Ebreu

1 Horiuluk Maromak koʼalia ba ita-nia beiʼala sira iha tempu oioin no iha dalan oioin liuhusi profeta sira. 2 No agora iha loron sira-neʼe nia rohan, nia koʼalia ona ba ita liuhusi ninia Oan-Mane, ida neʼebé nia hili atu simu buat hotu nuʼudar liman-rohan, no liuhusi nia mak Maromak halo buat neʼebé iha mundu no mós iha lalehan.* 3 Nia mak haleno Maromak nia glória no nia mak Maromak nia ilas loloos, no nia apoia buat hotu ho kbiit husi ninia liafuan; no depois nia hamoos tiha ita-nia sala nia tuur iha liman-loos husi Maromak neʼebé Boot Liu, iha fatin aas liu. 4 Entaun, nia sai diʼak liu fali anju sira, tanba nia simu naran neʼebé kmanek liu fali sira-nian.

5 Porezemplu, Maromak la koʼalia ba anju ida seluk hodi dehan: “Ó mak haʼu-nia oan-mane; ohin haʼu sai ona nuʼudar ó-nia aman.” No dala ida tan dehan: “Haʼu sei sai ninia aman, no nia sei sai haʼu-nia oan.” 6 Maibé kuandu nia lori fali ninia Oan Primeiru ba mundu, nia dehan: “Maromak nia anju sira hotu tenke hakruʼuk an ba nia.”

7 No mós, nia koʼalia kona-ba anju sira hodi dehan: “Nia halo ninia anju sira nuʼudar espíritu,* no ninia atan sira nuʼudar ahi neʼebé lakan.” 8 Maibé kona-ba ninia Oan-Mane nia dehan: “Maromak mak ó-nia kadunan ba nafatin, no ai-tonka ba ó-nia ukun mak ai-tonka hahalok loos nian. 9 Ó hadomi hahalok loos, no ó odi hahalok aat. Tan neʼe mak Maromak, ó-nia Maromak, fui mina* ba ó no fó ba ó ksolok neʼebé boot liu fali ó-nia maluk sira.” 10 No: “Horiuluk kedas, oh Naʼi, Ita tau rai nia hun, no lalehan mak serbisu husi Ita-nia liman. 11 Sira sei lakon, maibé Ita sei hela ba nafatin; no hanesan hena ida, sira sei sai tuan, 12 no Ita sei lulun sira hanesan hatais neʼebé naruk no Ita sei troka sira hanesan ema troka roupa, maibé Ita sei hanesan nafatin, no Ita-nia tinan sira nunka toʼo rohan.”

13 Maibé Maromak nunka koʼalia ba anju seluk dehan: “Tuur iha haʼu-nia liman-loos, toʼo haʼu tau ó-nia inimigu sira iha ó-nia ain okos.” 14 Anju sira hotu mak espíritu hodi halo serbisu santu. No Maromak haruka sira mai atu serbí ema sira neʼebé sei hetan salvasaun.

2 Tan neʼe mak ita presiza atu tau hanoin tomak ba buat neʼebé ita rona ona, atu nuneʼe ita labele laʼo dook husi fiar. 2 Basá se liafuan neʼebé koʼalia liuhusi anju sira mak loos, no tan neʼe hahalok sala hotu no hahalok kontra lei simu ona kastigu tuir buat neʼebé loos; 3 entaun oinsá mak ita bele halai-sees husi kastigu se ita husik ona mensajen kona-ba buat neʼebé Maromak halo atu salva ita? Basá mensajen neʼe hahú fó sai liuhusi ita-nia Naʼi no mós ema sira neʼebé rona nia fó-hatene ba ita kona-ba neʼe; 4 no Maromak mós hola parte hamutuk sira hodi fó sasin ho sinál no milagre sira no ho hahalok boot oioin no mós ho espíritu santu neʼebé fahe tuir ninia hakarak.

5 Basá nia la fó mundu* neʼebé atu mai ba anju sira atu ukun, no kona-ba mundu neʼe mak ita koʼalia daudaun. 6 Maibé mane ida fó sasin ona iha fatin ruma dehan: “Ema iha folin saida hodi Ita nafatin hanoin kona-ba nia, ka ema nia oan-mane iha folin saida hodi Ita tau matan ba nia? 7 Ita halo nia kiʼik liu fali anju sira; Ita tau koroa glória no hahiʼi nian ba nia, no Ita hili nia atu tau matan ba buat sira neʼebé Ita halo ho Ita-nia liman. 8 Buat hotu Ita tau ona iha ninia ain okos.” Hodi tau buat hotu iha nia ain okos, Maromak la husik hela buat ida neʼebé la tau iha nia ain okos. Maski nuneʼe, agora ita seidauk haree buat hotu tau iha nia ain okos; 9 maibé ita haree duni katak Jesus, ida neʼebé Maromak halo kiʼik liu fali anju sira, agora hetan ona koroa glória no hahiʼi nian tanba nia hetan terus toʼo mate, atu nuneʼe liuhusi Maromak nia laran-diʼak neʼebé boot, nia bele koko mate ba ema hotu.

10 Buat hotu mosu ba Maromak nia glória no mosu liuhusi nia. Entaun, atu Maromak bele fó glória ba oan barak, diʼak ba nia atu halo Naʼi-Ulun Salvasaun nian sai diʼak loloos liuhusi terus oioin. No Maromak salva sira liuhusi Naʼi-Ulun neʼe. 11 Basá sira neʼebé sai santu ona no mós ida neʼebé halo sira santu, sira hotu iha aman ida deʼit, tan neʼe mak nia la moe atu bolu sira nuʼudar ninia “alin sira”, 12 nia dehan: “Haʼu sei fó sai Ita-nia naran ba haʼu-nia alin sira; iha kongregasaun nia leet haʼu sei hahiʼi Ita ho knananuk.” 13 No dala ida tan: “Haʼu sei tau haʼu-nia fiar ba nia.” No dala ida tan: “Haree! Haʼu no mós oan sira-neʼe, neʼebé Jeová fó ona ba haʼu.”

14 Entaun, tanba “oan sira-neʼe” mak parte ba raan no isin, nia mós sai parte ba raan no isin, atu nuneʼe liuhusi ninia mate nia bele halakon ida neʼebé iha kbiit atu halo mate, neʼe mak Diabu; 15 no atu nuneʼe nia bele halo livre sira hotu neʼebé sai atan durante sira-nia moris tomak tan sira-nia taʼuk ba mate. 16 Tanba loloos nia la ajuda anju sira, maibé nia ajuda Abraão nia bei-oan sira. 17 Tan neʼe mak nia tenke sai hanesan ninia “alin sira” iha buat hotu, atu nuneʼe nia bele sai nuʼudar amlulik boot atu halo Maromak nia serbisu ho laran-sadiʼa no laran-metin; nuneʼe nia bele hasaʼe sakrifísiu atu taka ema nia sala hodi nuneʼe sira bele hadame malu fali ho Maromak. 18 Nia rasik hetan ona terus kuandu nia hetan koko, tan neʼe nia bele sai nuʼudar ajuda-naʼin ba sira neʼebé hetan koko.

3 Tan neʼe, maun-alin santu sira, neʼebé parte husi sira neʼebé Maromak bolu ona atu bá lalehan, imi hanoin didiʼak kona-ba Jesus; nia mak apóstolu no amlulik boot neʼebé ita fó sai katak ita fiar. 2 Nia laran-metin ba Maromak neʼebé hili ona nia, hanesan Moisés mós serbí ho laran-metin iha Maromak nia uma. 3 Basá glória neʼebé Jesus simu mak boot liu fali Moisés nian, tanba ida neʼebé harii uma hetan glória neʼebé boot liu fali uma neʼe. 4 Klaru katak, uma ida-idak ema mak harii, maibé ida neʼebé harii buat hotu mak Maromak. 5 No Moisés serbí ho laran-metin nuʼudar atan iha Maromak nia uma, no ninia serbisu sai nuʼudar sasin ba buat neʼebé sei fó sai iha futuru, 6 maibé Kristu hatudu ona laran-metin nuʼudar Oan-Mane hodi tau matan ba Maromak nia uma. No ita mak Maromak nia uma, só deʼit se ita kaer metin toʼo rohan ba ita-nia aten-brani atu koʼalia no mós kaer metin ba ita-nia esperansa ho haksolok.

7 Tan neʼe mak espíritu santu dehan: “Se ohin loron imi rona ba haʼu-nia lian, 8 keta halo toos imi-nia laran hanesan iha tempu neʼebé imi-nia beiʼala sira halo haʼu hirus tebes, iha loron neʼebé sira koko haʼu iha rai-fuik, 9 no maski sira haree ona haʼu-nia hahalok sira ba tinan haatnulu, maibé sira koko haʼu. 10 Tan neʼe mak haʼu hakribi ba jerasaun neʼe no dehan: ‘Sira-nia laran sempre dook husi haʼu, no sira la hatene haʼu-nia dalan sira.’ 11 Entaun ho hirus haʼu jura katak, ‘Sira sei la tama iha haʼu-nia fatin deskansa nian.’”

12 Matan-moris bá, maun-alin sira, atu imi labele haburas laran-aat neʼebé la iha fiar hodi hadook an husi Maromak neʼebé moris; 13 maibé kontinua fó laran-manas ba malu loron-loron bainhira sei iha tempu neʼebé bolu nuʼudar “ohin loron”, atu nuneʼe imi-nia laran la sai toos tanba sala nia kbiit atu lohi. 14 Tanba tuir loloos ita sei sai parte ba Kristu só deʼit se ita kaer metin ba fiar uluk nian toʼo rohan. 15 Hanesan hatete nanis ona: “Se ohin loron imi rona ba haʼu-nia lian, keta halo toos imi-nia laran hanesan iha tempu neʼebé imi-nia beiʼala sira halo haʼu hirus tebes.”

16 Sé mak sira neʼebé rona maibé halo nia hirus tebes? Tuir loloos, sira mak ema neʼebé Moisés lori sai husi Ejitu, loos ka lae? 17 Liután neʼe, sé mak Maromak hakribi ba tinan haatnulu? Sira mak ema neʼebé halo sala, no sira-nia mate-isin monu iha rai-fuik, loos ka lae? 18 No ba sé mak nia jura katak sira sei la tama iha ninia fatin deskansa nian? Sira mak ema neʼebé kontra nia, loos ka lae? 19 Entaun ita hatene katak sira la bele tama tanba sira la iha fiar.

4 Entaun, tanba promesa atu tama iha ninia fatin deskansa nian sei iha nafatin, mai ita matan-moris bá atu ita ida mós la lakon promesa neʼe. 2 Basá ita mós rona ona liafuan diʼak hanesan sira; maibé liafuan neʼebé sira rona la lori buat diʼak ba sira, tanba sira la sai ida deʼit iha fiar hamutuk ho sira neʼebé halo tuir. 3 Tanba ita neʼebé hatudu ona fiar, ita tama iha ninia fatin deskansa nian, maibé kona-ba sira neʼebé la halo tuir, nia dehan: “Entaun ho hirus haʼu jura katak, ‘Sira sei la tama iha haʼu-nia fatin deskansa nian’”, maski ninia serbisu hotu ona husi tempu neʼebé mundu hahú.* 4 Tanba iha eskritura ida nia koʼalia kona-ba loron hitu nian hodi dehan: “No iha loron hitu, Maromak deskansa husi ninia serbisu hotu”, 5 no dala ida tan nia dehan: “Sira sei la tama iha haʼu-nia fatin deskansa nian.”

6 Sira neʼebé rona uluk liafuan diʼak la tama ba fatin deskansa neʼe tanba sira la halo tuir. Maibé fatin neʼe sei nakloke hela atu ema balu bele tama. 7 Nuneʼe liutiha tempu naruk nia koʼalia iha David nia salmu ida, no dala ida tan nia marka tiha loron ida hodi dehan “ohin loron”; hanesan temi tiha ona iha leten: “Se ohin loron imi rona haʼu-nia lian, keta halo toos imi-nia laran.” 8 Tanba se Josué lori tiha ona sira atu tama ba Maromak nia fatin deskansa nian, neʼe katak depois tempu neʼe Maromak la presiza tan atu koʼalia kona-ba loron seluk. 9 Neʼe duni, sei iha hela loron deskansa nian ba Maromak nia povu neʼebé hanesan ho loron Sábadu. 10 Tanba ema neʼebé tama ona iha Maromak nia fatin deskansa nian, nia deskansa husi ninia serbisu rasik, hanesan Maromak mós deskansa husi ninia serbisu.

11 Tan neʼe, mai ita hakaʼas an atu tama ba fatin deskansa neʼe, atu nuneʼe ita ida mós la monu hodi tuir ezemplu aat husi sira neʼebé la halo tuir. 12 Tanba Maromak nia liafuan mak moris no iha kbiit boot no neʼe kroʼat liu fali surik ho kroʼat rua no bele tama kleʼan toʼo haketak ema nia moris* husi ema nia laran, no ruin husi buat neʼebé iha ruin laran,* no bele hatene ema nia hanoin no hakarak iha laran. 13 No la iha kriasaun ida neʼebé subar husi ninia matan, maibé nia bele haree buat hotu ho momoos no buat hotu nakloke iha ninia matan. Ba nia mak ita tenke hatán.

14 Entaun, tanba ita iha amlulik boot neʼebé aas liu, katak Jesus Maromak nia Oan-Mane, no nia tama ona iha lalehan, mai ita laran-metin ba ita-nia fiar neʼebé ita fó sai ona kona-ba nia. 15 Ita iha amlulik boot neʼebé hanoin no komprende kona-ba ita-nia fraku sira, basá nia hetan ona koko iha buat hotu hanesan ita, maibé la iha sala. 16 Tan neʼe, mai ita hakbesik ba kadunan laran-diʼak nian no koʼalia ba Maromak hodi la taʼuk, atu nuneʼe ita bele simu laran-sadiʼa no hetan ajuda iha tempu neʼebé loos liuhusi Maromak nia laran-diʼak neʼebé boot.

5 Ema ida-idak neʼebé simu knaar atu serbí nuʼudar amlulik boot, nia simu knaar neʼe atu serbí Maromak ba ema nia diʼak, atu nuneʼe nia bele hasaʼe prezente no sakrifísiu ba ema nia sala. 2 Nia bele hatudu laran-sadiʼa ba sira neʼebé la hatene no sira neʼebé halo sala, basá nia rasik mós hatene ninia fraku sira, 3 no tan neʼe, nia tenke hasaʼe sakrifísiu ba ninia sala rasik hanesan nia mós halo ba ema seluk.

4 No mós, ema ida la bele hili nia an rasik ba knaar neʼe, maibé Maromak deʼit mak hili ema neʼe, hanesan uluk nia hili Aarão. 5 Nuneʼe mós Kristu la fó glória ba nia an rasik hodi halo nia an nuʼudar amlulik boot, maibé nia simu glória neʼe husi Maromak, ida neʼebé dehan ba nia: “Ó mak haʼu-nia oan-mane; ohin, haʼu sai ona nuʼudar ó-nia aman.” 6 No nia mós koʼalia iha fatin seluk dehan: “Ó mak amlulik ba nafatin tuir dalan Melkizedek nian.”

7 Durante Kristu moris iha rai, nia hasaʼe orasaun no mós harohan ho laran tomak ba Ida neʼebé bele salva nia husi mate; nia halo nuneʼe ho lian makaʼas no ho matan-been, no Maromak rona duni ninia orasaun tanba nia hamtaʼuk Maromak. 8 Maski nia mak Oan-Mane, maibé nia aprende atu halo tuir liuhusi terus neʼebé nia hasoru, 9 no depois nia sai kompletu ona, nia sai nuʼudar dalan ba ema hotu neʼebé halo tuir nia atu hetan salvasaun ba nafatin, 10 tanba Maromak rasik hili nia atu sai nuʼudar amlulik boot tuir dalan Melkizedek nian.

11 Ami iha buat barak atu koʼalia kona-ba nia, maibé susar atu esplika ida-neʼe tanba imi neineik atu komprende.* 12 Tuir loloos, agora imi tenke sai ona nuʼudar mestre, maibé dala ida tan imi sei presiza ema atu hanorin fali buat simples husi Maromak nia liafuan santu; no imi presiza fali susubeen, laʼós ai-han neʼebé toos. 13 Basá ema neʼebé hemu deʼit susubeen, nia la hatene liafuan neʼebé loos, tanba nia sei hanesan bebé. 14 Maibé ai-han toos mak ba ema neʼebé boot ona, neʼebé uza beibeik sira-nia kbiit atu hanoin, no hodi halo nuneʼe sira treinu sira-nia kbiit neʼe atu hatene buat diʼak husi buat aat.

6 Nuneʼe, tanba ita aprende ona hanorin neʼebé simples kona-ba Kristu, mai ita laʼo ba oin hodi sai ema boot, no la harii fali uma hun ba dala ida tan, katak, arrepende an husi hahalok mate nian, no fiar iha Maromak, 2 hanorin kona-ba batizmu no kona-ba tau liman ba ema, kona-ba moris-hiʼas husi mate no kona-ba tesi-lia neʼebé metin ba nafatin. 3 No ita sei laʼo ba oin hodi sai ema boot, se Maromak husik ita atu halo ida-neʼe.

4 Kona-ba ema sira neʼebé simu ona naroman, no simu ona prezente neʼebé mai husi lalehan, no simu mós espíritu santu, 5 no koko ona Maromak nia liafuan furak no mós koko ona kbiit husi mundu neʼebé atu mai; 6 se sira laʼo sees ona husi hanorin neʼebé loos, la iha ema ida bele lori fali sira atu hakribi sira-nia sala, tanba sira hedi fali ona Maromak nia Oan-Mane no hamoe nia iha ema hotu nia oin. 7 Tanba rai xupa udan-been neʼebé monu ba nia leten no tuirmai fó moris ba modo sira, no ema sira neʼebé kuda bele han ida-neʼe. No rai neʼe simu bensaun husi Maromak. 8 Maibé se rai neʼe hamosu ai-tarak no duʼut aat, rai neʼe la iha ona folin no toʼos-naʼin besik atu fó-malisan ba rai neʼe; no ikusmai sei sunu tiha.

9 Maski ami koʼalia hanesan neʼe, maibé ba imi, haʼu-nia maluk doben sira, ami fiar katak imi moris iha dalan neʼebé diʼak liu, no imi-nia moris neʼe sei lori imi ba salvasaun. 10 Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ba ninia naran, basá imi serbí ona no kontinua atu serbí santu sira. 11 Maibé ami hakarak imi ida-idak atu hatudu badinas hanesan uluk nian hodi imi bele kaer metin ba imi-nia esperansa toʼo rohan, 12 atu nuneʼe imi labele sai baruk, maibé banati-tuir sira neʼebé simu promesa nuʼudar liman-rohan liuhusi fiar no pasiénsia.

13 Basá kuandu Maromak halo promesa ba Abraão, nia jura hodi ninia an rasik tanba nia la bele jura hodi buat seluk neʼebé boot liu nia. 14 Nia dehan: “Haʼu sei haraik duni bensaun ba ó no haʼu sei halo duni ó-nia oan sira sai barak.” 15 Entaun, depois Abraão hatudu tiha pasiénsia, nia simu duni promesa neʼe. 16 Kuandu ema halo promesa, sira jura hodi ida neʼebé boot liu sira, no juramentu neʼe hapara haksesuk-malu tanba neʼe hatudu katak buat neʼebé sira dehan mak loos. 17 Nuneʼe mós ho Maromak, kuandu nia deside atu hatudu ho klaru ba sira neʼebé simu promesa nuʼudar liman-rohan katak ninia hakarak la bele muda, nia mós halo juramentu ida, 18 atu nuneʼe, liuhusi buat rua neʼebé la bele muda, neʼebé hatudu katak Maromak nunka bosok, ita neʼebé halai ona ba Maromak nia fatin seguru bele hetan laran-manas atu kaer metin ba esperansa neʼebé tau ona iha ita-nia oin. 19 Ita iha esperansa neʼe nuʼudar ankor neʼebé loos no metin ba ita-nia moris, no esperansa neʼe lori ita tama ba laran liuhusi kortina ida. 20 No iha ida neʼebé tama uluk liu hodi reprezenta ita, neʼe mak Jesus, ida neʼebé sai ona nuʼudar amlulik boot ba nafatin tuir dalan Melkizedek nian.

7 Melkizedek neʼe mak liurai husi Salém no nia mak amlulik ba Maromak neʼebé Aas Liu Hotu, no nia hasoru Abraão bainhira Abraão fila husi funu atu oho liurai sira, no nia fó bensaun ba Abraão, 2 no Abraão fó ba nia parte sanulu husi buat hotu neʼebé nia hetan. Ninia naran iha arti katak, “Liurai hahalok loos nian”, no nia mak liurai Salém nian, neʼe katak, “Liurai dame nian”. 3 Nia la iha aman no inan, no la iha lista kona-ba ninia beiʼala sira, no la iha informasaun kona-ba ninia moris no ninia mate, maibé Maromak halo tiha nia hanesan ninia Oan-Mane, no tan neʼe nia mak nuʼudar amlulik ba nafatin.

4 Entaun, imi haree bá oinsá mak ema neʼe importante tebes, neʼebé Abraão, nuʼudar família nia ulun, fó parte sanulu husi rikusoin diʼak liu neʼebé nia manán iha funu. 5 Loloos, tuir Ukun-Fuan, Levi nia oan sira neʼebé simu knaar nuʼudar amlulik tenke halibur parte sanulu nian husi povu, katak sira-nia maun-alin sira, maski sira mak Abraão nia bei-oan. 6 Maibé mane neʼe neʼebé laʼós husi família Levi nian, nia halibur impostu husi Abraão no fó bensaun ba Abraão neʼebé simu ona promesa sira. 7 No ita la bele nega katak ida neʼebé kiʼik liu simu bensaun husi ida neʼebé boot liu. 8 No ema Levi neʼebé simu impostu, sira sei mate, maibé kona-ba mane ida seluk neʼebé simu ona impostu, Eskritura fó sasin kona-ba nia katak nia moris. 9 No, ita bele dehan katak Levi neʼebé simu impostu, nia mós selu ona impostu liuhusi Abraão, 10 tanba nia sei iha hela nia beiʼala Abraão nia isin bainhira Melkizedek hasoru Abraão.

11 Arranju kona-ba amlulik levita nian mak parte ida husi Ukun-Fuan neʼebé fó ona ba povu. Nuneʼe, se amlulik levita nian bele halo povu sai sala-laek, entaun tansá mak presiza amlulik seluk atu mosu mai, ida neʼebé sai nuʼudar amlulik tuir dalan Melkizedek nian no laʼós tuir dalan Aarão nian? 12 Kuandu arranju amlulik nian troka, ukun-fuan mós tenke troka. 13 Tanba buat sira-neʼe koʼalia kona-ba mane ida neʼebé mai husi suku seluk, suku neʼebé seidauk iha ema ida neʼebé halaʼo knaar iha altár. 14 No klaru katak ita-nia Naʼi mai husi Judá, maibé Moisés la fó sai buat ida kona-ba amlulik sira husi suku neʼe.

15 No ida-neʼe sai klaru liu kuandu amlulik ida seluk mosu mai, amlulik neʼebé hanesan ho Melkizedek. 16 Nia sai amlulik laʼós liuhusi ukun-fuan neʼebé tuir deʼit jerasaun iha isin, maibé liuhusi kbiit neʼebé fó ba nia moris neʼebé la bele lakon. 17 Tanba iha sasin kona-ba nia dehan: “Ó mak amlulik ba nafatin tuir dalan Melkizedek nian.”

18 Entaun, mandamentu uluk nian hasai tiha tanba ida-neʼe fraku no la iha folin. 19 Basá Ukun-Fuan la halo buat ida sai kompletu, maibé esperansa diʼak liu neʼebé Maromak fó halo kompletu, no liuhusi neʼe mak ita hakbesik ba Maromak. 20 No mós, ho juramentu mak Maromak fó knaar ba Jesus nuʼudar amlulik. 21 Basá iha duni ema neʼebé sai ona amlulik no Maromak la halo juramentu kona-ba sira, maibé iha ema ida neʼebé sai amlulik liuhusi Maromak nia juramentu no Maromak koʼalia kona-ba nia kuandu nia dehan: “Jeová jura ona, no nia sei la muda nia hanoin: ‘Ó mak amlulik ba nafatin’”, 22 tan neʼe mak Maromak fó ona Jesus nuʼudar garantia ba aliansa neʼebé diʼak liu. 23 Liután neʼe, ema barak sai amlulik no ida troka fali ida seluk tanba mate hanetik sira atu kontinua halaʼo knaar neʼe, 24 maibé tanba nia kontinua moris nafatin, la iha ida mak sei troka fali ninia knaar nuʼudar amlulik. 25 Tan neʼe mak nia bele fó salvasaun neʼebé kompletu ba ema sira neʼebé hakbesik ba Maromak liuhusi nia, basá nia moris nafatin hodi harohan ba sira.

26 Tuir loloos, diʼak duni ba ita atu iha amlulik boot hanesan neʼe neʼebé laran-metin, laran-moos, la iha foʼer ida, ketak husi sala-naʼin sira, no foti aas liu fali lalehan. 27 La hanesan ho amlulik boot sira seluk, nia la presiza atu hasaʼe sakrifísiu loron-loron, ulukliu ba ninia sala rasik no tuirmai ba povu sira, tanba nia halo ida-neʼe dala ida deʼit ba nafatin kuandu nia hasaʼe ninia an rasik nuʼudar sakrifísiu. 28 Tanba Ukun-Fuan hili ema neʼebé iha fraku atu sai nuʼudar amlulik, maibé juramentu neʼebé hatoʼo depois Ukun-Fuan hili Oan-Mane, ida neʼebé sai kompletu ona ba nafatin.

8 No ida-neʼe mak pontu importante husi buat neʼebé ita koʼalia daudaun: Ita iha amlulik boot hanesan neʼe, no nia tuur ona iha Maromak kmanek liu nia liman sorin loos iha lalehan, 2 no serbí nuʼudar atan iha fatin santu no iha tenda neʼebé loos, neʼebé Jeová rasik mak harii, laʼós ema. 3 Tanba amlulik boot ida-idak simu knaar atu hasaʼe prezente no sakrifísiu; tan neʼe amlulik boot neʼe mós presiza buat ruma atu hasaʼe. 4 No se nia iha rai neʼe, nia la bele sai nuʼudar amlulik ida, tanba iha ona ema neʼebé hasaʼe prezente sira tuir Ukun-Fuan. 5 Maibé ema sira-neʼe halo serbisu santu neʼebé nuʼudar ezemplu no lalatak husi buat neʼebé lalehan nian; basá kuandu Moisés besik ona atu harii tenda, nia simu Maromak nia mandamentu neʼebé dehan: “Haree bá katak ó halo buat hotu tuir sira-nia modelu neʼebé hatudu ona ba ó iha foho leten.” 6 Maibé agora Jesus simu ona knaar kmanek liu, tanba nia mós mediadór* ba aliansa neʼebé diʼak liu; aliansa neʼe mak tuir lei no harii metin tiha liuhusi promesa sira neʼebé diʼak liu.

7 Se aliansa uluk nian neʼe la iha sala, entaun la presiza tan aliansa segundu. 8 Basá nia hetan ona sala iha ema sira-neʼe kuandu nia dehan: “‘Haree! Iha loron sira neʼebé atu mai’, Jeová dehan. ‘Haʼu sei halo aliansa foun ho umakain Izraél nian no umakain Judá nian. 9 Aliansa neʼe sei la hanesan ho aliansa neʼebé haʼu halo ona ho sira-nia beiʼala sira iha loron neʼebé haʼu kaer sira-nia liman no lori sira sai husi rai-Ejitu; basá sira la kontinua atu laran-metin ba haʼu-nia aliansa, no tan neʼe haʼu para ona atu tau matan ba sira’, Jeová dehan.”

10 “‘Basá ida-neʼe mak aliansa neʼebé haʼu sei halo ho umakain Izraél nian depois loron sira-neʼe’, Jeová dehan. ‘Haʼu sei tau haʼu-nia ukun-fuan iha sira-nia neon, no haʼu sei hakerek neʼe iha sira-nia laran. No haʼu sei sai sira-nia Maromak no sira sei sai haʼu-nia povu.

11 “‘No sira sei la hanorin tan sira ida-idak nia maluk no sira ida-idak nia maun ka alin, hodi dehan: “Ó tenke hatene Jeová!” Tanba sira hotu sei hatene haʼu, husi ida neʼebé kiʼik toʼo ida neʼebé boot. 12 Tanba haʼu sei hatudu laran-sadiʼa ba sira-nia hahalok neʼebé la loos, no haʼu sei nunka hanoin fali sira-nia sala sira.’”

13 Tanba nia koʼalia kona-ba “aliansa foun”, neʼe katak nia halo aliansa uluk nian la vale ona. No ida neʼebé la vale ona no tuan ona besik atu mohu.

9 Aliansa uluk nian iha lei sira kona-ba oinsá atu halaʼo serbisu santu no iha mós fatin santu iha rai neʼe. 2 Tanba sira harii tenda ho parte rua, no iha parte primeiru sira tau ahi-oan no mós meza no paun neʼebé santu; no parte neʼe bolu nuʼudar “Fatin Santu”. 3 Maibé iha kortina segundu nia kotuk iha tenda neʼe mak fatin laran liu neʼebé bolu nuʼudar “Fatin Santu Liu Hotu”. 4 Parte neʼe iha fatin insensu* nian neʼebé halo husi osan-mean no iha arka aliansa nian neʼebé taka hotu ho osan-mean, no iha arka neʼe nia laran iha buli osan-mean neʼebé iha maná,* no arka neʼe mós iha Aarão nia ai-tonka neʼebé iha dikin no iha fatuk-belar aliansa nian; 5 no iha arka neʼe nia leten iha kerubín sira neʼebé kmanek hodi hamahan arka nia matan.* Maibé agora laʼós tempu atu esplika informasaun barak kona-ba buat sira-neʼe.

6 No depois buat sira-neʼe harii tiha hanesan neʼe, amlulik sira tama beibeik ba parte primeiru iha tenda neʼe atu halaʼo serbisu santu; 7 maibé amlulik boot mesak deʼit mak tama ba parte segundu iha tenda neʼe tinan ida dala ida, no nia tenke lori raan, neʼebé nia hasaʼe ba ninia an rasik no ba sala sira neʼebé povu halo la ho neon. 8 Nuneʼe, espíritu santu hatudu ho klaru katak dalan atu tama ba fatin santu seidauk loke bainhira sei iha hela tenda primeiru. 9 Tuir loloos, tenda neʼe sai nuʼudar ilas ba tempu agora nian, no tuir arranju ida-neʼe ema hasaʼe prezente no sakrifísiu ba Maromak. Maibé, buat sira-neʼe la halo ema neʼebé halaʼo serbisu santu sai laran* moos iha dalan neʼebé kompletu. 10 Basá buat sira-neʼe kona-ba ai-han deʼit no mós kona-ba hemu no kona-ba batizmu oioin.* Buat sira-neʼe mak ukun-fuan kona-ba buat isin nian no tenke halo tuir toʼo tempu neʼebé hili tiha ona atu halo loos buat hotu.

11 Maibé, Kristu mai nuʼudar amlulik boot hodi lori buat diʼak neʼebé agora ita hetan ona, no nia tama liuhusi tenda neʼebé kmanek liu no kompletu liu neʼebé laʼós ema nia liman mak halo, katak, laʼós parte husi kriasaun neʼe; 12 nia tama ba fatin santu laʼós ho bibi-timur ka ho karau-oan nia raan, maibé ho ninia raan rasik, dala ida deʼit ba nafatin, no nia salva ita ba nafatin. 13 Basá se bibi-timur nia raan no karau-aman nia raan no mós ahi-kadesan karau nian neʼebé hisik ba ema neʼebé foʼer ona mak hamoos sira iha isin, 14 entaun Kristu nia raan iha folin neʼebé boot liután, tanba nia hasaʼe ninia an ba Maromak la ho sala ida liuhusi espíritu neʼebé iha ba nafatin, ho ida-neʼe nia hamoos ita-nia laran husi hahalok neʼebé lori ba mate atu nuneʼe ita bele halaʼo serbisu santu ba Maromak neʼebé moris.

15 Tan neʼe mak nia sai nuʼudar mediadór* ba aliansa foun, hodi nuneʼe, sira neʼebé Maromak bolu ona bele simu promesa atu hetan liman-rohan neʼebé ba nafatin. Sira bele hetan buat sira-neʼe tanba ninia mate, no liuhusi ninia sakrifísiu neʼe mak sira sai livre husi sala neʼebé sira halo bainhira sira sei iha aliansa uluk nian nia okos. 16 Basá, se iha aliansa ida, ema neʼebé halo aliansa neʼe* presiza duni mate. 17 Aliansa ida sai vale liuhusi ema ida nia mate, tanba aliansa neʼe laiha folin durante ema neʼebé halo aliansa neʼe sei moris hela. 18 Tuir loloos, aliansa uluk nian mós sai vale liuhusi raan. 19 Kuandu Moisés fó sai tiha ukun-fuan hotu ba povu, nia foti karau-oan no bibi-timur nia raan hodi kahur hamutuk ho bee, no nia uza bibi-fulun mean no mós ai-hissopo atu hisik ba livru ukun-fuan nian no ba ema hotu, 20 hodi dehan: “Neʼe mak raan aliansa nian neʼebé Maromak haruka imi atu halo tuir.” 21 No nia mós hisik raan ba tenda no ba buat hotu neʼebé uza atu halo serbisu santu. 22 Sin, tuir Ukun-Fuan besik buat hotu hamoos ho raan, no sei la iha perdua ba sala se raan la fakar sai.

23 Entaun, buat neʼebé nuʼudar ilas husi buat lalehan nian tenke sai moos liuhusi buat sira-neʼe, maibé buat lalehan nian presiza sakrifísiu neʼebé diʼak liu. 24 Tanba Kristu tama ona, laʼós iha fatin neʼebé ema halo ho liman, neʼebé nuʼudar ilas ba buat neʼebé loos, maibé tama iha lalehan, no agora nia iha Maromak nia oin ba ita-nia diʼak. 25 Neʼe laʼós atu hasaʼe ninia an beibeik nuʼudar sakrifísiu, hanesan amlulik sira neʼebé tama ba fatin santu tinan-tinan hodi lori raan neʼebé laʼós sira-nian rasik. 26 Se lae karik, nia tenke terus beibeik husi mundu hahú.* Maibé agora nia hatudu ona nia an dala ida ba nafatin iha tempu neʼe nia rohan atu halakon sala liuhusi ninia sakrifísiu rasik. 27 No ema ida-idak mate dala ida deʼit, maibé depois neʼe simu tesi-lia, 28 nuneʼe mós Kristu hasaʼe ninia an nuʼudar sakrifísiu dala ida deʼit ba nafatin atu lori ema hotu nia sala; no kuandu nia mosu mai ba dala segundu, neʼe laʼós ba ema nia sala, maibé atu salva sira neʼebé buka nia ho laran-manas.

10 Ukun-Fuan mak nuʼudar ilas ba buat diʼak neʼebé atu mai, maibé laʼós buat diʼak neʼe rasik, tan neʼe ema nunka bele sai nuʼudar ema loos hodi kontinua hasaʼe sakrifísiu neʼebé hanesan tinan-tinan. 2 Se sakrifísiu bele halo sira sai nuʼudar ema loos, entaun la presiza atu hasaʼe sakrifísiu seluk tan, basá neʼe katak sira neʼebé halo serbisu santu sai moos ona dala ida ba nafatin hodi la sente sala tan. 3 Maibé, sakrifísiu sira neʼebé hasaʼe tinan-tinan halo sira hanoin-hetan kona-ba sala, 4 tanba karau-oan no bibi-timur nia raan la bele hasai sala.

5 Nuneʼe, kuandu nia mai iha mundu, nia dehan ba Maromak: “‘Ita lakohi simu sakrifísiu no prezente; maibé Ita prepara isin-lolon mai haʼu. 6 Ita la haksolok ho sakrifísiu sunu nian no sakrifísiu sala nian.’ 7 No haʼu dehan: ‘Haree! Oh, Maromak, haʼu mai ona atu halo Ita-nia hakarak, hanesan hakerek nanis ona iha livru kona-ba haʼu.’” 8 Nia fó sai uluk dehan: “Ita lakohi simu no la haksolok ho sakrifísiu no prezente sira no sakrifísiu sunu nian no sakrifísiu sala nian”, katak sakrifísiu sira neʼebé ema hasaʼe tuir Ukun-Fuan. 9 Tuirmai, nia dehan: “Haree! Haʼu mai ona atu halo Ita-nia hakarak.” Nia halakon tiha ida uluk atu nuneʼe harii fali ida segundu. 10 No ho Maromak nia “hakarak” neʼe ita sai santu liuhusi Jesus Kristu nia isin neʼebé nia hasaʼe nuʼudar sakrifísiu dala ida ba nafatin.

11 No mós, loron ba loron amlulik ida-idak halaʼo nia knaar atu serbí no hasaʼe beibeik sakrifísiu neʼebé hanesan, neʼebé la bele halakon ema nia sala iha dalan kompletu. 12 Maibé mane neʼe hasaʼe sakrifísiu ida deʼit ba sala sira ba nafatin no tuur ona iha Maromak nia liman-loos; 13 hahú husi tempu neʼebá, nia hein toʼo ninia inimigu sira tau tiha iha ninia ain okos. 14 Basá, liuhusi sakrifísiu ida deʼit mak nia halo ona sira neʼebé santu atu sai nuʼudar ema loos ba nafatin. 15 Liután neʼe, espíritu santu mós fó sasin ba ita hodi dehan: 16 “‘Neʼe mak aliansa neʼebé haʼu sei halo ho sira depois loron sira-neʼe’, Jeová dehan. ‘Haʼu sei tau haʼu-nia ukun-fuan sira iha sira-nia laran, no haʼu sei hakerek neʼe iha sira-nia neon’”, 17 no tuirmai dehan: “No haʼu sei nunka hanoin fali sira-nia sala sira no haʼu sei la hanoin-hetan sira-nia hahalok neʼebé la loos.” 18 Se Maromak fó ona perdua ba sala sira-neʼe hotu, entaun la presiza tan hasaʼe sakrifísiu ba sala.

19 Neʼe duni, maun-alin sira, liuhusi Jesus nia raan, ita la taʼuk atu laʼo iha dalan neʼebé lori ita tama ba fatin santu. 20 No dalan neʼebé nia loke ona ba ita mak dalan foun neʼebé lori ita ba moris. No nia halo ida-neʼe hodi tama liuhusi kortina, neʼe katak, ninia isin. 21 No mós ita iha amlulik boot liu neʼebé tau matan ba Maromak nia uma, 22 tan neʼe mai ita hakbesik Maromak ho laran tomak no fiar tomak, tanba ita-nia fuan sai moos ona husi laran* neʼebé aat, no ita fase tiha ona ita-nia isin ho bee moos. 23 Mai ita kontinua fó sai ba ema hotu kona-ba ita-nia esperansa hodi la namlele, tanba ida neʼebé fó ita promesa neʼe mak laran-metin. 24 No mai ita hanoin malu hodi ajuda malu atu hatudu domin no hahalok diʼak, 25 no maski ema balu sai toman atu la halibur hamutuk, maibé imi keta haluha atu halibur an hamutuk, no fó laran-manas ba malu, liuliu nuʼudar imi haree loron neʼe besik ona mai.

26 Se ita simu ona matenek neʼebé loloos kona-ba lia-loos, maibé tuirmai ita kontinua halo sala ho neon, sei la iha tan sakrifísiu ba sala, 27 maibé ita sei hein ba kastigu ho laran-taʼuk no hein ba hirus neʼebé lakan hanesan ahi, neʼebé sei han mohu ema sira neʼebé kontra. 28 Ema neʼebé la halo tuir ukun-fuan Moisés nian tenke mate no la hetan laran-sadiʼa kuandu iha sasin naʼin-rua ka tolu. 29 Entaun, tuir imi-nia hanoin, se ema hakribi Maromak nia Oan-Mane, no haree raan aliansa nian neʼebé halo ema neʼe santu ona nuʼudar buat baibain deʼit, no se nia la hatudu respeitu ba Maromak nia espíritu neʼebé nia uza atu fó laran-diʼak neʼebé boot, ema neʼe merese simu kastigu boot oinsá? 30 Tanba ita hatene Maromak neʼebé dehan: “Haʼu mak iha direitu atu selu fali; haʼu sei selu fali”; no dala ida tan nia dehan: “Jeová sei tesi lia ba ninia povu.” 31 Tuir loloos, monu ba Maromak moris nia liman mak buat neʼebé halo ita taʼuk tebetebes.

32 Maibé, kontinua hanoin-hetan loron uluk nian, iha neʼebé imi hetan terus no tahan liuhusi koko oioin depois imi simu tiha naroman. 33 Iha tempu neʼebá, dala ruma ema hamoe imi no fó-terus ba imi iha ema barak nia oin, no dala ruma imi sai parte ho sira neʼebé hetan terus hanesan neʼe. 34 Basá imi hatudu domin ba sira neʼebé iha komarka laran no imi la lakon imi-nia ksolok kuandu ema hadau imi-nia sasán, tanba hatene katak imi hetan rikusoin neʼebé diʼak liu no ba nafatin.

35 Tan neʼe, keta lakon imi-nia aten-brani atu koʼalia, neʼebé sei lori bensaun barak ba imi. 36 Basá imi presiza atu tahan, atu nuneʼe, depois imi halo tiha Maromak nia hakarak, imi bele simu buat neʼebé nia promesa ona. 37 Tanba “tempu uitoan deʼit ona”, no “nia neʼebé atu mai sei toʼo no nia sei la demora”. 38 “Maibé haʼu-nia atan neʼebé laran-loos sei moris liuhusi fiar”, no “se nia dada an, haʼu* sei la kontente ho nia”. 39 No ita laʼós ema neʼebé dada an, neʼebé lori ba mate, maibé ita mak ema neʼebé iha fiar, neʼebé lori ita atu kontinua moris.

11 Se ita iha fiar, ita sei laran-metin katak ita-nia esperansa sei sai loos no ita sei la duvida katak buat neʼebé ita fiar mak loos, maski neʼe la bele haree. 2 Tanba liuhusi fiar mak Maromak hatudu ba ema iha tempu uluk katak nia simu sira.

3 No liuhusi fiar mak ita hatene katak Maromak halo buat hotu iha lalehan no rai liuhusi ninia liafuan, atu nuneʼe buat neʼebé bele haree mosu mai liuhusi buat neʼebé labele haree.

4 Liuhusi fiar mak Abel hasaʼe ba Maromak sakrifísiu ida neʼebé folin-boot liu fali Caim nian, no liuhusi fiar neʼe mak nia simu sasin katak nia ema loos, tanba Maromak fó sasin hodi simu ninia prezente sira; no maski nia mate ona, maibé nia koʼalia hela liuhusi ninia fiar.

5 Liuhusi fiar mak Enoc la haree mate tanba Maromak foti tiha nia, no ema la hetan tan nia tanba Maromak foti nia; maibé antes foti nia, Maromak fó sasin katak Enoc halo nia laran kontente. 6 Liután neʼe, se fiar la iha, ita la bele halo Maromak nia laran kontente. Basá ema neʼebé hakbesik ba Maromak tenke fiar katak Maromak iha, no fiar mós katak Maromak sei fó kolen ba sira neʼebé buka nia ho laran.

7 Liuhusi fiar mak Noé hatudu hamtaʼuk ba Maromak no halo ró* hodi salva nia umakain bainhira simu tiha avizu kona-ba buat neʼebé seidauk haree; no liuhusi fiar neʼe, nia hatudu katak mundu neʼe aat, no Maromak haree nia nuʼudar ema loos tanba ninia fiar.

8 Liuhusi fiar mak Abraão halo tuir Maromak bainhira Maromak bolu nia, no nia laʼo ba fatin neʼebé Maromak promete atu fó ba nia nuʼudar liman-rohan; no nia husik nia rai rasik, maski nia la hatene atu bá loos neʼebé. 9 Liuhusi fiar mak nia hela nuʼudar ema estranjeiru iha rai seluk, iha rai neʼebé Maromak promete ona, no nia hela iha tenda hamutuk ho Isaac no Jacob, neʼebé mós sai nuʼudar liman-rohan naʼin ba promesa neʼebé hanesan. 10 Tanba nia hein hela sidade neʼebé iha hun metin, no ida neʼebé halo planu ba sidade neʼe no harii sidade neʼe mak Maromak.

11 Liuhusi fiar mak Sara mós sai isin-rua,* maski ninia tinan liu ona, tanba nia hatene katak ida neʼebé fó promesa neʼe mak laran-metin. 12 Tan razaun neʼe, liuhusi mane ida mak oan sira moris mai maski mane neʼe haree hanesan la bele ona atu iha oan;* no oan sira-neʼe sai barak hanesan fitun iha lalehan no hanesan rai-henek iha tasi-ibun, neʼebé la bele sura.

13 Ema sira-neʼe hotu mate iha fiar; no maski sira la haree promesa sira-neʼe sai loos, maibé sira haree neʼe husi dook no haksolok ho promesa sira-neʼe, no sira fó sai iha ema hotu nia oin katak sira mak ema estranjeiru no hela nuʼudar sidadaun temporáriu iha rai neʼe. 14 Tanba sira neʼebé koʼalia buat sira-neʼe hatudu ho klaru katak sira buka ho laran-manas ba fatin neʼebé sei sai nuʼudar sira-nia hela-fatin rasik. 15 No tuir loloos, se sira hanoin beibeik kona-ba fatin neʼebé sira husik, sira bele iha oportunidade atu fila fali. 16 Maibé, sira hakaʼas an atu hetan fatin neʼebé diʼak liu, neʼe mak, fatin lalehan nian. Tan neʼe mak Maromak la moe kuandu sira bolu nia nuʼudar sira-nia Maromak, no nia prepara ona sidade ida ba sira.

17 Liuhusi fiar mak Abraão besik atu hasaʼe Isaac kuandu Maromak koko nia; no Abraão, ida neʼebé ho haksolok simu ona promesa sira, komesa atu hasaʼe ninia oan-mane mesak ba Maromak 18 maski Maromak fó-hatene ona ba nia dehan: “Ida neʼebé bolu nuʼudar ‘ó-nia bei-oan’ sei mai husi Isaac.” 19 Maibé nia hanoin katak Maromak bele halo Isaac moris fali husi mate; no nia simu fali duni Isaac husi mate, no ida-neʼe sai hanesan ezemplu kona-ba buat neʼebé sei mosu iha futuru.

20 Liuhusi fiar mak Isaac mós fó bensaun ba Jacob no Esau kona-ba buat neʼebé atu mai.

21 Liuhusi fiar mak Jacob fó bensaun ba José nia oan-mane ida-idak, kuandu nia besik ona atu mate; no nia adora Maromak nuʼudar nia sadere ba ninia ai-tonka.

22 Liuhusi fiar mak José, kuandu nia besik ona atu mate, nia koʼalia kona-ba tempu neʼebé Izraél nia oan sira sai husi Ejitu; no nia fó matadalan kona-ba oinsá atu hakoi nia.

23 Liuhusi fiar mak Moisés nia inan-aman subar nia ba fulan tolu depois nia moris mai, tanba sira haree katak labarik neʼe bonitu no sira la taʼuk liurai nia lei. 24 Liuhusi fiar mak Moisés la simu atu ema bolu nia nuʼudar oan husi Liurai Ejitu nia oan-feto kuandu nia sai boot ona. 25 Nia hili atu hetan terus hamutuk ho Maromak nia povu duké hetan ksolok ba tempu uitoan iha sala laran, 26 tanba nia haree katak moe neʼebé nia hetan nuʼudar Kristu iha folin boot liu fali rikusoin Ejitu nian; basá nia hateke loloos ba kolen neʼebé nia atu simu. 27 Liuhusi fiar mak nia husik Ejitu hodi la taʼuk liurai nia hirus, basá nia kontinua hamriik metin hanesan haree Ida neʼebé matan la haree. 28 Liuhusi fiar mak nia selebra Festa Salvasaun nian hodi hisik animál nia raan, atu nuneʼe Maromak nia anju sei la oho sira-nia oan primeiru.

29 Liuhusi fiar mak sira hakur Tasi Mean hanesan laʼo iha rai-maran, maibé kuandu ema Ejitu sira koko atu halo tuir, sira mout hotu.

30 Liuhusi fiar mak moru Jerikó monu depois ema Izraél marxa haleʼu tiha ba loron hitu. 31 Liuhusi fiar mak feto-aat Rahab la lakon hamutuk ho sira neʼebé la halo tuir, tanba nia simu espiaun sira ho dame.

32 No haʼu sei koʼalia tan kona-ba sé? Basá la iha tempu ba haʼu atu konta kona-ba Jideaun, Barake, Sansão, Jefte, David, Samuel, no mós profeta sira seluk. 33 Liuhusi fiar mak sira manán liurai sira iha funu, halo buat neʼebé loos, simu promesa, no taka leaun nia ibun. 34 No ahi-lakan mós la han sira; no sira sees husi surik, hetan fali kbiit boot kuandu sira fraku, sai kbiit boot iha funu, no manán tropa sira husi rai seluk. 35 Feto sira simu fali sira-nia família neʼebé mate ona liuhusi moris-hiʼas; maibé mane seluk hetan terus tanba sira lakohi husik sira-nia fiar hodi sai livre, basá sira buka atu hetan moris-hiʼas neʼebé diʼak liu. 36 Sin, ema seluk simu terus tanba ema hamoe sira no baku sira ho xikote, no liután neʼe, ema kesi sira ho korrente no hatama iha dadur. 37 Ema tuda sira, koko sira, ema kadoo sira ba rua, ema oho sira ho surik, sira hatais bibi-malae no bibi-timur nia kulit; sira kuran buat neʼebé presiza, sira iha terus laran, ema halo aat ba sira; 38 no mundu la merese ba sira. Sira laʼo bá-mai iha rai-fuik no iha foho sira no iha fatuk-kuak no rai-kuak sira.

39 Kona-ba ema sira-neʼe hotu, Maromak fó sasin katak sira halo nia laran-kontente tanba sira-nia fiar, maibé sira la haree promesa neʼe sai loos. 40 Basá Maromak hanoin nanis ona atu fó buat neʼebé diʼak liu ba ita, hodi nuneʼe sira labele sai kompletu antes ita.*

12 Entaun, tanba ita iha sasin barak neʼebé haleʼu ita hanesan kalohan, mai ita soe tiha buat hotu neʼebé hatodan ita no mós soe tiha sala neʼebé bele kaer metin ita, no mai ita hakaʼas an atu halai toʼo rohan iha halai-taru neʼebé Maromak tau ona iha ita-nia oin, 2 nuʼudar ita hateke didiʼak ba Jesus, Ida neʼebé halo kompletu ita-nia fiar no ita-nia Naʼi-Ulun ba fiar. Tanba ksolok neʼebé tau ona iha nia oin, nia tahan iha ai-riin terus nian hodi la sente moe, no tuur ona iha Maromak nia kadunan nia sorin loos. 3 Neʼe duni, hanoin didiʼak toʼok kona-ba ida neʼebé tahan ona liafuan makaʼas husi ema sala-naʼin neʼebé lori kastigu ba sira-nia an rasik, atu nuneʼe imi labele sai kole no laran-tun.

4 Imi luta daudaun hasoru sala neʼe, maibé imi seidauk halo funu toʼo fakar imi-nia raan, 5 no imi haluha ona avizu neʼebé fó sai ba imi nuʼudar oan sira: “Haʼu-nia oan, keta fila kotuk ba dixiplina husi Jeová, no keta sente laran-tun kuandu nia korrije ó; 6 tanba Jeová fó dixiplina ba sira neʼebé nia hadomi; tuir loloos, nia fó kastigu ba ema ida-idak neʼebé nia simu nuʼudar ninia oan.”

7 Imi presiza atu tahan tanba neʼe mak parte husi imi-nia dixiplina. Maromak haree imi nuʼudar oan sira. No oan ida neʼebé mak ninia aman la fó dixiplina? 8 No se imi hotu la simu dixiplina neʼe, imi laʼós ninia oan tuir lei, katak laʼós oan loloos. 9 Liután neʼe, ita-nia aman iha rai fó dixiplina ba ita, no ita respeitu ba sira. Tan neʼe, atu bele moris, ita tenke prontu liután atu hakruʼuk an ba ita-nia Aman neʼebé hili ita ho espíritu, loos ka lae? 10 Tanba sira fó dixiplina ba ita tempu uitoan deʼit hodi tuir buat neʼebé diʼak ba sira, maibé Maromak halo nuneʼe ba ita-nia diʼak atu ita bele sai santu hanesan nia. 11 Loloos, dixiplina hotu la lori ksolok iha tempu neʼe, só halo moras deʼit; maibé ikusmai sira neʼebé simu treinu husi dixiplina neʼe sei fó fuan dame nian, katak hahalok loos.

12 Tan neʼe, halo loos imi-nia liman neʼebé kbiit-laek no imi-nia ain-tuur neʼebé fraku, 13 no kontinua halo loos dalan ba imi-nia ain, atu nuneʼe ida neʼebé kudeʼik la sai aat liután, maibé bele sai diʼak fali. 14 Buka dame ho ema hotu, no hakaʼas an atu sai santu, basá se ema ida la sai santu nia sei la haree Naʼi. 15 Haree didiʼak bá atu ema ida la lakon Maromak nia laran-diʼak neʼebé boot; no atu nuneʼe ai-abut neʼebé iha venenu la mosu iha imi-nia leet hodi lori problema no halo ema barak sai foʼer; 16 atu iha imi-nia leet la iha ema neʼebé halo sala-foʼer ka ema neʼebé la hafolin buat neʼebé santu, hanesan Esaú, neʼebé faʼan tiha ninia direitu nuʼudar oan primeiru hodi troka fali ai-han ba dala ida nian. 17 Tanba imi hatene katak ikusmai kuandu nia hakarak atu simu fali bensaun neʼe, ninia aman la fó ba nia, no maski nia hakaʼas an atu troka desizaun neʼe ho matan-been, nia la hetan ida-neʼe.

18 Imi laʼós hakbesik ba buat neʼebé imi bele kaer no neʼebé lakan ho ahi, no neʼebé iha kalohan nakukun ida no nakukun tebes no anin makaʼas, 19 ho trombeta nia tarutu no ho lian neʼebé koʼalia ba povu; no kuandu povu rona lian neʼe, sira husu makaʼas atu lian neʼe la koʼalia tan ba sira. 20 Tanba sira sai taʼuk loos ho mandamentu neʼebé dehan: “Maski se animál ida mak kona foho neʼe, tenke tuda mate nia ho fatuk.” 21 No buat neʼebé mosu halo ema taʼuk tebes toʼo Moisés mós dehan: “Haʼu taʼuk loos no nakdedar.” 22 Maibé imi hakbesik ona ba Foho Siaun no Maromak moris nia sidade, katak Jeruzalein lalehan nian, no ba anju rihun ba rihun 23 neʼebé halibur hamutuk, no ba kongregasaun husi sira neʼebé moris uluk neʼebé sira-nia naran hakerek ona iha lalehan, no hakbesik ba Maromak neʼebé Tesi-Lia Naʼin ba buat hotu, no hakbesik ba ema loos sira neʼebé iha moris liuhusi espíritu santu no sai kompletu ona, 24 no ba Jesus neʼebé mediadór* ba aliansa foun, no ba raan neʼebé hisik ona, neʼebé diʼak liu fali Abel nia raan.

25 Haree bá katak imi rona didiʼak ba nia neʼebé koʼalia daudaun. Basá sira neʼebé uluk la rona ba ida neʼebé fó sai Maromak nia avizu iha mundu, sira la halai-sees husi kastigu. Entaun, oinsá liután ho ita? Ita la bele halai-sees se ita fila kotuk ba nia neʼebé koʼalia husi lalehan. 26 Iha tempu neʼebá, ninia lian halo rai nakdoko, maibé agora nia promete: “No dala ida tan haʼu sei doko, laʼós deʼit rai maibé mós lalehan.” 27 No liafuan “dala ida tan” hatudu katak Maromak sei hasai tiha buat neʼebé nakdoko, katak buat sira neʼebé laʼós Maromak mak halo, atu nuneʼe buat neʼebé la nakdoko bele hela nafatin. 28 Entaun, tanba ita atu simu ukun neʼebé la nakdoko, mai ita kontinua haksolok ho Maromak nia laran-diʼak neʼebé boot, basá liuhusi neʼe mak ita bele halo serbisu santu neʼebé monu loos ba Maromak nia laran ho hamtaʼuk no nakdedar. 29 Tuir loloos, ita-nia Maromak mak hanesan ahi neʼebé han mohu hotu.

13 Kontinua hadomi malu nuʼudar maun-alin. 2 Keta haluha atu hatudu laran-diʼak,* tanba liuhusi neʼe mak ema balu simu anju sira, maski sira rasik la hatene. 3 Kontinua hanoin kona-ba sira neʼebé iha dadur laran hanesan imi mós tama dadur hamutuk ho sira, no hanoin sira neʼebé ema fó susar, tanba imi rasik mós iha isin-lolon hanesan sira.* 4 Ema hotu tenke respeitu moris kaben nian, no keta hafoʼer relasaun kaben nian, tanba Maromak sei tesi lia ba foin-saʼe sira no kaben-naʼin sira neʼebé halo sala-foʼer. 5 Imi-nia moris tenke livre husi domin ba osan, no haksolok bá ho buat neʼebé imi iha. Tanba nia dehan ona: “Haʼu sei nunka husik ó no haʼu sei nunka fila kotuk ba ó.” 6 Atu nuneʼe ita bele sai aten-brani liu no dehan: “Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?”

7 Hanoin-hetan sira neʼebé dirije imi iha imi-nia leet, no neʼebé fó sai ona Maromak nia liafuan ba imi; no haree bá rezultadu diʼak husi sira-nia hahalok atu nuneʼe imi bele banati-tuir sira-nia fiar.

8 Jesus Kristu sei hanesan deʼit husi uluk, agora, no ba nafatin.

9 Keta husik hanorin oioin no hanorin oin-seluk lori imi ba dalan sala; tanba diʼak liu atu hametin imi-nia laran liuhusi Maromak nia laran-diʼak neʼebé boot duké liuhusi ai-han, neʼebé la lori buat diʼak ba sira neʼebé hanoin demais kona-ba neʼe.

10 Ita iha altár ida, no ema sira neʼebé halaʼo serbisu santu iha tenda labele han buat neʼebé iha altár neʼe nia leten. 11 Basá amlulik boot lori raan husi animál sira ba fatin santu nuʼudar sakrifísiu sala nian, no animál sira-neʼe nia isin-lolon sunu tiha iha liʼur dook husi fatin neʼebé ema hela. 12 Nuneʼe mós Jesus hetan terus iha odamatan boot nia liʼur hodi nuneʼe nia bele halo santu ema ho ninia raan rasik. 13 Entaun, mai ita laʼo ba liʼur atu hasoru nia, hodi lori moe neʼebé nia mós lori, 14 tanba iha neʼe ita la iha sidade neʼebé hela ba nafatin, maibé ita hakaʼas an atu hetan ida neʼebé atu mai. 15 Liuhusi nia mak ita tenke hasaʼe nafatin sakrifísiu hahiʼi nian ba Maromak, katak, uza ita-nia ibun hodi fó sai iha ema hotu nia oin kona-ba ninia naran. 16 Liután neʼe, keta haluha atu halo diʼak no fahe buat neʼebé imi iha ba ema seluk, tanba buat sira-neʼe hanesan sakrifísiu neʼebé monu loos ba Maromak nia laran.

17 Halo tuir sira neʼebé dirije imi iha imi-nia leet no hakruʼuk an bá, tanba sira kontinua tau matan ba imi-nia moris nuʼudar ema neʼebé sei hatán ba Maromak; atu nuneʼe sira bele halaʼo sira-nia knaar ho ksolok laʼós hodi obriga an, se lae karik ida-neʼe sei lori buat aat ba imi.

18 Kontinua halo orasaun ba ami, tanba ami fiar katak ami iha laran* neʼebé moos, no ami hakarak atu hatudu laran-moos iha buat hotu. 19 Maibé haʼu husu liuliu ba imi atu halo orasaun hodi haʼu bele fila fali ba imi lalais.

20 Maromak dame nian fó moris-hiʼas ba ita Naʼi Jesus husi mate, no Jesus mak bibi-atan boot no nia mós lori raan husi aliansa neʼebé ba nafatin. Haʼu harohan katak Maromak 21 fó ba imi buat diʼak hotu neʼebé imi presiza atu halo ninia hakarak. Atu nuneʼe, liuhusi Jesus Kristu, Maromak sei book ita atu halo buat neʼebé monu loos ba nia laran; ba nia mak glória ba nafatin. Amen.

22 Agora haʼu husu imi, maun-alin sira, atu rona ho pasiénsia ba liafuan sira-neʼe neʼebé haʼu hakerek atu fó laran-manas ba imi, tanba haʼu hakerek karta neʼe ho liafuan balu deʼit. 23 Hatene bá katak ita-nia alin Timóteo sai livre ona. No se nia toʼo lalais, ami sei laʼo hamutuk hodi bá haree imi.

24 Fó haʼu-nia kumprimentus ba sira hotu neʼebé dirije imi iha imi-nia leet no ba santu sira hotu. Sira neʼebé iha Itália haruka sira-nia kumprimentus ba imi.

25 Haʼu harohan ba Maromak atu haraik ninia laran-diʼak neʼebé boot ba imi hotu.

[Nota–rodapé]