Jiámá, wa̱ʼxa̱ʼ gu̱ni̱ má xúʼko̱ dí nandoo Dios nda̱wa̱á dí nijnguála iyááʼ

1. Ndiéjunʼ rí niʼngu̱u̱n má nini̱ mbaʼin jiámá rá.

XÚGÍʼ tsiguʼ najngún iyááʼ mbaʼin jiámá mu manindxu̱ún xa̱bi̱i̱ Jeobá. Ikháán nindxa̱a̱ʼ mbáa dí ikhiin xáʼ. Á mu xúʼko̱, xtaʼdiin a̱ngia̱a̱nʼ bi̱ nuni̱ rí nandoo Dios, nadxún kuyaaʼ ga̱jma̱a̱ Jeobá nadxuu ma̱ngaa (Prov. 27:11). Atatsaʼwáminaʼ náa xúgíʼ rí nitani̱ rí asndu xúgi̱. Mbá xkri̱da, nitanigajma̱a̱ má Biblia mbáa mba̱yu̱u̱ʼ tsiguʼ má, ga̱jma̱a̱ rígi̱ niʼni ma̱ta̱ya̱a̱ dí nindxu̱u̱ Ajngá rawuunʼ Dios. Mú rí gíʼdoo itháan numuu, rí xúgi̱ natatsiniiʼ ga̱jma̱a̱ nandaaʼ xtayáá bi̱ niʼthí marigá libro dí mitsúʼkháan. Nandaaʼ xtayáá wéñuʼ Jeobá ga̱jma̱a̱ nitraʼwíí dí maraxnajxíminaʼ ga̱jma̱a̱ dí manguáanʼ iyááʼ. ¡Ra̱ʼkhá tháán májánʼ dí nitraʼwíí matani̱!

2. Ndiéjunʼ gúʼyáá náa artículo rígi̱ rá.

² Mbáa nákhá xóó tséjnguáanʼ iyááʼ, ikháánʼ nitraʼníí mbaʼa xkujndu ga̱jma̱a̱ numuu fe ndrígáaʼ. Mú, xó má ejkha̱ ranújngoo tsiguʼ matraʼníí i̱ʼwáʼ, Gixa̱a̱ maʼni dí maʼga rámbáa ngajua dí xtaʼdáá náa Jeobá ga̱jma̱a̱ dí marájñaaʼ náa ikhaa (Efes. 4:14). Xátatsiʼñáʼ dí ikhaa maʼngo̱o̱. Ndiéjunʼ gámbáyaaʼ mu matani̱ dí nandoo Jeobá ga̱jma̱a̱ matanimbaníí dí niraxnáximinaʼ náa ikhaa xá. Ndayóoʼ rí matani̱ má xúʼko̱, xóo muʼthá: “Gagajáánʼlú má xúʼko̱” (Heb. 6:1). Náa artículo rígi̱ mbuʼyáá xú káʼnii gándoo gúʼni̱.

RÍ MA̱NDOO MATANI̱ MU MATANI̱ MÁ XÚʼKO̱ DÍ NANDOO DIOS

3. Ndiéjunʼ gíʼmaa muni̱ mbá xúgíinʼ cristiano nda̱wa̱á dí nijngún iyááʼ rá.

³ Índo̱ mbáa najngúun iyááʼ, ndayóoʼ maʼnimbánuu consejo rí niʼthí apóstol Pablo, rí niʼthún cristiano bi̱ kúwá náa Éfeso. Niʼthún rí manindxu̱ún “xóo mbáa xa̱bu̱ nikhi̱i̱” bi̱ naʼni rí nanigu̱u̱ʼ Dios (Efes. 4:13). Rí asndu xóo xtáa raʼthún “gágajáánʼla má xúʼko̱”. Pablo niʼnimbríguii xóo ekhi̱i̱ mbáa ada̱ ga̱jma̱a̱ rí mu̱ʼni̱ rí nandoo Dios. Xabuanii nadxún índo̱ nuguáʼdaa mbáa ada̱, mú raʼkháa kámuu má gánindxu̱u̱ xóo mbáa ada̱. Nda̱wa̱á maniñuuʼ raʼni xóo “eʼni mbáa ada̱” (1 Cor. 13:11). Ikhaa má kayuuʼ rí midxuʼnú manindxa̱a̱ʼ mbáa cristiano, nda̱wa̱á dí najngúlú iyááʼ, ndayóoʼ rí magajánʼ má xúʼko̱ náa Dios. Guʼyáá tikhuʼ dí ma̱ndoo mambáyulú mu̱ʼni̱.

4. Dí cualidad gámbáyaaʼ matani̱ rí nandoo Dios ga̱jma̱a̱ náá numuu rá. (Filipenses 1:9.)

⁴ Xátatsiʼñánʼ dí ngajua rí xtaʼdáá na Jeobá mambáa. Gajkhun má dí nandaaʼ xtayáá wéñuʼ Jeobá, mú ngajua rígi̱ ma̱ndoo mba̱ja̱a̱ itháan. Xú káʼnii rá. Apóstol Pablo niʼthí mbá rí ma̱ndoo mu̱ʼni̱, nuxkamaa náa Filipenses 1:9 (atraxnuu). Pablo nindo̱ʼo̱ Jeobá rí ngajua dí niguáʼdáá Filipenses “maʼga rajoo má xúʼko̱”. Rígi̱ nandoo gáʼthúu̱n rí ngajua dí kuaʼdáá náa Dios ma̱ndoo mba̱ja̱a̱ itháan. Mú, ndayóoʼ muʼnigajma̱a̱ mu ‹muguaʼdáá mbá ku̱ma̱ kájxi̱ ga̱jma̱a̱ dí xúgíʼ gákru̱ʼu̱lú›. Rígi̱ nandoo gáʼthúu̱n, á mu rí nuniʼniniiʼ itháan Jeobá, itháan má gáʼndulú kuʼyáá ga̱jma̱a̱ itháan má gánigulú xóo xa̱bu̱ nindxu̱u̱ ma̱ngaa xóo kaʼnii eʼni. Nandulú rí Jeobá maxtáa gagi, nditháan tsíyúlú mu̱ʼni̱ dí ikhaa maxtáa ngíná. Nu̱ʼni̱ tsiakimíjna̱ mu mbuʼyáá ndiéjunʼ dí ikhaa gíʼthu̱u̱n náa ikháánʼlú ga̱jma̱a̱ nduʼyáʼ xóo mu̱ʼni̱.

5, 6. Ndiéjunʼ imbo̱o̱ʼ rí ma̱ndoo mu̱ʼni̱ mu xámbáa ngajua dí kuaʼdáálú náa Jeobá rá.

⁵ Imbo̱o̱ʼ rí ma̱ndoo mu̱ʼni̱ mu rí ngajua dí kuaʼdáálú náa Jeobá xáguámbáa nindxu̱u̱ rí muniʼniiʼ itháan májánʼ a̱ʼdióo bi̱ nisngájma májánʼ xóo kaʼnii nindxu̱u̱ Anu̱u̱ (Heb. 1:3). Mbóoʼ dí xóo ma̱ndoo muniʼniiʼ itháan Jesús, nindxu̱u̱ dí muʼnigajma̱a̱ mbá nájkhu̱ evangelio. Naguʼwáanʼ matraxnuu Biblia xúgíʼ mbiʼi ráʼ. Á mu xóó tsétani̱, ma̱ndoo matagíʼdi̱i̱ nákhá xúgi̱. Índo̱ gátraxnuu dí niʼni ga̱jma̱a̱ dí niʼthí Jesús. Atayáá xóo kaʼnii nindxu̱u̱. Ikhaa nindxu̱u̱ mbáa xa̱bu̱ bi̱ naʼdxaun ga̱jma̱a̱ ma̱ndoo mambajxáaʼ ga̱jma̱a̱ʼ rí asndu nanigu̱u̱ʼ maguraʼiin e̱ji̱n (Mar. 10:13-16). Ma̱ngaa niʼni dí xa̱bi̱i̱ makuwá tsímáá gajmiún ikhaa. Ikha jngóo ikhiin nandoo nuthán xúgíʼ dí nundxaʼwamíjna̱ (Mat. 16:22). Jesús ndiʼyoo xú káʼnii nindxu̱u̱ Anu̱u̱, ikha jngóo xúʼko̱ niʼni ma̱ngaa. Jeobá nindxu̱u̱ bi̱ naʼdxaun. Ikha jngóo ma̱ndoo muʼtákáñíi ga̱jma̱a̱ muʼthán xúgíʼ rí gíwánʼ náa a̱jkiu̱lú. Índo̱ nu̱ʼni̱ xúgíʼ rígi̱, ikhaa tséndxaʼwáminaʼ dí raʼkhí ga̱jma̱a̱ numulú. Nandoo kaʼyulú ga̱jma̱a̱ naxmiéjuunʼ kaʼyulú xúgiáánʼ (1 Ped. 5:7).

⁶ Jesús nigáwíinʼ a̱jkiu̱u̱n kaʼñún xa̱bu̱. Apóstol Mateo naʼthúlú: “Índo̱ ndaʼñún xa̱bu̱, nagáwíinʼ a̱jkiu̱u̱n numuu rí niguma gíníi ga̱jma̱a̱ niguanáti̱gu̱u̱n xóo mugu̱ bi̱ nda̱wa̱a̱ báxtúu ndrígu̱ún” (Mat. 9:36). Xú káʼnii eʼñún xa̱bu̱ Jeobá rá. Dí nuʼthá ga̱jma̱a̱ numuu Anu̱u̱, Jesús niʼthí: “Ikhaa tsíyoo dí mandáti̱ga̱a̱ nimbáa bi̱ chíʼgíiʼ bugi” (Mat. 18:14). ¡Ra̱ʼkhá tháán edxulú rí nduʼyáá dí Jeobá nandoo kaʼyulú wéñuʼ! Á mu nuniʼniiʼ itháan Jesús, maʼndulú kuʼyáá itháan Jeobá.

7. Xú káʼnii gámbáyaaʼ rí mambajxáaʼ gajmiánʼ a̱ngiu̱lú bi̱ gúajun májánʼ gajmiún Dios rá.

⁷ Rígá mbaʼa rí ma̱ndoo matani̱ mu ngajua rí xtaʼdáá náa Jeobá maga̱ja̱a̱ itháan ga̱jma̱a̱ rí matani̱ má xúʼko̱ rí nandoo Dios. Ndiéjunʼ nindxu̱u̱ rúʼko̱ rá. Rí mambajxáaʼ gajmiáanʼ a̱ngiu̱lú bi̱ gúajun májánʼ gajmiún Dios náa congregación. Atayáá dí a̱ngiu̱lú bugi̱ kúwá má xúʼko̱ gagi. Nditháan tsétanga̱a̱ a̱jkiu̱ún dí ikhiin niraʼwi̱i̱ muni̱ ñajuunʼ Jeobá. Arathún dí mutháanʼ experiencia dí ikhiin niguáʼdáá. Ga̱jma̱a̱ índo̱ ikháán gátraʼwi̱i̱ mbá rí gíʼdoo numuu matani̱. Arathún mumbayáaʼ. Xó má eʼthí náa Biblia: “Náa kúwá mbaʼin bi̱ nuxna consejo nagájnuu májánʼ rí nuni̱” (Prov. 11:14).

8. Ndiéjunʼ gándoo matani̱ á mu naʼni a̱jma̱ a̱jkia̱nʼ dí naʼsngáa náa Biblia rá.

⁸ Xátani̱ a̱jma̱ a̱jkia̱nʼ náa dí naʼsngáa Biblia. Xó má ndiʼyáá náa kutriga̱ 2, Gixa̱a̱ maʼni rí ikháán matatsiʼñánʼ ratani̱ dí nandoo Dios. Mbá rí ikhaa najmuu mu matani̱ a̱jma̱ a̱jkia̱a̱nʼ. Ikhaa nandoo rí matatsiʼñánʼ rakuma̱a̱ʼ dí naʼsngáa náa Biblia. Mbá xkri̱da, mbáa midxuʼnú matadxawíín dí mbáa naʼthí ga̱jma̱a̱ numuu evolución, mbá rí naʼni gachúu mbiʼyuu Jeobá. Mbáa nákhá ginii tsétatsaʼwáminaʼ ga̱jma̱a̱ numuu rígi̱. Mú rí xúgi̱, dí nindxa̱a̱ʼ dxámá o dxáʼgú mbáa maestriaaʼ nusngáaʼ ga̱jma̱a̱ numuu rígi̱. Mbáa rí nusngáaʼ ma̱ta̱ya̱a̱ rí asndu gajkhun nindxu̱u̱. Mú atayáá rí ikhiin tséyáʼ majmañún itháan ga̱jma̱a̱ numuu rí xtáa mbáa bi̱ Niʼniwáánʼlú. Garmáʼáan a̱jkia̱nʼ dí naʼthí náa Proverbios 18:17: “Bi̱ naʼthí ginii rí nigíʼnuu nakujmaa rí gajkhun nindxu̱u̱, asndu índo̱ na̱ʼkha̱ i̱mba̱a̱ naraxu̱u̱ ga̱jma̱a̱ numuu rúʼko̱”. Ndiéjunʼ eʼthúlú náa ajngáa rígi̱ rá. Dí ragíʼmaa mbuʼyáá dí gajkhun nindxu̱u̱ xúgíʼ rí nusngáa náa escuela. Rí itháan gíʼmaa mu̱ʼni̱, muʼnigajma̱a̱ itháan Ajngá rawuunʼ Dios, mbuʼyáʼ itháan náa i̱yu̱lú. Guʼtámijná gajmiúlú a̱ngiu̱lú bi̱ nákhá ginii nunimbu̱u̱n náa evolución ga̱jma̱a̱ gurajxu̱u̱n ndiéjunʼ nimbáñún mu mbuyáá rí xtáa mbáa bi̱ niʼniwáánʼlú bi̱ nandoo kaʼyulú. Índo̱ nuʼtámijnálú gajmiúlú a̱ngiu̱lú, xúgiáanʼ nambáyúlú mu mbuʼyáá xú káʼnii nindxu̱u̱ rígi̱.

9. Ndiéjunʼ ejmañaaʼ dí nigíʼnuu Melissa rá.

⁹ Mbáa ndxájulú mbiʼyuu Melissa nimbáyuu wéñuʼ rí niʼnigajma̱a̱ ga̱jma̱a̱ numuu rí nigumawíi.b Ikhaa naʼthí: “Bi̱ nindxu̱ún maestros nusngáa dí evolución nindxu̱u̱ asndu xóo gajkhun. Nákhá ginii namíñúʼ dí manigajma̱a̱ itháan, niku̱mu̱ʼ rí maʼni a̱jma̱ a̱jkiu̱nʼ ga̱jma̱a̱ rí fe ndrígóʼ makáguabaaʼ. Ikha jngóo nigíʼdu̱u̱ ninigajma̱a̱ numuu rí nindxaʼwamínáʼ dí Jeobá tsíyoo mu̱ʼni̱ ñajunʼ ndrígóo á mu rí na̱nguá eʼyáá ndiéjunʼ nindxu̱u̱, numuu rúʼko̱ rí nánguá ni̱ni̱ a̱jma̱ a̱jkiu̱nʼ. Nigúxnuu libro rí mbiʼyuu ¿Existe un Creador que se interese por nosotros? Ga̱jma̱a̱ folleto rí mbiʼyuu Obra de un Creador ma̱ngaa El origen de la vida. Cinco cuestiones dignas de análisis. Índo̱ ninigajma̱a̱ xúgíʼ rígi̱ nijkhánú ndi̱yo̱o̱ rí ikhaa nindxu̱u̱ rí ndayóoʼ majmañuʼ. Nagáwíinʼ a̱jkiu̱nʼ rí na̱nguá ni̱ni̱ rígi̱ asndu nákhá ginii”.

10, 11. Ndiéjunʼ gámbáyaaʼ mu matrikháá rí nagua̱ʼa̱ matani̱ rá. (1 Tesalonicenses 4:3, 4).

¹⁰ Atrikháá rí nagua̱ʼa̱ matani̱. Nákhá nindxa̱a̱ʼ dxámá o dxáʼgú, ikhú nagua̱ʼa̱ xkawiʼ rí mata̱ba̱a̱ʼ ga̱jma̱a̱ʼ mbáa, numuu dí rígi̱ nindxu̱u̱ gakhi̱i̱ wéñuʼ, ga̱jma̱a̱ mbáa eʼwíinʼ nutsudán rí mata̱ba̱a̱ʼ ga̱jma̱a̱ʼ mbáa. Gixa̱a̱ nandoo rí matani̱ rígi̱. Ndiéjunʼ gámbáyaaʼ matrikháá rí nagua̱ʼa̱ matani̱ rá. (Atraxnuu 1 Tesalonicenses 4:3, 4.) Índo̱ gáratakáñíi Jeobá, aratháán xú káʼnii ku̱ma̱a̱ʼ ga̱jma̱a̱ atanda̱ʼa̱a̱ rí maxnáaʼ tsiakii (Mat. 6:13). Garmáʼáan a̱jkia̱nʼ dí Jeobá xtáa mu mambáyaaʼ raʼkháa mu matsíjmán (Sal. 103:13, 14). Biblia ma̱ngaa ma̱ndoo mambáyaaʼ. Melissa bi̱ niʼthá náa kutriga̱ rí ninújngóo, ma̱ngaa nindxa̱ʼwáminaʼ dí ra̱májánʼ. Ikhaa naʼthí: “Ikhúún tániguabaminaʼ núma̱a̱ má dí nigúxnuu Biblia xúgíʼ mbiʼi. Rígi̱ nimbáyúʼ mba̱yo̱o̱ dí vida ndrígóʼ kaʼyoo náa Jeobá, ga̱jma̱a̱ dí ikhúún nandoʼ dí ikhaa maxtáa ga̱jma̱á nindxu̱ʼ” (Sal. 119:9).

¹¹ Xátanimbáníí mbáwíín xkujndu ndrígáaʼ. Aratháán ana̱a̱ʼ ga̱jma̱a̱ rudáa̱ʼ dí xtaa ratagíʼníí. Gajkhun má dí mingíjyúuʼ nindxu̱u̱ dí maratha̱ xóo xtaa ratagíʼníí, mú gíʼdoo wéñuʼ numuu matani̱. Melissa naʼthí: “Nindo̱ʼo̱o̱ Jeobá mambáyúʼ mu xámiñúʼ ga̱jma̱a̱ nithu̱u̱n anu̱ʼ dí xtáá ragíʼnuu. Niku̱mu̱ʼ dí niʼni̱i̱ a̱jkiu̱nʼ. Nda̱yo̱o̱ rí Jeobá nadxuu wéñuʼ kaʼyoʼ”.

12. Ndiéjunʼ gámbáyaaʼ mu matraʼwi̱i̱ májánʼ rí matani̱ rá.

¹² Atatsíñánʼ rí ikha ndrígóo Biblia mambáyaaʼ. Mámbá xóo ejkha̱ ranújngoo tsiguʼ, mi̱dxu̱ʼ rajmañaaʼ xóo matra̱ʼwi̱i̱ dí matani̱. Mú xóó tséjmañaaʼ májánʼ xóo maraxtaa. Ndiéjunʼ gíʼmaa matani̱ mu xátani mbá dí raʼkhí dí maʼnigachúu rí nambájxáaʼ ga̱jma̱a̱ʼ Jeobá rá. (Prov. 22:3.) Mbáa ndxájulú bi̱ mbiʼyuu Kari narmáʼáan a̱jkiu̱u̱n dí ikhaa niʼni índo̱ niraʼwíí rí maʼni. Ni̱jkha̱nú ndiʼyoo rí cristianos bi̱ najmañún tséyóoʼ má dí majuiʼthún náa mámbá dí muni̱. Kari naʼthí: “Raʼkháa i̱ndó rí manimboʼ ikha, ndayóoʼ mba̱yo̱o̱ xú káʼnii eʼyoo Jeobá xúgíʼ dí naraʼwíí ma̱ni̱”. Índo̱ gátraxnuu Biblia, atrajxi̱mínáʼ: “Ndiéjunʼ eʼsngóʼ náa relato rígi̱ ga̱jma̱a̱ xú káʼnii endxa̱ʼwáminaʼ Jeobá rá. Lá rígá mbá ikha gi̱i̱ dí nambáyúʼ mu ma̱ndoo ma̱ni̱ rí májánʼ ráʼ. Á mu natatsíñánʼ dí ikha rígi̱ mambáyaaʼ, ndiéjunʼ gárígá ga̱jma̱a̱ numuu rígi̱ rá.” (Sal. 19:7; Is. 48:17, 18.) Á mu natraxnuu Biblia ga̱jma̱a̱ natatsaʼwáminaʼ dí naʼthí náa ikha ndrígóo xáʼñáanʼ mingíjyúuʼ matra̱ʼwi̱i̱ rí matani̱ ga̱jma̱a̱ rí maxtáa gagi Jeobá. Mámbá índo̱ gídxúʼ rakrua̱ʼa̱a̱ʼ, ma̱ta̱ya̱a̱ xú káʼnii endxaʼwóo edxu̱u̱ Jeobá, ma̱ta̱ya̱a̱ dí tséyóoʼ má majuiʼtháanʼ mámbá rí matani̱. Rúʼko̱ eyoo gáʼthúu̱n rí matani̱ má xúʼko̱ rí nandoo Dios.

13. Xú káʼnii gúmbayaaʼ bi̱ nambájxáaʼ májánʼ gajmiánʼ rá. (Proverbios 13:20.)

¹³ Gambajxáaʼ gajmiánʼ bi̱ nandún kuyáá Jeobá. Xó má ndiʼyáá náa kutriga̱ 7, bi̱ nambájxáaʼ gajmián mumbayáaʼ mu matani̱ má xúʼko̱ ñajunʼ Dios (atraxnuu Proverbios 13:20).c Atayáá dí nigíʼnuu ndxájulú bi̱ mbiʼyuu Sara. Ikhaa nánguá edxuu mu maʼni ñajunʼ Jeobá, mú nirígá mbá rí nimbáyúu. Sara naʼthí: “Índo̱ phú ndayóʼ ikhú nixkamin bi̱ mambajxúʼ májánʼ gajmíʼ. Ikhúún ga̱jmu̱ʼ imba̱a̱ dxáʼgú, nunigajma̱a̱xu̱ xúgíʼ xmáná i̱yi̱ʼ Bi̱ Nayejngoo, ga̱jma̱a̱ imba̱a̱ nimbáyúʼ mu ma̱ni̱ comentar náa reunión. Núma̱a̱ má ga̱jma̱a̱ numún ikhiin, nindoo ndi̱yo̱o̱ rí gíʼdoo wéñuʼ numuu manigajma̱a̱ ga̱jma̱a̱ rí matakáñuu Dios. Mañu mañúú ndiya̱a̱ tsiakii rí mambajxúʼ ga̱jmu̱ʼ Jeobá ga̱jma̱a̱ nidxuʼ mbu̱júu̱ʼ”.

14. Xú káʼnii nixkamiin Julien bi̱ mambajxúu májánʼ gajmíi̱n rá.

¹⁴ Xú káʼnii gándoo mataxkamiin bi̱ mambajxáaʼ gajmiáanʼ rá. Mbáa ndxájulú bi̱ mbiʼyuu Julien ga̱jma̱a̱ rí xúgi̱ nindxu̱u̱ bi̱ kayá edxu̱u̱ naʼthí: “Nákhá nindxu̱ʼ dxámá, nimbájxu̱ʼ májánʼ gajmíʼ a̱ngiu̱lú bi̱ nataráʼa gajmíʼ. Ra̱ʼkhá tháán edxún ga̱jma̱a̱ nimbayúʼ dí mangúún maʼdxuʼ náa nataráʼa. Ikhú niʼgíminaʼ rí ma̱ni̱ kájxi̱ ñajunʼ Dios. Nijkhánú ndi̱yo̱o̱ rí i̱ndó xtáá raʼñíinʼ mambájxúʼ gajmíʼ bi̱ guáʼdáá tsiguúnʼ xóo ikhúún, rúʼko̱ niʼni dí mandátigo̱ʼ rí mambajxúʼ gajmíʼ bi̱ mumbayúʼ mu ma̱ni̱ itháan ñajunʼ Dios. Nda̱wa̱á rí ni̱jkhá náa Betel, ma̱ngaa nixkamiin bi̱ mambajxúʼ májánʼ gajmíʼ. Ikhiin nisngóʼ rí maraʼwi̱i̱ májánʼ rí mba̱yo̱o̱, rúʼko̱ nimbáyúʼ rí mambajxúʼ májánʼ ga̱jmu̱ʼ Jeobá”.

15. Ndiéjunʼ niʼthúu̱n Pablo Timoteo rá. (2 Timoteo 2:20-22.)

¹⁵ Ndiéjunʼ gátani̱ á mu natayáá dí náa congregación xtáa mbáa bi̱ xámbáyáaʼ rá. Apóstol Pablo ndaʼyoo dí cristiano bi̱ nikúwá nákhá siglo timbá, nikúwá tikhun bi̱ tséni̱ xóo phú eni̱gu̱u̱ʼ Dios. Ikha jngóo niʼthúu̱n Timoteo dí xámbájxu̱u̱ gajmíi̱n (atraxnuu 2 Timoteo 2:20-22). Dí mambajxáaʼ ga̱jma̱a̱ʼ Anu̱lú bi̱ xtáa mekhuíí gíʼdoo wéñuʼ numuu, ga̱jma̱a̱ mbaʼa má rí edxa̱ʼ ratani̱ mu mambajxáaʼ májánʼ ga̱jma̱a̱ʼ. Ikha jngóo xátatsiʼñáʼ rí nimbáa maʼnigachúu rígi̱ (Sal. 26:4).

DÍ MARAʼDÁÁ META MAMBÁYAAʼ MATANI̱ ITHÁAN ÑAJUNʼ DIOS

16. Ndiéjunʼ meta rí ma̱ndoo maraʼdáá rá.

¹⁶ Araʼdáá meta rí gíʼdoo numuu. Ndiéjunʼ nindxu̱u̱ rá. Nindxu̱u̱ rí mambáyúu fe ndrígáaʼ ga̱jma̱a̱ rí mambáyáaʼ mani̱ndxa̱a̱ʼ mbáa májáanʼ cristiano (Efes. 3:16). Mbá xkri̱da, ma̱ndoo matanigajma̱a̱ tsejtsíí mbiʼi ga̱jma̱a̱ matraxnuu Biblia (Sal. 1:2, 3). O mbáa ma̱ndoo maratakáñíi má xúʼko̱ Jeobá asndu náa a̱jkia̱nʼ. Ma̱ngaa ndayóoʼ maraʼdáá tsu̱ma̱ índo̱ gátraʼwíí rí ma̱ta̱ya̱a̱ ga̱jma̱a̱ majmañaaʼ majmaaʼ májánʼ mbiʼi ndrígáaʼ (Efes. 5:15, 16). Jeobá nadxuu índo̱ ndaʼyoo rí natani̱ tsiakimínáʼ matani̱ rí ikhaa nanigu̱u̱ʼ.

17. Náá numuu rí mambáyaaʼ wéñuʼ á mu natambáñúún eʼwíinʼ rá.

¹⁷ Índo̱ natambáñúún eʼwíinʼ nagaja̱a̱n xóo mbáa cristiano. Jesús niʼthí: “Rígá itháan gagi dí maraxna̱ ki xóo dí makánaaʼ” (Hech. 20:35). Á mu najmaaʼ mbiʼi ga̱jma̱a̱ tsiakii ndrígáaʼ matambáñún eʼwíinʼ mambáyaaʼ wéñuʼ. Ndiéjunʼ gándoo matani̱ mu matambáñún eʼwíinʼ rá. Mbá xkri̱da, atagíminaʼ matambáñún a̱ngiu̱lú guanii ga̱jma̱a̱ bi̱ naʼñún nandii bi̱ kúwá náa congregación ndrígáaʼ, mi̱dxu̱ʼ gáratsi rí ndañúunʼ o matambáñún xóo majmún celular o tablet ndrígu̱ún. Á mu nindxa̱a̱ʼ mbáa dxámá bi̱ nijngúun má iyááʼ, atagíminaʼ rí manindxa̱a̱ʼ siervo ministerial, mu xúʼko̱ matambáñún itháan a̱ngiu̱lú (Filip. 2:4). Ma̱ngaa ma̱ndoo matasnga̱jmá ngajua índo̱ nadxu̱ʼ gárataráʼa ga̱jma̱a̱ numuu ajngáa rí májánʼ (Mat. 9:36, 37). Á mu naʼngo̱o̱, atagíminaʼ matani̱ tikhuʼ ñajunʼ kájxi̱.

18. Xú káʼnii embáyaaʼ matani̱ kájxi̱ ñajunʼ rí nanigu̱u̱ʼ Dios rá.

¹⁸ Rí matani̱ kájxi̱ mbá ñajunʼ, nambáyaaʼ mu matani̱ itháan ñajunʼ Dios, rí manindxa̱a̱ʼ precursor, ma̱ndoo mi̱dxu̱ʼ náa najuiʼsngún bi̱ nutaraʼa numuu Reino, mi̱dxu̱ʼ Betel o mi̱dxu̱ʼ náa naguma Guʼwá rí nagimbáanʼ. Atayáá xú káʼnii niʼthí mbáa dxáʼgú bi̱ nindxu̱u̱ precursora bi̱ mbiʼyuu Kaitlyn: “Rí mataráʼa gajmíʼ a̱ngiu̱lú bi̱ guáʼdáá itháan experiencia nimbáyúʼ mu ma̱ni̱ itháan ñajunʼ Dios nda̱wa̱á rí nijngúnʼ iyááʼ. Xkri̱da ndrígu̱ún nimbáyúʼ mu manigajma̱a̱ itháan Biblia ga̱jma̱a̱ rí masngáa itháan májánʼ”.

19. Xú káʼnii gáguma tsajkurámááʼ á mu natani̱ má xúʼko̱ rí nandoo Dios rá.

¹⁹ Á mu natani̱ má xúʼko̱ rí nandoo Dios maguma tsajkurámáánʼ wéñuʼ. Xátatsiʼñánʼ manújngoo xúʼkhíinʼ mbiʼi ndrígáaʼ náa dí ragíʼdoo numuu (1 Juan 2:17). Xágáwíinʼ a̱jkia̱nʼ dí tájmañanʼ gátrawi̱i̱ rí matani̱, mú itháan araxtaa gagi, gaʼdxaaʼ ga̱jma̱a̱ araxtaa májánʼ (Prov. 16:3). Xkri̱da ndrígáaʼ mambáñún eʼwíinʼ jiámá ga̱jma̱a̱ a̱ngiu̱lú bi̱ wanii bi̱ kúwá náa congregación (1 Tim. 4:12). Dí gíʼdoo itháan numuu, dí ikháán maraxtaa gagi ga̱jma̱a̱ maʼdxanʼ índo̱ gáta̱ya̱a̱ dí Jeobá nagruiguíín ga̱jma̱a̱ rí nambájxa̱a̱ʼ ga̱jma̱a̱ʼ (Prov. 23:15, 16).