Ganindxa̱a̱ʼ bi̱ májáanʼ a̱jkiu̱u̱n

Dí niʼni Jesús

VIDEO: Jesús naʼni thanuu xa̱bu̱ bi̱ tsíkruigo̱o̱

1. Atayáá VIDEO o atraxnuu Juan 9:​1-7. Nda̱wa̱á atayáá graxe̱ rígi̱:

1. Ndiéjunʼ niʼni ginii Jesús rá. Niʼni thanuu xa̱bu̱ bi̱ tsikruigoo xáʼ, o niʼthúu̱n ginii ajngáa dí májánʼ dxe̱ʼ. (Atayáá Juan 9:​35-38.)

2. Náá numuu dí xa̱bu̱ nixnátiʼñaminaʼ maʼdxawuun dí niʼthí Jesús rá.

Ndiéjunʼ ejmañulúʼ náa xkri̱doo Jesús rá.

2. Mbáa xa̱bu̱ manigu̱u̱ʼ maʼdxawuun itháan á mu naku̱mu̱u̱ dí naxmiéjunlú kuʼyáá.

Atayaridáá Jesús

3. Gakrua̱ʼaaʼ xtayáá xa̱bu̱. Ataniminaʼ matatsaʼwamínáʼ xóo ku̱mu̱u̱ xa̱bu̱.

1. Atraximínaʼ: “Ndiéjunʼ eʼni maxmiéjuunʼ xa̱bu̱ rá. Ndiéjunʼ naniguuʼ mbaʼyoo ga̱jma̱a̱ ndiéjunʼ gámbáyúu xá.” Graxe̱ rígi̱ gámbáyáaʼ ma̱nindxa̱a̱ʼ májáanʼ xa̱bu̱ ga̱jma̱a̱ xúgíʼ a̱jkia̱a̱nʼ.

2. Atagíʼ edxa̱a̱ʼ matadxawíín dí gáʼtháanʼ xa̱bu̱ mu xúʼko̱ mbaʼyoo dí naxmiéjuanʼ xtayáá. Á mu xa̱bu̱ nagíʼdu̱u̱ naʼtháanʼ xóo ku̱mu̱u̱ o naʼtháanʼ xkáʼnii xkujndu gíʼdoo, xátriʼkhu̱u̱ dí xtáa raʼthí.

4. Arathá ga̱jma̱a̱ ajngáa gua̱ba̱ʼ ma̱ngaa ga̱jma̱a̱ gamajkhu. Nakujmaa ga̱jma̱a̱ xóo nuʼthá dí nagáwi̱i̱nʼ a̱jkiu̱lú kuʼyáá mbáa ga̱jma̱a̱ dí nandulúʼ mumbayíí gajkhun. Ikha jngóo atraʼwíí tsumáá dí marata̱ ga̱jma̱a̱ xú káʼnii gárata. Xárata nimbá dí maʼni gawúunʼ xa̱bu̱.

5. Araxnáximinaʼ matambáyii. Mámbá índo̱ gándoo, atambáyii xa̱bu̱. Dí manindxa̱a̱ʼ májánʼ xa̱bu̱ ma̱ndoo mani̱ndxu̱u̱ xóo mbá llave dí mambaʼtoo mbá xkrugua xóo muʼthá mu ma̱ndoo maratamíjná májánʼ ga̱jma̱a̱ʼ.