Tiago

1 Husi Tiago, Maromak nia atan no mós Naʼi Jesus Kristu nia atan, ba suku sanulu-resin-rua neʼebé namkari iha raiklaran:

Kumprimentus!

2 Haʼu-nia maun-alin sira, haksolok bá kuandu imi hasoru susar oioin, 3 tanba imi hatene katak imi-nia fiar neʼebé hetan ona koko iha dalan neʼe sei halo metin liután imi-nia kbiit atu tahan. 4 No se imi-nia hahalok atu tahan treinu imi ho didiʼak, imi bele sai kompletu no sai diʼak iha buat hotu, hodi la kuran buat ida.

5 Tan neʼe, se imi ida presiza matenek, nia tenke kontinua husu ba Maromak, no ida-neʼe sei fó ba nia, basá Maromak fó ho laran-luak ba ema hotu hodi la siʼak. 6 Maibé nia tenke kontinua husu ho fiar no la laran-rua, tanba ema neʼebé laran-rua mak hanesan laloran tasi neʼebé anin huu bá-mai. 7 Tuir loloos, ema hanesan neʼe labele hanoin katak nia sei simu buat ida husi Jeová; 8 nia mak ema neʼebé namlele, no la metin iha ninia dalan sira.

9 Maun-alin sira neʼebé kiak tenke haksolok tanba agora sira hetan ona pozisaun neʼebé aas, 10 no ema neʼebé riku tenke haksolok tanba nia hetan pozisaun neʼebé kiʼik liu, basá hanesan ai-funan iha toʼos, nia sei lakon. 11 Tanba loro-matan saʼe no sai manas loos no sei halo namlaek ai-funan neʼe, no ninia funan sei monu no ninia furak sei lakon. Nuneʼe mós ho ema riku, nia sei lakon hamutuk ho ninia dalan moris nian.

12 Ksolok ba ema neʼebé kontinua tahan susar, basá kuandu Maromak simu ona nia, nia sei simu koroa moris nian, ida neʼebé Jeová promete ona ba sira neʼebé kontinua hadomi nia. 13 Kuandu iha susar laran, ema ida labele dehan: “Maromak koko haʼu.” Tanba ema ida la bele koko Maromak no nia mós la koko ema ida ho buat neʼebé aat. 14 Basá ema ida-idak hetan koko liuhusi ninia hakarak rasik neʼebé dada nia no lohi nia. 15 No kuandu hakarak neʼe sai buras ona, neʼe hamosu sala; no tuirmai, kuandu halo ona sala, neʼe lori ba mate.

16 Haʼu-nia maun-alin doben sira, keta husik ema lohi imi. 17 Prezente diʼak ida-idak no prezente hotu neʼebé kompletu mak husi leten, no tun mai husi ida neʼebé mak Aman ba naroman lalehan nian; nia la hanesan ho lalatak, no nia la muda ka la troka. 18 No nia fó moris ba ita liuhusi ninia liafuan lia-loos nian tanba neʼe mak ninia hakarak. Nia halo ida-neʼe atu ita bele sai hanesan ai-fuan primeiru husi ninia kriasaun sira.

19 Haʼu-nia maun-alin doben sira, imi hatene ida-neʼe bá: Ema ida-idak tenke lalais atu rona, neineik atu koʼalia, no neineik atu hirus; 20 tanba ema neʼebé sai hirus nunka halo buat neʼebé loos iha Maromak nia matan. 21 Tan neʼe, hasai tiha buat hotu neʼebé foʼer no hahalok aat neʼebé sai barak daudaun, no ho laran-maus simu liafuan neʼebé kuda iha imi, liafuan neʼebé bele salva imi-nia moris.*

22 Neʼe duni, imi tenke sai nuʼudar ema neʼebé halo tuir liafuan, laʼós nuʼudar ema neʼebé rona deʼit hodi lohi ninia an ho hanoin neʼebé sala. 23 Tanba ema neʼebé rona deʼit ba liafuan no la halo tuir, nia hanesan ema neʼebé haree nia oin iha espellu. 24 Nia haree ninia an no nia bá, tuirmai nia haluha kedas nia ema oinsá. 25 Maibé ema neʼebé hateke didiʼak ba ukun-fuan neʼebé kompletu no fó liberdade, no se ema neʼe kontinua fó laran tomak ba ida-neʼe, nia sai ona nuʼudar ema neʼebé halo tuir liafuan, laʼós nuʼudar ema neʼebé haluhadór, no nia sei haksolok hodi halo ida-neʼe.

26 Se ema ida hanoin katak nia adora Maromak, maibé la kontrola ninia nanál, nia bosok ninia laran rasik no ninia adorasaun mak saugati deʼit. 27 Adorasaun neʼebé moos no la foʼer iha ita-nia Maromak no Aman nia matan mak neʼe: tau matan ba oan-kiak sira no feto-faluk sira iha sira-nia susar, no kontinua hadook an husi mundu neʼe nia hahalok aat.

2 Haʼu-nia maun-alin sira, imi koko atu kahur fiar ba Naʼi Jesus Kristu, ita-nia glória, ho hahalok todan ba sorin ka? 2 Porezemplu, se ema naʼin-rua tama atu tuir imi-nia reuniaun, no sira ida hatais roupa neʼebé furak no tau kadeli osan-mean iha ninia liman, no ida seluk mak ema kiak neʼebé hatais roupa foʼer, 3 imi sei simu ho kontente ema neʼebé hatais roupa furak no dehan: “Ita-Boot tuur iha fatin diʼak neʼe”, no imi sei dehan ba ema kiak: “Ó hamriik deʼit”, ka dehan: “Tuur iha kadeira neʼe iha haʼu-nia ain okos.” 4 Neʼe katak imi haree ema ida diʼak liu fali ema seluk no imi komesa ona tesi lia iha dalan neʼebé aat, loos ka lae?

5 Rona bá, haʼu-nia maun-alin doben sira. Maromak hili sira neʼebé kiak tuir mundu nia haree atu sai riku iha fiar no atu simu ninia ukun neʼebé nia promete ona ba sira neʼebé hadomi nia, loos ka lae? 6 Maibé imi la hatudu respeitu ba kiak sira. Tuir loloos, ema riku sira mak hanehan imi no lori imi ba tribunál, loos ka lae? 7 Sira mak hafoʼer naran diʼak neʼebé imi lori, loos ka lae? 8 Entaun, se imi kumpre liurai nia ukun-fuan neʼebé boot liu hotu hodi tuir eskritura neʼebé dehan: “Ó tenke hadomi ó-nia maluk hanesan ó-nia an rasik”, imi halo buat neʼebé diʼak. 9 Maibé se imi kontinua todan ba sorin, imi halo sala, no ukun-fuan neʼe tesi lia ba imi katak imi halo sala.

10 Tanba ema neʼebé halo tuir Ukun-Fuan tomak, maibé halo sala hasoru ukun-fuan ida deʼit, nia sai ona nuʼudar kontradór ba ukun-fuan hotu. 11 Basá ida neʼebé dehan: “Ó keta halo sala-foʼer”,* nia mós dehan: “Ó keta oho.” Entaun, se ó la halo sala-foʼer maibé ó oho ema, ó kontra ona ukun-fuan. 12 Kontinua koʼalia no halaʼo imi-nia moris nuʼudar ema sira neʼebé sei hetan tesi-lia tuir ukun-fuan neʼebé fó liberdade. 13 Basá sira neʼebé la hatudu laran-sadiʼa sei simu tesi-lia la ho laran-sadiʼa. Laran-sadiʼa mak manán tesi-lia.

14 Haʼu-nia maun-alin sira, ema ida sei manán sá se nia dehan katak nia iha fiar maibé la hatudu liuhusi hahalok? Fiar neʼe la bele salva nia, loos ka lae? 15 Se maluk fiar-naʼin ida kuran roupa no ninia ai-han la toʼo ba loron neʼe, 16 no imi ida dehan ba nia: “Bá ho dame, halo manas ó-nia an bá no sai bosu bá”, maibé imi la fó buat neʼebé nia presiza ba ninia isin, ida-neʼe folin saida? 17 Nuneʼe mós, se fiar la hamutuk ho hahalok, fiar neʼe mate.

18 No mós, ema ida sei dehan: “Ó iha fiar, no haʼu iha hahalok. Hatudu ó-nia fiar mai haʼu la ho hahalok, no haʼu sei hatudu ba ó haʼu-nia fiar liuhusi hahalok.” 19 Ó fiar katak iha Maromak ida deʼit ka? Se nuneʼe, ó halo buat neʼebé diʼak. Maibé, anju aat sira mós fiar neʼe no nakdedar. 20 Ema beik-teen, ó hakarak hatene ka lae, katak fiar la hamutuk ho hahalok mak saugati deʼit? 21 Maromak haree ita-nia aman Abraão nuʼudar ema loos liuhusi hahalok kuandu nia hasaʼe tiha nia oan Isaac iha altár, loos ka lae? 22 Entaun, imi haree katak ninia fiar laʼo hamutuk ho hahalok no ninia fiar sai kompletu liuhusi hahalok. 23 Tan neʼe, eskritura tuirmai neʼe sai loos duni: “Abraão tau fiar ba Jeová, no tan neʼe Maromak haree nia nuʼudar ema loos”, no bolu nia nuʼudar “Jeová nia belun”.

24 Imi haree ona katak ema sai nuʼudar ema loos iha Maromak nia oin liuhusi hahalok, laʼós deʼit liuhusi fiar. 25 Nuneʼe mós ho feto-aat Rahab, nia sai ema loos iha Maromak nia oin liuhusi hahalok, basá nia simu manu-ain sira ho laran-diʼak no nia haruka sira fila liuhusi dalan seluk. 26 Neʼe duni, hanesan isin la hamutuk ho iis* mate, nuneʼe mós fiar la hamutuk ho hahalok mate.

3 Maun-alin sira, laʼós imi hotu tenke sai nuʼudar mestre,* basá imi hatene katak ita sei hetan tesi-lia neʼebé todan liu. 2 Tanba ita hotu halo sala* dala barak. Se ema ida la halo sala ho ninia liafuan, nia mak ema sala-laek, nia bele kontrola ninia isin tomak. 3 Se ita tau besi* iha kuda nia ibun atu nia bele halo tuir ita, ita kontrola mós ninia isin-lolon tomak. 4 Haree mós ba ró sira, maski sira boot loos no anin makaʼas mak lori sira, maibé ró-naʼin bele kontrola sira ho kamudi neʼebé kiʼik hodi lori ba fatin neʼebé nia hakarak atu bá.

5 Nuneʼe mós, nanál mak parte kiʼik ida husi isin, maibé nia bele koʼalia hodi gaba an tebes. Haree bá! Ahi neʼebé kiʼik bele han ai-laran neʼebé boot. 6 Nanál mak hanesan ahi ida. Husi ita-nia isin tomak, nanál mak nakonu ho buat aat, tanba nanál hafoʼer isin-lolon tomak no estraga ema nia moris tomak, no bele halakon ema hanesan Gehena.* 7 Ema bele halo maus no tuir loloos ema halo maus ona animál fuik oioin, manu, animál neʼebé dolar, no animál iha tasi. 8 Maibé la iha ema ida bele kontrola ninia nanál. Nanál neʼe bele hakanek ema no nakonu ho venenu neʼebé halo mate. 9 Ho nanál mak ita hahiʼi Aman Jeová, maibé ho nanál ita mós fó-malisan ba ema neʼebé kria ona “tuir Maromak nia ilas”. 10 Liuhusi ibun ida deʼit mak ita fó hahiʼi no fó-malisan.

Haʼu-nia maun-alin sira, la diʼak duni atu halo buat sira-neʼe. 11 Bee moruk no bee moos la suli sai husi bee-matan ida deʼit, loos ka lae? 12 Haʼu-nia maun-alin sira, ai-figeira la bele fó oliveira fuan ka uvas-hun la bele fó figeira fuan, no bee meer la bele fó bee moos, loos ka lae?

13 Iha imi-nia leet, iha ema matenek ka lae? Se nuneʼe, nia tenke iha hahalok diʼak neʼebé hatudu katak nia halo buat hotu ho laran-maus neʼebé mai husi matenek. 14 Maibé se imi sai laran-moras no iha imi-nia laran imi buka atu istori malu, keta gaba an no bosok hodi kontra lia-loos. 15 Neʼe laʼós matenek neʼebé mai husi leten, maibé neʼe mundu nian, isin nian, anju aat sira-nian. 16 Basá, kuandu mosu laran-moras no istori-malu, sei mosu mós runguranga no buat aat oioin.

17 Maibé matenek husi lalehan ulukliu mak moos, tuirmai buka dame, la ulun-toos, prontu atu halo tuir, nakonu ho laran-sadiʼa no hahalok diʼak, la todan ba sorin, no la laran-makerek. 18 Liután neʼe, sira neʼebé buka atu nafatin iha relasaun diʼak ho ema seluk, sira haburas dame no tuirmai sira sei fó fuan hahalok loos nian.

4 Saida mak hamosu kontra-malu no istori-malu iha imi-nia leet? Ida-neʼe mosu tanba imi-nia hakarak isin nian neʼebé halo funu iha imi, loos ka lae? 2 Basá buat neʼebé imi hakarak, imi la hetan. Imi kontinua oho malu no imi mós kaan buat neʼebé ema seluk nian, maibé imi la bele hetan. Imi kontinua istori malu no halo funu. Tanba imi la husu, imi la simu. 3 No kuandu imi husu, imi la simu tanba imi husu ho hakarak neʼebé sala; basá imi husu ida-neʼe atu imi bele uza hodi halo kontente imi-nia hakarak isin nian.

4 Imi neʼebé la laran-metin,* imi hatene ka lae katak sai belun ho mundu halo imi sai inimigu ho Maromak? Tan neʼe, ema naran deʼit neʼebé hakarak atu sai belun ho mundu neʼe, nia halo nia an sai nuʼudar Maromak nia inimigu. 5 Eskritura dehan: “Laran-moras neʼebé hela iha ita-nia laran kontinua book ita atu kaan buat oioin.” Entaun, imi hanoin katak eskritura neʼe la iha folin ka? 6 Maibé, Maromak nia laran-diʼak neʼebé nia fó mak boot liu. Tan neʼe, eskritura dehan: “Maromak kontra ema sira neʼebé foti an, maibé nia fó ninia laran-diʼak boot ba ema neʼebé haraik-an.”

7 Entaun, hakruʼuk an ba Maromak; no kontra Diabu, no nia sei halai husi imi. 8 Hakbesik ba Maromak, no nia sei hakbesik ba imi. Hamoos imi-nia liman, imi ema sala-naʼin sira, no hamoos imi-nia laran, imi neʼebé laran-namlele. 9 Imi tenke triste, halerik no tanis. Halo imi-nia hamnasa sai fali triste, no imi-nia ksolok sai fali laran-kraik. 10 Haraik imi-nia an iha Jeová nia oin no nia sei foti aas imi.

11 Maun-alin sira, keta koʼalia kontra malu. Ema neʼebé koʼalia kontra ninia maun-alin ka tesi lia ba ninia maun-alin, ema neʼe koʼalia kontra ukun-fuan no tesi lia kona-ba ukun-fuan. No se ó tesi lia kona-ba ukun-fuan, ó laʼós tan ema neʼebé halo tuir ukun-fuan, maibé ó sai tesi-lia naʼin. 12 No iha ida deʼit mak fó ukun-fuan no sai tesi-lia naʼin, nia mak bele salva no halakon. Maibé kona-ba ó, sé mak ó atu tesi lia ba ó-nia maluk?

13 Imi balu dehan: “Ohin ka aban ita sei laʼo ba sidade neʼe no sei hela iha neʼebá tinan ida, no ita sei fila liman no manán osan”, 14 maibé imi la hatene imi-nia moris sei sai oinsá loos iha loron aban. Tanba imi mak abuabu neʼebé mosu ba tempu uitoan no depois neʼe lakon. 15 Loloos, imi tenke dehan: “Se Jeová hakarak, ita sei moris no halo ida-neʼe ka ida neʼebá.” 16 Maibé agora imi foti-an hodi gaba an deʼit. Gaba an sira hanesan neʼe mak aat. 17 Tan neʼe, se ema ida hatene oinsá atu halo buat neʼebé loos maibé la halo, ida-neʼe mak sala ba nia.

5 Rona bá, imi sira neʼebé riku, tanis bá no halerik kona-ba susar sira neʼebé sei mosu ba imi. 2 Imi-nia rikusoin sai dodok ona, no imi-nia roupa ular han tiha ona. 3 Imi-nia osan-mean no osan-mutin sai ferrujen ona, no ferrujen neʼe sei sai nuʼudar sasin ida hasoru imi no sei han imi-nia isin. Buat neʼebé imi rai hela sei sai hanesan ahi iha loron ikus sira. 4 Haree! Imi la selu serbisu-naʼin sira neʼebé halo serbisu koʼa nian iha imi-nia toʼos no sira-nia kolen kontinua hakilar, no Jeová, ida neʼebé nuʼudar ukun-naʼin ba tropa lalehan nian, nia rona ona sira-nia tanis atu husu ajuda. 5 Imi buka deʼit atu moris diʼak iha rai no buka haksolok ba imi-nia an. Imi han no halo bokur imi-nia isin toʼo loron oho nian. 6 Imi tesi lia ona no mós oho ida neʼebé iha hahalok loos. Tan neʼe mak nia kontra imi.

7 Entaun, maun-alin sira, hatudu pasiénsia bá toʼo tempu neʼebé Naʼi toʼo ona mai.* Haree! Toʼos-naʼin kontinua hein atu rai fó fuan neʼebé folin boot, no nia hatudu pasiénsia toʼo udan primeiru no udan ikus habokon rai. 8 Imi mós hatudu pasiénsia bá; hametin imi-nia laran, tanba tempu neʼebé Naʼi toʼo ona mai* besik daudaun ona.

9 Maun-alin sira, imi keta muramura hasoru malu, atu nuneʼe imi la hetan tesi-lia. Haree! Tesi-Lia Naʼin hamriik ona iha odamatan oin. 10 Maun-alin sira, halo tuir ezemplu diʼak husi profeta sira neʼebé koʼalia iha Jeová nia naran; halo tuir sira-nia ezemplu kona-ba tahan terus no hatudu pasiénsia. 11 Haree! Ita fó sai ona katak sira neʼebé tahan terus mak ema neʼebé kontente. Imi rona ona oinsá Job tahan terus no haree rezultadu ikus neʼebé Jeová fó ba nia, katak Jeová laran-diʼak tebes ho domin no laran-sadiʼa.

12 No ulukliu, maun-alin sira, keta jura hodi lalehan ka hodi rai ka hodi buat seluk. Maibé se imi dehan ‘sin’, tenkesér sin, no ‘lae’, tenkesér lae, atu nuneʼe imi labele monu ba kastigu.

13 Iha imi-nia leet iha ema neʼebé hasoru terus ka? Nia tenke kontinua halo orasaun. Iha imi-nia leet iha ema neʼebé laran haksolok ka? Nia tenke kanta knananuk hahiʼi nian. 14 Iha imi-nia leet iha ema ruma neʼebé moras ka? Nia tenke bolu katuas sira iha kongregasaun, no sira sei halo orasaun ba nia no kose mina ba nia iha Jeová nia naran. 15 No orasaun neʼebé hatoʼo ho fiar sei halo ema neʼebé moras sai diʼak fali, no Jeová sei halo nia hamriik. No mós, se nia halo ona sala, ninia sala sei hetan perdua.

16 Tan neʼe, koʼalia nakloke hodi fó sai imi-nia sala ba malu no halo orasaun ba malu, atu nuneʼe imi bele hetan kura. Ema loos nia harohan iha kbiit boot no bele ajuda duni ema. 17 Elias mak ema hanesan ita, maibé nia halo orasaun ho laran atu labele udan; no udan la tau ba rai durante tinan tolu no fulan neen. 18 Tuirmai nia halo fali orasaun, no udan tau no rai fó fuan.

19 Haʼu-nia maun-alin sira, se ema ruma iha imi-nia leet laʼo sees husi lia-loos no ema seluk lori nia fila fali, 20 hatene bá katak ema neʼebé ajuda sala-naʼin ida atu husik ninia dalan neʼebé sala, nia sei salva ema sala-naʼin neʼe nia moris* husi mate no sei taka sala barak.

[Nota–rodapé]