2 Pedro

1 Husi Simão Pedro, neʼebé nuʼudar atan no apóstolu ba Jesus Kristu, hakerek ba sira neʼebé hetan ona fiar neʼebé folin-boot hanesan ami-nian. Ita simu fiar neʼe tanba hahalok loos neʼebé Maromak no Jesus Kristu ita-nia Salvadór hatudu ona ba ita:

2 Haʼu harohan katak Maromak nia laran-diʼak boot no dame sei aumenta liután ba imi nuʼudar imi kontinua hatene ho didiʼak kona-ba Maromak no Jesus ita-nia Naʼi, 3 tanba liuhusi Maromak nia kbiit ita simu buat hotu neʼebé ita presiza atu moris no atu serbí Maromak ho laran-metin, no ita simu buat sira-neʼe tanba ita hetan matenek loloos kona-ba ida neʼebé bolu ita liuhusi glória no hahalok diʼak. 4 No ho buat sira-neʼe mak nia fó ba ita promesa sira neʼebé folin aas no boot tebes, hodi nuneʼe imi bele hola parte iha Maromak nia kbiit, basá imi halai-sees ona husi buat foʼer mundu nian neʼebé mosu tanba hakarak aat neʼebé makaʼas.

5 Tan razaun neʼe, imi tenke hakaʼas an atu iha fiar, atu halo buat neʼebé diʼak, no atu iha matenek, 6 no hakaʼas an atu iha hahalok kontrola an, atu tahan, no atu laran-metin ba Maromak. 7 Hakaʼas an atu hadomi maun-alin sira, no atu hadomi ema hotu. 8 Basá se imi iha buat sira-neʼe no sai nakonu liu, buat sira-neʼe sei ajuda imi atu la sai baruk no atu fó fuan nuʼudar imi halo tuir matenek loloos kona-ba ita Naʼi Jesus Kristu.

9 Basá se ema ida la iha buat sira-neʼe, nia mak matan-delek, nia taka matan ba naroman no haluha ona katak nia hamoos tiha ninia sala neʼebé nia halo iha tempu uluk. 10 Tan neʼe maun-alin sira, hakaʼas an liután atu laran-metin nafatin nuʼudar ema neʼebé Maromak bolu no hili ona; se imi kontinua halo buat sira-neʼe imi sei la monu. 11 Tuir loloos, hodi halo nuneʼe, imi sei simu bensaun furak atu tama ba ukun rohan-laek husi ita Naʼi no Salvadór Jesus Kristu.

12 Tan razaun neʼe mak haʼu sempre prontu atu fó-hanoin imi kona-ba buat sira-neʼe maski imi hatene ona buat sira-neʼe no imi metin ona iha lia-loos neʼebé imi simu. 13 Maibé, durante tempu neʼebé haʼu hela iha tenda* neʼe, haʼu hanoin katak diʼak ba haʼu atu fó-hanoin imi no fó laran-manas ba imi; 14 basá haʼu hatene katak lakleur tan haʼu sei husik tiha tenda neʼe, hanesan ita-nia Naʼi Jesus Kristu fó sai ona ba haʼu. 15 Entaun, haʼu sei hakaʼas an nafatin hodi nuneʼe, kuandu haʼu bá tiha, imi rasik bele hanoin-hetan buat sira-neʼe.

16 Kuandu ami fó sai ba imi kona-ba ita-nia Naʼi Jesus Kristu nia kbiit no kona-ba tempu neʼebé nia toʼo ona mai,* ami la koʼalia tuir istória falsu neʼebé ema inventa deʼit; maibé ami haree ninia kmanek ho matan rasik. 17 Basá nia simu glória no hahiʼi husi Aman Maromak kuandu Maromak glória nian dehan ba nia liafuan tuirmai neʼe: “Neʼe mak haʼu-nia oan-mane, ida neʼebé haʼu hadomi, no neʼebé halo haʼu kontente.” 18 Sin, ami rona liafuan sira-neʼe hatoʼo mai husi lalehan kuandu ami hamutuk ho nia iha foho santu.

19 Ho ida-neʼe, ita-nia fiar ba profeta sira-nia liafuan sai metin liután; no imi halo buat neʼebé loos hodi hanoin didiʼak kona-ba neʼe nuʼudar ahi-oan ida neʼebé fó naroman ba fatin nakukun neʼebé iha imi-nia laran; toʼo rai sai naroman no fitun rai-hun mutin nian mosu. 20 Tanba imi hatene ona katak profeta nia liafuan iha Eskritura la mosu mai husi ema ida nia hanoin. 21 Basá liafuan profeta nian la fó sai husi ema nia hakarak, maibé ema koʼalia husi Maromak nuʼudar espíritu santu fó matadalan ba sira.

2 Maibé, hanesan profeta falsu mosu iha Maromak nia povu nia leet, nuneʼe mós mestre falsu sira sei mosu iha imi-nia leet. Ema sira-neʼe ho subasubar deʼit sei fahe imi ba grupu oioin hodi estraga imi-nia fiar. Sira mós sei nega sira-nia naʼin neʼebé sosa ona sira; nuneʼe sira sei halakon lalais sira-nia an rasik. 2 Liután neʼe, ema barak sei halo tuir sira-nia hahalok neʼebé la iha moe, no tan ida-neʼe mak ema sei koʼalia aat kona-ba dalan lia-loos nian. 3 No mós, ho kaan-teen sira sei aproveita imi liuhusi liafuan bosok. Maibé sira-nia kastigu neʼebé deside nanis ona sei la tarde, no sira-nia rohan sei mai duni.

4 Tuir loloos, Maromak fó kastigu ba anju sira neʼebé halo sala, no soe sira ba Tártaro, no entrega sira ba rai-kuak neʼebé nakukun hodi hein atu hetan tesi-lia; 5 no nia fó kastigu ba mundu iha tempu uluk, maibé salva Noé, haklaken-naʼin kona-ba buat loos, hamutuk ho ema naʼin-hitu seluk kuandu nia halo rai-nabeen mosu ba ema aat sira; 6 no nia mós fó kastigu ba Sodoma no Gomorra, no hodi harahun sidade sira-neʼe toʼo sai ahi-kadesan, nia hatudu ezemplu kona-ba buat neʼebé sei mosu ba ema aat sira iha tempu neʼebé atu mai; 7 no nia salva Lot, ema loos ida neʼebé sente laran-susar tebes tanba ema aat nia hahalok neʼebé la iha moe. 8 Basá loron ba loron, hahalok aat sira neʼebé ema loos neʼe haree no rona nuʼudar nia hela iha sira-nia leet, haterus ninia moris. 9 Nuneʼe, kona-ba ema neʼebé serbí Maromak ho laran-metin, Jeová hatene oinsá atu salva sira husi susar laran, maibé nia rai hela ema aat sira atu halakon tiha iha loron tesi-lia nian, 10 liuliu sira neʼebé buka atu hafoʼer ema seluk no hakribi ukun-naʼin sira.

Sira sai brani demais no halo tuir deʼit sira-nia hakarak, no sira la taʼuk atu koʼalia aat ema sira neʼebé Maromak hafolin. 11 No maski anju sira iha forsa no kbiit boot liu, maibé tanba hatudu respeitu ba Jeová, sira la uza liafuan aat hodi duun mestre falsu sira-neʼe. 12 Maibé mane sira-neʼe hanesan deʼit ho animál neʼebé la iha hanoin hodi tuir deʼit sira-nia hakarak no moris mai atu ema kaer no oho. Mane sira-neʼe koʼalia aat kona-ba buat neʼebé sira la hatene. Sira sei lakon iha sira-nia dalan neʼebé aat, 13 sira hetan terus nuʼudar kolen ba sira-nia dalan neʼebé aat.

Sira buka atu fó ksolok ba sira-nia hakarak isin nian, maski iha rai-loron. Sira mak buat foʼer no aat iha imi-nia leet, sira buka ksolok iha sira-nia hanorin bosok nuʼudar sira halo festa hamutuk ho imi. 14 Sira-nia matan nakonu ho sala-foʼer* no sira la bele para atu halo sala, no sira dada ema* neʼebé namlele. Sira-nia laran hetan treinu hodi sai kaan-teen. Sira mak oan neʼebé hetan malisan. 15 Sira husik ona dalan loos, no laʼo ona iha dalan sala. Sira laʼo tuir dalan husi Balám, Beor nia oan-mane, ida neʼebé gosta atu hetan kolen husi hahalok sala, 16 maibé nia hetan dixiplina tanba nia kontra buat neʼebé loos. No kuda-burru neʼebé la bele koʼalia, hasai lian ema nian no koko atu hanetik profeta neʼe atu nia la laʼo tuir ninia dalan neʼebé aat.

17 Sira mak bee-matan neʼebé la iha bee, no kalohan neʼebé anin-boot lori; no buat neʼebé rai hela ona ba sira mak fatin neʼebé nakukun loos. 18 Basá sira koʼalia buat neʼebé rona hanesan importante, maibé neʼe la iha folin. No liuhusi hakarak isin nian no hahalok neʼebé la iha moe, sira dada ema neʼebé foin hasees an husi sira neʼebé moris iha sala laran. 19 Mestre falsu sira-neʼe promete liberdade ba sira, maibé sira rasik mak atan ba buat neʼebé foʼer. Basá se ema ida husik ema seluk domina nia, nia sai ema neʼe nia atan. 20 Tuir loloos, se ema halai-sees ona husi buat neʼebé foʼer iha mundu neʼe tanba hetan matenek loloos kona-ba Naʼi no Salvadór Jesus Kristu, no tuirmai sira envolve an fali ho buat sira-neʼe no ida-neʼe domina fali sira, entaun sira-nia situasaun neʼe sei sai aat liu fali ida uluk nian. 21 Basá diʼak liu se sira la hatene ho didiʼak kona-ba dalan loos nian duké hatene tiha kona-ba neʼe no tuirmai fila kotuk fali ba mandamentu santu neʼebé sira simu ona. 22 No lia-dadolin neʼe sai loos duni kona-ba sira: “Asu fila fali ba ninia muta rasik, no fahi neʼebé hariis tiha ona duir an fali iha tahu laran.”

3 Maluk doben sira, ida-neʼe mak karta segundu neʼebé haʼu hakerek ba imi, no hanesan haʼu-nia karta ida uluk, haʼu hakarak ajuda imi atu hametin imi-nia kbiit atu hanoin hodi fó-hatene fali ba imi kona-ba buat ruma, 2 katak imi tenke hanoin-hetan liafuan sira neʼebé uluk koʼalia liuhusi profeta santu sira no mós hanoin-hetan mandamentu husi Naʼi no Salvadór neʼebé fó sai liuhusi imi-nia apóstolu sira. 3 Ulukliu, hatene bá katak iha loron ikus sira sei mosu gozadór sira neʼebé koʼalia aat kona-ba buat neʼebé diʼak, sira halo tuir deʼit sira-nia hakarak rasik 4 no dehan: “Nia promete katak nia sei mai fali,* maibé nia iha neʼebé? Husi ita-nia beiʼala sira-nia tempu, buat hotu kontinua hanesan deʼit husi tempu neʼebé Maromak kria mundu.”

5 No ho neon sira nega lia-loos katak horiuluk kedas lalehan mosu, no rai hamriik metin hodi sai husi bee no bee haleʼu mundu tanba Maromak nia liafuan; 6 no liuhusi buat sira-neʼe mak mundu iha tempu neʼebá lakon kuandu rai-nabeen taka mundu tomak. 7 Maibé liuhusi liafuan neʼebé hanesan mak lalehan no mundu neʼebé iha agora marka tiha ona ba ahi no rai hela toʼo loron tesi-lia nian no loron atu halakon ema aat.

8 Maibé maluk doben sira, keta haluha katak ba Jeová loron ida mak hanesan tinan 1.000 no tinan 1.000 mak hanesan loron ida. 9 Jeová la tarde atu kumpre ninia promesa, hanesan ema barak hanoin katak nia tarde, maibé nia hatudu pasiénsia ba imi tanba nia lakohi ema ida lakon maibé nia hakarak ema hotu atu hakribi sala. 10 Tuir loloos, Jeová nia loron sei mai hanesan naʼok-teen ida, iha tempu neʼe lalehan sei lakon derrepente deʼit ho tarutu makaʼas, maibé buat hotu iha lalehan no rai sei sai nabeen tanba manas makaʼas, no rai no buat neʼebé iha nia sei sunu tiha.*

11 Tanba buat sira-neʼe hotu sei lakon iha dalan neʼe, imi tenke hanoin kona-ba imi-nia hahalok no buat neʼebé imi halo. Imi tenke iha hahalok santu no hatudu katak imi serbí Maromak ho laran-metin, 12 nuʼudar imi hein no kontinua hanoin-hetan kona-ba Jeová nia loron neʼebé atu mai,* iha neʼebé lalehan sei halakon tiha ho ahi, no buat hotu iha lalehan no rai sei nabeen tanba manas makaʼas. 13 Maibé tuir ninia promesa, ita hein lalehan foun no rai foun, no iha neʼebá sei iha nafatin hahalok loos.

14 Neʼe duni, maluk doben sira, tanba imi hein hela buat sira-neʼe, hakaʼas an liután atu Maromak haree imi nuʼudar ema neʼebé moos, sala-laek, no iha dame laran. 15 Liután neʼe, haree ita-nia Naʼi nia pasiénsia nuʼudar salvasaun, hanesan ita-nia maluk doben Paulo mós hakerek ba imi tuir matenek neʼebé fó ona ba nia. 16 Tuir loloos, nia hakerek ona kona-ba buat sira-neʼe iha ninia karta hotu. Maibé, iha karta sira-neʼe, iha buat balu neʼebé susar atu komprende, no ema neʼebé beik no laran-namlele bobar lia kona-ba buat sira-neʼe, hanesan sira mós halo ba Eskritura sira seluk, toʼo sira rasik lakon.

17 Maibé kona-ba imi, maluk doben sira, imi hatene nanis ona kona-ba neʼe, entaun kuidadu imi-nia an bá, atu nuneʼe ema aat sira neʼebé kontra lei sei la lori lakon imi tuir sira-nia sala no imi lakon imi-nia laran-metin. 18 Maibé, kontinua simu laran-diʼak boot no matenek loloos husi ita Naʼi no Salvadór Jesus Kristu. Nia mak merese simu glória ohin no ba nafatin.

[Nota–rodapé]