1 João

1 Ami hakerek kona-ba ida neʼebé sai nuʼudar liafuan moris nian, neʼebé iha ona husi uluk kedas, neʼebé ami rona ona no haree ho ami-nia matan rasik, neʼebé ami hateke ho didiʼak no ami kaer ho ami-nia liman. 2 Sin, moris rohan-laek hatudu sai ona mai ita no ami haree ona no sai sasin ba ida-neʼe no fó sai ida-neʼe ba imi. Moris rohan-laek neʼe mai husi Aman no hatudu sai ona ba ami. 3 Ami koʼalia kona-ba ida neʼebé ami haree no rona, no ami mós hatoʼo neʼe ba imi, atu nuneʼe imi bele sai parte ho ami. Liután neʼe, ita mós sai parte ho Aman no ho ninia Oan-Mane Jesus Kristu. 4 Entaun ami hakerek buat sira-neʼe atu ita-nia ksolok bele sai kompletu.

5 No neʼe mak mensajen neʼebé ami rona husi nia no ida-neʼe mak ami fó sai ba imi, katak Maromak mak naroman no la iha nakukun ida iha nia. 6 No se ita dehan: “Ita mak hamutuk ho nia”, maski nuneʼe ita kontinua laʼo iha nakukun laran, ita bosok no ita la moris tuir lia-loos. 7 Maibé, se ita laʼo iha naroman hanesan nia mós iha naroman laran, ita hamutuk duni ho nia, no ninia Oan Jesus nia raan hamoos ita-nia sala hotu.

8 Se ita dehan: “Ita la iha sala”, ita bosok ita-nia an no lia-loos la hela iha ita. 9 Maromak mak laran-metin no iha hahalok loos, no tan neʼe se ita fó sai ita-nia sala, nia sei perdua ita husi ita-nia sala hotu no hamoos ita husi hahalok aat hotu. 10 Se ita dehan: “Ita la halo sala”, ita halo nia sai nuʼudar bosok-teen ida, no ninia liafuan la hela iha ita.

2 Haʼu-nia oan sira, haʼu hakerek buat sira-neʼe ba imi atu imi labele halo sala ida. Maibé se ema ida halo sala, ita iha ajuda-naʼin ida neʼebé hamutuk ho Aman, katak Jesus Kristu, ida neʼebé iha hahalok loos. 2 No nia mak sai nuʼudar sakrifísiu neʼebé hasaʼe ona atu taka ita-nia sala hodi nuneʼe ita bele hadame malu fali ho Maromak, no tuir loloos laʼós deʼit ba ita-nia sala, maibé mós ba mundu tomak nia sala. 3 No se ita kontinua halo tuir ninia ukun-fuan sira, ida-neʼe hatudu katak ita hatene nia. 4 Ema neʼebé dehan: “Haʼu hatene ona nia”, maibé la halo tuir ninia ukun-fuan sira, ema neʼe bosok-teen, no lia-loos la hela iha ema neʼe. 5 Maibé, ema neʼebé halo tuir ninia liafuan, ema neʼe hatudu loloos katak ninia domin ba Maromak sai kompletu ona. Liuhusi ida-neʼe mak ita hatene katak ita ida deʼit ho nia. 6 Ema neʼebé dehan katak sira ida deʼit ho nia, ema sira-neʼe tenkesér kontinua atu laʼo tuir dalan neʼebé Jesus laʼo.

7 Maluk doben sira, haʼu hakerek ba imi, laʼós ukun-fuan foun, maibé ukun-fuan tuan neʼebé imi iha ona husi tempu uluk. No ukun-fuan tuan neʼe mak liafuan sira neʼebé imi rona ona. 8 Liután neʼe, haʼu hakerek ba imi ukun-fuan foun ida, no neʼe mak ukun-fuan neʼebé Jesus halo tuir no imi mós halo tuir, tanba nakukun liu daudaun ona no naroman loloos sai nabilan ona.

9 Ema neʼebé dehan katak nia iha naroman laran maibé nia odi ninia maluk, ema neʼe iha nakukun laran toʼo agora. 10 Ema neʼebé hadomi ninia maluk hela nafatin iha naroman, no la iha buat ida neʼebé halo nia sidi. 11 Maibé ema neʼebé odi ninia maluk, ema neʼe iha nakukun laran no nia laʼo iha nakukun laran, no nia la hatene atu bá neʼebé, tanba nakukun taka netik ninia matan.

12 Haʼu hakerek ba imi, haʼu-nia oan doben sira, basá imi-nia sala hetan ona perdua tanba ninia naran. 13 Haʼu hakerek ba imi, aman sira, tanba imi hatene ona ida neʼebé iha ona horiuluk kedas. Haʼu hakerek ba imi, mane joven sira, tanba imi manán ona aat-naʼin. Haʼu hakerek ba imi, labarik sira, tanba imi hatene ona Aman. 14 Haʼu hakerek ba imi, aman sira, tanba imi hatene ona ida neʼebé iha ona horiuluk kedas. Haʼu hakerek ba imi, mane joven sira, tanba imi iha forsa no Maromak nia liafuan hela iha imi no imi manán ona aat-naʼin.

15 Keta hadomi mundu ka buat sira neʼebé mundu nian. Se ema ida hadomi mundu, domin ba Aman la hela iha nia; 16 tanba buat hotu iha mundu neʼe, hanesan hakarak aat isin nian no hakarak aat matan nian no foti-an kona-ba rikusoin, buat sira-neʼe la mai husi Aman, maibé mai husi mundu neʼe. 17 Liután neʼe, mundu neʼe no ninia hakarak liu daudaun, maibé ema neʼebé halo Maromak nia hakarak sei hela ba nafatin.

18 Oan sira, ida-neʼe mak tempu nia rohan, no hanesan imi rona ona katak Kristu nia inimigu* sei mosu mai, ohin Kristu nia inimigu barak mosu ona; ho ida-neʼe ita hatene katak agora mak tempu nia rohan. 19 Uluk sira hamutuk ho ita maibé sira husik hela ita tanba sira laʼós parte ho ita; basá se sira parte ho ita, entaun sira hela nafatin ho ita. Maibé sira husik hela ita no ida-neʼe hatudu sai katak laʼós ema hotu mak parte ho ita. 20 No Maromak neʼebé santu hili* ona imi no imi hotu hatene lia-loos. 21 Haʼu hakerek ba imi, laʼós tanba imi la hatene lia-loos, maibé tanba imi hatene, no tanba la iha lia-bosok neʼebé mai husi lia-loos.

22 Sé mak bosok-teen? Ema bosok-teen mak ida neʼebé nega katak Jesus mak Kristu, loos ka lae? Nia mak Kristu nia inimigu,* ida neʼebé nega Aman no Oan-Mane. 23 Ema neʼebé nega Oan-Mane nega mós Aman. Ema neʼebé simu Oan-Mane simu mós Aman. 24 Kona-ba imi, buat neʼebé imi rona ona husi uluk kedas tenke kontinua hela iha imi. Se buat neʼebé imi rona husi uluk kedas hela iha imi, imi sei kontinua sai ida deʼit ho Oan-Mane no mós ho Aman. 25 Liután neʼe, buat neʼebé nia rasik promete ba ita mak moris rohan-laek.

26 Haʼu hakerek buat sira-neʼe ba imi tanba iha ema sira neʼebé koko atu lohi imi. 27 No kona-ba imi, tanba Maromak hili* ona imi liuhusi espíritu santu no espíritu neʼe nafatin hela iha imi, entaun imi la presiza tan atu ema ida hanorin imi; maibé Maromak uza espíritu neʼe atu hanorin imi kona-ba buat hotu, no neʼe loos no la bosok. Entaun kontinua sai ida deʼit ho nia hanesan espíritu hanorin ona imi atu halo. 28 Neʼe duni, oan doben sira, kontinua sai ida deʼit ho nia, atu nuneʼe kuandu nia hatudu sai nia an, ita bele koʼalia ho aten-brani no la subar an husi nia ho moe iha loron neʼebé nia toʼo ona mai.* 29 Se imi hatene katak nia iha hahalok loos, imi mós hatene katak ema hotu neʼebé halo hahalok loos moris mai husi nia.

3 Haree bá oinsá Aman nia domin boot tebes ba ita, basá nia bolu ona ita nuʼudar ninia oan;* no ita mak ninia oan duni. Tan neʼe mak mundu la hatene ita, tanba mundu la hatene nia. 2 Maluk doben sira, agora ita Maromak nia oan, maibé ita seidauk hatene loloos ita sei sai oinsá. Maski nuneʼe, ita hatene katak iha tempu neʼebé nia hatudu sai nia an, ita sei sai hanesan nia, tanba ita sei haree duni nia. 3 No ema hotu neʼebé iha esperansa neʼe, sira hamoos tiha ona sira-nia an hanesan nia neʼebé moos ona.

4 Ema neʼebé toman atu halo sala nia mós toman atu kontra lei, entaun sala katak kontra lei. 5 Imi mós hatene katak nia mai atu hasai tiha ita-nia sala sira, no la iha sala iha nia. 6 Ema hotu neʼebé kontinua sai ida deʼit ho nia, sira la iha toman atu halo sala; no ema neʼebé iha toman atu halo sala seidauk haree nia ka hatene nia. 7 Oan doben sira, keta husik ema ida lohi imi; ema neʼebé iha toman atu halo hahalok loos, nia mak ema loos hanesan ho Jesus mak loos. 8 Ema neʼebé iha toman atu halo sala, nia mai husi Diabu, tanba Diabu halo sala ona horiuluk kedas. Tan neʼe mak Maromak nia Oan-Mane mai: atu harahun Diabu nia serbisu hotu.

9 Ema hotu neʼebé moris mai husi Maromak la iha toman atu halo sala, tanba Ninia espíritu santu* hela iha ema sira hanesan neʼe, no ema neʼe labele iha toman atu halo sala, tanba nia moris mai husi Maromak. 10 Nuneʼe, ita bele hatene Maromak nia oan no Diabu nia oan liuhusi ida-neʼe: Ema hotu neʼebé iha toman atu halo hahalok laloos la mai husi Maromak, nuneʼe mós ho ema neʼebé la hadomi ninia maluk. 11 Neʼe mak lia-menon neʼebé imi rona ona horiuluk kedas katak ita tenke hadomi malu; 12 ita labele sai hanesan Caim, ida neʼebé mai husi aat-naʼin no oho ninia alin. Tan razaun saida mak nia oho ninia alin? Tanba Caim rasik nia hahalok mak aat, maibé ninia alin nia hahalok mak loos.

13 Maun-alin sira, imi keta hakfodak katak mundu odi imi. 14 Ita hatene katak ita husik tiha ona mate hodi hakat ba moris, tanba ita hadomi maun-alin sira. Ema neʼebé la hadomi kontinua hela iha mate. 15 Ema hotu neʼebé odi ninia maluk, ema neʼe mak ohodór, no imi hatene katak ema neʼebé ohodór la simu moris rohan-laek. 16 Ita hatene kona-ba domin tanba Jesus fó nia moris* ba ita; no ita mós tenke fó ita-nia moris ba ita-nia maluk sira. 17 Maibé, se ema iha sasán mundu neʼe nian no nia haree katak nia maluk kuran buat ruma, no nia lakohi hatudu laran-sadiʼa ba nia maluk, entaun oinsá mak Maromak nia domin hela iha nia? 18 Oan doben sira, ita labele hadomi ho liafuan ka ho ibun deʼit, maibé ho hahalok no lia-loos.

19 Ho ida-neʼe mak ita hatene katak ita mai husi lia-loos, no ita sai laran-metin katak nia simu ita 20 maski ita-nia laran duun ita kona-ba buat ruma, basá Maromak mak boot liu fali ita-nia laran no hatene buat hotu. 21 Maluk doben sira, se ita-nia laran la duun ita, ita bele hakbesik ba Maromak hodi la taʼuk; 22 no buat naran deʼit neʼebé ita husu, ita simu husi nia, tanba ita halo tuir ninia ukun-fuan sira no halo buat neʼebé nia gosta. 23 Loloos, neʼe mak ninia ukun-fuan, katak ita iha fiar ba ninia Oan Jesus Kristu nia naran no katak ita hadomi malu, nuʼudar nia fó ona ukun-fuan ba ita. 24 Liután neʼe, ema neʼebé halo tuir ninia ukun-fuan, ema neʼe sai ida deʼit ho nia, no nia sai ida deʼit ho ema neʼe. No liuhusi espíritu neʼebé nia fó mai ita, ita hatene katak nia nafatin sai ida deʼit ho ita.

4 Maluk doben sira, keta fiar mensajen hotu neʼebé haree hanesan husi Maromak, maibé koko mensajen neʼe hodi haree loloos se neʼe mai husi Maromak ka lae, tanba profeta falsu barak mosu ona iha mundu neʼe.

2 Ho ida-neʼe mak imi hatene katak mensajen neʼe loloos mai husi Maromak: Basá mensajen hotu neʼebé fó sai kona-ba Jesus Kristu nuʼudar ida neʼebé mai iha isin mak mensajen neʼebé husi Maromak. 3 Maibé mensajen hotu neʼebé la fó sai kona-ba Jesus la mai husi Maromak. Liután neʼe, ida-neʼe mak mensajen husi Kristu nia inimigu,* ida neʼebé imi rona ona katak atu mai, no agora nia mosu ona iha mundu neʼe.

4 Oan doben sira, imi mai husi Maromak, no imi manán ona ema sira-neʼe, tanba nia neʼebé ida deʼit ho imi mak boot liu fali nia neʼebé ida deʼit ho mundu. 5 Sira mai husi mundu; tan neʼe mak sira koʼalia buat neʼebé mai husi mundu no mundu rona ba sira. 6 Ita mai husi Maromak. No ema neʼebé hatene Maromak, sira rona ba ita; ema neʼebé la mai husi Maromak la rona ba ita. Ho ida-neʼe mak ita bele hatene ida neʼebé mak mensajen lia-loos husi Maromak no ida neʼebé mak mensajen sala nian.

7 Maluk doben sira, mai ita nafatin hatudu domin ba malu, tanba domin mak husi Maromak, no ema neʼebé hatudu domin moris mai husi Maromak no hatene Maromak. 8 Ema neʼebé la hadomi la hatene Maromak, tanba Maromak mak domin. 9 Iha dalan neʼe mak Maromak hatudu nia domin mai ita, basá nia haruka ninia Oan-Mane mesak ba mundu atu ita bele hetan moris liuhusi nia. 10 Maromak nia domin mak neʼe, laʼós katak ita hadomi ona Maromak, maibé nia hadomi ita no haruka ninia Oan-Mane nuʼudar sakrifísiu neʼebé hasaʼe ona atu taka ita-nia sala hodi nuneʼe ita bele hadame malu fali ho Maromak.

11 Maluk doben sira, se Maromak hadomi ita iha dalan neʼe, entaun ita mós tenke hadomi malu. 12 La iha ema ida neʼebé haree ona Maromak. No se ita kontinua hadomi malu, Maromak nafatin hela iha ita no ninia domin sai kompletu iha ita. 13 Ita hatene katak ita nafatin sai ida deʼit ho nia no nia sai ida deʼit ho ita, tanba nia fó ona ninia espíritu ba ita. 14 Liután neʼe, ita rasik haree ona no fó sasin katak Aman haruka ona ninia Oan-Mane nuʼudar Salvadór ba mundu. 15 Ema neʼebé fó sai katak Jesus Kristu mak Maromak nia Oan-Mane, Maromak nafatin sai ida deʼit ho nia no nia sai ida deʼit ho Maromak. 16 No ita hatene ona no fiar katak Maromak hadomi ita.

Maromak mak domin, no ema neʼebé nafatin hela iha domin sai ida deʼit ho Maromak no Maromak nafatin sai ida deʼit ho nia. 17 Iha dalan neʼe mak domin sai kompletu ona iha ita, atu nuneʼe ita bele koʼalia ho livre ba Maromak iha loron tesi-lia nian, tanba iha mundu neʼe ita mós sai ona hanesan Jesus Kristu. 18 Ema neʼebé iha domin, nia la iha taʼuk. Domin neʼebé kompletu halakon taʼuk, tanba taʼuk hanetik ita. Tuir loloos, ema neʼebé taʼuk seidauk sai kompletu iha domin. 19 Kona-ba ita, ita hadomi tanba nia hadomi uluk ita.

20 Se ema ruma dehan: “Haʼu hadomi Maromak”, maibé nia odi ninia maluk, ema neʼe bosok-teen. Tanba ema neʼebé la hadomi ninia maluk neʼebé nia haree, la bele hadomi Maromak neʼebé nia la haree. 21 No neʼe mak ukun-fuan neʼebé ita simu husi nia, katak ema neʼebé hadomi Maromak tenke hadomi mós ninia maluk.

5 Ema hotu neʼebé fiar katak Jesus mak Kristu, sira mak Maromak nia oan, no ema hotu neʼebé hadomi Maromak, hadomi mós Maromak nia oan sira. 2 No ita hatene katak ita hadomi Maromak nia oan sira kuandu ita hadomi Maromak no halo tuir ninia ukun-fuan sira. 3 Basá domin ba Maromak katak ita halo tuir ninia ukun-fuan sira; no ninia ukun-fuan sira la todan, 4 tanba ema hotu neʼebé moris mai husi Maromak mak manán mundu. No ho ita-nia fiar mak ita manán tiha ona mundu.

5 Sé mak bele manán mundu? Neʼe mak sira neʼebé fiar katak Jesus mak Maromak nia Oan-Mane, loos ka lae? 6 Jesus Kristu mai ho bee no raan; nia mai laʼós deʼit ho bee, maibé ho bee no raan. No espíritu mak ida neʼebé fó sasin, tanba espíritu mak lia-loos. 7 Iha buat tolu neʼebé fó sasin, 8 neʼe mak espíritu, bee no raan, no buat tolu neʼe fó sasin neʼebé hanesan.

9 Se ita simu ema nia sasin, oinsá liután ho sasin husi Maromak. Basá neʼe mak sasin neʼebé Maromak fó, katak nia fó sasin kona-ba ninia Oan-Mane. 10 Ema neʼebé tau fiar ba Maromak nia Oan-Mane, ema neʼe simu ona iha nia laran sasin neʼebé Maromak fó ba nia. Ema neʼebé la tau fiar ba Maromak halo ona Maromak nuʼudar bosok-teen, tanba nia la tau fiar ba sasin neʼebé Maromak fó sai kona-ba ninia Oan-Mane. 11 No neʼe mak sasin neʼebé Maromak fó, katak Maromak fó ita moris rohan-laek, no moris neʼe mai husi ninia Oan-Mane. 12 Ema neʼebé sai ida deʼit ho Oan-Mane, nia hetan moris neʼe; no ema neʼebé la sai ida deʼit ho Maromak nia Oan-Mane, nia la hetan moris neʼe.

13 Haʼu hakerek buat sira-neʼe ba imi neʼebé tau fiar ba Maromak nia Oan-Mane nia naran, hodi nuneʼe imi bele hatene katak imi hetan moris rohan-laek. 14 No neʼe mak buat neʼebé ita fiar kona-ba nia, katak, buat naran deʼit neʼebé ita husu hodi tuir ninia hakarak, nia rona ita. 15 Liután neʼe, se ita hatene katak nia rona ita kona-ba buat naran deʼit neʼebé ita husu, ita fiar katak ita sei hetan buat neʼebé ita husu ona husi nia.

16 Se ema ida haree ninia maluk halo sala neʼebé la lori ba mate, nia sei harohan ba ninia maluk neʼe, no Maromak sei fó moris ba nia, sin, neʼe kona-ba sira neʼebé halo sala neʼebé la lori ba mate. Maibé iha mós sala neʼebé lori ba mate. No kona-ba sala neʼe mak haʼu la haruka nia atu harohan. 17 Hahalok aat hotu mak sala; maibé iha sala neʼebé la lori ba mate.

18 Ita hatene katak ema hotu neʼebé moris mai husi Maromak, sira la iha toman atu halo sala, maibé Ida neʼebé moris mai husi Maromak tau matan ba sira, no aat-naʼin la bele kaer sira. 19 Ita hatene katak ita mai husi Maromak, maibé mundu tomak iha aat-naʼin nia ukun. 20 Maibé ita hatene katak Maromak nia Oan-Mane mai tiha ona, no nia fó ona matenek ba ita atu ita bele hatene ho didiʼak kona-ba Maromak neʼebé loos. No liuhusi ninia Oan-Mane Jesus Kristu, ita sai ida deʼit ona ho nia. Sin, nia mak Maromak neʼebé loos no hun ba moris rohan-laek. 21 Oan doben sira, hadook an husi estátua.

[Nota–rodapé]