Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • bi7 Tito 1:1-3:15
  • Tito

La iha video neʼebé bele loke.

Deskulpa, la bele loke vídeo.

  • Tito
  • Bíblia Sagrada Tradusaun Mundu Foun Mateus–Apokalipse
Bíblia Sagrada Tradusaun Mundu Foun Mateus–Apokalipse
Tito

Tito

1 Husi Paulo, Maromak nia atan no Jesus Kristu nia apóstolu neʼebé iha fiar hanesan ho sira neʼebé Maromak hili ona, no neʼebé serbí nuʼudar apóstolu tuir matenek loloos kona-ba lia-loos, ida-neʼe inklui serbí Maromak ho laran-metin. 2 Buat sira-neʼe tuir esperansa moris rohan-laek nian neʼebé Maromak promete ona iha tempu uluk kedas no Maromak nunka bosok. 3 No iha tempu neʼebé nia deside ona, nia halo ema hatene ninia liafuan liuhusi serbisu haklaken, neʼebé nia fó fiar mai haʼu atu halo, hodi tuir mandamentu husi Maromak, ita-nia Salvadór. 4 Ba Tito, haʼu-nia oan doben neʼebé hamutuk ho haʼu iha fiar:

Haʼu harohan katak ita-nia Aman Maromak no Kristu Jesus ita-nia Salvadór sei hatudu laran-diʼak ba ó no haraik dame ba ó.

5 Haʼu husik ó atu hela iha Kreta, hodi nuneʼe ó bele hadiʼa buat neʼebé la loos no atu foti katuas sira iha sidade ida-idak, nuʼudar haʼu haruka ó atu halo; 6 katuas ida tenke halaʼo nia moris ho didiʼak atu ema la hetan sala iha nia, nia tenke iha feen ida deʼit, iha oan sira neʼebé fiar-naʼin no neʼebé ema la duun nuʼudar kontradór ka ema neʼebé moris aat. 7 Basá nuʼudar Maromak nia atan, katuas ida tenke iha naran diʼak,* la halo tuir deʼit ninia hakarak, la hirus lalais, la lanu-teen, la halo violénsia, no la kaan-teen atu buka osan, 8 maibé nia tenke hatudu laran-diʼak, hadomi buat diʼak, iha hanoin neʼebé loos, hahalok loos, laran-metin, kontrola an, 9 no nia tenke kaer metin ba liafuan neʼebé loos iha dalan neʼebé nia hanorin, atu nuneʼe nia bele book ema nia laran liuhusi hanorin neʼebé diʼak no fó dixiplina ba sira neʼebé koʼalia kontra hanorin neʼe.

10 Tanba iha ema barak neʼebé kontradór, koʼalia buat neʼebé folin-laek, no lohidór, liuliu mane sira neʼebé kaer metin ba sirkunsizaun. 11 Ó tenke taka ema sira-neʼe nia ibun, tanba sira kontinua estraga umakain tomak hodi hanorin buat neʼebé sira labele hanorin tan deʼit sira buka atu manán osan hodi lohi. 12 Sira-nia profeta ida hatete: “Ema Kreta sira sempre bosok-teen, sira hanesan animál fuik neʼebé estraga buat hotu, no sira mak ema baruk-teen neʼebé gosta atu han demais.”

13 Lia-sasin neʼe mak loos. Tan neʼe, kontinua fó dixiplina makaʼas ba sira, atu nuneʼe sira bele sai metin iha fiar, 14 hodi la see tilun ba ema judeu sira-nia istória bosok no la rona ba mandamentu husi ema sira neʼebé la simu ona lia-loos. 15 Buat hotu mak moos ba ema sira neʼebé moos, maibé buat hotu la moos ba ema sira neʼebé foʼer ona no laiha fiar, tanba sira-nia hanoin no laran* sai foʼer ona. 16 Sira fó sai iha ema nia oin katak sira hatene Maromak, maibé sira nega nia liuhusi sira-nia hahalok, tanba sira sai hanesan buat neʼebé aat tebes no sira la halo tuir Maromak nia hakarak no Maromak la simu sira atu halo serbisu diʼak ida.

2 Maibé kona-ba ó, kontinua koʼalia buat neʼebé mai husi hanorin neʼebé loos. 2 No haruka mane sira neʼebé idade ona atu kontrola sira-nia hahalok, sai sériu,* iha hanoin neʼebé loos, iha fiar neʼebé metin, iha domin no iha kbiit atu tahan. 3 Nuneʼe mós feto sira neʼebé idade ona tenke hatudu hahalok neʼebé fó glória ba Maromak, la konta ema nia vida, la hemu tua demais, sai mestra ba buat neʼebé diʼak; 4 atu sira bele hanorin feto joven sira atu hadomi sira-nia laʼen, hadomi sira-nia oan, 5 atu iha hanoin neʼebé loos, iha hahalok moos, atu halo serbisu iha uma laran, hatudu hahalok diʼak, hakruʼuk an ba sira-nia laʼen, atu nuneʼe ema labele koʼalia aat Maromak nia liafuan.

6 Nuneʼe mós kontinua fó laran-manas ba mane joven sira atu iha hanoin neʼebé loos. 7 No ó tenke hatudu ezemplu kona-ba halo hahalok diʼak iha buat hotu. Hanorin buat neʼebé loos ho badinas 8 hodi uza liafuan sira neʼebé diʼak atu ema seluk la duun ó; hodi nuneʼe sira neʼebé kontra ita bele sai moe, tanba la iha buat aat ida neʼebé sira bele koʼalia kona-ba ita. 9 Atan sira tenke hakruʼuk an ba sira-nia naʼi iha buat hotu, no hakaʼas an atu halo sira-nia naʼi kontente hodi la hatán fali ba sira-nia naʼi. 10 Atan ida keta naʼok husi ninia naʼi, maibé hatudu hahalok neʼebé halo ninia naʼi tau fiar ba nia, hodi nuneʼe iha buat hotu nia bele lori hahiʼi ba hanorin neʼebé mai husi Maromak, ita-nia Salvadór.

11 Tanba Maromak hatudu sai ona ninia laran-diʼak neʼebé boot, hodi lori salvasaun ba ema oioin. 12 No ninia laran-diʼak neʼe hanorin ita atu la simu hahalok neʼebé la tuir ninia hakarak, no atu la simu hakarak mundu nian, maibé atu moris ho hanoin neʼebé loos no hahalok loos no serbí Maromak ho laran-metin iha mundu ohin neʼe nian, 13 nuʼudar ita hein ba ita-nia esperansa ksolok nian no hein ba tempu neʼebé Maromak no ita-nia Salvadór, Kristu Jesus, hatudu sai sira-nia an ho glória boot. 14 Kristu Jesus fó nia an rasik ba ita atu halo ita livre husi hahalok aat hotu no atu hamoos povu ida nuʼudar buat espesiál ba nia an rasik, povu neʼebé laran-manas ba serbisu diʼak sira.

15 Kontinua koʼalia kona-ba buat sira-neʼe no hanorin no fó dixiplina ho kbiit tomak. Keta husik ema ida atu hatún ó.

3 Kontinua fó-hanoin sira atu hakruʼuk an no halo tuir governu no ukun-naʼin sira, atu sai prontu ba serbisu diʼak oioin, 2 la koʼalia aat kona-ba ema ida, la buka atu istori malu, la sai ulun-toos, hatudu laran-maus ba ema hotu. 3 Tanba uluk ita mós beik, la halo tuir Maromak, ema lohi ita, ita sai atan ba hakarak oioin no buka deʼit ksolok, ita moris iha dalan neʼebé aat no laran-moras, ita ema aat tebes, no ita odi malu.

4 Maibé, Maromak ita-nia Salvadór hatudu sai ona ninia laran-diʼak no domin ba ema. 5 Nia halo ida-neʼe laʼós tanba buat loos neʼebé ita halo, maibé tanba ninia laran-sadiʼa. Nia salva ita hodi hamoos ita, no neʼe lori ona ita ba moris, no nia hafoun ita liuhusi espíritu santu.* 6 Ho laran-luak nia fakar espíritu neʼe mai ita liuhusi Jesus Kristu ita-nia Salvadór, 7 atu nuneʼe, kuandu Maromak simu tiha ita nuʼudar ema loos liuhusi ninia laran-diʼak neʼebé boot, ita bele sai liman-rohan naʼin tuir esperansa moris rohan-laek nian.

8 Liafuan sira-neʼe mak loos, no haʼu hakarak ó atu hanorin beibeik buat sira-neʼe ho makaʼas, atu nuneʼe sira neʼebé fiar Maromak bele hanoin deʼit kona-ba kontinua halo serbisu diʼak. Sin, buat sira-neʼe mak loos no lori diʼak ba ema.

9 Maibé hasees an husi istori-malu kona-ba buat neʼebé la iha folin, kona-ba lista beiʼala nian, no hasees an husi haksesuk-malu kona-ba Ukun-Fuan, tanba buat sira-neʼe saugati deʼit no la lori buat diʼak ida. 10 No kona-ba ema neʼebé habelar hanorin neʼebé oin-seluk, fó avizu dala ida ba nia, no tuirmai fó avizu ba dala rua, no se nia la rona keta simu tan nia. 11 Basá ema hanesan neʼe laʼo sees ona husi dalan loos no halo sala, no ninia hahalok rasik mak tesi lia hasoru nia.

12 Kuandu haʼu haruka Ártemas ka Tíkiko ba ó, hakaʼas an atu mai toʼo haʼu iha Nikópolis, tanba haʼu deside ona atu hela iha neʼebá durante tempu malirin. 13 Hakaʼas an atu fó ajuda ba Zenas, neʼebé hatene didiʼak kona-ba Ukun-Fuan, no mós ba Apolo, atu sira bele iha buat hotu neʼebé sira presiza ba sira-nia viajen. 14 Maibé ita-nia maluk sira mós tenke aprende atu halo serbisu diʼak ba ema seluk nia presiza, hodi nafatin fó fuan diʼak.

15 Sira hotu neʼebé hamutuk haʼu haruka sira-nia kumprimentus ba ó. Fó haʼu-nia kumprimentus ba sira neʼebé hadomi ami iha fiar.

Haʼu harohan ba Maromak atu haraik ninia laran-diʼak neʼebé boot ba imi hotu.

[Nota–rodapé]

Tit 1:7 Ka, “halaʼo nia moris ho didiʼak atu ema la hetan sala iha nia”.

Tit 1:15 Ka, “konxiénsia”.

Tit 2:2 Neʼe katak tau atensaun liu ba buat neʼebé nia halo.

Tit 3:5 Lia-gregu, pneuma. Haree Apéndise 7B.

    Livru sira iha lian Tetun Dili (1993-2026)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe