Mateus

1 Neʼe mak livru neʼebé konta kona-ba Jesus Kristu nia moris. Nia mak David nia oan* no Abraão nia oan:

17 Nuneʼe, husi Abraão toʼo David, iha jerasaun sanulu-resin-haat, no husi David toʼo tempu neʼebé ema judeu sai dadur iha Babilónia, iha jerasaun sanulu-resin-haat, no husi tempu dadur iha Babilónia toʼo Kristu, iha jerasaun sanulu-resin-haat.

18 Jesus Kristu nia moris mak hanesan neʼe: Durante tempu neʼebé ninia inan Maria promete ona atu sai José nia kaben, Maria sai isin-rua liuhusi espíritu santu,* maski sira seidauk moris hamutuk nuʼudar feen-laʼen. 19 Maibé, tanba ninia laʼen José mak ema laran-loos no lakohi atu hamoe nia, José hanoin atu soe malu ho nia subasubar deʼit. 20 Depois nia hanoin tiha kona-ba buat sira-neʼe, haree! Jeová* nia anju ida mosu ba José iha mehi, no hatete: “José, David nia oan, keta taʼuk atu kaben ho Maria,* tanba labarik neʼebé iha ninia knotak mak liuhusi espíritu santu. 21 Nia sei tuur ahi oan-mane ida, no ó tenke hanaran nia Jesus, tanba nia sei salva ninia povu husi sira-nia sala.” 22 Buat hotu neʼe mosu duni, atu halo tuir loloos liafuan neʼebé Jeová hatete liuhusi ninia profeta, hodi dehan: 23 “Haree! Feto virjen ida sei sai isin-rua no sei tuur ahi oan-mane ida, no sira sei hanaran nia Emanuel”, katak: “Maromak hamutuk ho ita.”

24 Depois neʼe, José hadeer no halo tuir buat neʼebé Jeová nia anju hatete ba nia atu halo, no José kaben ho Maria.* 25 No nia la halo relasaun* ho Maria toʼo tempu neʼebé Maria tuur ahi oan-mane ida, no José hanaran nia Jesus.

2 Jesus moris iha Belein iha rai-Judeia, iha Liurai Herodes nia tempu. No tuirmai ema siʼikdór sira neʼebé haree fitun* mai husi parte leste hodi bá toʼo Jeruzalein. 2 No sira husu: “Ida neʼebé moris mai nuʼudar liurai judeu sira-nian iha neʼebé? Ami haree ninia fitun kuandu ami iha parte leste, no ami mai atu monu ain ba nia.” 3 Kuandu rona tiha kona-ba neʼe, Liurai Herodes no ema Jeruzalein tomak hahú sai laran-taridu tebes. 4 Entaun, nia halibur ulun-naʼin amlulik sira no eskriba* sira no nia hahú husu ba sira kona-ba Kristu sei moris loos iha neʼebé. 5 Sira hatete ba nia: “Iha Belein iha Judeia, basá buat neʼebé profeta hakerek ona mak neʼe: 6 ‘Ó, Belein iha rai-Judá, ukun-naʼin hotu iha rai-Judá sei la haree ó nuʼudar sidade kiʼik, tanba husi ó mak ida neʼebé atu ukun sei mosu mai, no nia sei sai nuʼudar bibi-atan ba haʼu-nia povu Izraél.’”

7 Tuirmai, Herodes bolu subasubar deʼit ema siʼikdór sira-neʼe no nia husu ba sira kona-ba tempu neʼebé fitun neʼe mosu. 8 No nia haruka sira bá Belein, hodi dehan: “Bá buka didiʼak labarik kiʼik neʼe, no kuandu imi hetan ona nia fó-hatene fali mai haʼu, atu nuneʼe haʼu mós bele bá no monu ain ba nia.” 9 Rona tiha buat neʼebé liurai hatete, sira bá, no fitun neʼebé sira haree kuandu sira iha parte leste laʼo uluk iha sira-nia oin, no para iha fatin neʼebé labarik kiʼik neʼe hela bá. 10 Kuandu sira haree fitun neʼe para, sira haksolok tebetebes. 11 No tama tiha ba uma laran, sira haree labarik kiʼik neʼe hamutuk ho nia inan Maria, no sira hatudu respeitu hodi hakneʼak iha labarik neʼe nia oin. Sira mós hasai sira-nia rikusoin no fó ba nia nuʼudar prezente. Sira fó osan-mean no buat morin oin rua.* 12 Maibé, tanba Maromak fó avizu ba sira iha mehi atu la bele fila fali ba Herodes, sira fila ba sira-nia rai liuhusi dalan seluk.

13 Depois sira bá tiha, Jeová nia anju mosu ba José iha mehi, no hatete: “Hamriik bá, lori labarik neʼe ho nia inan halai ba rai-Ejitu hodi hela iha neʼebá toʼo haʼu fó-hatene ba ó, tanba lakleur tan Herodes sei buka labarik neʼe atu oho.” 14 Tan neʼe, iha kalan neʼe kedas nia hamriik no lori labarik neʼe ho ninia inan ba rai-Ejitu, 15 no nia hela iha neʼebá toʼo Herodes mate. Ida-neʼe kumpre liafuan neʼebé Jeová koʼalia liuhusi ninia profeta, neʼebé dehan: “Husi Ejitu mak haʼu bolu haʼu-nia oan-mane.”

16 Kuandu Herodes haree katak ema siʼikdór sira-neʼe bosok nia, nia sai hirus tebetebes. No depois nia sura tiha tempu hodi tuir informasaun neʼebé ema siʼikdór sira fó-hatene ba nia, nia haruka ninia atan sira bá Belein no bá distritu sira neʼebé besik, atu oho labarik-mane hotu neʼebé tinan rua ba kraik. 17 Neʼe kumpre liafuan neʼebé profeta Jeremias hatete ona, neʼebé dehan: 18 “Ema rona lian tanis no halerik makaʼas iha Ramá. Neʼe mak Rakel neʼebé tanis ba ninia oan, no nia lakohi atu simu kmaan, tanba ninia oan sira la iha ona.”

19 Kuandu Herodes mate ona, Jeová nia anju mosu ba José liuhusi mehi ida iha Ejitu, 20 no hatete: “Hamriik bá, lori labarik kiʼik neʼe ho ninia inan no laʼo ba rai-Izraél, tanba sira neʼebé buka atu halakon labarik neʼe nia moris,* mate tiha ona.” 21 Tan neʼe, nia hamriik no lori labarik neʼe ho ninia inan no sira laʼo hodi fila fali ba rai-Izraél. 22 Maibé José sai taʼuk atu bá Judeia tanba nia rona katak Arkelau mak ukun nuʼudar liurai iha neʼebá, hodi troka ninia aman Herodes. Liután neʼe, nia hetan avizu husi Maromak liuhusi mehi, no tan neʼe nia laʼo fali ba área Galileia nian, 23 hodi hela iha sidade naran Nazaré. Ida-neʼe mosu atu bele kumpre liafuan neʼebé profeta hatete: “Ema sei bolu nia nuʼudar ema Nazaré.”

3 Tuirmai João Batista komesa haklaken iha rai-fuik Judeia nian, 2 hodi dehan: “Hakribi sala bá, tanba Ukun* lalehan nian besik ona.” 3 Tuir loloos, profeta Isaías koʼalia nanis kona-ba ema neʼe hodi dehan: “Rona bá! Ema ida iha rai-fuik hakilar: ‘Prepara dalan ba Jeová! Halo loos nia dalan sira.’” 4 No kona-ba João, ninia hatais halo husi kuda-kamelu nia fulun no nia tau sintu neʼebé halo husi animál nia kulit. Ninia ai-han mak gafañotu no bani-been. 5 Tuirmai, ema husi Jeruzalein no husi rai-Judeia tomak no mós husi rai hotu neʼebé besik Mota Jordaun bá hodi haree nia. 6 No nia fó batizmu ba sira iha Mota Jordaun, no sira fó sai sira-nia sala iha ema nia oin.

7 Kuandu João haree ema farizeu* no saduseu* barak hakbesik ba fatin neʼebé nia fó batizmu, nia hatete ba sira: “Imi samea nia oan sira, sé mak hatete ba imi katak imi bele halai-sees husi Maromak nia hirus neʼebé atu mai? 8 Tan neʼe, halo hahalok* neʼebé hatudu katak imi hakribi imi-nia sala. 9 Keta hanoin no hatete ba imi-nia an: ‘Ami-nia aman mak Abraão.’ Basá haʼu hatete ba imi katak Maromak bele halo fatuk sira-neʼe sai Abraão nia oan. 10 Baliu tau ona iha ai nia hun. Tan neʼe, ai hotu neʼebé la fó fuan diʼak sei tesi tiha no soe ba ahi. 11 Haʼu fó batizmu ba imi ho bee tanba imi hakribi imi-nia sala, maibé Ida neʼebé atu mai depois haʼu, nia iha kbiit boot liu fali haʼu, no ninia sandálias deʼit mós haʼu la merese atu hasai. Nia sei fó batizmu ba imi ho espíritu santu no ho ahi. 12 Iha nia liman, nia kaer ona buat neʼebé uza atu haketak trigu,* no nia sei hamoos hotu fatin sama trigu nian no nia sei haloot trigu ba fatin trigu nian, maibé trigu nia kulit nia sei sunu ho ahi neʼebé sei la mate.”

13 Tuirmai, husi Galileia Jesus bá toʼo Mota Jordaun hodi hetan batizmu husi João. 14 Maibé João koko atu hanetik nia, hodi dehan: “Haʼu mak ida neʼebé presiza hetan batizmu husi Ita, entaun tansá mak Ita hakarak hetan batizmu husi haʼu?” 15 Jesus hatán ba nia: “Agora husik lai bá, tanba hodi halo nuneʼe mak ita halo buat hotu neʼebé loos.” Ho ida-neʼe, João para atu hanetik nia. 16 Hetan tiha batizmu, Jesus sai husi bee, no tuirmai lalehan nakloke, no nia haree Maromak nia espíritu hanesan manu-pombu ida tun ba Jesus. 17 No mós, lian ida husi lalehan dehan: “Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.”

4 Liutiha neʼe, espíritu santu lori Jesus bá rai-fuik, no Diabu* tenta nia. 2 Depois nia jejún tiha ba loron haatnulu no kalan haatnulu, nia sente hamlaha. 3 Iha tempu neʼe, Diabu mai hodi tenta nia dehan: “Se ó Maromak nia oan ida karik, haruka fatuk sira-neʼe atu sai paun.” 4 Jesus hatán: “Hakerek nanis ona: ‘Ema sei la moris deʼit ho paun, maibé ho liafuan hotu neʼebé sai husi Jeová nia ibun.’”

5 Tuirmai, Diabu lori nia ba sidade santu, no tau nia iha templu nia moru leten, 6 no hatete ba nia: “Se ó Maromak nia oan ida karik, soe ó-nia an ba kraik, basá hakerek nanis ona: ‘Nia sei haruka nia anju sira atu proteje ó, no sira sei lori ó iha sira-nia liman, atu nuneʼe ó-nia ain sei la kona fatuk ida.’” 7 Jesus hatán ba nia: “Dala ida tan, hakerek nanis ona: ‘Ó labele koko Jeová, ó-nia Maromak.’”

8 Tuirmai, Diabu lori nia ba foho neʼebé aas tebes, no hatudu ba nia mundu nia ukun hotu no sira-nia glória, 9 hodi hatete ba nia: “Buat hotu neʼe haʼu sei fó ba ó, se ó adora haʼu.”* 10 No Jesus hatete ba nia: “Bá dook tiha Satanás! Tanba hakerek nanis ona: ‘Ó tenke adora Jeová ó-nia Maromak, no ba nia deʼit mak ó tenke halo serbisu santu.’” 11 Tuirmai Diabu husik nia, no anju sira mai no hahú atu fó ajuda ba Jesus.

12 Rona tiha katak ema kaer ona João, Jesus laʼo ba Galileia. 13 No tuirmai, depois sai tiha husi Nazaré, nia bá hela iha Kafarnaum, besik tasi iha área Zabulon no Neftali. 14 Ida-neʼe kumpre profeta Isaías nia liafuan neʼebé dehan: 15 “Oh, rai-Zabulon no rai-Neftali, iha dalan tasi nian, iha Mota Jordaun nia sorin bá, Galileia nasaun sira-nian! 16 Ema sira neʼebé hela iha nakukun laran haree naroman boot, no naroman mosu ba sira neʼebé hela iha rai ho lalatak mate nian.” 17 Husi tempu neʼebá, Jesus hahú haklaken no dehan: “Hakribi sala bá, tanba Ukun lalehan nian besik ona.”

18 Laʼo daudaun tuir tasi-ibun Galileia nian, nia haree maun-alin naʼin-rua, Simão neʼebé ema bolu Pedro, no André. Sira soe hela rede ba tasi tanba sira mak ema peskadór. 19 No nia hatete ba sira: “Mai tuir haʼu, no haʼu sei halo imi sai peskadór ba ema.” 20 Sira husik kedas sira-nia rede no laʼo tuir nia. 21 Laʼo uitoan ba oin, nia haree maun-alin naʼin-rua tan, Tiago no João. Sira iha ró laran hamutuk ho sira-nia aman Zebedeu hodi hadiʼa hela sira-nia rede, no nia bolu sira. 22 Sira husik kedas ró no sira-nia aman hodi laʼo tuir nia.

23 Tuirmai, nia laʼo iha Galileia tomak hodi hanorin iha sira-nia sinagoga sira no haklaken liafuan diʼak kona-ba Maromak nia Ukun, no nia mós kura moras oioin iha ema nia leet. 24 Ema iha Síria tomak rona kona-ba nia, no sira lori ba nia ema sira neʼebé moras boot, sira neʼebé neon-susar tanba moras oioin no terus, sira neʼebé anju aat domina no sira neʼebé iha moras bibi-maten, no mós sira neʼebé isin-matek, no nia kura sira hotu. 25 Tan neʼe, ema-lubun boot laʼo tuir nia. Ema sira-neʼe mai husi Galileia no Dekápolis* no Jeruzalein no Judeia no mós husi Mota Jordaun nia sorin bá.

5 Kuandu nia haree ema-lubun neʼe, nia saʼe ba foho ida. No depois nia tuur tiha, ninia dixípulu sira hakbesik nia, 2 no nia hahú hanorin sira dehan:

3 “Kontente ba sira neʼebé hatene katak sira presiza Maromak nia matadalan,* tanba Ukun lalehan nian mak sira-nian.

4 “Kontente ba sira neʼebé triste, tanba sira sei hetan laran-kmaan.

5 “Kontente ba sira neʼebé laran-maus, tanba sira sei simu rai nuʼudar liman-rohan.

6 “Kontente ba sira neʼebé hamlaha no hamrook ba buat loos, tanba sira sei sai bosu.

7 “Kontente ba sira neʼebé hatudu laran-sadiʼa, tanba sira sei hetan laran-sadiʼa.

8 “Kontente ba sira neʼebé laran moos, tanba sira sei haree Maromak.

9 “Kontente ba sira neʼebé buka dame, tanba ema sei bolu sira Maromak nia oan.

10 “Kontente ba sira neʼebé hetan terus tanba halo buat loos, basá Ukun lalehan nian mak sira-nian.

11 “Kontente ba imi kuandu ema koʼalia aat imi no fó-terus ba imi no koʼalia lia-bosok oioin neʼebé aat hasoru imi tanba haʼu. 12 Haksoit bá ho haksolok, tanba imi-nia kolen boot tebes iha lalehan, basá iha dalan hanesan neʼe mós sira fó-terus ba profeta sira neʼebé uluk liu imi.

13 “Imi masin rai neʼe nian, maibé se masin lakon ninia meer, oinsá mak nia sei sai meer fali? Ema sei la uza tan nia ba buat ida, no sei soe tiha ba liʼur atu ema sama.

14 “Imi mak mundu nia naroman. Kuandu sidade ida harii iha foho leten, fasil loos ba ema atu haree. 15 Ema sunu ahi-oan laʼós atu taka ho raga, maibé atu tau iha fatin aas, hodi nuneʼe fó naroman ba ema hotu iha uma laran. 16 Nuneʼe mós, halo imi-nia naroman nabilan iha ema nia oin, atu sira bele haree hahalok diʼak neʼebé imi halo no fó hahiʼi ba imi-nia Aman neʼebé iha lalehan.

17 “Keta hanoin katak haʼu mai atu halakon Ukun-Fuan ka liafuan profeta sira-nian. Haʼu mai laʼós atu halakon, maibé atu kumpre. 18 Basá haʼu hatete loloos ba imi katak, maski karik lalehan no rai sei lakon, maibé letra kiʼik ida ka sinál kiʼik husi letra ida sei la lakon iha Ukun-Fuan toʼo buat hotu sai loos. 19 Neʼe duni, ema naran deʼit neʼebé la halo tuir mandamentu kiʼik sira-neʼe ida no hanorin ema atu la halo tuir, nia sei la merese atu tama ba Ukun lalehan nian. Maibé, ema sira neʼebé halo tuir no hanorin kona-ba buat sira-neʼe, ema neʼe merese atu tama ba Ukun lalehan nian. 20 Tanba haʼu hatete ba imi katak se imi la hatudu hahalok loos liu fali ema eskriba no farizeu sira, imi sei la tama duni ba Ukun lalehan nian.

21 “Imi rona liafuan ba ema iha tempu uluk dehan: ‘Ó keta oho, no ema naran deʼit neʼebé oho ema seluk, sei hatán iha tribunál.’ 22 Maibé haʼu dehan ba imi katak ema naran deʼit neʼebé kontinua hirus ninia maun-alin sei hatán iha tribunál, no ema naran deʼit neʼebé koʼalia aat ba ninia maun-alin sei hatán iha tribunál aas liu,* no liután neʼe, ema neʼebé hatete: ‘Ó beik-teen loos!’ sei hetan kastigu iha Gehena* neʼebé lakan.

23 “Neʼe duni, se ó lori daudaun ó-nia prezente ba altár no ó hanoin-hetan katak ó-nia maun-alin iha buat ruma hasoru ó, 24 husik lai ó-nia prezente iha altár oin, no bá hodi halo dame uluklai ho ó-nia maun-alin. Tuirmai, kuandu ó fila fali, fó ó-nia prezente neʼe.

25 “Sai lalais atu hadiʼa ó-nia problema ho ema neʼebé iha buat ruma hasoru ó kona-ba ukun-fuan, hodi halo dame ho nia kuandu imi laʼo hamutuk ba tribunál. Se lae karik, nia sei entrega ó ba tesi-lia naʼin no tesi-lia naʼin sei entrega ó ba guarda, no sei hatama ó iha komarka laran. 26 Haʼu dehan loloos ba ó katak, ó sei la sai husi fatin neʼe toʼo ó selu osan hotu.

27 “Imi rona liafuan ba ema iha tempu uluk dehan: ‘Ó keta halo sala-foʼer.’* 28 Maibé haʼu hatete ba imi katak ema neʼebé hateke beibeik ba feto ida toʼo kaan nia, ema neʼe halo ona sala-foʼer* ho feto neʼe iha ninia laran. 29 Neʼe duni, se ó-nia matan sorin loos halo ó sidi,* losu sai nia no soe dook tiha. Tanba diʼak liu ba ó se ó lakon parte ida husi ó-nia isin duké ó-nia isin-lolon tomak sei soe ba Gehena. 30 No mós, se ó-nia liman sorin loos halo ó sidi, tesi sai nia no soe dook tiha. Tanba diʼak liu ba ó se ó lakon parte ida husi ó-nia isin duké ó-nia isin-lolon tomak sei soe ba Gehena.

31 “Liután neʼe, imi rona liafuan: ‘Ema neʼebé soe ninia feen, nia tenke fó surat soe-malu nian ba ninia feen.’ 32 Maibé, haʼu hatete ba imi katak ema neʼebé soe malu ho nia feen maski nia feen la halo sala-foʼer,* nia tau nia feen iha perigu laran tanba nia feen bele monu ba sala-foʼer.* No ema naran deʼit neʼebé kaben ho feto neʼebé soe malu,* ema neʼe mós halo sala-foʼer.

33 “Dala ida tan, imi rona liafuan ba ema iha tempu uluk dehan: ‘Ó labele jura se ó la halo tuir, maibé ó tenke kumpre ó-nia promete ba Jeová.’ 34 Haʼu fali dehan ba imi: Keta jura kona-ba buat naran deʼit. Keta jura hodi lalehan basá neʼe mak Maromak nia kadunan. 35 No keta jura hodi rai, basá neʼe mak fatin ba Maromak atu tau nia ain. No mós keta jura hodi Jeruzalein, basá neʼe mak sidade ba Liurai boot. 36 No mós keta jura hodi ó-nia ulun, basá ó la bele halo fuuk-lahan ida sai mutin ka metan. 37 Maibé, se imi dehan ‘sin’, tenkesér sin, no ‘lae’, tenkesér lae, tanba liu fali ida-neʼe mai husi aat-naʼin.

38 “Imi rona liafuan ba ema iha tempu uluk dehan: ‘Matan selu ho matan no nehan selu ho nehan.’ 39 Maibé haʼu hatete ba imi: Keta kontra hasoru ema aat. Se ema ruma basa ó-nia hasan sorin loos, see tan ó-nia hasan sorin karuk ba nia. 40 No se ema ida hakarak atu bá tribunál ho ó no foti ó-nia roupa ida, fó tan ba nia ó-nia roupa seluk neʼebé ó uza. 41 Se ema ruma obriga ó atu halo serbisu ba nia hodi laʼo ba kilómetru ida, laʼo ho nia ba kilómetru rua. 42 Fó bá, kuandu ema husu ajuda, no keta fila kotuk ba ema neʼebé hakarak husu empresta husi ó.

43 “Imi rona liafuan ba ema iha tempu uluk dehan: ‘Ó tenke hadomi ó-nia maluk no odi ó-nia inimigu.’ 44 Maibé, haʼu hatete ba imi: Hadomi nafatin imi-nia inimigu no harohan ba sira neʼebé haterus imi, 45 atu imi bele hatudu katak imi mak oan husi imi-nia Aman iha lalehan, tanba nia halo loro-matan saʼe ba ema aat no mós ema diʼak, no halo udan tun ba ema laran-loos no mós ema aat. 46 Tanba se imi hadomi deʼit ema neʼebé hadomi imi, imi hetan kolen saida? Laʼós ema kobradór impostu sira mós halo hanesan? 47 No se imi kumprimenta deʼit imi-nia maun-alin sira, imi halo buat diʼak saida? Laʼós ema husi nasaun sira seluk mós halo hanesan? 48 Imi tenke sai perfeitu,* hanesan imi-nia Aman iha lalehan mós perfeitu.

6 “Kuidadu bá atu imi la halo hahalok loos hodi hatudu an iha ema nia oin atu sira bele haree. Tanba se lae karik, imi sei la hetan kolen husi imi-nia Aman iha lalehan. 2 Tan neʼe, kuandu imi fó buat diʼak ruma ba ema kiak, keta huu uluk trombeta,* hanesan ema laran-makerek sira halo iha sinagoga no iha dalan, atu nuneʼe ema bele hahiʼi sira. Haʼu hatete loloos ba imi katak sira simu ona sira-nia kolen tomak. 3 Maibé kona-ba ó, kuandu ó fó buat diʼak ruma ba ema kiak, keta husik ó-nia liman-karuk hatene buat neʼebé ó-nia liman-loos halo, 4 atu nuneʼe, ema sei la haree kuandu ó fó buat diʼak ruma ba ema kiak, no ó-nia Aman neʼebé haree buat hotu* sei fó kolen ba ó.

5 “No mós, kuandu imi halo orasaun, imi keta halo hanesan ema laran-makerek sira, tanba sira halo orasaun hodi hamriik iha sinagoga sira no iha lurón boot nia sikun, atu nuneʼe ema bele haree sira. Haʼu hatete loloos ba imi katak sira simu ona sira-nia kolen tomak. 6 Maibé kona-ba ó, kuandu ó halo orasaun, tama iha ó-nia kuartu laran no taka odamatan, depois neʼe halo orasaun ba ó-nia Aman iha lalehan, no ó-nia Aman neʼebé haree buat hotu sei fó kolen ba ó. 7 Maibé kuandu halo orasaun, keta dehan beibeik liafuan neʼebé hanesan, hodi tuir buat neʼebé ema husi nasaun seluk halo, basá sira hanoin katak Maromak sei rona sira tanba sira uza liafuan barabarak. 8 Tan neʼe, keta halo imi-nia an hanesan sira, tanba imi-nia Aman Maromak hatene saida mak imi presiza antes imi husu ba nia.

9 “Neʼe duni, imi tenke halo orasaun nuneʼe:

“‘Ami Aman iha lalehan, ami hakarak atu Ita-nia naran sai santu.* 10 Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan. 11 Fó mai ami ai-han* ba ohin nian, 12 no fó perdua ba ami-nia sala,* nuʼudar ami mós perdua ona ema neʼebé halo sala mai ami. 13 Keta husik ami monu ba tentasaun,* maibé salva ami husi aat-na’in.’

14 “Tanba se imi fó perdua ba ema neʼebé halo sala hasoru imi, imi-nia Aman iha lalehan mós sei perdua imi. 15 Maibé se imi la fó perdua ba ema neʼebé halo sala hasoru imi, imi-nia Aman mós sei la fó perdua ba imi-nia sala.

16 “Kuandu imi jejún, keta hatudu oin triste hanesan ema laran-makerek sira, tanba sira la tau matan ba sira-nia an atu nuneʼe ema bele haree katak sira jejún. Haʼu hatete loloos ba imi katak sira simu ona sira-nia kolen tomak. 17 Maibé kona-ba ó, kuandu ó jejún, tau mina ba ó-nia ulun no fase ó-nia oin, 18 atu nuneʼe, ó halo jejún laʼós ba ema, maibé ba ó-nia Aman iha lalehan, no ó-nia Aman neʼebé haree buat hotu sei fó kolen ba ó.

19 “Keta* haloot ba ó-nia an rikusoin iha rai, iha neʼebé ular* no ferrujen han mohu tiha, no naʼok-teen tama hodi naʼok. 20 Maibé, haloot ba ó-nia an rikusoin iha lalehan, iha neʼebé ular no ferrujen la han mohu, no naʼok-teen la bele tama hodi naʼok. 21 Basá iha fatin neʼebé ó tau ó-nia rikusoin, iha fatin neʼe mós ó-nia fuan sei hela bá.

22 “Ó-nia isin nia ahi-oan mak ó-nia matan. Tan neʼe, se ó-nia matan haree momoos,* ó-nia isin-lolon tomak sei nabilan. 23 Maibé se ó-nia matan hateke ba buat neʼebé aat,* ó-nia isin-lolon tomak sei nakukun. Neʼe duni, se naroman neʼebé iha ó-nia laran sai nakukun, nakukun neʼe sei sai boot tebes!

24 “Ema ida la bele sai atan ba naʼi-ulun rua, tanba nia sei odi ida no hadomi ida seluk, ka sei apoia ida no hakribi ida seluk. Imi la bele sai atan ba Maromak no ba Rikusoin.

25 “Tan neʼe haʼu hatete ba imi: Keta* hanoin resin kona-ba imi-nia moris,* atu han saida ka atu hemu saida, ka kona-ba imi-nia isin, atu hatais saida. Moris* iha folin-boot liu fali ai-han no isin iha folin-boot liu fali hatais, loos ka lae? 26 Haree didiʼak ba manu sira iha lalehan. Sira la kuda, la koʼa, ka la halibur fini ba ai-han fatin. Maski nuneʼe, imi-nia Aman iha lalehan fó-han ba sira. Imi mak folin-boot liu fali sira, loos ka lae? 27 Imi ida neʼebé mak hodi hanoin barak, bele aumenta ninia moris ba tempu uitoan tan? 28 No mós kona-ba hatais, tansá mak imi hanoin barak? Haree didiʼak ba ai-funan iha rai-luan, no oinsá sira moris. Sira la serbisu no la suku, 29 maibé haʼu dehan ba imi katak, maski Salomão iha buat furak oioin, nia la hatais hanesan ai-funan sira-neʼe ida. 30 Entaun, se Maromak fó hatais ba ai-horis iha rai-luan neʼebé agora iha no aban soe tiha ba ahi, nia sei hakarak liután atu fó hatais ba imi neʼebé fiar kiʼik, loos ka lae? 31 Tan neʼe, keta hanoin barak no dehan: ‘Saida mak ami sei han?’ ka, ‘Saida mak ami sei hemu?’ ka, ‘Saida mak ami sei hatais?’ 32 Tanba buat hotu neʼe mak nasaun seluk buka namanas. Maibé, imi-nia Aman iha lalehan hatene katak imi presiza buat hotu neʼe.

33 “Neʼe duni, kontinua buka uluknanain Maromak nia Ukun no ninia hakarak,* no buat sira seluk nia sei fó mós ba imi. 34 Tan neʼe, keta hanoin barak kona-ba loron tuirmai, basá loron tuirmai iha ninia susar rasik. Tanba loron ida-idak iha ninia problema rasik.

7 “Keta tesi lia ba ema, atu Maromak la tesi lia ba imi, 2 tanba dalan neʼebé imi tesi lia ba ema, Maromak mós sei tesi lia ba imi, no buat neʼebé imi sukat ba ema, nuneʼe mós ema sei sukat ba imi. 3 Entaun, tansá ó haree duʼut-lahan iha ó-nia maluk nia matan, maibé ó la haree ai-kabelak* iha ó-nia matan rasik? 4 Ka oinsá mak ó bele dehan ba ó-nia maluk: ‘Husik haʼu hasai duʼut-lahan neʼe husi ó-nia matan’, maibé iha ai-kabelak ida iha ó-nia matan rasik? 5 Ema laran-makerek! Hasai uluklai ai-kabelak husi ó-nia matan rasik, no depois neʼe ó bele haree ho momoos oinsá atu hasai duʼut-lahan husi ó-nia maluk nia matan.

6 “Keta fó buat neʼebé santu ba asu, no mós keta soe imi-nia fatuk-murak* iha fahi nia oin, tanba sira sei sama deʼit iha sira-nia ain okos no fila hodi ataka imi.

7 “Kontinua husu, no imi sei simu. Kontinua buka, no imi sei hetan. Kontinua tuku odamatan, no odamatan sei loke ba imi. 8 Tanba ema neʼebé husu sei simu, no ema neʼebé buka sei hetan, no ema neʼebé tuku odamatan, odamatan sei loke. 9 Iha imi-nia leet, la iha ema ida neʼebé fó fatuk ba ninia oan kuandu nia oan husu paun, loos ka lae? 10 Ka, se ninia oan husu ikan, nia sei la fó samea ba nia oan, loos ka lae? 11 Tan neʼe, maski imi ema sala-naʼin hatene fó buat diʼak ba imi-nia oan sira, oinsá liután ho imi-nia Aman iha lalehan! Nia sei fó duni buat diʼak ba sira neʼebé husu ba nia.

12 “Neʼe duni, buat hotu neʼebé imi hakarak ema halo ba imi, imi mós tenke halo ba sira. Tuir loloos, neʼe mak buat neʼebé Ukun-Fuan no profeta* sira hanorin.

13 “Laʼo liuhusi odamatan kloot bá, basá dalan boot no luan mak lori ema ba mate, no ema barak laʼo liuhusi nia. 14 Maibé odamatan kloot no dalan kiʼik tebes mak lori ema ba moris, no ema uitoan deʼit mak hetan nia.

15 “Matan-moris kona-ba profeta falsu sira neʼebé mosu ba imi hodi hatais hanesan bibi-malae, maibé tuir loloos, sira hanesan asu-fuik neʼebé hamlaha tebes. 16 Liuhusi sira-nia hahalok* imi bele hatene sira. Ema nunka kuʼu uvas husi ai-tarak ka ai-figeira fuan husi duʼut-aat, loos ka lae? 17 Nuneʼe mós, ai-hun hotu neʼebé diʼak sei fó fuan diʼak, maibé ai-hun hotu neʼebé dodok sei fó fuan aat. 18 Ai-hun diʼak ida la bele fó fuan aat, no ai-hun neʼebé dodok la bele fó fuan diʼak. 19 Ai-hun hotu neʼebé la fó fuan diʼak sei tesi tiha no soe ba ahi. 20 Entaun, liuhusi sira-nia hahalok* imi bele hatene ema sira-neʼe.

21 “Laʼós ema hotu neʼebé dehan mai haʼu: ‘Naʼi, Naʼi’, sei tama ba Ukun lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama. 22 Ema barak sei dehan mai haʼu iha loron neʼebá: ‘Naʼi, Naʼi, ami koʼalia no duni sai anju aat sira, no mós halo milagre sira ho Ita-Boot nia naran, loos ka lae?’ 23 Maibé, haʼu sei hatete ba sira: Haʼu la hatene imi! Hadook an tiha husi haʼu, imi neʼebé halo aat!

24 “Neʼe duni, ema hotu neʼebé rona haʼu-nia liafuan sira-neʼe hodi halo tuir, sira hanesan ema matenek ida neʼebé harii nia uma iha fatuk-boot nia leten. 25 No udan boot tun, bee saʼe, no anin boot huu hasoru uma neʼe, maibé uma neʼe la monu tanba harii iha fatuk-boot nia leten. 26 Liután neʼe, ema hotu neʼebé rona haʼu-nia liafuan sira-neʼe no la halo tuir, sira mak hanesan ema beik ida neʼebé harii ninia uma iha rai-henek leten. 27 No udan boot tun, bee saʼe, no anin boot huu hasoru uma neʼe, no uma neʼe monu no naksobu hotu.”

28 Bainhira Jesus koʼalia tiha liafuan sira-neʼe, ema-lubun hakfodak ho dalan neʼebé nia hanorin, 29 tanba ninia hanorin mai husi Maromak, laʼós hanesan ema eskriba sira.

8 Bainhira nia tun husi foho, ema-lubun boot laʼo tuir nia. 2 No, haree! ema moras-lepra ida mai no monu ain ba nia no hatete: “Naʼi, haʼu hatene katak se Ita-Boot hakarak, Ita bele halo haʼu sai moos.” 3 Ho ida-neʼe, Jesus lolo nia liman hodi kona mane neʼe, no dehan: “Haʼu hakarak. Sai moos bá.” No ema neʼe nia moras-lepra lakon kedas. 4 Tuirmai Jesus hatete ba nia: “Keta fó-hatene ba ema ida, maibé bá hodi hatudu ó-nia an ba amlulik, no fó prezente neʼebé tuir Moisés nia Ukun-Fuan, hodi sai nuʼudar sasin ba sira.”

5 Kuandu Jesus tama tiha iha Kafarnaum, kapitaun tropa nian ida* hakbesik hodi husu ba nia 6 dehan: “Naʼi, haʼu-nia atan-mane latan hela iha uma tanba moras isin-matek, no nia terus tebetebes.” 7 Jesus hatete ba nia: “Kuandu haʼu toʼo iha neʼebá, haʼu sei kura nia.” 8 Kapitaun neʼe hatán: “Naʼi, haʼu la merese atu Ita-Boot tama iha haʼu-nia uma, maibé hatoʼo deʼit liafuan ruma bá, no haʼu-nia atan sei sai isin-diʼak. 9 Haʼu mós iha ema seluk neʼebé ukun haʼu, no haʼu iha soldadu sira neʼebé haʼu manda. Kuandu haʼu hatete ba soldadu ida-neʼe: ‘Laʼo bá’, nia bá, no ba ida seluk: ‘Mai!’ nia mai, no kuandu haʼu haruka haʼu-nia atan: ‘Halo ida-neʼe!’ nia halo.” 10 Rona tiha ida-neʼe, Jesus hakfodak no hatete ba sira neʼebé laʼo tuir nia: “Haʼu koʼalia loloos ba imi: Haʼu seidauk hasoru ema ida neʼebé iha fiar boot hanesan neʼe iha Izraél tomak. 11 Haʼu hatete ba imi katak ema barak husi parte leste no oeste sei mai no tuur iha meza, hamutuk ho Abraão, Isaac, no Jacob iha Ukun lalehan nian. 12 Maibé oan sira neʼebé atu simu Ukun nuʼudar liman-rohan, sei soe tiha ba nakukun laran iha liʼur. Iha neʼebá sira sei tanis no ruun nehan.” 13 Tuirmai Jesus hatete ba kapitaun neʼe: “Laʼo bá. Buat neʼebé ó fiar sei akontese duni.” No kapitaun nia atan sai isin-diʼak kedas iha oras neʼebá.

14 Kuandu Jesus toʼo tiha Pedro nia uma, nia haree Pedro nia banin-feto toba hela tanba moras isin-manas. 15 No Jesus kaer nia liman no isin-manas lakon kedas, tuirmai feto neʼe hadeer no hahú prepara hahán ba nia. 16 Maibé kuandu kalan toʼo ona, ema lori ba nia ema barak neʼebé anju aat domina, no nia duni sai anju* aat sira-neʼe ho liafuan ida, no nia kura sira hotu neʼebé moras. 17 Atu nuneʼe bele kumpre liafuan neʼebé profeta Isaías hatete: “Nia rasik halakon ita-nia moras sira no nia lori ita-nia moras.”

18 Kuandu Jesus haree tiha ema-lubun neʼebé haleʼu nia, nia haruka ninia dixípulu sira lori ró atu sira hakur ba tasi sorin. 19 No ema eskriba ida hakbesik nia no hatete: “Mestre, haʼu sei laʼo tuir Ita ba fatin naran deʼit neʼebé Ita bá.” 20 Maibé Jesus hatete ba nia: “Asu-fuik* sira iha fatin atu toba no manu sira iha lalehan iha knuuk, maibé Oan-Mane husi ema, nia laiha fatin atu sadere nia ulun.” 21 Tuirmai, dixípulu ida husu ba nia: “Naʼi, fó lisensa mai haʼu atu bá hodi hakoi uluklai haʼu-nia aman.” 22 Jesus hatete ba nia: “Kontinua laʼo tuir haʼu, no husik ema mate hakoi sira-nia mate.”

23 No kuandu nia saʼe tiha ba ró, ninia dixípulu sira tuir nia. 24 No tuirmai, tasi hahú sai siʼak tebes, no laloran tasi nian baku makaʼas toʼo bee tama ba ró, maibé Jesus toba hela. 25 No sira hakbesik Jesus hodi fanu nia no dehan: “Naʼi, salva ami, ita besik ona atu mate!” 26 Maibé nia hatete ba sira: “Tansá imi sai taʼuk, imi neʼebé fiar kiʼik?” Tuirmai nia hamriik hodi siʼak anin no tasi, no buat hotu sai hakmatek. 27 Entaun, mane sira-neʼe sai hakfodak no dehan: “Sé mak ema neʼe, hodi anin no tasi mós halo tuir nia?”

28 Kuandu nia toʼo tiha tasi sorin bá, hodi tama ba rai-Gadara, ema naʼin-rua neʼebé anju aat domina laʼo sai husi rate sira leet hodi hasoru nia. Sira iha forsa boot no siʼak tebes, no tan neʼe la iha ema ida neʼebé brani atu liu dalan neʼe. 29 No haree! sira hakilar dehan: “Saida mak ó hakarak husi ami, Maromak nia Oan? Ó mai iha neʼe atu kastigu ami maski tempu neʼe seidauk toʼo?” 30 Maibé dook husi sira, iha fahi-lubun boot neʼebé han hela. 31 Tan neʼe, anju aat sira hahú husu nia dehan: “Se ó duni sai ami karik, haruka ami tama ba fahi-lubun neʼe.” 32 Nuneʼe, nia hatete ba sira: “Bá!” Depois neʼe, sira sai no tama ba fahi sira, no fahi-lubun neʼe halai lalais no haksoit husi rai naruk no tama ba tasi no sira mate iha bee laran. 33 Maibé, sira neʼebé tau matan ba fahi halai ba sidade, no sira fó-hatene buat hotu, inklui buat neʼebé akontese ba mane sira neʼebé anju aat domina. 34 No ema hotu husi sidade neʼe mai hodi hasoru Jesus, no kuandu sira haree nia, sira husu ba nia atu sai husi sira-nia rai.

9 Tan neʼe, nia saʼe ró no hakur ba tasi sorin hodi tama ba sidade neʼebé nia hela.* 2 No haree! ema lori ba nia mane isin-matek ida neʼebé latan iha toba-fatin. Kuandu Jesus haree sira-nia fiar, nia hatete ba ema moras isin-matek neʼe: “Oan, aten-brani bá! Ó-nia sala perdua tiha ona.” 3 No ema eskriba balu koʼalia ba malu dehan: “Ema neʼe koʼalia hodi kontra Maromak.” 4 Maibé Jesus hatene buat neʼebé sira hanoin no nia dehan: “Tansá imi hanoin buat aat iha imi-nia laran? 5 Ida neʼebé mak fasil liu atu dehan? ‘Ó-nia sala perdua tiha ona’, ka ‘Hamriik no laʼo bá’? 6 Maibé haʼu sei hatudu ba imi katak Oan-Mane husi ema iha kbiit atu perdua sala iha rai.” Tuirmai, nia hatete ba ema moras isin-matek neʼe: “Hamriik, lori ó-nia toba-fatin, no bá ó-nia uma.” 7 No nia hamriik hodi laʼo ba ninia uma. 8 Haree tiha neʼe, ema-lubun sai taʼuk tebetebes, no sira hahiʼi Maromak neʼebé fó kbiit hanesan neʼe ba ema.

9 Tuirmai, kuandu laʼo liu husi neʼebá, Jesus haree mane ida naran Mateus tuur hela iha fatin impostu nian. Jesus hatete ba nia: “Mai tuir haʼu.” No nia hamriik hodi laʼo tuir Jesus. 10 Depois neʼe, kuandu Jesus tuur hela iha meza iha Mateus nia uma, haree! ema barak husi kobradór impostu nian no mós sala-naʼin sira mai atu tuur hamutuk ho Jesus no ninia dixípulu sira. 11 Maibé, kuandu haree tiha ida-neʼe, ema farizeu sira hahú hatete ba Jesus nia dixípulu: “Tansá mak imi-nia mestre han hamutuk ho ema kobradór impostu nian no sala-naʼin sira?” 12 Rona tiha sira, Jesus hatete: “Ema neʼebé isin-diʼak la presiza doutór, maibé ema moras mak presiza. 13 Tan neʼe, imi laʼo bá no buka-hatene liafuan sira-neʼe katak sá: ‘Haʼu hakarak laran-sadiʼa, laʼós imi-nia prezente.’ Tanba haʼu mai laʼós atu bolu ema loos sira, maibé atu bolu ema sala-naʼin.”

14 Tuirmai, João nia dixípulu sira mai hasoru Jesus no husu: “Tansá mak ami no ema farizeu sira halo jejún, maibé ó-nia dixípulu sira la halo jejún?” 15 No Jesus hatete ba sira: “Noivu nia belun sira lalika sente laran-susar bainhira noivu sei hamutuk ho sira, loos ka lae? Maibé, loron sei toʼo mai kuandu noivu la iha tan iha sira-nia leet, no tempu neʼe mak sira sei jejún. 16 La iha ema ida taka roupa tuan nia kuak ho hena foun, basá hena foun neʼe forte liu no sei dada hena tuan no halo ninia kuak sai boot liután. 17 No mós, ema la tau tua foun iha tua-fatin* neʼebé tuan, tanba se sira halo nuneʼe, tua-fatin neʼe sei nakfera no sai aat no tua sei fakar. Maibé, ema tau tua foun iha tua-fatin neʼebé foun, no la iha buat ida neʼebé sai aat.”

18 Bainhira Jesus koʼalia ba sira kona-ba buat sira-neʼe, haree! ukun-naʼin ida hakbesik nia no monu ain ba nia hodi dehan: “Oras neʼe haʼu-nia oan-feto karik mate ona, maibé se Ita mai no tau liman ba nia, nia sei moris fali.”

19 Entaun, Jesus hamriik no laʼo hamutuk ho ninia dixípulu sira hodi tuir nia. 20 No haree! feto ida neʼebé hetan terus ba tinan sanulu-resin-rua tanba moras raan fakar, hakbesik ba nia husi kotuk no kona ninia roupa ninin, 21 tanba nia hatete beibeik ba nia an: “Se haʼu kona deʼit ninia roupa, haʼu sei sai isin-diʼak.” 22 Jesus fila no haree nia, dehan: “Haʼu-nia oan-feto, aten-brani bá! Ó-nia fiar mak halo ó sai diʼak.” No iha tempu neʼe kedas feto neʼe hetan isin-diʼak.

23 No bainhira nia toʼo ba ukun-naʼin neʼe nia uma, nia haree ema neʼebé toka knananuk triste nian* no ema-lubun neʼebé barullu. 24 Jesus hatete: “Sai husi fatin neʼe, tanba labarik-feto neʼe la mate, maibé nia toba.” Tan neʼe, sira hahú hamnasa nia. 25 Kuandu ema-lubun sai tiha ba liʼur, Jesus tama no kaer labarik-feto neʼe nia liman no nia hadeer. 26 No ema husi fatin hotu iha rai neʼe koʼalia kona-ba buat neʼebé Jesus halo.

27 Bainhira Jesus laʼo liu fatin neʼebá, ema matan-delek naʼin-rua laʼo tuir nia no hakilar hodi dehan: “David nia oan, hatudu laran-sadiʼa mai ami.” 28 Kuandu Jesus tama tiha ba uma ida, ema matan-delek sira-neʼe hakbesik nia, no Jesus husu sira: “Imi fiar duni katak haʼu bele halo ida-neʼe?” Sira hatán: “Sin, Naʼi.” 29 Tuirmai, nia tau liman ba sira-nia matan hodi dehan: “Buat neʼebé imi fiar, imi sei simu.” 30 No sira-nia matan nakloke. Liután neʼe, Jesus fó avizu makaʼas ba sira, dehan: “Kuidadu bá katak ema ida labele hatene kona-ba neʼe.” 31 Maibé, depois sira sai tiha ba liʼur, sira fó-hatene ema barak kona-ba nia iha área neʼebá.

32 No bainhira sira sai tiha, haree! ema lori ba Jesus, mane monok ida neʼebé anju aat mak domina. 33 No kuandu Jesus duni sai tiha anju aat, mane monok neʼe koʼalia. No ema-lubun sente hakfodak tebes hodi hatete: “Seidauk mosu buat hanesan neʼe iha Izraél.” 34 Maibé ema farizeu sira hahú dehan: “Ho kbiit husi anju aat sira-nia ukun-naʼin mak nia duni sai anju aat sira.”

35 Depois neʼe, Jesus laʼo ba sidade no knua hotu atu hanorin iha sinagoga sira no atu haklaken liafuan diʼak kona-ba Maromak nia Ukun no kura moras oioin neʼebé kona ema. 36 Kuandu nia haree ema-lubun neʼe, nia hanoin tebes sira, tanba nia haree katak ema hanehan no la tau matan ba sira, no sira hanesan bibi neʼebé bibi-atan la iha. 37 Tuirmai, nia hatete ba ninia dixípulu sira: “Sin, serbisu koʼa nian boot tebes, maibé serbisu-naʼin uitoan deʼit. 38 Tan neʼe, husu ba toʼos-naʼin atu haruka tan ema hodi halo serbisu koʼa nian.”

10 Nia bolu ninia dixípulu naʼin sanulu-resin-rua no fó sira kbiit atu duni sai anju* aat sira, no atu kura moras oioin.

2 Apóstolu naʼin sanulu-resin-rua nia naran mak neʼe: Primeiru mak Simão, neʼebé bolu nuʼudar Pedro, ho nia alin André;* no Tiago, Zebedeu nia oan-mane, ho ninia alin João;* 3 Filipe no Bartolomeu; Tomé no Mateus, ida neʼebé kobradór impostu nian; Tiago, Alfeu nia oan; Tadeu; 4 Simão, ida neʼebé laran-manas, no Judas Iscariotes neʼebé ikusmai sai traidór.

5 Jesus haruka sira naʼin sanulu-resin-rua neʼe, no fó lei ba sira dehan: “Keta laʼo tuir dalan nasaun seluk nian, no keta tama ba ema Samaria nia sidade. 6 Maibé bá, hodi buka deʼit bibi-malae neʼebé lakon husi umakain Izraél. 7 Bá hodi haklaken katak Ukun lalehan nian besik ona. 8 Kura ema moras, fó moris-hiʼas ba ema mate, halo ema moras-lepra sai moos, no duni sai anju aat sira. Imi simu la selu, fó mós hodi la hein atu ema selu imi. 9 Keta lori osan-mean ka osan-mutin ka osan-riti iha imi-nia osan-fatin, 10 ka fatin ai-han nian, ka roupa tahan rua,* ka sandálias ka ai-tonka ida, tanba serbisu-naʼin merese atu simu ninia ai-han.

11 “Iha sidade ka knua naran deʼit neʼebé imi tama, buka ema neʼebé mak merese atu imi vizita, no hela iha neʼebá toʼo imi husik fatin neʼe. 12 Kuandu imi tama iha uma ida, kumprimenta* ema iha uma neʼe. 13 No se sira simu imi, sira sei hetan bensaun.* Maibé se sira la simu imi, bensaun neʼe sei nafatin ho imi. 14 Iha fatin naran deʼit neʼebé ema la simu imi ka la rona imi-nia liafuan, kuandu imi sai husi uma neʼe ka sidade neʼe, liki tiha rai-rahun husi imi-nia ain. 15 Haʼu hatete loloos ba imi katak, iha Loron Tesi-Lia nian, sidade neʼe nia kastigu sei todan liu fali rai-Sodoma no Gomorra.

16 “Haree! Haʼu haruka imi bá hanesan bibi-malae iha asu-fuik nia leet. Tan neʼe, matan-moris bá hanesan samea, maibé laran-moos bá hanesan manu-pombu. 17 Kuidadu bá, tanba ema sei lori imi ba tribunál no sira sei baku imi ho xikote iha sira-nia sinagoga sira. 18 Sira sei lori imi ba governadór no liurai sira-nia oin tanba haʼu. No, imi sei fó sasin ba sira no ba nasaun seluk. 19 Maibé bainhira sira lori imi ba ukun-naʼin sira, keta laran-taridu kona-ba oinsá no saida mak imi sei koʼalia, tanba sei haraik ba imi iha oras neʼebá buat neʼebé imi atu koʼalia. 20 Basá laʼós imi rasik deʼit mak sei koʼalia, maibé imi-nia Aman nia espíritu mak koʼalia liuhusi imi. 21 No maun-alin sei entrega ninia maun ka alin ba ema atu oho, nuneʼe mós aman ida ho ninia oan, no oan sei hamriik hodi kontra nia inan-aman no entrega sira ba ema atu oho. 22 No ema hotu sei odi imi tanba haʼu-nia naran. Maibé ema neʼebé tahan toʼo rohan mak ida neʼebé sei hetan salvasaun. 23 Kuandu ema fó-terus ba imi iha sidade ida, halai ba sidade seluk. Tanba haʼu hatete loloos ba imi katak antes imi ramata imi-nia serbisu iha sidade Izraél nian tomak, Oan-Mane husi ema sei mai.

24 “Dixípulu ida la boot liu fali nia mestre, no atan ida la boot liu fali nia naʼi. 25 Dixípulu ida kontente atu sai hanesan nia mestre, nuneʼe mós atan ida kontente atu sai hanesan nia naʼi. Se ema bolu karik uma-naʼin nuʼudar Belzebu,* oinsá liután mak sira sei bolu ema husi ninia uma-laran? 26 Entaun, keta taʼuk ba sira, tanba buat naran deʼit neʼebé falun hela sei loke tiha, no segredu naran deʼit neʼebé subar hela ema sei hatene. 27 Buat neʼebé haʼu hatete ba imi mesamesak, dehan sai neʼe iha ema barak nia oin. No buat neʼebé haʼu bisibisi ba imi, fó sai fali ba ema husi uma-leten. 28 No keta taʼuk ba sira neʼebé oho isin-lolon maibé la iha kbiit atu halakon moris.* Maibé taʼuk ba ida neʼebé iha kbiit atu halakon moris* no isin-lolon iha Gehena. 29 Ema faʼan manu-liin rua ba osan-besi ida neʼebé folin kiʼik, loos ka lae? Maibé imi-nia Aman hatene kuandu sira ida monu ba rai. 30 No kona-ba imi, fuuk-lahan iha imi-nia ulun mós nia sura hotu. 31 Tan neʼe, keta taʼuk. Imi iha folin-boot liu fali manu-liin barak.

32 “Ema hotu neʼebé fó sai iha ema seluk nia oin katak nia hamutuk ho haʼu, haʼu mós sei fó sai ba haʼu-nia Aman iha lalehan katak ema neʼe haʼu-nia dixípulu. 33 Maibé ema neʼebé nega haʼu iha ema seluk nia oin, haʼu mós sei nega nia iha haʼu-nia Aman nia oin, iha lalehan. 34 Keta hanoin katak haʼu mai atu lori dame ba mundu. Haʼu mai, laʼós atu lori dame, maibé lori surik. 35 Basá haʼu mai atu haketak ema: Hodi haketak oan-mane husi aman, oan-feto husi inan, no feto-foun husi banin-feto. 36 Neʼe duni, ema nia inimigu sei mai husi ninia umakain rasik. 37 Ema neʼebé hadomi ninia aman ka inan liu fali haʼu, nia la merese sai haʼu-nia dixípulu. No ema neʼebé hadomi ninia oan-mane ka oan-feto liu fali haʼu, nia la merese sai haʼu-nia dixípulu. 38 No ema neʼebé la simu ninia ai-riin terus nian hodi laʼo tuir haʼu, nia la merese sai haʼu-nia dixípulu. 39 Ema neʼebé salva nia moris* sei lakon nia moris, no ema neʼebé lakon nia moris tanba haʼu, nia sei hetan fali nia moris.

40 “Ema neʼebé simu imi, nia simu mós haʼu. No ema neʼebé simu haʼu, nia simu mós ida neʼebé haruka haʼu mai. 41 Ema neʼebé simu profeta ida tanba nia mak profeta, ema neʼe sei simu kolen hanesan ho buat neʼebé profeta simu. No ema neʼebé simu ema laran-loos tanba nia mak ema laran-loos, nia sei simu kolen hanesan ho buat neʼebé ema laran-loos simu. 42 No ema neʼebé fó bee malirin kopu ida deʼit ba kiʼik oan sira-neʼe ida, tanba nia mak haʼu-nia dixípulu, haʼu dehan loloos ba imi: Nia sei la lakon ninia kolen.”

11 Kuandu Jesus fó tiha matadalan ba ninia dixípulu naʼin sanulu-resin-rua, nia sai husi neʼebá atu hanorin no haklaken iha sidade sira seluk.

2 No bainhira João, neʼebé iha komarka laran, rona kona-ba buat neʼebé Kristu halo, nia haruka ninia dixípulu rasik ba Kristu, 3 hodi dehan ba nia: “Ita mak Ida neʼebé atu mai, ka ami sei hein ema seluk?” 4 Jesus hatán ba sira: “Fila bá, no fó-hatene ba João buat neʼebé imi haree no rona: 5 Ema matan-delek sira haree fali, ema ain-kudeʼik sira laʼo, ema moras-lepra sira sai moos, ema tilun-diuk sira rona, ema mate moris fali, no ema kiak sira rona liafuan diʼak. 6 Kontente ba ema neʼebé tau fiar ba haʼu hodi la duvida.”*

7 Nuʼudar ema sira-neʼe laʼo hodi fila fali, Jesus hahú koʼalia ba ema-lubun kona-ba João: “Imi bá rai-fuik atu haree saida? Atu haree duʼut-kain ida neʼebé anin huu bá-mai ka? 8 Entaun, imi bá atu haree saida? Atu haree mane ida neʼebé hatais roupa furak ka? Loloos, sira neʼebé hatais roupa furak hela iha liurai sira-nia uma. 9 Nuneʼe, tanbasá mak imi bá? Imi bá atu haree profeta ida ka? Sin, nia mak profeta duni. Maibé haʼu dehan ba imi katak nia boot liu fali profeta sira. 10 Kona-ba nia mak hakerek nanis ona: ‘Haree! Haʼu rasik haruka haʼu-nia manu-ain iha ó-nia oin, neʼebé sei prepara dalan ba ó!’ 11 Haʼu hatete loloos ba imi: Toʼo agora, seidauk iha ema ida iha rai neʼebé boot liu fali João Batista. Maski nuneʼe, ema neʼebé kiʼik liu iha Ukun lalehan nian mak boot liu fali nia. 12 Maibé, husi João Batista nia loron toʼo agora, ema hakaʼas an atu hetan Ukun lalehan nian, no sira neʼebé la para atu hakaʼas an sei hetan nia. 13 Basá, toʼo João nia tempu, profeta hotu no Ukun-Fuan fó-hatene nanis kona-ba buat neʼebé sei mosu. 14 No maski imi hakarak atu fiar ida-neʼe ka lae, nia mak ‘Elias neʼebé Eskritura fó-hatene nanis atu mai’. 15 Ema neʼebé iha tilun, rona bá.

16 “Haʼu sei kompara jerasaun neʼe ho sé? Sira hanesan labarik kiʼik neʼebé tuur hela iha merkadu, hodi dehan ba malu: 17 ‘Ami toka múzika* ba imi, maibé imi la dansa. Ami tanis hakilar, maibé imi la baku hirus-matan tanba triste.’ 18 Hanesan neʼe mós, João mai, nia la han no la hemu, no ema dehan: ‘Nia iha anju aat.’ 19 Oan-Mane husi ema mai hodi han no hemu, maibé ema mós dehan: ‘Haree! Mane neʼe kaan-teen no lanu-teen,* ema kobradór impostu nian no ema sala-naʼin sira-nia belun.’ Maibé, liuhusi ema nia hahalok loos mak nia hatudu sai ninia matenek.”

20 Tuirmai, nia komesa atu koʼalia kontra sidade sira neʼebé nia halo milagre barak, tan sira la hakribi sira-nia sala. 21 Nia dehan: “Susar ba ó, Korozain! Susar ba ó, Betsaida! Tanba, se milagre boot sira neʼebé mosu iha imi leet mak mosu ba Tiro no Sidon, karik kleur ona sira sei hakribi sira-nia sala, no hatais hena karón nian* hodi tuur iha ahi-kadesan. 22 Tan neʼe, haʼu dehan ba imi: Iha Loron Tesi-Lia nian, Tiro no Sidon nia kastigu sei sai kmaan liu fali imi-nian. 23 No kona-ba ó Kafarnaum, ó hanoin katak Maromak sei foti ó toʼo lalehan ka? Lae! Nia sei hatún ó toʼo rate.* Basá, se milagre sira neʼebé mosu iha imi leet mak mosu iha Sodoma, karik nia sei iha toʼo ohin loron. 24 Tan neʼe, haʼu dehan ba imi: Iha Loron Tesi-Lia nian, rai-Sodoma nia kastigu sei sai kmaan liu fali imi-nian.”

25 Iha tempu neʼebá Jesus dehan: “Aman, Naʼi lalehan no rai nian, haʼu hahiʼi Ita-Boot iha ema nia oin, tanba Ita subar buat sira-neʼe husi ema matenek sira, hodi fó sai ba labarik kiʼik sira. 26 Loos duni, Aman, tan halo nuneʼe mak tuir Ita-nia hakarak. 27 Haʼu-nia Aman entrega ona buat hotu mai haʼu, no la iha ema ida neʼebé hatene didiʼak Oan-Mane, só deʼit Aman. No, la iha ema neʼebé hatene Aman, só deʼit Oan-Mane no mós ema neʼebé Oan-Mane hakarak hanorin kona-ba Aman. 28 Mai besik haʼu, imi hotu neʼebé kole tan serbisu makaʼas no neʼebé lori naha todan. Haʼu sei fó kmaan ba imi. 29 Sai haʼu-nia dixípulu* no aprende husi haʼu, tan haʼu laran-maus no haraik-an, no imi sei hetan kmaan. 30 Basá sai haʼu-nia dixípulu laʼós buat neʼebé susar, no buat neʼebé haʼu husu imi atu lori la todan.”

12 Iha loron Sábadu ida, Jesus laʼo liu toʼos trigu nian. Ninia dixípulu sira sai hamlaha no komesa kuʼu trigu-musan hodi han. 2 Haree tiha neʼe, ema farizeu sira dehan ba nia: “Haree! Ó-nia dixípulu sira halo buat neʼebé bandu iha loron Sábadu.” 3 Jesus dehan ba sira: “Imi la lee buat neʼebé David halo, kuandu nia no ema sira neʼebé hamutuk ho nia hamlaha? 4 Nia tama ba Maromak nia uma, no sira han paun neʼebé santu, maski ukun-fuan bandu atu han ida-neʼe, tanba amlulik sira deʼit mak bele han neʼe. 5 Ka, imi la lee iha Ukun-Fuan katak iha loron Sábadu amlulik sira iha templu serbisu nafatin? Maibé, sira la halo sala kontra ukun-fuan loron Sábadu nian. 6 Maibé, haʼu dehan ba imi katak iha neʼe iha ida neʼebé boot liu fali templu. 7 Se imi komprende karik liafuan neʼebé dehan: ‘Haʼu hakarak laran-sadiʼa, laʼós imi-nia prezente’, entaun imi sei la tesi lia ba sira neʼebé la halo sala. 8 Tanba Oan-Mane husi ema mak loron Sábadu nia Naʼi.”

9 Sai tiha husi fatin neʼe, nia laʼo hodi tama ba sira-nia sinagoga. 10 No haree! Iha mane ida ho liman-matek. No sira husu Jesus: “Tuir lei, bele kura ema iha loron Sábadu ka lae?” Sira husu neʼe hodi buka razaun atu duun nia. 11 Nia dehan ba sira: “Iha imi-nia leet, sé mak la bá atu kaer hodi dada sai ninia bibi-malae kuandu bibi neʼe monu ba rai-kuak iha loron Sábadu? 12 Ema ida folin-boot liu fali bibi ida, loos ka lae? Nuneʼe, la sala atu halo buat neʼebé diʼak iha loron Sábadu.” 13 Tuirmai, nia dehan ba mane neʼe: “Lolo ó-nia liman.” No nia lolo nia liman, no liman neʼe sai diʼak hanesan ida seluk. 14 Maibé ema farizeu sira sai ba liʼur no futu lia kontra Jesus atubele oho nia. 15 Tanba Jesus hatene kona-ba neʼe, nia sai husi fatin neʼebá. Ema barak mós tuir nia, no nia kura sira hotu. 16 Maibé nia fó avizu makaʼas ba sira atu la fó-hatene ema seluk kona-ba nia, 17 atu nuneʼe bele kumpre buat neʼebé Maromak hatete liuhusi profeta Isaías, neʼebé dehan:

18 “Haree! Haʼu-nia atan neʼebé haʼu hili ona, ida neʼebé haʼu* hadomi, neʼebé halo haʼu kontente! Haʼu sei fó haʼu-nia espíritu ba nia, no nia sei fó sai ba nasaun sira kona-ba oinsá atu halo buat neʼebé loos. 19 Nia sei la diskute malu ho ema ka la hakilar, no ema sei la rona ninia lian iha dalan boot sira. 20 Nia sei la halo tohar duʼut-kain neʼebé kleʼuk ona, no nia sei la hamate ahi-oan neʼebé besik atu mate, toʼo tempu neʼebé nia hadiʼa buat hotu neʼebé la loos. 21 Neʼe duni, iha ninia naran mak nasaun sira sei tau esperansa.”

22 Tuirmai, sira lori ba nia mane ida neʼebé matan-delek no monok tanba anju aat mak domina. No Jesus kura nia, no ema monok neʼe koʼalia no haree. 23 Ema-lubun hakfodak no dehan: “Karik ema neʼe mak David nia Oan, loos ka lae?” 24 Rona tiha ida-neʼe, ema farizeu dehan: “Ema neʼe duni sai anju aat sira ho kbiit husi Belzebu, anju aat sira-nia ukun-naʼin.” 25 Tanba Jesus hatene sira-nia hanoin, nia dehan ba sira: “Ukun ida sei lakon se ninia povu funu hasoru malu, no sidade ka umakain ida sei la metin se ninia ema funu hasoru malu. 26 Nuneʼe mós, se Satanás mak duni sai Satanás, nia halo funu hasoru nia an rasik. Entaun, oinsá mak ninia ukun bele metin? 27 Liután neʼe, se haʼu duni sai anju aat ho kbiit husi Belzebu, ho sé-nia kbiit mak imi-nia oan duni sai sira? Tan neʼe mak imi-nia oan rasik sei hatudu sai katak imi koʼalia sala. 28 Maibé, se haʼu duni sai anju aat sira ho Maromak nia espíritu, neʼe katak Maromak nia Ukun toʼo ona ba imi no imi la hatene. 29 Ka, se ema ida hakarak tama ba mane forsa boot nia uma hodi hadau ninia sasán, maibé nia la kesi uluklai mane forsa boot neʼe, entaun oinsá mak nia bele naʼok sasán iha mane neʼe nia uma? 30 Ema neʼebé la tuir haʼu, nia kontra haʼu. No ema neʼebé la serbisu hamutuk ho haʼu hodi ajuda ema seluk atu hakbesik haʼu, nia hadook ema husi haʼu.

31 “Tan neʼe, haʼu dehan ba imi: Liafuan aat* no sala hotu sei hetan perdua. Maibé ema neʼebé koʼalia aat hasoru espíritu sei la hetan perdua. 32 Porezemplu, ema naran deʼit neʼebé koʼalia aat hasoru Oan-Mane husi ema, nia sei hetan perdua. Maibé ema neʼebé koʼalia aat hasoru espíritu santu sei la hetan perdua, laʼós deʼit iha tempu agora maibé mós iha tempu neʼebé atu mai.

33 “Se imi mak ai-hun neʼebé diʼak, imi sei fó fuan diʼak. Se imi mak ai neʼebé aat, imi sei fó fuan aat. Basá ema hatene ai-hun husi ninia fuan. 34 Imi samea nia oan. Oinsá mak imi bele koʼalia buat neʼebé diʼak kuandu imi ema aat? Tanba buat neʼebé sai husi ema nia ibun mai husi laran. 35 Ema neʼebé diʼak koʼalia sai buat diʼak tanba ninia laran nakonu ho buat diʼak. Maibé, ema neʼebé aat koʼalia sai buat aat tanba ninia laran nakonu ho buat aat. 36 Haʼu dehan ba imi katak iha Loron Tesi-Lia nian ema sei hatán kona-ba liafuan folin-laek hotu neʼebé sira koʼalia. 37 Basá Maromak sei dehan sai katak imi ema loos tuir imi-nia liafuan, no nia sei tesi lia hasoru imi tuir imi-nia liafuan.”

38 Tuirmai, ema eskriba no farizeu balu dehan ba nia: “Mestre, ami hakarak haree sinál husi Ita atu hatudu katak buat neʼebé Ita koʼalia mak loos.” 39 Nia hatán ba sira: “Jerasaun neʼebé aat no la laran-metin ba Maromak kontinua buka sinál, maibé sinál ida sei la fó ba sira, só deʼit sinál profeta Jonas nian. 40 Hanesan Jonas hela iha ikan boot nia kabun ba loron tolu no kalan tolu, nuneʼe mós Oan-Mane husi ema sei hela iha rai laran ba loron tolu no kalan tolu. 41 Iha tempu neʼebé Maromak tesi lia ba ema hotu, ema Nínive sei hamriik no dehan sai katak ema sira-neʼe merese kastigu. Basá, kuandu Jonas haklaken, ema Nínive hakribi sira-nia sala. Maibé, haree! iha neʼe iha ida neʼebé boot liu fali Jonas. 42 Iha tempu tesi-lia nian, liurai-feto husi parte súl sei moris hiʼas fali hamutuk ho ema husi jerasaun neʼe no nia sei hatudu sai katak ema sira-neʼe merese kastigu. Basá nia mai husi rai neʼebé dook atu rona Salomão nia matenek. Maibé, haree! Iha neʼe iha ida neʼebé boot liu fali Salomão.

43 “Kuandu anju aat ida sai husi ema, nia laʼo liu rai-fuik maran hodi buka uma. Se nia la hetan, 44 nia dehan: ‘Haʼu sei fila ba haʼu-nia uma neʼebé haʼu husik tiha.’ No kuandu nia toʼo, nia hetan uma neʼe mamuk, dasa moos no furak ona. 45 Entaun, anju aat neʼe laʼo bá hodi lori tan anju aat hitu, neʼebé aat liu nia. Sira tama no hela iha neʼebá, no ikusmai ema neʼe nia situasaun sai aat liu fali uluk. Nuneʼe mós ho jerasaun aat neʼe.”

46 Kuandu nia koʼalia hela ho ema-lubun, haree! ninia inan no alin-mane sira mai iha liʼur, no sira buka atu koʼalia ho nia. 47 Entaun, ema ida dehan ba nia: “Haree! Ita-nia inan no alin sira hamriik iha liʼur, no sira hakarak atu koʼalia ho Ita.” 48 Jesus hatán ba ema neʼebé koʼalia ba nia: “Sé mak haʼu-nia inan, no sé mak haʼu-nia alin sira?” 49 Tuirmai, nia lolo liman ba ninia dixípulu sira hodi dehan: “Haree! Sira-neʼe mak haʼu-nia inan no haʼu-nia alin sira! 50 Basá, ema naran deʼit neʼebé halo haʼu Aman iha lalehan nia hakarak, ema neʼe mak haʼu-nia alin, feton no inan.”

13 Iha loron neʼebá Jesus sai husi uma no nia tuur iha tasi-ibun, 2 no ema-lubun boot hakbesik nia. Tan neʼe, nia saʼe ba ró ida hodi tuur iha laran, no ema-lubun neʼe hamriik iha tasi-ibun. 3 No nia hanorin sira buat barak hodi uza ai-knanoik, dehan: “Toʼos-naʼin ida bá atu kari fini. 4 No nuʼudar nia kari, fini balu monu iha dalan ninin, no manu sira mai hodi han. 5 Fini seluk monu iha fatuk leten, neʼebé iha rai uitoan deʼit. No fini sira-neʼe moris lalais tanba rai la kleʼan. 6 Maibé, kuandu loro-matan saʼe, loron sunu sira, no tanba sira-nia abut la naruk, sira sai namlaek no mate. 7 Fini seluk monu iha ai-tarak laran, no ai-tarak sira-neʼe sai boot no hanehan sira. 8 Fini seluk tan monu iha rai neʼebé diʼak, no sira komesa atu fó fuan. Balu dala atus ida, balu dala neenulu, no balu seluk dala tolunulu. 9 Ema neʼebé iha tilun, rona bá.”

10 Entaun, dixípulu sira hakbesik no dehan ba nia: “Tanbasá mak Ita koʼalia ba sira hodi uza ai-knanoik?” 11 No nia hatán: “Ba imi, Maromak mak ajuda imi atu komprende ninia segredu santu sira kona-ba Ukun lalehan nian. Maibé ba ema sira-neʼe lae. 12 Basá, ema neʼebé komprende, nia sei komprende liután, no ikusmai nia sei komprende buat barak. Maibé, ema neʼebé la komprende, buat uitoan neʼebé nia komprende mós sei foti tiha husi nia. 13 Tan neʼe mak haʼu koʼalia ba sira hodi uza ai-knanoik, basá sira haree maibé la hatene buat neʼebé sira haree, no sira rona maibé la hatene buat neʼebé sira rona, no sira la komprende. 14 No buat neʼebé Isaías fó-hatene nanis sai loos kona-ba sira, dehan: ‘Imi sei rona, maibé sei la komprende loloos, no imi sei hateke, maibé sei la haree momoos. 15 Basá povu neʼe nia laran sai toos ona, no maski sira rona ho sira-nia tilun maibé sira la halo tuir, no sira mós taka sira-nia matan. Ho ida-neʼe sira hatudu katak maski sira iha matan maibé sira lakohi haree no maski sira iha tilun maibé sira lakohi rona; sira lakohi atu komprende iha sira-nia laran hodi fila fali ba haʼu atu haʼu kura sira.’

16 “Maibé, kontente ba imi, tanba imi-nia matan haree, no imi-nia tilun rona. 17 Haʼu hatete loloos ba imi katak profeta no ema laran-loos barak hakarak atu haree buat neʼebé imi haree, maibé sira la haree, no atu rona buat neʼebé imi rona, maibé sira la rona.

18 “Nuneʼe, rona fali ai-knanoik kona-ba ema neʼebé kari fini. 19 Fini neʼebé kari iha dalan ninin mak ema neʼebé rona liafuan kona-ba Maromak nia Ukun, maibé la komprende ho loloos, no aat-naʼin mai hodi hasai buat neʼebé kuda iha ninia laran. 20 No fini neʼebé kari iha fatuk leten, ida-neʼe mak ema neʼebé rona liafuan kona-ba Maromak nia Ukun no nia simu kedas ho laran-haksolok. 21 Maibé, nia la iha abut iha ninia laran. Nia bele tahan ba tempu uitoan, no kuandu nia hasoru terus ka susar tan liafuan neʼe, nia monu kedas. 22 No kona-ba fini neʼebé kari iha ai-tarak laran, ida-neʼe mak ema neʼebé rona liafuan neʼe. Maibé, tanba nia hanoin resin kona-ba moris iha mundu neʼe, no tanba rikusoin iha kbiit atu lohi nia, buat sira-neʼe hanehan liafuan no nia la fó fuan. 23 No fini neʼebé kari iha rai neʼebé diʼak, ida-neʼe mak ema neʼebé rona no komprende loloos liafuan neʼe. No nia fó fuan duni. Balu fó fuan ba dala atus ida, balu ba dala neenulu, no balu seluk ba dala tolunulu.”

24 Nia konta ai-knanoik ida tan ba sira, dehan: “Ukun lalehan nian hanesan ema neʼebé kari fini diʼak iha ninia toʼos. 25 Kuandu ema hotu toba, ninia inimigu mai no kari duʼut aat iha trigu nia leet, no depois nia bá tiha. 26 Bainhira trigu moris no fó isin, duʼut aat mós mosu. 27 Tan neʼe, uma-naʼin nia atan sira hakbesik ba nia no dehan: ‘Naʼi, Ita-Boot kari fini diʼak iha Ita-nia toʼos, loos ka lae? Entaun, tansá mak duʼut aat neʼe mosu?’ 28 Nia dehan ba sira: ‘Inimigu ida mak halo nuneʼe.’ No sira hatete: ‘Ita-Boot hakarak ami bá atu fokit sai sira?’ 29 Nia hatán: ‘Husik lai bá. Tanba se lae karik, kuandu imi fokit duʼut neʼe, imi sei fokit sai mós trigu. 30 Husik sira rua moris hamutuk toʼo tempu koʼa nian. No iha tempu koʼa nian haʼu sei dehan ba serbisu-naʼin sira: Fokit uluk duʼut aat no futu hamutuk hodi sunu tiha. Tuirmai halibur trigu ba haʼu-nia trigu fatin.’”

31 Nia konta ai-knanoik ida tan ba sira, dehan: “Ukun lalehan nian hanesan ho mostarda-musan ida,* neʼebé ema kuda iha ninia toʼos. 32 Fini neʼe kiʼik liu fini seluk hotu. Maibé, kuandu moris, nia sai boot liu modo hotu, no sai hanesan ai-hun ida. No manu sira iha lalehan mai no hela iha ninia sanak sira.”

33 Nia dehan tan ai-knanoik ida seluk ba sira: “Ukun lalehan nian hanesan ho fermentu, neʼebé feto ida kahur ho trigu sukat tolu,* toʼo masa tomak saʼe.”

34 Buat sira-neʼe hotu Jesus dehan ba ema-lubun hodi uza ai-knanoik. Tuir loloos, la ho ai-knanoik, nia sei la koʼalia ba sira. 35 No ida-neʼe kumpre buat neʼebé profeta hatete nanis: “Haʼu sei loke haʼu-nia ibun hodi koʼalia ai-knanoik, no haʼu sei fó sai buat neʼebé subar husi tempu neʼebé mundu hahú.”*

36 Tuirmai, haruka tiha ema-lubun sai, nia tama ba uma. No nia dixípulu sira hakbesik nia no dehan: “Esplika mai ami ai-knanoik kona-ba duʼut aat iha toʼos.” 37 Nia hatán: “Ida neʼebé kari fini diʼak mak Oan-Mane husi ema, 38 no toʼos mak mundu. Fini diʼak mak Ukun lalehan nia oan sira, maibé duʼut aat mak aat-naʼin nia oan sira. 39 Inimigu neʼebé kari fini aat mak Diabu, tempu koʼa nian mak mundu nia loron ikus sira, no serbisu-naʼin neʼebé koʼa mak anju sira. 40 Tan neʼe, hanesan sira halibur duʼut aat no sunu ba ahi, nuneʼe mós sei akontese iha loron ikus sira. 41 Oan-Mane husi ema sei haruka ninia anju sira, no sira sei haketak husi ninia Ukun ema hotu neʼebé halo ema seluk sidi no mós ema neʼebé halo aat. 42 No anju sei soe sira ba fornu neʼebé lakan, no iha neʼebá sira sei tanis no ruun nehan. 43 Iha tempu neʼebá sira neʼebé laran-loos sei sai nabilan hanesan loro-matan iha sira-nia Aman nia Ukun. Ema neʼebé iha tilun, rona bá.

44 “Ukun lalehan nian hanesan rikusoin neʼebé subar iha toʼos, neʼebé mane ida hetan no subar fali. Ho ksolok nia faʼan buat hotu neʼebé nia iha atu hola rai neʼe.

45 “No mós, Ukun lalehan nian hanesan kontratu-naʼin neʼebé laʼo rai hodi buka fatuk-murak* neʼebé diʼak. 46 Hetan tiha fatuk-murak ida neʼebé folin-boot, nia bá no faʼan kedas buat hotu neʼebé nia iha hodi hola fatuk-murak neʼe.

47 “Dala ida tan, Ukun lalehan nian hanesan rede neʼebé peskadór sira soe ba tasi hodi dada ikan oioin. 48 No kuandu rede nakonu, sira dada sai ba tasi-ibun. Sira tuur hodi halibur ikan, no ikan diʼak tau ba raga, ikan neʼebé la diʼak sira soe tiha. 49 Nuneʼe mós sei akontese iha loron ikus sira. Anju sira sei mai hodi haketak ema aat husi ema laran-loos, 50 no sei soe sira ba fornu neʼebé lakan. Iha neʼebá sira sei tanis no ruun nehan.

51 “Imi komprende ho loloos buat sira-neʼe hotu ka lae?” Sira hatán: “Sin.” 52 Tuirmai, nia dehan ba sira: “Entaun, mestre hotu neʼebé aprende kona-ba Ukun lalehan nian mak hanesan uma-naʼin ida neʼebé lori sai buat foun no buat tuan husi ninia rikusoin.”

53 Konta tiha ai-knanoik sira-neʼe, Jesus sai husi fatin neʼebá. 54 No kuandu nia toʼo ninia rai, nia komesa hanorin sira iha sira-nia sinagoga, no sira sai hakfodak hodi dehan: “Mane neʼe hetan matenek no kbiit atu halo milagre husi neʼebé? 55 Laʼós nia mak badain-ai nia oan? No laʼós ninia inan naran Maria, no ninia alin sira mak Tiago, José, Simão no Judas? 56 No ninia alin-feto sira hotu laʼós hamutuk ho ita? Entaun, ema neʼe hetan matenek no kbiit neʼe husi neʼebé?” 57 Tan neʼe, sira lakohi fiar nia.* No Jesus dehan ba sira: “Ema hatudu respeitu ba profeta ida iha rai sira seluk, só deʼit iha ninia rai rasik no ninia uma rasik mak ema la respeitu nia.” 58 No nia la halo milagre barak iha neʼebá tanba sira la iha fiar.

14 Iha tempu neʼebá, Herodes, ukun-naʼin distritu nian, rona kona-ba Jesus 2 no nia hatete ba ninia atan sira: “Neʼe mak João Batista. Nia moris hiʼas fali ona husi mate, no tan neʼe mak nia iha kbiit atu halo milagre sira-neʼe.” 3 Basá Herodes kaer ona João no kesi nia no hatama nia iha komarka tanba Herodia, ninia maun Filipe nia feen. 4 Dala barak ona João hatete ba Herodes: “Tuir ukun-fuan, Ita-Boot labele hola nia.” 5 Maski nia hakarak oho João, maibé nia taʼuk ema-lubun tanba sira haree João nuʼudar profeta ida. 6 Maibé kuandu Herodes selebra nia loron-moris, Herodia nia oan-feto dansa ba sira no ida-neʼe halo Herodes laran-haksolok tebetebes. 7 Tan neʼe, nia jura hodi promete atu fó buat naran deʼit neʼebé feto neʼe husu. 8 Tuirmai, feto neʼe husu hodi tuir buat neʼebé ninia inan haruka, no dehan: “Fó mai haʼu João Batista nia ulun iha bikan ida.” 9 Maski liurai la gosta ida-neʼe, maibé tanba nia jura ona no mós tanba ema hotu neʼebé tuur hamutuk nia, entaun nia haruka atu fó buat neʼebé feto neʼe husu. 10 Nuneʼe, nia haruka ema bá no tesi João nia ulun iha komarka laran. 11 No ema lori João nia ulun iha bikan hodi fó ba feto neʼe, no nia lori ba ninia inan. 12 Tuirmai, João nia dixípulu sira mai no hasai ninia mate-isin hodi hakoi, no sira fó-hatene ba Jesus. 13 Rona tiha kona-ba neʼe, Jesus husik fatin neʼe no saʼe ró hodi bá fatin-fuik ida atu mesamesak, maibé ema-lubun husi sidade oioin rona kona-ba neʼe, no sira laʼo ain hodi tuir nia.

14 Depois Jesus tun husi ró, nia haree ema-lubun boot, no nia hanoin tebes sira, no nia kura ema sira neʼebé moras. 15 Maibé kuandu rai besik kalan ona, ninia dixípulu mai no hatete ba nia: “Fatin neʼe fuik loos, no rai besik kalan ona. Haruka ema-lubun neʼe bá, hodi sira bele bá knua sira no sosa buat ruma atu han.” 16 Jesus hatete ba sira: “Sira lalika bá, imi mak fó sira buat ruma atu han.” 17 Sira hatán ba nia: “Ami la iha buat ida iha neʼe, só deʼit paun fuan lima no ikan rua.” 18 Nia dehan: “Lori paun no ikan sira-neʼe mai haʼu.” 19 Tuirmai, nia haruka ema-lubun neʼe tuur iha duʼut leten no depois neʼe nia foti paun fuan lima no ikan rua neʼe, no nia hateke ba lalehan hodi halo orasaun.* No nia silu paun hodi fahe ba ninia dixípulu sira, no dixípulu sira fahe ba ema-lubun neʼe. 20 Ema hotu han toʼo bosu, no sira halibur hahán resin ba bote sanulu-resin-rua nakonu. 21 Ema neʼebé han maizumenus mane naʼin-5.000, la sura hamutuk feto no labarik sira. 22 Tuirmai, nia haruka kedas ninia dixípulu sira atu saʼe ró no bá uluk tasi sorin, maibé nia hein atu haruka ema-lubun neʼe fila.

23 Ikusmai, depois nia haruka tiha ema-lubun neʼe fila, nia mesamesak saʼe ba foho ida atu halo orasaun. No nia iha neʼebá mesak, maski toʼo kalan-boot ona. 24 Iha tempu neʼe, ró dook loos ona iha tasi klaran, no anin huu hasoru sira hodi halo laloran makaʼas baku ró neʼe. 25 Maibé, iha dadeer-saan kuandu sei nakukun hela,* nia hakbesik ba sira hodi laʼo iha tasi leten. 26 Kuandu dixípulu sira haree nia laʼo iha tasi leten, sira sai taʼuk, no hatete: “Neʼe mak vizaun ida!” No sira hakilar ho taʼuk. 27 Maibé Jesus koʼalia kedas ba sira, dehan: “Aten-brani bá! Neʼe mak haʼu. Keta taʼuk.” 28 Pedro hatán ba nia: “Naʼi, se neʼe mak Ita, haruka haʼu laʼo iha bee leten hodi toʼo ba Ita.” 29 Nia hatete: “Mai!” Entaun, Pedro tun husi ró no laʼo iha bee leten hodi toʼo ba Jesus. 30 Maibé kuandu nia haree anin-boot, nia sai taʼuk no hahú atu mout, no nia hakilar: “Naʼi, salva haʼu!” 31 Jesus lolo kedas nia liman hodi kaer Pedro no hatete: “Ó neʼebé fiar kiʼik, tansá ó laran-rua?” 32 No kuandu sira tama tiha ba ró laran, anin-boot neʼe la iha tan. 33 Tuirmai, sira neʼebé iha ró laran monu ain ba nia no hatete: “Ita mak Maromak nia Oan duni.” 34 No hakur tiha tasi, sira tama ba rai-Genesaré.

35 Tanba sira hatene kona-ba nia, ema husi fatin neʼe haruka lia-menon ba rai hotu neʼebé besik, no ema lori ba nia ema hotu neʼebé moras. 36 No sira husu ba nia atu sira bele kaer deʼit ninia roupa ninin, no sira hotu neʼebé kaer, hetan duni isin-diʼak.

15 Tuirmai, ema farizeu no eskriba sira husi Jeruzalein mai hasoru Jesus, no sira hatete: 2 “Tansá mak ó-nia dixípulu sira la tuir lisan husi beiʼala sira? Porezemplu, sira la fase sira-nia liman antes han.”

3 Nia hatán ba sira: “Tansá mak imi mós la halo tuir Maromak nia mandamentu tan imi-nia lisan? 4 Porezemplu, Maromak hatete: ‘Hatudu respeitu ba ó-nia inan no aman’, no: ‘Ema neʼebé koʼalia aat ninia inan ka aman tenke mate.’ 5 Maibé imi hatete: ‘Ema neʼebé dehan ba ninia inan ka aman: “Buat naran deʼit neʼebé haʼu iha atu bele apoia imi mak prezente neʼebé fó ona ba Maromak”, 6 ema neʼe la presiza atu ajuda ninia aman.’ Entaun, imi halo ona Maromak nia liafuan la iha folin tanba imi-nia lisan. 7 Imi ema laran-makerek sira, Isaías fó-hatene nanis ho loloos kona-ba imi bainhira nia dehan: 8 ‘Povu neʼe respeitu haʼu ho ibun-tutun deʼit, maibé sira-nia laran dook husi haʼu. 9 Sira-nia adorasaun ba haʼu saugati deʼit, tanba sira hanorin ema nia ukun-fuan nuʼudar Maromak nian.’” 10 Depois neʼe, nia bolu ema-lubun atu hakbesik no nia hatete ba sira: “Rona no komprende bá: 11 Laʼós buat neʼebé tama ba ibun mak hafoʼer ema, maibé buat neʼebé sai husi ninia ibun mak hafoʼer ema.”

12 Tuirmai, ninia dixípulu sira hakbesik nia no dehan: “Ita la hatene katak ema farizeu sira sai hirus* tanba buat neʼebé Ita hatete ka?” 13 Nia hatán: “Ai-horis hotu neʼebé haʼu-nia Aman iha lalehan la kuda sei fokit sai tiha. 14 Husik sira bá! Sira hanesan ema matan-delek neʼebé hatudu dalan ba matan-delek seluk. Entaun, se matan-delek ida lori matan-delek seluk, sira naʼin-rua sei monu ba rai-kuak.” 15 Pedro hatete ba Jesus: “Esplika mai ami ai-knanoik neʼe.” 16 Jesus hatán: “Imi mós seidauk komprende ka? 17 Imi hatene ka lae katak buat hotu neʼebé tama ba ibun sei liu ba kabun no depois hasai tiha ba liʼur? 18 Maibé, buat neʼebé sai husi ibun mai husi laran, no buat sira-neʼe mak hafoʼer ema. 19 Porezemplu, husi laran mak mosu hanoin aat, oho ema, sala-foʼer oioin, naʼok, fó sasin falsu, no koʼalia liafuan aat.* 20 Buat sira-neʼe mak hafoʼer ema, maibé han hodi la fase liman la hafoʼer ema.”

21 Depois husik tiha fatin neʼe, Jesus laʼo ba área Tiro no Sidon nian. 22 No haree! feto Fenísia nian ida husi fatin neʼebá mai no hakilar dehan: “Naʼi, David nia oan, hatudu laran-sadiʼa mai haʼu. Anju aat domina haʼu-nia oan-feto hodi fó-terus boot ba nia.” 23 Maibé nia la hatán liafuan ida ba feto neʼe. Tan neʼe ninia dixípulu sira hakbesik no husu nia: “Haruka feto neʼe bá tiha, tanba nia kontinua hakilar tuir ita.” 24 Jesus dehan: “Maromak haruka haʼu laʼós ba ema hotu, maibé ba deʼit bibi-malae neʼebé lakon husi umakain Izraél.” 25 Kuandu feto neʼe hakbesik, nia hahú monu ain ba Jesus no hatete: “Naʼi, ajuda haʼu!” 26 Nia hatán: “La diʼak atu foti oan sira-nia paun no fó ba asu-oan.” 27 Feto neʼe hatete: “Loos, Naʼi. Maibé tuir loloos asu-oan sira mós han paun-rahun neʼebé monu husi sira-nia naʼin nia meza.” 28 No Jesus hatán: “Feto, ó-nia fiar boot duni. Buat neʼebé ó hakarak sei sai loos.” No ninia oan-feto hetan fali isin-diʼak iha oras neʼebá kedas.

29 Husik tiha fatin neʼe, Jesus laʼo toʼo besik Tasi Galileia nian, no nia saʼe ba foho ida hodi tuur iha neʼebá. 30 Tuirmai, ema-lubun hakbesik nia. Sira lori mós ema sira neʼebé ain-kudeʼik, liman-matek, matan-delek, monok, no moras seluseluk. Sira tau ema sira-neʼe besik ninia ain no nia kura sira. 31 Ema-lubun hakfodak nuʼudar sira haree ema monok koʼalia, ain-kudeʼik sira laʼo no matan-delek sira haree, no sira fó hahiʼi ba Maromak Izraél nian.

32 Maibé Jesus bolu ninia dixípulu sira no dehan: “Haʼu hanoin tebes ema-lubun neʼe tanba sira hamutuk ho haʼu loron tolu ona no sira la iha buat ida atu han. Haʼu lakohi atu haruka sira fila ho hamlaha, tanba karik sira sei sai fraku no monu iha dalan.” 33 Maibé, ninia dixípulu sira dehan ba nia: “Iha fatin fuik hanesan neʼe, iha neʼebé mak ami bele hetan paun neʼebé toʼo ba ema-lubun neʼe atu sira bele han?” 34 Tuirmai, Jesus hatete ba sira: “Imi iha paun fuan hira?” Sira hatán: “Hitu, no ikan kiʼik balu.” 35 Depois haruka tiha ema-lubun neʼe tuur iha rai, 36 nia foti paun fuan hitu no ikan sira-neʼe, no nia fó-agradese ba Maromak, depois neʼe nia silu no hahú fahe ba ninia dixípulu, no dixípulu sira fó ba ema-lubun. 37 Ema hotu han toʼo bosu. No sira halibur hahán resin ba bote hitu nakonu. 38 Ema neʼebé han mak hamutuk mane naʼin-4.000, la sura feto no labarik sira. 39 Ikusmai, haruka tiha ema-lubun neʼe fila, nia saʼe ró hodi bá área Magadan nian.

16 No ema farizeu no saduseu sira hakbesik nia, no sira koko nia hodi husu atu hatudu ba sira sinál ida husi lalehan. 2 Nia hatán ba sira dehan: “[Kuandu rai atu sai kalan ona, imi iha toman atu hatete: ‘Udan sei la tun, tanba lalehan mean.’ 3 No iha dadeer imi dehan: ‘Rai sei malirin no udan, tanba lalehan mean maibé iha mós kalohan.’ Imi hatene atu esplika kona-ba buat neʼebé mosu iha lalehan, maibé imi la hatene atu esplika kona-ba sinál neʼebé mosu iha tempu neʼe.]* 4 Jerasaun neʼebé aat no la laran-metin ba Maromak kontinua buka sinál, maibé sinál ida sei la fó ba sira, só deʼit sinál Jonas nian.” Koʼalia tiha neʼe, nia husik hela sira hodi sai husi fatin neʼe.

5 Depois neʼe, ninia dixípulu sira hakur ba tasi sorin, maibé haluha atu lori paun. 6 Jesus hatete ba sira: “Matan-moris bá, no kuidadu kona-ba ema farizeu no saduseu sira-nia fermentu.” 7 Tan neʼe, sira komesa koʼalia ba malu hodi dehan: “Ita la lori paun.” 8 Jesus hatene kona-ba neʼe, entaun nia dehan: “Imi neʼebé fiar kiʼik, tansá mak imi koʼalia ba malu katak imi la lori paun? 9 Imi haluha ona kona-ba paun fuan lima neʼebé mane naʼin-5.000 han ka? No imi halibur nia resin ba bote hira? 10 Ka, imi haluha ona paun fuan hitu neʼebé mane naʼin-4.000 han ka? No imi halibur nia resin ba bote hira? 11 Tansá mak imi seidauk komprende katak haʼu la koʼalia kona-ba paun? Haʼu dehan katak imi presiza kuidadu ho ema farizeu no saduseu sira-nia fermentu.” 12 Ho ida-neʼe mak sira foin komprende katak Jesus haruka sira laʼós atu kuidadu kona-ba fermentu ba paun, maibé kuidadu kona-ba hanorin husi ema farizeu no saduseu sira.

13 Tuirmai, kuandu Jesus toʼo ba área Sezareia Filipe, nia husu ninia dixípulu sira: “Ema dehan katak Oan-Mane husi ema mak sé?” 14 Sira hatán: “Ema balu dehan João Batista, seluk dehan Elias, seluk fali dehan Jeremias ka profeta ruma.” 15 Nia hatete ba sira: “Maibé, tuir imi-nia hanoin haʼu neʼe sé?” 16 Simão Pedro hatán: “Ita mak Kristu, Maromak moris nia Oan-Mane.” 17 Jesus koʼalia ba nia dehan: “Ksolok ba ó Simão, Jonas nia oan, tanba isin no raan la hatudu sai ida-neʼe ba ó, maibé haʼu Aman iha lalehan mak hatudu sai. 18 No mós, haʼu hatete ba ó: Ó mak Pedro, no iha fatuk-boot neʼe nia leten mak haʼu sei harii haʼu-nia kongregasaun, no rate* sei la iha kbiit atu manán nia. 19 Haʼu sei fó ba ó xave sira ba Ukun lalehan nian, no buat naran deʼit neʼebé ó futu iha rai, futu ona iha lalehan, no buat naran deʼit neʼebé ó kore iha rai, kore ona iha lalehan.” 20 Tuirmai, nia fó avizu makaʼas ba ninia dixípulu sira atu la fó sai ba ema ida katak nia mak Kristu.

21 Hahú husi tempu neʼe, Jesus Kristu komesa fó sai ba ninia dixípulu sira katak nia tenke bá Jeruzalein no nia sei hetan susar barak husi katuas sira no ulun-naʼin amlulik sira no eskriba sira, no sira sei oho nia no liutiha loron tolu nia sei moris hiʼas fali. 22 Tan neʼe, Pedro lori nia ba sorin no hahú siʼak nia hodi hatete: “Naʼi, keta fó-malisan ba Ita-nia an.* Susar sira-neʼe sei la kona Ita.” 23 Maibé fila kotuk tiha, nia hatete ba Pedro: “Dook tiha husi haʼu,* Satanás! Ó hanesan fatuk sidi nian ba haʼu tanba ó-nia hanoin la tuir Maromak nian, maibé tuir ema nian.”

24 No Jesus hatete ba ninia dixípulu sira: “Se ema ruma hakarak tuir haʼu, nia tenke nega ninia an rasik no lori ninia ai-riin terus nian no kontinua laʼo tuir haʼu. 25 Tanba ema neʼebé hakarak salva nia moris* sei lakon nia moris, maibé ema neʼebé lakon nia moris tanba haʼu sei hetan nia moris. 26 Basá, buat diʼak saida mak ema ida hetan se nia manán mundu tomak maibé lakon nia moris? Ka saida mak ema ida bele fó hodi troka ninia moris? 27 Basá Oan-Mane husi ema sei mai iha ninia Aman nia glória hamutuk ninia anju sira, no nia sei fó kolen ba ema ida-idak tuir sira-nia hahalok. 28 Haʼu hatete loloos ba imi katak ema balu neʼebé hamriik iha neʼe sei la mate toʼo sira haree uluk Oan-Mane husi ema mai iha ninia Ukun.”

17 Liutiha loron neen, Jesus lori Pedro, Tiago no mós ninia alin João* bá foho aas ida hodi sira mesamesak. 2 No Jesus nakfila an iha sira-nia oin. Ninia oin sai naroman hanesan loro-matan, no ninia hatais sai nabilan loos. 3 No haree! Moisés no Elias mosu iha sira-nia oin no koʼalia daudaun ho Jesus. 4 Tuirmai, Pedro hatete ba Jesus: “Naʼi, ami kontente tebes atu mai iha neʼe. No se Ita hakarak, haʼu sei harii tenda tolu iha neʼe, ida ba Ita, ida ba Moisés, no ida ba Elias.” 5 Kuandu Pedro sei koʼalia hela, kalohan nabilan ida taka sira no lian ida sai husi kalohan dehan: “Neʼe mak haʼu-nia Oan-Mane, ida neʼebé haʼu hadomi, no neʼebé halo haʼu kontente, rona nia bá.” 6 Rona tiha neʼe, dixípulu sira hakneʼak ho oin ba rai no sira sai taʼuk tebetebes. 7 Tuirmai, Jesus hakbesik sira no kona sira hodi dehan: “Hamriik bá, no keta taʼuk.” 8 Kuandu sira foti sira-nia matan, sira la haree ema ida, só Jesus deʼit. 9 Nuʼudar sira tun husi foho, Jesus bandu sira, hodi dehan: “Keta fó-hatene ba ema ida buat neʼebé imi haree, toʼo Oan-Mane husi ema moris hiʼas fali husi mate.”

10 Maibé, dixípulu sira husu ba nia: “Entaun, tansá mak ema eskriba sira dehan katak Elias tenke mai uluk?” 11 Nia hatán: “Loloos, Elias tenke mai uluk hodi hadiʼa fali buat hotu. 12 Haʼu hatete ba imi katak Elias mai tiha ona, maibé sira la hatene loloos kona-ba nia, no sira halo aat ba nia tuir deʼit sira-nia hakarak. Iha dalan hanesan neʼe mós, Oan-Mane husi ema sei hetan terus iha sira-nia liman.” 13 No dixípulu sira foin komprende katak nia koʼalia ba sira kona-ba João Batista.

14 Kuandu sira laʼo besik ba ema-lubun, mane ida hakbesik nia, hakneʼak iha nia oin no hatete: 15 “Naʼi, hatudu laran-sadiʼa ba haʼu-nia oan-mane tanba nia moras bibi-maten no nia terus tebetebes. Dala barak ona nia monu ba ahi no monu ba bee laran, 16 no haʼu lori nia ba Ita-Boot nia dixípulu, maibé sira la bele kura nia.” 17 Maibé Jesus hatán: “Oh jerasaun neʼebé la iha fiar no aat, ba tempu hira tan mak haʼu sei hamutuk ho imi? Tempu hira tan mak haʼu tenke tahan imi? Lori nia mai haʼu.” 18 Tuirmai, Jesus siʼak anju aat neʼe no nia sai husi labarik-mane, no labarik neʼe sai diʼak kedas iha oras neʼebá. 19 No dixípulu sira hakbesik ba Jesus mesamesak no husu: “Tansá mak ami la bele duni sai anju aat neʼe?” 20 Nia hatán ba sira: “Tanba imi-nia fiar mak kiʼik. Haʼu hatete loloos ba imi: Se imi-nia fiar boot hanesan mostarda-musan, imi sei hatete ba foho neʼe: ‘Muda husi neʼe hodi bá fali neʼebá’, no foho neʼe sei muda, no la iha buat ida neʼebé imi la bele halo.” 21 ——*

22 Kuandu sira halibur hamutuk iha Galileia, Jesus hatete ba sira: “Fó-hatene nanis ona katak ema sei entrega Oan-Mane husi ema ba inimigu nia liman, 23 no sira sei oho nia, no liutiha loron tolu nia sei moris hiʼas fali.” Rona tiha ida-neʼe, sira sente triste tebetebes.

24 Kuandu sira toʼo tiha Kafarnaum, ema neʼebé halibur impostu templu nian* hakbesik Pedro no hatete: “Imi-nia mestre selu impostu templu nian ka lae?” 25 Nia hatán: “Sin.” Maibé, kuandu nia tama ba uma laran, Jesus koʼalia kedas ba nia no dehan: “Simão, ó hanoin oinsá? Liurai sira rai neʼe nian simu impostu sira husi sé? Husi sira-nia oan ka husi ema seluk?” 26 Nia hatán: “Husi ema seluk.” No Jesus dehan ba nia: “Entaun, oan sira la presiza selu impostu. 27 Maibé atu la halo sira sidi, ó bá tasi no soe kail, foti ikan primeiru neʼebé ó kaer no loke ninia ibun, iha neʼebá ó sei hetan osan-mutin ida.* Lori neʼe no fó ba sira atu selu impostu ba haʼu no ba ó.”

18 Iha oras neʼebá, dixípulu sira hakbesik Jesus no hatete: “Sé mak boot liu iha Ukun lalehan nian?” 2 Ho ida-neʼe nia bolu labarik kiʼik ida, no nia halo labarik neʼe hamriik iha sira-nia klaran 3 no hatete: “Haʼu hatete loloos ba imi: Se imi la troka dalan neʼebé imi hanoin hodi sai hanesan labarik kiʼik, imi sei la tama duni ba Ukun lalehan nian. 4 Tan neʼe, ema naran deʼit neʼebé haraik-an hanesan labarik kiʼik neʼe, nia mak ida neʼebé boot liu iha Ukun lalehan nian, 5 no ema naran deʼit neʼebé simu labarik ida hanesan neʼe tanba haʼu-nia naran, nia simu mós haʼu. 6 Maibé haʼu dehan ba imi kona-ba kiʼikoan sira neʼebé tau fiar mai haʼu: Se ema ruma halo sira-neʼe ida sidi, diʼak liu tara fatuk boot* ba nia kakorok no soe nia ba tasi laran.

7 “Susar ba mundu tanba hamosu fatuk sidi nian! Loloos, fatuk sidi nian tenke mosu mai, maibé susar ba ema neʼebé liuhusi nia mak fatuk sidi nian mosu! 8 Entaun, se ó-nia liman ka ain halo ó sidi, tesi tiha nia no soe ba dook; tanba diʼak liu ba ó atu tama ba moris ho liman sorin deʼit ka ain sorin deʼit, duké soe ó ba ahi neʼebé lakan ba nafatin ho liman rua ka ain rua. 9 No mós, se ó-nia matan halo ó sidi, losu tiha nia no soe ba dook; tanba diʼak liu ba ó atu tama ba moris ho matan ida deʼit, duké soe ó ba Gehena neʼebé lakan ho ó-nia matan rua. 10 Kuidadu atu imi la hakribi kiʼikoan sira-neʼe ida, tanba haʼu hatete ba imi katak sira-nia anju sira iha lalehan sempre hateke ba haʼu-nia Aman iha lalehan nia oin. 11 ——*

12 “Imi hanoin oinsá? Se ema ida iha bibi-malae atus ida no bibi ida lakon, nia sei husik bibi sianulu-resin-sia iha foho no bá hodi buka ida neʼebé lakon, loos ka lae? 13 Haʼu hatete loloos ba imi katak, se nia hetan bibi neʼe, nia sei haksolok tebes ho ida-neʼe liu fali ho bibi sianulu-resin-sia neʼebé la lakon. 14 Nuneʼe mós, haʼu-nia Aman iha lalehan lakohi atu kiʼikoan sira-neʼe ida lakon.

15 “Liután neʼe, se ó-nia maun ka alin ida halo sala hasoru ó, bá no koʼalia ho nia mesamesak hodi hatudu sai ninia sala. Se nia rona ba ó, neʼe katak ó lori fali ona ó-nia maun ka alin ba dalan loos. 16 Maibé se nia la rona ba ó, lori tan ema ida ka rua, atu nuneʼe ita bele hametin lia neʼe liuhusi sasin naʼin-rua ka tolu nia liafuan. 17 Se nia la rona ba sira, bá fó-hatene kongregasaun. Se nia la rona mós ba kongregasaun, haree nia hanesan ó haree ema husi nasaun seluk no ema kobradór impostu nian.

18 “Haʼu hatete loloos ba imi katak, buat naran deʼit neʼebé imi futu iha rai, futu ona iha lalehan, no buat naran deʼit neʼebé imi kore iha rai, kore ona iha lalehan. 19 Dala ida tan, haʼu hatete loloos ba imi: Se imi naʼin-rua iha rai deside hamutuk atu halo orasaun kona-ba buat naran deʼit neʼebé importante, haʼu-nia Aman iha lalehan sei halo ida-neʼe sai loos. 20 Tanba iha fatin naran deʼit neʼebé ema naʼin-rua ka tolu halibur hamutuk hodi haʼu-nia naran, haʼu mós iha sira-nia leet.”

21 Tuirmai, Pedro hakbesik no hatete ba nia: “Naʼi, toʼo dala hira mak haʼu-nia maun ka alin sei halo sala hasoru haʼu no haʼu tenke perdua nia? Toʼo dala hitu?” 22 Jesus dehan ba nia: “Haʼu hatete ba ó, laʼós toʼo dala hitu, maibé toʼo dala hitunulu-resin-hitu.”

23 “Tan neʼe, Ukun lalehan nian mak hanesan liurai ida neʼebé hakarak ninia atan sira atu selu fali sira-nia debe. 24 Kuandu nia hahú atu halibur tusan husi atan sira, ema lori ba nia atan ida neʼebé debe nia osan talentu 10.000.* 25 Maibé tanba nia la iha kbiit atu selu fali, ninia naʼi haruka atu faʼan atan neʼe hamutuk ho ninia feen no oan no buat hotu neʼebé nia iha, atu bele selu debe neʼe. 26 Entaun, atan neʼe monu ain ba nia no husu ho laran, dehan: ‘Fó tempu mai haʼu, no haʼu sei selu fali buat hotu ba Ita-Boot.’ 27 Tan hanoin tebetebes nia, atan neʼe nia naʼi husik nia bá no halo nia livre husi ninia tusan. 28 Maibé depois atan neʼe sai tiha, nia hetan ninia maluk atan ida neʼebé debe nia osan denáriu* atus ida, no kaer tiha atan neʼe, nia buti metin atan neʼe no dehan: ‘Selu fali buat hotu neʼebé ó debe husi haʼu.’ 29 No ninia maluk atan neʼe monu ain ba nia no husu ho laran, dehan: ‘Fó tempu mai haʼu, no haʼu sei selu fali buat hotu ba Ita.’ 30 Maibé nia lakohi, tan neʼe nia bá no husu ema atu hatama ninia maluk ba komarka toʼo nia bele selu fali buat hotu neʼebé nia debe. 31 No kuandu ninia maluk atan sira seluk haree buat neʼebé mosu, sira laran-susar tebetebes, no sira bá hodi fó-hatene buat hotu ba sira-nia naʼi. 32 Tuirmai, ninia naʼi bolu nia no dehan: ‘Atan aat, haʼu halo ó livre husi ó-nia debe hotu kuandu ó husu ba haʼu. 33 Entaun, tansá ó la hatudu laran-sadiʼa ba ó-nia maluk, hanesan haʼu hatudu ona laran-sadiʼa ba ó?’ 34 Tan neʼe, ho hirus, ninia naʼi fó nia ba guarda komarka nian, toʼo nia selu fali buat hotu neʼebé nia debe. 35 Nuneʼe mós, haʼu-nia Aman iha lalehan sei halo buat neʼebé hanesan ba imi se imi la perdua malu husi imi-nia laran.”

19 Kuandu Jesus koʼalia tiha liafuan sira-neʼe, nia sai husi Galileia no laʼo ba fronteira Judeia nian iha Mota Jordaun nia sorin bá. 2 Ema-lubun mós laʼo tuir nia no nia kura sira iha neʼebá.

3 No ema farizeu sira hakbesik nia tanba hakarak atu koko nia, no sira dehan: “Tuir lei mane ida bele soe malu ho nia feen tan razaun naran deʼit ka lae?” 4 Nia hatán: “Imi lee tiha ona ka lae, katak horiuluk kedas Maromak kria ema no nia kria sira mane no feto? 5 No imi mós lee tiha ona ka lae, katak Maromak hatete ba sira: ‘Tan razaun neʼe mak mane ida sei husik ninia inan no aman no nia sei hela* ho nia feen no sira naʼin-rua sei sai isin ida deʼit’? 6 Nuneʼe sira laʼós tan naʼin-rua maibé isin ida deʼit. Neʼe duni, buat neʼebé Maromak tau hamutuk, ema keta haketak.” 7 Sira dehan ba nia: “Entaun, tansá mak Moisés fó ukun-fuan kona-ba halo surat soe-malu nian atu ema bele soe nia feen?” 8 Nia hatete ba sira: “Tan imi-nia laran neʼebé toos mak Moisés husik imi atu soe imi-nia feen, maibé horiuluk kedas laʼós hanesan neʼe. 9 Haʼu hatete ba imi katak ema naran deʼit neʼebé soe nia feen maski nia feen la halo sala-foʼer,* no ema neʼe kaben fali, nia halo sala-foʼer.”*

10 Ninia dixípulu sira hatete ba nia: “Se moris kaben nian mak hanesan neʼe, entaun diʼak liu atu la kaben.” 11 Nia hatete ba sira: “Laʼós ema hotu halo tuir liafuan sira-neʼe, só deʼit sira neʼebé simu prezente neʼe. 12 Mane balu la bele kaben tanba moris mai nuneʼe kedas,* no mane seluk la bele kaben tanba ema mak halo sira hanesan neʼe, maibé iha mós mane neʼebé deside atu la kaben tanba Ukun lalehan nian. Ema neʼebé hakarak moris hanesan neʼe, halo nuneʼe bá.”

13 Tuirmai, ema lori labarik kiʼik sira ba nia atu nia tau liman no harohan ba sira, maibé ninia dixípulu siʼak sira. 14 Jesus dehan: “Husik labarik sira-neʼe, keta hapara sira atu hakbesik haʼu, tanba ema hanesan labarik sira-neʼe mak sei simu Ukun lalehan nian.” 15 Tuirmai, nia tau liman ba labarik sira-neʼe, no depois neʼe nia sai husi neʼebá.

16 No haree! mane ida hakbesik nia no husu: “Mestre, buat diʼak saida mak haʼu tenke halo atu hetan moris rohan-laek?” 17 Nia hatete ba mane neʼe: “Tansá mak ó husu haʼu kona-ba saida mak diʼak? Iha ida deʼit mak diʼak. Maibé, se ó hakarak hetan moris, ó presiza halo tuir nafatin ukun-fuan sira.” 18 Mane neʼe hatete ba nia: “Ukun-fuan ida-neʼebé?” Jesus hatán: “Ó keta oho, ó keta halo sala-foʼer,* ó keta naʼok, ó keta fó sasin falsu. 19 Hatudu respeitu ba ó-nia inan no aman, no ó tenke hadomi ó-nia maluk hanesan ó-nia an rasik.” 20 Mane joven neʼe hatete ba nia: “Haʼu halo tuir buat sira-neʼe hotu, saida tan mak sei kuran?” 21 Jesus dehan ba nia: “Se ó hakarak atu sai kompletu* iha ó-nia serbisu ba Maromak, bá no faʼan ó-nia rikusoin sira no fó ba ema kiak, no ó sei hetan rikusoin iha lalehan, no mai tuir haʼu.” 22 Kuandu mane joven neʼe rona liafuan sira-neʼe, nia bá ho laran-triste, tanba nia iha rikusoin barak. 23 Maibé Jesus dehan ba ninia dixípulu sira: “Haʼu hatete loloos ba imi katak susar duni ba ema riku atu tama iha Ukun lalehan nian. 24 Dala ida tan haʼu hatete ba imi: Fasil liu ba kuda-kamelu ida atu tama liuhusi daun nia kuak duké ema riku ida tama iha Maromak nia Ukun.”

25 Kuandu dixípulu sira rona kona-ba neʼe, sira hakfodak tebetebes no dehan: “Entaun, sé loos mak bele hetan salvasaun?” 26 Jesus hateke ba sira-nia oin no dehan: “Ba ema buat neʼe la bele, maibé ba Maromak buat hotu bele deʼit.”

27 Pedro hatán ba nia dehan: “Haree! Ami husik ona buat hotu atu tuir Ita, ami sei hetan saida?” 28 Jesus dehan ba sira: “Haʼu hatete loloos ba imi katak Maromak sei halo buat hotu sai foun kuandu Oan-Mane husi ema tuur iha ninia kadunan neʼebé nabilan. Iha tempu neʼebá, imi neʼebé laʼo tuir ona haʼu sei tuur mós iha kadunan sanulu-resin-rua atu tesi lia ba Izraél nia suku sanulu-resin-rua. 29 No ema hotu neʼebé husik uma, maun-alin ka feton, inan ka aman, oan, ka rai tanba haʼu-nia naran sei simu barak liu fali no sei hetan moris ba nafatin.

30 “Maibé ema barak neʼebé uluk sei sai ikus, no sira neʼebé ikus sei sai uluk.

20 “Basá Ukun lalehan nian hanesan toʼos-naʼin ida neʼebé sai husi nia uma iha dadeer-saan, hodi halo kontratu ho serbisu-naʼin ba ninia toʼos uvas nian. 2 Kuandu nia halo tiha kontratu ho serbisu-naʼin sira atu fó osan denáriu* ida ba loron ida, nia haruka sira ba nia toʼos uvas nian. 3 No kuandu nia sai fali iha tuku sia dadeer, nia haree ema seluk neʼebé hamriik iha merkadu no la halo buat ida. 4 No nia hatete ba sira: ‘Imi mós bá haʼu-nia toʼos uvas nian, no haʼu sei selu imi tuir buat neʼebé loos.’ 5 Entaun sira bá. No nia sai fali iha tuku sanulu-resin-rua no mós tuku tolu lokraik, hodi halo buat neʼebé hanesan. 6 Ikusliu, iha tuku lima lokraik, nia sai fali no hetan ema seluk neʼebé hamriik hela, no nia hatete ba sira: ‘Tansá mak imi hamriik iha neʼe loron tomak no la halo buat ida?’ 7 Sira hatete ba nia: ‘Tanba la iha ema ida neʼebé fó serbisu ba ami.’ Nia hatán: ‘Imi mós bá haʼu-nia toʼos uvas nian.’

8 “Kuandu rai besik kalan ona, toʼos-uvas nia naʼin hatete ba ema neʼebé tau matan ba nia toʼos hodi dehan: ‘Bolu serbisu-naʼin sira no selu sira-nia kolen, hahú husi ida neʼebé mai ikus toʼo ida neʼebé mai uluk.’ 9 Kuandu ema sira neʼebé hahú serbisu iha tuku lima lokraik mai, sira ida-idak simu denáriu ida. 10 Nuneʼe kuandu sira neʼebé serbisu uluk toʼo mai, sira hanoin katak sira sei simu liu, maibé sira mós simu denáriu ida. 11 Simu tiha ida-neʼe, sira hahú muramura hasoru toʼos-naʼin, 12 no hatete: ‘Sira neʼebé ikus halo serbisu oras ida deʼit, maibé Ita-Boot selu sira hanesan ho ami, maski ami serbisu makaʼas ba loron tomak iha loro-manas laran.’ 13 Maibé nia hatán ba sira ida dehan: ‘Maluk, haʼu la halo sala ida hasoru ó. Ó halo kontratu ho haʼu atu simu denáriu ida ba loron ida, loos ka lae? 14 Foti buat neʼebé ó-nian no bá. Haʼu hakarak fó ba ida neʼebé ikus neʼe hanesan haʼu fó ba ó. 15 Haʼu iha direitu atu halo buat neʼebé haʼu hakarak ho haʼu-nia rikusoin, loos ka lae? Ka ó laran-moras* tanba haʼu hatudu laran-diʼak ka?’ 16 Nuneʼe mak sira neʼebé ikus sei sai uluk no sira neʼebé uluk sei sai ikus.”

17 Nuʼudar sira laʼo tuir dalan atu saʼe ba Jeruzalein, Jesus bolu ninia dixípulu naʼin sanulu-resin-rua mesamesak no hatete ba sira: 18 “Haree! Agora ita saʼe daudaun ba Jeruzalein no ema sei entrega Oan-Mane husi ema ba ulun-naʼin amlulik sira no eskriba sira. Sira sei tesi lia ba nia atu hetan kastigu-mate 19 no sira sei entrega nia ba ema husi nasaun seluk atu hamoe nia, baku nia ho xikote no atu hedi nia, no liutiha loron tolu nia sei moris hiʼas fali.”

20 Tuirmai, Zebedeu nia feen hakbesik Jesus hamutuk ho ninia oan sira, no hakruʼuk an ba Jesus hodi husu buat ruma husi nia. 21 Jesus hatete ba feto neʼe: “Ita hakarak saida?” Nia hatete ba Jesus: “Haʼu husu Ita-Boot katak haʼu-nia oan naʼin-rua sei tuur hamutuk Ita iha Ita-nia Ukun. Ida iha Ita-nia liman-loos no ida iha Ita-nia liman-karuk.” 22 Jesus hatete: “Imi la hatene saida mak imi husu. Imi bele hemu husi kopu neʼebé haʼu sei hemu?” Sira hatán ba nia: “Ami bele.” 23 Nia hatete ba sira: “Imi sei hemu duni husi haʼu-nia kopu, maibé kona-ba tuur iha haʼu-nia liman-loos no liman-karuk, laʼós haʼu mak sei fó. Haʼu-nia Aman mak deside kona-ba sira neʼebé sei tuur iha fatin sira-neʼe.”

24 Kuandu sira naʼin-sanulu seluk rona kona-ba neʼe, sira sai hirus ba maun-alin rua neʼe. 25 Maibé Jesus bolu sira hodi hakbesik ba nia, no dehan: “Imi hatene katak ukun-naʼin husi nasaun seluk domina sira-nia povu, no sira neʼebé iha kbiit hanehan povu. 26 Maibé iha imi-nia leet laʼós hanesan neʼe. Ema naran deʼit neʼebé hakarak sai ema-boot iha imi-nia leet tenke serbí imi. 27 No ema naran deʼit neʼebé hakarak sai uluk iha imi-nia leet tenke sai imi-nia atan. 28 Nuneʼe mós ho Oan-Mane husi ema. Nia mai, laʼós atu ema serbí nia, maibé atu serbí no atu fó nia moris hodi sosa fali ema barak.”

29 Bainhira sira sai husi Jerikó, ema-lubun laʼo tuir nia. 30 No haree! mane naʼin-rua neʼebé matan-delek tuur hela iha dalan ninin no sira rona katak Jesus laʼo liu fatin neʼe. Entaun sira hakilar dehan: “Naʼi, David nia Oan, hatudu laran-sadiʼa mai ami!” 31 Tuirmai, ema-lubun siʼak sira hodi haruka sira atu nonook, maibé sira hakilar makaʼas liután dehan: “Naʼi, David nia oan, hatudu laran-sadiʼa mai ami!” 32 Entaun Jesus para no bolu sira hodi husu: “Saida mak imi hakarak haʼu atu halo ba imi?” 33 Sira hatete ba nia: “Naʼi, halo ami-nia matan nakloke.” 34 Tanba hanoin tebetebes sira, Jesus tau liman ba sira-nia matan, no iha tempu neʼe kedas sira haree fali, no sira laʼo tuir nia.

21 Tuirmai, sira toʼo ba Betfage iha Foho Oliveira no fatin neʼe besik Jeruzalein. No Jesus haruka ninia dixípulu naʼin-rua 2 hodi dehan ba sira: “Bá hodi tama ba knua neʼebé imi haree daudaun, no imi sei hetan kuda-burru inan neʼebé kesi hela hamutuk ho kuda-burru oan ida. Imi kore sira no lori mai haʼu. 3 Se ema ruma husu, imi tenke dehan: ‘Naʼi presiza sira.’ Iha tempu neʼe, nia sei husik kedas imi atu lori sira.”

4 Ida-neʼe sai loos atu bele kumpre liafuan neʼebé Maromak koʼalia liuhusi profeta neʼebé dehan: 5 “Hatete ba Siaun nia oan-feto: ‘Haree! Ó-nia Liurai laʼo ba ó, ho laran-maus, no nia saʼe kuda-burru ida, sin, nia tuur iha kuda-burru oan nia leten.’”

6 No dixípulu sira bá hodi halo tuir buat hotu neʼebé Jesus haruka. 7 Sira lori ba nia kuda-burru inan no ninia oan, no sira tau sira-nia hatais ba kuda-burru nia leten no Jesus tuur iha kuda neʼe nia leten. 8 Ema barak husi ema-lubun nahe sira-nia hatais iha dalan no ema balu seluk hahú tesi ai-sanak no tau iha dalan. 9 Kona-ba ema-lubun neʼe, sira neʼebé laʼo iha ninia oin no mós sira neʼebé laʼo iha ninia kotuk kontinua hakilar makaʼas dehan: “Ami harohan, salva* David nia Oan bá! Bensaun ba ida neʼebé mai ho Jeová nia naran! Salva nia, Ita-Boot neʼebé iha fatin aas!”

10 Kuandu nia tama ba Jeruzalein, ema hotu iha sidade koʼalia ba malu kona-ba nia, dehan: “Ema neʼe sé?” 11 Ema-lubun neʼe kontinua dehan ba sira: “Neʼe mak profeta Jesus, nia husi Nazaré iha Galileia!”

12 No Jesus tama ba templu no duni sai ema sira hotu neʼebé faʼan no sosa iha templu, no nia baku fila meza ema troka osan nian no banku ema faʼan manu-pombu nian. 13 Nia hatete ba sira: “Hakerek nanis ona: ‘Haʼu-nia uma sei bolu nuʼudar uma orasaun nian’, maibé imi halo nia sai fali hanesan naʼok-teen sira-nia knuuk.” 14 No mós ema matan-delek sira no ain-kudeʼik sira hakbesik ba nia iha templu no nia kura sira.

15 Maibé ulun-naʼin amlulik sira no eskriba sira sai hirus kuandu sira haree buat furak sira neʼebé nia halo no rona labarik-mane sira neʼebé hakilar iha templu laran hodi dehan: “Ami harohan, salva David nia Oan bá!” 16 Sira hatete ba Jesus: “Ó la rona buat neʼebé labarik sira-neʼe dehan ka?” Jesus hatán: “Sin, haʼu rona. Maibé, imi lee tiha ona ka lae liafuan neʼebé dehan: ‘Ita halo labarik kiʼik no bebé sira-nia ibun fó hahiʼi ba Ita’?” 17 Tuirmai, nia husik hela sidade neʼe no nia bá Betánia hodi hela iha neʼebá kalan neʼe.

18 Kuandu nia fila fali ba sidade iha dadeer-saan, nia sente hamlaha. 19 No nia haree ai-figeira hun ida iha dalan ninin, no nia laʼo besik ba ai neʼe, maibé nia la hetan ai-fuan ida, só deʼit tahan. Entaun nia dehan ba ai neʼe: “Husi ohin ba oin, ó sei la fó fuan tan ba nafatin.” Iha tempu neʼe kedas ai-figeira neʼe sai maran. 20 Maibé kuandu ninia dixípulu sira haree ida-neʼe, sira hakfodak no dehan: “Oinsá mak ai-figeira neʼe sai maran kedas?” 21 Jesus hatán ba sira: “Haʼu hatete loloos ba imi: Se imi iha fiar no la laran-rua, imi laʼós deʼit halo buat neʼebé haʼu halo ba ai-figeira neʼe, maibé se imi hatete ba foho neʼe: ‘Hiʼit ó-nia an no soe tiha ba tasi’, ida-neʼe sei akontese duni. 22 No buat hotu neʼebé imi husu iha orasaun, hatudu fiar bá, no imi sei simu.”

23 No kuandu nia tama tiha ba templu, ulun-naʼin amlulik sira no katuas sira hakbesik nia nuʼudar nia hanorin hela no sira husu: “Ho kbiit saida mak ó halo buat sira-neʼe? No sé mak fó kbiit neʼe ba ó?” 24 Jesus hatán ba sira: “Haʼu mós sei husu imi buat ida. Se imi fó-hatene mai haʼu, haʼu mós sei fó-hatene imi ho kbiit saida mak haʼu halo buat sira-neʼe: 25 João nia batizmu mai husi neʼebé? Husi Maromak* ka husi ema?” Maibé sira hahú koʼalia ba malu dehan: “Se ita hatete: ‘Husi Maromak’, nia sei hatán ba ita: ‘Entaun, tansá mak imi la fiar nia?’ 26 Se ita dehan: ‘Husi ema’, ita taʼuk ba ema-lubun, tanba sira hotu haree João nuʼudar profeta ida.” 27 Entaun sira hatete ba Jesus: “Ami la hatene.” Nuneʼe, Jesus dehan ba sira: “Haʼu mós sei la fó-hatene imi ho kbiit saida mak haʼu halo buat sira-neʼe.

28 “Imi hanoin oinsá? Mane ida iha oan naʼin-rua. Nia hakbesik ba ida primeiru no dehan: ‘Oan, ohin ó bá hodi halo serbisu iha toʼos uvas nian.’ 29 Oan neʼe hatán: ‘Haʼu sei bá, apá’, maibé nia la bá. 30 Hakbesik ba ida seluk, nia hatete buat neʼebé hanesan. No oan neʼe hatán: ‘Haʼu sei la bá.’ Maibé depois neʼe, nia sente triste no nia bá. 31 Husi oan naʼin-rua neʼe, ida-neʼebé mak halo ninia aman nia hakarak?” Sira hatete: “Ida ikus.” Jesus dehan ba sira: “Haʼu hatete loloos ba imi katak kobradór impostu nian no feto-aat sira sei laʼo uluk liu imi atu tama ba Maromak nia Ukun. 32 Tanba João mosu ba imi no hatudu ba imi dalan neʼebé loos, no imi la fiar nia. Maibé, ema kobradór impostu nian no feto-aat sira fiar nia. Maski imi haree ida-neʼe, maibé imi la hakribi an hodi tau fiar ba nia.

33 “Rona tan ai-knanoik ida-neʼe: Iha mane toʼos-naʼin ida. Nia halo toʼos uvas nian no tau lutu haleʼu no nia keʼe fatin sama uvas nian no harii uma aas,* no depois neʼe nia fó-aluga* ba toʼos-atan sira, no nia bá rai liʼur. 34 Kuandu toʼo ona tempu atu kuʼu uvas, nia haruka ninia ema sira atu bá toʼos-atan sira hodi simu ai-fuan neʼebé ninian. 35 Maibé, toʼos-atan sira kaer tiha toʼos-naʼin nia ema, no sira baku ida, oho ida seluk, no ida tan sira tuda. 36 Tuirmai, nia haruka ema seluk tan, barak liu fali uluk, maibé toʼos-atan sira halo buat neʼebé hanesan ba ema sira-neʼe. 37 Ikusliu, nia haruka ninia oan ba sira tanba nia hanoin: ‘Sira sei respeitu haʼu-nia oan.’ 38 Kuandu haree oan neʼe, toʼos-atan sira koʼalia ba malu: ‘Nia mak ida neʼebé sei simu toʼos neʼe nuʼudar liman-rohan, mai ita oho tiha nia no foti ninia liman-rohan.’ 39 Entaun, sira kaer nia no lori nia ba toʼos liʼur no oho nia. 40 Nuneʼe, kuandu toʼos-naʼin mai, saida mak nia sei halo ba toʼos-atan sira-neʼe?” 41 Sira hatete ba nia: “Tanba ema sira-neʼe aat, entaun nia sei oho sira no sei fó-aluga toʼos neʼe ba toʼos-atan seluk, neʼebé sei fó ba nia uvas-fuan kuandu tempu toʼo.”

42 Jesus hatete ba sira: “Imi seidauk lee buat neʼebé Eskritura sira dehan ka? Basá Eskritura hatete: ‘Fatuk neʼebé badain sira la simu sai ona fatuk neʼebé importante liu.* Ida-neʼe mai husi Jeová, no ida-neʼe furak tebes iha ita-nia matan.’ 43 Tan neʼe mak haʼu hatete ba imi: Maromak nia Ukun sei foti tiha husi imi no fó fali ba nasaun neʼebé halo tuir ninia hakarak. 44 No ema neʼebé monu iha fatuk neʼe nia leten sei rahun. Nuneʼe mós, ema neʼebé fatuk neʼe monu iha nia leten, ema neʼe sei rahun.”

45 Kuandu ulun-naʼin amlulik sira no farizeu sira rona tiha ai-knanoik sira-neʼe, sira hatene katak nia koʼalia kona-ba sira. 46 Maski sira buka atu kaer nia, maibé sira taʼuk ema-lubun, tanba ema sira-neʼe haree nia nuʼudar profeta ida.

22 Dala ida tan, Jesus koʼalia ba sira ho ai-knanoik, hodi dehan: 2 “Ukun lalehan nian mak hanesan liurai ida neʼebé halo festa kaben nian ba ninia oan-mane. 3 No nia haruka ninia atan sira atu bolu sira neʼebé nia konvida ona atu tuir festa kaben nian, maibé ema sira-neʼe lakohi mai. 4 Dala ida tan, nia haruka atan seluk, no dehan: ‘Bá hodi fó-hatene sira neʼebé haʼu konvida: “Haree! Haʼu prepara ona ai-han, haʼu oho ona haʼu-nia karau-aman sira no mós animál neʼebé bokur,* no buat hotu prontu ona. Mai tuir festa kaben nian.”’ 5 Maibé sira la hafolin ida-neʼe no sira bá hodi halo buat seluk, ida bá nia toʼos, ida seluk bá halo kontratu, 6 no sira seluk kaer atan sira-neʼe hodi baku no oho sira.

7 “Entaun, liurai sai hirus, no nia haruka ninia soldadu sira hodi halakon ohodór sira-neʼe no sunu sira-nia sidade. 8 Tuirmai, nia hatete ba ninia atan sira: ‘Festa kaben nian prontu ona, maibé ema neʼebé haʼu konvida la merese atu tuir. 9 Tan neʼe, bá iha dalan boot sidade nian, no konvida ema naran deʼit neʼebé imi hasoru atu mai tuir festa kaben nian.’ 10 Nuneʼe, atan sira halo tuir hodi bá dalan boot sira no halibur ema hotu neʼebé sira hasoru, ema aat no ema diʼak, no fatin festa nian sai nakonu ho ema.*

11 “Kuandu liurai mai atu haree bainaka sira-neʼe, nia haree mane ida hatais roupa neʼebé laʼós ba festa kaben nian. 12 Entaun nia hatete: ‘Haʼu-nia maluk, oinsá mak ó tama iha neʼe hodi la hatais roupa festa nian?’ Ema neʼe la hatene atu koʼalia saida. 13 Nuneʼe, liurai dehan ba ninia atan sira: ‘Kesi nia liman no ain no soe nia ba liʼur iha nakukun laran. Iha neʼebá mak nia sei tanis no ruun nehan.’

14 “Basá ema barak hetan konvite, maibé hili deʼit uitoan.”

15 Tuirmai, ema farizeu bá hodi halibur hamutuk no koʼalia ba malu hodi lasu Jesus ho ninia liafuan. 16 Entaun, sira haruka sira-nia dixípulu, hamutuk ho ema neʼebé apoia Herodes, no sira hatete: “Mestre, ami hatene katak Ita-Boot sempre koʼalia buat loos no Ita hanorin ho loloos kona-ba Maromak nia dalan, no Ita la todan ba sorin, tanba Ita la tesi lia tuir deʼit buat neʼebé matan haree. 17 Neʼe duni, fó-hatene mai ami, sala ka lae atu selu impostu ba Liurai Roma nian?”* 18 Tan hatene sira-nia laran-aat, Jesus hatete: “Imi ema laran-makerek, tansá mak imi koko haʼu? 19 Hatudu mai haʼu osan-besi impostu nian.” Entaun sira fó ba nia osan denáriu ida. 20 No nia hatete ba sira: “Sé-nia oin no naran mak neʼe?” 21 Sira hatán: “Liurai Roma nian.” Tuirmai nia dehan: “Fó ba Liurai Roma buat neʼebé Liurai Roma nian, no ba Maromak buat neʼebé Maromak nian.” 22 Rona tiha kona-ba neʼe, sira sai hakfodak, no sira bá hodi husik hela nia.

23 Iha loron neʼe, ema saduseu sira, neʼebé dehan katak la iha moris-hiʼas, hakbesik Jesus no husu: 24 “Mestre, Moisés hatete: ‘Se mane ida mate no nia la iha oan, ninia alin* tenke kaben fali ho nia feen no iha oan ba ninia maun.’ 25 Iha maun-alin naʼin-hitu iha ami-nia leet. No ida primeiru kaben no depois neʼe mate, no nia la iha oan, entaun nia husik hela nia feen ba ninia alin. 26 Ida-neʼe mós akontese ba ida segundu, no ba ida tuirmai, no ba sira naʼin-hitu hotu. 27 Ikusmai, feto neʼe mós mate. 28 Entaun, iha tempu moris-hiʼas nian, husi sira naʼin-hitu neʼe, feto neʼe sei sai sé-nia feen loos? Basá uluk sira hotu kaben ho nia.”

29 Jesus hatán ba sira: “Imi hanoin sala, basá imi la hatene Eskritura no mós la hatene Maromak nia kbiit, 30 tanba iha tempu moris-hiʼas nian, mane sira sei la kaben no feto sira sei la sai ema nia kaben, maibé sira sei sai hanesan anju sira iha lalehan. 31 No kona-ba moris-hiʼas husi mate, imi seidauk lee saida mak Maromak koʼalia ba imi? Nia dehan: 32 ‘Haʼu mak Abraão nia Maromak no Isaac nia Maromak no Jacob nia Maromak.’ Nia laʼós Maromak ba ema neʼebé mate, maibé Maromak ba ema neʼebé moris.” 33 Rona tiha ida-neʼe, ema-lubun hakfodak ho ninia hanorin.

34 Kuandu ema farizeu sira rona katak Jesus halo ema saduseu sira sai nonook, entaun farizeu sira halibur hamutuk hodi bá hasoru Jesus. 35 No sira ida neʼebé hatene didiʼak kona-ba Ukun-Fuan koko Jesus hodi husu: 36 “Mestre, iha Moisés nia Ukun-Fuan, mandamentu ida-neʼebé mak boot liu?” 37 Jesus hatete ba nia: “‘Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.’ 38 Neʼe mak mandamentu neʼebé boot liu no uluk liu. 39 Ida tuirmai neʼebé hanesan nia mak: ‘Ó tenke hadomi ó-nia maluk hanesan ó-nia an rasik.’ 40 Mandamentu rua neʼe mak hun ba Ukun-Fuan tomak no profeta sira-nia liafuan.”

41 Kuandu ema farizeu sira sei hamutuk hela, Jesus husu sira: 42 “Imi hanoin oinsá kona-ba Kristu? Nia sé-nia oan?” Sira hatán: “David.” 43 Nia hatete ba sira: “Entaun, tansá mak liuhusi espíritu santu, David bolu nia Naʼi? David dehan: 44 ‘Jeová hatete ba haʼu-nia Naʼi: “Tuur iha haʼu-nia liman-loos toʼo haʼu tau ó-nia inimigu sira iha ó-nia ain okos.”’ 45 Entaun, se David bolu nia Naʼi, oinsá mak nia David nia oan?” 46 No la iha ema ida neʼebé bele hatán ba nia, no mós husi loron neʼe kedas la iha ema ida neʼebé brani atu husu tan pergunta ba nia.

23 Tuirmai, Jesus koʼalia ba ema-lubun no ba ninia dixípulu sira, dehan: 2 “Ema eskriba no farizeu sira hadau Moisés nia tuur-fatin. 3 Tan neʼe, halo tuir bá buat hotu neʼebé sira hatete, maibé keta halo tuir sira-nia hahalok, tanba sira la halo tuir buat neʼebé sira rasik hatete. 4 Sira futu naha todan no tau iha ema nia kabaas, maibé sira rasik lakohi atu hiʼit ho sira-nia liman-fuan. 5 Buat hotu neʼebé sira halo, sira halo atu ema haree. Sira halo boot liután kaixa* neʼebé sira tau iha sira-nia reen-toos no iha liman-karuk. No sira mós hanaruk sira-nia hatais ninin. 6 Kuandu han iha festa, sira buka tuur-fatin neʼebé importante liu, no iha sinagoga laran, sira gosta atu tuur iha oin. 7 Sira hakarak atu ema kumprimenta sira iha merkadu, no hakarak atu ema bolu sira mestre.* 8 Maibé imi, keta husik ema bolu imi mestre, tanba imi-nia Mestre ida deʼit, no imi hotu mak maun-alin. 9 Liután neʼe, keta bolu ema ida iha rai nuʼudar aman,* tanba imi-nia Aman ida deʼit, neʼebé iha lalehan. 10 Nuneʼe mós keta husik ema bolu imi ulun-naʼin, tanba imi-nia Ulun-Naʼin ida deʼit, Kristu. 11 Maibé, ida neʼebé boot liu iha imi-nia leet tenke sai imi-nia atan. 12 Ema neʼebé foti an, Maromak sei hatún, no ema neʼebé haraik an, Maromak sei foti aas.

13 “Susar ba imi eskriba no farizeu, imi ema laran-makerek! Imi taka netik odamatan ba ema atu tama ba Ukun lalehan nian. Imi rasik sei la tama, no imi mós la husik ema neʼebé hakarak atu tama. 14 ——*

15 “Susar ba imi eskriba no farizeu, imi ema laran-makerek! Imi hakur tasi no laʼo liu rai-maran atu halo ema foun ida tuir imi-nia fiar, no kuandu nia fiar ona, imi halo nia sai Gehena nia oan, dala rua liu fali imi.

16 “Susar ba imi tanba imi hanesan ema matan-delek neʼebé hatudu dalan ba ema seluk. Imi hatete: ‘Se ema ruma jura hodi templu, neʼe la buat ida, maibé se ema ruma jura hodi osan-mean templu nian, nia tenkesér kumpre ida-neʼe.’ 17 Beik-teen no matan-delek sira! Loloos, ida-neʼebé mak importante liu? Osan-mean ka templu neʼebé halo santu osan-mean? 18 Imi mós dehan: ‘Se ema ruma jura hodi altár, neʼe la buat ida, maibé se ema ruma jura hodi prezente neʼebé iha altár leten, nia tenkesér kumpre ida-neʼe.’ 19 Matan-delek sira! Loloos, ida-neʼebé mak importante liu? Prezente ka altár neʼebé halo santu prezente neʼe? 20 Tan neʼe, ema neʼebé jura hodi altár, nia jura laʼós deʼit hodi altár neʼe, maibé mós ho buat hotu neʼebé iha altár leten. 21 No ema neʼebé jura hodi templu, nia jura laʼós deʼit hodi templu neʼe, maibé mós ho ida neʼebé hela iha templu neʼe. 22 No ema neʼebé jura hodi lalehan, nia jura hodi Maromak nia kadunan no ho ida neʼebé tuur iha kadunan neʼe.

23 “Susar ba imi eskriba no farizeu sira, imi ema laran-makerek! Maski imi fó parte sanulu husi ortelaun no endru no mós komiñu,* maibé imi la halo tuir buat neʼebé importante iha Ukun-Fuan, hanesan hahalok loos, laran-sadiʼa no laran-metin. Maski fó parte sanulu kona-ba buat kiʼik sira-neʼe mak importante atu halo, maibé keta haluha buat sira seluk. 24 Imi ema matan-delek neʼebé hatudu dalan ba ema seluk! Maski imi taʼes susuk, maibé imi tolan kuda-kamelu.

25 “Susar ba imi eskriba no farizeu sira, imi ema laran-makerek! Imi hamoos kopu no bikan nia liʼur, maibé iha laran nakonu ho hahalok kaan-teen no hanoin an deʼit. 26 Imi farizeu neʼebé matan-delek! Hamoos uluklai kopu no bikan nia laran atu nuneʼe iha liʼur bele sai moos.

27 “Susar ba imi eskriba no farizeu sira, imi ema laran-makerek! Imi hanesan rate neʼebé pinta mutin. Maski iha liʼur haree furak, maibé iha laran nakonu ho ema mate nia ruin sira no buat foʼer oioin. 28 Nuneʼe mós ho imi. Husi liʼur ema haree imi hanesan ema loos, maibé iha laran imi nakonu ho hahalok laran-makerek no hahalok aat.

29 “Susar ba imi eskriba no farizeu sira, imi ema laran-makerek! Imi hada profeta sira-nia rate no halo furak ema loos sira-nia rate, 30 no imi hatete: ‘Se ami moris iha ami-nia beiʼala sira-nia tempu, ami sei la halo parte iha sira-nia sala atu fakar profeta sira-nia raan.’ 31 Nuneʼe, imi rasik fó sasin hasoru imi-nia an katak imi mak oan husi sira neʼebé oho profeta sira. 32 Entaun, halo bá toʼo rohan buat neʼebé imi-nia beiʼala sira hahú ona.

33 “Imi samea sira, no samea nia oan sira. Oinsá mak imi bele halai husi kastigu Gehena nian? 34 Tan neʼe, haʼu sei haruka ba imi profeta sira no ema matenek sira no mós mestre sira. Sira balu imi sei oho no hedi, no sira seluk imi sei baku ho xikote iha imi-nia sinagoga sira no fó-terus ba sira husi sidade ba sidade. 35 Atu nuneʼe imi sei simu sala husi ema loos nia raan neʼebé fakar ona iha rai, hahú husi ema loos Abel nia raan toʼo Barakias nia oan Zacarias nia raan, neʼebé imi oho iha fatin santu no altár nia klaran. 36 Haʼu hatete loloos ba imi katak, buat sira-neʼe hotu sei mosu ba jerasaun neʼe.

37 “Jeruzalein, Jeruzalein, ó neʼebé oho profeta sira no tuda ema neʼebé Maromak haruka ba ó! Dala hira ona mak haʼu hakarak atu halibur ó-nia oan sira hanesan manu-inan halibur nia oan iha nia liras okos, maibé imi lakohi! 38 Haree! Maromak husik ona imi-nia uma.* 39 Basá haʼu hatete ba imi katak, hahú husi agora imi sei la haree tan haʼu, toʼo tempu neʼebé imi dehan: ‘Bensaun ba ida neʼebé mai ho Jeová nia naran!’”

24 Sai tiha husi templu, Jesus nia dixípulu sira hakbesik nia no hatudu ba nia uma sira iha templu. 2 Jesus hatete ba sira: “Imi haree buat sira-neʼe hotu, loos ka lae? Haʼu hatete loloos ba imi: La iha fatuk ida sei husik hela iha fatuk seluk nia leten, sira hotu sei naksobu.”

3 Kuandu nia tuur iha Foho Oliveira, ninia dixípulu hakbesik nia mesamesak no husu: “Fó-hatene mai ami, bainhira mak buat sira-neʼe sei mosu, no sinál saida mak sei hatudu katak Ita toʼo ona mai* no katak mundu neʼe atu hotu?”

4 Jesus hatán ba sira dehan: “Kuidadu bá atu ema ida la lohi imi, 5 tanba ema barak sei mai hodi haʼu-nia naran no dehan: ‘Haʼu mak Kristu’, no sira sei lohi ema barak. 6 Imi sei rona kona-ba funu iha fatin oioin, maibé kuidadu bá katak imi la sai taʼuk. Tanba buat sira-neʼe tenke mosu duni, maibé rohan seidauk mai.

7 “Nasaun sei hamriik hasoru nasaun seluk no ukun ida sei hamriik hasoru ukun seluk, no rai sei hamlaha no sei iha rai-nakdoko iha fatin oioin. 8 Buat sira-neʼe hatudu katak terus* foin hahú.

9 “Ema sei fó-terus ba imi no sei oho imi, no nasaun sira hotu sei odi imi tanba haʼu-nia naran. 10 No ema barak sei lakon sira-nia fiar no sira sei la laran-metin ba malu, no sei odi malu. 11 Profeta falsu sira sei mosu no lohi ema barak. 12 No tanba hahalok aat aumenta ba beibeik, entaun ema barak nia domin sei sai malirin. 13 Maibé, ema neʼebé tahan toʼo rohan mak ida neʼebé sei hetan salvasaun. 14 No ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.

15 “Tan neʼe, kuandu imi haree buat neʼebé foʼer hamriik iha fatin santu no sei halakon fatin neʼe, no neʼe tuir liafuan neʼebé profeta Daniel fó-hatene nanis ona (atu komprende ida-neʼe, ema neʼebé lee hanoin didiʼak bá), 16 iha oras neʼe, ema neʼebé iha Judeia presiza halai ba foho. 17 No ema neʼebé iha uma-leten keta tun atu foti ninia sasán iha uma laran. 18 No ema neʼebé iha toʼos keta fila ba nia uma atu foti ninia hatais. 19 Susar ba feto sira neʼebé isin-rua no mós ba sira neʼebé fó-susu ba bebé iha loron sira neʼebá! 20 Kontinua harohan atu tempu neʼebé imi halai laʼós iha tempu malirin ka loron Sábadu. 21 Tanba iha tempu neʼe sei mosu terus boot. Husi mundu hahú toʼo agora seidauk mosu terus hanesan neʼe, no depois neʼe sei la mosu fali. 22 Tuir loloos, se Maromak la habadak loron sira-neʼe, sei la iha ema ida neʼebé hetan salvasaun; maibé tanba sira neʼebé Maromak hili ona, entaun loron sira-neʼe sei habadak duni.

23 “Entaun se ema ruma hatete ba imi: ‘Haree! Kristu iha neʼe’, ka ‘Kristu iha neʼebá!’, imi keta fiar ida-neʼe. 24 Tanba Kristu falsu no profeta falsu sira sei mosu no sira sei halo sinál boot oioin no mós halo milagre sira tanba koko atu lohi mós sira neʼebé Maromak hili ona. 25 Haree! Haʼu fó avizu nanis ona ba imi. 26 Neʼe duni, se ema dehan ba imi: ‘Haree! Nia iha rai-fuik’, imi keta bá neʼebá, ka se ema dehan: ‘Haree! Nia iha uma laran’, imi keta fiar. 27 Hanesan rai-lakan neʼebé mosu husi parte leste no nia naroman toʼo parte oeste, nuneʼe mós kuandu Oan-Mane husi ema toʼo ona mai.* 28 Iha fatin neʼebé iha mate-isin, iha neʼebá mós manu-makikit sira halibur.

29 “Lakleur depois susar iha loron sira-neʼe, loro-matan sei sai nakukun no fulan sei la fó tan ninia naroman no fitun sira sei monu husi lalehan no lalehan nia kbiit sei nakdoko. 30 No tuirmai, sinál husi Oan-Mane husi ema sei mosu iha lalehan, no nasaun* hotu iha rai sei baku sira-nia an ho triste, no sira sei haree Oan-Mane husi ema, no nia sei mai iha kalohan iha lalehan ho kbiit no ho glória boot. 31 No nia sei haruka ninia anju sira, no ho lian trombeta nian neʼebé boot, sira sei halibur ema neʼebé Maromak hili ona husi mundu nia parte haat,* husi lalehan nia parte ida toʼo lalehan nia parte seluk.

32 “Aprende husi ai-figeira nuʼudar ai-knanoik ida atu hatene ida-neʼe: Kuandu ai-sanak nurak mosu no hamosu tahan, imi hatene katak tempu bailoro* besik ona. 33 Nuneʼe mós kuandu imi haree buat hotu neʼe, imi hatene bá katak nia besik ona odamatan. 34 Haʼu hatete loloos ba imi katak jerasaun neʼe sei la lakon toʼo buat hotu neʼe mosu. 35 Maski lalehan no rai sei lakon, maibé haʼu-nia liafuan sei la lakon.

36 “Kona-ba loron no oras, ema ida la hatene, anju sira iha lalehan la hatene no Oan-Mane mós la hatene, só deʼit Aman. 37 Basá hanesan Noé nia loron, nuneʼe mós ho tempu neʼebé Oan-Mane husi ema toʼo ona mai.* 38 Iha loron sira neʼebá antes rai-nabeen, ema han no hemu, mane no feto sira kaben, toʼo loron neʼebé Noé tama ba ró* laran. 39 No sira lakohi rona toʼo rai-nabeen mosu no halakon sira hotu, nuneʼe mós sei mosu iha tempu neʼebé Oan-Mane husi ema toʼo ona mai.* 40 Mane naʼin-rua sei iha toʼos laran: Ida Maromak sei lori no ida seluk sei husik hela. 41 Feto naʼin-rua sei dulas hela trigu: Ida Maromak sei lori no ida seluk sei husik hela. 42 Tan neʼe, matan-moris nafatin bá, tanba imi la hatene loron neʼebé imi-nia Naʼi sei mai.

43 “Maibé hanoin ida-neʼe bá: Se uma-naʼin hatene ona iha oras saida mak naʼok-teen sei mai, nia sei kontinua atu hadeer no la husik naʼok-teen neʼe atu tama nia uma. 44 Nuneʼe mós hatudu imi-nia an prontu bá, tanba iha oras neʼebé imi la hanoin nia atu mai, iha oras neʼe mak Oan-Mane husi ema sei mai.

45 “Sé loos mak atan laran-metin no matenek neʼebé ninia Naʼi hili atu tau matan ba Naʼi nia atan sira seluk, atu fó sira ai-han iha tempu loloos? 46 Ksolok ba atan neʼe, se nia Naʼi mai no haree nia halo nuneʼe! 47 Haʼu hatete loloos ba imi: Nia sei foti atan neʼe atu tau matan ba ninia rikusoin tomak.

48 “Maibé se atan neʼe aat no koʼalia iha nia laran dehan: ‘Haʼu-nia Naʼi sei mai tarde’, 49 no hahú baku ninia maluk atan no han no hemu ho ema lanu-teen sira, 50 atan neʼe nia Naʼi sei mai iha loron neʼebé nia la hein no iha oras neʼebé nia la hatene, 51 no sei fó kastigu todan ba nia no sei tau nia hamutuk ho ema laran-makerek sira. Iha neʼebá mak nia sei tanis no ruun nehan.

25 “Ukun lalehan nian sei sai hanesan feto virjen naʼin-sanulu neʼebé foti sira-nia ahi-oan no bá atu hasoru noivu. 2 Sira naʼin-lima beik no naʼin-lima seluk matenek. 3 Basá sira neʼebé beik lori sira-nia ahi-oan maibé la lori mina, 4 no sira neʼebé matenek lori sira-nia ahi-oan no mós mina iha botir. 5 Kuandu noivu demora, sira hotu sai matan-dukur no toba. 6 No iha kalan-boot, ema hakilar: ‘Noivu mai ona! Sai bá hasoru nia.’ 7 Entaun, feto virjen sira-neʼe hotu hadeer no hadiʼa sira-nia ahi-oan. 8 Feto sira neʼebé beik hatete ba sira neʼebé matenek: ‘Fó imi-nia mina balu ba ami tanba ami-nia ahi-oan besik atu mate.’ 9 Sira neʼebé matenek hatán: ‘Karik ida-neʼe la toʼo ba ami no mós ba imi, entaun imi rasik bá hodi sosa mina husi ema neʼebé faʼan.’ 10 Kuandu sira bá atu sosa, noivu toʼo mai, no feto virjen sira neʼebé prontu ona tama hamutuk ho noivu ba festa kaben nian, no tuirmai odamatan taka tiha. 11 Depois neʼe, feto virjen naʼin-lima seluk toʼo mai no hatete: ‘Naʼi, naʼi, loke odamatan ba ami!’ 12 Maibé, nia hatán: ‘Haʼu hatete loloos ba imi, haʼu la hatene imi.’

13 “Tan neʼe, matan-moris nafatin bá, tanba imi la hatene loron no oras.

14 “Ukun lalehan nian mós hanesan ho mane ida neʼebé planu atu bá rai seluk. Antes bá, nia bolu ninia atan sira hodi fó ninia rikusoin ba sira atu tau matan. 15 Nia fó osan talentu* lima ba atan ida, ba atan ida seluk nia fó talentu rua, no ba atan ida tan nia fó talentu ida. Nia fó ba sira tuir sira ida-idak nia kbiit, depois neʼe nia bá rai seluk. 16 Ida neʼebé simu talentu lima uza kedas ida-neʼe hodi halo kontratu no nia manán talentu lima tan. 17 Nuneʼe mós, ida neʼebé simu talentu rua manán rua tan. 18 Maibé atan neʼebé simu osan talentu ida bá hodi keʼe rai no hakoi ninia naʼi nia osan.

19 “Liutiha tempu kleur, atan sira-neʼe nia naʼi mai no husu sira kona-ba ninia rikusoin. 20 Atan neʼebé simu talentu lima mai no lori tan talentu lima no nia dehan: ‘Naʼi, Ita-Boot fó mai haʼu osan talentu lima, no haree, haʼu manán talentu lima tan.’ 21 Ninia naʼi dehan ba nia: ‘Ó atan diʼak no laran-metin, ó halo diʼak loos! Ó laran-metin ba buat neʼebé uitoan. Entaun haʼu sei foti ó atu tau matan ba buat barak. Tama bá ó-nia naʼi nia ksolok.’ 22 Tuirmai ida neʼebé simu talentu rua mai no lori tan talentu rua no nia dehan: ‘Naʼi, Ita-Boot fó mai haʼu osan talentu rua, no haree, haʼu manán talentu rua tan.’ 23 Ninia naʼi dehan ba nia: ‘Ó atan diʼak no laran-metin, ó halo diʼak loos! Ó laran-metin ba buat neʼebé uitoan. Entaun haʼu sei foti ó atu tau matan ba buat barak. Tama bá ó-nia naʼi nia ksolok.’

24 “Ikusliu, atan neʼebé simu talentu ida mai no dehan: ‘Naʼi, haʼu hatene katak Ita mak ema neʼebé makaʼas, Ita koʼa iha toʼos neʼebé Ita la kuda no Ita halibur fini neʼebé Ita la kari. 25 Tan neʼe haʼu sai taʼuk, no haʼu bá subar Ita-nia osan talentu iha rai-kuak. No agora, simu fali bá buat neʼebé Ita-nian.’ 26 Ninia naʼi hatete ba nia: ‘Atan aat no baruk-teen! Se ó hatene katak haʼu koʼa iha toʼos neʼebé haʼu la kuda no haʼu halibur fini neʼebé haʼu la kari, 27 se nuneʼe, ó tenke hatama haʼu-nia osan ba banku no kuandu haʼu fila haʼu bele simu haʼu-nia osan hamutuk ho nia funan.

28 “‘Tan neʼe, foti tiha osan talentu neʼe husi nia no fó ba ida neʼebé iha talentu sanulu. 29 Basá ema neʼebé iha, nia sei simu barak tan, no nia sei iha barak, maibé ba ema neʼebé la iha, buat uitoan neʼebé nia iha sei foti hotu husi nia. 30 Soe tiha atan folin-laek neʼe ba nakukun laran iha liʼur. Iha neʼebá mak nia sei tanis no ruun nehan.’

31 “Kuandu Oan-Mane husi ema mai iha ninia glória no anju sira hamutuk ho nia, nia sei tuur iha ninia kadunan neʼebé nabilan. 32 No nasaun hotu sei halibur iha nia oin, no nia sei haketak ema, hanesan bibi-atan haketak bibi-malae husi bibi-timur. 33 No nia sei tau bibi-malae iha nia liman-loos no bibi-timur iha nia liman-karuk.

34 “Tuirmai, Liurai neʼe sei dehan ba sira neʼebé iha ninia liman-loos: ‘Mai, imi neʼebé haʼu-nia Aman fó bensaun, mai simu Ukun neʼebé prepara ona ba imi husi mundu hahú.* 35 Tanba haʼu hamlaha, imi fó haʼu buat ruma atu han. Haʼu hamrook, imi fó haʼu buat ruma atu hemu. Maski imi la hatene haʼu no haʼu la iha fatin atu hela, maibé imi simu haʼu iha imi-nia uma. 36 Kuandu haʼu isin-tanan, imi fó hatais haʼu. Haʼu sai moras, imi tau matan haʼu. Haʼu iha komarka laran, imi mai haree haʼu.’ 37 Tuirmai, ema laran-loos sei dehan ba nia: ‘Naʼi, horibainhira mak ami haree Ita-Boot hamlaha no fó buat ruma ba Ita atu han, ka Ita hamrook no ami fó buat ruma ba Ita atu hemu? 38 Horibainhira mak ami haree katak Ita la iha fatin atu hela no ami simu Ita iha ami-nia uma, ka Ita isin-tanan no ami fó hatais ba Ita? 39 Horibainhira mak ami haree Ita moras ka iha komarka laran no ami bá haree Ita?’ 40 No Liurai neʼe sei hatán: ‘Haʼu hatete loloos ba imi: Tanba imi halo ida-neʼe ba haʼu-nia alin kiʼik sira-neʼe ida, imi halo neʼe mai haʼu.’

41 “Tuirmai, nia sei dehan ba sira neʼebé iha nia liman-karuk: ‘Sai tiha husi haʼu-nia oin, imi neʼebé hetan malisan. Bá no tama iha ahi neʼebé nunka mate neʼebé prepara ona ba Diabu no ninia anju sira. 42 Tanba haʼu hamlaha, imi la fó haʼu buat ruma atu han. Haʼu hamrook, imi la fó haʼu buat ruma atu hemu. 43 Haʼu la iha fatin atu hela, maibé imi la simu haʼu iha imi-nia uma. Haʼu isin-tanan, maibé imi la fó hatais ba haʼu. Haʼu moras no iha komarka laran, maibé imi la tau matan ba haʼu.’ 44 Tuirmai, sira mós sei hatán: ‘Naʼi, horibainhira mak ami haree Ita-Boot hamlaha ka hamrook, ka la iha fatin atu hela ka isin-tanan ka moras ka iha komarka laran no ami la ajuda Ita?’ 45 Nia sei hatán ba sira: ‘Haʼu hatete loloos ba imi: Tanba imi la halo ida-neʼe ba haʼu-nia alin kiʼik sira-neʼe ida, imi la halo neʼe mai haʼu.’ 46 No ema sira-neʼe sei lakon ba nafatin, maibé ema laran-loos sira sei hetan moris ba nafatin.”

26 Kuandu Jesus koʼalia tiha liafuan sira-neʼe, nia hatete ba ninia dixípulu sira: 2 “Imi hatene katak loron rua tan sei iha Festa Salvasaun nian,* no sira sei fó Oan-Mane husi ema ba inimigu sira-nia liman atu hedi.”

3 Tuirmai, ulun-naʼin amlulik sira no katuas sira povu nian halibur hamutuk iha amlulik boot Caifás nia uma. 4 No sira koʼalia hamutuk hodi buka dalan atu kaer Jesus* no oho nia. 5 Maibé sira kontinua dehan: “Ita keta halo ida-neʼe iha loron festa nian, atu nuneʼe povu la sai hirus.”

6 Kuandu Jesus iha Betánia, iha Simão, ema moras-lepra ida nia uma, 7 feto ida hakbesik Jesus no nia lori mina-morin neʼebé karun iha botir ida.* No feto neʼe hahú fui ba Jesus nia ulun nuʼudar nia tuur hela iha meza. 8 Haree tiha neʼe, ninia dixípulu sira sai hirus no dehan: “Tansá estraga deʼit mina-morin neʼe? 9 Tanba mina-morin neʼe bele faʼan no hetan osan barak hodi fó ba ema kiak sira.” 10 Hatene kona-ba neʼe, Jesus dehan ba sira: “Tansá mak imi halo susar ba feto neʼe? Nia halo buat diʼak ba haʼu. 11 Basá ema kiak sira nafatin hamutuk ho imi, maibé haʼu sei la hamutuk ho imi nafatin. 12 Kuandu feto neʼe tau mina-morin ba haʼu-nia isin, nia halo ida-neʼe atu prepara haʼu-nia isin atu hakoi. 13 Haʼu hatete loloos ba imi katak iha fatin naran deʼit iha mundu tomak neʼebé ema haklaken liafuan diʼak, ema mós sei fó sai buat neʼebé feto neʼe halo hodi hanoin fali nia.”

14 Depois neʼe, sira naʼin sanulu-resin-rua neʼe ida, naran Judas Iscariotes, bá hasoru ulun-naʼin amlulik sira, 15 no nia hatete: “Imi fó saida ba haʼu se haʼu entrega nia ba imi?” Sira promete atu fó ba nia osan-mutin tolunulu. 16 Entaun hahú husi tempu neʼe, nia kontinua buka oportunidade atu fó Jesus ba sira-nia liman.

17 Iha loron primeiru husi Festa Paun Fermentu-Laek nian, dixípulu sira hakbesik Jesus no dehan: “Ita hakarak ami prepara hahán ba Festa Salvasaun nian iha neʼebé?” 18 Nia hatete: “Bá hodi tama ba sidade no imi sei hasoru mane ida, no dehan ba nia: ‘Mestre hatete: “Haʼu-nia tempu besik ona. Haʼu sei selebra Festa Salvasaun nian hamutuk ho haʼu-nia dixípulu sira iha Ita-nia uma.”’” 19 No dixípulu sira-neʼe halo tuir buat neʼebé Jesus haruka no prepara buat hotu ba Festa Salvasaun nian.

20 Kuandu rai sai kalan ona, nia tuur iha meza hamutuk ho ninia dixípulu naʼin sanulu-resin-rua. 21 Kuandu sira sei han hela, nia hatete ba sira: “Haʼu hatete loloos ba imi katak imi ida sei entrega haʼu ba inimigu nia liman.” 22 Sira hotu sai laran-susar tebes, no sira ida-idak hahú husu ba nia: “Naʼi, laʼós haʼu, loos ka lae?” 23 Nia hatán: “Ema neʼebé hatama nia liman iha bikan laran hamutuk ho haʼu, nia mak ida neʼebé sei fó haʼu ba inimigu nia liman. 24 Loos katak Oan-Mane husi ema sei mate, hanesan hakerek nanis ona kona-ba nia, maibé susar ba ema neʼebé fó Oan-Mane neʼe ba inimigu nia liman! Diʼak liu ba ema neʼe se nia la moris mai.” 25 Judas, neʼebé lakleur tan sei entrega Jesus ba inimigu sira, hatán: “Mestre, laʼós haʼu, loos ka lae?” Jesus dehan ba nia: “Ó rasik mak hatete nuneʼe.”

26 Nuʼudar sira han hela, Jesus foti paun ida, no depois husu tiha bensaun, nia silu hodi fó ba ninia dixípulu sira no dehan: “Simu no han bá. Neʼe reprezenta haʼu-nia isin.” 27 No mós, nia foti kopu ida, no depois fó tiha agradese ba Maromak, nia fó ba sira no dehan: “Imi hotu, hemu bá. 28 Tanba ida-neʼe reprezenta haʼu-nia ‘raan aliansa nian’, neʼebé sei fakar atu ema barak hetan perdua husi sala. 29 Maibé haʼu hatete ba imi: Haʼu sei la hemu tan tua-uvas neʼe toʼo loron neʼebé haʼu hemu tua-uvas foun hamutuk ho imi iha haʼu-nia Aman nia Ukun.” 30 Depois kanta tiha hodi hahiʼi Maromak, sira sai hodi bá Foho Oliveira.

31 No Jesus dehan ba sira: “Iha kalan neʼe, imi hotu sei sidi tanba buat neʼebé sei mosu ba haʼu. Basá hakerek nanis ona: ‘Haʼu sei baku bibi-atan, no bibi sira sei halai namkari.’ 32 Maibé kuandu haʼu moris hiʼas fali ona, haʼu sei bá uluk liu imi toʼo Galileia.” 33 Pedro dehan ba nia: “Maski sira seluk hotu sei sidi ho buat neʼebé mosu ba Ita, maibé haʼu sei nunka sidi!” 34 Jesus dehan ba nia: “Haʼu hatete loloos ba ó: Iha kalan neʼe, antes manu kokoreek, ó sei nega haʼu ba dala tolu.” 35 Pedro hatete ba nia: “Maski haʼu tenke mate hamutuk ho Ita, haʼu sei nunka nega Ita.” Dixípulu sira seluk mós dehan buat neʼebé hanesan.

36 Tuirmai Jesus bá hamutuk ho sira toʼo fatin neʼebé bolu Getsémani, no nia hatete ba dixípulu sira: “Tuur lai iha neʼe. Haʼu sei bá neʼebá atu halo orasaun.” 37 No nia lori Pedro no mós Zebedeu nia oan-mane naʼin-rua, no nia hahú sai triste no laran-susar tebes. 38 Tuirmai nia hatete ba sira: “Haʼu* sente triste tebetebes atu mate. Hela iha neʼe no hadeer nafatin bá ho haʼu.” 39 No laʼo uitoan ba oin, nia hakneʼak no hakruʼuk ho oin ba rai, no harohan: “Haʼu-nia Aman, bele karik, hasai tiha kopu neʼe husi haʼu. Maibé, halo tuir Ita-nia hakarak bá, laʼós haʼu-nian.”

40 Fila fali ba nia dixípulu, nia haree sira toba hela, no nia hatete ba Pedro: “Imi la bele hadeer netik ho haʼu ba oras ida deʼit ka? 41 Matan-moris nafatin bá no harohan beibeik, atu imi la monu ba tentasaun. Laran* hakarak, maibé isin fraku.” 42 Dala ida tan, nia laʼo dook uitoan no harohan: “Haʼu-nia Aman, se kopu neʼe labele hasai husi haʼu no haʼu tenke hemu nia, entaun halo tuir Ita-nia hakarak bá.” 43 Dala ida tan, nia fila no haree sira toba hela, tanba sira dukur loos. 44 Nuneʼe nia husik hela sira, nia laʼo dook uitoan no harohan ba dala terseiru hodi temi buat neʼebé hanesan. 45 Tuirmai, nia fila fali ba nia dixípulu no hatete ba sira: “Iha oras hanesan neʼe imi toba no deskansa ka? Haree! Oras toʼo ona atu ema entrega Oan-Mane husi ema ba sala-naʼin sira-nia liman. 46 Hamriik. Mai ita bá. Haree! Ema neʼebé atu entrega haʼu ba inimigu sira-nia liman mai ona.” 47 No kuandu nia koʼalia hela, Judas, ida husi sira naʼin sanulu-resin-rua, mai hamutuk ho ema-lubun neʼebé lori surik no ai-dona. Sira mai tanba ulun-naʼin amlulik sira no katuas povu nian mak haruka sira.

48 No Judas, ida neʼebé atu entrega Jesus ba inimigu, fó tiha sinál ida ba sira hodi dehan: “Ema neʼebé haʼu reʼi, nia mak ema neʼe. Kaer nia bá.” 49 Nia hakbesik kedas Jesus no dehan: “Dame hela ho Ita, Mestre!” no nia reʼi Jesus. 50 Maibé Jesus dehan ba nia: “Maluk, tansá ó mai iha neʼe?” Tuirmai, ema-lubun mai no kaer Jesus. 51 Maibé ema ida husi sira neʼebé hamutuk ho Jesus, kaer no losu ninia surik no ataka amlulik boot nia atan no sabir nia tilun. 52 Tuirmai Jesus hatete ba nia: “Hatama fali ó-nia surik ba nia fatin, tanba ema hotu neʼebé kaer surik sei mate ho surik. 53 Ó hanoin katak haʼu la bele husu ba haʼu-nia Aman atu haruka ba haʼu anju rihun ba rihun* iha tempu neʼe ka? 54 Se nuneʼe karik, oinsá mak Eskritura neʼebé hakerek nanis kona-ba buat sira-neʼe sei sai loos?” 55 Iha oras neʼebá, Jesus dehan ba ema-lubun: “Imi mai ho surik no ai-dona atu kaer haʼu hanesan kaer naʼok-teen ida ka? Loron-loron, haʼu tuur iha templu hodi hanorin, maibé imi la kaer haʼu. 56 Maski nuneʼe, buat hotu neʼe mosu atu kumpre liafuan neʼebé profeta sira hakerek nanis ona.” Tuirmai ninia dixípulu hotu halai no husik hela nia.

57 Ema sira neʼebé kaer Jesus lori nia ba amlulik boot Caifás nia uma, iha neʼebá mak eskriba sira no katuas povu nian halibur hamutuk. 58 Maibé Pedro kontinua laʼo tuir Jesus husi dook toʼo amlulik boot nia uma. No depois tama tiha ba laran, Pedro tuur hamutuk ho atan sira iha neʼebá atu haree buat hotu neʼe sei sai oinsá loos.

59 Iha tempu neʼe, ulun-naʼin amlulik sira no Sinédriu tomak buka sasin falsu hodi kontra Jesus atu bele fó kastigu-mate ba nia. 60 Maibé sira la hetan buat ida, maski iha ema barak neʼebé fó sasin falsu. Ikusliu, sasin naʼin-rua mai 61 no hatete: “Mane neʼe dehan: ‘Haʼu bele sobu tiha Maromak nia templu no harii fali iha loron tolu.’” 62 Ho ida-neʼe, amlulik boot hamriik no hatete ba nia: “Ó la koʼalia liafuan ida ka? Ó sei hatán saida kona-ba sasin neʼebé sira fó?” 63 Maibé Jesus nonook nafatin. Tan neʼe, amlulik boot hatete ba nia: “Haʼu haruka ó jura hodi Maromak moris nia naran atu ó koʼalia loloos mai ami no fó-hatene ami se ó mak Kristu, Maromak nia Oan.” 64 Jesus dehan ba nia: “Ita rasik mak hatete nuneʼe. Maibé, haʼu hatete ba imi: Hahú agora imi sei haree Oan-Mane husi ema tuur iha kbiit-naʼin nia liman-loos no mai ho kalohan iha lalehan.” 65 Ho ida-neʼe, amlulik boot lees ninia hatais no dehan: “Nia koʼalia hodi kontra Maromak! Ita presiza sasin saida tan? Imi rasik rona nia koʼalia kontra Maromak. 66 Imi hanoin oinsá?” Sira hatán: “Nia merese mate.” 67 Tuirmai, sira tafui kabeen ba nia oin no tuku nia. Ema seluk basa nia oin, 68 no dehan: “Ó Kristu, siʼik toʼok, sé mak baku ó?”

69 Iha tempu neʼe Pedro tuur iha uma liʼur, no atan-feto ida hakbesik nia no dehan: “Ó mós hamutuk ho Jesus, ema Galileia neʼe!” 70 Maibé nia nega iha sira hotu nia oin hodi dehan: “Haʼu la hatene ó koʼalia kona-ba saida!” 71 No nia sai hodi bá besik portaun, no feto ida seluk haree nia no dehan ba ema iha neʼebá: “Mane neʼe uluk hamutuk ho Jesus husi Nazaré.” 72 Dala ida tan nia nega hodi jura dehan: “Haʼu la hatene mane neʼe!” 73 Lakleur depois neʼe, ema sira iha neʼebá hakbesik no dehan ba Pedro: “Loloos ó mós husi ema sira-neʼe. Ami hatene nuneʼe husi dalan neʼebé ó koʼalia.” 74 Tuirmai, nia hahú fó-malisan no jura: “Haʼu la hatene mane neʼe!” Iha oras neʼe kedas, manu kokoreek. 75 No Pedro hanoin-hetan fali Jesus nia liafuan neʼebé dehan: “Antes manu kokoreek, ó sei nega haʼu ba dala tolu.” Tuirmai, nia sai ba liʼur hodi tanis tanba triste tebetebes.

27 Kuandu dadeer ona, ulun-naʼin amlulik sira hotu no katuas povu nian halibur hodi koʼalia hamutuk kona-ba oinsá atu fó kastigu-mate ba Jesus. 2 No depois kesi tiha nia liman, sira lori nia hodi entrega ba governadór Pilatos.

3 No Judas, neʼebé entrega Jesus ba inimigu, sente triste kuandu haree katak Jesus hetan kastigu-mate. Entaun nia lori fali osan-mutin tolunulu ba ulun-naʼin amlulik sira no katuas povu nian, 4 no dehan: “Haʼu halo sala hodi fó ema laran-loos nia raan ba imi.” Sira hatán: “Neʼe ó-nia problema, laʼós ami-nian!” 5 Depois neʼe, nia soe osan-mutin sira-neʼe ba templu laran no nia sai hodi bá tara an. 6 Maibé ulun-naʼin amlulik sira foti osan-mutin sira-neʼe no dehan: “Tuir lei, osan sira-neʼe labele tau iha osan-fatin templu nian, tanba neʼe mak folin husi ema nia raan.” 7 Depois koʼalia hamutuk tiha, sira sosa toʼos badain sanan-rai nian ho osan neʼe, hodi uza atu hakoi ema husi rai seluk. 8 Tan neʼe, toʼo agora toʼos neʼe bolu nuʼudar Toʼos Raan nian. 9 Nuneʼe, liafuan sira neʼebé fó sai liuhusi profeta Jeremias sai loos ona, neʼebé dehan: “No sira foti osan-mutin tolunulu neʼe, osan neʼe mak folin neʼebé Izraél nia oan balu deside atu selu hodi sosa nia, 10 no sira fó osan neʼe atu sosa toʼos badain sanan-rai nian, hodi tuir buat neʼebé Jeová haruka haʼu atu halo.”

11 Jesus hamriik iha governadór nia oin no governadór husu ba nia: “Ó mak Liurai judeu sira-nian ka?” Jesus hatán: “Ita rasik mak hatete nuneʼe.” 12 Maibé, kuandu ulun-naʼin amlulik sira no katuas sira duun nia, nia la hatán buat ida. 13 Tuirmai, Pilatos husu ba nia: “Ó la rona liafuan barak neʼebé sira koʼalia hasoru ó?” 14 Maibé, Jesus la hatán liafuan ida ba nia, no neʼe halo governadór hakfodak tebes.

15 Tinan-tinan iha festa neʼe, governadór iha toman atu husik ema dadur ida livre tuir buat neʼebé ema-lubun husu. 16 Iha tempu neʼe, ema aat ida neʼebé ema barak hatene, naran Barrabas, iha dadur laran. 17 Nuneʼe, kuandu sira halibur hamutuk, Pilatos husu ba sira: “Ida-neʼebé mak imi hakarak haʼu husik livre ba imi, Barrabas ka Jesus neʼebé ema bolu nuʼudar Kristu?” 18 Basá Pilatos hatene katak sira fó Jesus ba nia tanba sira laran-moras. 19 Liután neʼe, kuandu nia tuur hela iha kadeira tesi-lia nian, ninia feen haruka lia-menon ba nia, dehan: “Keta halo buat ida ba ema laran-loos neʼe, tanba horikalan haʼu mehi kona-ba nia, no ida-neʼe halo haʼu terus tebes ohin.” 20 Maibé ulun-naʼin amlulik sira no katuas sira fó laran-manas ba ema-lubun hodi husu atu hasai Barrabas no oho Jesus. 21 Nuneʼe, governadór husu ba sira: “Husi ema naʼin-rua neʼe, ida-neʼebé mak imi hakarak haʼu atu husik livre?” Sira hatán: “Barrabas.” 22 Pilatos dehan ba sira: “Entaun, saida mak haʼu sei halo ba Jesus, ida neʼebé ema bolu Kristu?” Sira hotu hatán: “Hedi nia!” 23 Nia hatete: “Tanbasá? Nia halo sala saida?” Maski nuneʼe sira hotu kontinua hakilar makaʼas liután dehan: “Hedi nia!”

24 Kuandu Pilatos haree katak ema-lubun la simu ninia liafuan, maibé halo ema hakilar makaʼas liután ho hirus, entaun nia foti bee no fase nia liman iha ema-lubun nia oin no dehan: “Haʼu la iha sala ida ho ema neʼe nia raan. Imi rasik mak tenke simu neʼe.” 25 Ho ida-neʼe, ema hotu hatán: “Ami no ami-nia oan sira mak sei lori todan kona-ba ninia raan.” 26 Tuirmai, Pilatos husik Barrabas ba sira, maibé nia haruka ema atu baku Jesus ho xikote no lori nia ba hedi.

27 Tuirmai, governadór nia soldadu sira lori Jesus ba governadór nia palásiu no halibur soldadu hotu ba nia. 28 No sira kolu ninia hatais hodi tau fali hena mean ida ba nia. 29 Sira bobar ai-tarak hodi halo koroa ida no sira tau iha nia ulun, no sira mós halo nia kaer ai-tonka ida iha nia liman-loos. Depois neʼe, sira hakneʼak iha nia oin no goza nia dehan: “Dame hela ho Ita-Boot, Liurai judeu sira-nian!” 30 No sira tafui kabeen ba nia no foti fali ai-tonka neʼe hodi baku nia ulun. 31 Ikusmai, kuandu sira goza tiha nia, sira hasai fali hena neʼe hodi tau fali ninia hatais ba nia no lori nia ba hedi.

32 Bainhira sira sai ba liʼur, sira hetan ema Sirene ida naran Simão. Sira obriga mane neʼe atu lori Jesus nia ai-riin terus nian. 33 No kuandu sira toʼo ba fatin ida neʼebé bolu Gólgota, katak Fatin Ulun-Ruin nian, 34 sira fó ba nia tua-uvas neʼebé kahur ho buat moruk ida, maibé koko tiha ida-neʼe, nia lakohi hemu. 35 Kuandu sira hedi tiha nia, sira fahe ninia hatais hodi dada sorte, 36 no sira tuur iha neʼebá hodi hein nia. 37 Sira mós hakerek sinál ida neʼebé duun nia no tau iha nia ulun leten, neʼebé dehan: “Neʼe mak Jesus, Liurai judeu sira-nian.”

38 No sira mós tau naʼok-teen naʼin-rua iha ai-riin, ida iha liman-loos no ida iha liman-karuk. 39 Sira neʼebé laʼo liu fatin neʼe hahú koʼalia aat nia no doko sira-nia ulun 40 hodi dehan: “Ó neʼebé bele sobu templu no harii fali iha loron tolu, salva ó-nia an bá! Se ó Maromak nia oan ida, tun husi ai-riin terus nian neʼe!” 41 Nuneʼe mós ulun-naʼin amlulik sira, eskriba sira no katuas sira hahú goza nia no dehan: 42 “Nia salva ema seluk, maibé nia la bele salva ninia an rasik! Se nia mak Liurai Izraél nian, mai ita haree toʼok se nia bele tun husi ai-riin terus nian neʼe, depois mak ita bele fiar nia. 43 Nia tau fiar ba Maromak, entaun se Maromak simu nia, husik Maromak atu salva nia, tanba nia dehan: ‘Haʼu mak Maromak nia Oan.’” 44 No, ema naʼok-teen sira neʼebé iha ai-riin leten iha Jesus nia sorin mós hahú goza nia.

45 Husi tuku sanulu-resin-rua, rai tomak sai nakukun toʼo tuku tolu lokraik. 46 Iha tuku tolu lokraik Jesus hakilar ho lian makaʼas: “Eli, Eli, lama sabaktani?” katak: “Haʼu-nia Maromak, haʼu-nia Maromak, tansá mak Ita husik haʼu?” 47 Rona tiha neʼe, ema balu neʼebé hamriik iha neʼebá hatete: “Mane neʼe bolu Elias.” 48 Ema sira-neʼe ida bá kedas no foti esponja no habokon ho tua-uvas siin no tau iha ai ida hodi fó-hemu ba nia. 49 Maibé ema sira seluk hatete: “Husik bá! Ita haree toʼok se Elias mai atu salva nia.” [Mane ida seluk foti diman no sona Jesus nia sorin, no raan no bee suli sai.]* 50 Dala ida tan Jesus hakilar ho lian makaʼas, depois neʼe nia iis kotu.

51 No haree! kortina templu nian lees fahe ba rua, husi leten toʼo okos, no rai-nakdoko, no fatuk sira nakfera. 52 No rate sira nakloke, no bele haree mate-isin husi ema santu sira barak neʼebé mate ona,* 53 no ema barak haree ida-neʼe. (No depois Jesus moris hiʼas, ema sira husi rate-fatin neʼe sai hodi tama ba sidade santu.) 54 Maibé, kuandu kapitaun tropa nian no sira seluk neʼebé hein Jesus haree rai-nakdoko no buat sira neʼebé mosu, sira sai taʼuk tebes no hatete: “Loloos, neʼe mak Maromak nia Oan-Mane duni.”

55 No mós, iha feto barak neʼebé laʼo tuir Jesus husi Galileia atu ajuda nia, no sira haree hela husi dook. 56 Feto sira-neʼe balu mak Maria Madalena, no Maria, Tiago no Joses nia inan, no Zebedeu nia oan-mane sira-nia inan.

57 No tanba rai besik kalan ona, mane riku ida naran José, ema Arimateia, neʼebé sai ona Jesus nia dixípulu, toʼo mai. 58 Mane neʼe hakbesik Pilatos no husu Jesus nia mate-isin. No Pilatos haruka atu fó Jesus nia mate-isin ba nia. 59 José foti Jesus nia mate-isin, falun ho hena neʼebé diʼak no moos, 60 no tau iha ninia rate foun neʼebé nia keʼe iha fatuk. No nia duir fatuk boot ida hodi taka rate, depois neʼe nia bá. 61 Maibé Maria Madalena no mós Maria ida seluk kontinua tuur iha rate nia oin.

62 Loron tuirmai, katak liutiha loron Prepara nian, ulun-naʼin amlulik sira no farizeu halibur hamutuk iha Pilatos nia oin 63 no dehan: “Naʼi, ami hanoin-hetan liafuan neʼebé lohidór neʼe hatete kuandu nia sei moris hela. Nia dehan: ‘Liutiha loron tolu haʼu sei moris hiʼas.’ 64 Tan neʼe, haruka ema atu hein rate neʼe toʼo loron tolu, atu nuneʼe ninia dixípulu sira labele mai hodi naʼok nia mate-isin no hatete ba ema: ‘Nia moris hiʼas ona husi mate!’ no lia-bosok neʼe sei sai aat liu fali ida uluk.” 65 Pilatos hatete ba sira: “Imi iha guarda. Bá hodi hein rate neʼe tuir buat neʼebé imi hatene.” 66 Entaun, sira bá no taka metin fatuk iha rate neʼe no tau guarda iha neʼebá.

28 Liutiha loron Sábadu, iha loron primeiru semana nian, kuandu rai komesa sai naroman ona, Maria Madalena no Maria ida seluk bá hodi haree rate.

2 No rai-nakdoko makaʼas ida akontese ona, tanba Jeová nia anju tun husi lalehan no hakbesik rate neʼe no duir tiha fatuk, no nia tuur hela iha fatuk neʼe nia leten. 3 Nia nabilan hanesan rai-lakan, no ninia hatais mutin loos. 4 No guarda sira nakdedar tanba taʼuk no sai hanesan ema mate.

5 Maibé anju hatete ba feto sira-neʼe: “Keta taʼuk! Haʼu hatene katak imi mai atu buka Jesus neʼebé ema hedi. 6 Nia la iha neʼe, tanba nia moris hiʼas ona, hanesan nia hatete nanis. Mai, haree fatin neʼebé uluk ema tau nia, 7 no bá lalais hodi fó-hatene ba ninia dixípulu sira katak nia moris hiʼas ona husi mate, no nia bá uluk liu imi toʼo Galileia, iha neʼebá mak imi sei haree nia. Neʼe mak haʼu-nia lia-menon ba imi.”

8 Entaun, sira sai lalais husi rate neʼe ho taʼuk no haksolok, hodi halai ba fó-hatene dixípulu sira. 9 No haree! Jesus hasoru sira no dehan: “Dame hela ho imi!” Sira hakbesik no kaer nia ain hodi hakruʼuk ba nia. 10 Tuirmai, Jesus dehan: “Keta taʼuk! Bá hodi fó-hatene haʼu-nia belun sira atu sira bá Galileia no iha neʼebá mak sira sei haree haʼu.”

11 Kuandu sira bá daudaun, guarda balu mós bá sidade no fó-hatene ba ulun-naʼin amlulik sira kona-ba buat hotu neʼebé mosu. 12 No kuandu ulun-naʼin amlulik sira halibur hamutuk no koʼalia tiha ho katuas povu nian, sira fó osan-mutin barak ba soldadu sira, 13 no hatete ba sira: “Dehan ba ema katak ninia dixípulu sira mai no naʼok ninia mate-isin kuandu imi toba hela iha kalan. 14 No se governadór rona kona-ba neʼe, imi lalika taʼuk, ami sei koʼalia ho nia.” 15 Entaun, soldadu sira foti osan-mutin sira-neʼe no halo tuir buat neʼebé sira hatete, no istória neʼe sai belar ba ema judeu tomak toʼo ohin.

16 Maibé, dixípulu naʼin sanulu-resin-ida laʼo ba Galileia hodi toʼo ba foho ida neʼebé Jesus fó-hatene ona ba sira. 17 No kuandu sira haree nia, sira monu ain ba nia, maibé sira balu laran-rua hela. 18 Jesus hakbesik no koʼalia ba sira, dehan: “Kbiit tomak iha lalehan no rai fó tiha ona mai haʼu. 19 Neʼe duni, laʼo bá no hanorin ema husi nasaun hotu atu sai haʼu-nia dixípulu, fó batizmu ba sira hodi Aman, Oan no espíritu santu* nia naran. 20 Hanorin sira atu halo tuir buat hotu neʼebé haʼu haruka ba imi. No haree! Haʼu sei hamutuk nafatin ho imi toʼo mundu nia rohan.”

[Nota–rodapé]