Kamba̱a̱ rí na̱jkha̱ náa xuajin Damasco

LÁ NATAYÁÁ tsáa ñajunʼ bi̱ kriga̱a̱ kabóoʼ mbayíiʼ ráʼ. Ikhaa nindxu̱u̱ Saulo. Ikhaa niñewu̱u̱n xtíñún xa̱bu̱ bi̱ nixnáá Esteban ga̱jma̱a̱ itsí. ¡Atayáá aguʼ rí naxpíbiʼ! Ndiéjunʼ xtáa rarígá rá.

Nda̱wa̱á rí nikháñu Esteban, Saulo na̱jkha̱ gáñíínʼ xa̱bi̱i̱ Jesús mu maʼniún dí ra̱májánʼ. Nato̱ʼo̱o̱ náa guʼún mu maguwíin mu xúʼko̱ makudiinʼ náa guʼwá e̱jua̱nʼ. Mbaʼin discípulos nagájnún nagún náa i̱ʼwáʼ xuajin ga̱jma̱a̱ ikhí nutaraʼa “ajngáa rí májánʼ”. Mú Saulo na̱jkha̱ náa i̱ʼwáʼ xuajin mu maʼga gáñinʼ xa̱bi̱i̱ Jesús. Rí xúgi̱ na̱jkha̱ náa xuajin Damasco. Mú náa kamba̱a̱ narígá mbá rí tsékujmaa kayuʼ:

Mbá nacháá, mbá aguʼ rí na̱ʼkha̱ mekhuíí nimbiʼiti̱ga̱ náa wíji̱ Saulo. Ikhú ikhaa nixpátriga̱a̱ mbayííʼ, xóo má tayáá gi̱i̱. Ikhú niwan mbá aʼwá rí naʼthí: ‹¡Saulo, Saulo! Náa numuu rí nataniuʼ dí ra̱májánʼ rá.› Xa̱bekha bi̱ na̱jkha̱ gajmíi̱n Saulo nduyáá aguʼ ga̱jma̱a̱ nudxawíín aʼwá, mú na̱nguá ekru̱ʼu̱u̱n rí eʼthí.

Saulo naraxi̱: ‹Tátá, tsáa ñajuanʼ ikháánʼ rá.›

Aʼwá nariʼña̱a̱: ‹Ikhúúnʼ ni̱ndxu̱ʼ Jesús, bi̱ natani̱i̱ dí ra̱májánʼ›. Jesús naʼthí rígi̱ numuu rí Saulo naʼniún dí ra̱májánʼ xa̱bi̱i̱. Numuu rí índo̱ nuniu̱u̱n rígi̱ xa̱bi̱i̱ asndu xóo ikhaa xtáa runi̱i̱ dí ra̱májánʼ.

Rí xúgi̱ Saulo naraxi̱: ‹Tátá, ndiéjunʼ eyaaʼ mani̱ rá.›

Jesús naʼthí: ‹Atuxaʼ ga̱jma̱a̱ ayuʼ náa Damasco. Ikhí gíʼtháanʼ rí gíʼmaa matani›. Índo̱ Saulo natuxi̱i̱ ga̱jma̱a̱ nambaʼtoo iduu, nánguá yexi. ¡Nánguá kruigo̱o̱! Ikha jngó, xa̱bekha bi̱ xtáa gajmíi̱n nurajtun ñawúunʼ mu magun kuya̱a̱ náa xuajin Damasco.

Rí xúgi̱ Jesús naʼthúu̱n mbáa discípulo bi̱ xtáa náa xuajin Damasco: ‹Ananías, atuxaʼ. Ayuʼ náa mbá calle rí mbiʼyuu Recta. Náa goʼwóo Judas gátraxi ga̱jma̱a̱ numuu mbáa xa̱bu̱ bi̱ mbiʼyuu Saulo. Ikhaa ndiʼyáaʼ mu manindxu̱u̱ xa̱bi̱ʼ kiejunʼ›.

Ananías naʼnimbo̱o̱. Índo̱ Ananías ndaʼyoo Saulo, ikhú naxkrámanʼ ga̱jma̱a̱ naʼthúu̱n: ‹Tátá nikuʼmún mu ma̱ndoo matiexi mbu̱júu̱ ga̱jma̱a̱ maraʼdáá espíritu santo›. Núkhu nigajtaa xtáxuo náa iduu Saulo rí nindxu̱u̱ asndu xóo xtáxuo mbáa egi̱ʼ ga̱jma̱a̱ nandoo nayexi mbu̱júu̱.

Saulo najmañuu naʼtaraʼa májánʼ wéñuʼ náa xa̱bu̱ bi̱ kuwa náa mbaʼa xuajin. Na̱jkha̱nú najmaʼniiʼ xóo apóstol Pablo, ga̱jma̱a̱ majmañulúʼ xóo itháan ga̱jma̱a̱ numuu ikhaa. Mú ginii guʼyáá ndiéjunʼ eʼthí Dios maʼni Pedro.