Gedeón gajmíi̱n 300 xa̱bi̱i̱

LÁ NATAYÁÁ rí xtáa rarígá gi̱i̱ ráʼ. Bugi̱ ni̱ndxu̱ún xa̱bu̱ Israel bi̱ nuni̱ aguʼ. Xa̱bu̱ bi̱ natañún kuwa rusmbatigu̱u̱n mú muwa̱a̱n iyaʼ. Juez Gedeón wíji̱ mijngii náa ikhiin. Ikhaa xtáa raʼyoo xú káʼnii kuwa raʼwa̱a̱n iyaʼ.

Atañún májánʼ xa̱bekha xú káʼnii mixtiʼkhu kuwa raʼwa̱a̱n iyaʼ. Tikhun nuxruigú inún asndu náa iyaʼ. Mu mbáwíi bi̱ xtáa raʼga̱a̱n iyaʼ ga̱jma̱a̱ ñawúunʼ, mu ma̱ndoo mbaʼyoo rí xtáa rarígá mbajndi. Gíʼdoo wéñuʼ numuu rígi̱, numuu rí Jeobá niʼthúu̱n Gedeón rí mbañíinʼ i̱ndó xa̱bu̱ bi̱ nuyejngo índo̱ rí kuwa raʼwa̱a̱n iyaʼ. Bi̱ táxtaʼwíin gíʼmaa rí magúun guʼún, niʼthí Dios. Guʼyáá náa numuu.

Israelitas guáʼdáá wéñuʼ xkujndu mbu̱júu̱ numuu rí túnimbu̱ún náa Jeobá. Xa̱bu̱ madianitas niguáʼdáá itháan tsiakii ki xóo israelitas ga̱jma̱a̱ nuniu̱u̱n dí ra̱májánʼ. Xúʼko̱ israelitas nunda̱ʼa̱ rí Jeobá mambáñún, ga̱jma̱a̱ Jeobá naʼdxun rí nutháán.

Jeobá naʼthúu̱n Gedeón rí mbañíinʼ soldados, xúʼko̱ Gedeón nagimbíi̱n mbá 32,000 xa̱bu̱ bi̱ nuni̱ aguʼ. Mú kuwa mbá 135,000 soldados bi̱ muxmijná gajmiún xa̱bu̱ israelitas. Mú, Jeobá naʼthúu̱n Gedeón: ‹Xtaʼdiin wéñuʼ xa̱bekha›. Náa numuu eʼthí xúʼko̱ xá.

Á mu rí israelitas gáʼngu̱u̱n muxmijná, mbáa mundxaʼwamíjna̱ rí niʼngu̱u̱n ga̱jma̱a̱ numún ikhiin, rí na̱nguá ndiyóoʼ mambañuun Jeobá mú maʼngu̱u̱n. Ikha jngó Jeobá naʼthúu̱n Gedeón: ‹Arathun xúgínʼ xa̱bu̱ bi̱ namiñun mu matangi̱i̱n náa guʼwún›. Índo̱ Gedeón eʼni rígi̱, mbá 22,000 xa̱bu̱ bi̱ nuni̱ aguʼ nagúun. I̱ndó 10,000 xa̱bu̱ eguanún mu muxmijná gajmiún mbá 135,000 soldados.

Mú, ¡atadxun! Jeobá naʼthí: ‹Xóó xtaʼdiin wéñuʼ xa̱bekha›. Ikha jngó naʼthúu̱n Gedeón rí maʼniún xa̱bekha mu muwa̱a̱n iyaʼ rígi̱ ga̱jma̱a̱ makuʼmiin magúun guʼwún xúgínʼ bi̱ guxruigu inún mu muwa̱a̱n iyaʼ. Jeobá nakudaminaʼ: ‹Ma̱ni̱ rí maʼngaaʼ gajmiáanʼ 300 xa̱bekha bi̱ nuyajngo má xúʼko̱ nákha kuwa raʼwa̱a̱n iyaʼ›.

Na̱jkha̱nú mbiʼi rí muxmijná. Gedeón naruiʼti̱i̱n ajtsú tongoo soldados bi̱ 300. Mámbáa xa̱biya̱ naxnúu mámbá chi̱ji̱ʼ, ga̱jma̱a̱ mbá rayaʼ náa gíwanʼ mbá xíʼtáa ixi̱ rí nakha. Itháan maʼni tikhu nduʼun, índo̱ rí nagímbíin xúgínʼ soldados náa mbajndi campamento ndrígúun xa̱bu̱ bi̱ sia̱nʼ. Ikhú, mbríguu endií mbaʼa chi̱ji̱ʼ, nuruiʼta rayaʼ, ga̱jma̱a̱ nundxa̱ʼwa̱: ‹¡Chídiu̱u̱ Jeobá ga̱jma̱a̱ Gedeón!›. Índo̱ rí soldados bi̱ sia̱nʼ ndajui̱i̱n, najngarígi̱i̱n ga̱jma̱a̱ namiñun. Xúgínʼ nagáñun, ga̱jma̱a̱ israelitas naʼngu̱u̱n nuxmijná.