ARTÍCULO RÍ MUʼNIGAJMAA 25
Bi̱ kuya̱ edxu̱u̱, guyaridáá Gedeón
‹Mbaʼyóoʼ mbiʼi mu ma̱ta̱ ga̱jma̱a̱ numuu Gedeón› (HEB. 11:32).
AJMÚÚ 124 Ganindxu̱lú mbáa xa̱bu̱ jmbii
RÍ MUʼNIGAJMAAa
1. Xó má naʼthí náa 1 Pedro 5:2, ndiéjunʼ ñajunʼ mitsaanʼ guaʼdáá bi̱ kuya̱ edxu̱u̱ rá.
JEOBÁ nixnún ñajunʼ bi̱ kuya̱ edxu̱u̱ dí muñewu̱u̱n mugiu̱u̱ bi̱ nandoo kaʼñún. Ikhiin nduyáá dí gíʼdoo numuu mumbañún a̱ngiu̱ún ga̱jma̱a̱ nunimi̱jna̱ mani̱ndxu̱ún míjíinʼ báxtúu (Jer. 23:4; atraxnuu 1 Pedro 5:2). ¡Ra̱ʼkhá tháán májánʼ dí kúwíin a̱ngiu̱lú náa congregación bi̱ nuñajunʼ gakhi̱i̱ wéñuʼ!
2. Xú káʼnii tikhu xkujndu eraʼníí tikhun a̱ngiu̱lú bi̱ kuya̱ edxu̱u̱ rá.
2 A̱ngiu̱lú bi̱ kuya̱ edxu̱u̱ nuraʼníí mbaʼa xkujndu índo̱ kúwá runimbánii ñajunʼ ndrígu̱ún. Mbá xkri̱da, ndayóoʼ muñajunʼ gakhi̱i̱ mu muñewu̱u̱n bi̱ kúwá náa congregación. Guʼyáá dí nigíʼnuu mbáa ndxájulú bi̱ kayá edxu̱u̱ bi̱ mbiʼyuu Tony, bi̱ na̱ʼkha̱ náa Estados Unidos. Ikhaa ni̱jkha̱nú ndiʼyoo dí ndayóoʼ mbaʼyoo á mu maʼngo̱o̱ maʼni i̱ʼwáʼ ñajunʼ dí makhánáá. Tony naʼthí: “Índo̱ nigi̱ʼdu̱u̱ nandii COVID-19, nirígá wéñuʼ ñajunʼ náa magajnúu awan xóo marigá reunión ga̱jma̱a̱ náa miʼtáraʼa, ga̱jma̱a̱ ikhúún nagrigu xúgíʼ ñajunʼ dí nixnuʼ. Maski ajndu naniminaʼ, mú rígá má xúʼko̱ dí maguma. Índo̱ ni̱jkha̱ ranújngoo mbiʼi, nánguá egúxnuu xúgíʼ mbiʼi Biblia, nánguá enigajma̱a̱ mbáwun ga̱jma̱a̱ nánguá etajkáan xóo gíʼmaa”. Imba̱a̱ ndxájulú bi̱ mbiʼyuu Ilir bi̱ na̱ʼkha̱ náa Kosovo, niraʼnuu i̱mba̱ xkujndu, numuu dí ikhaa xtáa náa xuajen dí narígá guerra naʼniuu mingíjyúuʼ maʼnimbánuu ikha dí nakhánáá náa xuajñuu Jeobá. Ikhaa naʼthí: “Índo̱ a̱ngiu̱lú bi̱ kúwá náa Betel nithu̱nʼ dí mambáñún a̱ngiu̱lú bi̱ kúwá náa rígá gamíi, nimíñúʼ wéñuʼ. Niʼniuʼ gakhi̱i̱ rí xámiñuʼ ga̱jma̱a̱ asndu niku̱mu̱ʼ rí ikha dí nikhánuʼ xáyambáá wéñuʼ”. Ga̱jma̱a̱ mbáa misionero bi̱ na̱ʼkha̱ náa Asia bi̱ mbiʼyuu Tim niʼniuu mingíjyúuʼ wéñuʼ maʼnimbánuu xúgíʼ ñajunʼ dí gíʼdoo. Ikhaa niʼthí: “Nguáná niʼni néʼngo̱ʼ wéñuʼ”. Ndiéjunʼ gándoo muni a̱ngiu̱lú bi̱ kuya̱ edxu̱u̱ mu maʼngu̱u̱n muraʼníí xkujndu xóo rígi̱ rá.
3. Ndíjkha gíʼdoo numuu dí xúgiáánʼ mbuʼyáá ndiéjunʼ eʼsngúlú xkri̱da ndrígóo Gedeón rá.
3 A̱ngiu̱lú bi̱ kuya̱ edxu̱u̱ ma̱ndoo majmañún wéñuʼ náa xkri̱da ndrígóo Gedeón (Heb. 6:12; 11:32). Ikhaa niñewu̱u̱n ga̱jma̱a̱ nixnún ikha bi̱ nikúwá náa xuajñuu Dios (Juec. 2:16; 1 Crón. 17:6). A̱ngiu̱lú bi̱ kuya̱ edxu̱u̱ rí mbiʼi xúgi̱, guaʼdáá ñajunʼ xó má dí nigiʼdoo Gedeón, dí muñewu̱u̱n bi̱ kúwá náa xuajñuu Dios náa mbiʼi mingíjyúuʼ wéñuʼ (Hech. 20:28; 2 Tim. 3:1). Ikha jngóo rígá mbaʼa dí ma̱ndoo majmañún á mu nduyáá xú káʼnii ñajuunʼ dí nigruigú dí ndiʼyoo maʼngo̱o̱ maʼni, xóo ninimbo̱o̱ ga̱jma̱a̱ xóo niʼngo̱o̱ Gedeón. Ma̱ngaa, xkrida̱ ndrígóo Gedeón mambáñún xúgín bi̱ kúwá náa congregación mbuyáá dí gíʼdoo numuu ñajuunʼ dí nuni̱ bi̱ kuya̱ edxu̱u̱ ga̱jma̱a̱ dí mumbañún ga̱jma̱a̱ xúgíʼ a̱jkiu̱ún (Heb. 13:17).
ÍNDO̱ NAʼNI MINGÍJYÚUʼ MANINDXU̱LÚ XA̱BU̱ WABAAʼ GA̱JMA̱A̱ RÍ MBUʼYÁÁ ASNDU NÁÁ EʼNGO̱O̱ MUʼNI
4. Xú kaʼnii nisngájma Gedeón dí ninindxu̱u̱ xa̱bu̱ guabaaʼ ga̱jma̱a̱ dí ndiʼyoo asndu náá eʼngo̱o̱ maʼni mbá ñajunʼ xá.
4 Gedeón ninindxu̱u̱ xa̱bu̱ wabaaʼ ga̱jma̱a̱ ndiʼyoo asndu náá eʼngo̱o̱ maʼni mbá ñajunʼ.b Índo̱ mbáa ángel niʼthúu̱n dí Jeobá niraʼwíi ikhaa mu maʼni káwíin israelita náa ñawúúnʼ madianitas, ikhaa nisngájma rí nindxu̱u̱ xa̱bu̱ waba̱a̱ʼ índo̱ niʼthí: “Xa̱bu̱ bi̱ gajmíʼ ikhúún na̱nguá guaʼdáá wéñuʼ numún bi̱ naguwaʼ náa eji̱i̱n Manasés ga̱jma̱a̱ ikhúún ragúʼdoʼ numuʼ náa goʼwóo anu̱ʼ” (Juec. 6:15). Ikhaa nikumu̱u̱ dí rakáʼyoo maʼni ñajunʼ rúʼko̱. Mú, Jeobá ndiʼyoo dí ikhaa maʼngo̱o̱ maʼni, numuu dí ikhaa má nimbáyúu ikha jngóo Gedeón niʼngo̱o̱.
5. Nguáná migamíi rí xánindxu̱ún xa̱bu̱ guabiinʼ ni má rí xúyáá nguáthá eʼngo̱o̱ muni ñajunʼ bi̱ kuya̱ edxu̱u̱ rá.
5 A̱ngiu̱lú bi̱ kuya̱ edxu̱u̱, nuni̱ xó má eʼngo̱o̱ rí mbuyáá asndu náá eʼngo̱o̱ muni mbá ñajunʼ ga̱jma̱a̱ nindxu̱ún xa̱bu̱ guabiinʼ (Miq. 6:8; Hech. 20:18, 19). Na̱nguá enimbaʼumijna ga̱jma̱a̱ rí najmiin nuni̱ ni má rí naʼngu̱u̱n nuni̱, ma̱ngaa índo̱ nakiéʼkhún o na̱nguá egájnuu májánʼ rí nuni̱, na̱nguá ekiʼníin kuyamijná. Mú, nguáná migamíi rí xánindxu̱ún xa̱bu̱ guabiinʼ ni má xúyáá asndu náá eʼngo̱o̱ muni. Guʼthá a̱jma̱ xkri̱da. Mbáa ndxájulú bi̱ kayá edxu̱u̱ nagruigú mbaʼa ñajunʼ mú nda̱wa̱á na̱jkha̱nú ndaʼyoo dí na̱nguá eʼngo̱o̱ gáʼnimbánuu xúgíʼ. Ga̱jma̱a̱ imba̱a̱, mbáa nutha numáá ga̱jma̱a̱ mbá ñajunʼ dí niʼni o nutháán dí ra̱ʼkhá tháán májánʼ niʼni mbá ñajunʼ. Á mu narígá xúʼko̱, xú káʼnii gándoo gambáñún a̱ngiu̱lú bi̱ kuya̱ edxu̱u̱ xkri̱da ndrígóo Gedeón rá.
Xó má Gedeón, a̱ngiu̱lú bi̱ kuya̱ edxu̱u̱ bi̱ nduyáá asndu náá eʼngo̱o̱ muni nuthúún eʼwíinʼ mumbañún, mbá xkri̱da índo̱ nuriyaʼ awan mutaraʼa ga̱jma̱a̱ carrito. (Atayáá kutriga̱ 6).
6. Xú káʼnii gándoo a̱ngiu̱lú bi̱ kuya̱ edxu̱u̱ mbuyaridáá Gedeón dí niʼthún eʼwíinʼ mumbayíí rá. (Atayáá xtiʼkhu ma̱ngaa.)
6 Guthu̱u̱n eʼwíinʼ mumbáyálá. Xa̱bu̱ bi̱ ndaʼyoo asndu nguáthá eʼngo̱o̱ maʼni, ndaʼyoo dí xáʼngo̱o̱ maʼni xúgíʼ. Numuu rí Gedeón ndiʼyoo dí xáʼngo̱o̱ mbáwíi maʼni xúgíʼ, ikha jngóo niʼthún eʼwíinʼ mumbayíí (Juec. 6:27, 35; 7:24). A̱ngiu̱lú bi̱ nundxaʼwáá májánʼ edxu̱ún nuni̱ xúʼko̱ ma̱ngaa. Tony, bi̱ niʼthá náa kutriga̱ a̱jma̱, naʼthí: “Ga̱jma̱a̱ numuu rí xóo nigaju̱u̱n, ikhúún nagruígú ñajunʼ rí asndu nguáná tséʼngoʼ gánimbánuu. Ikha jngóo niraʼwíí matha̱ ga̱jma̱a̱ numuu rí mbuʼyáá nguáthá eʼngo̱o̱ muʼni náa nunigájma̱a̱xu mbá guʼwáanʼxu, ga̱jma̱a̱ nithu̱u̱n a̱ʼgiu̱ʼ maʼthúnʼ xóo endxaʼwáminaʼ ikhaa. Ga̱jma̱a̱ nitanga̱án ndi̱yo̱o̱ video dí rígá náa jw.org rí kayá edxu̱u̱ Tal como Jesús, capacitemos a otros y confiemos en ellos”. Tony nigíʼdu̱u̱ niʼthún eʼwíinʼ mumbayíí, ikhaa naʼthí ndiéjunʼ nirígá nda̱wa̱á: “Náa congregación nirígá xúgíʼ májánʼ, ga̱jma̱a̱ rí xúgi̱ gúʼdoʼ itháan mbiʼi mani i̱ʼwáʼ rí mambáyuʼ mambájxuʼ itháan gajmuʼ Jeobá”.
7. Xú káʼnii gándoo mbuyaridáá Gedeón a̱ngiu̱lú bi̱ kuya̱ edxu̱u̱ índo̱ mbáa naʼthá numún xá. (Santiago 3:13.)
7 Xakiʼnáá á mu nutha numaaʼ. Mbáa maʼni makiʼnáa mbáa bi̱ kayá edxu̱u̱ á mu nutha numáá. Mú xkri̱da ndrígóo Gedeón ma̱ndoo mambáñún. Ikhaa ni̱jkha̱nú ndiʼyoo dí na̱nguá ninindxu̱u̱ xa̱bu̱ jmbii, ga̱jma̱a̱ índo̱ xa̱bu̱ bi̱ naguwáʼ náa eji̱i̱n Efraín nitha̱ numáá, na̱nguá nikiʼnáa (Juec. 8:1-3). Dí phú niʼni ninindxu̱u̱ xa̱bu̱ guabaaʼ ga̱jma̱a̱ niʼdxawun dí nithi, ga̱jma̱a̱ ajngáa guabaʼ dí niʼthí niʼni rí ni xakiʼníi kuyáá. A̱ngiu̱lú bi̱ kuya̱ edxu̱u̱ bi̱ najmañún nindxu̱ún xóo Gedeón. Índo̱ mbáa nakiʼnáa kaʼñúún, ikhiin nudxawíín májánʼ ga̱jma̱a̱ nuriʼña̱a̱ ga̱jma̱a̱ ajngáa guabaʼ (atraxnuu Santiago 3:13). Índo̱ ikhiin nuni xúʼko̱, nayambáá rí marigá dí tsímáá náa congregación.
8. Xú káʼnii gíʼmaa muthi a̱ngiu̱lú bi̱ kuya̱ edxu̱u̱ índo̱ nuxnún gamajkhu ikhiin xá. Arathá mbá xkri̱da.
8 Guxna̱a̱ gamajkhu Jeobá. Índo̱ nixnáá gamajkhu Gedeón numuu rí niʼngo̱o̱ nixmínaʼ gajmíi̱n’ madianitas, ikhaa niʼni rí israelita muxnáá gamajkhu Jeobá (Juec. 8:22, 23). Xú káʼnii gándoo a̱ngiu̱lú bi̱ kuya edxu̱u̱ mbuyaridáá xá. Dí muxnáá xúgíʼ gamajkhu Jeobá índo̱ rígá dí najmii nuni (1 Cor. 4:6, 7). Mbá xkri̱da, á mu nutháán mbáa bi̱ kayá edxu̱u̱ dí ra̱ʼkhá tháán májánʼ eʼsngáa, ikhaa ma̱ndoo mariʼña̱a̱ dí ikhaa niʼthí nindxu̱u̱ dí na̱ʼkha̱ náa Ajngá rawuunʼ Dios ga̱jma̱a̱ rí xúgiánʼ najmañulúʼ wéñuʼ numuu rí xuajñuu Jeobá naʼsngúlú. Májánʼ gáʼni rí nguáná a̱ngiu̱lú bi̱ kuya̱ edxu̱u̱ murajximijna á mu rí xóo nusngáa nuxnáá gamajkhu Jeobá o i̱ndó naʼni rí makhánún gamajkhu ikhiin. Gundxaʼwamijná dí nigíʼnuu ndxájulú bi̱ mbiʼyuu Timoteo. Índo̱ nitháán manindxu̱u̱ bi̱ kayá edxu̱u̱, ninigu̱u̱ maxná discurso público. Ikhaa naʼthí: “Nákha ginii naniratoo mba̱a̱ dí matha̱ índo̱ nagíʼdu̱u̱ ga̱jma̱a̱ najmuʼ mbaʼa xkri̱da, ikha jngóo a̱ngiu̱lú nuthu̱nʼ dí raʼkhá tháán májánʼ etha. Mú itháan má nixnuʼ gamajkhu ikhúún ki xóo Jeobá o dí na̱ʼkha̱ náa Biblia”. Nda̱wa̱á, Timoteo ni̱jkha̱nú ndiʼyoo dí ndiyóoʼ mariʼkhu̱u̱ xóo eʼsngáa mu xútháán i̱ndó ikhaa dí májánʼ wéñuʼ eʼthí (Prov. 27:21). Xú káʼnii nirígá nda̱wa̱á rá. Ikhaa niʼthí: “Rí xúgi̱ a̱ngiu̱lú nuthu̱nʼ dí discurso dí naxna̱ nimbáñún maʼngu̱u̱n ga̱jma̱a̱ xkujndu dí guaʼdáá, dí maʼngu̱u̱n muraʼníí mbá tsaʼkhá o rí nakumu̱ún dí kúwá itháan mijngii náa Jeobá. Itháan má nadxuʼ índo̱ nadxawun nuthu̱nʼ xúʼko̱ ki xóo dí nuxnuʼ gajmajkhu nákha tsiguʼ kidííʼ”.
ÍNDO̱ NAʼNI MINGÍJYÚUʼ RÍ XÁMÍÑÚLÚ GA̱JMA̱A̱ RÍ MUNIMBULÚ
Gedeón niʼnimbo̱o̱ ga̱jma̱a̱ niʼni nguéjmi̱i̱n soldados ndrígióo; niguanún mbá 300 xa̱bekha bi̱ nisngajma dí kúwíin xawii (Atayáá kutriga̱ 9).
9. Nguáná ndiyóoʼ dí manimbo̱o̱ ga̱jma̱a̱ dí xámíñú Gedeón rá. (Atayáá xtiʼkhu dí na̱ʼkha̱ náa timbá ináa.)
9 Nda̱wa̱á rí Jeobá nigíiʼ Gedeón bi̱ mayéʼga̱ edxu̱u̱, ndiyóoʼ masngájma dí nanimbo̱o̱ ga̱jma̱a̱ dí xámíñuu. Ikhaa nikháná mbá ñajunʼ rí migamíi maʼni: Rí maʼnigámbáa altar ndrígóo Baal dí gíʼdoo anu̱u̱ (Juec. 6:25, 26). Nda̱wa̱á, Gedeón nigímbíin mbaʼin wéñuʼ soldado, ga̱jma̱a̱ a̱jma̱ nuthu̱ Jeobá niʼthúu̱n dí maʼthún magu̱ún mu maʼni ngújmi̱i̱ (Juec. 7:2-7). Nda̱wa̱á kayuʼ, Jeobá niʼtáñajuunʼ dí tikhu nduʼun maxmínaʼ gajmíi̱n xa̱bu̱ sia̱nʼ (Juec. 7:9-11).
10. Nguáná migamíi maʼniuu mingíjyúuʼ maʼnimbo̱o̱ mbáa bi̱ kayá edxu̱u̱ rá.
10 Bi̱ kuya̱ edxu̱u̱ gíʼmaa makuwá xawii manimbu̱ún (Sant. 3:17). Índo̱ mbáa bi̱ kayá edxu̱u̱ nanimbo̱o̱, naʼnimbánuu ga̱jma̱a̱ xúgíʼ a̱jkiu̱u̱n ikha dí na̱ʼkha̱ náa Biblia ga̱jma̱a̱ dí naxná xuajñuu Dios, xúʼko̱ naniñuu mbá májánʼ xkri̱da náa eʼwíinʼ. Mú, mbáa nguáná naʼni mingíjyúuʼ maʼnimbo̱o̱ ga̱jma̱a̱ naʼniuu mingíjyúuʼ mbaʼyoo xúgíʼ ikha dí naʼkha̱nú. Mbáa nguáná narajximinaʼ á mu manindxu̱u̱ májánʼ dí maʼnimbánuu mbá ikha dí nakhánáá. O mbáa mutháán maʼni mbá dí asndu migamíi maʼga̱ guʼwá ejua̱nʼ. Índo̱ narígá xúʼko̱, xú káʼnii gándoo guyaridáá dí ninimbo̱o̱ Gedeón a̱ngiu̱lú bi̱ kuya̱ edxu̱u̱ rá.
11. Ndiéjunʼ gándoo gambáñún bi̱ kuya̱ edxu̱u̱ rí manimbu̱ún rá.
11 Gu̱ya̱a̱ máján xú káʼnii phú nindxu̱u̱ ikha ga̱jma̱a̱ gunimbaníí. Dios niʼthúu̱n Gedeón xú káʼnii gáʼni gámbáa altar dí niʼni anu̱u̱, náá gáʼni altar ndrígóo Jeobá ga̱jma̱a̱ xú káʼnii xujkhúʼ gaxnájxi̱i̱. Gedeón na̱nguá niʼthí náá numuu gáʼni xúʼko̱, ikhaa mbá nacha̱ niʼnimbánuu. Rí mbiʼi xúgi̱, a̱ngiu̱lú bi̱ kuya̱ edxu̱u̱ nudrigú ikha dí naxná xuajñuu Jeobá índo̱ nakhánú carta, narígá anuncio ma̱ngaa ga̱jma̱a̱ náa iʼwáʼ ikha dí nakhánúún. Xúgí rígi̱ narígá numuu rí mañewu̱u̱n ikhiin ma̱ngaa rí xóo nambájxu̱u̱n gajmiún Dios. Numuu dí a̱ngiu̱lú bi̱ kuya̱ edxu̱u̱ nunimbánii kuduun ikha dí nakhánúú náa xuajñuu Jeobá ikha jngóo nandulúʼ kuʼñúúnʼ wéñuʼ. Ga̱jma̱a̱ numuu dí ikhiin nunimbu̱ún, xúgínʼ bi̱ kúwá náa congregación nambáñun (Sal. 119:112).
12. Xú káʼnii gúnimbaníí bi̱ kuya̱ edxu̱u̱ dí naʼthí náa Hebreos 13:17 índo̱ xuajñuu Jeobá naʼthí dí maxtiʼkhu̱u̱ tikhu rá.
12 Gakuwáan xawii mudrígú dí naxtiʼkhu̱u̱. Garmaʼáanʼ a̱jkiu̱lú dí Jeobá niʼthúu̱n Gedeón maguanúu gajmíi̱n ngújmiin soldado ndrígióo (Juec. 7:8). Mbáa ikhaa nidxaʼwáminaʼ: “Lá ndayóoʼ mani xúʼko̱ ráʼ. Lá magajnúu májánʼ á mu nani xúʼko̱ ráʼ.” Maski ajndu xúʼko̱, Gedeón ninimbo̱o̱. Xú káʼnii eyaridáá ikhaa a̱ngiu̱lú bi̱ kuya̱ edxu̱u̱ rá. Índo̱ xuajñuu Jeobá naʼthí dí rígá dí naxtiʼkhu̱u̱ ikhiin nunimbánii (atraxnuu Hebreos 13:17). Mbá xkri̱da, nákha 2014, a̱ngiu̱lú Cuerpo Gobernante niriʼkhu̱u̱ xóo nini ga̱jma̱a̱ mbújkha̱a̱ dí naguma ga̱jma̱a̱ Guʼwá náa na̱jkua̱ reunión ga̱jma̱a̱ Asamblea (2 Cor. 8:12-14). Nákha ginii, nakanatiʼñún mbújkha̱a̱ a̱ngiu̱lú muni salón ndrígu̱ún ga̱jma̱a̱ nda̱wa̱á ikhiin gíʼmaa muxnaxi̱i̱ mbújkha̱a̱ rúʼko̱. Mú rí xúgi̱, nuruwa̱a̱ mbóó mbújkha̱a̱ dí nuxna a̱ngiu̱lú bi̱ kúwá náa xúgíʼ numbaaʼ mu muni náa ndayóoʼ Guʼwá dí magimbáánʼ, tséʼniuu má asndu nguáthá mbújkha̱a̱ exna a̱ngiu̱lú náa maguma guʼwá. Índo̱ mbáa ndxájulú bi̱ kayá edxu̱u̱ bi̱ mbiʼyuu José ndiʼyoo dí xóo nixtiʼkhuu rígi̱, ikhaa nidxaʼwáminaʼ: “Magajnúu májánʼ awan rúʼko̱ náa i̱ʼwáʼ xuajen, mú gi̱jyooʼ xándoo. Ma̱ta̱ya̱a̱ má, xáguma nimbá Guʼwá náa magimbáánʼ”. Mú, maski ajndu xúʼko ikhaa nigruigú má májánʼ imba̱ awan rígi̱. Náá numuu rá. Ikhaa naʼthí: “Nirmaʼáanʼ a̱jkiu̱n dí naʼthí náa Proverbios 3:5, 6, dí ndayóoʼ maku̱mu̱ʼ kayo̱o̱ Jeobá. ¡Ga̱jma̱a̱ ndi̱yo̱o̱ dí ra̱ʼkhá tháán májánʼ dí nirígá nda̱wa̱á! Raʼkháa i̱ndó niguma i̱ʼwáʼ Guʼwá náa magimbáánʼ, ma̱ngaa nijmañuxu dí xúgiánʼ ma̱ndoo muyambáá mbá chíʼgíiʼ mu magumambánii dí nuxná”.
Ma̱ndoo muʼtáraʼa maski ajndu kuwáán’ náa nanguá eniñulú’ mu’ni ñajuun’ ndrígúlú. (Atayáá kutriga 13).
13. Ndiéjunʼ ni̱jkha̱nú ndiʼyoo Gedeón rá. b) Ndiéjunʼ gándoo muni a̱ngiu̱lú bi̱ kuya̱ edxu̱u̱ mu manindxu̱ún xóo Gedeón rá. (Atayáá xtiʼkhu ma̱ngaa.)
13 Xamíñala muni ñajuunʼ Jeobá. Gedeón ninimbo̱o̱ kaʼyoo Jeobá maski ajndu nirígá migamíi ga̱jma̱a̱ ikhaa nimíñuu (Juec. 9:17). Nda̱wa̱á dí Jeobá niʼni mbaʼyoo dí gajkhun mambáyúu, Gedeón ni̱jkha̱nú ndiʼyoo dí Dios má gambáyúu mañewu̱u̱n xuajñuu. A̱ngiu̱lú bi̱ ku̱ya̱ edxu̱u̱ bi̱ kúwá náa xuajen dí tséniñu̱u̱n mutaraʼa nindxu̱ún xóo Gedeón. Tsémiñún muriyaʼ awan xóo marigá reunión ga̱jma̱a̱ nuyegu̱u̱n edxu̱u̱ náa miʼtáraʼa maski ajndu migamíi muxudi̱i̱n guʼwá ejua̱n, muniu̱u̱n mbaʼa graxe̱, muxkawíinʼ náa nuñajunʼ o maguma gíníi wéñuʼ.c Índo̱ gáʼni majphú mba̱a̱ gaʼkhu, a̱ngiu̱lú bi̱ kuya̱ edxu̱u̱ mbaʼyóoʼ dí xámíñúún índo̱ gunimbu̱ún ikha dí gakhánún tséʼniuu má asndu ndiéjunʼ guraʼníí. Mbáa ikha dí gakhánún manindxu̱u̱ xú káʼnii guʼtáraʼa ajngáa gakhi̱i̱ rí manindxu̱u̱ asndu xóo eʼtsi mbaʼu. O mbáa manindxu̱u̱ tikhu ikha dí ndayóoʼ muʼni mu makáwáanʼ índo̱ Gog ndrígóo Magog gáʼni gináanʼlu (Ezeq. 38:18; Apoc. 16:21).
ÍNDO̱ GÁʼNI MINGÍJYÚUʼ MAʼNGAAʼ
14. Ndiéjunʼ ndiyóoʼ maʼni Gedeón maski ajndu niʼni néʼngo̱o̱ rá.
14 Xóo bi̱ kayá edxu̱u̱ náa Israel, Gedeón ndiyóoʼ maʼngo̱o̱ wéñuʼ. Índo̱ xa̱bu̱ madianita nigájnún ragáñún mbruʼun, ikhaa ni̱jkha̱ raxkhúún náa matha̱ ndrígóo Jezreel asndu náa mañu Jordán, mbáa náa rawuunʼ mañu rúʼko̱ nirígá wéñuʼ ixi̱ tsuwanʼ (Juec. 7:22). Ndiéjunʼ niʼni ikhú xá. Lá aʼkue̱ má niwi̱ji̱ xáʼ. ¡Na̱nguá! Maski ajndu ikhaa gajmíi̱n mbá 300 xa̱bi̱i̱ niʼni néʼngu̱u̱n wéñuʼ, nikidiin náa mañu ga̱jma̱a̱ nigún ruxkhúún má xúʼko̱. Nda̱wa̱á, niʼngu̱u̱n nixkamiin ga̱jma̱a̱ nigudíin (Juec. 8:4-12).
15. Ndiéjunʼ migamíi maʼni néʼngo̱o̱ mbáa bi̱ kayá edxu̱u̱ rá.
15 Rí mañewu̱u̱n a̱ngiu̱lú bi̱ kúwá náa congregación ga̱jma̱a̱ bi̱ kúwá náa goʼwóo migamíi maʼni rí bi̱ kayá edxu̱u̱ maʼni neʼngo̱o̱ o makawábaaʼ. Xú káʼnii gándoo guyaridáá Gedeón a̱ngiu̱lú bi̱ kuya̱ edxu̱u̱ á mu naku̱mu̱ún xúʼko̱ rá.
Bi̱ kuya̱ edxu̱u̱ nuxnún tsiakii ga̱jma̱a̱ ngajua bi̱ ndañúunʼ mixtambáñún. (Atayáá kutriga̱ 16 ga̱jma̱a̱ 17).
16, 17. a) Ndiéjunʼ nimbáyúuʼ Gedeón maʼngo̱o̱ rá. b) Ndiéjunʼ ma̱ndoo mbuyáá gajkhun bi̱ kuya̱ edxu̱u̱ rá. (Isaías 40:28-31; atayáá ma̱ngaa xtiʼkhu).
16 Gakumala kuya̱a̱ Jeobá rí ikhaa má gaxnala tsiakii. Rúʼko̱ dí niʼni Gedeón, ga̱jma̱a̱ Jeobá nditháan tániñuuʼ (Juec. 6:14, 34). Mbá miʼtsú, Gedeón gajmíi̱n xa̱bi̱i̱ nigún rajkhúún ruxkhún a̱jmi̱i̱n rey madianita bi̱ nagáñún gajmiún camello ndrígu̱ún (Juec. 8:12, 21). Mú numuu rí Jeobá nimbáñún, israelita bugi̱ bi̱ túni kawabamijná niʼngu̱u̱n nixkamiin ga̱jma̱a̱ niradíin. Xúʼko̱ má kayuuʼ a̱ngiu̱lú bi̱ kuya̱ edxu̱u̱ rí mbiʼi xúgi̱ mangiin ma̱ndoo maku̱mu̱ún kuyáá Jeobá, Dios bi̱ “na̱nguá egaʼ asndu má tsekhanajkhoʼ”. Ikhaa maxnún má xúʼko̱ tsiakii índo̱ gáʼyóoʼ (atraxnuu Isaías 40:28-31).d
17 Guʼyáá xkri̱da ndrígóo Mateo bi̱ nindxu̱u̱ Comité de Enlace náa Hospital, ndiéjunʼ embáyúuʼ maʼngo̱o̱ xáʼ. Ikhaa naʼthí: “Nda̱yo̱o̱ kaʼwu xóo embánúu dí naʼthí náa Filipenses 4:13. Mbaʼa nuthu índo̱ naʼni neʼngoʼ ga̱jma̱a̱ naku̱mu̱ʼ dí nánguá eʼngo̱ʼ itháan, ikhú natakháñúu wéñu’ Jeobá dí maxnú’ tsiakii dí ndayóo’ mu mambáñuun angiulú. Ikhú naku̱mu̱ʼ dí Jeobá naxnúʼ tsiakii maʼngoʼ”. Xó má Gedeón, a̱ngiu̱lú bi̱ kuya̱ edxu̱u̱ nuniginamijná muñewu̱u̱n ga̱jma̱a̱ ngajua a̱ngiu̱lú maski ajndu narígá xkujndu. Gajkhun má nguáná ndayóoʼ mbuyáá asndu náá eʼngo̱o̱ muni ga̱jma̱a̱ mbuyáá dí nguáná xáʼngo̱o̱ muni xúgíʼ xóo ikhiin nanigu̱u̱n. Mú, maski ajndu xúʼko̱, a̱ngiu̱lú bi̱ kuya̱ edxu̱u̱ nduyáá gajkhun dí Jeobá má gariʼña̱a̱ dí nutajkháanʼ ga̱jma̱a̱ rí maxnún tsiakii dí ndañúunʼ mu munimijna má xúʼko̱ (Sal. 116:1; Filip. 2:13).
18. Xó má ndiʼyáá, xú káʼnii gándoo guyaridáá Gedeón a̱ngiu̱lú bi̱ kuya̱ edxu̱u̱ rá.
18 Xó má eʼyáá, a̱ngiu̱lú bi̱ kuya̱ edxu̱u̱ ma̱ndoo majmañún wéñuʼ náa xkri̱da ndrígóo Gedeón. Gíʼmaa manindxu̱ún xa̱bu̱ guabiinʼ ga̱jma̱a̱ gíʼmaa mbuyáá asndu náá eʼngo̱o̱ muni mbá ñajunʼ índo̱ nakhánún, ma̱ngaa índo̱ nutha̱ numún o nuthún dí máján eni. Gíʼmaa manindxu̱ún xa̱bu̱ guabiinʼ ga̱jma̱a̱ munimbu̱ún, itháan má rí mbiʼi xúgi̱ dí na̱jkha̱ rajngiyuuʼ mbiʼi. Ga̱jma̱a̱ gíʼmaa maku̱mu̱ún gajkhun dí Jeobá má gaxnún tsiakii maʼngu̱u̱n. Nanduxu kuñu̱u̱n wéñuʼ ga̱jma̱a̱ “nduyamajkhún má xúʼko̱” a̱ngiu̱lú bugi̱ bi̱ nuñajunʼ gakhi̱i̱ wéñuʼ (Filip. 2:29).
Ajmúú 120 Ganindxu̱lú xa̱bu̱ guabaaʼ xóo Cristo
a Jeobá niraʼwíí Gedeón mu maxnúu ikha ga̱jma̱a̱ mañewu̱u̱n xuajñuu náa mbiʼi mingíjyúuʼ dí nikúwá náa Israel. Ga̱jma̱a̱ ikhaa niʼnimbánuu ñajunʼ ndrígóo mbá 40 tsiguʼ maski ajndu nirígá mbaʼa xkujndu. Náa artículo rígi̱, mbuʼyáá xú káʼnii gándoo a̱ngiu̱lú bi̱ kuya̱ edxu̱u̱ mbuyaridáá xkri̱da ndrígóo índo̱ nuraʼníí xkujndu.
b Nambríguíi rí manindxa̱a̱ xa̱bu̱ guabaaʼ ga̱jma̱a̱ dí ma̱ta̱ya̱a̱ asndu náá eʼngo̱o̱ matani mbá ñajunʼ. Xa̱bu̱ bi̱ ndaʼyoo asndu náá eʼngo̱o̱ maʼni mbá ñajunʼ, naʼngo̱o̱ nayéjximinaʼ awáán ga̱jma̱a̱ ndaʼyoo rí maʼngo̱o̱ maʼni ga̱jma̱a̱ dí xáʼngo̱o̱ maʼni. Mbáa xa̱bu̱ guabaaʼ ndaʼyamajkhún eʼwíinʼ ga̱jma̱a̱ ndaʼyoo dí ikhiin guaʼdáá itháan numún (Filip. 2:3). Ga̱jma̱a̱ bi̱ ndaʼyoo asndu náá eʼngo̱o̱ maʼni mbá ñajunʼ ma̱ngaa nindxu̱u̱ xa̱bu̱ guabaaʼ.
c Atayáá ma̱ngaa artículo “Guʼni má xúʼko̱ ñajuunʼ Jeobá maski ajndu nuxkulú”, dí nigájnuu náa i̱yi̱i̱ʼ Bi̱ Nayejngoo gu̱nʼ julio tsiguʼ 2019, ináa 10 ga̱jma̱a̱ 11, kutriga̱ 10 asndu 13.
d Isaías 40:28-31: “Lá xóó tsédxúʼnú ma̱ta̱ya̱a̱ o xóó tsetadxuun ráʼ. Jeobá, bi̱ Niʼni xúgíʼ ku̱ba̱ʼ, nindxu̱u̱ mbáa Dios bi̱ xtáa má xúʼko̱. Ikhaa na̱nguá egaʼ asndu má tsekhanajkhoʼ. Nimbáa xáʼngo̱o̱ gaʼyoo xú káʼnii endxa̱ʼóo edxu̱u̱. 29 Naxnúu tsiakii bi̱ néʼngo̱o̱ ga̱jma̱a̱ naxnúu tsiakii bi̱ nakáguabaaʼ. 30 Bi̱ ni̱ndxu̱ún e̱ji̱n nagiinʼ ga̱jma̱a̱ nánguá eʼngu̱u̱n, ga̱jma̱a̱ jiáma majngrádiinʼ ga̱jma̱a̱ maxpátrigi̱i̱n, 31 mú bi̱ guáʼthi̱i̱n náa Jeobá muguaʼdáá tsiakii. Maguaʼdáá xpíjpiun xóo bi̱yú. Magañún mu xágiinʼ, majngruigu̱u̱n ga̱jma̱a̱ xáʼni néʼngu̱u̱n›”.