Marcos

1 Liafuan diʼak kona-ba Jesus Kristu, hahú nuneʼe: 2 Hanesan profeta Isaías hakerek nanis ona: “(Haree! Haʼu haruka haʼu-nia manu-ain iha ó-nia oin, neʼebé sei prepara dalan ba ó);* 3 Rona bá! Ema ida iha rai-fuik hakilar: ‘Prepara dalan ba Jeová! Halo loos nia dalan sira.’” 4 Nuneʼe, João Batista toʼo iha rai-fuik no nia haklaken ba ema atu hetan batizmu hodi hatudu katak sira hakribi sala no hetan perdua. 5 Tan neʼe, ema husi fatin hotu iha rai-Judeia no ema hotu husi Jeruzalein bá hodi haree nia no nia fó batizmu ba sira iha Mota Jordaun, no sira fó sai sira-nia sala iha ema nia oin. 6 Kona-ba João, ninia hatais halo husi kuda-kamelu fulun no nia tau sintu neʼebé halo husi animál nia kulit. Ninia ai-han mak gafañotu no bani-been. 7 No nia haklaken dehan: “Depois haʼu, ema ida sei mai no nia iha kbiit boot liu haʼu. Haʼu la merese atu hakruʼuk hodi kore ninia sandálias talin. 8 Haʼu fó batizmu ba imi ho bee, maibé nia sei fó batizmu ba imi ho espíritu santu.”*

9 Iha tempu neʼe mak Jesus mai husi Nazaré iha Galileia, no João fó batizmu ba nia iha Mota Jordaun. 10 No iha tempu neʼebé Jesus sai husi bee, nia haree lalehan nakloke, no espíritu santu hanesan manu-pombu ida tun ba nia leten. 11 No lian ida sai husi lalehan dehan: “Ó mak haʼu-nia Oan-Mane neʼebé haʼu hadomi, no neʼebé halo haʼu-nia laran kontente.”

12 Depois neʼe, espíritu santu lori nia hodi bá rai-fuik. 13 No nia kontinua hela iha rai-fuik ba loron haatnulu, no Satanás tenta nia. No nia hela hamutuk animál fuik sira, maibé anju sira serbí nia.

14 No depois ema kaer tiha João, Jesus laʼo ba Galileia no haklaken liafuan diʼak Maromak nian 15 no hatete: “Tempu neʼebé fó-hatene nanis toʼo mai ona, no Maromak nia Ukun besik ona. Imi hakribi sala bá, no tau fiar ba liafuan diʼak.”

16 Kuandu Jesus laʼo daudaun tuir tasi-ibun Galileia nian, nia haree Simão no ninia alin André* soe hela rede ba tasi tanba sira mak ema peskadór. 17 No Jesus hatete ba sira: “Mai tuir haʼu, no haʼu sei halo imi sai peskadór ba ema.” 18 Sira husik kedas sira-nia rede no laʼo tuir nia. 19 Hakat uitoan ba oin, nia haree Zebedeu nia oan-mane Tiago no João. Sira hadiʼa hela sira-nia rede iha ró laran. 20 No nia bolu kedas sira. Entaun sira husik hela sira-nia aman Zebedeu hamutuk ho serbisu-naʼin sira no laʼo tuir nia. 21 No sira laʼo hodi tama ba Kafarnaum.

Kuandu toʼo ona loron Sábadu, nia tama ba sinagoga no hahú hanorin. 22 No sira hakfodak ho nia dalan atu hanorin, tanba buat neʼebé nia hanorin mai husi Maromak,* la hanesan ho ema eskriba sira. 23 Iha tempu neʼebá, iha sinagoga laran iha mane ida neʼebé anju aat domina, no nia hakilar 24 dehan: “Tansá mak Ita mai iha neʼe, Jesus, ema Nazaré? Ita mai atu halakon ami ka? Haʼu hatene ho loloos Ita mak sé. Ita mak Ida neʼebé Santu husi Maromak.” 25 Maibé Jesus siʼak nia hodi dehan: “Nonook, no sai husi mane neʼe!” 26 No anju aat doko makaʼas mane neʼe hodi hakilar ho lian boot tebes, tuirmai nia sai husi mane neʼe. 27 Ema hotu hakfodak tebes, tan neʼe sira hahú koʼalia ba malu dehan: “Saida mak neʼe? Ninia hanorin mak oin-seluk liu! Ho kbiit boot nia haruka anju aat no sira mós halo tuir deʼit buat neʼebé nia hatete.” 28 Entaun lakleur deʼit ema iha área hotu iha Galileia rona kona-ba nia.

29 No sira sai kedas husi sinagoga hodi laʼo ba Simão no André nia uma hamutuk ho Tiago no João. 30 Iha tempu neʼe, Simão nia banin-feto toba hela tanba moras isin-manas, no sira fó-hatene kedas ba Jesus kona-ba feto neʼe nia moras. 31 No nia hakbesik, kaer feto neʼe nia liman no isin-manas lakon kedas, no feto neʼe hahú prepara hahán ba sira.

32 Iha lokraik kuandu loro-matan monu ona, ema hahú lori ba nia ema hotu neʼebé moras no mós sira neʼebé anju aat domina, 33 no ema hotu husi sidade mai hodi halibur iha odamatan oin. 34 Nuneʼe, nia kura ema barak neʼebé iha moras oioin, no nia duni sai anju aat barak, maibé nia la husik anju aat sira koʼalia, tanba sira hatene katak nia mak Kristu.

35 Iha dadeer-saan kuandu sei nakukun hela, nia hadeer no sai ba liʼur no laʼo ba fatin ida hodi mesamesak, no iha neʼebá nia hahú halo orasaun. 36 Maibé Simão no sira neʼebé hamutuk ho nia hakaʼas an atu buka nia, 37 no bainhira hetan tiha nia, sira hatete: “Ema hotu buka Ita.” 38 Maibé nia hatete ba sira: “Mai ita bá fatin seluk, no tama ba sidade sira neʼebé besik, atu nuneʼe haʼu bele haklaken mós iha neʼebá, tanba haʼu mai atu halo nuneʼe.” 39 No nia halo nuneʼe duni, hodi haklaken iha sira-nia sinagoga sira iha Galileia tomak no duni sai anju aat sira.

40 No ema moras-lepra ida mai hodi hakneʼak iha nia oin no husu ho laran dehan: “Haʼu hatene katak se Ita-Boot hakarak, Ita bele halo haʼu sai moos.” 41 Rona tiha neʼe, nia hanoin tebetebes mane neʼe, no nia lolo liman hodi kona mane neʼe no dehan: “Haʼu hakarak. Sai moos bá.” 42 No mane neʼe sai moos kedas husi ninia moras-lepra. 43 Depois neʼe, nia haruka mane neʼe atu bá no nia fó avizu makaʼas 44 hodi dehan: “Keta fó-hatene ema ida, maibé bá hodi hatudu ó-nia an ba amlulik no hasaʼe ba Maromak tuir buat neʼebé Moisés haruka tanba ó sai moos ona, no neʼe sai nuʼudar sasin ba sira.” 45 Maibé depois bá tiha, mane neʼe hahú fó sai no habelar istória neʼe ba fatin barak, tan neʼe susar ba Jesus atu tama iha sidade sira hodi hatudu an. Nia nafatin hela iha sidade liʼur no iha fatin fuik. Maibé, ema husi fatin oioin kontinua bá hasoru nia.

2 Maibé, liutiha loron balu, nia fila fali ba Kafarnaum no ema rona katak nia tama iha uma ida. 2 Tan neʼe, ema barak tebes halibur iha uma neʼe toʼo la iha tan fatin, no odamatan mós nakonu ho ema, no nia hahú fó sai liafuan diʼak ba sira. 3 No mane naʼin-haat lori ema ida neʼebé moras isin-matek ba Jesus no ema seluk mós laʼo tuir sira. 4 Maibé sira la bele lori tama ema moras neʼe ba Jesus tanba ema barak tebes. Tan neʼe sira loke uma-kakuluk iha loos fatin neʼebé Jesus tuur, no liuhusi kuak neʼe, sira hatún ema moras isin-matek neʼe iha ninia toba-fatin. 5 Kuandu Jesus haree sira-nia fiar, nia hatete ba ema moras isin-matek neʼe: “Oan, ó-nia sala perdua tiha ona.” 6 Iha tempu neʼe ema eskriba balu mós iha neʼebá no sira tuur no hanoin iha sira-nia laran: 7 “Tansá mak mane neʼe koʼalia hanesan neʼe? Nia koʼalia kontra Maromak. La iha ema ida neʼebé bele perdua sala só Maromak deʼit.” 8 Maibé Jesus hatene kedas katak sira hanoin nuneʼe no tan neʼe nia dehan ba sira: “Tansá mak imi hanoin buat sira-neʼe iha imi-nia laran? 9 Ida-neʼebé mak fasil liu? Hatete ba ema moras isin-matek neʼe katak ‘Ó-nia sala perdua tiha ona’, ka hatete: ‘Hamriik no foti ó-nia toba-fatin no laʼo bá’? 10 Maibé haʼu sei hatudu ba imi katak Oan-Mane husi ema iha kbiit atu perdua sala iha rai.” Tuirmai nia hatete ba ema moras isin-matek neʼe: 11 “Haʼu hatete ba ó: Hamriik, foti ó-nia toba-fatin, no bá ó-nia uma.” 12 No mane neʼe hamriik, foti kedas ninia toba-fatin no laʼo sai iha sira hotu nia oin. Tan neʼe sira hotu hakfodak, no hahiʼi Maromak dehan: “Ami seidauk haree buat ida hanesan neʼe.”

13 Dala ida tan nia laʼo ba tasi-ibun, no ema barak kontinua bá atu hasoru nia no nia hanorin sira. 14 Maibé nuʼudar nia laʼo daudaun, nia haree Levi, Alfeu nia oan, tuur hela iha fatin impostu nian, no nia hatete ba Levi: “Mai tuir haʼu.” No Levi hamriik hodi tuir nia. 15 Kuandu Jesus tuur hela iha meza iha Levi nia uma, ema barak husi kobradór impostu no sala-naʼin sira mós tuur hamutuk ho nia no ninia dixípulu, tanba sira barak hahú tuir nia. 16 Maibé kuandu eskriba husi farizeu* sira haree katak nia han hamutuk ho ema sala-naʼin no kobradór impostu, sira dehan ba ninia dixípulu: “Nia han hamutuk ho kobradór impostu nian no sala-naʼin sira ka?” 17 Rona tiha neʼe Jesus hatete ba sira: “Ema sira neʼebé isin-diʼak la presiza doutór, maibé ema moras presiza. Haʼu mai laʼós atu bolu ema loos sira, maibé atu bolu ema sala-naʼin.”

18 João nia dixípulu sira no ema farizeu sira iha toman atu halo jejún. Tan neʼe sira mai no hatete ba nia: “Tansá mak João nia dixípulu no farizeu sira-nia dixípulu halo jejún, maibé ó-nia dixípulu la halo jejún?” 19 Jesus hatete ba sira: “Noivu nia belun sira la jejún kuandu nia sei hamutuk ho sira, loos ka lae? Nuʼudar noivu sei hela ho sira, sira la jejún. 20 Maibé loron sei toʼo mai kuandu noivu la iha tan iha sira-nia leet, no iha loron neʼe mak sira sei jejún. 21 La iha ema ida taka roupa tuan nia kuak ho hena foun. Basá se nia halo nuneʼe, hena foun neʼe forte liu no sei dada hena tuan no halo kuak sai boot liután. 22 No mós, la iha ema ida neʼebé tau tua foun iha tua-fatin* neʼebé tuan. Basá se nia halo nuneʼe, tua neʼe sei halo nakfera tua-fatin, no tua sei fakar sai no tua-fatin sei sai aat. Maibé ema tau tua foun iha tua-fatin neʼebé foun.”

23 No kuandu sira laʼo liu toʼos trigu nian iha loron Sábadu, ninia dixípulu sira hahú kuʼu trigu-musan. 24 Tan neʼe, ema farizeu sira dehan ba nia: “Haree bá! Tansá mak sira halo buat neʼebé bandu iha loron Sábadu?” 25 Maibé nia dehan ba sira: “Imi la lee buat neʼebé David halo, kuandu nia no ema sira neʼebé hamutuk ho nia hamlaha no presiza ai-han? 26 Imi la lee istória kona-ba Abiatar, ulun-naʼin amlulik nian ka? Basá David tama ba Maromak nia uma, no han paun neʼebé santu maski ukun-fuan bandu ema naran deʼit atu han, só amlulik sira deʼit mak bele han, no David mós fó ba ninia ema sira neʼebé hamutuk ho nia.” 27 No nia dehan tan ba sira: “Maromak halo loron Sábadu ba ema, laʼós ema ba loron Sábadu. 28 Tan neʼe, Oan-Mane husi ema mak loron Sábadu nia Naʼi.”

3 Dala ida tan nia tama ba sinagoga ida, no iha neʼebá iha mane ida neʼebé liman-matek. 2 Entaun, sira haree didiʼak se nia atu kura mane neʼe iha loron Sábadu ka lae, tanba sira buka atu duun nia. 3 No nia hatete ba mane liman-matek neʼe: “Hamriik no mai iha klaran.” 4 Tuirmai nia hatete ba sira: “Sala atu halo hahalok diʼak ka aat, atu salva ka oho ema* iha loron Sábadu ka lae?” Maibé sira hotu nonook deʼit. 5 No ho laran-hirus nia haree ba sira neʼebé haleʼu nia, no nia sente triste tebes tanba sira-nia laran neʼebé toos. Tuirmai nia hatete ba mane neʼe: “Lolo ó-nia liman.” No mane neʼe lolo nia liman, no ninia liman sai diʼak. 6 Ho ida-neʼe, ema farizeu sira sai ba liʼur no hahú kedas koʼalia hamutuk ho ema neʼebé apoia Herodes atu bele oho Jesus.

7 Maibé Jesus no ninia dixípulu sira sai hodi laʼo ba tasi, no ema-lubun boot husi Galileia no Judeia laʼo tuir nia. 8 Ema mós mai husi Jeruzalein no Idumeia, no husi Mota Jordaun nia sorin bá, no husi área sira besik Tiro no Sidon. Sira hotu mai nuʼudar ema-lubun boot hodi hasoru nia tanba sira rona kona-ba buat barak neʼebé nia halo. 9 No nia haruka ninia dixípulu sira atu foti ró kiʼik hodi nia bele uza, atu nuneʼe ema-lubun labele sena nia. 10 Basá nia kura ema barak, tan neʼe ema sira neʼebé iha moras boot haleʼu nia hodi bele kona nia. 11 No kuandu anju* aat sira haree nia, sira mós monu ain ba nia no hakilar makaʼas dehan: “Ita mak Maromak nia Oan.” 12 Maibé dala barak Jesus fó avizu makaʼas ba sira atu la fó sai ba ema kona-ba nia.

13 Tuirmai nia saʼe ba foho ida no nia bolu ema sira neʼebé nia hakarak, no sira laʼo tuir nia. 14 No nia hili ema naʼin sanulu-resin-rua no nia bolu sira apóstolu. Sira mak ema neʼebé sei laʼo hamutuk ho nia no neʼebé nia haruka atu haklaken 15 no nia mós fó sira kbiit atu duni sai anju aat sira.

16 No ema naʼin sanulu-resin-rua neʼebé nia hili mak Simão neʼebé nia hanaran Pedro; 17 no Zebedeu nia oan Tiago no ninia alin João* (nia mós hanaran sira Boanerges, katak “rai-tarutu nia oan”); 18 André, no Filipe no Bartolomeu; Mateus no Tomé; Tiago, Alfeu nia oan-mane; Tadeu, no Simão ida neʼebé laran-manas; 19 no Judas Iscariotes, ida neʼebé ikusmai sai traidór.

No depois neʼe Jesus tama ba uma ida. 20 Dala ida tan ema-lubun halibur, toʼo sira la biban atu han. 21 Maibé kuandu ninia família rona kona-ba neʼe, sira bá atu kaer nia, tanba sira hatete: “Nia bulak ona.” 22 No mós, ema eskriba sira neʼebé mai husi Jeruzalein dehan: “Nia iha Belzebu,* no nia duni sai anju aat ho kbiit husi anju aat sira-nia ukun-naʼin.” 23 No bolu tiha sira, nia koʼalia ba sira ho ai-knanoik no dehan: “Oinsá mak Satanás bele duni sai Satanás? 24 Ukun ida sei monu se nia povu funu hasoru malu, 25 no umakain ida sei monu se ema iha umakain kontra malu. 26 Nuneʼe mós, se Satanás kontra ninia an rasik no sira neʼebé tuir nia sai haketak malu, nia la bele hamriik metin, maibé nia sei lakon. 27 Tuir loloos, la iha ema ida neʼebé bele tama ba mane forsa boot ida nia uma hodi naʼok ninia sasán se nia la kesi uluklai mane neʼe. Depois mak nia bele naʼok mane neʼe nia sasán. 28 Haʼu hatete loloos ba imi katak sala hotu no liafuan aat* hotu neʼebé ema koʼalia sei hetan perdua. 29 Maibé, ema naran deʼit neʼebé koʼalia kontra espíritu santu sei nunka hetan perdua tanba sala neʼebé nia halo mak sala neʼebé ba nafatin.” 30 Nia hatete ida-neʼe tanba sira dehan: “Nia iha anju* aat.”

31 Iha tempu neʼe ninia inan no ninia alin sira mai, no tanba sira hamriik iha liʼur, sira haruka ema ida tama atu bolu nia. 32 Ema-lubun neʼebé tuur haleʼu dehan ba nia: “Haree! Ita-nia inan no alin sira iha liʼur, sira buka Ita.” 33 Maibé, nia hatán ba sira: “Sé mak haʼu-nia inan no haʼu-nia alin sira?” 34 Tuirmai, nia hateke ba sira neʼebé tuur haleʼu nia no dehan: “Haree, neʼe mak haʼu-nia inan no alin sira! 35 Ema naran deʼit neʼebé halo Maromak nia hakarak, nia mak haʼu-nia alin, feton, no inan.”

4 No nia hahú hanorin fali iha tasi-ibun. Ema-lubun boot tebes halibur besik nia, tan neʼe nia saʼe ba ró ida neʼebé dook uitoan husi tasi-ibun no nia tuur iha laran, maibé ema-lubun hela iha tasi-ibun. 2 No nia hahú hanorin sira buat barak hodi uza ai-knanoik no dehan: 3 “Rona bá! Toʼos-naʼin ida bá hodi kari fini. 4 No nuʼudar nia kari, fini balu monu iha dalan ninin, no manu sira mai hodi han. 5 No fini seluk monu iha fatuk leten, neʼebé iha rai uitoan deʼit, no fini sira-neʼe moris kedas tanba rai la kleʼan. 6 Maibé kuandu loro-matan saʼe, loron sunu sira, no sira sai namlaek no mate tanba sira-nia abut la naruk. 7 Fini seluk monu iha ai-tarak laran, no ai-tarak sira-neʼe sai boot no hanehan sira, no sira la fó fuan. 8 Maibé fini seluk tan monu iha rai neʼebé diʼak, no sira moris no sai boot, no sira komesa atu fó fuan. Sira balu fó fuan dala tolunulu, balu neenulu, no balu dala atus ida.” 9 Nia dehan tan: “Ema neʼebé iha tilun atu rona, rona bá.”

10 Maibé bainhira nia mesamesak, ema sira neʼebé haleʼu nia no mós sira naʼin sanulu-resin-rua husu nia kona-ba ai-knanoik sira-neʼe. 11 Nia dehan ba sira: “Ba imi, Maromak ajuda imi atu komprende segredu santu kona-ba ninia Ukun, maibé ba sira neʼebé iha liʼur, buat hotu fó sai deʼit liuhusi ai-knanoik, 12 atu nuneʼe, maski sira haree, maibé sira la hatene, no maski sira rona, maibé la komprende, no sira mós sei la fila ba Maromak hodi hetan perdua.” 13 Liután neʼe, nia hatete ba sira: “Se imi la komprende ai-knanoik neʼe, oinsá mak imi bele komprende ai-knanoik sira seluk?

14 “Fini neʼebé ema kari mak Maromak nia liafuan. 15 Entaun, fini sira neʼebé monu iha dalan ninin mak ema sira neʼebé rona liafuan neʼe, maibé kuandu rona tiha ida-neʼe, Satanás mai no foti sai kedas liafuan neʼebé kuda ona iha sira-nia laran. 16 Nuneʼe mós ho sira neʼebé monu iha fatuk leten. Kuandu sira rona tiha liafuan neʼe, sira simu kedas ho laran-haksolok. 17 Maski sira la iha abut, sira kontinua moris ba tempu balu. Maibé, kuandu susar mosu no ema haterus sira tanba liafuan neʼe, sira monu kedas. 18 Iha mós fini seluk neʼebé kari iha ai-tarak laran. Sira mak ema neʼebé rona liafuan neʼe, 19 maibé tanba hanoin resin kona-ba moris iha mundu neʼe, no rikusoin nia lasu, no mós hakarak oioin kona sira-nia laran, buat sira-neʼe hanehan liafuan, no sira la fó fuan. 20 Ikusliu, fini neʼebé monu iha rai neʼebé diʼak mak sira neʼebé rona liafuan no simu ho laran, no sira fó fuan dala tolunulu, neenulu, no mós atus ida.”

21 No nia dehan tan ba sira: “Ema la taka ahi-oan ho raga ka tau iha kama okos, loos ka lae? Loloos, ema sei tau ahi-oan iha fatin neʼebé aas. 22 Nuneʼe, buat hotu neʼebé subar hela ema sei hatene. No buat hotu neʼebé taka hela sei nakloke. 23 Ema neʼebé iha tilun atu rona, rona bá.”

24 Nia dehan tan ba sira: “Halo tuir didiʼak buat neʼebé imi foin rona. Tanba buat neʼebé imi sukat, nuneʼe mós sei sukat ba imi. Sin, neʼe sei aumenta liután ba imi. 25 Basá ema neʼebé iha ona sei simu barak tan, maibé ema neʼebé la iha, buat neʼebé nia iha mós sei foti tiha husi nia.”

26 No nia dehan: “Maromak nia Ukun hanesan mane ida neʼebé kari fini ba rai, 27 no nia toba iha kalan no hadeer fali iha loron. No nuʼudar loron liu daudaun fini sira-neʼe moris no sai boot, maibé nia la hatene oinsá. 28 Neineik-neineik rai neʼe halo fini moris; ulukliu mosu tahan, tuirmai kain, no ikusliu fulin. 29 Maibé kuandu fini tasak ona, nia lolo ninia tudik tanba tempu koʼa nian mai ona.”

30 No nia hatete ba sira: “Ita sei kompara Maromak nia Ukun ho saida? Ka, ita sei uza ai-knanoik saida atu esplika kona-ba neʼe? 31 Ida-neʼe hanesan mostarda-musan ida kuandu kuda iha rai. Fini neʼe kiʼik liu fini seluk hotu iha mundu. 32 Maibé kuandu kuda tiha, fini neʼe moris no sai boot liu modo sira seluk no nia hamosu sanak sira neʼebé boot, atu nuneʼe manu sira iha lalehan bele hetan fatin atu hela iha ninia mahon.”

33 Entaun ho ai-knanoik barak hanesan neʼe mak nia koʼalia Maromak nia liafuan ba sira, hodi tuir buat neʼebé sira bele komprende. 34 Tuir loloos, la ho ai-knanoik, nia sei la koʼalia ba sira, maibé nia esplika buat hotu ba ninia dixípulu sira kuandu mesamesak.

35 No iha loron neʼe, kuandu rai besik kalan ona, nia hatete ba sira: “Mai ita hakur ba tasi sorin.” 36 Entaun, depois sira haruka tiha ema-lubun fila, sira lori nia iha ró laran, no mós ró seluk bá hamutuk ho nia. 37 Tuirmai anin komesa huu makaʼas tebes no laloran boot kontinua baku ró neʼe, tan neʼe ró besik atu nakonu ho bee. 38 Maibé nia toba hela iha ró nia kotuk ho ulun iha xumasu leten. Entaun sira fanu nia no dehan: “Mestre, Ita la haree katak ita besik ona atu mate?” 39 Ho ida-neʼe, nia hadeer no siʼak anin no hatete ba tasi: “Hakmatek bá!” No anin para, no buat hotu sai hakmatek. 40 No nia hatete ba sira: “Tansá imi sai taʼuk? Imi seidauk iha fiar ka?” 41 Maibé sira sente taʼuk loos ba nia no sira hatete ba malu: “Sé mak ema neʼe? Anin no tasi mós halo tuir nia!”

5 Tuirmai, sira toʼo tasi sorin bá no tama ba rai-Gerasa. 2 No kuandu Jesus foin tun husi ró, mane ida neʼebé anju aat domina mai husi rate sira leet hodi hasoru nia. 3 Mane neʼe hela iha rate sira leet, no toʼo tempu neʼe seidauk iha ema ida neʼebé bele kesi metin nia maski uza korrente. 4 Dala barak ona ema kesi nia liman no ain ho korrente, maibé nia hakotu korrente neʼebé kesi ninia liman no ain, no la iha ema ida neʼebé iha kbiit atu tahan nia. 5 No loron-kalan, nia kontinua hakilar iha rate sira leet no iha foho, no nia mós hakanek nia an ho fatuk sira. 6 Maibé, kuandu nia haree Jesus husi dook, nia halai hasoru Jesus no monu ain ba nia, 7 no nia hakilar ho lian makaʼas: “Saida mak ó hakarak husi haʼu, Jesus, Maromak Aas Liu Hotu nia Oan? Haʼu husu ó jura hodi Maromak nia naran katak ó sei la fó kastigu ba haʼu.” 8 Nia hakilar nuneʼe tanba Jesus hatete ona ba nia: “Ó anju aat, sai husi mane neʼe.” 9 Maibé Jesus husu ba nia: “Ó naran sá?” No nia hatán ba Jesus: “Haʼu-nia naran Lubun Boot,* tanba ami barak.” 10 No nia husu Jesus dala barak atu la haruka anju aat sira sai husi área neʼe.

11 Iha tempu neʼe iha fahi-lubun boot neʼebé han hela iha foho neʼe. 12 No anju aat sira-neʼe husu ba Jesus dehan: “Haruka ami tama ba fahi sira neʼebá.” 13 No Jesus husik sira hodi halo nuneʼe. Ho ida-neʼe, anju aat sira sai no tama ba fahi sira. No fahi sira-neʼe halai lalais hodi haksoit husi rai naruk no tama ba tasi. Fahi sira-neʼe besik 2.000, no sira hotu mout iha tasi laran. 14 Maibé ema sira neʼebé hein fahi, halai no fó-hatene ba ema iha sidade no knua sira. No ema mai atu haree buat neʼebé mosu. 15 Entaun sira mai hasoru Jesus, no sira haree mane neʼebé anju aat lubun boot domina, nia hatais roupa tuur hela ho neon moos ona. No sira sai taʼuk tebes. 16 Sira neʼebé haree buat sira-neʼe, konta fali kona-ba buat neʼebé mosu ba mane neʼebé anju aat domina no mós kona-ba buat neʼebé mosu ba fahi sira. 17 Entaun sira husu Jesus atu husik tiha sira-nia rai.

18 Kuandu Jesus atu saʼe ba ró, mane neʼebé uluk anju aat domina hahú husu atu bele laʼo tuir nia. 19 Maibé nia la simu no nia hatete ba mane neʼe: “Bá ó-nia uma no ó-nia família no konta buat hotu neʼebé Jeová halo ona ba ó no laran-sadiʼa neʼebé nia hatudu ba ó.” 20 Entaun nia bá no hahú fó sai iha rai-Dekápolis* tomak buat hotu neʼebé Jesus halo ba nia, no ema hotu hakfodak.

21 No kuandu Jesus hakur fali ba tasi sorin ho ró, ema-lubun halibur an ba nia nuʼudar nia besik tasi-ibun. 22 No sinagoga nia ulun-naʼin ida naran Jairo toʼo mai no kuandu nia haree Jesus, nia monu ain ba Jesus 23 no husu beibeik dehan: “Haʼu-nia oan-feto moras boot tebes. Favór ida mai hodi tau liman ba nia atu nuneʼe nia bele sai diʼak no la mate.” 24 Ho ida-neʼe, nia laʼo tuir mane neʼe. No ema-lubun mós laʼo tuir no habit nia.

25 Iha neʼebá iha mós feto ida neʼebé hetan terus ba tinan sanulu-resin-rua tanba moras raan fakar, 26 no nia hetan terus barak ona iha doutór sira-nia liman no nia mós gasta ona nia osan hotu, maski nuneʼe nia la sai diʼak, maibé sai aat liután. 27 Kuandu nia rona kona-ba Jesus, nia mai husi kotuk iha ema-lubun sira leet no kona Jesus nia hena, 28 tanba nia hatete beibeik: “Se haʼu kona deʼit karik ninia hena, haʼu sei sai isin-diʼak.” 29 No iha tempu neʼe kedas, ninia raan la suli sai tan. No nia sente katak nia hetan isin-diʼak ona husi ninia moras boot.

30 Jesus hatene kedas katak kbiit ruma sai ona husi nia, tan neʼe nia hateke haleʼu ba ema-lubun no dehan: “Sé mak kona haʼu-nia hena?” 31 Maibé ninia dixípulu sira dehan ba nia: “Ita haree ema-lubun neʼebé sena daudaun Ita no Ita sei husu: ‘Sé mak kona haʼu?’” 32 Maibé, nia hateke haleʼu nafatin atu haree sé mak halo ida-neʼe. 33 No feto neʼe sai taʼuk no nakdedar, tanba hatene buat neʼebé mosu ba nia. Nuneʼe nia mai no monu ain ba Jesus no fó sai lia-loos hotu. 34 Jesus hatete ba nia: “Oan-feto, ó-nia fiar mak halo ó sai diʼak. Laʼo ho dame bá, no sai isin-diʼak bá husi ó-nia moras boot neʼe.”

35 Kuandu Jesus koʼalia hela, ema balu husi Jairo nia uma mai no dehan: “Ita-nia oan-feto mate ona! Keta hakole tan Mestre.” 36 Maibé Jesus rona buat neʼebé sira hatete, no nia dehan ba Jairo: “Keta taʼuk, hatudu fiar bá.” 37 No nia la husik ema ida atu tuir nia, só deʼit Pedro, Tiago, no João, Tiago nia alin.*

38 Entaun, sira toʼo iha Jairo nia uma, no Jesus haree ema barullu no tanis hodi hakilar makaʼas. 39 No tama tiha ba uma laran, nia dehan ba sira: “Tansá mak imi tanis no barullu hanesan neʼe? Labarik neʼe la mate, maibé nia toba deʼit.” 40 No sira hahú hamnasa nia. Maibé, Jesus haruka sira atu sai ba liʼur, no nia lori labarik kiʼik neʼe nia inan no aman no mós dixípulu sira neʼebé hamutuk ho nia, no tama ba fatin neʼebé sira hatoba labarik neʼe. 41 Tuirmai nia kaer labarik neʼe nia liman no dehan ba nia: “Talita kumi”, katak: “Noi, haʼu hatete ba ó: ‘Hadeer bá!’” 42 No labarik neʼe, neʼebé tinan sanulu-resin-rua ona, hamriik kedas no hahú laʼo. No iha tempu neʼe ninia inan-aman sente haksolok tebetebes. 43 Maibé nia husu sira beibeik atu la fó-hatene ema ida kona-ba neʼe, no nia haruka sira atu fó-han ba labarik neʼe.

6 No nia sai husi fatin neʼe no laʼo hodi tama ba ninia rai, no ninia dixípulu sira tuir nia. 2 Iha loron Sábadu, nia tama iha sinagoga no hahú hanorin, no ema barak neʼebé rona nia sai hakfodak no dehan: “Mane neʼe aprende buat sira-neʼe husi neʼebé? Oinsá mak nia simu matenek neʼe no simu kbiit atu halo milagre? 3 Laʼós nia mak badain-ai ida? Ninia inan mak Maria, no ninia alin sira mak Tiago, José, Judas, no Simão, loos ka lae? No ninia feton sira hamutuk ho ita, loos ka lae?” Tan neʼe sira lakohi fiar nia. 4 Maibé Jesus dehan ba sira: “Ema hatudu respeitu ba profeta ida iha rai sira seluk, só deʼit iha ninia rai rasik no iha ninia família nia leet no iha ninia uma rasik mak ema la respeitu nia.” 5 Entaun nia la halo milagre barak iha neʼebá, só deʼit tau liman ba ema balu neʼebé moras hodi kura sira. 6 No nia sai hakfodak tan sira la iha fiar. Tuirmai, nia laʼo husi knua ida ba knua seluk iha área neʼe hodi hanorin.

7 Tuirmai nia bolu sira naʼin sanulu-resin-rua no haruka sira rua-rua, no nia fó sira kbiit atu duni sai anju aat sira. 8 Nia mós haruka sira atu la lori buat ida iha dalan, katak la lori paun ka fatin ai-han nian, no mós la lori osan-riti iha osan-fatin, só lori deʼit ai-tonka ida 9 no sira bele uza sandálias, maibé labele uza roupa tahan rua. 10 Liután neʼe, nia hatete ba sira: “Kuandu imi tama iha uma ida, hela iha neʼebá toʼo imi husik fatin neʼe. 11 No iha fatin hotu neʼebé ema la simu imi ka la rona ba imi, kuandu imi sai husi fatin neʼe liki tiha rai-rahun husi imi-nia ain okos hodi sai nuʼudar sasin ba sira.” 12 Tuirmai sira bá no haklaken hodi ema bele hakribi sala. 13 No sira duni sai anju aat barak no kose mina ba ema barak neʼebé moras no kura sira.

14 No Liurai Herodes rona kona-ba neʼe tanba Jesus nia naran sai boot, basá ema dehan: “João Batista moris hiʼas ona husi mate, no tan neʼe mak nia iha kbiit atu halo milagre sira.” 15 Maibé ema seluk dehan: “Nia Elias.” No ema seluk tan dehan: “Nia mak profeta ida hanesan profeta sira husi tempu uluk.” 16 Maibé kuandu Herodes rona, nia hatete: “Neʼe mak João neʼebé haʼu tesi ona nia ulun. Nia moris hiʼas ona husi mate.” 17 Basá uluk Herodes rasik haruka ema atu kaer João no kesi hodi hatama iha komarka laran tanba Herodia, ninia maun Filipe nia feen; basá Herodes kaben ona ho feto neʼe. 18 No uluk João hatete beibeik ba Herodes: “Tuir ukun-fuan Ita-Boot labele kaben ho Ita-nia maun nia feen.” 19 Tan neʼe, Herodia rai odi ba João no hakarak atu oho nia, maibé la bele. 20 Basá Herodes taʼuk João, tanba nia hatene katak João mak ema loos no santu, no nia proteje João. Dala ida-idak neʼebé Herodes rona João koʼalia, nia la hatene atu halo saida ho João, maski nuneʼe nia kontinua atu rona ba João ho laran-kontente.

21 Maibé tempu diʼak ba Herodia atu halaʼo ninia hakarak mosu kuandu Herodes halo tinan. Iha tempu neʼe Herodes halo festa ba ninia ema-boot sira no komandante tropa sira no sira neʼebé naran boot iha Galileia. 22 No Herodia nia oan-feto tama hodi dansa, no ida-neʼe halo kontente Herodes no mós sira hotu neʼebé tuur hamutuk ho nia. Entaun liurai hatete ba feto neʼe: “Husu buat naran deʼit neʼebé ó hakarak, no haʼu sei fó ba ó.” 23 Sin, nia jura ba feto neʼe: “Buat naran deʼit neʼebé ó husu, haʼu sei fó ba ó toʼo haʼu-nia ukun nia sorin balun.” 24 Entaun nia sai hodi husu ba ninia inan: “Saida mak haʼu sei husu?” Ninia inan dehan: “João Batista nia ulun.” 25 Tuirmai, feto neʼe tama lalais hodi hasoru liurai no husu: “Haʼu hakarak Ita atu fó kedas ba haʼu João Batista nia ulun iha bikan ida.” 26 Maski ida-neʼe halo liurai laran-susar, maibé nia simu buat neʼebé feto neʼe husu, tanba nia jura tiha ona iha ninia bainaka sira-nia oin. 27 Tan neʼe liurai haruka kedas soldadu ida bá atu lori João nia ulun mai. Nuneʼe soldadu neʼe bá hodi tesi João nia ulun iha komarka. 28 No nia lori João nia ulun iha bikan ida, no fó ba feto neʼe, no feto neʼe fó ba ninia inan. 29 Kuandu João nia dixípulu sira rona kona-ba neʼe, sira bá hodi foti ninia mate-isin no hakoi iha rate.

30 No apóstolu sira halibur iha Jesus nia oin no konta ba nia buat hotu neʼebé sira halo no hanorin. 31 Nia hatete ba sira: “Mai ita laʼo mesamesak ba fatin fuik ida atu deskansa uitoan.” Basá ema barak mai no bá, no sira la iha tempu atu deskansa no mós atu han. 32 Entaun sira saʼe ró no bá fatin fuik ida hodi mesamesak. 33 Maibé ema haree sira kuandu sira bá, no ema barak mós rona kona-ba neʼe, entaun ema husi sidade hotu halai tuir sira, no ema sira-neʼe toʼo uluk iha fatin neʼebé sira atu bá. 34 Kuandu nia tun husi ró, nia haree ema-lubun boot, no nia hanoin tebetebes ba sira, tanba sira hanesan bibi neʼebé bibi-atan la iha. No nia hahú hanorin sira buat barak.

35 Bainhira rai besik kalan ona, ninia dixípulu sira hakbesik nia no dehan: “Fatin neʼe fuik, no rai kalan ona. 36 Haruka ema sira-neʼe fila hodi sira bele bá knua ka fatin sira neʼebé besik atu bele sosa buat ruma atu han.” 37 Nia hatán ba sira: “Imi mak fó sira buat ruma atu han.” Sira dehan ba nia: “Entaun, ami tenke bá no sosa paun ho osan denáriu* 200 hodi fó ba ema sira-neʼe atu han ka?” 38 Nia hatete ba sira: “Imi iha paun fuan hira? Bá haree toʼok!” Depois haree tiha, sira hatete: “Lima, no mós ikan rua.” 39 Tuirmai nia haruka ema hotu atu fahe ba grupu balu no tuur iha duʼut matak nia leten. 40 Nuneʼe sira tuur tuir grupu, balu atus ida no balu limanulu. 41 Foti tiha paun fuan lima no ikan rua neʼe, nia hateke ba lalehan no halo orasaun. Tuirmai nia silu paun no fó ba nia dixípulu sira atu fahe ba ema, no nia mós fahe ikan hodi fó ba sira hotu. 42 Nuneʼe sira hotu han toʼo bosu. 43 No sira halibur paun resin iha bote sanulu-resin-rua nakonu, no iha mós ikan resin. 44 Sira neʼebé han hamutuk mane naʼin-5.000.

45 Depois neʼe, nia haruka kedas ninia dixípulu sira atu saʼe ró no bá uluk tasi sorin hodi ba Betsaida, maibé nia rasik hela atu haruka ema-lubun fila. 46 No dehan tiha adeus ba sira, nia saʼe ba foho hodi halo orasaun. 47 Kuandu rai kalan ona, ró neʼe toʼo ona tasi klaran, maibé nia mesak deʼit mak iha rai-maran. 48 No besik tuku tolu dadeer nia haree katak susar tebes ba ninia dixípulu sira atu hean ró neʼe tanba anin huu hasoru sira. Entaun nia bá toʼo sira hodi laʼo iha tasi leten, maibé haree hanesan nia atu laʼo liu deʼit. 49 Kuandu haree nia laʼo iha tasi leten sira hakilar makaʼas dehan: “Neʼe mak vizaun ida!” 50 Sira hotu haree nia no sai taʼuk. Maibé nia koʼalia kedas ba sira dehan: “Aten-brani bá! Neʼe mak haʼu. Keta taʼuk.” 51 No nia tama ba ró laran hodi hamutuk ho sira, no anin para. Ho ida-neʼe, sira hakfodak tebes, 52 tanba sira seidauk komprende milagre paun nian katak sá, no sira-nia neon taka hela.

53 No kuandu sira toʼo ona rai-maran sira hatún ankor iha neʼebá, no tuirmai sira tama ba rai-Genesaré. 54 Maibé kuandu sira tun husi ró, ema hatene kedas nia, 55 no sira halai lalais hodi fó-hatene ema hotu neʼebé hela iha área neʼe, no sira hahú lori ba Jesus ema moras sira iha toba-fatin leten. 56 No kuandu nia tama ba sidade ida ka knua ida, sira tau ema moras sira iha merkadu no husu atu kaer deʼit ninia roupa ninin. No sira hotu neʼebé kaer ninia roupa hetan isin-diʼak.

7 Ema farizeu no eskriba balu neʼebé mai husi Jeruzalein halibur an besik nia. 2 No kuandu sira haree Jesus nia dixípulu balu han ho liman foʼer, katak seidauk fase liman, sira hanoin katak dixípulu sira halo sala. 3 Basá ema farizeu sira no ema judeu hotu la han se sira seidauk fase sira-nia liman toʼo liman-sikun, hodi kaer metin ba lisan husi beiʼala sira. 4 No kuandu sira fila husi merkadu, sira la han se sira seidauk hamoos sira-nia an hodi hisik bee, no sira mós kaer metin ba lisan seluk tan neʼebé sira simu, hanesan solur* kopu, buli no sanan riti. 5 Nuneʼe ema farizeu no eskriba sira-neʼe husu nia: “Tansá mak ó-nia dixípulu la halo tuir lisan husi beiʼala sira? Ó-nia dixípulu sira han ho liman neʼebé foʼer.” 6 Nia hatete ba sira: “Isaías fó-hatene nanis ho loloos kona-ba imi ema laran-makerek sira. Nia hakerek: ‘Povu neʼe respeitu haʼu ho ibun-tutun deʼit, maibé sira-nia laran dook husi haʼu. 7 Sira-nia adorasaun ba haʼu saugati deʼit, tanba sira hanorin ema nia ukun-fuan nuʼudar Maromak nian.’ 8 Imi husik Maromak nia mandamentu no kaer metin fali ba ema nia lisan.”

9 Liután neʼe, nia hatete ba sira: “Ho matenek imi buka dalan atu la halo tuir Maromak nia mandamentu hodi bele kaer metin ba imi-nia lisan. 10 Porezemplu, Moisés hatete: ‘Hatudu respeitu ba ó-nia inan no aman’, no: ‘Ema neʼebé koʼalia aat ninia inan ka aman tenke mate.’ 11 Maibé imi hatete: ‘Se ema ida dehan ba ninia inan ka aman: “Buat naran deʼit neʼebé haʼu iha atu bele apoia imi mak korban (neʼe katak prezente neʼebé fó ona ba Maromak).”’ 12 Nuneʼe, imi la husik ona ema neʼe atu halo buat ida ba ninia inan ka aman. 13 Ho ida-neʼe, imi halo ona Maromak nia liafuan la iha folin tan deʼit imi-nia lisan neʼebé imi simu no hatutan fali ba jerasaun seluk. No imi mós halo buat barak tan hanesan neʼe.” 14 Entaun, nia bolu ema-lubun atu hakbesik fali ba nia no nia dehan ba sira: “Imi hotu, rona mai haʼu no komprende bá. 15 La iha buat ida husi liʼur neʼebé tama ba ema hodi bele hafoʼer nia, maibé buat neʼebé sai husi ema mak hafoʼer nia.” 16 ——*

17 Kuandu nia husik tiha ema-lubun no tama ba uma ida, ninia dixípulu sira hahú husu nia kona-ba ai-knanoik neʼe. 18 Entaun nia hatete ba sira: “Imi mós seidauk komprende hanesan sira ka? Imi seidauk hatene katak buat naran deʼit husi liʼur neʼebé tama ba ema la hafoʼer ema? 19 Tanba ida-neʼe la tama ba fuan-laran, maibé tama ba kabun no depois neʼe hasai tiha ba liʼur.” Hodi koʼalia nuneʼe, Jesus dehan katak ai-han hotu moos. 20 Liután neʼe, Jesus dehan: “Buat neʼebé sai husi ema mak hafoʼer nia, 21 tanba husi ema nia fuan-laran mak ema hasai hanoin neʼebé aat, hahalok sala-foʼer,* naʼok, oho, 22 sala-foʼer ho ema nia kaben, kaan-teen, hahalok aat, lohi, hahalok neʼebé la iha moe, laran-moras,* koʼalia aat, foti-an, no ulun-toos. 23 Buat aat sira-neʼe sai husi ema nia laran no neʼe mak hafoʼer ema.”

24 Tuirmai, nia husik hela fatin neʼe hodi bá área Tiro no Sidon. Iha neʼebá nia tama ba uma ida, no nia lakohi atu ema ida hatene katak nia toʼo fatin neʼe, maski nuneʼe ema hatene. 25 Feto ida rona kona-ba Jesus no nia mai kedas hodi hakneʼak iha Jesus nia ain, no feto neʼe iha oan-feto kiʼik neʼebé anju aat domina. 26 Feto neʼe ema gregu, maibé nia sidadaun Fenísia nian iha rai-Síria. Feto neʼe kontinua husu Jesus atu duni sai anju aat husi ninia oan-feto. 27 Maibé Jesus dehan: “Ulukliu, husik oan sira han toʼo bosu lai, tanba la diʼak atu foti oan sira-nia paun no fó ba asu-oan.” 28 Feto neʼe hatán: “Loos Naʼi, maibé asu-oan sira iha meza okos han paun rahun husi labarik kiʼik.” 29 Ho ida-neʼe Jesus hatete ba nia: “Tanba ó dehan ida-neʼe, neʼe duni laʼo bá! Basá anju aat sai ona husi ó-nia oan-feto.” 30 Tuirmai feto neʼe laʼo hodi fila ba nia uma no nia haree ninia oan toba hela iha kama no anju aat sai ona husi labarik neʼe.

31 Kuandu Jesus fila husi área Tiro, nia laʼo liuhusi área Sidon nian no liu área Dekápolis* nian, hodi bá toʼo Tasi Galileia. 32 No ema lori ba Jesus mane ida neʼebé diuk no nanál toos, no sira husu nia atu tau liman ba mane neʼe. 33 No nia lori mane neʼe dook husi ema-lubun hodi mesamesak, no nia hatama nia liman-fuan ba ema neʼe nia tilun, no depois tafui tiha, nia tau liman-fuan ba ema neʼe nia nanál. 34 No nuʼudar nia hateke ba lalehan, nia dada iis no hatete ba mane neʼe: “Efeta”, katak: “Loke bá.” 35 No mane neʼe nia tilun loke, no buat neʼebé halo nia nanál toos lakon ona, no nia hahú koʼalia ho momoos. 36 Ho ida-neʼe Jesus haruka sira atu la fó-hatene ema ida. Maibé nuʼudar nia haruka sira beibeik atu la halo ida-neʼe, sira fó sai liután ba ema barak kona-ba buat neʼebé nia halo. 37 Tuir loloos, sira hakfodak tebetebes no hatete: “Buat hotu neʼebé nia halo diʼak tebes. Nia mós halo ema tilun-diuk rona no ema monok koʼalia.”

8 Iha loron sira-neʼe, dala ida tan ema-lubun boot halibur an no sira la iha buat ida atu han, entaun nia bolu ninia dixípulu sira no dehan ba sira: 2 “Haʼu hanoin tebes ema-lubun neʼe, tanba loron tolu ona sira hamutuk ho haʼu no sira la iha buat ida atu han. 3 Se haʼu haruka sira fila ba uma ho kabun mamuk, sira sei monu iha dalan. Sira balu hela dook tebes.” 4 Maibé ninia dixípulu sira hatán ba nia: “Iha fatin fuik hanesan neʼe, bele hetan paun iha neʼebé atu ema sira-neʼe han?” 5 Maibé nia husu ba sira: “Imi iha paun fuan hira?” Sira hatán: “Hitu.” 6 Entaun nia haruka ema-lubun atu tuur iha rai, no nia foti paun fuan hitu neʼe, no fó tiha agradese, nia silu, no hahú fó ba ninia dixípulu sira atu fahe ba ema-lubun. 7 Sira mós iha ikan kiʼik balu. No depois nia halo tiha orasaun, nia hatete ba sira atu fahe ba ema-lubun. 8 Sira han toʼo bosu, no sira halibur hahán resin ba bote hitu nakonu. 9 Sira hamutuk mane naʼin-4.000. Ikusmai nia haruka sira fila.

10 No nia saʼe kedas ba ró hamutuk ho ninia dixípulu sira no sira laʼo ba área Dalmanuta. 11 Iha fatin neʼe, ema farizeu sira mai no hahú haksesuk ho nia, no husu nia atu hatudu sinál husi lalehan, hodi koko nia. 12 Entaun nia sente laran-susar tebes no dehan ba sira: “Tansá mak jerasaun neʼe buka sinál? Haʼu hatete loloos ba imi: La iha sinál ida sei fó ba jerasaun neʼe.” 13 Ho ida-neʼe, nia husik sira, no saʼe fali ba ró no hakur ba tasi sorin.

14 Maibé, sira haluha atu lori paun balu, no iha deʼit paun fuan ida iha ró laran, la iha buat seluk tan. 15 No nia fó avizu makaʼas ba sira dehan: “Matan-moris bá no kuidadu kona-ba ema farizeu sira-nia fermentu no Herodes nia fermentu.” 16 Entaun, sira komesa diskute malu tanba sira la lori paun. 17 Kuandu haree ida-neʼe, nia dehan ba sira: “Tanbasá mak imi diskute malu kona-ba imi la lori paun? Imi seidauk haree no hatene ka? Imi-nia laran taka hela no la komprende ka? 18 ‘Maski imi iha matan, maibé imi la haree, no maski imi iha tilun, maibé imi la rona.’ No imi haluha ona ka? 19 Iha tempu neʼebé haʼu silu paun fuan lima ba mane naʼin-5.000, imi halibur hahán resin iha bote hira?” No sira hatán ba nia: “Sanulu-resin-rua.” 20 “Kuandu haʼu silu paun fuan hitu ba mane naʼin-4.000, imi halibur hahán resin iha bote boot hira?” No sira hatán ba nia: “Hitu.” 21 Tuirmai nia dehan ba sira: “Imi seidauk komprende ka?”

22 Kuandu sira toʼo Betsaida, ema husi fatin neʼe lori ba Jesus mane matan-delek ida, no sira husu nia atu tau liman ba ema neʼe. 23 No nia kaer ema neʼe nia liman no lori ba knua nia liʼur, no depois tafui tiha ba ema neʼe nia matan, nia tau liman ba ema neʼe no husu: “Ó haree buat ruma ka lae?” 24 No mane neʼe foti nia matan no dehan: “Karik haʼu haree ema, tanba buat neʼebé haʼu haree hanesan ai, maibé sira laʼo bá-mai.” 25 Tuirmai, nia tau liman dala ida tan ba ema neʼe nia matan, no ema neʼe sai diʼak fali, no bele haree buat hotu ho momoos. 26 Entaun, nia haruka ema neʼe fila ba uma, no dehan: “Keta bá fali knua neʼe.”

27 Jesus no ninia dixípulu sira husik fatin neʼe hodi bá Sezareia Filipe, no iha dalan nia husu ninia dixípulu sira: “Ema dehan haʼu neʼe sé?” 28 Sira hatán: “João Batista, balu dehan Elias no balu seluk dehan profeta ida.” 29 No nia husu sira: “Maibé, tuir imi-nia hanoin haʼu neʼe sé?” Pedro hatán ba nia: “Ita mak Kristu.” 30 Ho ida-neʼe, nia bandu sira atu la fó-hatene ema seluk kona-ba nia. 31 No mós nia hanorin sira katak Oan-Mane husi ema tenke hetan terus barak, no katuas sira, ulun-naʼin amlulik sira no eskriba sira sei la simu nia no oho nia, maibé liutiha loron tolu nia sei moris hiʼas fali. 32 Tuir loloos, nia koʼalia la taka kona-ba neʼe, maibé Pedro lori nia ba sorin no hahú siʼak nia. 33 Entaun nia fila hodi hateke ba ninia dixípulu sira no siʼak Pedro, hodi dehan: “Dook tiha husi haʼu,* Satanás, tanba ó-nia hanoin la tuir Maromak nian, maibé tuir ema nian.”

34 Tuirmai nia bolu ema-lubun no mós ninia dixípulu sira hodi hakbesik ba nia no dehan: “Se ema ruma hakarak tuir haʼu, nia tenke nega ninia an rasik no lori ninia ai-riin terus nian no kontinua laʼo tuir haʼu. 35 Tanba ema neʼebé hakarak salva nia moris* sei lakon nia moris, maibé ema neʼebé lakon nia moris tanba haʼu no tanba liafuan diʼak sei salva nia moris. 36 Loloos, buat diʼak saida mak ema ida hetan se nia manán mundu tomak maibé lakon nia moris? 37 No saida loos mak ema ida bele fó hodi troka ninia moris? 38 Basá ema naran deʼit neʼebé moe kona-ba haʼu no kona-ba haʼu-nia liafuan iha jerasaun neʼe neʼebé aat no la laran-metin, Oan-Mane husi ema mós sei moe kona-ba nia bainhira nia mai iha ninia Aman nia glória hamutuk ho anju santu sira.”

9 Liután neʼe, nia dehan ba sira: “Haʼu hatete loloos ba imi: Ema balu neʼebé hamriik iha neʼe sei la mate toʼo sira haree uluk Maromak nia Ukun mai ona ho kbiit.” 2 Liutiha loron neen, Jesus lori Pedro, Tiago, no João ba foho aas ida atu mesamesak. No iha neʼebá nia nakfila an iha sira-nia oin, 3 no ninia hatais sai mutin liu no nabilan tebes, no la iha ema ida iha rai neʼebé bele halo hena mutin hanesan neʼe. 4 No mós, Elias no Moisés mosu, no sira koʼalia daudaun ho Jesus. 5 Tuirmai Pedro hatete ba Jesus: “Mestre,* ami kontente tebes atu mai iha neʼe, entaun husik ami harii tenda tolu, ida ba Ita, ida ba Moisés, no ida ba Elias.” 6 Tuir loloos, Pedro la hatene atu halo saida, basá sira taʼuk loos. 7 Tuirmai kalohan mosu no taka sira, no lian ida sai husi kalohan dehan: “Neʼe mak haʼu-nia Oan-Mane, ida neʼebé haʼu hadomi, rona nia bá.” 8 Maibé derrepente deʼit, kuandu sira hateke haleʼu, sira la haree ema ida, só deʼit Jesus.

9 Nuʼudar sira tun daudaun husi foho, nia bandu sira atu la konta ba ema ida buat neʼebé sira haree, toʼo Oan-Mane husi ema moris hiʼas fali husi mate. 10 Sira rai didiʼak iha sira-nia laran buat neʼebé nia hatete, maibé sira koʼalia ba malu kona-ba ninia moris-hiʼas husi mate katak sá. 11 No sira husu nia dehan: “Tansá mak ema eskriba sira dehan katak Elias tenke mai uluk?” 12 Nia hatete ba sira: “Elias mai uluk duni no hadiʼa fali buat hotu; se nuneʼe, tansá mak Eskritura dehan katak Oan-Mane husi ema tenke hetan terus no ema sei la simu nia? 13 Maibé haʼu hatete ba imi: Elias mai tiha ona, no sira halo aat ba nia tuir deʼit buat neʼebé sira hakarak, hanesan hakerek nanis ona kona-ba nia.”

14 No kuandu sira laʼo besik ba dixípulu sira seluk, sira haree katak ema-lubun haleʼu sira no eskriba haksesuk malu ho dixípulu sira-neʼe. 15 Maibé kuandu ema-lubun haree nia, sira hakfodak tebes no sira halai ba nia no kumprimenta nia. 16 No nia husu ba ema-lubun neʼe: “Imi haksesuk malu ho sira kona-ba saida?” 17 No ema ida husi ema-lubun hatán: “Mestre, haʼu lori haʼu-nia oan-mane ba Ita tanba anju aat ida halo nia monok. 18 No kuandu anju aat neʼe ataka haʼu-nia oan, nia soe haʼu-nia oan ba rai no kabeen nafurin sai no nia ruun nehan no mós lakon nia forsa. Haʼu fó-hatene ona Ita-nia dixípulu sira atu duni sai anju aat neʼe, maibé sira la bele.” 19 Jesus hatán hodi dehan: “Oh jerasaun neʼebé la iha fiar, ba tempu hira tan mak haʼu sei hamutuk ho imi? Tempu hira tan mak haʼu tenke tahan imi? Lori nia mai haʼu.” 20 Entaun sira lori labarik neʼe ba nia. Maibé kuandu haree nia, anju aat neʼe doko makaʼas labarik neʼe, no labarik neʼe monu ba rai, no duir an bá-mai, no nia kabeen nafurin sai husi nia ibun. 21 Tuirmai Jesus husu ba labarik nia aman: “Horibainhira mak ida-neʼe mosu ba nia?” Aman neʼe hatán: “Hahú husi kiʼik kedas, 22 dala barak anju aat neʼe soe haʼu-nia oan ba ahi no ba bee laran atu oho nia. Entaun se Ita bele halo buat ruma, hanoin ami bá no ajuda ami.” 23 Jesus hatete ba nia: “Tansá mak ó dehan: ‘Se Ita bele’? Tuir loloos ba sira neʼebé iha fiar, buat hotu bele deʼit.” 24 Labarik neʼe nia aman fó sai kedas hodi dehan: “Haʼu iha fiar ona! Maibé ajuda haʼu atu iha fiar liután!”

25 Kuandu Jesus haree ema-lubun halai besik ba sira, Jesus siʼak anju aat neʼe, dehan: “Ó anju aat neʼebé halo ema sai monok no diuk, haʼu haruka ó atu sai husi labarik neʼe no labele tama fali ba nia.” 26 No anju aat neʼe hakilar no doko makaʼas labarik neʼe, tuirmai nia sai, no labarik neʼe haree hanesan mate ona, tan neʼe ema barak hatete: “Nia mate ona!” 27 Maibé Jesus kaer labarik neʼe nia liman no halo nia hamriik, no labarik neʼe hamriik. 28 Maibé, kuandu nia tama tiha ba uma ida, ninia dixípulu sira husu nia mesamesak dehan: “Tansá mak ami la bele duni sai anju aat neʼe?” 29 Nia hatán ba sira: “Ho orasaun deʼit mak bele duni sai anju aat hanesan neʼe.”

30 Tuirmai sira sai husi fatin neʼe no laʼo liu área Galileia nian, maibé nia lakohi atu ema ida hatene kona-ba neʼe. 31 Nia hanorin ninia dixípulu sira no dehan: “Ema sei entrega Oan-Mane husi ema ba inimigu nia liman no sira sei oho nia. No maski sira oho nia, maibé liutiha loron tolu nia sei moris hiʼas fali.” 32 No sira la komprende buat neʼebé nia dehan, maibé sira taʼuk atu husu ba nia.

33 No sira toʼo ba Kafarnaum. Kuandu sira tama tiha ba uma ida, nia husu sira: “Imi haksesuk malu kona-ba saida iha dalan?” 34 Sira nonook deʼit, basá iha dalan, sira haksesuk malu kona-ba sé mak boot liu iha sira-nia leet. 35 Entaun nia tuur no bolu sira naʼin sanulu-resin-rua neʼe no dehan ba sira: “Se ema ida hakarak sai uluk, nia tenke sai ikus liu no sai atan ba ema hotu.” 36 No nia bolu labarik kiʼik ida hodi hamriik iha sira-nia klaran no tau liman ba labarik neʼe nia kabaas no nia dehan ba sira: 37 “Ema naran deʼit neʼebé simu labarik ida hanesan neʼe tanba haʼu-nia naran, nia simu mós haʼu. No ema naran deʼit neʼebé simu haʼu, nia laʼós deʼit simu haʼu, maibé simu mós ida neʼebé haruka haʼu mai.”

38 João hatete ba nia: “Mestre, ami haree mane ida duni sai anju aat hodi Ita-nia naran no ami koko atu hapara nia, tanba nia la laʼo hamutuk ho ita.” 39 Maibé Jesus dehan: “Keta koko atu hapara nia, tanba la iha ema ida neʼebé halo milagre hodi haʼu-nia naran, no depois neʼe fila hodi koʼalia aat haʼu. 40 Tanba ema neʼebé la kontra ita, nia apoia ita. 41 Ema naran deʼit neʼebé fó bee kopu ida ba imi atu hemu tanba imi Kristu nian, haʼu hatete loloos ba imi katak ema neʼe sei la lakon ninia kolen. 42 Maibé, haʼu dehan ba imi kona-ba kiʼikoan sira neʼebé tau fiar mai haʼu: Se ema ruma halo sira-neʼe ida sidi, diʼak liu tara fatuk boot* ba ema neʼe nia kakorok no soe nia ba tasi.

43 “Se ó-nia liman halo ó sidi, tesi tiha nia; tanba diʼak liu ba ó atu tama ba moris ho liman sorin deʼit, duké ho liman rua ó tama ba Gehena,* ba ahi neʼebé nunka mate. 44 ——* 45 No se ó-nia ain halo ó sidi, tesi tiha nia. Diʼak liu ba ó atu tama ba moris ho ain sorin, duké soe ó ba Gehena ho ain rua. 46 ——* 47 No sé ó-nia matan halo ó sidi, soe tiha nia; tanba diʼak liu bá ó atu tama ba Maromak nia Ukun ho matan sorin deʼit, duké soe ó ba Gehena ho matan rua. 48 Iha neʼebá ular la mate no ahi mós nunka mate.

49 “Hanesan ema tau masin ba ai-han, Maromak sei fakar ahi ba ema sira-neʼe. 50 Masin mak diʼak. Maibé se masin lakon nia meer, oinsá mak imi halo nia sai meer fali? Imi tenke iha masin iha imi-nia laran, no kontinua iha dame ho ema seluk.”

10 Husi neʼebá nia laʼo hodi toʼo ba fronteira Judeia nian no hakur Mota Jordaun, no dala ida tan ema-lubun mai besik nia, no tuir ninia toman nia hanorin sira. 2 Ema farizeu mós hakbesik nia no hakarak atu koko nia. Nuneʼe sira husu nia se tuir lei mane ida bele soe malu ho nia feen ka lae. 3 Nia dehan ba sira: “Moisés haruka imi atu halo saida?” 4 Sira hatán: “Moisés fó lisensa atu hakerek surat soe-malu nian hodi ema bele soe nia feen.” 5 Maibé Jesus dehan ba sira: “Tan imi-nia laran neʼebé toos mak nia hakerek ukun-fuan neʼe ba imi. 6 Maibé, horiuluk kedas, ‘Maromak kria mane no feto, 7 no tan neʼe mak mane ida sei husik ninia inan no aman, 8 no sira naʼin-rua sei sai isin ida deʼit’, nuneʼe sira laʼós tan naʼin-rua maibé isin ida deʼit. 9 Neʼe duni, buat neʼebé Maromak tau hamutuk, ema keta haketak.” 10 Kuandu sira tama fali ona ba uma, ninia dixípulu sira husu nia kona-ba neʼe. 11 No nia hatete ba sira: “Ema naran deʼit neʼebé soe nia feen no kaben fali ho ema seluk, nia halo sala-foʼer* no la laran-metin ba nia feen, 12 no se feto ida soe malu tiha ho nia laʼen, no kaben fali ho ema seluk, feto neʼe halo sala-foʼer.”*

13 Tuirmai, ema lori labarik kiʼik sira ba nia atu nia tau liman, maibé ninia dixípulu siʼak sira. 14 Kuandu haree ida-neʼe, Jesus sai hirus hodi dehan: “Husik labarik sira-neʼe mai besik haʼu. Keta koko atu hapara sira, tanba ema hanesan labarik sira-neʼe mak sei simu Maromak nia Ukun. 15 Haʼu hatete loloos ba imi: Ema naran deʼit neʼebé la simu Maromak nia Ukun hanesan labarik ida, nia sei la tama duni ba Ukun neʼe.” 16 Tuirmai, nia hakoʼak labarik sira-neʼe no tau liman hodi fó bensaun ba sira.

17 No bainhira nia laʼo daudaun, mane ida halai hakbesik nia no hakneʼak iha nia oin no husu: “Mestre Diʼak, saida mak haʼu tenke halo atu hetan moris rohan-laek?” 18 Jesus hatete ba nia: “Tansá ó bolu haʼu diʼak? La iha ema ida diʼak; Maromak mesak deʼit mak diʼak. 19 Ó hatene mandamentu sira: ‘Keta oho; keta halo sala-foʼer;* keta naʼok; keta fó sasin falsu; keta hadau ema nia sasán hodi bosok; hatudu respeitu ba ó-nia inan no aman.’” 20 Mane neʼe hatete ba nia: “Mestre, haʼu halo tuir buat hotu neʼe husi tempu kiʼik kedas.” 21 Jesus hateke ba nia no sente domin ba nia, no hatete: “Buat ida deʼit mak ó kuran: Bá no faʼan buat neʼebé ó iha no fó ba ema kiak, no ó sei hetan rikusoin iha lalehan, no mai tuir haʼu.” 22 Maibé rona tiha neʼe, mane neʼe sai triste, no nia fila ho laran-susar tanba nia iha rikusoin barak.

23 Depois hateke haleʼu tiha, Jesus hatete ba ninia dixípulu sira: “Susar duni ba ema sira neʼebé iha osan barak atu tama ba Maromak nia Ukun!” 24 Maibé dixípulu sira hakfodak tebes ho ninia liafuan. Tuirmai Jesus dehan tan ba sira: “Haʼu-nia oan sira, susar duni atu tama iha Maromak nia Ukun! 25 Fasil liu ba kuda-kamelu ida atu tama liuhusi daun nia kuak duké ema riku ida tama iha Maromak nia Ukun.” 26 Sira sai hakfodak liután no husu ba nia: “Entaun, sé loos mak bele hetan salvasaun?” 27 Hodi hateke ba sira-nia oin, Jesus dehan: “Ba ema buat neʼe la bele, maibé laʼós hanesan neʼe ho Maromak, basá ba Maromak buat hotu bele deʼit.” 28 Pedro hatete ba nia: “Haree! Ami husik ona buat hotu no laʼo tuir Ita.” 29 Jesus dehan: “Haʼu hatete loloos ba imi: Ema neʼebé husik ona uma, maun-alin ka feton, inan ka aman, oan, no mós toʼos tanba haʼu no tanba liafuan diʼak 30 sei simu iha tempu neʼe, uma, maun-alin, feton, inan, oan no toʼos dala atus ida liu fali uluk nian, hamutuk ho terus oioin, no iha tempu neʼebé atu mai sei simu moris rohan-laek. 31 Maibé, ema barak neʼebé uluk sei sai ikus, no sira neʼebé ikus sei sai uluk.”

32 Kuandu sira laʼo daudaun tuir dalan atu saʼe ba Jeruzalein, Jesus laʼo uluk iha sira-nia oin, no sira hakfodak, maibé ema neʼebé tuir hahú sai taʼuk. Dala ida tan Jesus bolu sira naʼin sanulu-resin-rua mesamesak no fó-hatene sira buat neʼebé hakerek nanis ona atu mosu ba nia: 33 “Agora ita saʼe daudaun ba Jeruzalein, no ema sei fó Oan-Mane husi ema ba ulun-naʼin amlulik sira no eskriba sira. Sira sei tesi lia ba nia atu hetan kastigu-mate no entrega nia ba ema husi nasaun seluk. 34 No ema sira-neʼe sei hamoe nia, tafui kabeen ba nia, baku nia ho xikote no oho nia, maibé liutiha loron tolu nia sei moris fali.”

35 No Zebedeu nia oan-mane naʼin-rua, Tiago no João, hakbesik ba nia no dehan: “Mestre, ami hakarak Ita atu halo buat neʼebé ami husu.” 36 Nia hatete ba sira: “Imi hakarak haʼu atu halo saida?” 37 Sira hatete ba nia: “Kuandu Ita simu ukun, fó fatin mai ami atu tuur, ida iha Ita-nia liman-loos no ida iha Ita-nia liman-karuk.” 38 Maibé Jesus hatete ba sira: “Imi la hatene saida mak imi husu. Imi bele hemu husi kopu neʼebé haʼu sei hemu ka hetan batizmu neʼebé haʼu hetan?” 39 Sira hatán: “Ami bele.” Ho ida-neʼe Jesus hatete ba sira: “Imi sei hemu duni husi kopu neʼebé haʼu hemu, no imi sei hetan batizmu ho batizmu neʼebé haʼu hetan. 40 Maibé, kona-ba tuur iha haʼu-nia liman-loos ka liman-karuk, laʼós haʼu mak fó. Haʼu-nia Aman mak sei deside kona-ba sira neʼebé sei tuur iha fatin sira-neʼe.”

41 Kuandu sira naʼin-sanulu seluk rona kona-ba neʼe, sira sai hirus ba Tiago no João. 42 Maibé Jesus bolu sira hodi hakbesik ba nia, no dehan: “Imi hatene katak sira neʼebé ukun nasaun sira seluk domina sira-nia povu, no sira neʼebé boot uza kbiit atu hanehan povu. 43 Maibé iha imi-nia leet laʼós hanesan neʼe. Ema naran deʼit neʼebé hakarak sai ema-boot iha imi leet tenke serbí imi, 44 no ema naran deʼit neʼebé hakarak atu sai uluk iha imi-nia leet tenke sai atan ba imi hotu. 45 Nuneʼe mós ho Oan-Mane husi ema. Nia mai, laʼós atu ema serbí nia, maibé atu serbí no atu fó nia moris* hodi sosa fali ema barak.”

46 Tuirmai sira tama ba Jerikó. Kuandu nia no ninia dixípulu sira no mós ema-lubun laʼo sai husi Jerikó, Timeo nia oan naran Bartimeu neʼebé matan-delek tuur hela iha dalan ninin hodi husu ezmola. 47 Kuandu nia rona katak Jesus Nazaré laʼo liu fatin neʼe, nia hahú hakilar no dehan: “Jesus, David nia oan, hatudu laran-sadiʼa mai haʼu!” 48 Ho ida-neʼe, ema barak hahú koʼalia makaʼas ba nia atu nonook, maibé nia hakilar makaʼas liután: “David nia oan, hatudu laran-sadiʼa mai haʼu!” 49 Entaun Jesus para no dehan: “Bolu nia mai.” No sira bolu ema matan-delek neʼe, no dehan ba nia: “Haksolok bá no hamriik, nia bolu ó.” 50 Nia soe tiha ninia unuk liʼur, no hamriik kedas hodi laʼo ba Jesus. 51 Tuirmai Jesus dehan ba nia: “Saida mak ó hakarak haʼu halo ba ó?” Mane matan-delek neʼe hatán: “Mestre,* halo haʼu haree fali.” 52 No Jesus hatete ba nia: “Laʼo bá, ó-nia fiar mak halo ó sai diʼak.” No nia bele haree kedas, no hahú laʼo tuir Jesus iha dalan neʼe.

11 Tuirmai, sira toʼo ba Betfage no Betánia iha Foho Oliveira, no fatin neʼe besik Jeruzalein. No nia haruka ninia dixípulu naʼin-rua 2 no dehan ba sira: “Bá hodi tama ba knua neʼebé imi haree daudaun, no kuandu imi tama ba knua neʼe, imi sei hetan kuda-burru oan kesi hela, no ema ida seidauk saʼe kuda-burru neʼe. Imi kore nia no lori mai. 3 No se ema ruma husu imi: ‘Tansá imi halo ida-neʼe?’ Imi dehan ba sira: ‘Naʼi presiza ida-neʼe no nia sei fó fali kedas.’” 4 Entaun sira bá no hetan kuda-burru oan kesi hela iha uma nia odamatan oin besik dalan, no sira kore kuda-burru neʼe. 5 Maibé ema balu neʼebé hamriik besik neʼe hatete: “Tansá imi kore kuda-burru oan neʼe?” 6 Sira dehan ba ema sira-neʼe tuir liafuan neʼebé Jesus hatete, no ema sira-neʼe husik sira bá.

7 Sira lori kuda-burru oan neʼe ba Jesus, no sira tau sira-nia hatais ba leten no Jesus tuur iha kuda-burru nia leten. 8 Ema barak nahe sira-nia hatais iha dalan, maibé ema balu seluk nahe ai-sanak neʼebé sira tesi husi dalan ninin. 9 Ema neʼebé laʼo iha Jesus nia oin no kotuk kontinua hakilar dehan: “Ami harohan, salva* David nia Oan bá! Bensaun ba ida neʼebé mai ho Jeová nia naran! 10 Maromak haraik bensaun ba ami-nia aman David nia ukun neʼebé atu mai! Ami harohan, salva nia bá, Ita-Boot neʼebé iha fatin aas!” 11 Toʼo tiha Jeruzalein nia tama ba templu. Nia haree buat hotu iha neʼebá, maibé tanba rai besik kalan ona, nia sai hodi bá Betánia hamutuk ho sira naʼin sanulu-resin-rua.

12 Loron tuirmai kuandu sira sai husi Betánia, nia sente hamlaha. 13 Husi dook nia haree ai-figeira hun ida neʼebé iha tahan, no nia bá hodi haree se nia bele hetan ai-fuan ruma. Maibé, kuandu nia toʼo tiha, nia la hetan ai-fuan ida, só ai-tahan deʼit, basá seidauk tempu ba ai-figeira atu fó fuan. 14 Entaun nia dehan ba ai-figeira neʼe: “Ema sei la han tan ai-fuan husi ó ba nafatin.” No ninia dixípulu sira rona neʼe.

15 Tuirmai sira toʼo ba Jeruzalein no iha neʼebá nia tama ba templu no hahú duni sai ema sira neʼebé faʼan no sosa iha templu, no nia baku fila meza ema troka osan nian no banku ema faʼan manu-pombu nian. 16 Nia la husik ema ida lori buat ruma liuhusi templu. 17 No nia hanorin hodi dehan: “Imi la hatene buat neʼebé hakerek nanis ona ka? ‘Haʼu-nia uma sei bolu nuʼudar uma orasaun nian ba nasaun hotu’, maibé imi halo ida-neʼe sai ona naʼok-teen sira-nia knuuk.” 18 Ulun-naʼin amlulik sira no eskriba sira rona kona-ba neʼe, no sira hahú buka dalan atu oho nia, basá sira taʼuk nia tanba ema-lubun hakfodak ho ninia hanorin.

19 Kuandu rai besik kalan, sira laʼo sai husi sidade neʼe. 20 Iha dadeer-saan kuandu sira laʼo iha dalan, sira haree ai-figeira sai maran ona husi abut toʼo tutun. 21 No Pedro hanoin-hetan, no dehan ba nia: “Mestre, haree! ai-figeira neʼebé Ita fó-malisan sai maran ona.” 22 No Jesus hatete ba sira: “Tau fiar ba Maromak. 23 Haʼu hatete loloos ba imi katak ema naran deʼit neʼebé hatete ba foho neʼe: ‘Hiʼit ó-nia an no soe ba tasi’, no nia la laran-rua maibé fiar katak buat neʼebé nia dehan sei sai loos, ida-neʼe sei sai loos duni. 24 Tan neʼe mak haʼu hatete ba imi: Buat hotu neʼebé imi husu iha orasaun, fiar bá katak imi simu ona, no imi sei hetan duni. 25 Bainhira imi hamriik atu halo orasaun, fó perdua ba sala hotu neʼebé ema halo ba imi, atu nuneʼe imi-nia Aman iha lalehan mós bele fó perdua ba imi-nia sala sira.” 26 ——*

27 Dala ida tan sira fila fali ba Jeruzalein. No kuandu nia laʼo iha templu laran, ulun-naʼin amlulik sira, eskriba sira no katuas povu nian mai hakbesik nia 28 no hatete: “Ho kbiit saida mak ó halo buat sira-neʼe? No sé mak fó ó kbiit atu halo buat sira-neʼe?” 29 Jesus dehan ba sira: “Haʼu sei husu imi pergunta ida. Se imi fó-hatene haʼu, haʼu mós sei fó-hatene imi ho kbiit saida mak haʼu halo buat sira-neʼe. 30 Fó-hatene haʼu, João nia batizmu mai husi Maromak* ka husi ema?” 31 No sira hahú koʼalia ba malu dehan: “Se ita dehan: ‘Husi Maromak’, nia sei hatán: ‘Entaun, tansá mak imi la fiar nia?’ 32 Maibé ita la brani atu dehan: ‘Husi ema.’” Basá sira taʼuk ema-lubun, tanba ema hotu haree João nuʼudar profeta ida. 33 Ho ida-neʼe sira hatán ba Jesus: “Ami la hatene.” No Jesus dehan ba sira: “Haʼu mós sei la fó-hatene imi ho kbiit saida mak haʼu halo buat sira-neʼe.”

12 No nia hahú koʼalia ba sira ho ai-knanoik, dehan: “Mane ida halo toʼos uvas nian, no nia tau lutu haleʼu, no keʼe fatin sama uvas nian no harii mós uma aas ida,* depois neʼe nia fó-aluga* ba toʼos-atan sira, no laʼo ba rai liʼur. 2 Kuandu tempu koʼa nian toʼo ona, nia haruka ninia ema ida ba toʼos-atan sira, atu nuneʼe nia bele hetan uvas-fuan balu husi toʼos-atan sira. 3 Maibé, sira kaer nia, baku nia, no haruka nia fila ho liman-mamuk. 4 No nia haruka ema seluk tan ba sira, no sira baku ema neʼe nia ulun no hamoe nia. 5 No nia haruka ida seluk tan, no sira oho ema neʼe. No nia haruka ema barak tan, maibé toʼos-atan baku sira balu no oho balu seluk. 6 Nia iha tan ema ida, neʼe mak ninia oan-mane neʼebé nia hadomi. Nia haruka ninia oan neʼe ba sira, hodi hanoin: ‘Sira sei respeitu haʼu-nia oan.’ 7 Maibé toʼos-atan sira koʼalia ba malu dehan: ‘Nia mak ida neʼebé sei simu toʼos neʼe nuʼudar liman-rohan. Mai ita oho tiha nia, no ninia liman-rohan sei sai ita-nian.’ 8 Entaun sira kaer no oho nia, no soe nia ba toʼos nia liʼur. 9 Saida mak toʼos-naʼin sei halo? Nia sei mai no oho toʼos-atan sira, no nia sei fó toʼos uvas nian ba ema seluk. 10 Imi seidauk lee buat neʼebé eskritura dehan ka? Basá eskritura hatete: ‘Fatuk neʼebé badain sira la simu, neʼe sai ona fatuk neʼebé importante liu.* 11 Ida-neʼe mai husi Jeová, no ida-neʼe furak tebes iha ita-nia matan.’”

12 Ho ida-neʼe, sira buka dalan atu kaer nia, basá sira hatene katak nia koʼalia kona-ba sira kuandu nia konta ai-knanoik neʼe. Maibé sira taʼuk ema-lubun, entaun sira sai no husik nia.

13 Tuirmai sira haruka ema farizeu balu no mós ema neʼebé apoia Herodes hodi bá hasoru nia, atu nuneʼe sira bele hetan sala husi ninia liafuan. 14 Kuandu sira toʼo, sira dehan ba nia: “Mestre, ami hatene katak Ita-Boot sempre koʼalia buat loos no Ita la todan ba sorin, tanba Ita la tesi lia tuir deʼit buat neʼebé matan haree, maibé Ita hanorin Maromak nia dalan hodi tuir lia-loos. Entaun, sala ka lae atu selu impostu ba Liurai Roma nian?* 15 Ami tenke selu ka lae?” Tanba hatene sira-nia laran-aat, nia hatete ba sira: “Tansá mak imi koko haʼu? Lori mai haʼu osan denáriu ida atu haʼu haree.” 16 Sira fó ida ba nia. No nia hatete ba sira: “Sé-nia oin no naran mak neʼe?” Sira hatán: “Liurai Roma nian.” 17 Tuirmai Jesus hatete: “Fó ba Liurai Roma buat neʼebé Liurai Roma nian, no ba Maromak buat neʼebé Maromak nian.” Ho ida-neʼe sira hakfodak tebes kona-ba nia.

18 Tuirmai, ema saduseu* sira, neʼebé dehan katak la iha moris-hiʼas, mai no husu nia: 19 “Mestre, Moisés hakerek mai ita katak se ema ida nia maun mate no husik hela nia feen no la iha oan, ninia alin* tenke hola feto neʼe no iha oan ba ninia maun. 20 Iha maun-alin naʼin-hitu, no ida primeiru hola feto, maibé kuandu nia mate nia la iha oan. 21 No ida segundu mós hola feto-faluk neʼe, maibé kuandu nia mate, nia la iha oan. Nuneʼe mós ho ida terseiru. 22 No sira naʼin-hitu hotu la iha oan. Ikusmai feto neʼe mós mate. 23 Entaun, iha tempu moris-hiʼas nian, husi sira naʼin-hitu neʼe, feto neʼe sei sai sé-nia feen loos? Basá sira naʼin-hitu hotu kaben ho nia.” 24 Jesus hatete ba sira: “Imi hanoin sala tanba imi la hatene Eskritura no mós la hatene Maromak nia kbiit. 25 Kuandu sira moris hiʼas husi mate, mane sira sei la kaben no feto sira sei la sai ema nia kaben, maibé sira sei sai hanesan anju sira iha lalehan. 26 Imi seidauk lee istória neʼebé Moisés hakerek kona-ba ai-hun* neʼebé lakan ka? Maromak koʼalia kona-ba mate sira neʼebé sei moris hiʼas kuandu nia dehan ba Moisés: ‘Haʼu mak Abraão nia Maromak no Isaac nia Maromak no Jacob nia Maromak.’ 27 Nia laʼós Maromak ba ema neʼebé mate, maibé Maromak ba ema neʼebé moris. Imi-nia hanoin sala duni.”

28 No eskriba ida iha sira-nia leet rona sira diskute malu, no nia haree katak Jesus hatán ba sira iha dalan neʼebé diʼak, entaun nia husu ba Jesus: “Mandamentu ida-neʼebé mak ulukliu hotu?” 29 Jesus hatán: “Ida ulukliu mak: ‘Rona bá, oh Izraél, Jeová mak ita-nia Maromak, no iha Jeová ida deʼit. 30 No ó tenke hadomi Jeová ó-nia Maromak ho ó-nia laran tomak, ho ó-nia moris* tomak, ho ó-nia neon tomak, no ho ó-nia kbiit tomak.’ 31 Ida tuirmai mak: ‘Ó tenke hadomi ó-nia maluk hanesan ó-nia an rasik.’ La iha mandamentu neʼebé boot liu fali sira-neʼe.” 32 Eskriba neʼe hatete ba nia: “Mestre, buat neʼebé Ita dehan tuir duni lia-loos: ‘Maromak mak Ida deʼit, no la iha ida seluk neʼebé hanesan Nia’, 33 no kona-ba hadomi Maromak ho laran tomak, ho neon tomak,* no ho kbiit tomak, no mós hadomi ita-nia maluk hanesan ita-nia an rasik mak folin-boot liu fali sakrifísiu animál nian no sakrifísiu sunu nian hotu.” 34 Jesus haree katak nia hatán ho matenek, neʼe duni Jesus dehan ba nia: “Ó la dook husi Maromak nia Ukun.” Maibé, ema ida la brani atu husu tan pergunta ba nia.

35 No nuʼudar Jesus kontinua hanorin iha templu, nia dehan: “Tansá mak ema eskriba sira hatete katak Kristu mak David nia oan? 36 Liuhusi espíritu santu David rasik dehan: ‘Jeová hatete ba haʼu-nia Naʼi: “Tuur iha haʼu-nia liman-loos toʼo haʼu tau ó-nia inimigu sira iha ó-nia ain okos.”’ 37 David rasik bolu nia Naʼi, entaun oinsá mak nia David nia oan?”

No ema-lubun neʼe rona ba nia ho kontente. 38 No nuʼudar nia hanorin, nia dehan tan: “Matan-moris bá, tanba eskriba sira laʼo bá-mai ho unuk neʼebé naruk no hakarak ema kumprimenta sira iha merkadu, 39 no iha sinagoga laran, sira gosta atu tuur iha oin. No kuandu sira han iha festa, sira mós hakarak tuur iha fatin neʼebé importante liu. 40 Sira mak hadau feto-faluk sira-nia sasán,* no halo orasaun naruk iha ema nia oin. Sira sei hetan kastigu neʼebé makaʼas liu.”

41 Tuirmai nia tuur, no husi fatin neʼe nia bele haree osan-fatin sira. Nia haree ema barak tau osan ba osan-fatin. No ema riku sira tau osan-besi barak. 42 No feto-faluk kiak ida mai, hodi tau osan kiʼik rua ho folin neʼebé kiʼik tebes. 43 No Jesus bolu ninia dixípulu hodi dehan ba sira: “Haʼu hatete loloos ba imi katak feto-faluk kiak neʼe tau barak liu fali sira seluk neʼebé tau osan ba osan-fatin. 44 Basá sira hotu tau buat neʼebé resin husi sira-nia rikusoin, maibé feto-faluk neʼe, maski nia kiak, nia fó buat hotu neʼebé nia iha.”

13 Kuandu nia laʼo sai daudaun husi templu, ninia dixípulu ida hatete ba nia: “Mestre, haree toʼok ba fatuk no uma sira-neʼe!” 2 Maibé Jesus hatete ba nia: “Ó haree uma boot sira-neʼe ka? La iha fatuk ida sei husik hela iha fatuk seluk nia leten, sira hotu sei naksobu.”

3 Jesus tuur iha Foho Oliveira nian, no iha fatin neʼe bele haree templu. Iha tempu neʼe Pedro, Tiago, João, no André hahú husu nia mesamesak: 4 “Fó-hatene mai ami, bainhira mak buat sira-neʼe sei mosu, no sinál saida mak sei hatudu katak buat hotu neʼe besik ona atu ramata?” 5 Entaun, Jesus hahú koʼalia ba sira: “Kuidadu bá atu ema ida la lohi imi. 6 Ema barak sei mai hodi haʼu-nia naran no dehan: ‘Haʼu mak nia’, no sira sei lohi ema barak. 7 Liután neʼe, kuandu imi rona kona-ba funu iha fatin oioin, keta sai taʼuk, buat sira-neʼe tenke mosu duni, maibé rohan seidauk mai.

8 “Nasaun sei hamriik hasoru nasaun seluk no ukun ida sei hamriik hasoru ukun seluk, rai sei nakdoko iha fatin oioin, no rai sei hamlaha. Buat sira-neʼe hatudu katak terus foin hahú.

9 “No kona-ba imi, kuidadu imi-nia an bá. Ema sei lori imi ba tribunál, no sira sei baku imi iha sinagoga sira no sira sei lori imi hodi hamriik iha governadór no liurai sira-nia oin tanba haʼu, atu fó sasin ba sira. 10 No mós, liafuan diʼak neʼe ema tenke haklaken uluk iha nasaun hotu. 11 Maibé kuandu sira lori imi ba tribunál, keta sai laran-taridu kona-ba saida mak imi sei koʼalia. Koʼalia deʼit buat neʼebé haraik ba imi iha oras neʼebá, tanba laʼós imi rasik mak koʼalia maibé espíritu santu. 12 Liután neʼe, maun-alin sira sei entrega sira-nia maun ka alin ba mate, nuneʼe mós oan ida ho ninia aman. Oan sei hamriik hodi kontra nia inan-aman no entrega sira ba mate. 13 No ema hotu sei odi imi tanba haʼu-nia naran. Maibé ema neʼebé tahan toʼo rohan mak ida neʼebé sei hetan salvasaun.

14 “Maibé, kuandu imi haree buat foʼer neʼebé hamosu susar hamriik iha fatin neʼebé nia labele hamriik (atu komprende ida-neʼe, ema neʼebé lee hanoin didiʼak bá), iha oras neʼe, ema neʼebé iha Judeia presiza halai ba foho. 15 No ema neʼebé iha uma-leten keta tun ka tama ba uma laran atu foti buat ruma. 16 No ema neʼebé iha toʼos keta fila fali hodi foti ninia hatais. 17 Susar ba feto sira neʼebé isin-rua no mós ba sira neʼebé fó-susu ba bebé iha loron sira neʼebá! 18 Kontinua harohan atu ida-neʼe la mosu iha tempu malirin. 19 Tanba loron sira-neʼe mak loron terus nian. Husi tempu neʼebé Maromak kria mundu toʼo tempu neʼe seidauk mosu terus hanesan neʼe, no depois neʼe sei la mosu fali. 20 Tuir loloos, se Jeová la habadak loron sira-neʼe, la iha ema ida neʼebé sei hetan salvasaun. Maibé tanba sira neʼebé nia hili ona, nia sei habadak loron sira-neʼe.

21 “Entaun, se ema ruma dehan ba imi: ‘Haree! Kristu iha neʼe’, ka ‘Haree! Nia iha neʼebá’, keta fiar ida-neʼe. 22 Tanba Kristu falsu no profeta falsu sira sei mosu no sira sei halo sinál oioin no halo milagre sira atubele karik dada mós sira neʼebé Maromak hili ona. 23 Neʼe duni, imi matan-moris bá. Haʼu fó-hatene nanis ona ba imi kona-ba buat hotu neʼe.

24 “Maibé iha loron sira-neʼe, depois susar neʼe, loro-matan sei sai nakukun, no fulan sei la fó tan ninia naroman. 25 Fitun sira sei monu husi lalehan no lalehan nia kbiit sei nakdoko. 26 No tuirmai sira sei haree Oan-Mane husi ema, no nia sei mai iha kalohan ho kbiit boot no ho glória. 27 No nia sei haruka nia anju sira no sei halibur ema neʼebé Maromak hili ona husi mundu nia parte haat,* husi rai no mós husi lalehan.

28 “Aprende husi ai-figeira nuʼudar ai-knanoik ida: Kuandu ai-sanak nurak mosu no hamosu tahan, imi hatene katak tempu bailoro* besik ona. 29 Nuneʼe mós kuandu imi haree buat sira-neʼe mosu, imi hatene bá katak nia besik ona odamatan. 30 Haʼu hatete loloos ba imi katak jerasaun neʼe sei la lakon toʼo buat hotu neʼe mosu. 31 Maski lalehan no rai sei lakon, maibé haʼu-nia liafuan sira sei la lakon.

32 “Kona-ba loron ka oras, ema ida la hatene, anju sira iha lalehan la hatene, Oan-Mane mós la hatene, só deʼit Aman. 33 Kontinua haree bá, no matan-moris nafatin bá, tanba imi la hatene tempu neʼebé Maromak hili tiha ona. 34 Ida-neʼe hanesan mane ida neʼebé laʼo ba rai seluk no husik hela ninia uma ba atan sira atu tau matan no fó sira knaar ida-idak. No nia haruka ema neʼebé hein odamatan atu matan-moris nafatin. 35 Tan neʼe, matan-moris nafatin bá, tanba imi la hatene bainhira mak Uma-Naʼin sei mai, iha kalan, iha kalan fahe-rua, ka kuandu manu kokoreek, ka iha dadeer-saan nakukun, 36 atu nuneʼe kuandu nia mai derrepente deʼit, nia la hetan imi toba hela. 37 Buat neʼebé haʼu hatete ba imi, haʼu hatete mós ba ema hotu: Matan-moris nafatin bá.”

14 Loron rua tan ema sei selebra Festa Salvasaun nian* no mós Festa Paun Fermentu-Laek nian. No ulun-naʼin amlulik sira no eskriba sira buka dalan atu kaer Jesus* no oho nia, 2 basá sira kontinua dehan: “Ita keta halo ida-neʼe iha loron festa nian, tanba karik povu sira sei sai hirus.”

3 No iha Betánia kuandu nia tuur hela iha meza iha Simão ema moras-lepra ida nia uma, feto ida mai no lori mina-morin iha botir ida,* mina-morin nardu* neʼebé karun tebes. Feto neʼe loke botir no hahú fui ba Jesus nia ulun. 4 Ho ida-neʼe, ema balu hatudu sai sira-nia hirus hodi dehan ba malu: “Tansá mak estraga deʼit mina-morin neʼe? 5 Mina-morin neʼe bele faʼan ho folin denáriu* 300 liu no osan neʼe bele fó ba ema kiak!” No sira sente hirus ba feto neʼe. 6 Maibé Jesus hatete: “Husik nia. Tansá mak imi halo susar ba nia? Nia halo buat diʼak ba haʼu. 7 Basá ema kiak sira nafatin hamutuk ho imi, no kuandu imi hakarak imi bele halo buat diʼak ba sira, maibé haʼu la hamutuk ho imi ba nafatin. 8 Nia halo buat neʼebé nia bele. Nia tau nanis mina-morin ba haʼu-nia isin atu prepara hodi hakoi. 9 Haʼu hatete loloos ba imi katak iha fatin naran deʼit iha mundu tomak neʼebé ema haklaken liafuan diʼak, ema mós sei fó sai buat neʼebé feto neʼe halo hodi hanoin fali nia.”

10 No Judas Iscariotes, neʼebé husi sira naʼin sanulu-resin-rua, sai hodi bá hasoru ulun-naʼin amlulik sira atu bele entrega Jesus ba sira. 11 Kuandu sira rona kona-ba neʼe, sira haksolok no promete atu fó osan-mutin ba Judas. Entaun nia hahú buka tempu diʼak atu fó Jesus ba sira.

12 Iha loron primeiru husi Festa Paun Fermentu-Laek nian, iha tempu neʼebé sira toman atu hasaʼe animál Festa Salvasaun nian, ninia dixípulu sira hatete ba nia: “Ita hakarak ami bá no prepara hahán ba Festa Salvasaun nian iha neʼebé?” 13 Ho ida-neʼe, Jesus haruka ninia dixípulu naʼin-rua no dehan ba sira: “Bá hodi tama ba sidade, no mane ida neʼebé lori hela sanan-rai bee nian sei hasoru imi. No imi laʼo tuir nia bá. 14 No iha fatin neʼebé nia tama, imi hatete ba uma-naʼin: ‘Mestre dehan: “Kuartu ida-neʼebé mak haʼu sei uza atu selebra Festa Salvasaun nian hamutuk ho haʼu-nia dixípulu sira?”’ 15 No nia sei hatudu ba imi kuartu boot ida iha andár leten, neʼebé iha ona buat neʼebé ita presiza, no iha neʼebá mak imi prepara hahán ba ita.” 16 Entaun dixípulu sira-neʼe sai, no sira tama ba sidade no hetan buat hotu tuir ninia liafuan ba sira, no sira prepara ba Festa Salvasaun nian.

17 Kuandu rai nakukun ona, nia mai ho sira naʼin sanulu-resin-rua. 18 No nuʼudar sira tuur hela iha meza no han, Jesus dehan: “Haʼu hatete loloos ba imi katak imi ida neʼebé han hamutuk ho haʼu, sei entrega haʼu ba inimigu nia liman.” 19 Sira hahú sai laran-susar no sira ida-idak hatete ba nia: “Laʼós haʼu, loos ka lae?” 20 Nia hatete ba sira: “Imi naʼin sanulu-resin-rua neʼe ida, neʼebé tau liman iha bikan hamutuk ho haʼu mak sei fó haʼu ba inimigu nia liman. 21 Loos katak Oan-Mane husi ema sei mate, hanesan hakerek nanis ona kona-ba nia, maibé susar ba ema neʼebé fó Oan-Mane neʼe ba inimigu sira-nia liman! Diʼak liu ba ema neʼe se nia la moris mai.”

22 No nuʼudar sira kontinua atu han, nia foti paun ida, no depois husu tiha bensaun nia silu hodi fó ba sira no dehan: “Simu ida-neʼe bá. Neʼe reprezenta haʼu-nia isin.” 23 Tuirmai nia foti tua kopu ida, no hatoʼo tiha agradese, nia fó ba sira, no sira hotu hemu husi kopu neʼe. 24 No nia hatete ba sira: “Neʼe reprezenta haʼu-nia ‘raan aliansa nian’, neʼebé sei fakar tanba ema barak. 25 Haʼu hatete loloos ba imi: Haʼu sei la hemu tan tua-uvas neʼe toʼo loron neʼebé haʼu hemu tua-uvas foun iha Maromak nia Ukun.” 26 Depois kanta tiha hodi hahiʼi Maromak, sira sai hodi laʼo ba Foho Oliveira.

27 No Jesus dehan ba sira: “Imi hotu sei sidi, tanba hakerek nanis ona: ‘Haʼu sei baku bibi-atan, no bibi sira sei halai namkari.’ 28 Maibé kuandu haʼu moris hiʼas fali ona, haʼu sei bá uluk liu imi toʼo Galileia.” 29 Ho ida-neʼe Pedro hatete ba nia: “Maski sira seluk hotu sei sidi, maibé haʼu lae.” 30 No Jesus dehan ba nia: “Haʼu hatete loloos ba ó katak, ohin, sin, iha kalan neʼe kedas, antes manu kokoreek ba dala rua ó sei nega haʼu ba dala tolu.” 31 Maibé Pedro koʼalia makaʼas liután: “Maski haʼu tenke mate ho Ita, haʼu sei nunka nega Ita.” No sira seluk mós hahú koʼalia buat neʼebé hanesan.

32 Tuirmai sira toʼo ba fatin ida naran Getsémani, no nia hatete ba ninia dixípulu sira: “Tuur lai iha neʼe no haʼu sei bá atu halo orasaun.” 33 No nia lori Pedro, Tiago, no João hamutuk ho nia, no nia hahú sai laran-taridu no laran-susar tebes. 34 No nia hatete ba sira: “Haʼu* sente triste tebetebes atu mate. Hela iha neʼe no hadeer nafatin bá.” 35 Laʼo uitoan ba oin, nia hakneʼak no hahú harohan atu se bele karik oras neʼe liu tiha husi nia. 36 No nia dehan: “Abba, Aman, buat hotu bele deʼit ba Ita; hasai tiha kopu neʼe husi haʼu. Maski nuneʼe, laʼós tuir haʼu-nia hakarak, maibé tuir Ita-nia hakarak.” 37 Nia fila fali no haree sira toba hela. No nia hatete ba Pedro: “Simão, ó dukur ka? Ó la iha forsa atu hadeer netik ho haʼu ba oras ida deʼit ka? 38 Belun sira, matan-moris nafatin bá hodi harohan atu nuneʼe imi labele monu ba tentasaun. Laran* hakarak, maibé isin fraku.” 39 No nia bá fali atu harohan hodi koʼalia buat neʼebé hanesan. 40 Dala ida tan nia mai fali no haree sira toba hela, tanba sira dukur loos, entaun sira la hatene atu hatán saida ba nia. 41 No nia mai fali ba dala terseiru no hatete ba sira: “Iha oras hanesan neʼe imi toba no deskansa ka? Hadeer bá! Oras toʼo ona atu ema entrega Oan-Mane husi ema ba sala-naʼin sira-nia liman. 42 Hamriik. Mai ita bá! Haree! Ema neʼebé atu entrega haʼu ba inimigu sira-nia liman mai ona.”

43 Iha oras neʼe duni kuandu nia koʼalia hela, Judas, ida husi sira naʼin sanulu-resin-rua, mai hamutuk ho ema-lubun neʼebé lori surik no ai-dona. Sira mai tanba ulun-naʼin amlulik sira no eskriba sira no mós katuas povu nian mak haruka. 44 No, Judas, ida neʼebé atu entrega Jesus ba inimigu, fó tiha ona sinál ida ba sira hodi dehan: “Ema neʼebé haʼu reʼi, nia mak ema neʼe. Kaer nia no haruka soldadu sira lori nia bá.” 45 No Judas hakat kedas hodi hakbesik nia no dehan: “Mestre!” no nia reʼi Jesus. 46 Ho ida-neʼe, sira kaer metin Jesus. 47 Maibé, ema ida neʼebé hamriik besik losu ninia surik no ataka amlulik boot nia atan no sabir tiha nia tilun. 48 Jesus dehan ba sira: “Imi mai ho surik no ai-dona atu kaer haʼu hanesan kaer naʼok-teen ida ka? 49 Loron-loron haʼu hamutuk ho imi iha templu atu hanorin, maibé imi la kaer haʼu. Maski nuneʼe, ida-neʼe mosu atu kumpre Eskritura.”

50 No dixípulu hotu halai hodi husik hela nia. 51 Maibé mane joven ida neʼebé taka nia isin-lolon ho unuk neʼebé diʼak, hahú laʼo tuir nia, no sira koko atu kaer mane joven neʼe. 52 Maibé nia husik hela ninia unuk neʼe no halai ho isin-tanan.

53 No sira lori Jesus ba amlulik boot, no ulun-naʼin amlulik sira no katuas sira no mós eskriba sira halibur hamutuk. 54 Maibé, Pedro laʼo tuir Jesus husi dook. Nia laʼo tuir toʼo amlulik boot nia uma, depois neʼe nia tuur hamutuk ho atan sira hodi haneruk ahi. 55 Iha tempu neʼe, ulun-naʼin amlulik sira no Sinédriu tomak buka sasin hodi kontra Jesus atu bele fó kastigu-mate ba nia, maibé sira la hetan buat ida. 56 Tuir loloos, ema barak fó sasin falsu hasoru Jesus, maibé sira-nia sasin la tuir malu. 57 No iha mós ema balu neʼebé hamriik no fó sasin falsu hasoru nia dehan: 58 “Ami rona nia dehan: ‘Haʼu sei sobu templu neʼe, neʼebé ema halo ho liman, no iha loron tolu deʼit haʼu sei harii fali ida seluk laʼós ho ema nia liman.’” 59 Maibé kona-ba ida-neʼe mós sira-nia sasin la tuir malu.

60 Ikusmai, amlulik boot hamriik iha sira-nia klaran no husu Jesus: “Ó la dehan buat ida ka? Ó sei hatán saida kona-ba sasin neʼebé sira fó?” 61 Maibé nia nafatin nonook no la hatán buat ida. Dala ida tan amlulik boot hahú husu nia no dehan: “Ó mak Kristu, Maromak Santu nia Oan ka?” 62 Tuirmai Jesus dehan: “Sin, haʼu duni. No imi sei haree Oan-Mane husi ema tuur iha kbiit-naʼin nia liman-loos no mai iha kalohan iha lalehan.” 63 Ho ida-neʼe, amlulik boot lees ninia hatais no dehan: “Ita presiza sasin saida tan? 64 Imi rasik rona nia koʼalia hodi kontra Maromak. Imi hanoin oinsá?” Sira hotu tesi lia katak nia merese simu kastigu-mate. 65 No sira balu hahú tafui kabeen ba nia no taka nia oin no tuku nia no hatete: “Siʼik toʼok bá!” No depois basa tiha nia oin, guarda sira lori nia sai.

66 No kuandu Pedro tuur hela iha kraik, amlulik boot nia atan-feto ida mai, 67 no bainhira nia haree Pedro haneruk hela ahi, nia hateke ba Pedro no dehan: “Ó mós hamutuk ho Jesus, ema Nazaré neʼe.” 68 Maibé Pedro nega no dehan: “Haʼu la hatene nia no haʼu la komprende buat neʼebé ó koʼalia”, depois neʼe nia sai ba liʼur besik portaun. 69 Iha neʼebá atan-feto neʼe haree nia, no hahú dehan fali ba ema sira neʼebé hamriik besik: “Nia mós ida husi sira.” 70 Dala ida tan nia nega kona-ba neʼe. No lakleur depois neʼe, ema sira neʼebé hamriik besik hahú dehan ba Pedro: “Loloos ó mós husi ema sira-neʼe, tanba ó ema Galileia.” 71 Maibé nia hahú fó-malisan no jura: “Haʼu la hatene mane neʼebé imi temi daudaun!” 72 Iha oras neʼe kedas manu kokoreek no ida-neʼe mak dala segundu, no Pedro hanoin-hetan fali Jesus nia liafuan ba nia: “Antes manu kokoreek ba dala rua, ó sei nega haʼu ba dala tolu.” No nia sai triste tebes no komesa tanis.

15 No iha dadeer-saan, ulun-naʼin amlulik sira ho katuas povu nian no eskriba sira, tuir loloos Sinédriu tomak, halibur hodi koʼalia hamutuk, no sira kesi Jesus hodi lori nia atu entrega ba Pilatos. 2 Entaun Pilatos husu ba nia: “Ó mak Liurai judeu sira-nian ka?” Jesus hatán: “Ita rasik mak hatete nuneʼe.” 3 Maibé ulun-naʼin amlulik sira duun nia kona-ba buat barak. 4 No Pilatos husu tan ba nia: “Ó la hatán buat ida ka? Haree toʼok lia barak neʼebé sira foti hasoru ó.” 5 Maibé Jesus la koʼalia tan buat ida, no neʼe halo Pilatos hakfodak tebes.

6 Tinan-tinan iha festa neʼe, Pilatos iha toman atu husik ema dadur ida sai livre tuir buat neʼebé povu husu. 7 Iha tempu neʼe mane ida naran Barrabas iha hela komarka laran. Nia no ema seluk tama komarka tanba sira kontra hasoru governu no oho ema. 8 Entaun, ema-lubun mai no hahú husu Pilatos hodi tuir ninia toman. 9 Pilatos hatán ba sira dehan: “Imi hakarak haʼu husik livre Liurai judeu sira-nian ba imi ka?” 10 Basá nia hatene katak ulun-naʼin amlulik sira fó Jesus ba nia tanba sira laran-moras. 11 Maibé ulun-naʼin amlulik sira fó laran-manas ba ema-lubun hodi husu atu hasai Barrabas duké Jesus. 12 Dala ida tan Pilatos dehan ba sira: “Entaun, saida mak haʼu sei halo ba ida neʼebé imi bolu nuʼudar Liurai judeu sira-nian?” 13 Dala ida tan sira hakilar: “Hedi nia!” 14 Maibé Pilatos dehan fali ba sira: “Tanbasá? Nia halo sala saida?” Maski nuneʼe sira hakilar makaʼas liután: “Hedi nia!” 15 Ho ida-neʼe, tanba Pilatos hakarak halo ema-lubun kontente, nia husik Barrabas ba sira, no nia haruka ema baku Jesus ho xikote no depois neʼe lori ba hedi.

16 No soldadu sira lori nia ba fatin iha liʼur iha governadór nia palásiu, no sira bolu soldadu hotu atu halibur hamutuk, 17 no sira tau ba nia hena kór-uvas, no sira mós bobar ai-tarak hodi halo koroa ida no tau iha nia ulun. 18 No sira hahú kumprimenta nia dehan: “Dame hela ho Ita-Boot, Liurai judeu sira-nian!” 19 No sira baku nia ulun ho ai-tonka ida no tafui kabeen ba nia, no hakneʼak iha nia oin hodi hakruʼuk ba nia. 20 Ikusmai, kuandu sira goza tiha nia, sira kolu hena kór-uvas neʼe no tau fali ninia hatais ba nia. No sira lori nia bá atu hedi. 21 No mós sira obriga Simão husi Sirene, neʼebé fila daudaun husi toʼos, atu lori Jesus nia ai-riin terus nian. Simão mak Alexandre no Rufo nia aman.

22 Entaun sira lori nia ba fatin ida naran Gólgota, katak “Fatin Ulun-Ruin nian”. 23 Iha neʼebá sira koko atu fó ba nia tua-uvas neʼebé kahur ho mirra, maibé nia lakohi hemu. 24 No sira hedi nia no fahe ninia hatais hodi dada sorte atu hatene sé mak sei hetan parte ida-neʼebé. 25 Sira hedi nia iha tuku sia dadeer. 26 No iha ninia ulun leten sira hakerek liafuan neʼebé duun nia dehan: “Liurai judeu sira-nian.” 27 Liután neʼe, sira mós tau naʼok-teen naʼin-rua hamutuk nia, ida iha liman-loos no ida iha liman-karuk. 28 ——* 29 No sira neʼebé laʼo liu fatin neʼe koʼalia aat kona-ba nia no doko sira-nia ulun dehan: “Huh! Ó neʼebé bele sobu templu no harii fali iha loron tolu, 30 salva ó-nia an no tun husi ai-riin terus nian neʼe.” 31 Nuneʼe mós ulun-naʼin amlulik no eskriba sira goza nia hodi koʼalia ba malu dehan: “Nia salva ema seluk, maibé nia la bele salva ninia an rasik! 32 Entaun husik toʼok Kristu, Liurai Izraél nian, tun husi ai-riin terus nian neʼe, atu nuneʼe ita bele haree no fiar.” No naʼok-teen sira neʼebé iha ai-riin leten iha Jesus nia sorin mós goza nia.

33 Kuandu tuku sanulu-resin-rua ona rai sai nakukun iha rai tomak toʼo tuku tolu lokraik. 34 No iha tuku tolu lokraik Jesus hakilar ho lian makaʼas: “Eli, Eli, lama sabaktani?” katak: “Haʼu-nia Maromak, haʼu-nia Maromak, tansá mak Ita husik haʼu?” 35 Rona tiha neʼe, ema balu neʼebé hamriik besik iha neʼebá hatete: “Haree! Nia bolu Elias.” 36 No ema ida halai hodi foti esponja no habokon ho tua-uvas siin no tau iha ai ida no hahú fó ba nia atu hemu, no dehan: “Husik bá! Ita haree toʼok se Elias mai atu salva nia.” 37 Maibé Jesus hakilar ho lian makaʼas, no depois neʼe nia iis kotu. 38 No kortina templu nian lees fahe ba rua, husi leten toʼo okos. 39 No kapitaun tropa nian neʼebé hamriik besik haree buat neʼebé mosu kuandu Jesus nia iis kotu, no nia dehan: “Loloos, ema neʼe mak Maromak nia Oan-Mane duni.”

40 No iha mós feto barak neʼebé haree husi dook, feto sira-neʼe balu mak Maria Madalena, Salomé, no mós Maria, Tiago* no Joses nia inan. 41 Feto sira-neʼe baibain laʼo tuir nia atu ajuda nia kuandu nia iha Galileia, no iha mós feto barak seluk neʼebé mai hamutuk nia toʼo Jeruzalein.

42 No tanba rai besik kalan ona, no loron neʼe mós loron Prepara nian, katak loron antes loron Sábadu, 43 entaun José Arimateia ho aten-brani bá hasoru Pilatos atu husu Jesus nia mate-isin. Nia mak membru Sinédriu nian ida neʼebé naran-boot, no nia mós hein daudaun ba Maromak nia Ukun. 44 Maibé Pilatos hanoin hela se Jesus mate ona ka lae, entaun nia bolu kapitaun tropa nian no husu nia se Jesus mate ona ka lae. 45 Kuandu nia hatene loloos ona husi kapitaun tropa nian, nia fó lisensa ba José atu foti Jesus nia mate-isin. 46 Tuirmai, José sosa hena diʼak ida no hatún Jesus nia mate-isin, no nia falun ho hena neʼe no tau Jesus nia isin iha rate ida neʼebé keʼe ona iha fatuk-boot, no nia duir fatuk atu taka netik rate neʼe nia odamatan. 47 Maibé Maria Madalena no mós Maria, Joses nia inan, kontinua hateke ba fatin neʼebé tau Jesus nia mate-isin.

16 No kuandu loron Sábadu liu ona, Maria Madalena no Maria Tiago nia inan, no Salomé sosa buat morin oioin atu bá hodi tau ba Jesus nia isin. 2 Iha loron primeiru semana nian, kuandu dadeer-saan hela no loro-matan saʼe ona, sira bá toʼo rate. 3 No sira dehan ba malu: “Sé mak sei duir fatuk iha rate nia odamatan ba ita?” 4 Maibé kuandu sira foti matan, sira haree katak fatuk neʼe duir sai tiha ona, maski ida-neʼe boot tebes. 5 No bainhira sira tama ba rate laran, sira haree mane joven ida tuur hela iha sorin loos no hatais hena mutin, no sira hakfodak tebes. 6 Nia hatete ba sira: “Keta taʼuk. Haʼu hatene katak imi mai atu buka Jesus Nazaré neʼebé ema hedi. Nia moris hiʼas ona, nia la iha neʼe. Haree ba fatin neʼebé ema tau nia. 7 Maibé bá no fó-hatene ba ninia dixípulu sira no Pedro, dehan: ‘Nia bá uluk liu imi toʼo Galileia. Iha neʼebá mak imi sei haree nia, hanesan nia hatete ona ba imi.’” 8 Entaun kuandu sira sai husi rate, sira halai hodi sente taʼuk no hakfodak. No sira la fó-hatene ba ema ida kona-ba buat ruma, tanba sira taʼuk tebes.

―――――

Manuskritu lia-gregu nian neʼebé tuan liu no importante liu ramata ho liafuan sira iha versíkulu 8. Maibé, manuskritu seluk husi livru Marcos neʼebé halo depois tempu neʼe aumenta tan liafuan ikus nian neʼebé naruk, neʼebé hakerek iha kraik. No depois tempu neʼe manuskritu seluk tan aumenta liafuan ikus nian neʼebé badak, no ida-neʼe mós hakerek iha kraik. Liafuan ikus sira-neʼe, maski neʼe mak liafuan badak ka liafuan naruk, maibé liafuan sira-neʼe laʼós parte ba Eskritura neʼebé Maromak leno.

LIAFUAN IKUS NIAN NEʼEBÉ NARUK

9 Nia moris hiʼas iha dadeer-saan, iha loron primeiru semana nian. No depois ninia moris-hiʼas, nia mosu uluk ba Maria Madalena, ida neʼebé uluk nia duni sai anju aat hitu. 10 Feto neʼe bá no fó-hatene ba sira neʼebé uluk hamutuk ho Jesus, tanba sira triste no tanis. 11 Maski sira rona katak nia moris ona no feto neʼe haree nia, maibé sira la fiar. 12 Depois ida-neʼe, nia mosu ho ilas seluk ba sira naʼin-rua neʼebé laʼo dook husi sidade. 13 No sira mai fali hodi fó-hatene ba apóstolu seluk, maibé sira mós la fiar dixípulu naʼin-rua neʼe. 14 Tuirmai nia mosu ba sira naʼin sanulu-resin-ida nuʼudar sira tuur hela iha meza, no nia koʼalia makaʼas ba sira tan sira-nia fiar neʼebé fraku no sira-nia laran neʼebé toos, basá sira la fiar ema sira neʼebé haree nia moris hiʼas ona husi mate. 15 No nia hatete ba sira: “Laʼo ba mundu tomak no haklaken liafuan diʼak ba ema hotu. 16 Ema neʼebé fiar no hetan batizmu sei hetan salvasaun, maibé ema neʼebé la fiar sei hetan kastigu. 17 Liután neʼe, ema neʼebé fiar sei halo sinál sira tuirmai neʼe: Sira sei duni sai anju aat sira no sira sei koʼalia língua seluk hodi haʼu-nia naran, 18 no ho sira-nia liman rasik sira sei kaer samea, no se sira hemu buat neʼebé iha venenu, neʼe sei la halo sira moras. No sira sei tau liman ba ema moras, no ema moras neʼe sei sai isin-diʼak.”

19 No depois koʼalia tiha ba sira, Naʼi Jesus saʼe ba lalehan no tuur iha Maromak nia liman-loos. 20 Ho ida-neʼe, sira bá hodi haklaken iha fatin oioin nuʼudar Naʼi ajuda sira no apoia sira liuhusi sinál neʼebé sira halo hodi hatudu katak mensajen neʼe mak loos.

LIAFUAN IKUS NIAN NEʼEBÉ BADAK

Maibé buat hotu neʼebé fó-hatene ba sira, sira konta fali ba ema sira neʼebé hamutuk ho Pedro. Depois neʼe, liuhusi ninia dixípulu sira, Jesus rasik haruka mensajen neʼebé santu no neʼebé tahan ba nafatin, husi parte leste toʼo parte oeste. Mensajen neʼe kona-ba salvasaun rohan-laek nian.

[Nota–rodapé]