Rí xta̱ʼthi̱i̱n gajkhun maʼga̱nú mambanúu

1. Náá numuu ma̱ndoo muʼthá rí nigi̱ʼthu̱u̱n Abrahán ndiʼyoo dí gajkhun mambanúu rá.

JEOBÁ nikudaminaʼ náa Abrahán rí mbáa bi̱ ga̱ʼkha̱ náa ikhaa maʼni rí mbá xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ makhánún rí maguma tsajkurámiinʼ (Gén. 15:5; 22:18). Numuu rí Abrahán nigiʼdoo mbá fe mba̱a̱ náa Dios, ikha jngóo ndiʼyoo gajkhun dí ikhaa maʼnimbánuu rí nikudaminaʼ. Índo̱ Abrahán gítháán magiʼdoo 100 tsiguuʼ ga̱jma̱a̱ a̱ʼgiu̱u̱ 90, ikhiin na̱nguá guáʼdaaʼ nimbáa ada̱ (Gén. 21:​1-7). Náa Biblia naʼthí dí Abrahán “nigiʼdoo fe dí maʼga̱nú mani̱ndxu̱u̱ anu̱ún xa̱bu̱ bi̱ gákúwá náa mbaʼa xuajen mba̱ʼu̱, maski ajndu ndiʼyoo dí rakáʼnii marigá, mú ikhaa niʼnimbo̱o̱ rí nijuiʼtháán” (Rom. 4:18). Xó má eʼyáá ni̱jkha̱nú nimbánuu rí nigi̱ʼthu̱u̱n: Abrahán ni̱jkha̱nú ninindxu̱u̱ anu̱u̱ Isaac, nigiʼdaa a̱ʼdióo bi̱ ra̱ʼkhá tháán nindoo magiʼdaaʼ. Náá numuu ndiʼyoo gajkhun Abrahán dí Jeobá maʼnimbánuu gajkhun dí nikudaminaʼ rá.

2. Náá numuu ndiʼyoo gajkhun Abrahán dí Jeobá maʼnimbánuu rí nikudaminaʼ rá.

² Numuu rí Abrahán nanuwiinʼ má Jeobá, ndiʼyoo gajkhun dí maʼnimbánuu rí nikudaminaʼ náa ikhaa (Rom. 4:21). Ga̱jma̱a̱ numuu fe rí nigiʼdoo, Jeobá ndiʼyoo rí nindxu̱u̱ jmbii ga̱jma̱a̱ nindoo kaʼyoo (Sant. 2:23). Xó má naʼthí náa Romanos 4:​18, fe rí nigiʼdoo ga̱jma̱a̱ rí nigi̱ʼthu̱u̱n Abrahán nimbríguii. Guʼyáá rí niʼthí apóstol Pablo ga̱jma̱a̱ numuu rí guáʼthi̱i̱n nda̱wa̱á dí na̱ʼkha̱ raʼthí náa capítulo 5 ndrígóo Romanos.

3. Ndiéjunʼ niʼthí Pablo ga̱jma̱a̱ numuu dí kua̱ʼthi̱i̱n nda̱wa̱á rá.

³ Pablo naʼthí náá numuu ma̱ndoo mbuʼyáá gajkhun rí kua̱ʼthi̱i̱n nda̱wa̱á “tséʼni rí majmáa a̱jkiu̱lú” (Rom. 5:5). Ma̱ngaa nambáyulú makru̱ʼu̱lú rí kua̱ʼthi̱i̱n ma̱ndoo maʼni itháán mba̱a̱. Xó má guʼgua̱ ruʼnigajma̱a̱ Romanos 5:​1-5, gundxaʼwamíjna̱ xú káʼnii rí kua̱ʼthi̱i̱n nda̱wa̱á ni̱jkha̱ raʼni itháán mba̱a̱. Ma̱ngaa rí muʼnigajma̱a̱ xúgi̱, rúʼko̱ gámbáyulú mbuʼyáá ndiéjuunʼ ma̱ndoo muʼni xóó mu xúʼko̱ ma̱ndoo maʼni itháán mba̱a̱ rí kua̱ʼthi̱i̱n nda̱wa̱á. Ginii, muʼthá mbá rí mitsaanʼ kua̱ʼthi̱i̱n rí niʼthí Pablo rí nditháan xáʼni majmáa a̱jkiu̱lú.

MITSAANʼ DÍ KUA̱ʼTHI̱I̱N MARIGÁ

4. Ndiéjuunʼ e̱ʼkha̱ raʼthí náa Romanos 5:​1, 2 rá.

⁴ (Atraxnuu Romanos 5:​1, 2). Pablo niʼnirámáʼ ajngáa rígi̱ náa inún a̱ngiu̱lú bi̱ kúwi̱i̱n náa congregación dí rígá náa Roma. Ikhiin nijmañún ga̱jma̱a̱ numuu Jeobá ma̱ngaa numuu Jesús, nisngajmá rí niguaʼdáá fe náa ikhiin ma̱ngaa ninindxu̱ún cristianos. Ikha jngóo Dios niʼthúún rí nindxu̱ún “xa̱bu̱ jmbiin ga̱jma̱a̱ numuu fe rí guaʼdáá” ma̱ngaa niraʼwíin ga̱jma̱a̱ espíritu santo. Asndu má nákha ikhú, niguaʼti̱i̱n mbá rí mitsaanʼ wéñuuʼ dí gajkhun maʼga̱nú mambanúu.

5. Ndiéjuunʼ rí kuáʼti̱i̱n bi̱ kaxtaʼwíin rá.

⁵ Nda̱wa̱á Pablo niʼthúún cristianos bi̱ kaxtaʼwíin bi̱ kúwá náa Éfeso ga̱jma̱a̱ numuu rí kua̱ʼthi̱i̱n dí Dios nixnúún. Niʼthúún rí mudrigúu rí “ikhaa nigujxi̱i̱ mu makhánún bi̱ ni̱ndxu̱ún xa̱bi̱i̱ Jesús” (Efes. 1:18). Ga̱jma̱a̱ a̱ngiu̱lú bi̱ kúwíin náa Colosas niʼthúún náa mínaaʼ mundrígúu rí wíji̱ makánún. Niʼthúún: “Numuu rí náa mekhuíí rígá rí kuaʼti̱i̱nla” (Col. 1:​4, 5). Ikha jngóo cristianos bi̱ kaxtaʼwíin bi̱ gátujxi̱ín ga̱jma̱a̱ makuwá kámuu mbiʼi mekhuíí mutañajunʼ gajmiún Cristo (1 Tes. 4:​13-17; Apoc. 20:6).

6. Ndiéjuunʼ niʼthí mbáa ndxájulú bi̱ kixtiʼyáaʼ ga̱jma̱a̱ numuu dí gíʼthu̱u̱n nda̱wa̱á rá.

⁶ Cristianos bi̱ kaxtaʼwíin nangaju̱u̱n ga̱jma̱a̱ xúgíʼ a̱jkiu̱ún rí kua̱ʼthi̱i̱n mudrigúu. Mbá xkri̱da, nákha tsiguʼ 1991 ndxájulú Frederick Franz niʼthí xígi̱: “Dí kua̱ʼthi̱i̱n gajkhun nindxu̱u̱ ga̱jma̱a̱ mambanúu náa mbá xúgíinʼ bi̱ 144,00 bi̱ kúwíin náa mugu̱ bi̱ chímbaʼin, mambanúu rí asndu tundxaʼwamíjna xóo marigá”. Xú káʼnii nikumu̱u̱ nda̱wa̱á rí niʼni kájxi̱ ñajuunʼ Dios náa mba̱yu̱u̱ʼ tsiguʼ xá. Ikhaa naʼthí: “Ndu̱ya̱a̱xu má xúʼko̱ rí kua̱ʼthi̱i̱n mambanúu gíʼdoo wéñuuʼ numuu. Nangajuxu xóo itháán tséʼniuu má nguáthá mba̱yu̱u̱ʼ mbaʼyóoʼ xóo muguaʼthi̱i̱n. Gíʼdoo wéñuuʼ numuu rí muguaʼthi̱i̱n tséʼniuu má mba̱yu̱u̱ʼ tsiguʼ. Xúgi̱ rí gúʼthu̱u̱n rígi̱ nda̱yo̱o̱ rí gíʼdoo itháán numuu ki xóo nákha ginii”.

7, 8. Ndiéjuunʼ rí kua̱ʼthi̱i̱n mbaʼin xa̱bi̱i̱ Dios rá. (Romanos 8:​20, 21.)

⁷ Mbaʼin xa̱bu̱ bi̱ nuni̱ ñajuunʼ Jeobá rí mbiʼi xúgi̱ imbo̱o̱ nindxu̱u̱ rí kua̱ʼthi̱i̱n ikhiin, ndiéjuunʼ nindxu̱u̱ ikhaa rá. Rí xóo nigi̱ʼthu̱u̱n Abrahán: Rí maxtáa kámuu mbiʼi náa tsu̱du̱u̱ Ku̱ba̱ʼ náa maʼtáñajunʼ Xa̱bu̱ ñajunʼ ndrígóo Dios (Heb. 11:​8-10, 13). Pablo ma̱ngaa niʼnirámáʼ ga̱jma̱a̱ numuu mbá rí mitsaanʼ rí kua̱ʼthi̱i̱n nda̱wa̱á (atraxnuu Romanos 8:​20, 21). Índo̱ ikháán nijmañaaʼ rí naʼthí náa Biblia ga̱jma̱a̱ numuu xóo makuwáanʼ nda̱wa̱á, ndiéjuunʼ rí itháán ninigua̱a̱ʼ rá. Lá ninigua̱a̱ʼ dí nánguá maguaʼdáá aʼkhá ga̱jma̱a̱ rí manindxu̱lú xa̱bu̱ jmbii ráʼ. Ninigua̱a̱ʼ índo̱ nitayáá rí bi̱ xtañún matujxi̱ín ga̱jma̱a̱ makuwá náa Ku̱ba̱ʼ mitsaanʼ xá. Núma̱aʼ dí mitsaanʼ wéñuuʼ rígi̱ dí naxnulú Dios, ikháán ma̱ngaa maraxtaa mitsaanʼ wéñuuʼ nda̱wa̱á.

⁸ Xúgiáanʼ rígá mbá rí kuáʼti̱i̱n rí naʼni makuwáanʼ gagi, tséʼniuu á mu makuwáanʼ kámuu mbiʼi mekhuíí o náa tsu̱du̱u̱ ku̱ba̱ʼ. Rí kuáʼti̱i̱n rígi̱ ma̱ndoo maʼni mba̱a̱ mambá mbiʼi. Xú káʼnii gándoo guʼni rá. Mu ma̱ndoo mbuʼyáá, guʼyáá xóo itháán dí niʼnirámáʼ Pablo. Ajngáa dí ikhaa niʼnirámáʼ mambáyulú mbuʼyáá rí kua̱ʼthi̱i̱n xáʼni rí majmáa a̱jkiu̱lú.

XÓO EʼNI MBA̱A̱ RÍ KUA̱ʼTHI̱I̱N

9, 10. Xó má Pablo, ndiéjunʼ nduʼyáá rí muraʼníí rá. (Romanos 5:​3, atayáá xtiʼkhu ma̱ngaa.)

⁹ (Atraxnuu Romanos 5:​3). Pablo niʼthí mbá rí maʼniulú wéñuuʼ tsiánguá: Rí índo̱ nanújngulu náa awúu̱n xkujndu, xúʼko̱ naʼni itháán mba̱a̱ fe ndrígulú náa rí kua̱ʼthi̱i̱n marigá nda̱wa̱á. Xúgiáanʼ bi̱ nindxu̱lú cristianos nduʼyáá dí muraʼníí xkujndu gakhi̱i̱. Gundxaʼwamíjna̱ rí niʼthúún Pablo cristianos bi̱ kúwá náa Tesalónica: “Índo̱ nikuwáanʼxu̱ ga̱jma̱á nindxa̱la, nithalaxu má wapháá rí ndayóoʼ mumíniiʼlú, xó má e̱ya̱a̱, xúʼko̱ má ni̱jkha̱nú nirígá” (1 Tes. 3:4). Ga̱jma̱a̱ a̱ngiu̱lú bi̱ kúwá náa Corinto niʼnirámáʼ inún: “Nanduxu mbu̱ya̱a̱la ga̱ʼkhu̱ mba̱a̱ dí niraʼnííxu […] nimíñúxu rí makhañúxu” (2 Cor. 1:8; 11:​23-27).

¹⁰ Gajkhun nindxu̱u̱ rígi̱. Bi̱ nindxu̱lú cristianos nduʼyáá rí manújngulú náa awúu̱n ga̱ʼkhu̱ (2 Tim. 3:12). Asndu má nákha mbiʼi rí ninindxa̱a̱ʼ xa̱bi̱i̱ Jesús, ndiéjuunʼ xkujndu nitraʼníí rá. Mbáa bi̱ nambájxáaʼ gajmiáanʼ o bi̱ kúwá náa guʼwáaʼ nitsijmáánʼ o asndu ninia̱a̱ʼ dí raʼkhí. Lá niraʼdáá xkujndu náa natiejunʼ numuu rí nandaaʼ matani̱ xúgíʼ májánʼ ráʼ. (Heb. 13:18.) Xa̱bu̱ ñajunʼ na̱nguá eñún gúyaa numuu dí narathúún eʼwíinʼ dí kua̱ʼthi̱i̱n marigá nda̱wa̱á ráʼ. Tséʼniuu má asndu xkáʼnii xkujndu dí nuraʼníí Pablo niʼthí rí gíʼmáánʼ maʼdxulu, náá numuu rá.

11. Náá numuu ndayóoʼ makuwáanʼ xawii maʼngulú rá.

¹¹ Nadxulú wéñuuʼ índo̱ nanújngulú náa xkujndu, numuu dí rígi̱ nambáyulú muguaʼdáá mbá cualidad rí gíʼdoo wéñuuʼ numuu. Náa Romanos 5:3 naʼthí: “Índo̱ nuraʼníí ga̱ʼkhu̱ naʼni rí maʼngulú”. Xúgiáanʼ bi̱ nindxu̱lú cristianos nanújngulú xkujndu ga̱jma̱a̱ gíʼmaa dí maʼngulú. Numuu rí á mu naʼngulú, xúʼko̱ mundrígúu dí ra̱ʼkhá tháán eyulú. Tsíyulú manindxu̱lú xóo xa̱bu̱ bi̱ niʼthí Jesús náa xkri̱da ndrígóo tsiga, rí nijngutígú náa ku̱ba̱ʼ dí rígá itsí. Numuu rí ikhiin nundrigú “ajngáa” ga̱jma̱a̱ gagi mú “índo̱ na̱ʼkha̱nú gamiéjunʼ o naguma gíníi” nuniñaaʼ (Mat. 13:​5, 6, 20, 21). Gajkhun má nimbáa tsénigu̱u̱ʼ rí mamínuuʼ o maraʼnuu xkujndu, mú rí maʼngulú nambáyulú. Guʼyáá náá numuu.

12. Xú káʼni embáyáaʼ rí maʼngaaʼ rá.

¹² Discípulo Santiago niʼthí rí maʼngulú nayambáá. Niʼnirámáʼ: “Á mu naʼngala má xúʼko̱ maguma ratháanʼ itháan májánʼ, mu xúʼko̱ mani̱ndxa̱la kájxáanʼ ga̱jma̱a̱ náa xúgíʼ rí gúni̱ mani̱ndxu̱u̱ májánʼ ma̱ngaa nimbá nda̱a̱ dí gáʼyála” (Sant. 1:​2-4). Ikha jngóo rí maʼngulú nambáyulú wéñuuʼ, ndiéjuunʼ nindxu̱u̱ rá. Nambáyulú mu maʼngo̱o̱ a̱jkiu̱lú, muguaʼdáá itháán fe, ga̱jma̱a̱ rí maku̱mu̱lú kuʼyáá itháán Dios. Mú raʼkháa i̱ndó rúʼko̱, rí maʼngo̱o̱ a̱jkiu̱lú rígá i̱mba̱ rí nayambáá.

13, 14. Ndiéjunʼ erígá índo̱ naʼngulú, ga̱jma̱a̱ xóo embáyulú rígi̱ náa dí kua̱ʼthi̱i̱n nda̱wa̱á rá.

¹³ (Atraxnuu Romanos 5:4). Pablo niʼthí: “Índo̱ naʼngulú, Dios nadxuu a̱jkiu̱u̱n”. Mú raʼkháa rúʼko̱ eyoo gaʼthí dí Jeobá nadxuu índo̱ nanújngulú náa xkujndu. Ikhaa nadxuu a̱jkiu̱u̱n índo̱ ndaʼyoo rí ikháán naʼnga̱a̱ʼ natraʼníí xkujndu. Phú gajkhun rí maxnáaʼ tsiaki̱i̱ ma̱ta̱ya̱a̱, dí á mu nariejun jmbu, naʼngo̱o̱ a̱jkia̱a̱nʼ naraʼti̱i̱n, ma̱ndoo matani̱ rí maʼdxuu a̱jkiu̱u̱n Jeobá (Sal. 5:12).

¹⁴ Gundxaʼwamíjna̱ ga̱jma̱a̱ numuu Abrahán. Ikhaa niʼngo̱o̱ náa xkujndu dí niraʼnuu ikha jngóo nidxuu a̱jkiu̱u̱n kaʼyoo Jeobá, ma̱ngaa ndiʼyoo xóo mbáa bi̱ nambájxu̱u̱ ga̱jma̱a̱ mbáa xa̱bu̱ bi̱ naʼni rí májánʼ (Gén. 15:6; Rom. 4:​13, 22). Xúʼko̱ má mbaʼyóoʼ muʼni mangáánʼ, mu Dios maʼndoo kaʼyulú, ndayóoʼ rí muguajún jmbu ga̱jma̱a̱ rí maʼngo̱o̱ a̱jkiu̱lú muguaʼthi̱i̱n, raʼkháa ga̱jma̱a̱ numuu xóo muʼni ñajuunʼ ikhaa o ñajunʼ dí naguáʼdáá náa congregación. Rígi̱ dí ma̱ndoo muʼni xúgiáanʼ, tséʼniuu má nguáthá tsigulú, xóo kuwáanʼ o rí najmáán nuʼnilú. Xtáa ikháán ratraʼníí mbá xkujndu xúgi̱ ráʼ. Atayáá gajkhun á mu nariejun jmbu Jeobá ma̱ndoo kaʼyáaʼ. Índo̱ nadxuʼnú natayáá rí ikhaa nandoo kaʼyaaʼ: Rígi̱ nambáyaaʼ naʼni matatsimbaʼ itháán náa rí xta̱ʼthi̱i̱n marigá nda̱wa̱á.

RÍ KUA̱ʼTHI̱I̱N NAʼNI MUʼNIMBULÚ ITHÁÁN

15. Ndiéjunʼ dí xóo niʼthí Pablo, ga̱jma̱a̱ ndiéjuunʼ dí murajximíjna̱ rá.

¹⁵ Xó má ndiʼyáá, Pablo niʼthí á mu dí naʼngulú nuraʼníí xkujndu, Dios maʼndoo kaʼyulú. Rí xúgi̱ guʼyáá xóo itháán rí niʼthí: “Dios nadxuu a̱jkiu̱u̱n ga̱jma̱a̱ rúʼko̱ naʼni dí marigá rí muguaʼthi̱i̱n nda̱wa̱á, rí nuguaʼthi̱i̱n nda̱wa̱á tséʼni rí majmáa a̱jkiu̱lú” (Rom. 5:​4, 5). Náa versículo rí na̱ʼkha̱ ginii náa dí Romanos 5:​2, Pablo niʼthúún cristianos bi̱ kúwá náa Roma dí rígá mbá dí kua̱ʼthi̱i̱n, ‹dí makuwá gajmiún Dios›. Mbáa ikha jngóo, murajximíjna̱: “Á mu dí cristianos buʼko̱ rígá má dí kuáʼti̱i̱n, náá numuu rí Pablo natanga̱a̱ naʼthúún mbu̱júu̱ xá.”

16. Xú káʼnii ma̱ndoo matayaa itháan gajkhun rí kua̱ʼthi̱i̱n nda̱wa̱á rá. (Atayáá xtiʼkhu ma̱ngaa.)

¹⁶ Ma̱ndoo makru̱ʼu̱lú dí Pablo nindoo gaʼthí, á mu nduʼyáá rí kua̱ʼthi̱i̱n nda̱wa̱á gajkhun maʼgá raʼni itháán mba̱a̱. Atatsaʼwáminaʼ rígi̱, nákha timbá miʼtsu niʼtháanʼ mbáa ga̱jma̱a̱ numuu xóo makuwáanʼ náa mbá Ku̱ba̱ʼ mitsaanʼ nda̱wa̱á. Mbáa niʼtatsaʼwáminaʼ, mitsaanʼ nindxu̱u̱ mú tsiánguá á mu gajkhun mambanúu. Mú, índo̱ nidxu̱ʼ ratatsiniiʼ itháán Jeobá ga̱jma̱a̱ rí naʼthí náa Biblia, xúʼko̱ nidxu̱ʼ rajmañaaʼ itháán ga̱jma̱a̱ nitayáá rí gajkhun mambanúu rí naʼthí.

17. Nda̱wa̱á rí nijnguáanʼ iyááʼ, xú káʼnii nidxu̱ʼ ratatsimbaaʼ itháán náa dí kua̱ʼthi̱i̱n nda̱wa̱á rá.

¹⁷ Asndu mbiʼi nda̱wa̱á rí nijnguáanʼ má iyááʼ, rí xta̱ʼthi̱i̱n nda̱wa̱á ni̱jkha̱ raʼni itháán mba̱a̱ numuu rí nidxu̱ʼ rajmañaaʼ itháán ga̱jma̱a̱ nidxu̱ʼ rambájxáaʼ itháán ga̱jma̱a̱ Dios (Heb. 5:13–6:1). Mbáa nigíʼnáaʼ mangáánʼ xóo má na̱ʼkha̱ raʼthí náa Romanos 5:​2-4, xó muʼthá nitraʼníí xkujndu ga̱jma̱a̱ nitayáá xóo Jeobá nimbáyaaʼ. Numuu rí natayáá dí Jeobá nadxuu kaʼyáaʼ rúʼko̱ naʼni ma̱ta̱ya̱a̱ gajkhun dí Jeobá maʼnimbánuu rí nikudaminaʼ. Rí xta̱ʼthi̱i̱n nda̱wa̱á ni̱jkha̱ raʼni itháán mba̱a̱ ki xóo rí nákha nitagíʼdi̱i̱ nitanigajma̱a̱. Natayáá rí gajkhun ga̱jma̱a̱ natatsimbaaʼ itháán. Rígi̱ nambáyaaʼ náa xúgíʼ mbiʼi dí naraxtaa, mbá xkri̱da, xóo nataniu̱u̱ bi̱ kúwá náa guʼwáaʼ, dí natraʼwíí natani̱ ga̱jma̱a̱ xóo najmaaʼ mbiʼi ndrígáaʼ.

18. Ndiéjuunʼ dí naʼthúlú Jeobá rá.

¹⁸ Nda̱wa̱á rí Pablo niʼthí rí nandoo kaʼyulú Dios rúʼko̱ naʼni dí rígá mbá dí muguaʼthi̱i̱n nda̱wa̱á, ga̱jma̱a̱ niʼthí xóo mbá rí gíʼdoo numuu: Rí ma̱ndoo mbuʼyáá dí kua̱ʼthi̱i̱n rígi̱, gajkhun mambanúu. Náá numuu rá. numuu rí Pablo niʼthí rígi̱ dí na̱ʼkha̱ náa Dios: “Rí nuguaʼthi̱i̱n nda̱wa̱á tséʼni rí majmáa a̱jkiu̱lú numuu rí ngajua ndrígóo Dios nirígá náa a̱jkiu̱lú ga̱jma̱a̱ numuu espíritu santo rí nindrígúlú” (Rom. 5:5). Ikhaa jngóo ma̱ndoo ma̱ta̱ya̱a̱ dí xta̱ʼthi̱i̱n nda̱wa̱á gajkhun maʼga̱nú mambanúu.

19. Ndiéjuunʼ rí nduʼyáá gajkhun rá.

¹⁹ Májánʼ nindxu̱u̱ dí marmáʼáan a̱jkiu̱lú náa xkridoo Abrahán. Jeobá rígá mbá dí nikudaminaʼ náa ikhaa, nigruiguíi ga̱jma̱a̱ ndiʼyoo xóo mbáa bi̱ nambájxu̱u̱ ga̱jma̱a̱. Rí nigi̱ʼthu̱u̱n Abrahán, ni̱jkha̱nú nimbánuu. Náa Biblia naʼthí: “Nda̱wa̱á rí Abrahán nisngájma rí niʼngo̱o̱ a̱jkiu̱u̱n, nigruigú rí nijuiʼthá makánáán” (Heb. 6:15; 11:​9, 18; Rom. 4:​20-22). Ikháá má xóo Abrahán, nduʼyáá májánʼ á mu dí naguajún jmbu náa Jeobá, dí kua̱ʼthi̱i̱n nda̱wa̱á xáʼni majmáa a̱jkiu̱lú, gajkhun maʼga̱nú mambanúu. Dí kua̱ʼthi̱i̱n rígi̱ nindxu̱u̱ gajkhun ga̱jma̱a̱ naʼni makuwáanʼ gagi (Rom. 12:12). Pablo niʼnirámáʼ: “Dios bi̱ naxná mbá rí muguaʼthi̱i̱n nda̱wa̱á, gáʼni rí makuwáanʼla gagi ga̱jma̱a̱ tsímáá numuu rí nakumala ku̱ya̱a̱ ma̱ngaa tsiakii ndrígóo espíritu santo gáʼni rí muguaʼthi̱i̱n ga̱jma̱a̱ xúgíʼ a̱jkia̱la” (Rom. 15:13).