2 Timóteo

1 Husi Paulo, Kristu Jesus nia apóstolu tanba Maromak nia hakarak hodi tuir promesa kona-ba moris neʼebé liuhusi Kristu Jesus, 2 ba Timóteo haʼu-nia oan doben:

Haʼu harohan katak ó bele simu Maromak nia laran-diʼak neʼebé boot, laran-sadiʼa, dame husi Aman Maromak no husi Kristu Jesus ita-nia Naʼi.

3 Haʼu fó-agradese ba Maromak, ida neʼebé haʼu serbí ho laran-moos* hanesan haʼu-nia beiʼala sira halo, no haʼu la para atu hanoin-hetan ó iha haʼu-nia harohan loron no kalan. 4 Haʼu hanoin-hetan ó-nia matan-been no haʼu hakarak tebes atu haree ó, atu nuneʼe haʼu bele sai nakonu ho ksolok. 5 Tanba haʼu hanoin-hetan ó-nia fiar neʼebé la laran-makerek, no fiar neʼe hetan uluk iha ó-nia avó-feto Luisa no ó-nia inan Eunike, no haʼu fiar metin katak ó mós iha fiar hanesan neʼe.

6 Tan razaun neʼe mak haʼu fó-hanoin ó atu uza Maromak nia prezente neʼebé ó simu ona kuandu haʼu tau liman ba ó, no uza prezente neʼe ho laran-manas hanesan ó halo ahi lakan boot. 7 Tanba espíritu neʼebé Maromak fó ba ita la hamosu hahalok taʼuk-teen, maibé fó ba ita kbiit no domin no hanoin neʼebé loos. 8 Nuneʼe, keta sai moe atu haklaken kona-ba ita-nia Naʼi, ka sai moe kona-ba haʼu-nia situasaun nuʼudar dadur tanba Naʼi. Maibé, sai prontu atu hetan terus tanba liafuan diʼak no sadere ba Maromak nia kbiit. 9 Nia salva ita no hili ona ita atu sai nuʼudar ema santu, laʼós tanba ita-nia hahalok rasik, maibé tanba ninia hakarak no laran-diʼak neʼebé boot. Horiuluk kedas nia fó ida-neʼe ba ita liuhusi Kristu Jesus, 10 maibé agora, laran-diʼak neʼe hatudu sai ona ho momoos kuandu ita-nia Salvadór mosu mai, katak Kristu Jesus, ida neʼebé halakon ona mate, no liuhusi liafuan diʼak nia haleno naroman ba moris neʼebé la bele lakon. 11 No Maromak hili haʼu nuʼudar haklaken-naʼin no apóstolu no mestre atu halo ema hatene kona-ba liafuan diʼak neʼe.

12 Tan neʼe mak haʼu mós hetan terus sira-neʼe, maibé haʼu la sai moe. Tanba haʼu hatene kona-ba ida neʼebé haʼu fiar, no haʼu fiar metin katak nia bele proteje buat neʼebé haʼu entrega ona ba nia toʼo loron tesi-lia nian. 13 Kontinua kaer metin ba liafuan loloos* neʼebé haʼu dehan ona ba ó, no kontinua hatudu ó-nia fiar no domin nuʼudar ema neʼebé ida deʼit ho Kristu Jesus. 14 No ho ajuda husi espíritu santu neʼebé hela iha ita, ó tenke proteje buat folin-boot neʼebé entrega ona ba ó.

15 Ó hatene ona katak ema hotu iha área Ázia nian fila kotuk ona husi haʼu, neʼe inklui mós Figelo no Hermógene. 16 Haʼu harohan atu Naʼi fó ninia laran-sadiʼa ba umakain Onesíforo nian, tanba dala barak nia fó kmaan ba haʼu, no nia la sai moe kona-ba haʼu-nia situasaun nuʼudar dadur. 17 Tuir loloos, kuandu nia iha Roma, nia hakaʼas an atu buka haʼu no hetan duni haʼu. 18 Haʼu harohan katak Naʼi Jeová haraik laran-sadiʼa ba nia iha loron tesi-lia nian. No ó hatene ho didiʼak serbisu hotu neʼebé nia halo iha Éfeso.

2 Tan neʼe, haʼu-nia oan, kontinua hetan kbiit husi Maromak nia laran-diʼak boot neʼebé nia fó ba sira neʼebé ida deʼit ho Kristu Jesus. 2 No buat neʼebé ó rona husi haʼu, neʼebé ema barak mós sai nuʼudar sasin, ó tenke fó sai buat sira-neʼe ba ema neʼebé laran-metin atu nuneʼe sira mós bele kumpre kritériu atu hanorin ema seluk. 3 Nuʼudar Kristu Jesus nia soldadu neʼebé diʼak, sai prontu bá atu hasoru terus. 4 Ema neʼebé sai nuʼudar soldadu la envolve an ho serbisu seluk atu buka moris tanba nia hakarak atu halo kontente ema neʼebé hatama nia nuʼudar soldadu. 5 Nuneʼe mós, se ema ruma hola parte iha jogu ida, nia sei la hetan prémiu* se nia la halo jogu neʼe tuir lei sira. 6 Toʼos-naʼin neʼebé serbisu makaʼas mak tenke han uluk fuan primeiru husi ninia toʼos. 7 Kontinua hanoin didiʼak kona-ba buat neʼebé haʼu dehan ba ó, no Naʼi sei fó matenek ba ó iha buat hotu.

8 Hanoin-hetan katak Jesus Kristu moris hiʼas ona husi mate no nia mak David nia bei-oan; ida-neʼe mak liafuan diʼak neʼebé haʼu haklaken, 9 no kona-ba neʼe mak haʼu hetan terus no tama komarka hanesan ema aat ida. Maski nuneʼe, ema la bele kesi metin Maromak nia liafuan. 10 Tan neʼe, haʼu kontinua atu tahan buat hotu tanba sira neʼebé Maromak hili ona, atu nuneʼe sira mós bele hetan salvasaun liuhusi Kristu Jesus no hetan glória ba nafatin. 11 Ita bele fiar duni liafuan tuirmai neʼe: Se ita mate hamutuk, ita mós sei moris hamutuk; 12 se ita kontinua atu tahan, ita mós sei ukun hamutuk nuʼudar liurai; se ita nega, nia mós sei nega ita; 13 no se ita la laran-metin, nia nafatin laran-metin, tanba nia la bele nega ninia an rasik.

14 Kontinua fó-hanoin sira kona-ba buat sira-neʼe, hanorin sira iha Maromak nia oin atu labele haksesuk malu kona-ba liafuan sira, tanba ida-neʼe la iha folin duni no estraga sira neʼebé rona. 15 Hakaʼas an hodi sai nuʼudar ema neʼebé Maromak simu, no nuʼudar serbisu-naʼin neʼebé la moe kona-ba buat ida, hodi uza ho didiʼak liafuan lia-loos nian. 16 Maibé hasees an husi liafuan sira neʼebé la iha folin no neʼebé estraga buat neʼebé santu; tanba buat sira-neʼe sei lori ba hahalok aat oioin neʼebé kontra Maromak, 17 no sira-nia liafuan sai belar lalais hanesan kanek neʼebé han mohu tiha isin. Ema sira-neʼe inklui Himeneo no Fileto 18 neʼebé laʼo sees ona husi lia-loos, hodi dehan katak moris-hiʼas mosu tiha ona; no sira estraga ona ema balu nia fiar. 19 Maski nuneʼe, Maromak tau ona uma hun neʼebé metin ho liafuan tuirmai hanesan sinál ida: “Jeová hatene sira neʼebé ninian”, no: “Sira hotu neʼebé bolu Jeová nia naran tenke husik tiha buat sira neʼebé la loos.”

20 No iha uma boot ida nia laran iha bikan sira neʼebé halo husi osan-mean no osan-mutin, no iha mós bikan sira neʼebé halo husi ai no rai-mean, balu uza ba tempu neʼebé espesiál no balu uza ba tempu baibain. 21 Tan neʼe, se ema ida hasees an husi ema neʼebé hanesan ho bikan baibain, nia sei sai nuʼudar bikan neʼebé espesiál, katak santu no buat diʼak ba ninia naʼin, no prepara tiha ba serbisu diʼak hotu. 22 Entaun, halai-sees husi hakarak joven nian, maibé buka hahalok loos, fiar, domin, dame, hamutuk ho sira neʼebé bolu Naʼi nia naran ho laran-moos.

23 Liután neʼe, hasees an husi pergunta folin-laek sira, tanba ida-neʼe hamosu deʼit haksesuk-malu. 24 Tanba Naʼi nia atan la presiza haksesuk malu, maibé tenke hatudu laran-diʼak ba ema hotu, iha matenek atu hanorin, no kontrola an kuandu ema halo sala hasoru nia. 25 Nia tenke hanorin ho laran-maus ba sira neʼebé kontra nia; tanba karik Maromak bele halo sira troka sira-nia laran, atu nuneʼe sira bele hatene didiʼak kona-ba lia-loos, 26 no sira bele hanoin momoos fali no halai sai husi Diabu nia lasu; basá Diabu kaer moris ona sira atu halo ninia hakarak.

3 Maibé hatene ida-neʼe bá, katak iha loron ikus sira sei mosu problema barak neʼebé susar atu tahan. 2 Tanba ema sei hadomi deʼit sira-nia an, hadomi osan, gaba an, loko an, koʼalia aat, la halo tuir inan-aman, la fó-agradese, la laran-metin, 3 la hadomi malu, ulun-toos,* konta ema nia vida, la kontrola an, siʼak, la hadomi buat neʼebé diʼak, 4 traidór, lakohi simu konsellu, sai foti-an, hadomi deʼit ksolok duké hadomi Maromak, 5 iha ema nia oin sira hatudu hahalok katak sira adora Maromak, maibé sira la moris tuir sira-nia adorasaun; ó hasees an husi ema sira hanesan neʼe. 6 Tanba husi sira-nia leet mak mosu mane sira neʼebé lohidór, no neineik-neineik mane sira-neʼe tama ba ema nia umakain no kontrola feto sira neʼebé fraku tanba sala barak no neʼebé tuir deʼit sira-nia hakarak oioin. 7 Feto sira-neʼe sempre aprende maibé sira nunka hetan matenek loloos kona-ba lia-loos.

8 No mane sira-neʼe kontra hasoru lia-loos, hanesan ho Janes no Jambres neʼebé mós kontra hasoru Moisés. No mane sira-neʼe nia hanoin foʼer ona, no Maromak la simu sira tanba sira la laʼo tuir fiar. 9 Maibé, sira sei la kontinua tan atu halo hahalok sira-neʼe, tanba sira-nia hahalok beik sei hatudu sai momoos iha ema hotu nia oin, hanesan mós ho Janes no Jambres nia hahalok beik. 10 Maibé ó halo tuir didiʼak ona haʼu-nia hanorin, haʼu-nia dalan atu moris, haʼu-nia hakarak, haʼu-nia fiar, haʼu-nia pasiénsia, haʼu-nia domin, no haʼu-nia laran-metin. 11 Liután neʼe, ó hatene susar no terus neʼebé mosu ba haʼu iha Antiokia, Ikónio, no Listra. Haʼu tahan susar no terus sira-neʼe, no Naʼi salva haʼu husi buat sira-neʼe hotu. 12 Tuir loloos, ema hotu neʼebé hakarak atu serbí Maromak ho laran-metin nuʼudar Kristu Jesus nia dixípulu mós sei hetan terus. 13 Maibé ema aat no bosok-teen sira sei laʼo husi aat ba aat liután, hodi bosok ema seluk no mós sira-nia an.

14 Maibé, kona-ba ó, kontinua halo tuir buat neʼebé ó aprende ona no buat neʼebé ema ajuda ó atu fiar, hodi hanoin-hetan sé mak hanorin ó buat sira-neʼe 15 no mós katak husi kiʼik kedas ó hatene ona buat neʼebé hakerek iha livru santu, neʼebé fó matenek ba ó hodi hetan salvasaun liuhusi fiar iha Kristu Jesus. 16 Maromak mak leno Eskritura hotu no neʼe diʼak atu hanorin, atu hatudu sai buat neʼebé sala, atu hadiʼa buat hotu, no atu fó dixiplina tuir Maromak nia matadalan neʼebé loos, 17 atu nuneʼe Maromak nia atan sira bele sai kompletu hodi prontu atu halo serbisu diʼak hotu.

4 Haʼu haruka ó iha Maromak no Kristu Jesus nia oin, ida neʼebé sei tesi lia ba ema moris no ema mate kuandu nia hatudu sai ninia an no mai nuʼudar Liurai: 2 Haklaken Maromak nia liafuan ho laran-manas iha tempu neʼebé diʼak no iha tempu neʼebé susar, fó dixiplina, fó konsellu, fó laran-manas, hodi hatudu pasiénsia no ho matenek atu hanorin. 3 Tanba tempu sei mosu mai kuandu ema sei la simu tan hanorin neʼebé diʼak, maibé sira sei tuir deʼit sira-nia hakarak rasik hodi halibur ba sira-nia an mestre sira neʼebé koʼalia deʼit buat neʼebé sira hakarak atu rona. 4 Sira sei fila kotuk hodi la rona ba lia-loos, no rona fali ba istória falsu sira. 5 Maibé kona-ba ó, ó tenke kontinua matan-moris iha buat hotu, tahan susar sira, halo serbisu nuʼudar haklaken-naʼin kona-ba liafuan diʼak, no halo didiʼak ó-nia knaar.

6 Basá haʼu hanesan sakrifísiu hemu nian neʼebé fakar daudaun ona iha altár leten, no haʼu-nia tempu atu sai livre besik loos ona. 7 Haʼu halo tiha ona funu neʼebé loloos, haʼu halai ona toʼo rohan, haʼu halo tuir ona fiar. 8 Husi ohin ba oin ita-nia Naʼi, neʼebé tesi lia ho loloos, rai hela ona ba haʼu koroa hahalok loos nian. Nia sei fó ida-neʼe ba haʼu nuʼudar liman-rohan iha loron tesi-lia nian, no laʼós deʼit ba haʼu, maibé mós ba sira hotu neʼebé hein namanas ba nia atu hatudu sai nia an.

9 Hakaʼas an atu mai haree haʼu lalais. 10 Basá Demas husik ona haʼu tanba nia hadomi mundu neʼe, no nia bá tiha ona Tesalónika; Cresente bá ona Galásia, no Tito bá ona Dalmásia. 11 Lucas deʼit mak hamutuk ho haʼu. Lori mós Marcos ho ó, tanba nia mak ajuda-naʼin diʼak ba haʼu iha haʼu-nia serbisu. 12 Maibé haʼu haruka ona Tíkiko ba Éfeso. 13 No kuandu ó mai, lori mós unuk neʼebé haʼu husik hela ba Karpo iha Tróade, no lori mós livru sira, liuliu livru neʼebé hakerek iha animál nia kulit.

14 Alexandre, badain-besi riti nian, halo buat aat barak mai haʼu. Jeová sei selu fali tuir ninia hahalok sira. 15 No ó mós tenke matan-moris kona-ba nia, tanba nia kontra makaʼas ita-nia mensajen.

16 No la iha ema ida apoia haʼu kuandu haʼu defende haʼu-nia an ba dala primeiru, basá sira hotu husik haʼu. Haʼu hein katak Maromak la fó-sala ba sira kona-ba neʼe. 17 Maibé Naʼi hamriik besik haʼu no fó kbiit mai haʼu, atu nuneʼe haʼu bele haklaken liafuan diʼak toʼo kompletu no nasaun hotu bele rona kona-ba neʼe; no nia salva haʼu husi leaun nia ibun. 18 Naʼi sei salva haʼu husi buat aat hotu no sei proteje haʼu ba ninia ukun iha lalehan. Fó glória nafatin ba nia. Amen.

19 Fó haʼu-nia kumprimentus ba Priska no Ákuila no ba umakain Onesíforo nian.

20 Erasto hela nafatin iha Korinto, maibé haʼu husik hela Trófimo iha Mileto tanba nia moras. 21 Hakaʼas an atu toʼo mai haʼu antes tempu malirin.

Eubulo haruka ninia kumprimentus, nuneʼe mós ho Pudente, Lino, Cláudia no maun-alin sira hotu.

22 Haʼu harohan katak Naʼi sei hamutuk ho ó-nia hanoin no hahalok, no katak nia haraik ninia laran-diʼak neʼebé boot ba imi hotu.

[Nota–rodapé]