nixnúlú xuajñuu, rígi̱ nimbáyulúʼ mu xáxmiéjunlú ní má tájmúnlú xóo bi̱ nunimbún xúgíʼ dí nidxawíín (Mat. 24:45).

13. Ndíjkha ragíʼmaa muniʼñááʼ dí nimbá maʼni jngariga̱ánʼ rá.

¹³ Dí naʼni jngariga̱ánʼ. Gíʼmaa mbuʼyáá “ndiéjuunʼ dí itháan gíʼdoo numuu” (Filip. 1:9, 10). Dí naʼni jngariga̱ánʼ naʼni mandatígulú mbiʼi ga̱jma̱a̱ nánguá eʼnilú dí itháan gíʼdoo numuu. Dí nuʼnilú tsejtsí mbiʼi xóo dí muphiʼtsulú, muʼwanlú, muʼni gagimijná ga̱jma̱a̱ ñájunʼ ndrígulú ma̱ndoo maʼni jngariga̱ánʼ á mu i̱ndó rúʼko̱ eyulú muʼni (Luc. 21:34, 35). Ma̱ngaa tsejtsi mbiʼi nduʼyáá ga̱jma̱a̱ nuʼdxawíín xú káʼnii gi̱ʼdu̱u̱n xa̱bu̱ ga̱jma̱a̱ numuu dí xóo ku̱mu̱ún ma̱ngaa ga̱jma̱a̱ numuu política. Gíʼmaa muʼni tsiakimijna mu xáʼni jngariga̱ánʼ rígi̱. Numuu rí maʼni dí mugíʼdi̱i̱ mundxaʼwamíjna̱ o makumulú ga̱jma̱a̱ numuu rígi̱. Gixa̱a̱ najmuu mbá witsu enii rígi̱ mu maʼni guabáanʼ náa niraʼwíí muʼnilú dí májánʼ. Xúgi̱ guʼyáá ndiéjunʼ gámbáyulú mu ma̱ndoo muraʼníí rígi̱ ga̱jma̱a̱ muguajúnlu jmbu.

NDIÉJUNʼ MA̱NDOO MUʼNI MU MUGUAJÚN JMBU RÁ.

14. Ndiéjunʼ ma̱ndoo mambáyulú mu muguajún jmbu náa níjniúu Jeobá rá.

¹⁴ Gundxaʼwamíjna̱ náa numuu dí nixnaxímíjná ga̱jma̱a̱ nijngúlú iyááʼ. Niʼnilú numuu dí nandulú muʼni dí nandoo Jeobá. Garmáʼáan a̱jkia̱a̱nʼ ndiéjunʼ niʼni dí matayaa dí nitaxkamaa rí gajkhun. Nitatsiniʼ Jeobá, nitayáá xóo Ana̱a̱ʼ bi̱ xtáá mekhuíí ma̱ngaa nitagíʼdi̱i̱ nitayamajkuíí ga̱jma̱a̱ nindaaʼ xtayáá. Fe ndrígáʼ nijkha ra̱ja̱a̱, ikhaa nixkajxi̱i̱n mu matanga̱a̱ a̱jkia̱a̱nʼ náa xúgíʼ dí raʼkhí rí nitani̱. Nitatsíñaaʼ nitani̱ xúgíʼ dí Jeobá nawiyuuʼ, nitagíʼdi̱i̱ nitani̱ dí naniguuʼ ikhaa. Asndu niʼni̱i̱ a̱jkia̱a̱nʼ índo̱ nitayáá dí Dios niʼni mba̱a̱ a̱jkiu̱u̱n kaʼyaaʼ (Sal. 32:1, 2). Nitagíʼdi̱i̱ nidxuʼ reunión, nirathúún eʼwíinʼ xúgíʼ rí mitsaanʼ dí nidxuʼ rajmañaʼ. Xúgi̱ dí nitaxnájximinaʼ ga̱jma̱a̱ nijnguáan má náa iyááʼ nagrui̱ga̱ náa kamba̱a̱ʼ dí maʼni dí maraxtaa ga̱jma̱a̱ natani̱ tsiakiminaʼ mu xátatsíʼñánʼ (Mat. 7:13, 14).

15. Xú káʼnii embáyulú dí muʼnigajma̱a̱ ma̱ngaa mundxaʼwamíjna̱ di niraxnuu náa Ajngáa rawuunʼ Dios rá.

¹⁵ Gúʼnigajma̱a̱ ma̱ngaa gundxaʼwamíjna̱ di nuraxnuu náa Ajngáa rawuunʼ Dios. Mu mawi̱ji̱ jmbu mbá ixi̱ ndayóoʼ dí ajmu̱u̱ majngún asndu mi̱jnu̱ʼ. Ikháá má kayuuʼ mangáanʼ, á mu fe ndrígulú na’ni gujkhuʼ náa Ajngáa rawuunʼ Dios, muguajúnlu jmbu. Índo̱ mbá ixi̱ na̱jkha̱ ra̱ja̱a̱, ajmu̱u̱ ma̱ngaa na̱jkha̱ raʼni mba̱ʼo̱ ga̱jma̱a̱ nagujtuminaʼ itháán gakhi̱i̱ náa ku̱ba̱ʼ. Índo̱ nuʼnigajma̱a̱ ma̱ngaa nundxaʼwamíjna̱, fe ndrígulú naʼni itháan gujkhuʼ ga̱jma̱a̱ naʼni kañiiʼ a̱jkiu̱lú dí kiʼsngáa ndrígóo Dios nindxu̱u̱ itháan májánʼ (Col. 2:6, 7). Gundxaʼwamíjna̱ xú káʼni nimbáñún xa̱bi̱i̱ Jeobá bi̱ nikúwíin nákha wajyúuʼ, ikha, consejo ga̱jma̱a̱ dí niñewu̱u̱n. Mbá xkri̱da, Ezequiel tsumáá ndiʼyoo náa mbá visión xú káʼni mbá ángel nagiéwan tsumáá templo. Visión raʼkháa i̱ndó nimbáyúu Ezequiel mu maʼni gújkhúʼ fe ndrígóo ma̱ngaa naʼsngúlú mangáanʼ ga̱jma̱a̱ xú káʼni gíʼmaa mbuʼyamajkuíí dí naʼthúlú Jeobá, rí gíʼmaa muʼni mu mbuʼyamajkuíí xó má kaʼyoo (Ezeq. 40:1-4; 43:10-12).d Mangáanʼ phú nambáyulú muríyaaʼ mbiʼi mu muʼnigajma̱a̱ dí tséʼngulú gakruʼulú mbá nache̱ dí naʼthí náa Ajngáa rawuunʼ Dios ga̱jma̱a̱ gundxaʼwamíjna̱ dí niraxnuu.

16. Xú káʼnii nimbáyúu Bob dí mawi̱ji̱ jmbu a̱jkiu̱u̱n rá. (Salmo 112:7.)

¹⁶ Guʼni dí a̱jkiu̱lú mawi̱ji̱ jmbu. Náa mbá ajmúú rey David niʼthí dí nditháan xániñuuʼ maʼndoo kaʼyoo Jeobá. Ikhaa niʼthí: “A̱jkiu̱nʼ wíji̱ jmbu, oh, Dios” (Sal. 57:7). Mangáanʼ ma̱ndoo muguaʼdaa mbá a̱jkiu̱lú dí mawi̱ji̱ jmbu kaʼyoo Jeobá dí maku̱mu̱u̱ kaʼyoo káxi̱ (atraxnuu Salmo 112:7).e Guʼyáá mbu̱júu̱ xkri̱doo Bob, bi̱ niʼtámíjná ga̱jma̱a̱ numuu náa kutriga̱ 9. Xú káʼni nimbáyúu dí a̱jkiu̱u̱n mawi̱ji̱ jmbu rá. Índo̱ nitháán dí muguaʼdáá eʼdi á mu mbaʼyóoʼ, ikhaa niriʼña̱a̱ dí á mu narígá xígi̱ kaʼnii, ikhaa maʼga̱a̱ mbá nache̱. Bob eʼthí: “Nimbá miʼtsu táʼni a̱jma̱ a̱jkiu̱nʼ ni má táxmiejunʼ numuu dí gárígá nda̱wa̱á”.

17. Ndiéjunʼ ejmañulú dí nigíʼnun Bob rá. (Atayáá ma̱ngaa xtiʼkhu.)

¹⁷ Bob tági̱ʼthu̱u̱n maxtáa náa hospital mu maraʼwíí dí mawi̱ji̱ jmbu, ikhaa niraʼwíí nákha wapháá. Timbá dí niraʼwíí maʼni nindxu̱u̱ dí nindoo rí Jeobá maxtáa gagi. Ragajma, niʼnigajma̱a̱ tsumáá dí eʼthí náa Biblia ga̱jma̱a̱ náa i̱yu̱lúʼ numuu vida ndrígulú ga̱jma̱a̱ eʼdiulú dí mitsúʼkháan. Ga̱jma̱a̱ nda̱wa̱á, ikhaa ndiʼyoo gajkhun dí Jeobá maʼni tsakurámuu á mu ikhaa nanimbo̱o̱ dí eʼthí Jeobá. Ikhaa xóo má Bob, mangáanʼ ma̱ndoo mawi̱ji̱ jmbu a̱jkiu̱lú tséʼniuu asndu ndiéjunʼ má tsáʼkhá dí gúraʼníí.

18. Ndiéjunʼ eʼsngúlú náa xkridoo Barac rá. (Atayáá xtiʼkhu rí na̱ʼkha̱ náa timbá ináa.)

¹⁸ Gákumulú kuʼyáá Jeobá. Gundxaʼwamíjna̱ náa xkridoo juez Barac ga̱jma̱a̱ xú káʼni nigájnuu májánʼ numuu dí niraʼwíí maʼnimbo̱o̱ kaʼyoo Jeobá. Maski ajndu mbiʼi rúʼko̱ israelitas takúwi̱i̱n xawii mu magún magi̱ʼdu̱u̱n, táguaʼdáa escudo ni ma lanza, maski ajndu xúʼko̱ Jeobá niʼthúu̱n Barac dí maʼga gági̱ʼdu̱u̱ ga̱jma̱á Sísara gajmíi̱n soldados cananeos bi̱ seguro guáʼdaa ajua̱nʼ mu magi̱ʼdu̱u̱n (Juec. 5:8). Profetisa Débora niʼthúu̱n Barac dí magajtaa náa kúbá Tabor náa xkua̱ mu magi̱ʼdu̱u̱ gajmíi̱n Sísara ga̱jma̱a̱ mbá 900 carro dí gíʼdoo ikhaa. Maski ajndu nakujmaa dí náa xkua̱ carros ma̱ndoo maʼngu̱u̱n, mú Barac niʼnimbo̱o̱ dí nijuiʼtháán. Índo̱ soldados kúwíin ruguájtha̱án náa kúbá, Jeobá nikuʼmaa mbá ruʼwa mbiʼ. Carro nijuiʼduma̱ʼán náa iyaʼ ku̱ba̱ʼ ga̱jma̱a̱ Jeobá niʼni dí Barac maʼngo̱o̱ (Juec. 4:1-7, 10, 13-16). Xúʼko̱ má kayuuʼ mangáanʼ: Jeobá maʼni dí maʼngulú á mu nakumulú kuʼyáá ga̱jma̱a̱ nuʼnimbulú ikha dí naxnúlú náa xuajñuu (Deut. 31:6).

GUʼNI TSIAKIMIJNA MUGUAJÚNLU JMBU

19. Náa numuu dí ikháán nandaaʼ mariejún má xúʼko̱ jmbu rá.

¹⁹ Ndayóoʼ muguajúnlu má xúʼko̱ jmbu numuu rí kuwáanʼ náa numbaaʼ rígi̱ (1 Tim. 6:11, 12; 2 Ped. 3:17). Xúniʼñáánʼ dí makáguabáanʼ eʼni dí muxkulú, dí tsékujmaa rí nutsudánʼ, xóo endxaʼwamíjna̱ xa̱bu̱ numbaaʼ, ku̱ma̱ rí minduwaʼ ga̱jma̱a̱ dí naʼni jngariga̱ánʼ (Efes. 4:14). Guguajúnlu jmbu, xúbangayimíjna̱lu ga̱jma̱a̱ guʼni tsiakimijna má xúʼko̱ maʼndulú kuʼyáá Jeobá ga̱jma̱a̱ muʼnimbulú dí ikhaa na̱nda̱ʼa̱ muʼnilú. Mú, ma̱ngaa gíʼmaa makru̱ʼu̱lú kuʼñúún eʼwíinʼ. Náa imba̱a̱ artículo mbuʼyáá xú káʼnii Jeobá ga̱jma̱a̱ Jesús nindxu̱ún bi̱ itháan nakruʼúún kuyulú ga̱jma̱a̱ mbuʼyáá xú káʼnii ma̱ndoo mbuʼyaridúún.