Saúl timbáa rey náa Israel

ATAYÁÁ Samuel xtáa rastrámuʼ aceite náa edxu̱u̱ xa̱bu̱ buʼko̱. Rígi̱ ni̱ndxu̱u̱ rí nuni̱i̱ mbáa xa̱bu̱ mu musngajma rí nixtiyáaʼ mu mani̱ndxu̱u̱ xóo rey. Jeobá naʼthúu̱n Samuel rí mastrámuʼ aceite náa edxu̱u̱ Saúl. Ni̱ndxu̱u̱ mbá aceite kiejunʼ rí ndataun májánʼ.

Saúl na̱nguá eyoo gáʼnimbo̱o̱ rí ikhaa ni̱ndxu̱u̱ mbáa xa̱bu̱ májánʼ rí maʼga̱nú mani̱ndxu̱u̱ rey. Ikha jngó naʼthúu̱n Samuel: ‹Ikhúúnʼ xtáá náa xuajin ndrígóo Benjamín, rí itháan chíʼgíʼ náa Israel. Náa numuu dí naratá manindxu̱ʼ rey rá.› Jeobá nanigu̱ʼ kaʼyoo Saúl numuu rí ikhaa tsíyoo mani̱ndxu̱u̱ mbáa xa̱bu̱ bi̱ itháan mba̱a̱. Ikha jngó Jeobá nda̱yáaʼ mu mani̱ndxu̱u̱ rey.

Mú Saúl na̱nguá ni̱ndxu̱u̱ mbáa xa̱bu̱ gínáa asndu má na̱nguá ni̱ndxu̱u̱ mbáa xa̱bu̱ lájuíin. Ikhaa na̱ʼkha̱ náa mbá guʼwá rí guáʼdáá wéñuʼ, ga̱jma̱a̱ ra̱ʼkhá tháán mitsiʼyáa ma̱ngaa mba̱yi̱i̱ʼ. ¡Xa̱bu̱ bugi̱ itháan mba̱yi̱i̱ʼ ki xóo xa̱bu̱ bi̱ kuwa náa Israel! Saúl nagáyúu májánʼ wéñuʼ, xúʼko̱ má migújkuíʼ wéñuʼ ma̱ngaa. Xa̱bu̱ kuwa gagi numuu rí Jeobá ndiyáaʼ Saúl mu mani̱ndxu̱u̱ rey. Xúgínʼ nugi̱ʼdi̱i̱ nundxa̱ʼwa̱: ‹¡Ga̱ʼga̱ gamajku náa rey!›.

Xa̱bu̱ bi̱ guáʼdáá sia̱nʼ gajmiún israelitas migújkuínʼ má xúʼko̱. Xóó nuni̱ rí muguaʼdáá xkujndu gajmiún xa̱bu̱ israelitas. Nguátha mbiʼi nda̱wa̱á rí Saúl nanindxu̱u̱ rey, xa̱bu̱ amonitas natsimún guxnamijná gajmiún israelitas. Mú Saúl nagímbíin mbaʼin wéñuʼ soldados, ga̱jma̱a̱ xúʼko̱ naʼngu̱u̱n nuxnamijná gajmiún amonitas. Xa̱bu̱ xuajin nakuwa gagi numuu rí guáʼdáá Saúl xóo rey.

Nakrújngoo tsiguʼ, Saúl naʼni dí israelitas maʼngu̱u̱n muxnamijná mbaʼa aʼphu̱ gajmiún xa̱bu̱ bi̱ guáʼdáá sia̱nʼ. Ma̱ngaa Saúl gíʼdaa mbáa a̱ʼdióo bi̱ tsímiñuu, bi̱ nagumbiʼyuu Jonatán. Ga̱jma̱a̱ Jonatán nambáñun xa̱bu̱ Israel mu maʼngu̱u̱n muxnamijná mbaʼa aʼphu̱. Xa̱bu̱ filisteos ra̱ʼkhá tháán guáʼdáá itháan sia̱nʼ náa xa̱bu̱ Israel. Mbóo mbiʼi, ra̱ʼkhá tháán mbaʼin wéñuʼ xa̱bu̱ filisteos kuwa raguwáʼ mu muxnamijná gajmiún xa̱bu̱ israelitas.

Samuel naʼthúu̱n Saúl rí magiʼthu̱u̱n asndu índo̱ gátanga̱a̱ ikhaa mu maxnáxi̱ tsigijñaʼ náa Jeobá. Mú Samuel ndajyúuʼ. Saúl namiñu rí filisteos mugi̱ʼdi̱i̱ muxnamijná, ikha jngó na̱jkha̱ ginii ikhaa gáxnáxi̱ tsigijñaʼ ndrígóo. Nda̱wa̱á kayuʼ índo̱ rí Samuel na̱ʼkha̱núu náa Saúl naʼthúu̱n rí táʼnimbo̱o̱. Samuel eʼthí: ‹Jeobá mbayáaʼ imba̱a̱ xa̱bu̱ mu mani̱ndxu̱u̱ rey náa xuajin Israel›.

Nda̱wa̱á, Saúl tseʼnimbo̱o̱ mbu̱júu̱. Samuel naʼthúu̱n: ‹Itháan májánʼ muʼnimbulúʼ náa Jeobá ki xóo mixnáxi̱i̱n mugu̱ bi̱ itháan míjínʼ xóo tsigijñaʼ. Numuu rí na̱nguá nitatsimbaaʼ náa Jeobá, ikhaa ní xágiʼdáán xóo rey náa Israel›.

Gi̱i̱ gándoo gájmañuluʼ mbá ikha májánʼ. Nasngájmulúʼ rí gíʼdoo numuu muʼnimbulúʼ má xúʼko̱ náa Jeobá. Ma̱ngaa rígi̱ nasngájmulúʼ, rí mbáa xa̱bu̱ májánʼ, ma̱ndoo mariʼkuminaʼ mani̱ndxu̱u̱ ra̱májánʼ xóo má ni̱jkha̱nú ninindxu̱u̱ Saúl. ¡Nimbá miʼtsú xúgiʼnii ikháanʼlu rúʼko̱! Lá ragájkhun ráʼ.