JEREMIAS
1 Tuirmai neʼe mak Hilquias nia oan-mane Jeremias* nia liafuan. Hilquias mak amlulik ida iha Anatot+ iha rai-Benjamim. 2 Iha tinan 13 husi Amon+ nia oan-mane Josias+ nia ukun nuʼudar liurai iha rai-Judá, Jeová koʼalia ba Jeremias. 3 Maromak koʼalia ba Jeremias iha tempu neʼebé Josias nia oan-mane Jeoquim+ mak ukun nuʼudar liurai ba rai-Judá, toʼo Josias nia oan-mane Zedequias+ remata ninia ukun ba rai-Judá durante tinan 11, toʼo ema sira iha Jeruzalein sai dadur* iha fulan-lima.+
4 Jeová koʼalia mai haʼu, hodi dehan:
5 “Antes haʼu kria ó iha ó-nia inan nia knotak, haʼu hatene* ona ó,+
No antes ó moris mai,* haʼu hili ona ó atu halo serbisu santu.*+
Haʼu halo ó sai nuʼudar profeta ba nasaun sira.”
6 Maibé haʼu hatete: “Oh Jeová, Naʼi Ukun-Naʼin Boot Liu!
Haʼu la iha matenek atu koʼalia,+ tanba haʼu mak joven* deʼit.”+
7 Jeová dehan mai haʼu:
“Keta hatete: ‘Haʼu mak joven deʼit.’
Ó tenke bá hasoru ema hotu neʼebé haʼu haruka ó atu bá,
No ó tenke hatoʼo buat hotu neʼebé haʼu haruka ó atu koʼalia.+
9 Tuirmai Jeová lolo ninia liman no kona haʼu-nia ibun.+ No Jeová dehan mai haʼu: “Haʼu tau ona haʼu-nia liafuan iha ó-nia ibun.+ 10 Iha loron neʼe haʼu fó podér ba ó atu sai boot liu fali nasaun sira no ukun sira, atu fokit no sobu, atu harahun no halakon, atu harii no kuda.”+
11 Jeová koʼalia tan mai haʼu, hodi dehan: “Jeremias, saida mak ó haree?” Haʼu hatete: “Haʼu haree ai-amendueira* nia sanak.”
12 Jeová dehan mai haʼu: “Neʼe loos duni, tanba haʼu hadeer nafatin hodi haʼu bele kumpre liafuan neʼebé haʼu hatete.”
13 Jeová koʼalia mai haʼu ba dala segundu, hodi dehan: “Saida mak ó haree?” Haʼu hatete: “Haʼu haree sanan ida hatuur iha ahi-matan neʼebé lakan makaʼas,* sanan nia ibun see hela ba parte súl no sanan nia kidun see hela ba parte norte.” 14 Tuirmai Jeová dehan mai haʼu:
“Susar boot sei mosu mai husi rai iha parte norte
Hodi haterus ema hotu neʼebé hela iha rai neʼe.+
15 Tanba Jeová dehan: ‘Haʼu sei bolu umakain hotu husi nasaun sira iha parte norte;+
Sira sei mai no sira ida-idak sei harii sira-nia kadunan
Iha Jeruzalein nia portaun sira,+
Sira sei haleʼu no ataka sidade neʼe nia moru
No ataka sidade sira hotu iha rai-Judá.+
16 Haʼu sei fó sai haʼu-nia desizaun hasoru sira tanba sira-nia hahalok aat hotu,
Tanba sira husik ona haʼu,+
No sira hasaʼe sakrifísiu* ba maromak sira seluk,+
No hakruʼuk ba buat neʼebé sira-nia liman mak halo.’+
17 Maibé ó tenke halo ó-nia an prontu,*
No ó tenke hamriik no fó-hatene ba sira liafuan hotu neʼebé haʼu fó sai ba ó.
Keta taʼuk ba sira,+
Hodi nuneʼe haʼu sei la halo ó sai taʼuk iha sira-nia oin.
18 Tanba iha loron neʼe, haʼu halo ona ó sai hanesan sidade neʼebé iha moru aas,
Hanesan besi-riin, no moru riti nian atu ó bele hamriik metin hasoru rai tomak,+
Hasoru rai-Judá nia liurai sira no ninia ulun-naʼin sira,
Amlulik sira no povu sira iha rai neʼe.+
19 No sira sei halo duni funu hasoru ó,
Maibé sira sei la manán ó,
Tanba Jeová dehan: ‘Haʼu hamutuk ho ó+ hodi salva ó.’”
2 Jeová koʼalia mai haʼu, hodi dehan: 2 “Bá, hatoʼo ba Jeruzalein: ‘Jeová dehan nuneʼe:
“Haʼu hanoin-hetan ho didiʼak ó-nia laran-metin* bainhira ó sei joven hela,+
Ó hatudu domin mai haʼu bainhira ó prenda ona atu kaben ho haʼu,+
Ó laʼo tuir haʼu iha rai-fuik,
Iha rai neʼebé ema la kari fini.+
3 Uluk Izraél mak santu ba Jeová,+ hanesan ai-fuan primeiru neʼebé nia koʼa husi toʼos.”’
Jeová dehan: ‘Ema hotu neʼebé halo aat ba nia sei simu sala.
Susar boot sei kona sira.’”+
4 Oh Jacob nia umakain,
No imi família hotu husi umakain Izraél, rona Jeová nia liafuan bá.
5 Jeová dehan nuneʼe:
“Imi-nia beiʼala sira hetan sala saida husi haʼu,+
Neʼebé halo sira hadook an husi haʼu?
Sira laʼo tuir estátua* sira neʼebé folin-laek+ toʼo halo sira-nia an rasik mós sai folin-laek.+
6 Sira la husu: ‘Jeová iha loos neʼebé?
Maromak neʼebé lori ita sai husi rai-Ejitu,+
Neʼebé lori ita laʼo liu rai-fuik,
Rai-fuik maran+ neʼebé iha rai-kuak sira,
Rai neʼebé bee la iha+ no nakukun tebes,*
Rai neʼebé la iha ema ida mak laʼo liu
No la iha ema ida mak hela.’
7 Ikusmai, haʼu lori imi ba rai ida neʼebé nakonu ho toʼos ai-fuan nian,
Hodi imi bele han nia fuan no buat diʼak oioin husi rai neʼe.+
Maibé imi mai no hafoʼer haʼu-nia rai,
Imi halo haʼu-nia liman-rohan sai fali buat neʼebé haʼu hakribi.+
8 Amlulik sira la husu: ‘Jeová iha loos neʼebé?’+
Sira neʼebé kaer Ukun-Fuan la hatene haʼu,
Bibi-atan sira kontra hasoru haʼu,+
Profeta sira mós fó sai liafuan hodi Baal nia naran,+
No sira halo tuir maromak sira neʼebé la lori buat diʼak.
9 Jeová dehan: ‘Nuneʼe haʼu sei kontinua foti kazu hasoru imi,+
No haʼu mós sei foti kazu hasoru imi-nia bei-oan sira.’
10 ‘Bá ema Kitim+ nia illa sira* no haree.
Sin, haruka ema bá Kedar+ no hanoin didiʼak bá.
Haree toʼok buat hanesan neʼe akontese tiha ona ka lae.
11 Iha ka lae, nasaun ida neʼebé troka ona sira-nia maromak ho buat neʼebé laʼós maromak?
Maibé haʼu-nia povu rasik troka ona haʼu-nia glória ho buat neʼebé folin-laek.+
12 Oh lalehan, hateke bá ho hakfodak,
Nakdedar no sai taʼuk tebetebes bá’, Jeová mak dehan.
13 ‘Tanba haʼu-nia povu halo ona buat rua neʼebé aat:
Sira husik tiha haʼu neʼebé mak hun ba bee moris nian,+
No sira keʼe tanke* ba sira-nia an rasik,
Tanke sira neʼebé nakfera ona, neʼebé labele rai bee.’
14 ‘Povu Izraél mak atan ida ka? Nia mak atan neʼebé moris mai iha ema nia umakain ka?
Se laʼós hanesan neʼe, tanbasá mak ema domina nia hanesan atan?
15 Leaun-aman sira hasai lian siʼak hasoru nia,+
Sira hasai lian makaʼas.
Sira halo ninia rai sai fatin neʼebé halo ema taʼuk.
Ahi han mohu tiha ninia sidade sira toʼo ema ida mós labele hela.
16 Ema Nof*+ ho ema Tafnes+ sira mós halo ó-nia ulun molik.
17 Neʼe mak buat neʼebé ó rasik halo ba ó-nia an, loos ka lae?
Tanba ó husik tiha ó-nia Maromak Jeová,+
Bainhira nia lori hela ó laʼo iha dalan.
19 Ó tenke aprende husi ó-nia hahalok aat,
No ó-nia hahalok la laran-metin tenke korrije ó.
Hatene no komprende bá, katak atu husik Jeová, ó-nia Maromak,
Neʼe mak hahalok neʼebé aat no moruk tebes.+
Ó la hamtaʼuk haʼu’,+ Naʼi Ukun-Naʼin Boot Liu, Jeová neʼebé ukun tropa lalehan nian, mak dehan.
20 ‘Tanba iha tempu uluk liubá, haʼu harahun ó-nia ai-leba+
No tesi kotu korrente neʼebé kesi metin ó.
Maibé ó dehan: “Haʼu sei la serbí Ita”,
21 Haʼu kuda ó nuʼudar uvas mean neʼebé diʼak liu,+ ninia fini hotu diʼak.
Entaun, oinsá mak ó sai aat iha haʼu-nia oin, ó sai fali uvas-hun fuik nia dikin?’+
22 Jeová, Naʼi Ukun-Naʼin Boot Liu, dehan: ‘Maski ó fase ho soda* no sabaun barak,
Ó-nia sala sei la lakon hanesan noda ida iha haʼu-nia oin.’+
23 Oinsá mak ó bele hatete: ‘Haʼu la hafoʼer haʼu-nia an.
Haʼu la halo tuir Baal sira’?
Haree bá ó-nia hahalok iha foho-leet.
Hanoin didiʼak buat neʼebé ó halo ona.
Ó hanesan kuda-kamelu inan neʼebé book an lalais,
Neʼebé halai tun-saʼe, la hatene atu bá neʼebé.
24 Nia hanesan kuda-burru inan neʼebé toman ona hela iha rai-fuik,
Neʼebé horon bá-mai hodi buka no kaan kuda-burru aman.
Sé mak bele hanetik nia bainhira nia hakarak namanas atu kaben?
Kuda-burru aman la presiza halo kole an hodi buka nia.
Sira sei hetan nia iha ninia tempu.
25 Keta husik ó-nia ain tanan,
No keta husik ó-nia kakorok sente hamrook.
Maibé ó hatete: ‘Lae, haʼu lakohi!+
26 Hanesan naʼok-teen ida neʼebé sente moe tanba ema kaer toman nia,
Umakain Izraél mós hetan ona moe,
Sira hotu no mós sira-nia liurai, ulun-naʼin,
Amlulik no profeta sira.+
27 Sira hatete ba ai-hun: ‘Ó mak haʼu-nia aman’,+
No ba fatuk: ‘Ó mak hahoris haʼu.’
Maibé sira fila kotuk no la fó oin ba haʼu.+
No iha tempu terus nia laran, sira sei dehan:
‘Hamriik bá, no salva ami!’+
28 Ó-nia maromak sira neʼebé ó halo ona ba ó-nia an rasik, iha neʼebé?+
Husik sira mak hamriik, se sira bele salva ó iha tempu terus nia laran.
Tanba oh Judá, ó-nia maromak sira sai barak tebes hanesan ó-nia sidade sira.+
29 Jeová dehan: ‘Tanbasá mak imi nafatin diskute malu ho haʼu?
Tanbasá mak imi hotu kontra hasoru haʼu?’+
30 Haʼu baku imi-nia oan* sira, maibé saugati deʼit.+
Sira lakohi simu dixiplina.+
Imi-nia surik rasik mak han tiha imi-nia profeta sira+
Hanesan leaun ida neʼebé ataka ema.
31 Oh imi hotu iha jerasaun ida-neʼe, hanoin didiʼak lai Jeová nia liafuan.
Ba Izraél, haʼu sai ona hanesan rai-fuik
Ka rai ida neʼebé nakukun tebes ka?
Tanbasá mak haʼu-nia povu hatete: ‘Ami laʼo-lemo ho livre.
Ami lakohi fila fali ba Ita’?+
32 Feto virjen ida bele haluha ninia sasán murak sira ka?
Noiva ida bele haluha ninia hena kazamentu nian* ka?
Maibé haʼu-nia povu rasik haluha tiha ona haʼu ba tempu kleur.+
33 Oh feto, ó sai matenek loos atu buka dalan hodi bele manán mane nia domin!
Ó treinu didiʼak ona ó-nia an hodi halo hahalok aat oioin.+
34 Ó-nia roupa* mós iha ona noda husi ema* kiak sira-nia raan neʼebé la iha sala.+
Maski sira la tama ema nia uma hodi naʼok,
Maibé sira-nia raan iha ó-nia roupa hotu.+
35 Maibé ó dehan: ‘Haʼu la iha sala.
Tebes duni, Maromak la hirus tan haʼu.’
Agora haʼu tesi-lia ba ó
Tanba ó dehan: ‘Haʼu la halo sala.’
36 Tanbasá ó hanoin ó-nia hahalok neʼebé troka bá-mai mak baibain deʼit?
37 Tan razaun neʼe mós ó sei sai ho liman neʼebé tula iha ó-nia ulun,+
Tanba Jeová la simu ona sira neʼebé ó tau fiar,
Sira sei la ajuda ó atu hetan susesu.”
3 Ema husu: “Se laʼen ida soe ninia feen no feen neʼe husik duni nia no sai fali mane seluk nian, laʼen neʼe sei fila fali ba ninia feen ka lae?”
Rai neʼe sai foʼer tebes ona, loos ka lae?+
2 Foti ó-nia matan no haree ba foho-oan sira neʼebé molik.
Iha fatin neʼebé mak mane seidauk estraga ó?
Ó tuur iha dalan ninin hodi hein sira,
Hanesan ema ida neʼebé laʼo-lemo* iha rai-fuik.
3 Tan neʼe mak udan boot la tun,+
No iha tempu udan mós udan la iha.
4 Maibé agora ó bolu fali haʼu, hodi dehan:
‘Haʼu-nia Aman, Ita-Boot mak haʼu-nia belun diʼak husi tempu neʼebé haʼu sei joven!+
5 Ita sei hirus ba nafatin ka?
Ita sempre haree haʼu-nia sala ka?’
Ó hatete hanesan neʼe,
Maibé ó kontinua halo buat aat hotu ho ó-nia kbiit tomak.”+
6 Iha Liurai Josias nia tempu,+ Jeová hatete mai haʼu: “‘Ó haree ona Izraél nia hahalok neʼebé la laran-metin ka lae? Nia saʼe ba foho aas hotu nia leten no bá ai-hun buras hotu nia okos hodi faʼan an.+ 7 Maski Izraél halo buat sira-neʼe hotu, haʼu kontinua hatete ba nia atu fila fali mai haʼu,+ maibé nia la fila. Judá hateke nafatin ba ninia biin Izraél nia hahalok sira neʼebé laran-makerek.+ 8 Haree tiha ida-neʼe, haʼu fó surat soe-malu nian+ ba Izraél neʼebé la laran-metin no haruka nia sai tanba nia halo ona adultériu.*+ Maibé ninia alin-feto Judá neʼebé laran-makerek la sai taʼuk. Nia mós faʼan an.+ 9 Nia* haree ninia hahalok faʼan an mak hanesan buat baibain deʼit, no nia kontinua halo adultériu* no hafoʼer rai neʼe hodi adora fatuk no ai sira.+ 10 Maski nuneʼe, ninia alin-feto Judá neʼebé laran-makerek lakohi fila fali mai haʼu ho laran tomak, nia finje deʼit’, Jeová mak dehan.”
11 Tuirmai Jeová dehan mai haʼu: “Izraél neʼebé la hatudu laran-metin, nia diʼak liu fali Judá neʼebé laran-makerek.+ 12 Bá no hatoʼo liafuan tuirmai neʼe ba parte norte:+
‘Jeová dehan: “Fila fali mai haʼu, oh Izraél neʼebé ulun-toos.”+ Jeová dehan: “Haʼu sei la hateke tun ba ó ho hirus,+ tanba haʼu laran-metin. Haʼu sei la rai hirus ba nafatin, 13 naran katak ó rekoñese ó-nia sala, tanba ó kontra hasoru ona Jeová, ó-nia Maromak. Ó kontinua halai tuir ema oin-foun* no faʼan an ba sira iha ai-hun buras hotu nia okos, maibé ó lakohi halo tuir haʼu-nia liafuan”, Jeová mak dehan.’
14 Jeová dehan: “Imi oan sira neʼebé ulun-toos, fila fali mai haʼu tanba haʼu sai ona imi-nia naʼin* neʼebé loos. Haʼu sei foti imi, ema ida husi sidade ida no ema naʼin-rua husi umakain ida, no haʼu sei lori imi ba Siaun.+ 15 Haʼu sei fó imi bibi-atan sira neʼebé halo tuir haʼu-nia hakarak,+ no sira sei fó-han imi ho koñesimentu no matenek. 16 Iha tempu neʼebá, imi sei iha oan no bei-oan sira no sai barak iha rai neʼe”,+ Jeová mak dehan. “Sira sei la hatete tan: ‘Jeová nia Arka Aliansa nian!’ Sira sei la hanoin tan kona-ba Arka neʼe, no sira mós sei la hanoin-hetan ka sente katak sira falta Arka neʼe, no sira mós sei la halo fali Arka foun ida. 17 Iha tempu neʼebá, sira sei temi Jeruzalein nuʼudar Jeová nia kadunan.+ Nasaun hotu sei halibur hamutuk iha Jeruzalein atu hahiʼi Jeová nia naran,+ no sira sei la ulun-toos tan hodi laʼo tuir sira-nia laran neʼebé aat.”
18 “Iha tempu neʼebá, umakain Judá sei laʼo hamutuk ho umakain Izraél.+ Sira sei sai husi rai iha parte norte no fila fali mai hamutuk toʼo rai neʼe, neʼebé haʼu fó ona ba imi-nia beiʼala sira nuʼudar liman-rohan.+ 19 Uluk haʼu hanoin: ‘Ho laran-haksolok haʼu sei tau ó iha haʼu-nia oan sira-nia leet no fó rai neʼebé diʼak ba ó, rai neʼebé nuʼudar liman-rohan furak liu iha nasaun sira-nia leet!’+ Haʼu mós hanoin katak imi sei bolu haʼu: ‘Haʼu-nia Aman!’ no imi sei nafatin laʼo tuir haʼu no sei la fila kotuk ba haʼu. 20 ‘Tebes duni, hanesan feen ida hatudu laran-makerek no husik ninia laʼen,* oh umakain Izraél, imi mós hatudu ona laran-makerek ba haʼu’,+ Jeová mak dehan.”
21 Ema rona lian iha foho-oan sira neʼebé molik,
Povu Izraél nia lian halerik no tanis hodi husu ajuda,
Tanba sira halo kleʼuk ona sira-nia dalan.
Sira haluha ona Jeová, sira-nia Maromak.+
22 “Imi oan sira neʼebé ulun-toos, fila fali mai haʼu.
Haʼu sei haloos imi-nia laran neʼebé sempre kontra.”+
No ami sei dehan: “Ami mak neʼe! Ami mai hakbesik Ita,
Tanba Ita, oh Jeová, Ita mak ami-nia Maromak.+
23 Loloos, ami habosok ami-nia an bainhira ami halo barullu iha foho-oan sira no foho sira.+
Loloos Jeová, ami-nia Maromak, mak Izraél nia salvasaun.+
24 Maibé husi tempu neʼebé ami sei joven, maromak* folin-laek neʼebé halo moe mak tolan tiha kolen neʼebé ami-nia beiʼala sira serbisu makaʼas atu hetan.+
Nia tolan sira-nia bibi no karau sira,
Sira-nia oan-mane no oan-feto sira.
25 Husik ami toba latan ho moe,
No husik ami-nia moe mak falun ami,
Tanba ami ho ami-nia aman sira halo ona sala hasoru Jeová, ami-nia Maromak,+
Husi tempu neʼebé ami sei joven toʼo ohin loron,+
No ami la halo tuir Jeová, ami-nia Maromak, nia liafuan.”
4 Jeová dehan: “Oh Izraél, se ó fila fali,
Se ó fila fali mai haʼu
No se ó halakon ó-nia estátua sira neʼebé haʼu hakribi* husi haʼu-nia oin,
Ó sei la laʼo-lemo iha ema nia rai.+
2 No se ó jura hodi lia-loos, justisa no hahalok loos, dehan:
‘Haʼu jura hodi Jeová, Maromak neʼebé moris!’,
Entaun nasaun sira sei hetan bensaun* husi Maromak,
No sira sei sente orgullu kona-ba buat neʼebé Maromak halo ona.”+
3 Tanba Jeová dehan nuneʼe ba ema Judá no Jeruzalein:
“Fila rai bá iha fatin neʼebé diʼak ba imi atu kuda fini,
No keta kari tan fini iha ai-tarak nia leet.+
4 Imi ema Judá no ema neʼebé hela iha Jeruzalein,
Halo sirkunsizaun* ba imi-nia fuan no hakruʼuk ba Jeová
No hasai buat neʼebé foʼer husi* imi-nia laran bá,+
Atu nuneʼe haʼu-nia hirus labele lakan hanesan ahi
No ahi neʼe labele lakan makaʼas toʼo la iha ida mak bele hamate,
Tanba imi-nia hahalok aat sira.”+
5 Fó sai ida-neʼe iha Judá, no haklaken iha Jeruzalein bá.
Hakilar no huu dikur iha rai tomak.+
Hakilar ho lian makaʼas hodi hatete: “Halibur hamutuk bá,
No mai ita halai ba sidade sira neʼebé iha moru aas.+
6 Tau sinál* ida hodi hatudu dalan ba Siaun.
Buka subar-fatin bá, keta hamriik deʼit”,
Tanba haʼu sei lori susar husi parte norte,+ neʼe mak susar boot.
7 Nia mosu mai ona hanesan leaun ida neʼebé sai husi ai-horis nia leet,+
Nia neʼebé sobu nasaun sira sai mai ona.+
Nia sai ona husi ninia fatin atu halo imi-nia rai sai fatin neʼebé halo ema taʼuk.
Imi-nia sidade sira sei rahun toʼo la iha ema ida mak hela.+
8 Tan neʼe, hatais hena karón* bá,+
Tanis* no halerik bá,
Tanba Jeová seidauk hatún ninia hirus neʼebé lakan makaʼas husi ita.
9 Jeová dehan: “Iha tempu neʼebá, liurai sei lakon ninia aten-brani,+
Ulun-naʼin sira mós lakon sira-nia aten-brani;
Amlulik sira sei sai taʼuk, no profeta sira sei hakfodak.”+
10 Tuirmai haʼu hatete: “Aii Jeová, Naʼi Ukun-Naʼin Boot Liu! Loloos Ita lohi ona povu+ neʼe no Jeruzalein, hodi dehan: ‘Imi sei iha dame’,+ maibé surik iha ona ami-nia kakorok.”*
11 Iha tempu neʼebá, povu neʼe no Jeruzalein sei rona liafuan tuirmai neʼe:
“Anin manas husi foho-oan sira neʼebé molik iha rai-fuik maran,
Sei huu ba haʼu-nia povu nia oan-feto.*
Anin neʼe mai laʼós atu haliri* ka hamoos trigu.
12 Haʼu mak haruka anin neʼe huu makaʼas husi fatin sira-neʼe.
Agora haʼu sei fó sai desizaun kontra sira.
13 Inimigu sei mai hanesan kalohan metan,
No ninia kuda-karreta sira mak hanesan anin-fuik.+
Ninia kuda sira halai lalais liu fali manu-makikit sira.+
‘Susar ba ita, tanba nia harahun ona ita!’
14 Oh Jeruzalein, hamoos ó-nia fuan husi hahalok aat atu ó bele hetan salvasaun.+
Toʼo bainhira mak ó sei rai hela hanoin aat sira?
15 Tanba iha lian ida neʼebé fó sai liafuan husi Dan,+
No lian neʼe fó sai dezastre husi foho sira iha Efraim.
16 Imi povu sira, fó sai kona-ba ida-neʼe ba nasaun sira.
Haklaken ida-neʼe ba Jeruzalein.”
“Espiaun sira* sei mai husi rai dook,
No sira sei hakilar lian funu nian hasoru Judá nia sidade sira.
17 Sira mai ataka Jeruzalein husi sorin-sorin hotu hanesan guarda sira neʼebé hein rai-luan,+
Tanba nia kontra hasoru ona haʼu”,+ Jeová mak dehan.
18 “Rezultadu husi ó-nia dalan no hahalok sira sei kona ó.+
Susar neʼebé kona ó mak aat tebes,
Tanba ó-nia hahalok aat neʼe tama toʼo ó-nia fuan-laran!”
19 Oh haʼu-nia terus,* haʼu-nia terus!
Haʼu-nia fuan-laran sente moras tebes.
Haʼu-nia fuan fekit makaʼas.
20 Haʼu rona ona dezastre ida ba dezastre ida seluk.
Tanba rai tomak naksobu ona.
Derrepente deʼit haʼu-nia tenda sira naksobu,
Lakleur deʼit ema sobu tiha haʼu-nia hena tenda nian.+
22 “Tanba haʼu-nia povu mak beik.+
Sira la rona haʼu.
Sira mak oan neʼebé beik, neʼebé la iha kbiit atu komprende.
Sira matenek bainhira atu halo buat neʼebé aat,
Maibé sira la hatene atu halo buat neʼebé diʼak.”
23 Haʼu hateke ba rai neʼe, maibé rai neʼe mamuk no fuik.+
Haʼu hateke ba lalehan, maibé naroman la iha tan.+
24 Haʼu hateke ba foho sira, maibé foho sira-neʼe nakdoko makaʼas,
No foho-oan sira hotu nakdoko bá-mai.+
25 Haʼu hateke, maibé ema ida mós la iha,
No manu hotu iha lalehan mós semo lakon tiha.+
26 Haʼu hateke, maibé toʼos ai-fuan nian sai ona rai-fuik,
No sidade sira hotu sobu rahun tiha.+
Neʼe tanba Jeová,
Tanba ninia hirus neʼebé lakan makaʼas.
27 Tanba Jeová dehan nuneʼe: “Rai tomak sei sai fuik,+
Maibé haʼu sei la halakon mohu rai neʼe.
Neʼe tanba haʼu mak dehan ona, haʼu deside ona,
Haʼu sei la troka haʼu-nia hanoin,* no haʼu mós sei la dada an atu kumpre haʼu-nia liafuan.+
29 Ema hotu iha sidade tomak halai sai ona+
Tanba sira rona tropa neʼebé saʼe kuda no hanadór sira-nia lian.
Sira halai tama ba ai-laran,
No sira saʼe ba fatuk boot sira.+
Sidade hotu sai mamuk ona,
No la iha ema ida mak hela.”
30 Agora ó naksobu ona, saida mak ó sei halo?
Uluk ó hatais roupa neʼebé mean lakan,
Hafurak ó-nia an ho osan-mean oioin,
No pinta metan ó-nia matan hodi halo boot ó-nia matan.
Maibé ó hafurak an saugati deʼit,+
Tanba sira neʼebé uluk kaan ó, lakohi ona ó.
Agora sira buka daudaun atu oho ó.+
31 Tanba haʼu rona lian hanesan feto neʼebé moras nia lian,
Terus hanesan feto ida neʼebé atu tuur-ahi ninia oan primeiru,
Lian husi Siaun nia oan-feto neʼebé dada iis makaʼas.
Nia loke nia liman no dehan:+
“Susar ba haʼu, haʼu kole tebes ona tanba ohodór sira!”
5 Laʼo-lemo iha dalan sira iha Jeruzalein.
Hateke haleʼu no haree didiʼak bá.
Buka toʼok iha sidade nia fatin públiku sira
Se ó bele hetan ema ida neʼebé halo hahalok loos,+
Ida neʼebé hakaʼas an atu hatudu laran-metin.
Se iha ema hanesan neʼe, haʼu sei fó perdua ba sidade neʼe.
2 Maski sira dehan: “Ami jura hodi Jeová neʼebé moris!”
Maibé sira nafatin jura falsu deʼit.+
3 Oh Jeová, Ita-nia matan buka ema neʼebé laran-metin, loos ka lae?+
Ita baku sira, maibé sira la sente moras.*
Ita halakon mohu sira, maibé sira lakohi simu dixiplina.+
4 Maibé haʼu hanoin iha haʼu-nia laran: “Loloos neʼe tanba sira mak ema baibain deʼit no la matenek.
Sira halo hahalok beik, tanba sira la hatene Jeová nia dalan,
La hatene sira-nia Maromak nia ukun-fuan.
5 Haʼu sei bá hasoru ema-boot sira no koʼalia ho sira,
Tanba haʼu fiar katak sira hatene ona Jeová nia dalan,
No sira-nia Maromak nia ukun-fuan.+
Maibé sira hotu halo tohar ona sira-nia ai-leba
No tesi kotu ona tali neʼebé kesi sira.”
6 Tan neʼe mak leaun husi ai-laran ataka sira,
Asu-lobu* husi rai-tetuk maran kontinua halo aat sira,
Leopardu latan an hodi hafuhu sira-nia sidade sira.
Sira lees mate ema hotu neʼebé sai husi sidade sira-neʼe.
Tanba sira halo ona sala barak;
Sira-nia hahalok la laran-metin mak barak tebes ona.+
7 Oinsá mak haʼu bele perdua ó-nia sala neʼe?
Ó-nia oan-mane sira husik ona haʼu,
No sira jura hodi buat sira neʼebé laʼós Maromak.+
Haʼu fó buat hotu neʼebé sira presiza,
Maibé sira nafatin halo adultériu,*
No sira laʼo nadodon ba feto-aat* nia uma.
8 Sira mak hanesan kuda-aman neʼebé kaan tebes kuda-inan.
Hanesan kuda-aman, sira hasai lian hodi kaan tebes ema seluk nia feen.+
9 Jeová dehan: “Haʼu tenke haruka sira hatán ba sira-nia hahalok aat sira-neʼe, loos ka lae?
Haʼu* tenke fó kastigu ba nasaun hanesan neʼe, loos ka lae?”+
10 “Saʼe bá, ataka ninia toʼos-uvas no estraga bá,
Maibé keta halakon mohu toʼos neʼe.+
Hasai tiha ninia dikin nurak sira neʼebé buras,
Tanba sira laʼós Jeová nian.
11 Tanba umakain Izraél no umakain Judá
Hatudu ona laran-makerek ba haʼu”, Jeová mak dehan.+
Susar sei la kona ita;
Ita sei la haree surik no mós rai-hamlaha.’+
13 Profeta sira koʼalia liafuan mamuk deʼit hanesan anin,
Sira la fó sai Maromak nia liafuan.
Husik sira lakon bá!”*
14 Tan neʼe Jeová, Maromak neʼebé ukun tropa lalehan nian, dehan nuneʼe:
“Tanba ema sira-neʼe koʼalia nuneʼe,
Haʼu sei halo haʼu-nia liafuan sira iha ó-nia ibun sai hanesan ahi,+
Povu neʼe sai hanesan ai,
No ahi sei han sira.”+
15 Jeová dehan: “Oh umakain Izraél, haʼu sei lori ba imi nasaun ida husi rai dook.+
Neʼe mak nasaun ida neʼebé iha ona husi tempu uluk kedas.
Neʼe mak nasaun antigu ida,
Nasaun ida neʼebé imi la hatene ninia língua,
No imi labele komprende buat neʼebé sira koʼalia.+
16 Sira-nia rama-fatin mak hanesan rate neʼebé nakloke.
Sira hotu mak funu-naʼin.
17 Sira sei han mohu imi-nia trigu no imi-nia paun.+
Sira sei han mohu imi-nia oan-mane no oan-feto sira.
Sira sei han mohu imi-nia bibi no karau sira.
Sira sei han mohu imi-nia uvas-hun no ai-figeira sira.
Ho surik, sira sei harahun imi-nia sidade sira neʼebé iha moru aas, neʼebé imi tau fiar.”
18 Jeová dehan: “Maski nuneʼe, haʼu sei la halakon mohu imi iha tempu neʼebá.+ 19 No bainhira sira husu: ‘Tanbasá mak ita-nia Maromak Jeová halo buat sira-neʼe ba ita?’, ó tenke fó-hatene ba sira: ‘Hanesan imi husik ona haʼu, imi-nia Maromak, no sai atan ba maromak falsu* iha imi-nia rai, nuneʼe mós imi sei sai atan ba ema estranjeiru sira iha rai ida neʼebé laʼós imi-nian.’”+
20 Hatoʼo liafuan tuirmai neʼe ba Jacob nia umakain,
No haklaken iha Judá, hodi dehan:
21 “Rona ida-neʼe bá, imi povu neʼebé beik no la iha neon:+
22 Jeová dehan: ‘Imi la taʼuk haʼu ka?
Imi tenke nakdedar iha haʼu-nia oin, loos ka lae?
Haʼu mak ida neʼebé tau ona rai-henek nuʼudar baliza ba tasi,
Ukun-fuan neʼe sei dura ba nafatin no tasi labele kontra.
Maski laloran sira baku makaʼas, maibé sira labele manán.
Maski sira sai siʼak, maibé sira nafatin labele liu baliza neʼe.+
23 Maibé povu neʼe ulun-toos no sira-nia laran lakohi halo tuir haʼu.
Sira fila kotuk ona ba haʼu no laʼo tuir sira-nia dalan rasik.+
24 No sira la dehan iha sira-nia laran:
“Agora mai ita hamtaʼuk Jeová, ita-nia Maromak,
Maromak neʼebé fó udan tuir ninia tempu,
Udan primeiru no udan ikus,*
Maromak neʼebé fó garantia katak ita sempre iha tempu atu koʼa trigu.”+
25 Imi rasik nia sala sira mak hanetik buat hirak-neʼe labele toʼo mai.
Imi rasik nia sala sira mak hapara imi labele simu buat neʼebé diʼak.+
26 Tanba iha haʼu-nia povu nia leet iha ema aat sira.
Sira hakruʼuk tun no hafuhu hela, hanesan ema neʼebé kasa manu.
Sira tau lasu neʼebé bele halo mate.
Vítima neʼebé sira kaer mak ema.
27 Hanesan gaiola neʼebé nakonu ho manu,
Nuneʼe mós sira-nia uma nakonu ho lia-bosok.+
Tan neʼe mak sira sai ema-boot no riku.
28 Sira sai bokur ona no sira-nia isin kabeer;
Sira-nia hahalok aat nakonu toʼo resin.
Sira la ajuda oan-kiak* nia kazu,+
Atu nuneʼe sira bele hetan susesu,
No sira hanetik justisa ba ema kiak.’”+
29 Jeová dehan: “Haʼu tenke haruka sira hatán ba sira-nia hahalok aat sira-neʼe, loos ka lae?
Haʼu tenke fó kastigu ba nasaun hanesan neʼe, loos ka lae?
30 Buat aat liu neʼebé halo haʼu la kontente no hakribi tebes akontese ona iha rai neʼe:
31 Profeta sira fó sai profesia bosok,+
Amlulik sira mós hanehan povu ho sira-nia podér.
No haʼu-nia povu rasik mós gosta buat hanesan neʼe.+
Maibé bainhira rohan neʼe toʼo mai, saida mak imi sei halo?”
6 Oh imi Benjamim nia oan* sira, buka fatin seguru bá, halai sai husi Jeruzalein.
Tanba dezastre ida mosu husi parte norte, neʼe mak terus boot ida.+
2 Siaun nia oan-feto* hanesan feto ida neʼebé bonita, mamar no laran-maus.+
3 Bibi-atan sira no sira-nia bibi-lubun sei mai.
4 “Prepara an bá atu funu* hasoru nia!
Hamriik bá, no mai ita ataka nia iha meiudia!”
“Susar ba ita, tanba loro-matan tun daudaun ona,
No lalatak rai-nakaras nian sai naruk daudaun ona!”
6 Tanba Jeová neʼebé ukun tropa lalehan nian dehan nuneʼe:
“Tesi tiha ai no ateru rai hodi halo aas atu ataka Jeruzalein.+
Nia mak sidade neʼebé tenke simu kastigu.
Sidade neʼe nakonu ho ema neʼebé hanehan malu.+
Iha sidade neʼe, haʼu rona beibeik ema halo violénsia no halo aat ba malu;+
Haʼu haree beibeik moras no susar oioin mosu.
8 Oh Jeruzalein, rona avizu bá, se lae, haʼu* sei husik ó tanba hakribi ó,+
No haʼu sei halo ó sai fatin neʼebé fuik, rai neʼebé la iha ema ida mak hela.”+
9 Jeová neʼebé ukun tropa lalehan nian dehan nuneʼe:
“Sira sei halibur duni ema Izraél restu hanesan kuʼu uvas-fuan restu husi uvas-hun.
Lolo fali ó-nia liman hanesan ema neʼebé kuʼu uvas-fuan husi uvas-hun.”
10 “Haʼu tenke koʼalia no fó avizu ba sé?
Sé mak sei rona?
Sira-nia tilun taka hela,* tan neʼe mak sira labele rona.+
Sira koʼalia aat hasoru Jeová nia liafuan;+
Sira la kontente ho liafuan neʼe.
11 Nuneʼe, Jeová nia hirus lakan iha haʼu-nia laran,
No haʼu kole ona atu tahan ida-neʼe.”+
“Fakar sai ida-neʼe ba labarik kiʼik neʼebé iha dalan,+
No ba grupu mane joven sira neʼebé halibur hamutuk.
Ema sei kaer sira hotu, mane hamutuk ho ninia feen,
Ema neʼebé katuas ona hamutuk ho sira neʼebé katuas liu ona.+
12 Sira-nia uma sei sai ema seluk nian,
Nuneʼe mós ho sira-nia toʼos no sira-nia feen.+
Tanba haʼu sei foti liman hasoru povu neʼebé hela iha rai neʼe”, Jeová mak dehan.
13 “Tanba husi povu kiʼik toʼo ema-boot, sira ida-idak hakarak manán buat ruma ho laran-makerek.+
Husi profeta toʼo amlulik, sira ida-idak lohi hodi hamatak ema.+
14 No sira koko atu hadiʼa haʼu-nia povu nia situasaun aat* hodi koʼalia ho ibun-midar,* hodi dehan:
‘Iha dame! Iha dame!’
Maski tuir loloos la iha dame.+
15 Sira sente moe ba buat aat oioin neʼebé sira halo ona ka lae?
Sira-nia moe la iha duni!
Sira mós la hatene moe!+
Tan neʼe, sira sei monu hamutuk ho sira neʼebé monu.
Sira sei sidi bainhira haʼu fó kastigu ba sira”, Jeová mak dehan.
16 Jeová dehan nuneʼe:
“Hamriik iha kruzamentu no haree bá.
Husu toʼok kona-ba dalan sira neʼebé antigu,
Husu toʼok dalan ida-neʼebé mak diʼak, no laʼo iha dalan neʼe,+
Atu nuneʼe imi bele hetan kmaan.”
Maibé sira dehan: “Ami lakohi laʼo iha dalan neʼe.”+
Maibé sira dehan: “Ami lakohi rona.”+
18 “Tan neʼe, oh nasaun sira, rona bá!
Oh povu sira neʼebé halibur hamutuk ona,
Hatene bá buat neʼebé sei akontese ba ema iha Jeruzalein.
19 Oh rai, rona bá!
Haʼu sei lori terus boot ba povu ida-neʼe+
Nuʼudar rezultadu ba sira-nia planu aat.
Sira la rona haʼu-nia liafuan
No sira lakohi simu haʼu-nia ukun-fuan.”*
20 “Maski imi lori olíbanu husi Sabá
No duʼut-kana morin husi rai dook, maibé neʼe lori buat diʼak saida ba haʼu?
Haʼu la simu imi-nia sakrifísiu sunu nian neʼebé hasaʼe tomak,
No imi-nia sakrifísiu sira la halo haʼu kontente.”+
21 Tan neʼe, Jeová dehan nuneʼe:
“Agora haʼu tau fatuk sira neʼebé halo povu neʼe sidi,
No sira sei sidi duni tanba fatuk sira-neʼe,
Aman ho oan sira sei sidi hamutuk,
Viziñu ho sira-nia maluk sei sidi hamutuk,
No sira hotu sei lakon.”+
22 Jeová dehan nuneʼe:
“Povu ida sei mai husi rai iha parte norte,
No nasaun ida neʼebé boot sei hamriik* hodi mai husi rai neʼebé dook liu iha mundu neʼe.+
23 Sira sei kaer rama no diman.
Sira mak siʼak tebes no la iha laran-sadiʼa.
Sira-nia lian sei tarutu hanesan tasi,
No sira saʼe kuda.+
Oh Siaun nia oan-feto, sira sei forma hodi prontu atu halo funu hanesan asuwaʼin ida hodi kontra ó.”
24 Ami rona ona kona-ba ida-neʼe.
Ami-nia liman sai kbiit-laek.+
Laran-taridu mak kaer metin ona ami,
25 Keta sai ba toʼos,
Keta laʼo iha dalan,
Tanba inimigu lori surik;
Fatin hotu nakonu ho taʼuk.
Tanis hanesan tanis ba oan-mane mesak neʼebé mate, tanis makaʼas bá,+
Tanba derrepente deʼit inimigu sei mai harahun ita.+
27 “Iha haʼu-nia povu nia leet, haʼu halo ó* sai hanesan ema neʼebé koko besi,
Tanba ó tenke buka-hatene didiʼak haʼu-nia povu;
Ó tenke haree didiʼak no hatene didiʼak sira-nia dalan.
28 Sira hotu mak ema neʼebé ulun-toos tebetebes,+
Sira laʼo bá-mai hodi koʼalia aat atu hafoʼer ema seluk nia naran.+
Sira mak hanesan riti no besi;
Sira hotu laran-aat tebes.
29 Ema serbisu makaʼas atu hamoos sira hanesan hamoos besi,+
Toʼo buat neʼebé nia uza atu huu lakan ahi sai motuk tiha.
Maibé saugati deʼit, besi-makdadi* deʼit mak suli sai husi ahi.
Ema aat sira seidauk hasai husi povu nia leet.+
30 Ema sei bolu sira nuʼudar osan-mutin neʼebé la iha folin,
Tanba Jeová la simu ona sira.”+
7 Tuirmai neʼe mak Jeová nia liafuan ba Jeremias: 2 “Bá hamriik iha portaun iha Jeová nia uma no iha neʼebá ó tenke fó sai lia-menon neʼe: ‘Rona ba Jeová nia liafuan, imi ema Judá hotu neʼebé tama liuhusi portaun sira-neʼe atu hakruʼuk ba Jeová. 3 Jeová neʼebé ukun tropa lalehan nian, Izraél nia Maromak, dehan nuneʼe: “Hadiʼa imi-nia dalan sira no imi-nia hahalok sira, hodi nuneʼe haʼu sei husik imi hela nafatin iha neʼe.+ 4 Keta tau fiar ba lia-bosok no keta hatete: ‘Neʼe mak* Jeová nia templu, Jeová nia templu, Jeová nia templu!’+ 5 Tanba se imi hadiʼa duni imi-nia dalan no hahalok sira, se imi defende justisa ba kazu sira entre ema ida ho ninia maluk,+ 6 se imi la haterus ema husi rai seluk, oan-kiak* no feto-faluk sira,+ se imi la fakar ema laran-moos nia raan iha fatin neʼe, no se imi la laʼo tuir maromak sira seluk toʼo lori susar ba imi-nia an rasik,+ 7 haʼu sei husik imi hela nafatin iha neʼe, iha rai neʼebé haʼu fó ona ba imi-nia beiʼala sira ba nafatin.”’”*
8 “Maibé imi fiar hela ba lia-bosok,+ no neʼe sei nunka lori buat diʼak ba imi. 9 Imi naʼok,+ oho ema, halo adultériu,* jura falsu,+ hasaʼe sakrifísiu ba Baal,*+ no laʼo tuir maromak sira neʼebé uluk imi la hatene, 10 tuirmai imi mai hamriik iha haʼu-nia oin iha uma ida-neʼe neʼebé lori haʼu-nia naran no hatete: ‘Ami sei hetan salvasaun’, maski imi halo daudaun buat aat sira-neʼe hotu. Haʼu bele simu ida-neʼe ka lae? 11 Tuir imi-nia haree, uma ida-neʼe neʼebé lori haʼu-nia naran sai ona naʼok-teen sira-nia knuuk ka?+ Haʼu rasik haree ona ida-neʼe”, Jeová mak dehan.
12 “‘Maibé agora, bá haʼu-nia fatin iha Silo,+ fatin primeiru neʼebé haʼu hili atu lori haʼu-nia naran,+ no haree buat neʼebé haʼu halo ona ba fatin neʼe tanba haʼu-nia povu Izraél nia hahalok aat.+ 13 Maibé imi kontinua halo hahalok sira-neʼe hotu’, Jeová mak dehan, ‘no maski haʼu koʼalia fila-fila* ba imi, maibé imi la rona.+ Haʼu bolu nafatin imi, maibé imi la hatán.+ 14 Tan neʼe, kona-ba uma neʼebé lori haʼu-nia naran,+ neʼebé imi tau fiar,+ no fatin ida-neʼe neʼebé haʼu fó ona ba imi no ba imi-nia beiʼala sira, haʼu mós sei halo duni hanesan ho buat neʼebé haʼu halo ona ba Silo.+ 15 Haʼu sei soe sai imi husi haʼu-nia oin, hanesan haʼu soe ona imi-nia maun-alin sira hotu, katak Efraim nia bei-oan hotu.’+
16 “Kona-ba ó,* keta halo orasaun ba povu neʼe nia diʼak. Keta halerik ka hasaʼe orasaun ka husu haʼu kona-ba sira-nia diʼak,+ tanba haʼu sei la rona ó.+ 17 Ó haree ka lae, buat neʼebé sira halo daudaun iha sidade sira iha Judá no iha dalan sira iha Jeruzalein? 18 Oan-mane sira hili ai, aman sira halakan ahi, no feen sira deʼut trigu atu tunu dose hodi hasaʼe sakrifísiu ba Liurai-Feto Lalehan nian,*+ no sira fui sakrifísiu hemu nian ba maromak sira seluk hodi hakanek haʼu-nia laran.+ 19 Jeová dehan: ‘Maibé haʼu mak ida neʼebé sira hakanek* ka lae? Sira hakanek sira-nia an toʼo hamoe sira-nia an rasik, loos ka lae?’+ 20 Tan neʼe, Jeová, Naʼi Ukun-Naʼin Boot Liu, dehan nuneʼe: ‘Haʼu sei fakar tun haʼu-nia hirus no laran-nakali ba fatin neʼe,+ ba ema no ba animál, ba ai-hun sira iha rai no ba rezultadu iha toʼos. Haʼu-nia hirus sei sai hanesan ahi neʼebé labele hamate.’+
21 “Jeová neʼebé ukun tropa lalehan nian, Izraél nia Maromak, dehan nuneʼe: ‘Fó deʼit imi-nia sakrifísiu sunu nian neʼebé hasaʼe tomak, hamutuk ho imi-nia sakrifísiu sira seluk, no han naʼan sira-neʼe.+ 22 Tanba iha loron neʼebé haʼu lori imi-nia beiʼala sira sai husi rai-Ejitu, haʼu la haruka sira no la koʼalia ba sira kona-ba sakrifísiu sunu nian neʼebé hasaʼe tomak no sakrifísiu sira seluk.+ 23 Maibé haʼu fó duni mandamentu tuirmai neʼe ba sira: “Halo tuir haʼu-nia liafuan bá, no haʼu sei sai imi-nia Maromak, no imi sei sai haʼu-nia povu.+ Imi tenke laʼo tuir dalan hotu neʼebé haʼu haruka, hodi nuneʼe imi-nia moris bele laʼo ho diʼak.”’+ 24 Maibé sira la rona haʼu no la see tilun mai haʼu;+ sira laʼo tuir sira-nia planu* rasik. Ho ulun-toos, sira halo tuir sira-nia laran aat.+ Sira fila fali ba kotuk no la laʼo ba oin 25 husi loron neʼebé imi-nia beiʼala sira sai husi rai-Ejitu toʼo ohin loron.+ Tan neʼe, haʼu haruka nafatin haʼu-nia atan profeta hotu ba imi, haʼu haruka sira fila-fila, loron ba loron.*+ 26 Maibé sira lakohi rona haʼu no la see tilun mai haʼu.+ Sira ulun-toos no halo hahalok aat liu fali sira-nia beiʼala!
27 “Ó sei koʼalia ba sira liafuan sira-neʼe hotu,+ maibé sira sei la rona ó. Ó sei bolu sira, maibé sira sei la hatán ó. 28 No ó sei dehan ba sira: ‘Neʼe mak nasaun neʼebé la halo tuir sira-nia Maromak Jeová nia liafuan no lakohi simu dixiplina. Sira-nia laran-metin lakon mohu ona, no sira mós la koʼalia tan kona-ba ida-neʼe iha sira-nia leet.’+
29 “Tesi hotu ó-nia* fuuk neʼebé seidauk tesi* no soe tiha ida-neʼe, no iha foho-oan sira neʼebé molik ona, kanta knananuk triste nian* bá, tanba Jeová la simu ona jerasaun neʼe, no nia sei husik hela jerasaun neʼe neʼebé halo nia laran-nakali. 30 ‘Tanba ema Judá halo ona buat neʼebé aat tuir haʼu-nia haree’, Jeová mak dehan. ‘Sira tau sira-nia estátua sira neʼebé haʼu hakribi* iha uma neʼebé lori haʼu-nia naran, hodi hafoʼer uma neʼe.+ 31 Sira harii ona fatin aas* iha Tofet, neʼebé iha Foho-Leet Hinom,*+ hodi sunu sira-nia oan-mane no oan-feto iha ahi.+ Neʼe mak hahalok neʼebé haʼu nunka haruka sira atu halo no haʼu nunka hanoin kona-ba ida-neʼe.’*+
32 “Jeová dehan: ‘Tan neʼe, tempu sei toʼo mai bainhira ema sei la temi tan fatin neʼe nuʼudar Tofet ka Foho-Leet Hinom,* maibé temi fali nuʼudar Foho-Leet Masakre. Sira sei hakoi mate-isin iha Tofet toʼo la iha tan fatin atu hakoi.+ 33 No povu neʼe nia mate-isin sei sai ai-han ba manu sira iha lalehan no animál sira iha rai, no la iha ema ida mak halo sira taʼuk no duni sai sira.+ 34 Iha sidade sira iha Judá no iha dalan sira iha Jeruzalein, haʼu sei hapara lian haklalak no lian haksolok, lian husi noivu no lian husi noiva,+ tanba rai neʼe sei estraga tiha no sei sai fuik.’”+
8 Jeová dehan: “Iha tempu neʼebá, ema sei keʼe sai rai-Judá nia liurai sira-nia ruin husi rate, no mós ulun-naʼin sira-nia ruin, amlulik sira-nia ruin, profeta sira-nia ruin no ema Jeruzalein sira-nia ruin. 2 Ema sira-neʼe nia ruin sei namkari iha loro-matan, fulan no fitun* hotu nia okos. Uluk sira hadomi, serbí, halo tuir, buka tuir no hakruʼuk ba buat sira-neʼe.+ Sira-nia ruin sei la halibur fali no mós sei la hakoi fali. Ruin sira-neʼe sei sai hanesan adubu* iha rai.”+
3 Jeová neʼebé ukun tropa lalehan nian, dehan: “No ema restu husi umakain aat neʼe neʼebé sei moris hela, sira sei hili atu mate deʼit duké moris iha fatin hotu neʼebé haʼu halo sira namkari bá.
4 Ó tenke hatete ba sira: ‘Jeová dehan nuneʼe:
“Sira sei monu no la hamriik fali ka?
Se ema ida hakarak fila fali, ema seluk mós sei fila fali, loos ka lae?
5 Tanbasá mak ema Jeruzalein nafatin la hatudu laran-metin ba haʼu?
Sira kaer metin lia-bosok,
No sira lakohi fila fali mai haʼu.+
6 Haʼu tau atensaun no kontinua rona, maibé buat neʼebé sira koʼalia la loos.
La iha ema ida mak arrepende ninia hahalok aat ka husu: ‘Saida mak haʼu halo ona?’+
Sira ida-idak fila fali ba dalan neʼebé ema barak gosta laʼo bá, hanesan ho kuda ida neʼebé halai makaʼas tama ba funu.
7 Manu-segoña iha lalehan deʼit mós hatene ho loloos ninia tempu.*
Manu-lakateu, manu-andoriña no manu-tordu* mós hatene ho didiʼak tempu neʼebé sira fila fali ba sira-nia knuuk.*
Maibé haʼu-nia povu rasik la komprende tempu neʼebé Jeová sei tesi-lia ba sira.”’+
8 ‘Oinsá mak imi bele hatete: “Ami mak matenek, no ami iha Jeová nia ukun-fuan”?*
Tanba loloos, eskriba* sira uza kaneta*+ falsu* atu hakerek deʼit lia-bosok.
9 Ema matenek sira hetan ona moe.+
Sira sai taʼuk tebes no sei monu ba lasu.
Sira la simu ona Jeová nia liafuan,
Entaun sira iha matenek saida?
10 Tan neʼe, haʼu sei fó sira-nia feen ba mane seluk,
No sira-nia toʼos sei sai ema seluk nian.+
Tanba husi povu kiʼik toʼo ema-boot, sira ida-idak hakarak manán buat ruma ho laran-makerek.+
Husi profeta toʼo amlulik, sira ida-idak lohi hodi hamatak ema.+
11 No sira koko atu hadiʼa haʼu-nia povu nia oan-feto nia situasaun aat* hodi koʼalia ho ibun-midar,* dehan:
“Iha dame! Iha dame!”
Maski tuir loloos la iha dame.+
12 Sira sente moe ba buat aat oioin neʼebé sira halo ona ka lae?
Sira-nia moe la iha duni!
Sira mós la hatene moe!+
Tan neʼe, sira sei monu hamutuk ho sira neʼebé monu.
Sira sei sidi bainhira haʼu fó kastigu ba sira’,+ Jeová mak dehan.
13 ‘Bainhira haʼu halibur sira, haʼu sei halakon sira’, Jeová mak dehan.
‘Uvas-hun sei la iha tan fuan, ai-figeira sei la iha tan fuan, no ai-tahan sira sei sai namlaek.
Buat hotu neʼebé haʼu fó ba sira sei la iha tan.’”
14 “Tanbasá mak ita tuur deʼit iha neʼe?
Mai ita halibur hamutuk no tama ba sidade sira neʼebé iha moru aas+ no mai ita mate mohu iha neʼebá.
Tanba Jeová ita-nia Maromak sei halakon ita,
Nia fó bee venenu ba ita atu hemu,+
Tanba ita halo ona sala hasoru Jeová.
15 Ita hein dame, maibé buat diʼak ida mós la mosu mai,
Ita hein tempu kura nian, maibé taʼuk deʼit mak iha!+
16 Ema bele rona inimigu nia kuda sira-nia lian husi Dan.
Rai tomak nakdoko
Tanba ninia kuda-aman sira-nia lian.
Inimigu tama mai no han mohu rai neʼe ho buat hotu neʼebé iha rai neʼe,
Sidade no mós ema iha sidade neʼe.”
17 Jeová dehan: “Haʼu sei haruka samea sira ba imi-nia leet,
Samea venenu sira neʼebé labele halo maus ho maninga,
No sira sei tata duni imi.”
18 Haʼu-nia laran-triste kura labele.
Haʼu-nia laran moras tebes.
19 Husi rai neʼebé dook mak haʼu-nia povu nia oan-feto
Hasai lian halerik hodi husu ajuda, dehan:
“Jeová la hela ona iha Siaun ka?
Ninia liurai la iha ona iha neʼebá ka?”
“Tanbasá mak sira halo haʼu laran-kanek ho sira-nia estátua,
Ho sira-nia maromak falsu neʼebé folin-laek?”
20 “Tempu koʼa nian liu ona, no tempu manas* mós remata ona,
Maibé ita seidauk hetan salvasaun!”
21 Haʼu-nia laran rahun tanba haʼu-nia povu nia oan-feto nia situasaun aat;+
Haʼu sente laran-triste.
Taʼuk mak kaer metin haʼu.
22 Iha Gilead, la iha mina-bálsamu* ka?+
La iha doutór iha neʼebá ka?+
Tanbasá mak haʼu-nia povu nia oan-feto labele sai isin-diʼak fali?+
9 Oh se karik haʼu-nia ulun mak bee-matan,
No haʼu-nia matan mak hun ba matan-been!+
Se nuneʼe, haʼu bele tanis loron no kalan
Ba haʼu-nia povu sira neʼebé ema oho tiha ona.
2 Oh se karik haʼu hatene toba-fatin ba ema laʼo-rai sira iha rai-fuik!
Se nuneʼe, haʼu bele husik hela haʼu-nia povu no laʼo dook husi sira,
Tanba sira hotu halo adultériu,*+
Sira hotu laran-makerek.
3 Sira prepara sira-nia nanál hanesan rama.
Lia-bosok mak nakonu iha rai neʼe, laʼós hahalok laran-metin.+
“Sira-nia hahalok aat sai aat liután.
No sira la rona haʼu”,+ Jeová mak dehan.
4 “Imi hotu, kuidadu ho imi-nia maluk,
No keta tau fiar ba imi-nia maun-alin sira.
Tanba imi-nia maun-alin sira hotu mak traidór,+
No maluk sira hotu koʼalia aat hodi hafoʼer ema nia naran.+
5 Sira hotu lohi sira-nia maluk,
No la iha ema ida mak koʼalia lia-loos.
Sira hanorin sira-nia nanál atu koʼalia bosok.+
Sira hakole sira-nia an ho hahalok sala.
6 Ó hela daudaun iha lohidór sira-nia leet.
Sira lakohi hatene haʼu tanba sira bosok-teen”, Jeová mak dehan.
7 Tan neʼe, Jeová neʼebé ukun tropa lalehan nian, dehan:
“Haʼu sei hamoos* sira, no haʼu sei koko sira,+
Tanba saida tan mak haʼu bele halo ba haʼu-nia povu nia oan-feto?
8 Sira bosok, sira-nia nanál mak hanesan rama-oan neʼebé oho ema.
Ema ida koʼalia kona-ba dame ba ninia maluk ho ibun-tutun deʼit,
Maibé iha laran, nia hanoin hela atu ataka ninia maluk.”
9 Jeová dehan: “Haʼu tenke haruka sira hatán ba sira-nia hahalok aat sira-neʼe, loos ka lae?
Haʼu tenke fó kastigu ba nasaun hanesan neʼe, loos ka lae?+
10 Haʼu sei tanis no halerik ba foho sira
No haʼu sei kanta knananuk triste nian* ba duʼut sira iha rai-fuik,
Tanba ahi han mohu ona buat hotu no la iha ema ida mak laʼo liu,
No labele rona ona animál-hakiak sira-nia lian.
Manu sira iha lalehan no animál sira mós halai lakon, sira hotu la iha tan.+
11 Haʼu sei halo Jeruzalein sai fatuk butuk boot+ no asu-xakál sira-nia hela-fatin,+
No haʼu sei halo Judá nia sidade sira sai fatin fuik, neʼebé la iha ema ida mak hela.+
12 Sé mak iha matenek atu bele komprende ida-neʼe?
Ba sé mak Jeová koʼalia atu nia bele haklaken ida-neʼe?
Tanbasá mak rai neʼe tenke lakon mohu?
Tanbasá mak rai neʼe tenke sai maran-dekor hanesan rai-fuik,
Toʼo ema ida mós labele laʼo liu?”
13 Jeová hatán: “Tanba sira lakohi simu haʼu-nia ukun-fuan* neʼebé haʼu fó ona ba sira, no tanba sira la laʼo tuir ukun-fuan neʼe no la halo tuir haʼu-nia liafuan. 14 Maibé ho ulun-toos sira laʼo tuir sira-nia laran rasik,+ no sira laʼo tuir estátua Baal sira, hanesan sira-nia aman hanorin ona sira atu halo.+ 15 Tan neʼe, Jeová neʼebé ukun tropa lalehan nian, Izraél nia Maromak, dehan: ‘Agora haʼu sei halo povu neʼe han ai-tahan neʼebé moruk, no haʼu sei halo sira hemu bee venenu.+ 16 Haʼu sei halo sira namkari iha nasaun sira seluk nia leet, nasaun neʼebé sira no mós sira-nia aman seidauk hatene,+ no haʼu sei haruka surik duni tuir sira toʼo haʼu halakon tiha sira.’+
17 Jeová neʼebé ukun tropa lalehan nian dehan:
‘Hanoin didiʼak kona-ba buat neʼebé akontese daudaun.
18 Atu nuneʼe sira bele mai lalais no kanta knananuk triste nian ba ita,
Hodi nuneʼe ita-nia matan-been bele suli tun
No ita-nia matan-been turuk husi ita-nia matan.+
19 Tanba iha lian halerik nian husi Siaun,+ neʼebé dehan:
“Ema harahun ami toʼo mohu ona!
Ami sente moe tebes!
Tanba ami husik tiha rai neʼe no sira estraga ona ami-nia hela-fatin hotu.”+
20 Imi feto sira, rona Jeová nia liafuan bá.
No see tilun ba liafuan husi ninia ibun.
Hanorin knananuk triste nian* neʼe ba imi-nia oan-feto sira.
No hanorin knananuk triste nian+ neʼe ba malu.
21 Tanba mate mak tama mai liuhusi ita-nia janela sira;
Mate neʼe tama mai ona iha ita-nia uma aas* sira neʼebé seguru
Atu foti labarik sira iha dalan
No mane joven sira iha sidade nia fatin públiku.’+
22 Hatete bá: ‘Jeová dehan nuneʼe:
“Ema nia mate-isin sira sei sai hanesan adubu* iha toʼos,
Hanesan trigu neʼebé toʼos-naʼin foin koʼa no husik hela iha kotuk,
La iha ema ida mak sei halibur sira.”’”+
23 Jeová dehan nuneʼe:
“Ema neʼebé matenek keta gaba an kona-ba ninia matenek.+
Ema neʼebé forsa boot keta gaba an kona-ba ninia forsa.
No ema neʼebé riku keta gaba an kona-ba ninia rikusoin.”+
24 “Maibé ema neʼebé gaba an, bele gaba an kona-ba buat tuirmai neʼe:
Katak nia iha kbiit atu komprende kleʼan no iha koñesimentu kona-ba haʼu,+
Katak haʼu mak Jeová, Maromak neʼebé hatudu domin neʼebé laran-metin, justisa, no hahalok loos iha rai,+
Tanba haʼu haksolok ho buat hirak-neʼe”,+ Jeová mak dehan.
25 Jeová dehan: “Tempu sei toʼo mai, no haʼu sei tesi-lia ba ema hotu neʼebé hetan ona sirkunsizaun* maibé tuir loloos seidauk hetan sirkunsizaun,+ 26 neʼe katak, ba ema Ejitu,+ ema Judá,+ ema Edom,+ no mós ba ema Ammon,+ ema Moab,+ no ema hotu neʼebé hela iha rai-fuik, neʼebé tesi badak ona sira-nia fuuk iha tilun-hun.+ Tanba nasaun sira-neʼe hotu seidauk hetan sirkunsizaun, no umakain Izraél tomak mós seidauk hetan sirkunsizaun iha laran.”+
10 Oh umakain Izraél, rona ba Jeová nia liafuan neʼebé dehan ona ba imi. 2 Jeová dehan nuneʼe:
“Keta aprende nasaun sira seluk nia hahalok,+
No keta sai taʼuk ba sinál sira iha lalehan
Tanba nasaun sira mak taʼuk buat sira-neʼe.+
3 Tanba ema sira-neʼe nia lisan mak folin-laek.
Sira-nia estátua mak ai-hun deʼit neʼebé tesi tiha ona husi ai-laran,
4 Sira hafurak ida-neʼe ho osan-mutin no osan-mean+
No prega metin ida-neʼe ho martelu no pregu hodi labele monu.+
5 Estátua sira labele koʼalia+ hanesan ho boneka duʼut* iha toʼos-pepinu.
Ema mak tenke lori sira, tanba sira labele laʼo.+
Keta taʼuk sira, tanba sira labele halo aat ba imi,
No sira mós labele halo buat neʼebé diʼak.”+
6 Oh Jeová, la iha ida mak hanesan Ita-Boot.+
Ita mak boot liu, no Ita-nia naran mak boot liu no kbiit-waʼin.
7 Oh Liurai ba nasaun sira,+ sé mak sei la hamtaʼuk Ita-Boot? Ita-Boot merese duni ida-neʼe,
Tanba husi matenek-naʼin hotu no liurai hotu iha nasaun sira-nia leet,
La iha ida mak hanesan Ita-Boot.+
8 Sira hotu la iha hanoin no beik-teen.+
Hanorin husi ai-hun mak folin-laek.+
9 Osan-mutin belar husi Tarsis+ no osan-mean husi Ufaz,
Badaen sira no badaen-besi nian uza buat sira-neʼe atu falun ai,
Sira fó-hatais ai ho roupa husi kabas kór-azúl no kabas kór-violeta husi bibi-malae fulun.
Badaen matenek sira mak halo buat hotu neʼe.
10 Maibé Jeová mak Maromak duni.
Nia mak Maromak neʼebé moris+ no Liurai rohan-laek.+
Rai sei nakdoko makaʼas tanba ninia hirus,+
No la iha nasaun ida mak bele tahan hasoru ninia hirus.
11 * Imi tenke hatete ba sira:
“Maromak sira neʼebé la kria lalehan no rai
Sei lakon mohu husi rai no mós husi lalehan okos.”+
12 Nia mak Kriadór neʼebé halo mundu ho ninia kbiit,
Ida neʼebé hametin rai ho ninia matenek+
No Ida neʼebé nahe lalehan hanesan hena ho ninia kbiit atu komprende.+
13 Bainhira nia hasai lian,
Bee iha lalehan sai siʼak,+
14 Ema hotu hatudu hahalok beik no la iha koñesimentu.
Badaen-besi hotu sei hetan moe tanba estátua neʼebé sira halo,+
Tanba sira-nia estátua besi mak falsu,
15 Estátua hotu neʼebé badaen halo mak folin-laek no merese atu ema hatete aat.+
Bainhira sira-nia loron kastigu nian toʼo mai, sira sei lakon mohu.
16 Maibé Jacob nia Maromak la hanesan ho estátua sira-neʼe,
Tanba nia mak Ida neʼebé kria buat hotu-hotu,
No Izraél mak Maromak nia ai-tonka; ai-tonka neʼe mak ninia liman-rohan.+
Ninia naran mak Jeová, neʼebé ukun tropa lalehan nian.+
17 Oh feto neʼebé moris susar tanba inimigu halo serku daudaun,
Haloot ó-nia sasán sira husi rai.
18 Tanba Jeová dehan nuneʼe:
19 Susar ba haʼu tanba haʼu-nia situasaun neʼebé aat!*+
Haʼu-nia kanek kura labele.
Haʼu hatete: “Neʼe mak haʼu-nia moras duni, no haʼu tenke tahan ida-neʼe.
20 Ema estraga ona haʼu-nia tenda, ema tesi kotu ona haʼu-nia tenda nia talin hotu.+
Haʼu-nia oan-mane sira husik ona haʼu no sira la iha tan.+
La iha ema ida mak dada ka hasaʼe fali haʼu-nia hena tenda nian.
Tan neʼe mak sira hatudu hahalok la matenek,
No sira-nia bibi hotu halai namkari tiha.”+
22 Rona ba lia-menon ida! Neʼe toʼo mai daudaun!
Tarutu makaʼas husi rai iha parte norte,+
Atu halo rai-Judá nia sidade sira sai fatin fuik no asu-xakál sira-nia hela-fatin.+
23 Oh Jeová, haʼu hatene duni katak ema la iha kbiit* atu hili ninia dalan rasik.
Ema neʼebé laʼo mós la iha kbiit* atu hili ninia hakat.+
24 Oh Jeová, korrije haʼu ho Ita-nia justisa,
Maibé keta korrije ho hirus,+ hodi nuneʼe Ita la halakon mohu haʼu.+
25 Fakar sai Ita-nia hirus ba nasaun sira neʼebé lakohi rona Ita+
No ba umakain sira neʼebé la bolu Ita-nia naran.
Tanba sira han mohu ona Jacob,+
Loos, sira han mohu nia toʼo nia besik atu lakon mohu ona,+
No sira estraga ona ninia hela-fatin.+
11 Tuirmai neʼe mak Jeová nia liafuan ba Jeremias: 2 “Imi povu sira, rona liafuan aliansa neʼe bá!
“Hatoʼo* liafuan sira-neʼe ba ema Judá no ba ema neʼebé hela iha Jeruzalein 3 no hatete ba sira: ‘Jeová, Izraél nia Maromak, dehan: “Malisan ba ema neʼebé la halo tuir liafuan aliansa neʼe,+ 4 neʼebé haʼu halo ona ho imi-nia beiʼala sira iha loron neʼebé haʼu lori sira sai husi rai-Ejitu+ neʼebé hanesan fornu besi,+ hodi dehan: ‘Halo tuir haʼu-nia liafuan bá, no halo tuir mandamentu hotu neʼebé haʼu fó ba imi; no imi sei sai haʼu-nia povu no haʼu sei sai imi-nia Maromak,+ 5 hodi nuneʼe haʼu bele kumpre juramentu neʼebé haʼu dehan ona ba imi-nia beiʼala sira, atu fó ba sira rai neʼebé iha susubeen no bani-been barak.’+ No imi hela iha rai neʼe toʼo ohin loron.”’”
Haʼu hatán: “Amen,* oh Jeová.”
6 Tuirmai Jeová hatete mai haʼu: “Haklaken liafuan hotu neʼe iha sidade sira iha Judá no iha dalan sira iha Jeruzalein: ‘Rona ba liafuan aliansa neʼe, no halo tuir bá. 7 Tanba haʼu hanorin no fó avizu ba imi-nia beiʼala sira husi loron neʼebé haʼu lori sira sai husi rai-Ejitu toʼo ohin loron, haʼu hanorin sira fila-fila,* hodi dehan: “Halo tuir haʼu-nia liafuan bá.”+ 8 Maibé sira la rona no la see tilun. Ho ulun-toos, sira ida-idak kontinua laʼo tuir sira-nia laran neʼebé aat.+ Sira lakohi halo tuir buat neʼebé haʼu haruka ona sira atu halo, tan neʼe haʼu halo ba sira tuir liafuan hotu husi aliansa neʼe.’”
9 Tuirmai Jeová hatete mai haʼu: “Ema Judá no ema neʼebé hela iha Jeruzalein futu lia hasoru haʼu. 10 Sira fila fali ba sala neʼebé sira-nia beiʼala halo ona, beiʼala sira iha tempu uluk neʼebé lakohi halo tuir haʼu-nia liafuan.+ Sira mós laʼo tuir no adora maromak sira seluk.+ Umakain Izraél no umakain Judá hotu la halo tuir haʼu-nia aliansa neʼebé haʼu halo ona ho sira-nia beiʼala.+ 11 Tan neʼe Jeová dehan nuneʼe: ‘Haʼu sei lori terus boot ba sira,+ no sira labele halai sees husi terus neʼe. Bainhira sira bolu haʼu atu husu ajuda, haʼu sei la rona ba sira.+ 12 Nuneʼe, ema iha sidade sira iha Judá no ema neʼebé hela iha Jeruzalein sei bá atu husu ajuda ba maromak sira neʼebé sira hasaʼe sakrifísiu.*+ Maibé maromak sira-neʼe sei la salva sira iha tempu neʼebé sira hasoru terus. 13 Imi-nia maromak sira sai barak hanesan ho imi-nia sidade sira, oh Judá, no imi harii ona altár neʼebé barak hanesan ho imi-nia dalan sira iha Jeruzalein, altár ba maromak* folin-laek neʼebé halo moe, altár sira atu hasaʼe sakrifísiu ba Baal.’+
14 “Kona-ba ó,* keta halo orasaun ba povu neʼe nia diʼak. Keta halerik ka hasaʼe orasaun ba sira-nia diʼak,+ tanba haʼu sei la rona bainhira sira husu ajuda tanba sira-nia terus.
15 Ema neʼebé haʼu hadomi iha direitu atu mai iha haʼu-nia uma ka lae?
Sira barak halo ona planu aat oioin.
Ó hasaʼe sakrifísiu naʼan santu* barak maibé bainhira terus toʼo mai, buat sira-neʼe bele hasees ó husi terus ka lae?
Iha tempu neʼebá, ó sei sente haksolok ka lae?
16 Uluk Jeová hanaran ó ai-oliveira buras,
Ai neʼebé furak ho fuan kapás.
Maibé nia halo tarutu makaʼas, nia halakan ahi no sunu ai neʼe,
No inimigu sira hatohar ona ai neʼe nia sanak sira.
17 “Jeová neʼebé ukun tropa lalehan nian, Ida neʼebé kuda ó,+ fó sai ona katak terus sei toʼo ba ó, tanba umakain Izraél no umakain Judá halo ona hahalok aat. Sira hasaʼe sakrifísiu ba Baal hodi hakanek haʼu-nia laran.”+
18 Jeová fó-hatene ona mai haʼu.
Iha tempu neʼebá, Ita halo ona haʼu haree buat neʼebé sira halo.
19 Haʼu hanesan bibi-malae oan maus neʼebé ema lori bá atu oho.
Haʼu la hatene katak sira halo planu aat ba haʼu,+ hodi dehan:
“Mai ita tesi tiha ai-hun neʼe ho ninia fuan,
Mai ita halakon tiha nia husi rai neʼebé ema moris sira hela bá,
Atu nuneʼe ema la hanoin-hetan tan ninia naran.”
20 Maibé Jeová neʼebé ukun tropa lalehan nian tesi-lia ho justisa.
Oh Maromak, husik haʼu haree Ita-Boot selu fali sira-nia hahalok aat,
Tanba haʼu entrega ona haʼu-nia kazu ba Ita.
21 Tuirmai neʼe mak Jeová nia liafuan ba ema Anatot sira+ neʼebé buka daudaun atu oho ó. Sira dehan: “Ó labele fó sai profesia hodi Jeová nia naran,+ se lae, ó sei mate iha ami-nia liman.” 22 Tan neʼe, Jeová neʼebé ukun tropa lalehan nian dehan: “Sira tenke hatán ba sira-nia hahalok aat. Mane joven sira sei mate ho surik,+ sira-nia oan-mane no oan-feto sira sei mate ho hamlaha.+ 23 Sei la iha ema ida mak moris, tanba haʼu sei fó-terus ba ema Anatot sira+ iha tinan neʼebé sira tenke hatán ba sira-nia hahalok aat.”
12 Oh Jeová, bainhira haʼu halerik ba Ita,
No bainhira haʼu koʼalia kona-ba justisa ho Ita, Ita-nia hahalok mak loos.+
Maibé tanbasá mak ema aat sira moris diʼak?+
Tanbasá mak ema laran-makerek sira nunka sente laran-taridu?
2 Ita kuda ona sira, no sira-nia abut metin ona.
Sira sai buras ba beibeik no fó fuan.
Sira temi Ita ho ibun-tutun, maibé sira-nia laran* dook husi Ita.+
3 Maibé oh Jeová, Ita hatene didiʼak haʼu+ no haree haʼu.
Ita haree haʼu-nia laran no hatene ona katak haʼu-nia laran ida deʼit ho Ita.+
Fahe sira ida-idak hanesan bibi-malae neʼebé lori atu bá oho,
No haketak sira ba loron oho nian.
4 Toʼo bainhira loos mak rai neʼe tenke sai maran
No modo sira iha toʼos hotu tenke sai maran?+
Animál no manu sira lakon mohu
Tanba sira neʼebé hela iha rai neʼe halo hahalok aat.
Tanba sira dehan: “Nia la haree buat neʼebé sei akontese ba ita.”
5 Tuirmai Maromak dehan mai haʼu: “Se ó halai deʼit hamutuk ho halaidór sira halo ó sente kole ona,
Oinsá mak ó bele halai-taru ho kuda sira?+
Se ó sente fiar an tanba ó hela iha rai neʼebé iha dame,
Oinsá se ó hela iha ai-laran iha Mota Jordaun nia ninin?
6 Tanba maski sira mak ó-nia maun-alin rasik husi ó-nia aman nia umakain,
Sira laran-makerek ba ó.+
Sira hakilar makaʼas hodi kontra ó.
Keta tau fiar ba sira,
Maski sira koʼalia buat diʼak deʼit ba ó.”
7 “Haʼu husik ona haʼu-nia uma,+ haʼu husik hela ona haʼu-nia liman-rohan.+
Haʼu entrega ona haʼu-nia doben ba ninia inimigu nia liman.+
8 Haʼu-nia liman-rohan sai ona hanesan leaun iha ai-laran.
Haʼu-nia povu hasai lian hasoru haʼu hanesan leaun.
Tan neʼe mak haʼu odi nia.
9 Haʼu-nia liman-rohan mak hanesan manu-makikit neʼebé kór oioin;*
Manu-makikit sira seluk mai haleʼu nia no ataka nia.+
Imi animál hotu iha rai-luan, mai, halibur hamutuk,
Mai han bá.+
Sira halo haʼu-nia rai neʼebé folin-boot sai fali rai-fuik neʼebé mamuk.
11 Rai neʼe sai fatin neʼebé estraga tiha ona.
Rai tomak sai fuik no mamuk ona,
Maibé la iha ema ida mak hanoin kona-ba neʼe.+
12 Sira mai liuhusi dalan hotu* iha rai-fuik atu estraga buat barak,
Tanba Jeová nia surik han mohu rai neʼe husi rohan ida toʼo rohan seluk.+
La iha ema ida mak hetan dame.
13 Sira kuda trigu, maibé sira koʼa deʼit ai-tarak.+
Sira hakole an, maibé la hetan buat diʼak.
Sira sei sente moe tanba buat neʼebé sira koʼa
Tanba Jeová nia hirus neʼebé lakan makaʼas.”
14 Jeová dehan nuneʼe: “Haʼu-nia viziñu sira hotu neʼebé aat, neʼebé book daudaun rai neʼebé haʼu fó ona ba haʼu-nia povu Izraél nuʼudar sira-nia liman-rohan,+ haʼu sei fokit sai sira husi sira-nia rai.+ Haʼu mós sei fokit sai umakain Judá husi sira-nia leet. 15 Maibé bainhira haʼu fokit sai tiha sira, haʼu sei hatudu laran-sadiʼa ba sira no lori sira ida-idak fila fali ba sira-nia liman-rohan no ba sira-nia rai.”
16 “No se sira aprende haʼu-nia povu nia dalan no se sira jura hodi haʼu-nia naran, dehan: ‘Ami jura hodi Jeová, Maromak neʼebé moris!’ hanesan uluk sira hanorin haʼu-nia povu jura hodi Baal nia naran, se nuneʼe sira sei hela metin iha haʼu-nia povu nia leet. 17 Maibé se nasaun sira-neʼe ida lakohi halo tuir, haʼu sei fokit sai hotu nasaun neʼe no halakon tiha nia”, Jeová mak dehan.+
13 Jeová dehan nuneʼe mai haʼu: “Bá sosa sintu ida neʼebé halo husi hena-liñu no kesi iha ó-nia knotak, maibé keta husik sintu neʼe kona bee.” 2 Nuneʼe haʼu sosa sintu ida hodi halo tuir Jeová nia liafuan, no kesi iha haʼu-nia knotak. 3 Depois neʼe, Jeová koʼalia mai haʼu ba dala segundu, hodi dehan: 4 “Lori sintu neʼebé ó sosa ona, neʼebé iha ó-nia knotak no bá Mota Eufrates, no subar sintu neʼe iha fatuk boot nia kuak.” 5 Nuneʼe haʼu bá toʼo Mota Eufrates no subar sintu neʼe, hodi halo tuir mandamentu neʼebé Jeová fó sai ona mai haʼu.
6 Maibé liutiha loron barak, Jeová dehan mai haʼu: “Bá Mota Eufrates, no foti fali sintu neʼebé haʼu haruka ó hakoi iha neʼebá.” 7 Nuneʼe haʼu bá toʼo Mota Eufrates no keʼe sai sintu neʼe husi fatin neʼebé haʼu subar sintu neʼe. No haʼu haree katak sintu neʼe aat tiha ona, no labele uza tan.
8 Tuirmai Jeová koʼalia mai haʼu: 9 “Jeová dehan nuneʼe: ‘Hanesan ho sintu neʼe, haʼu mós sei halakon Judá nia hahalok foti an no Jeruzalein nia hahalok neʼebé foti an tebes.+ 10 Povu aat neʼe lakohi halo tuir haʼu-nia liafuan.+ Ho ulun-toos sira halo tuir sira-nia laran rasik,+ no laʼo tuir maromak sira seluk hodi serbí no hakruʼuk ba maromak sira-neʼe. Povu neʼe sei sai hanesan sintu aat neʼe neʼebé labele uza tan.’ 11 Jeová dehan: ‘Tanba hanesan sintu neʼebé kesi metin iha ema ida nia knotak, nuneʼe mós haʼu kesi metin umakain Izraél tomak no umakain Judá tomak ba haʼu, atu sira bele sai haʼu-nia povu,+ haʼu-nia naran-boot,+ haʼu-nia glória no buat furak ida mai haʼu. Maibé sira lakohi halo tuir.’+
12 “Ó mós tenke hatoʼo liafuan tuirmai neʼe ba sira: ‘Jeová, Izraél nia Maromak, dehan: “Imi tenke enxe tua-uvas iha sanan-rai boot hotu toʼo nakonu.”’ Sira sei hatete ba ó: ‘Ó hanoin ami la hatene katak sanan-rai boot hotu tenke enxe ho tua-uvas toʼo nakonu ka?’ 13 Ó tenke dehan ba sira: ‘Jeová dehan nuneʼe: “Ba ema hotu neʼebé hela iha rai neʼe, liurai sira neʼebé tuur iha David nia kadunan, amlulik sira, profeta sira no ema hotu neʼebé hela iha Jeruzalein, haʼu sei halo sira hotu lanu.+ 14 Hanesan sanan-rai ho sanan-rai neʼebé baku ba malu no rahun, haʼu sei halo aman no oan-mane harahun malu”, Jeová mak dehan.+ “Haʼu sei la hatudu laran-diʼak ka laran-triste ka laran-sadiʼa ba sira. La iha buat ida mak bele hapara haʼu atu halakon sira.”’+
15 Rona no tau atensaun bá.
Keta sai loko an, tanba Jeová koʼalia tiha ona.
16 Fó hahiʼi ba Jeová, imi-nia Maromak,
Antes nia lori nakukun toʼo mai
No antes imi-nia ain sidi iha foho sira iha rai-nakaras.
Imi sei hein ba naroman,
Maibé nia sei lori nakukun neʼebé metan tebes.
Nia sei halo naroman sai nakukun tebes.+
17 Se imi lakohi rona,
Haʼu sei tanis subasubar tanba imi foti an.
Haʼu-nia matan sei nakonu ho matan-been, no haʼu-nia matan-been barak sei suli,+
Tanba ema lori ona Jeová nia bibi-lubun+ nuʼudar dadur.
18 Hatete ba liurai no ba liurai nia inan:*+ ‘Bá tuur ho moe,*
Tanba imi-nia koroa furak sei monu husi imi-nia ulun.’
19 Sidade sira iha parte súl taka metin ona,* la iha ema ida mak bele loke.
Ema lori ona Judá tomak nuʼudar dadur, sira lori ema hotu nuʼudar dadur.*+
20 Foti ó-nia matan no haree ema sira neʼebé mai daudaun husi parte norte.+
Ó-nia bibi-malae furak sira iha neʼebé? Bibi-lubun neʼebé ó simu ona iha neʼebé?+
21 Bainhira ó-nia belun diʼak,
Sira neʼebé ó habelun husi uluk kedas,+ lori kastigu ba ó, saida mak ó sei dehan?
Moras tuur-ahi nian sei kona ó derrepente deʼit hanesan feto neʼebé atu tuur-ahi, loos ka lae?+
22 No bainhira ó hanoin iha ó-nia laran: ‘Tanbasá mak buat sira-neʼe akontese ba haʼu?’+
Neʼe tanba ó halo sala boot, tan neʼe ema kolu sai ona ó-nia roupa+
No ema halo ó-nia ain-tuban sente moras tebes.
23 Ema Kus* bele troka ninia kulit nia kór ka lae? Leopardu bele troka ninia kulit nia modelu ka lae?+
Se sira bele, imi mós bele halo hahalok diʼak,
Imi neʼebé toman ona halo hahalok aat.
24 Tan neʼe, haʼu sei halo sira namkari, hanesan anin iha rai-fuik maran huu duʼut-maran halo namkari.+
25 Neʼe mak ó-nia parte neʼebé haʼu sukat tiha ona ba ó”, Jeová dehan,
26 Tan neʼe, haʼu sei hiʼit saʼe ó-nia saia no taka ó-nia oin,
No ema sei haree ó-nia moe,+
27 Ó halo beibeik adultériu*+ no hasai lian hanesan kuda neʼebé kaan malu,
Iha foho-oan sira no iha rai-luan,
Haʼu haree ona ó-nia hahalok neʼebé haʼu hakribi.+
Oh Jeruzalein, susar ba ó!
Toʼo bainhira mak ó nafatin foʼer hanesan neʼe?”+
14 Tuirmai neʼe mak Jeová nia liafuan ba Jeremias kona-ba rai maran tanba udan la tun:+
2 Judá halerik,+ no ninia portaun sira sai aat ona.
Portaun sira monu ba rai ho triste,
No Jeruzalein hasai lian halerik.
3 Ninia naʼi sira haruka atan* sira bá buka bee.
Atan sira bá buka bee iha rai-kuak* maibé bee la iha.
Sira fila deʼit ho sanan-rai neʼebé mamuk.
Sira sente moe no triste,
No taka sira-nia ulun.
4 Toʼos-naʼin sira sente laran-taridu no taka sira-nia ulun
Tanba rai maran-dekor toʼo nakfera,
Tanba udan la tun ba rai.+
5 Bibi-rusa inan iha rai-luan mós husik hela ninia oan neʼebé foin moris
Tanba duʼut la iha.
6 Kuda-burru fuik sira hamriik iha foho-oan sira neʼebé molik.
Sira dada iis boot hanesan asu-xakál.
Sira-nia matan sai aat tanba sira kontinua hateke hodi buka ai-horis maibé la hetan.+
7 Oh Jeová, maski ami-nia sala rasik fó sasin hasoru ami,
Ajuda ami bá tanba Ita-Boot nia naran.+
Tanba ami-nia hahalok la laran-metin mak barak tebes ona,+
No ami halo sala kontra Ita.
8 Oh Ita-Boot mak Izraél nia esperansa, ninia Salvadór+ iha tempu susar.
Tanbasá mak Ita sai fali hanesan ema oin-foun iha rai neʼe,
Hanesan ema laʼo-rai neʼebé para hodi toba kalan deʼit?
9 Tanbasá mak Ita sai hanesan mane ida neʼebé bilán deʼit,
Hanesan asuwaʼin neʼebé la iha kbiit atu salva ninia povu?
Keta soe hela ami.
10 Jeová dehan nuneʼe kona-ba povu neʼe: “Sira gosta laʼo-lemo deʼit.+ Sira la hanetik sira-nia ain.+ Tan neʼe Jeová la kontente ho sira.+ Agora nia sei hanoin-hetan sala neʼebé sira halo no fó kastigu ba sira-nia sala.”+
11 Tuirmai Jeová dehan mai haʼu: “Keta halo orasaun ba povu neʼe nia diʼak.+ 12 Bainhira sira halo jejún, haʼu la rona ba sira-nia harohan.+ Bainhira sira fó sakrifísiu sunu nian neʼebé hasaʼe tomak no sakrifísiu trigu* nian, buat sira-neʼe la monu ba haʼu-nia laran,+ tanba haʼu sei halakon sira ho surik, hamlaha boot no moras-peste.”*+
13 Nuneʼe haʼu dehan: “Aii Jeová, Naʼi Ukun-Naʼin Boot Liu! Profeta sira koʼalia daudaun ba povu: ‘Imi sei la haree surik no hamlaha boot sei la kona imi, maibé haʼu sei fó dame neʼebé loos ba fatin neʼe.’”+
14 Tuirmai Jeová dehan mai haʼu: “Profeta sira hatoʼo lia-bosok hodi haʼu-nia naran.+ Haʼu la haruka sira, la fó mandamentu ba sira no la koʼalia ba sira.+ Sira hatoʼo ba imi vizaun bosok, buat neʼebé sira siʼik la iha folin, no sira fó sai liafuan ho laran-makerek.+ 15 Tan neʼe, kona-ba profeta sira neʼebé hatoʼo liafuan hodi haʼu-nia naran maski laʼós haʼu mak haruka sira, no neʼebé dehan katak surik no hamlaha boot sei la kona rai neʼe, Jeová dehan nuneʼe: ‘Profeta sira-neʼe sei mate mohu ho surik no hamlaha boot.+ 16 Kona-ba povu neʼebé rona sira-nia profesia, sira-nia mate-isin sei soe tiha iha Jeruzalein nia dalan sira tanba hamlaha boot no surik. La iha ema ida mak sei hakoi sira,+ sira-nia feen, oan-mane no oan-feto. Haʼu sei fakar tun ba sira terus neʼebé sira merese simu.’+
17 “Ó tenke hatoʼo liafuan neʼe ba sira:
‘Husik haʼu-nia matan-been suli la para loron no kalan,+
Tanba haʼu-nia povu nia oan-feto virjen hetan baku no rahun ona,+
Ninia kanek todan tebes.
18 Se haʼu sai ba rai-luan no hateke,
Haʼu haree ema neʼebé mate ona tanba surik!+
Se haʼu mai iha sidade laran,
Haʼu haree moras oioin tanba hamlaha boot!+
Tanba profeta no amlulik mós laʼo-lemo iha rai ida neʼebé sira la hatene.’”+
19 Ita-Boot la simu ona Judá ka? Ita-Boot* hakribi ona Siaun ka?+
Tanbasá mak Ita-Boot hakanek ami toʼo kura labele?+
Ami hein dame, maibé buat diʼak ida mós la mosu mai,
Ami hein tempu kura nian, maibé taʼuk deʼit mak iha!+
20 Oh Jeová, ami hatene katak ami-nia hahalok aat duni,
No ami-nia beiʼala sira mós halo sala.
Ami halo ona sala hasoru Ita.+
21 Keta husik ami tanba Ita-nia naran;+
Keta hakribi Ita-nia kadunan furak.
Hanoin-hetan bá, no keta hakotu aliansa neʼebé Ita halo ona ho ami.+
22 Nasaun seluk nia estátua sira neʼebé folin-laek bele fó udan ka lae?
Ka lalehan rasik bele halo udan boot tun ka lae?
Oh Jeová, ami-nia Maromak, Ita mesak deʼit mak bele halo ida-neʼe, loos ka lae?+
No ami tau esperansa ba Ita,
Tanba Ita mesak deʼit mak halo ona buat hotu neʼe.
15 Tuirmai Jeová dehan mai haʼu: “Maski Moisés no Samuel hamriik hela iha haʼu-nia oin,+ haʼu* sei la hanoin povu neʼe. Duni sai sira husi haʼu-nia oin. Husik sira bá ona. 2 Se sira hatete ba ó: ‘Ami sei bá loos neʼebé?’, ó tenke hatete ba sira: ‘Jeová dehan nuneʼe:
“Sira neʼebé atu hetan moras-peste, hetan moras-peste bá!
Sira neʼebé atu mate ho surik, mate ho surik bá!+
Sira neʼebé atu sai hamlaha, sai hamlaha bá!
No sira neʼebé atu sai dadur, sai dadur bá!”’+
3 “‘Haʼu sei hili terus haat* atu fó ba sira’,+ Jeová mak dehan, ‘surik atu oho ema, asu atu rasta sira-nia mate-isin, manu sira iha lalehan no animál sira iha rai atu han mohu no atu halakon sira.+ 4 Haʼu sei halo nasaun hotu iha mundu neʼe sai taʼuk tanba haree susar neʼebé kona sira.+ Haʼu halo nuneʼe tanba buat neʼebé Ezequias nia oan-mane Manasés, liurai ba rai-Judá, halo ona iha Jeruzalein.+
5 Oh Jeruzalein, sé mak sei hatudu laran-sadiʼa ba ó?
Sé mak sei hanoin ó?
No sé mak sei mai atu husu buat diʼak kona-ba ó?’
6 ‘Ó husik ona haʼu’, Jeová mak dehan.+
‘Ó kontinua fila kotuk ba haʼu.*+
Tan neʼe haʼu sei foti liman hasoru ó no halakon ó.+
Haʼu baruk ona atu sente laran-sadiʼa ba ó.*
7 Haʼu sei haliri* sira hanesan ema haliri trigu ho garfu iha rai neʼe nia sidade* sira.
Haʼu sei halakon sira-nia oan.+
Haʼu sei halakon haʼu-nia povu,
Tanba sira lakohi troka sira-nia hahalok.+
8 Iha haʼu-nia oin, sira-nia feto-faluk sei sai barak liu fali rai-henek iha tasi.
Iha meiudia, haʼu sei halo inimigu ida mai ataka sira, ataka inan no mane joven sira.
Derrepente deʼit haʼu halo sira la hakmatek no taʼuk.
9 Feto neʼebé tuur-ahi oan naʼin-hitu sai fraku ona;
Nia* susar atu dada iis.
Ninia loro-matan tun ona maski loron hela,
Neʼe lori moe ba nia no hamoe tebes nia.’*
‘No sira balu neʼebé moris hela
Haʼu sei entrega ba sira-nia inimigu nia surik’, Jeová mak dehan.”+
10 Susar ba haʼu, oh haʼu-nia inan, tanba Ita tuur-ahi ona haʼu.+
Haʼu mak ema neʼebé sempre istori malu no haksesuk malu ho ema iha rai tomak.
Maski haʼu la fó-empresta ba ema no haʼu rasik mós la empresta,
Maibé sira hotu fó-malisan ba haʼu.
11 Jeová dehan: “Haʼu sei ajuda ó.*
Haʼu sei apoia ó iha inimigu nia oin,
Iha tempu terus no susar boot.
12 Iha ka lae ema neʼebé bele harahun besi,
Besi husi parte norte, no mós riti?
13 Haʼu sei fó ó-nia rikusoin no sasán ba ema atu hadau,+
Laʼós tanba atu hetan osan, maibé tanba sala hotu neʼebé ó halo ona iha ó-nia rai tomak.
14 Haʼu sei fó rikusoin sira-neʼe ba ó-nia inimigu sira
Atu lori ba rai neʼebé ó la hatene.+
Tanba haʼu-nia hirus hanesan ahi neʼebé lakan ona,
No ida-neʼe lakan makaʼas hasoru imi.”+
15 Oh Jeová, Ita-Boot rasik hatene haʼu-nia susar.
Hanoin-hetan haʼu no tau atensaun ba haʼu.
Selu fali ba ema neʼebé haterus haʼu.+
Keta husik haʼu lakon mohu, tanba deʼit Ita la hirus lalais ba sira.
Hatene bá katak haʼu tahan hasoru susar neʼe tanba Ita.+
16 Haʼu hetan Ita-nia liafuan sira, no haʼu han tiha.+
Ita-nia liafuan sai buat neʼebé halo haʼu-nia laran kontente no haksolok,
Tanba haʼu lori Ita-nia naran, oh Jeová, Maromak neʼebé ukun tropa lalehan nian.
17 Haʼu la tuur hamutuk ho ema neʼebé gosta halimar deʼit, no haʼu la haksolok hamutuk ho sira.+
18 Tanbasá mak haʼu sente moras nafatin no haʼu-nia kanek labele kura?
Kanek neʼe lakohi sai diʼak fali.
Ita sei sai hanesan bee-matan neʼebé la iha bee,
Neʼebé haʼu labele tau fiar ka?
19 Tan neʼe Jeová dehan nuneʼe:
“Se ó fila fali mai haʼu, haʼu sei simu fali ó,
No ó sei hamriik iha haʼu-nia oin.
Se ó haketak buat neʼebé folin-boot husi buat neʼebé la iha folin,
Ó sei sai haʼu-nia lia-naʼin.*
Sira sei fila fali ba ó,
Maibé ó rasik sei la fila fali ba sira.”
20 “Haʼu sei halo ó sai hanesan moru riti neʼebé metin iha povu nia leet.+
Sira sei halo duni funu hasoru ó,
Maibé sira sei la manán,+
Tanba haʼu hamutuk ho ó, atu salva ó no halo ó livre”, Jeová mak dehan.
21 “Haʼu sei hasai ó husi ema aat sira-nia liman
No halo ó livre husi aat-naʼin sira-nia liman-laran.”
16 Jeová koʼalia tan mai haʼu, hodi dehan: 2 “Ó keta hola feto, no keta iha oan-mane ka oan-feto iha fatin neʼe. 3 Tanba kona-ba oan-mane no oan-feto sira neʼebé moris iha fatin neʼe no kona-ba inan sira neʼebé tuur-ahi oan sira-neʼe no kona-ba aman sira neʼebé halo oan sira-neʼe moris iha rai neʼe, Jeová dehan nuneʼe: 4 ‘Sira sei mate tanba kona moras aat,+ maibé la iha ema ida mak lelir ba sira ka hakoi sira. Sira sei sai hanesan adubu* iha rai.+ Sira sei mate ho surik no hamlaha boot,+ no sira-nia mate-isin sei sai ai-han ba manu sira neʼebé semo iha lalehan no ba animál sira iha rai.’
5 Tanba Jeová dehan nuneʼe:
‘Keta tama ba mate-uma,
No keta bá atu lelir ka hatudu sentimentu triste ho sira.’+
‘Tanba haʼu foti tiha ona haʼu-nia dame,
Haʼu-nia laran-sadiʼa no domin neʼebé laran-metin husi povu neʼe’, Jeová mak dehan.+
6 ‘Ema hotu iha rai neʼe, boot ka kiʼik, sei mate.
La iha ema ida mak hakoi sira
Ka lelir ba sira,
No la iha ema ida mak sei hakanek an ka koi molik ulun tanba sira.*
7 La iha ema ida mak sei fó hahán ba sira neʼebé lelir hela,
Atu fó kmaan ba sira tanba ema mate neʼe.
No la iha ema ida mak sei fó kopu ba sira hodi sira bele hemu tua-uvas
Atu fó kmaan ba sira tanba sira-nia aman ka inan mate.
8 Ó mós labele tama ba uma neʼebé ema halo festa
Hodi tuur no han-hemu hamutuk ho sira.’
9 “Tanba Jeová neʼebé ukun tropa lalehan nian, Izraél nia Maromak, dehan: ‘Iha fatin neʼe, iha imi-nia tempu, imi-nia matan rasik sei haree haʼu hapara lian haksolok no kontente nian, lian husi noivu no lian husi noiva.’+
10 “Bainhira ó fó-hatene liafuan sira-neʼe hotu ba povu neʼe, sira sei husu ó: ‘Tanbasá mak Jeová fó sai susar boot hotu neʼe hasoru ami? Sala saida mak ami halo ona kontra Jeová, ami-nia Maromak?’+ 11 Ó tenke hatán ba sira: ‘Jeová dehan: “Tanba imi-nia beiʼala sira husik ona haʼu+ no sira kontinua laʼo tuir maromak sira seluk hodi serbí no hakruʼuk ba sira.+ Maibé sira husik ona haʼu no la halo tuir haʼu-nia ukun-fuan.+ 12 No imi-nia hahalok aat liu fali imi-nia beiʼala sira,+ no imi ida-idak ho ulun-toos halo tuir imi-nia laran neʼebé aat no lakohi halo tuir haʼu.+ 13 Tan neʼe haʼu sei soe sai imi husi rai neʼe ba rai ida neʼebé imi no imi-nia beiʼala sira la hatene,+ no iha neʼebá imi tenke serbí maromak sira seluk loron no kalan,+ tanba haʼu sei la hatudu laran-diʼak ba imi.”’
14 “Jeová dehan: ‘Tan neʼe, tempu sei toʼo mai bainhira sira sei la hatete tan: “Haʼu jura hodi Jeová, Maromak neʼebé moris, neʼebé lori povu Izraél sai husi rai-Ejitu!”,+ 15 maibé sira sei hatete fali: “Haʼu jura hodi Jeová, Maromak neʼebé moris, neʼebé lori sai povu Izraél husi rai iha parte norte no husi rai hotu neʼebé nia halo sira namkari bá!” Haʼu sei lori sira fila fali ba sira-nia rai neʼebé haʼu fó ona ba sira-nia beiʼala.’+
16 Jeová dehan: ‘Haʼu sei haruka peskadór barak
Atu kail sira hanesan kail ikan.
Tuirmai haʼu sei haruka kasadór barak
Atu kasa sira iha foho no foho-oan hotu
No iha fatuk boot nia kuak sira.
17 Tanba haʼu-nia matan haree buat hotu neʼebé sira halo.*
Sira labele subar husi haʼu,
No sira-nia sala mós labele subar husi haʼu-nia matan.
18 Ulukliu, haʼu sei selu fali sira tuir buat hotu neʼebé sira merese simu tanba sira-nia sala,+
Tanba sira hafoʼer ona haʼu-nia rai ho estátua barak neʼebé la moris,* estátua sira neʼebé haʼu hakribi.*
Sira halo nakonu haʼu-nia rai ho buat neʼebé aat tebes.’”+
19 Oh Jeová, Ita-Boot mak haʼu-nia kbiit no haʼu-nia fatin seguru,
Fatin neʼebé haʼu halai bá iha tempu susar,+
Nasaun sira sei mai husi rai hotu iha mundu tomak atu hakbesik Ita-Boot,
No sira sei dehan: “Ami-nia beiʼala sira simu tutan maromak falsu* hanesan liman-rohan,
Buat neʼebé folin-laek no la fó benefísiu.”+
20 Ema bele halo maromak sira ba ninia an ka lae?
Tuir loloos buat neʼebé ema halo laʼós maromak.+
21 “Tan neʼe haʼu sei halo sira hatene haʼu,
Iha tempu neʼe haʼu sei halo sira hatene haʼu-nia forsa no haʼu-nia kbiit,
No sira sei hatene duni katak haʼu-nia naran mak Jeová.”
17 “Judá nia sala hakerek ona ho kaneta* besi.
Sala sira-neʼe bahat ona iha sira-nia fuan-laran ho kaneta husi fatuk-diamante*
No mós bahat ona iha sira-nia altár nia dikur sira,
2 Bainhira sira-nia oan hanoin-hetan sira-nia altár no ai-riin lulik sira*+
Iha ai-hun buras nia sorin, no iha foho-oan sira neʼebé aas,+
3 Iha foho sira iha rai-luan.
Haʼu sei fó ó-nia rikusoin no sasán hotu ba ema atu hadau.+
Ó-nia fatin aas adorasaun nian mós ema sei hadau tanba sala neʼebé ó halo ona iha ó-nia rai tomak.+
4 Ó rasik mak sei halo lakon ó-nia liman-rohan neʼebé haʼu fó ona ba ó.+
No haʼu sei halo ó sai atan ba ó-nia inimigu sira iha rai neʼebé ó la hatene,+
Neʼe sei lakan ba nafatin.”
5 Jeová dehan nuneʼe:
“Malisan ba ema* neʼebé tau fiar deʼit ba ema,+
Neʼebé sadere ba ema nia forsa,+
No hadook ninia laran husi Jeová.
6 Nia sei sai hanesan ai-hun ida neʼebé mesak deʼit iha rai-fuik maran.
Nia sei la haree bainhira buat diʼak mosu mai,
Maibé nia sei hela iha fatin sira neʼebé maran-dekor iha rai-fuik,
Iha rai masin neʼebé la iha ema ida mak bele hela.
8 Nia sei sai hanesan ai-hun ida neʼebé kuda besik bee,
Neʼebé ninia abut sira toʼo iha bee-dalan.
Nia sei la sente manas bainhira rai-manas,
Maibé ninia tahan sei buras nafatin.+
Maski udan la tun ba tinan ida, nia sei la sente laran-taridu,
No mós nia sei la para atu fó fuan.
9 Laran mak makerek* liu fali buat hotu-hotu no perigozu.*+
Sé mak bele hatene ida-neʼe?
10 Haʼu, Jeová, mak buka-hatene ema nia laran,+
Haʼu haree didiʼak ema nia hanoin,*
Atu fó kolen ba ema ida-idak tuir ninia hahalok sira,
Tuir rezultadu husi ninia hahalok sira.+
11 Hanesan manu-perdiz luut tolun neʼebé laʼós ninian,
Rikusoin sira-neʼe sei husik hela nia bainhira nia forte hela,
No ikusmai, ida-neʼe hatudu katak nia la iha neon.”
12 Kadunan neʼebé kmanek liu mak aas liu husi uluk kedas,
Kadunan neʼe mak ita-nia fatin sagradu.+
13 Oh Jeová, Izraél nia esperansa,
Sira hotu neʼebé husik hela Ita sei hetan moe.
Sira neʼebé fila kotuk ba Ita,* sira-nia naran sei hakerek iha rai-rahun,+
Tanba sira husik ona Jeová, hun ba bee moris nian.+
14 Oh Jeová, kura haʼu bá, no haʼu sei sai isin-diʼak.
Salva haʼu bá, no haʼu sei hetan salvasaun,+
Tanba haʼu fó hahiʼi ba Ita-Boot.
15 Iha ema neʼebé hatete mai haʼu:
“Jeová nia liafuan iha loos neʼebé?+
Husik ida-neʼe sai loos bá!”
16 Maibé haʼu la hadook an husi Ita no nafatin laʼo tuir Ita nuʼudar bibi-atan.
Haʼu mós la husu beibeik atu loron terus nian toʼo mai.
Ita hatene didiʼak buat hotu neʼebé haʼu-nia ibun koʼalia ona.
Haʼu koʼalia buat hotu iha Ita-nia oin!
17 Keta halo haʼu sai taʼuk.
Ita mak haʼu-nia fatin protesaun iha tempu terus nian.
18 Husik sira neʼebé haterus haʼu hetan moe,+
Maibé keta husik haʼu hetan moe.
Husik sira sai taʼuk,
Maibé keta husik haʼu sai taʼuk.
19 Jeová dehan mai haʼu: “Bá, hamriik iha portaun boot* neʼebé Judá nia liurai sira tama-sai, no mós iha portaun hotu iha Jeruzalein.+ 20 Ó tenke hatete ba sira: ‘Rona Jeová nia liafuan bá, imi Judá nia liurai sira, ema Judá tomak, no ema hotu neʼebé hela iha Jeruzalein, neʼebé tama liuhusi portaun sira-neʼe. 21 Jeová dehan nuneʼe: “Kuidadu imi-nia an bá, keta lori sasán ida iha loron Sábadu no keta lori tama sasán neʼe liuhusi Jeruzalein nia portaun sira.+ 22 Imi labele lori sai sasán ida husi imi-nia uma iha loron Sábadu. Imi labele halo serbisu ruma.+ Hanoin-hetan katak loron Sábadu mak loron neʼebé sagradu, hanesan ukun-fuan neʼebé haʼu fó ona ba imi-nia beiʼala sira.+ 23 Maibé sira la rona no mós la see tilun. Ho ulun-toos, sira lakohi halo tuir no lakohi simu dixiplina.”’+
24 “‘Jeová dehan: “Maibé se imi halo tuir haʼu ho loloos, no imi la lori tama sasán ida liuhusi sidade neʼe nia portaun iha loron Sábadu, no imi hanoin-hetan nafatin katak loron Sábadu mak loron neʼebé sagradu hodi la halo serbisu ruma,+ 25 entaun liurai no ulun-naʼin sira neʼebé tuur iha David nia kadunan+ mós sei saʼe kuda-karreta no kuda sira. Sira sei tama liuhusi sidade neʼe nia portaun, hamutuk ho sira-nia ulun-naʼin, ema Judá no ema neʼebé hela iha Jeruzalein.+ No sira sei hela iha sidade neʼe ba nafatin. 26 No povu sei mai husi sidade sira iha Judá, husi fatin sira besik Jeruzalein, husi rai-Benjamim,+ husi rai-tetuk,+ husi foho sira, no husi área Negeb,* no sira sei lori sakrifísiu sunu nian neʼebé hasaʼe tomak,+ sakrifísiu sira,+ sakrifísiu trigu* nian,+ olíbanu no sakrifísiu agradese nian ba Jeová nia uma.+
27 “‘“Maibé se imi la halo tuir haʼu-nia ukun-fuan kona-ba loron Sábadu hodi halo loron neʼe sagradu no se imi lori tama sasán sira liuhusi Jeruzalein nia portaun sira iha loron Sábadu, haʼu sei sunu sidade neʼe nia portaun sira, no ahi sei han mohu Jeruzalein nia uma aas* sira neʼebé seguru+ no ahi neʼe sei labele hamate.”’”+
18 Tuirmai neʼe mak Jeová nia liafuan ba Jeremias: 2 “Hamriik no laʼo ba badaen rai-mean nia uma,+ no haʼu sei hatoʼo haʼu-nia liafuan ba ó iha neʼebá.”
3 Nuneʼe haʼu laʼo ba badaen rai-mean nia uma, no nia halo hela sanan-rai ho rai-mean. 4 Maibé sanan-rai neʼebé badaen halo ho rai-mean neʼe sai aat tiha iha ninia liman. Nuneʼe, ho rai-mean neʼe, nia halo fali sanan-rai seluk tuir ninia hakarak.
5 Jeová koʼalia tan mai haʼu, dehan: 6 “‘Oh umakain Izraél, haʼu mós bele halo ba imi hanesan ho buat neʼebé badaen rai-mean neʼe foin halo, loos ka lae?’ Jeová mak dehan. ‘Hanesan rai-mean iha badaen rai-mean nia liman, nuneʼe mós imi iha haʼu-nia liman, oh umakain Izraél.+ 7 Bainhira haʼu koʼalia kona-ba fokit sai, sobu no halakon nasaun ida ka ukun ida,+ 8 maibé nasaun neʼe husik ninia hahalok aat neʼebé haʼu fó sai ona, haʼu mós sei troka haʼu-nia hanoin* kona-ba susar neʼebé haʼu hakarak atu lori ba sira.+ 9 Maibé bainhira haʼu koʼalia kona-ba harii no kuda nasaun ida ka ukun ida, 10 no nasaun neʼe halo buat neʼebé aat tuir haʼu-nia haree no la halo tuir haʼu-nia liafuan, haʼu mós sei troka haʼu-nia hanoin* kona-ba buat diʼak neʼebé haʼu hakarak atu halo ba sira.’
11 “Agora favór ida, hatete ba ema Judá no ba ema neʼebé hela iha Jeruzalein: ‘Jeová dehan nuneʼe: “Haʼu prepara* hela susar ida no halo planu ida hasoru imi. Favór ida, fila fali husi imi-nia dalan sira neʼebé aat, troka imi-nia hahalok no dalan sira.”’”+
12 Maibé sira dehan: “Lae, ami labele fila fali ona!+ Tanba ami sei laʼo tuir ami-nia hanoin rasik, no ho ulun-toos ami ida-idak sei halo tuir ami-nia laran neʼebé aat.”+
13 Tan neʼe, Jeová dehan nuneʼe:
“Imi rasik husu lai ba nasaun sira seluk.
Sé mak rona ona buat hanesan neʼe?
Feto virjen Izraél halo ona buat neʼebé aat tebes.+
14 Jelu-rahun iha Líbanu sei nabeen husi fatuk sira iha foho-lolon ka lae?
Bee malirin neʼebé suli tun husi fatin dook bele sai maran ka lae?
15 Maibé haʼu-nia povu haluha ona haʼu.+
Sira hasaʼe sakrifísiu* ba buat neʼebé folin-laek.+
No sira mós halo ema sidi iha sira-nia dalan sira neʼebé antigu,+
No laʼo fali iha dalan seluk neʼebé la kabeer no la tetuk,*
16 Nuneʼe sira halo sira-nia rai sai fali fatin neʼebé halo ema taʼuk+
No ema sei hakfuʼik nafatin ba fatin neʼe.+
Ema hotu neʼebé laʼo liu sei hateke ba fatin neʼe ho taʼuk no doko ulun.+
17 Hanesan anin husi parte leste, haʼu sei halo sira namkari iha inimigu nia oin.
Iha sira-nia loron terus nian, haʼu sei fila kotuk ba sira, no la fó oin ba sira.”+
18 Rona tiha neʼe, sira dehan: “Mai, mai ita futu lia hasoru Jeremias,+ tanba ita-nia amlulik sira sei nafatin fó sai ukun-fuan,* matenek-naʼin sira sei nafatin fó konsellu, no profeta sira sei nafatin hatoʼo Maromak nia liafuan. Mai ita koʼalia kontra nia no keta tau atensaun ba buat neʼebé nia hatete.”
19 Oh Jeová, tau atensaun ba haʼu,
No rona buat neʼebé haʼu-nia inimigu sira hatete.
Hanoin-hetan bá, dala barak ona haʼu hamriik iha Ita-nia oin atu koʼalia buat diʼak kona-ba sira,
Atu bele hasees Ita-nia hirus husi sira.
21 Tan neʼe, entrega sira-nia oan-mane ba hamlaha boot,
No entrega sira ba surik nia kbiit.+
Husik sira-nia feen lakon oan sira tanba mate no sai faluk.+
Husik sira-nia mane mate ho moras-peste,
Husik sira-nia mane joven mate ho surik iha funu laran.+
22 Husik ema rona sira-nia lian tanis husi sira-nia uma
Bainhira Ita lori naʼok-teen sira mai atu ataka sira derrepente deʼit.
Tanba sira keʼe ona rai-kuak atu kaer haʼu
No tau ona lasu sira ba haʼu-nia ain.+
23 Maibé oh Jeová,
Ita-Boot hatene didiʼak sira-nia planu aat hotu hasoru haʼu atu oho haʼu.+
Keta perdua sira-nia hahalok sala,
No keta hamoos sira-nia sala husi Ita-nia oin.
19 Jeová dehan nuneʼe: “Bá, sosa buli rai-mean ida husi badaen rai-mean.+ Lori povu nia katuas balu no amlulik nia ulun-naʼin balu hamutuk ho ó, 2 no bá Foho-Leet Hinom,*+ iha Portaun Sanan-Rai Rohan nia oin. No iha neʼebá, fó sai liafuan neʼebé haʼu fó-hatene ba ó. 3 Ó tenke dehan: ‘Rona ba Jeová nia liafuan, imi liurai sira iha rai-Judá no imi hotu neʼebé hela iha Jeruzalein. Jeová neʼebé ukun tropa lalehan nian, Izraél nia Maromak, dehan nuneʼe:
“‘“Haʼu sei fó-terus ba fatin neʼe, no ema hotu neʼebé rona kona-ba neʼe sei hakfodak.* 4 Neʼe tanba sira husik ona haʼu+ no halo fatin neʼe sai fali fatin neʼebé haʼu la hatene.+ Iha fatin neʼe, sira hasaʼe sakrifísiu ba maromak sira seluk, neʼebé sira no sira-nia beiʼala no rai-Judá nia liurai sira uluk la hatene, no sira halo fatin neʼe nakonu ho ema laran-moos nia raan.+ 5 Sira harii ona fatin aas ba Baal hodi sunu sira-nia oan-mane iha ahi nuʼudar sakrifísiu sunu nian neʼebé hasaʼe tomak ba Baal.+ Neʼe mak hahalok neʼebé haʼu nunka haruka sira atu halo ka nunka koʼalia, no haʼu mós nunka hanoin kona-ba ida-neʼe.”’*+
6 “‘Jeová dehan: “Tan neʼe, tempu sei toʼo mai bainhira ema sei la temi tan fatin neʼe nuʼudar Tofet ka Foho-Leet Hinom,* maibé temi fali nuʼudar Foho-Leet Masakre.+ 7 Iha fatin neʼe, haʼu sei sobu Judá no Jeruzalein nia planu, no haʼu sei halo sira monu ba sira-nia inimigu nia surik, inimigu neʼebé buka atu oho sira. No haʼu sei fó sira-nia mate-isin nuʼudar ai-han ba manu sira iha lalehan no animál sira iha rai.+ 8 Haʼu sei halo sidade neʼe sai fatin neʼebé halo ema taʼuk no ema sei hakfuʼik ba fatin neʼe. Ema hotu neʼebé laʼo liu sei hateke ba fatin neʼe ho taʼuk no hakfuʼik tanba susar hotu neʼebé kona sidade neʼe.+ 9 No haʼu sei halo sira han fali sira-nia oan-mane no oan-feto nia isin. Sira ida-idak sei han sira-nia maluk nia isin, tanba sira-nia inimigu neʼebé buka atu oho sira sei halo susar tebes ba sira hodi halo serku ba sidade neʼe no sulan sira.”’+
10 “Tuirmai ó tenke halo rahun buli neʼe iha mane sira-neʼe nia oin, sira neʼebé bá hamutuk ho ó, 11 no hatete ba sira: ‘Jeová neʼebé ukun tropa lalehan nian, dehan nuneʼe: “Hanesan ema neʼebé harahun badaen rai-mean nia buli toʼo la iha ema ida mak bele hadiʼa fali, nuneʼe mak haʼu sei harahun povu neʼe no sidade neʼe. Sira sei hakoi ema nia mate-isin iha Tofet toʼo la iha tan fatin atu hakoi.”’+
12 “Jeová dehan: ‘Haʼu sei halo hanesan neʼe ba fatin neʼe no ba ema neʼebé hela iha fatin neʼe, haʼu sei halo sidade neʼe sai hanesan Tofet. 13 Uma sira iha Jeruzalein no liurai Judá nia uma sira sei sai foʼer hanesan Tofet,+ tanba sira hasaʼe sakrifísiu ba fitun sira*+ no fui sakrifísiu hemu nian ba maromak sira seluk iha uma hotu nia kakuluk.’”+
14 Tuirmai, bainhira Jeremias fila fali husi Tofet, fatin neʼebé Jeová haruka nia atu fó sai profesia, nia bá hamriik iha pátiu* iha Jeová nia uma, no hatete ba ema hotu: 15 “Jeová neʼebé ukun tropa lalehan nian, Izraél nia Maromak, dehan nuneʼe: ‘Haʼu sei fó-terus ba sidade neʼe no ba ninia knua sira hotu, hanesan haʼu dehan tiha ona kona-ba sidade neʼe, tanba ho ulun-toos sira lakohi halo tuir haʼu-nia liafuan.’”+
20 Imer nia oan-mane Pasur, neʼebé serbí nuʼudar amlulik no mós ulun-naʼin neʼebé toma konta iha Jeová nia uma, rona hela bainhira Jeremias fó sai profesia sira-neʼe. 2 Tuirmai, Pasur baku profeta Jeremias no xave metin ninia ain*+ iha fatin ida iha Portaun Benjamim besik Jeová nia uma. 3 Maibé iha loron tuirmai bainhira Pasur husik Jeremias livre, Jeremias dehan ba nia:
“Ó-nia naran laʼós tan Pasur, maibé Jeová hanaran ó Taʼuk iha Fatin Hotu.+ 4 Tanba Jeová dehan nuneʼe: ‘Haʼu sei halo ó no ó-nia belun sira hotu sai taʼuk tebes. Ho ó-nia matan rasik ó sei haree sira mate ho sira-nia inimigu nia surik,+ no haʼu sei entrega ema Judá tomak ba liurai Babilónia nia liman. Nia sei lori sira ba dadur* iha rai-Babilónia no oho sira ho surik.+ 5 No haʼu sei entrega sidade neʼe nia rikusoin hotu, sidade neʼe nia sasán hotu, buat hotu neʼebé folin-boot no Judá nia liurai sira-nia rikusoin hotu ba sira-nia inimigu nia liman.+ Inimigu sei hadau rikusoin sira-neʼe no lori hotu ba rai-Babilónia.+ 6 Kona-ba ó, Pasur, no ema hotu neʼebé hela iha ó-nia uma, imi sei sai dadur. Ó sei bá rai-Babilónia no mate iha neʼebá, no ema sei hakoi ó iha neʼebá hamutuk ho ó-nia belun hotu, tanba ó fó sai profesia bosok ba sira.’”+
7 Oh Jeová, Ita lohi ona haʼu toʼo halo haʼu sai bilán.
Ita hatudu katak Ita forte liu haʼu, no Ita manán ona.+
Loron tomak, ema hamoe haʼu;
Ema hotu hamnasa haʼu.+
8 Tanba bainhira haʼu koʼalia, haʼu tenke hakilar dehan:
“Maromak sei lori violénsia no harahun Judá!”
Tanba Jeová nia liafuan mak ema koʼalia aat no goza haʼu loron tomak.+
9 Nuneʼe haʼu hatete: “Haʼu sei la temi tan kona-ba nia,
No haʼu sei la koʼalia tan hodi ninia naran.”+
Maibé iha haʼu-nia laran, ninia liafuan sai hanesan ahi neʼebé lakan makaʼas iha haʼu-nia ruin.
Haʼu kole ona atu hanetik ida-neʼe,
No haʼu labele tahan tan ida-neʼe.+
10 Tanba haʼu rona lia-anin barak neʼebé aat;
Buat neʼebé halo haʼu taʼuk mak haleʼu haʼu.+
“Mai ita duun nia. Duun nia bá!”
Ema hotu neʼebé finje hasé haʼu ho dame, sira mós hein hela ba tempu neʼebé haʼu sidi, hodi dehan:+
“Karik nia sei halo sala ho hahalok neʼebé beik,
No ita bele manán nia no selu fali hahalok aat ba nia.”
11 Maibé Jeová mak hamutuk ho haʼu hanesan asuwaʼin neʼebé forsa boot.+
Tan neʼe mak ema neʼebé haterus haʼu sei sidi no sira sei la manán.+
Sira sei hetan moe boot, tanba sira la hetan susesu.
No ema sei la haluha moe boot neʼebé sira hetan ba nafatin.+
12 Maibé oh Jeová neʼebé ukun tropa lalehan nian, Ita-Boot haree didiʼak ema neʼebé laran-loos;
Husik haʼu haree Ita-Boot selu fali sira-nia hahalok aat,+
Tanba haʼu entrega ona haʼu-nia kazu ba Ita.+
13 Kanta ba Jeová! Fó hahiʼi ba Jeová!
Tanba nia salva ona ema kiak husi ema aat sira-nia liman.
14 Malisan ba loron neʼebé haʼu moris mai!
Keta fó bensaun ba loron neʼebé haʼu moris, loron neʼebé haʼu-nia inan tuur-ahi haʼu!+
15 Malisan ba ema neʼebé hatoʼo liafuan diʼak ba haʼu-nia aman
No halo nia haksolok, hodi dehan:
“Oan ida moris ona ba ó, neʼe mak oan-mane ida!”
16 Halo ema neʼe sai hanesan sidade sira neʼebé Jeová halakon ona no la sente hanoin.
Halo nia rona lian halerik iha dadeer no lian funu nian iha meiudia.
17 Tanbasá mak nia la oho tiha haʼu bainhira haʼu sei iha haʼu-nia inan nia knotak?
Hodi nuneʼe haʼu-nia inan nia oan-fatin mak sai hanesan haʼu-nia rate
18 Tanbasá mak haʼu tenke sai husi haʼu-nia inan nia knotak
Atu haree deʼit terus no susar,
No haʼu-nia moris remata deʼit ho moe?+
21 Jeová koʼalia ba Jeremias bainhira Liurai Zedequias+ haruka Malquias nia oan-mane Pasur,+ no Maseias nia oan-mane Sofonias+ neʼebé serbí nuʼudar amlulik, atu husu Jeremias, hodi dehan: 2 “Favór ida, ajuda ami no husu lai ba Jeová, tanba Liurai Nabukodonozór* husi rai-Babilónia mai ona atu halo funu hasoru ita.+ Karik Jeová sei halo buat furak ruma hodi ajuda ita no liurai neʼe sei hakiduk husi ita.”+
3 Jeremias hatete ba sira: “Imi tenke dehan ba Zedequias: 4 ‘Jeová, Izraél nia Maromak, dehan nuneʼe: “Haʼu sei halo armas sira iha imi-nia liman ataka fali* imi, armas sira neʼebé imi uza daudaun atu halo funu hasoru liurai Babilónia+ no ema Kaldeia sira halo serku ba imi iha moru nia liʼur. No haʼu sei halibur sira hotu ba sidade neʼe nia klaran. 5 Haʼu rasik mak sei halo funu hasoru imi+ ho liman neʼebé forte no ho liman neʼebé iha kbiit, ho hirus, ho nervozu no ho laran-nakali tebetebes.+ 6 Haʼu sei fó kastigu ba ema hotu iha sidade neʼe, ema no animál hotu. Sira sei mate ho moras-peste* neʼebé boot.”’+
7 “‘Jeová dehan: “Liutiha neʼe, haʼu sei entrega Liurai Zedequias husi rai-Judá ba Liurai Nabukodonozór* husi rai-Babilónia. Kona-ba Zedequias ho ninia atan sira no povu sira iha sidade neʼe, katak sira hotu neʼebé la mate ho moras-peste, surik no hamlaha boot, haʼu sei entrega sira hotu ba sira-nia inimigu neʼebé buka atu oho sira.+ Nia sei oho sira ho surik. Nia sei la sente hanoin, nia sei la hatudu laran-sadiʼa ka laran-diʼak ba sira.”’+
8 “Ó tenke hatete ba povu neʼe: ‘Jeová dehan nuneʼe: “Haʼu tau dalan ba moris no dalan ba mate iha imi hotu nia oin. 9 Ema neʼebé hela nafatin iha sidade neʼe sei mate ho surik, hamlaha boot no moras-peste. Maibé ema neʼebé sai husi sidade neʼe no rende an ba ema Kaldeia sira neʼebé halo serku daudaun ba imi, sei moris nafatin no salva ninia moris.”’+
10 “‘Jeová dehan nuneʼe: “Tanba haʼu fila kotuk ona ba sidade neʼe,* no haʼu sei halo sidade neʼe hetan terus, laʼós buat diʼak.+ Sidade neʼe sei monu ba liurai Babilónia nia liman,+ no nia sei sunu sidade neʼe.”+
11 “‘Ba liurai Judá nia umakain: Rona Jeová nia liafuan bá. 12 Oh David nia umakain, Jeová dehan nuneʼe:
“Dadeer-dadeer kaer metin ba justisa,
No salva ema husi ema aat neʼebé lohi hodi hamatak nia,+
Atu nuneʼe haʼu-nia hirus labele lakan hanesan ahi+
No ahi neʼe labele lakan makaʼas toʼo la iha ema ida mak bele hamate
Tanba imi-nia hahalok aat sira.”’+
13 Jeová dehan: ‘Oh povu neʼebé hela iha rai-tetuk,
Oh fatuk boot iha rai-tetuk, haʼu sei kontra imi.
Kona-ba imi neʼebé hatete: “Sé mak sei tun mai atu kontra hasoru ami?
No sé mak bele tama iha ami-nia hela-fatin?”
14 Haʼu sei tesi-lia ba imi
Tuir imi-nia hahalok’,+ Jeová mak dehan.
‘Haʼu sei sunu imi-nia ai-laran,
No ahi sei han buat hotu neʼebé haleʼu imi.’”+
22 Jeová dehan nuneʼe: “Laʼo ba liurai Judá nia palásiu, no hatoʼo mensajen ida-neʼe. 2 Ó tenke hatete: ‘Rona Jeová nia liafuan bá, oh liurai Judá neʼebé tuur iha David nia kadunan, ó hamutuk ho ó-nia atan sira no ó-nia povu, sira neʼebé tama liuhusi portaun sira-neʼe. 3 Jeová dehan nuneʼe: “Kaer metin justisa no halo hahalok loos bá. Salva ema husi ema aat neʼebé lohi hodi hamatak nia. Keta halo aat ba ema husi rai seluk neʼebé hela iha imi-nia leet, no keta halo aat ba oan-kiak* no feto-faluk sira.+ No keta fakar ema laran-moos sira-nia raan iha fatin neʼe.+ 4 Tanba se imi halo tuir liafuan neʼe ho didiʼak, liurai sira neʼebé tuur iha David nia kadunan+ sei saʼe kuda no kuda-karreta hodi tama ba palásiu neʼe liuhusi portaun sira. Sira sei mai hamutuk ho sira-nia atan no sira-nia povu.”’+
5 “Jeová hatutan tan: ‘Maibé se imi la halo tuir liafuan sira-neʼe, haʼu jura hodi haʼu-nia an rasik katak palásiu neʼe sei sai fatin neʼebé rahun.’+
6 “Tanba Jeová dehan nuneʼe kona-ba liurai Judá nia palásiu:
‘Ba haʼu, ó mak hanesan Gilead,
Hanesan foho-tutun iha Líbanu.
Maibé haʼu sei halo ó sai rai neʼebé fuik;
No sei la iha ema ida mak hela iha ó-nia sidade sira.+
Sira sei tesi ó-nia ai-sedru neʼebé diʼak liu
No sunu tiha ai sira-neʼe iha ahi.+
8 “‘Ema husi nasaun barak sei laʼo liu sidade neʼe no husu ba malu: “Tanbasá mak Jeová halo buat hanesan neʼe ba sidade boot neʼe?”+ 9 Sira sei hatán: “Tanba sira husik ona aliansa neʼebé Jeová, sira-nia Maromak, halo ona no sira hakruʼuk hodi serbí fali ba maromak sira seluk.”’+
10 Keta tanis ba ema neʼebé mate ona,
No keta sente triste ba nia.
Maibé tanis makaʼas ba ema neʼebé sai dadur,
Tanba nia sei la fila fali tan ba ninia rai, ninia moris-fatin.
11 “Tanba Jeová koʼalia kona-ba Josias nia oan-mane Salum,*+ neʼebé ukun nuʼudar liurai ba rai-Judá hodi troka ninia aman Josias,+ no sai tiha ona husi fatin neʼe, hodi dehan: ‘Nia sei la fila fali tan. 12 Tanba nia sei mate iha fatin neʼebé sira lori nia bá nuʼudar dadur,* no nia sei la haree tan rai neʼe.’+
13 Susar ba ema* neʼebé harii ninia uma ho hahalok la loos
No harii ninia kuartu sira iha andár-leten la ho justisa,
Nia neʼebé halo ninia maluk sira serbisu ba nia saugati deʼit,
No lakohi selu kolen ba ninia maluk sira.+
14 Nia dehan: ‘Haʼu sei harii uma boot ba haʼu-nia an,
Ho kuartu sira neʼebé luan iha andár-leten.
Haʼu sei tau janela sira
No taka uma nia didin ho ai-sedru no pinta ho kór-mean neʼebé moris loos.’
15 Ó sei ukun nafatin tan deʼit ó uza ai-sedru barak liu fali ema seluk ka?
Ó-nia aman mós han no hemu,
Maibé nia defende justisa no hahalok loos,+
No buat hotu iha ninia moris laʼo ho diʼak.
16 Nia defende ema iha terus laran no ema kiak nia kazu,
Hodi nuneʼe mak buat hotu laʼo ho diʼak.
Jeová dehan: ‘Neʼe hatudu katak nia hatene haʼu, loos ka lae?’
17 ‘Maibé ó-nia matan no fuan hakarak atu manán buat ruma ho laran-makerek,
Atu fakar ema laran-moos nia raan,
No atu lohi ema no hamatak ema.’
18 “Tan neʼe, kona-ba Josias nia oan-mane, Jeoquim,+ liurai ba rai-Judá, Jeová dehan nuneʼe:
‘Bainhira nia mate, ema sei la tanis ba nia, hodi dehan:
“Aii, haʼu-nia naan! Aii, haʼu-nia feton!”
Sira sei la lelir ba nia, hodi dehan:
“Aii, haʼu-nia naʼi! Aii, ninia kmanek la iha ona!”
19 Ema sei hakoi nia hanesan hakoi kuda-burru,+
Sira sei rasta ninia mate-isin no soe tiha
Ba Jeruzalein nia portaun liʼur.’+
20 Saʼe ba Líbanu no hakilar bá,*
Hasai lian makaʼas iha Basan,
No hakilar husi Abarim,+
Tanba ó-nia doben hotu neʼebé kaan ó lakon mohu ona.+
21 Uluk haʼu koʼalia ba ó bainhira ó sente hakmatek hela.
Maibé ó hatete: ‘Haʼu sei la halo tuir.’+
Ó halo nuneʼe husi tempu neʼebé ó sei joven,
Tanba ó la halo tuir haʼu-nia liafuan.+
22 Anin mak sei lori ó-nia bibi-atan hotu,+
Ó-nia doben sira neʼebé kaan ó sei sai dadur.
No ema sei hamoe ó no ó sei sente moe tanba ó-nia terus hotu.
23 Ó neʼebé hela iha Líbanu,+
Ó neʼebé halo knuuk iha ai-sedru nia leet,+
Ó sei halerik bainhira ó sente moras,
24 “Jeová dehan: ‘Haʼu jura hodi haʼu-nia moris rasik: Kona-ba ó, Jeoquim+ nia oan-mane Konias,*+ neʼebé ukun nuʼudar liurai ba rai-Judá, maski ó hanesan kadeli selus* iha haʼu-nia liman-loos, maibé haʼu sei losu sai ó husi haʼu-nia liman! 25 Haʼu sei entrega ó ba ema sira neʼebé buka atu oho ó, ba sira neʼebé halo taʼuk ó, ba Liurai Nabukodonozór* husi rai-Babilónia, no ba ema Kaldeia sira.+ 26 Haʼu sei soe ó ba rai seluk hamutuk ho ó-nia inan neʼebé tuur-ahi ó. Haʼu sei soe imi ba rai neʼebé laʼós imi-nia moris-fatin, no imi sei mate iha neʼebá. 27 Sira sei nunka fila fali ba rai neʼebé sira hadomi tebes.+
28 Konias hanesan deʼit ho sanan-rai neʼebé rahun ona no ema hakribi ka?
Nia hanesan vazu ida neʼebé la iha ema ida mak hakarak ka?
Tanbasá mak haʼu tenke soe nia ho ninia bei-oan sira,
No soe sira ba rai neʼebé sira la hatene?’+
29 Oh rai, rai, rai, rona Jeová nia liafuan bá.
30 Jeová dehan nuneʼe:
‘Hakerek kona-ba ema neʼe nuʼudar ema neʼebé la iha oan,
Nuʼudar ema neʼebé sei la hetan susesu iha ninia moris tomak,
Tanba husi ninia bei-oan hotu, la iha ema ida mak sei troka ninia fatin
Hodi tuur iha David nia kadunan no ukun fali iha rai-Judá.’”+
23 Jeová dehan: “Susar ba bibi-atan sira neʼebé halakon no halo namkari bibi-malae sira neʼebé haʼu tau matan!”+
2 Tan neʼe, Jeová, Izraél nia Maromak, dehan ba bibi-atan sira neʼebé iha knaar atu tau matan ba ninia povu: “Imi halo haʼu-nia bibi-malae sira halai namkari. Imi nafatin halo sira namkari, no imi la tau matan didiʼak ba sira.”+
“Tan neʼe haʼu sei fó kastigu ba imi tanba imi-nia hahalok aat sira”, Jeová mak dehan.
3 “Tuirmai, haʼu sei halibur haʼu-nia bibi-malae restu husi rai hotu neʼebé haʼu halo ona sira namkari bá,+ no haʼu sei lori sira fila fali ba sira-nia rai neʼebé nakonu ho duʼut matak,+ no sira sei iha oan no sai barak.+ 4 No haʼu sei foti bibi-atan sira neʼebé sei tau matan duni bibi sira ho didiʼak.+ Bibi sira-neʼe sei la taʼuk no mós la laran-taridu tan, no la iha bibi ida mak sei lakon”, Jeová mak dehan.
5 Jeová dehan: “Tempu sei toʼo mai bainhira haʼu sei halo moris ai-tubun ida* neʼebé laran-loos husi David nia umakain.+ No nia sei ukun nuʼudar liurai ida+ neʼebé hatudu matenek, defende justisa no hahalok loos iha rai neʼe.+ 6 Iha ninia tempu, Judá sei hetan salvasaun,+ no Izraél sei hela ho hakmatek.+ No ema sei hanaran nia: Ita-nia Hahalok Loos Mai husi Jeová.”+
7 Jeová dehan: “Tan neʼe, tempu sei toʼo mai bainhira sira sei la hatete tan: ‘Haʼu jura hodi Jeová, Maromak neʼebé moris, neʼebé lori povu Izraél sai husi rai-Ejitu!’+ 8 maibé sira sei hatete fali: ‘Haʼu jura hodi Jeová, Maromak neʼebé moris, neʼebé lori sai umakain Izraél nia jerasaun sira husi rai iha parte norte no husi rai hotu neʼebé nia halo sira hela namkari bá’, no sira sei hela iha sira-nia rai rasik.”+
9 Haʼu dehan ba profeta sira:
Haʼu-nia fuan rahun iha haʼu-nia laran.
Haʼu-nia ruin hotu nakdedar.
Haʼu sai hanesan ema neʼebé lanu
Hanesan mane neʼebé hemu tua-uvas toʼo lanu,
Tanba Jeová no tanba ninia liafuan neʼebé santu.
10 Tanba rai neʼe nakonu ho ema neʼebé halo adultériu.*+
Rai neʼe tanis halerik tanba hetan malisan+
No duʼut matak iha rai-fuik sai maran tiha.+
Sira-nia hahalok mak aat, no sira uza sala sira-nia kbiit.
11 Jeová dehan: “Profeta no amlulik hotu foʼer ona.*+
Iha haʼu-nia uma mós haʼu haree ona sira-nia hahalok aat.”+
12 Jeová dehan: “Tan neʼe, sira-nia dalan sei sai namdoras no nakukun;+
Sira sei sidi no monu.
Tanba haʼu sei lori terus ba sira
Iha tinan kastigu nian.
13 Haʼu haree ona buat neʼebé aat tebes iha profeta iha Samaria nia leet.+
Profesia neʼebé sira hatoʼo mak husi Baal,
No sira lori haʼu-nia povu Izraél laʼo sala dalan.
14 No haʼu haree ona buat sira neʼebé haʼu hakribi tebes iha profeta sira iha Jeruzalein nia leet.
Sira halo adultériu*+ no laʼo iha lia-bosok;+
Sira fó aten-brani ba ema aat sira,*
No sira la sees husi sira-nia hahalok aat.
15 Tan neʼe, Jeová neʼebé ukun tropa lalehan nian dehan ba profeta sira:
“Haʼu sei halo sira han ai-tahan neʼebé moruk
No fó bee venenu ba sira atu hemu.+
Tanba profeta sira iha Jeruzalein halo ema hotu iha rai neʼe fila kotuk ba haʼu.”*
16 Jeová neʼebé ukun tropa lalehan nian dehan nuneʼe:
“Keta rona ba profeta nia liafuan neʼebé sira hatoʼo ba imi.+
Sira bosok deʼit imi.*
17 Sira hatete fila-fila ba ema neʼebé la hamtaʼuk haʼu:
‘Jeová dehan: “Imi sei iha dame.”’+
No ba ema hotu neʼebé laʼo tuir sira rasik nia laran neʼebé toos, sira hatete:
‘Terus sei la kona imi.’+
18 Sé mak hamriik hamutuk ona ho ema neʼebé besik Jeová
Atu rona no komprende ninia liafuan?
Sé mak tau atensaun ba ninia liafuan hodi rona?
19 Jeová nia hirus sei huu makaʼas hanesan anin-fuik,
Hanesan anin-fuik neʼebé nakdulas makaʼas, neʼebé tun ba ema aat sira-nia ulun.+
20 Jeová sei la hatún ninia hirus
Toʼo nia kumpre ona ninia hakarak iha ninia laran.
Iha loron sira-neʼe nia rohan, imi sei komprende ida-neʼe ho klaru.
21 Haʼu la haruka profeta sira-neʼe no haʼu la koʼalia ba sira,
Maibé sira halai bá hodi fó sai profesia.+
22 Maibé se karik sira hamriik hamutuk ho ema neʼebé besik loos ba haʼu,
Sira sei halo haʼu-nia povu rona haʼu-nia liafuan
No halo haʼu-nia povu fila fali husi dalan sira neʼebé aat no hahalok sira neʼebé aat.”+
23 Jeová dehan: “Haʼu mak Maromak bainhira haʼu besik imi, no haʼu mós Maromak bainhira haʼu dook husi imi, loos ka lae?”
24 Jeová dehan: “Ema ruma bele subar an iha fatin neʼebé haʼu labele haree ka?”+
Jeová dehan: “Haʼu bele haree buat hotu iha lalehan no rai, loos ka lae?”+
25 “Haʼu rona ona profeta sira neʼebé hatoʼo lia-bosok hodi haʼu-nia naran, dehan: ‘Haʼu hetan mehi! Haʼu hetan mehi!’+ 26 Toʼo bainhira mak profeta sira hanoin nafatin atu hatoʼo profesia bosok? Sira mak profeta neʼebé koʼalia lia-bobar husi sira-nia laran rasik.+ 27 Sira koko atu halo haʼu-nia povu haluha haʼu-nia naran liuhusi sira-nia mehi neʼebé sira konta ba malu, hanesan sira-nia aman sira neʼebé haluha ona haʼu-nia naran tanba Baal.+ 28 Profeta neʼebé hetan mehi, husik nia konta mehi bá. Maibé profeta neʼebé simu duni haʼu-nia liafuan, nia tenke hatoʼo liafuan neʼe ho loloos.”
Jeová dehan: “Trigu-kain no trigu-musan la hanesan duni, loos ka lae?”
29 Jeová dehan: “Haʼu-nia liafuan mak hanesan ahi,+ no hanesan marreta neʼebé baku rahun fatuk boot, loos ka lae?”+
30 Jeová dehan: “Tan neʼe, haʼu sei kontra profeta sira neʼebé naʼok haʼu-nia liafuan husi sira-nia maluk.”+
31 Jeová dehan: “Haʼu sei kontra profeta sira neʼebé uza sira-nia nanál atu koʼalia: ‘Maromak dehan nuneʼe!’”+
32 Jeová dehan: “Haʼu sei kontra profeta sira neʼebé konta sira-nia mehi falsu no lori haʼu-nia povu laʼo sala dalan tanba sira-nia lia-bosok no liafuan gaba an.”+
Jeová dehan nuneʼe: “Haʼu la haruka sira no la fó mandamentu ba sira atu halo ida-neʼe. Nuneʼe sira sei la lori buat diʼak ida ba povu neʼe.”+
33 “Kuandu povu neʼe ka profeta ka amlulik ida dehan: ‘Lia-menon neʼe hanesan naha todan* husi Jeová.’ Ó tenke hatán ba sira: ‘Jeová dehan nuneʼe: “Imi mak naha todan! Haʼu sei soe tiha imi.”’+ 34 Kona-ba profeta, amlulik ka povu neʼebé hatete: ‘Lia-menon husi Jeová mak naha todan!’ haʼu sei kontra hasoru ema neʼe no ninia umakain. 35 Neʼe mak liafuan neʼebé imi ida-idak koʼalia ba imi-nia maluk no imi-nia maun-alin sira, dehan: ‘Saida mak Jeová hatán? Saida mak Jeová hatete?’ 36 Maibé imi labele dehan tan katak Jeová nia lia-menon mak naha todan. Tanba imi ida-idak mak halo naha todan ba imi-nia an rasik hodi hatoʼo imi-nia liafuan rasik no imi troka ona liafuan husi Jeová neʼebé ukun tropa lalehan nian, ita-nia Maromak neʼebé moris.
37 “Tuirmai neʼe mak liafuan neʼebé ó sei fó sai ba profeta sira: ‘Saida mak Jeová hatán ona ba imi? Saida mak Jeová hatete? 38 Se imi nafatin hatete: “Lia-menon husi Jeová mak naha todan!” Jeová dehan nuneʼe: “Tanba imi hatete: ‘Jeová nia liafuan mak naha todan’ maski haʼu dehan ona ba imi: ‘Imi labele hatete katak lia-menon husi Jeová mak naha todan’, 39 entaun haʼu sei foti saʼe imi no soe imi dook husi haʼu-nia oin, imi no mós sidade neʼebé haʼu fó ona ba imi no ba imi-nia beiʼala sira. 40 Haʼu sei hamoe imi, no imi sei hetan moe boot ba nafatin, moe neʼebé ema sei nunka haluha.”’”+
24 Tuirmai, Jeová hatudu ba haʼu bote rua nakonu ho figeira-fuan neʼebé tau iha Jeová nia templu oin. Neʼe akontese bainhira Liurai Nabukodonozór* husi Babilónia lori ona Jeoquim+ nia oan-mane Jeconias,*+ liurai husi rai-Judá, nuʼudar dadur. Nia lori liurai neʼe hamutuk ho ulun-naʼin sira husi rai-Judá, badaen no badaen-besi* sira husi Jeruzalein nuʼudar dadur* ba Babilónia.+ 2 Iha bote ida nakonu ho figeira-fuan neʼebé diʼak tebes, hanesan figeira-fuan primeiru neʼebé tasak uluk,* maibé iha bote ida seluk nakonu ho figeira-fuan neʼebé aat tebes toʼo ema labele han tanba aat loos.
3 Tuirmai Jeová husu mai haʼu: “Jeremias, saida mak ó haree?” Haʼu hatán: “Figeira-fuan sira. Iha figeira-fuan neʼebé diʼak tebes, maibé iha mós figeira-fuan neʼebé aat tebes toʼo ema labele han.”+
4 Tuirmai Jeová dehan mai haʼu: 5 “Jeová, Izraél nia Maromak, dehan nuneʼe: ‘Hanesan figeira-fuan neʼebé diʼak, haʼu mós sei haree ema dadur sira husi rai-Judá ho didiʼak, sira neʼebé haʼu haruka ona sai husi fatin neʼe ba ema Kaldeia nia rai. 6 Haʼu sei tau matan sira no halo diʼak ba sira, no haʼu sei halo sira fila fali ba rai neʼe.+ Haʼu sei harii sira, no haʼu sei la sobu sira. Haʼu sei kuda sira, no haʼu sei la fokit sira.+ 7 Haʼu sei fó sira laran neʼebé hakarak hatene kona-ba haʼu, katak haʼu mak Jeová.+ Sira sei sai haʼu-nia povu, no haʼu sei sai sira-nia Maromak,+ tanba sira sei fila fali mai haʼu ho sira-nia laran tomak.+
8 “‘Maibé kona-ba figeira-fuan neʼebé aat toʼo ema labele han,+ Jeová dehan nuneʼe: “Haʼu-nia hanoin kona-ba Liurai Zedequias+ husi rai-Judá mak hanesan neʼe, nuneʼe mós ho ninia ulun-naʼin sira, no ema restu husi Jeruzalein neʼebé sei hela nafatin iha rai neʼe, no mós ema sira neʼebé hela iha rai-Ejitu.+ 9 Haʼu sei halo nasaun hotu iha mundu neʼe sai taʼuk tanba haree susar neʼebé kona sira.+ Ema sei hamoe sira, konta lia-dadolin kona-ba sira, hatún sira no fó-malisan ba sira+ iha fatin hotu neʼebé haʼu halo sira namkari bá.+ 10 Haʼu sei haruka surik,+ hamlaha boot no moras-peste* hasoru sira,+ toʼo sira lakon mohu husi rai neʼe, neʼebé haʼu fó ona ba sira no sira-nia beiʼala.”’”
25 Neʼe mak liafuan neʼebé Maromak hatoʼo ba Jeremias kona-ba povu hotu iha rai-Judá iha tinan haat husi Liurai Jeoquim nia ukun. Jeoquim+ mak Josias nia oan-mane. Tempu neʼe mak tinan primeiru husi Liurai Nabukodonozór* nia ukun iha rai-Babilónia. 2 Tuirmai neʼe mak liafuan neʼebé profeta Jeremias fó sai kona-ba* povu hotu iha rai-Judá no ema hotu neʼebé hela iha Jeruzalein:
3 “Hahú husi tinan 13 husi Amon nia oan-mane Josias+ nia ukun nuʼudar liurai ba rai-Judá toʼo ohin loron, neʼe katak durante tinan 23 nia laran, Jeová fó sai ninia liafuan mai haʼu, no haʼu koʼalia fila-fila* ba imi, maibé imi lakohi rona.+ 4 No Jeová haruka ninia atan profeta sira hotu ba imi, nia haruka sira fila-fila,* maibé imi lakohi rona no la see tilun.+ 5 Sira dehan beibeik: ‘Favór ida, imi ida-idak fila fali husi imi-nia dalan sira neʼebé aat no husi imi-nia hahalok aat sira;+ ho ida-neʼe mak imi sei hela nafatin ba tempu kleur iha rai neʼebé Jeová fó ona ba imi no ba imi-nia beiʼala sira iha tempu uluk. 6 Keta laʼo tuir maromak sira seluk, keta serbí no hakruʼuk ba sira hodi hakanek haʼu-nia laran ho buat neʼebé imi halo ho imi-nia liman. Se lae, haʼu sei fó-terus ba imi.’
7 “Jeová dehan: ‘Maibé imi lakohi rona haʼu. Imi hakanek haʼu-nia laran ho buat neʼebé imi halo ho imi-nia liman, toʼo lori susar ba imi-nia an rasik.’+
8 “Tan neʼe, Jeová neʼebé ukun tropa lalehan nian dehan: ‘“Tanba imi lakohi halo tuir haʼu-nia liafuan, 9 haʼu sei bolu nasaun* sira hotu husi parte norte”,+ Jeová dehan: “Haʼu sei bolu haʼu-nia atan, Nabukodonozór,* liurai ba rai-Babilónia,+ no haʼu sei lori sira atu ataka rai neʼe+ no ema hotu neʼebé hela iha neʼe no mós nasaun sira hotu neʼebé haleʼu rai neʼe.+ Haʼu sei halakon sira hotu, no ema sei taʼuk no hakfuʼik bainhira haree buat neʼebé akontese ba sira, no fatin neʼe sei sai fuik ba nafatin. 10 Haʼu sei hapara sira-nia lian haksolok no kontente nian,+ lian husi noivu no lian husi noiva,+ lian husi fatuk dulas trigu nian no ahi-oan nia naroman. 11 No rai tomak sei sai aat no fuik, no sei sai fatin neʼebé halo ema taʼuk, no nasaun sira-neʼe tenke sai atan ba liurai Babilónia durante tinan 70.”’+
12 “Jeová dehan: ‘Maibé bainhira tinan 70 neʼe remata ona,+ haʼu sei fó kastigu ba liurai Babilónia no ninia nasaun tanba sala neʼebé sira halo,+ no haʼu sei halo ema Kaldeia sira-nia rai sai fatin neʼebé rahun no mamuk ba nafatin.+ 13 Haʼu sei kumpre liafuan hotu neʼebé haʼu koʼalia ona kona-ba rai neʼe, tuir liafuan hotu neʼebé hakerek ona iha livru neʼe, tuir profesia neʼebé Jeremias fó sai kona-ba nasaun hotu. 14 Liurai boot sira no nasaun barak+ sei halo sira sai atan,+ no haʼu sei selu fali sira tuir sira-nia hahalok no tuir buat neʼebé sira halo ho sira-nia liman.’”+
15 Jeová, Izraél nia Maromak, dehan nuneʼe ba haʼu: “Foti kopu neʼebé nakonu ho tua-uvas hirus nian husi haʼu-nia liman, no lori ba nasaun hotu neʼebé haʼu haruka ó bá, atu sira hemu. 16 Sira sei hemu no laʼo namlele bá-mai hanesan ema bulak, tanba surik neʼebé haʼu haruka ba sira-nia leet.”+
17 Nuneʼe, haʼu foti kopu neʼe husi Jeová nia liman no lori ba nasaun hotu hodi sira hemu, nasaun hotu neʼebé Jeová haruka haʼu bá:+ 18 hahú husi Jeruzalein no sidade sira iha rai-Judá,+ ninia liurai sira no ulun-naʼin sira, atu halakon sira no ema sei temi sira nuʼudar malisan, ema sei taʼuk no hakfuʼik bainhira haree buat neʼebé akontese ba sira,+ hanesan ohin loron; 19 tuirmai Faraó,* liurai Ejitu nian, ho ninia atan sira, ninia ulun-naʼin sira no ninia povu hotu,+ 20 no mós ema hotu husi rai oioin neʼebé hela iha rai-Ejitu; liurai hotu husi rai-Uz; liurai hotu husi ema Filístia nia rai:+ Askelon,+ Gaza, Ekron, no ema restu neʼebé sei hela iha Asdod; 21 Edom,+ Moab+ no ema Ammon;+ 22 liurai hotu husi Tiro, liurai hotu husi Sidon,+ no liurai sira husi illa neʼebé iha tasi; 23 Dedan,+ Tema, Buz, no ema hotu neʼebé tesi badak sira-nia fuuk iha sira-nia tilun-hun;+ 24 liurai hotu neʼebé ukun ema Arábia+ no liurai hotu neʼebé ukun ema husi rai oioin neʼebé hela iha rai-fuik; 25 liurai hotu husi Zimri, liurai hotu husi Elam,+ no liurai hotu neʼebé ukun ema Média;+ 26 no liurai hotu husi rai iha parte norte, sira neʼebé besik no mós dook, ida ba ida, no nasaun seluk hotu iha mundu neʼe; ikusliu liurai husi Sesak*+ mós sei hemu tua-uvas neʼe.
27 “Ó tenke hatete ba sira: ‘Jeová neʼebé ukun tropa lalehan nian, Izraél nia Maromak, dehan nuneʼe: “Hemu no sai lanu bá, muta no monu toʼo labele hamriik fali+ tanba surik neʼebé haʼu sei haruka ba imi-nia leet.”’ 28 Se sira lakohi foti kopu neʼe husi ó-nia liman no hemu, ó tenke hatete ba sira: ‘Jeová neʼebé ukun tropa lalehan nian, dehan nuneʼe: “Imi tenke hemu! 29 Haree bá! Se haʼu fó uluk kastigu ba sidade neʼebé lori haʼu-nia naran,+ sá tan ho imi? Imi bele sees husi kastigu ka lae?”’+
“Jeová neʼebé ukun tropa lalehan nian dehan: ‘Imi sei la sees husi kastigu, tanba haʼu sei bolu surik atu ataka ema hotu neʼebé hela iha mundu neʼe.’
30 “No ó tenke fó sai profesia no hatete liafuan sira-neʼe hotu ba sira:
‘Jeová sei hasai lian boot husi fatin aas,
No ema sei rona nia lian husi ninia hela-fatin santu.
Nia sei hasai lian makaʼas hasoru ninia hela-fatin.
Nia sei hakilar hanesan ema neʼebé sama uvas-fuan,
No kanta knananuk manán nian hasoru ema hotu neʼebé hela iha mundu.’
31 Jeová dehan: ‘Barullu boot sei toʼo rai hotu iha mundu tomak,
Tanba Jeová foti kazu kontra nasaun sira.
Nia rasik sei tesi-lia ba ema hotu.+
Nia sei halakon ema aat sira ho surik.’
32 Jeová neʼebé ukun tropa lalehan nian dehan:
‘Terus sei habelar husi nasaun ida toʼo nasaun seluk,+
No anin-fuik sei huu husi fatin neʼebé dook liu iha mundu neʼe.+
33 “‘Ema sira neʼebé Jeová oho iha loron neʼebá sei sai barak husi rai nia rohan ida toʼo rai nia rohan seluk. Ema sei la tanis ba sira, no ema sei la halibur ka hakoi sira-nia mate-isin. Sira sei sai hanesan adubu* iha rai.’
34 Imi bibi-atan sira, tanis halerik bá!
Imi povu* nia ulun-naʼin sira neʼebé kmanek, duir an bá iha rai-rahun laran,
Tanba tempu atu oho imi no halo imi namkari toʼo mai ona,
No imi sei monu rahun hanesan vazu neʼebé folin-boot!
35 La iha tan fatin ba bibi-atan sira atu halai,
No povu* nia ulun-naʼin sira neʼebé kmanek mós labele halai sees.
36 Rona bá! Bibi-atan hasai lian halerik
No povu* nia ulun-naʼin sira neʼebé kmanek tanis hakilar,
Tanba Jeová estraga daudaun sira-nia rai matak.
37 Ema nia hela-fatin sira neʼebé hakmatek sai mamuk ona
Tanba Jeová nia hirus neʼebé lakan makaʼas.
38 Nia hanesan leaun-aman ida neʼebé sai ona husi ninia hela-fatin,+
No sira-nia rai sai fatin neʼebé halo ema taʼuk
Tanba surik neʼebé siʼak
No tanba ninia hirus neʼebé lakan makaʼas.”
26 Bainhira Josias nia oan-mane Jeoquim+ hahú ukun nuʼudar liurai ba rai-Judá, Jeová fó sai ninia liafuan ba Jeremias, hodi dehan: 2 “Jeová dehan nuneʼe: ‘Bá, hamriik iha pátiu* iha Jeová nia uma no koʼalia kona-ba* ema hotu husi sidade sira iha rai-Judá, neʼebé mai atu adora* Jeová iha ninia uma. Fó-hatene ba sira liafuan hotu neʼebé haʼu haruka ó atu hatoʼo. Keta hamenus liafuan ida husi lia-menon neʼe. 3 Karik sira sei rona no sira ida-idak sei fila fali husi sira-nia dalan neʼebé aat, no haʼu sei troka haʼu-nia hanoin* kona-ba terus neʼebé haʼu hakarak fó ba sira tanba sira-nia hahalok aat.+ 4 Hatete ba sira: “Jeová dehan nuneʼe: ‘Se imi la rona haʼu hodi la halo tuir haʼu-nia ukun-fuan* neʼebé haʼu tau ona iha imi-nia oin, 5 no la rona ba liafuan husi haʼu-nia atan profeta sira neʼebé haʼu haruka fila-fila ba imi,* neʼebé toʼo ohin loron imi la rona,+ 6 se nuneʼe, haʼu sei halo uma neʼe sai hanesan Silo,+ no nasaun sira hotu iha mundu sei temi sidade neʼe nuʼudar malisan.’”’”+
7 No amlulik, profeta sira no povu hotu rona Jeremias koʼalia liafuan hirak-neʼe iha Jeová nia uma.+ 8 Tan neʼe, bainhira Jeremias koʼalia tiha lia-menon neʼebé Jeová haruka ona nia atu hatoʼo ba ema hotu, amlulik, profeta sira no povu hotu kaer nia no dehan: “Ó tenke mate. 9 Tanbasá mak ó fó sai profesia hodi Jeová nia naran, dehan: ‘Uma neʼe sei sai hanesan Silo, no sidade neʼe sei sai aat no fuik no ema sei la hela tan iha neʼe’?” Ema hotu hobur Jeremias iha Jeová nia uma.
10 Bainhira ulun-naʼin sira iha rai-Judá rona liafuan sira-neʼe, sira sai husi liurai nia palásiu no bá toʼo Jeová nia uma no tuur iha portaun foun iha Jeová nia uma.+ 11 Tuirmai, amlulik no profeta sira dehan ba ulun-naʼin sira no mós ba povu hotu: “Ema neʼe merese simu kastigu-mate,+ tanba nia fó sai profesia hodi hatete aat sidade neʼe hanesan imi foin rona ho imi-nia tilun rasik.”+
12 Nuneʼe, Jeremias hatete ba ulun-naʼin sira hotu no mós ba ema hotu: “Jeová mak haruka haʼu atu fó sai profesia hodi kontra uma neʼe no sidade neʼe, hanesan imi foin rona.+ 13 Tan neʼe, agora, hadiʼa imi-nia dalan no imi-nia hahalok sira no halo tuir imi-nia Maromak Jeová nia liafuan, hodi nuneʼe Jeová sei troka ninia hanoin* kona-ba terus neʼebé nia dehan ona atu fó ba imi.+ 14 Maibé kona-ba haʼu, haʼu iha imi-nia liman ona. Halo deʼit ba haʼu tuir buat neʼebé imi hanoin mak diʼak no loos. 15 Maibé imi tenke hatene ida-neʼe bá: Se imi oho haʼu, imi no sidade neʼe no ema hotu neʼebé hela iha sidade neʼe sei simu sala ba ema laran-moos nia raan, tanba loloos Jeová mak haruka haʼu ba imi atu hatoʼo liafuan sira-neʼe hotu iha imi-nia leet.”
16 Tuirmai, ulun-naʼin sira no povu hotu hatete ba amlulik no profeta sira, hodi dehan: “Ema neʼe la merese simu kastigu-mate, tanba nia koʼalia ba ita hodi Jeová ita-nia Maromak nia naran.”
17 Liután neʼe, katuas balu iha rai neʼe mós hamriik no hahú koʼalia ba kongregasaun* tomak, hodi dehan: 18 “Bainhira Liurai Ezequias+ ukun rai-Judá, Miqueias+ husi Moreset fó sai profesia ba povu iha rai-Judá, dehan: ‘Jeová neʼebé ukun tropa lalehan nian dehan nuneʼe:
“Siaun sei rahun tiha hanesan ema fila rai iha toʼos,
Sidade Jeruzalein sei sai fatin neʼebé rahun,+
No foho neʼebé Maromak nia uma* harii bá sei sai hanesan ai-laran.”’+
19 “Maibé Liurai Ezequias husi Judá no ema Judá hotu oho nia ka lae? Liurai neʼe hamtaʼuk Jeová no husu Jeová nia laran-sadiʼa,* nuneʼe Jeová troka ninia hanoin* kona-ba terus neʼebé nia dehan ona atu fó ba sira, loos ka lae?+ Se ita halo buat ida hanesan neʼe,* ita sei lori terus boot ba ita-nia an rasik.
20 “Iha mós ema ida neʼebé fó sai profesia hodi Jeová nia naran, nia mak Semaias nia oan-mane Urias, husi Kiriat-Jearim.+ Nia mós hatoʼo liafuan kontra sidade neʼe no rai neʼe, hanesan deʼit ho Jeremias nia liafuan. 21 Liurai Jeoquim+ ho ninia asuwaʼin sira no ulun-naʼin hotu rona Urias nia liafuan, no liurai neʼe buka atu oho nia.+ Bainhira Urias rona kona-ba neʼe, nia sai taʼuk no halai ba rai-Ejitu. 22 Tuirmai Liurai Jeoquim haruka Akbor nia oan-mane Elnatan,+ hamutuk ho mane sira seluk bá rai-Ejitu. 23 Sira lori Urias husi rai-Ejitu no lori nia ba Liurai Jeoquim, tuirmai liurai oho nia ho surik+ no soe ninia mate-isin ba fatin neʼebé baibain hakoi povu kiʼik.”
24 Maibé Safan+ nia oan-mane Ahikam+ apoia Jeremias, tan neʼe povu labele kaer nia no labele oho nia.+
27 Bainhira Josias nia oan-mane Jeoquim hahú ukun rai-Judá nuʼudar liurai, Jeová fó sai ninia liafuan ba Jeremias: 2 “Jeová dehan mai haʼu: ‘Halo tali sira no ai-leba* sira bá, no tau buat sira-neʼe ba ó-nia kabaas. 3 Tuirmai, haruka buat sira-neʼe ba liurai Edom,+ liurai Moab,+ ema Ammon nia liurai,+ liurai Tiro+ no liurai Sidon+ liuhusi sira-nia ema neʼebé lori lia-menon neʼebé mai toʼo Jeruzalein atu hasoru Zedequias, liurai ba rai-Judá. 4 Fó mandamentu tuirmai neʼe ba sira atu sira bele hatoʼo ba sira-nia naʼi:
“‘“Jeová neʼebé ukun tropa lalehan nian, Izraél nia Maromak, dehan nuneʼe no imi tenke hatete nuneʼe ba imi-nia naʼi sira: 5 ‘Haʼu mak ida neʼebé kria mundu, ema no animál sira iha rai ho haʼu-nia kbiit boot no ho haʼu-nia liman neʼebé forte. Haʼu entrega ona mundu ba ema naran deʼit neʼebé haʼu hakarak entrega bá.+ 6 Agora, haʼu entrega ona rai sira-neʼe hotu ba haʼu-nia atan Liurai Nabukodonozór+ husi Babilónia. Animál fuik sira iha rai mós haʼu entrega ona ba nia atu serbí nia. 7 Nasaun sira hotu sei serbí nia no ninia oan-mane no ninia bei-oan toʼo tempu neʼebé ninia nasaun nia ukun toʼo ona rohan.+ Iha tempu neʼebá, nasaun barak no liurai boot sira sei halo nia sai atan.’+
8 “‘“Jeová dehan: ‘Se iha nasaun ka ukun ruma neʼebé lakohi serbí Liurai Nabukodonozór husi rai-Babilónia, no lakohi hakruʼuk hodi lori ai-leba husi liurai Babilónia, haʼu sei fó kastigu ba nasaun neʼe ho surik,+ hamlaha boot no moras-peste,* toʼo haʼu halakon sira ho ninia liman.’
9 “‘“‘Tan neʼe, keta rona ba imi-nia profeta, siʼikdór, mehidór, ema neʼebé halo masonik no matan-dook sira, neʼebé hatete ba imi: “Imi sei la serbí liurai Babilónia.” 10 Tanba sira fó sai profesia bosok ba imi, no se imi rona ba sira, ema sei lori imi dook husi imi-nia rai no haʼu sei halo imi namkari no imi sei lakon mohu.
11 “‘“Jeová dehan: ‘Maibé kona-ba nasaun neʼebé hakruʼuk hodi lori ai-leba husi liurai Babilónia no serbí nia, haʼu sei husik nasaun neʼe hela* iha sira-nia rai rasik, no sira sei halo toʼos no hela iha neʼebá.’”’”
12 Haʼu mós hatoʼo liafuan neʼebé hanesan ba Liurai Zedequias+ husi rai-Judá, hodi dehan: “Hakruʼuk hodi lori ai-leba husi liurai Babilónia no serbí nia no ninia povu, no moris nafatin bá.+ 13 Tanbasá mak ó no ó-nia povu tenke mate ho surik,+ hamlaha boot+ no moras-peste,+ hanesan liafuan neʼebé Jeová dehan ona kona-ba nasaun neʼebé lakohi serbí liurai Babilónia? 14 Keta rona ba liafuan neʼebé profeta sira koʼalia ba imi, hodi dehan: ‘Imi sei la serbí liurai Babilónia’,+ tanba sira hatoʼo lia-bosok ba imi.+
15 “Jeová dehan: ‘Haʼu la haruka sira, maibé sira koʼalia lia-bosok hodi haʼu-nia naran. Tan neʼe mak haʼu sei halo imi namkari no imi sei lakon mohu, imi hamutuk ho profeta sira neʼebé koʼalia ba imi.’”+
16 No haʼu hatete ba amlulik sira no ba povu hotu: “Jeová dehan nuneʼe: ‘Keta rona ba liafuan neʼebé imi-nia profeta sira koʼalia ba imi: “Haree bá! Lakleur tan sasán sira iha Jeová nia uma sei lori fila fali husi Babilónia!”+ tanba sira hatoʼo lia-bosok ba imi.+ 17 Keta rona sira. Serbí liurai Babilónia no moris nafatin bá.+ Tanbasá mak sidade neʼe tenke sai fuik no aat? 18 Maibé se karik sira mak profeta no hatoʼo Jeová nia liafuan, favór ida, husu sira atu harohan ba Jeová neʼebé ukun tropa lalehan nian, atu sasán restu neʼebé sei iha Jeová nia uma, iha liurai Judá nia palásiu no iha Jeruzalein labele lori ba Babilónia.’
19 “Tanba Jeová neʼebé ukun tropa lalehan nian, dehan nuneʼe kona-ba uma nia riin sira,+ tanke neʼebé hanaran Tasi,*+ karrosa sira+ no sasán restu sira neʼebé sei iha hela sidade neʼe, 20 neʼebé Liurai Nabukodonozór husi Babilónia la foti bainhira nia kaer Jeoquim nia oan-mane Jeconias, liurai Judá, no lori nia sai husi Jeruzalein hamutuk ho Judá no Jeruzalein nia ema-boot sira ba Babilónia nuʼudar dadur.*+ 21 Sin, Jeová neʼebé ukun tropa lalehan nian, Izraél nia Maromak, dehan nuneʼe kona-ba sasán restu neʼebé sei iha hela Jeová nia uma, liurai Judá nia palásiu, no iha Jeruzalein: 22 ‘Jeová dehan: “Sasán sira-neʼe hotu sei lori ba Babilónia,+ no sasán sira-neʼe sei iha neʼebá toʼo loron neʼebé haʼu tau fali atensaun ba sira. Tuirmai, haʼu sei lori fali sasán sira-neʼe no tau fali iha fatin neʼe.”’”+
28 Iha tinan neʼebé hanesan, bainhira Liurai Zedequias+ hahú ukun rai-Judá iha fulan-lima tinan haat husi ninia ukun, Azur husi Gibeão+ nia oan-mane Hananias neʼebé nuʼudar profeta hatete mai haʼu iha Jeová nia uma, iha amlulik sira no povu hotu nia oin, hodi dehan: 2 “Jeová neʼebé ukun tropa lalehan nian, Izraél nia Maromak, dehan nuneʼe: ‘Haʼu sei halo tohar ai-leba neʼebé liurai Babilónia tau ba imi.+ 3 Iha tinan rua nia laran, haʼu sei lori fila sasán hotu husi Jeová nia uma, neʼebé Liurai Nabukodonozór husi Babilónia, foti ona husi fatin neʼe no lori ba Babilónia.’”+ 4 “Jeová dehan: ‘No haʼu sei lori Jeoquim+ nia oan-mane Jeconias,+ liurai Judá, fila fali mai iha fatin neʼe, no haʼu mós sei lori ema Judá hotu neʼebé sai dadur* iha rai-Babilónia fila fali mai iha fatin neʼe,+ tanba haʼu sei halo tohar ai-leba neʼebé liurai Babilónia tau ba imi.’”
5 Tuirmai, profeta Jeremias hatete ba profeta Hananias iha amlulik sira no ema hotu nia oin bainhira sira hamriik iha Jeová nia uma. 6 Profeta Jeremias dehan: “Amen!* Jeová halo nuneʼe bá! Haʼu hein katak Jeová sei kumpre ó-nia liafuan no lori sasán sira husi Jeová nia uma no ema dadur hotu iha Babilónia fila fali mai iha fatin neʼe! 7 Maibé favór ida, rona lai lia-menon neʼebé haʼu koʼalia ba ó no ba povu hotu.* 8 Husi tempu uluk kedas, profeta sira neʼebé moris antes haʼu no antes ó, sira mós fó sai ona profesia kona-ba funu, terus no moras-peste* neʼebé akontese iha rai barak no iha nasaun boot sira. 9 Se profeta ruma fó sai profesia kona-ba dame no ninia liafuan neʼe sai loos duni, nuneʼe ema sei hatene katak Jeová mak haruka duni profeta neʼe.”
10 Rona tiha neʼe, profeta Hananias foti ai-leba husi profeta Jeremias nia kabaas no halo tohar tiha ai neʼe.+ 11 No Hananias hatete iha ema hotu nia oin: “Jeová dehan nuneʼe: ‘Hanesan neʼe mak iha tinan rua nia laran, haʼu sei halo tohar ai-leba neʼebé Liurai Nabukodonozór husi Babilónia tau iha nasaun hotu nia kabaas.’”+ Tuirmai profeta Jeremias laʼo sees husi fatin neʼe.
12 Bainhira profeta Hananias halo tohar tiha ai-leba iha profeta Jeremias nia kabaas, Jeová fó sai ninia liafuan ba Jeremias, hodi dehan: 13 “Bá no hatete ba Hananias: ‘Jeová dehan nuneʼe: “Ó halo tohar tiha ai-leba,+ maibé ó tenke troka fali ai-leba neʼe ho besi-lolon.”* 14 Tanba Jeová neʼebé ukun tropa lalehan nian, Izraél nia Maromak, dehan nuneʼe: “Haʼu sei tau besi-lolon* iha nasaun sira-neʼe hotu nia kabaas atu serbí Liurai Nabukodonozór husi Babilónia, no sira tenke serbí nia.+ Animál fuik sira iha rai mós haʼu sei entrega ba nia.”’”+
15 Tuirmai, profeta Jeremias hatete ba profeta Hananias:+ “Oh Hananias, favór ida, rona lai! Jeová la haruka ó, maibé ó halo ona povu sira-neʼe tau fiar ba lia-bosok.+ 16 Tan neʼe, Jeová dehan nuneʼe: ‘Haʼu sei halakon ó husi rai leten. Iha tinan neʼe ó sei mate, tanba ó book ema atu kontra hasoru Jeová.’”+
17 Nuneʼe, profeta Hananias mate iha fulan-hitu iha tinan neʼebá.
29 Profeta Jeremias haruka karta tuirmai neʼe husi Jeruzalein ba katuas, amlulik, profeta sira no ema hotu neʼebé Nabukodonozór lori ona husi Jeruzalein nuʼudar dadur* ba Babilónia. 2 Nia halo nuneʼe bainhira Liurai Jeconias+ no liurai nia inan,*+ ema-boot sira iha palásiu, Judá no Jeruzalein nia ulun-naʼin sira, badaen no badaen-besi* sira husik ona sidade Jeruzalein.+ 3 Nia haruka karta neʼe liuhusi Safan+ nia oan-mane Elasa no Hilquias nia oan-mane Gemarias, bainhira Liurai Zedequias+ husi Judá haruka sira bá Babilónia atu hasoru Liurai Nabukodonozór husi Babilónia. Karta neʼe dehan:
4 “Jeová neʼebé ukun tropa lalehan nian, Izraél nia Maromak, dehan ba ema dadur hotu, neʼebé sai ona husi Jeruzalein hodi bá Babilónia: 5 ‘Harii uma no hela bá. Halo toʼos no han ninia rezultadu bá. 6 Hola feto no iha oan-mane no oan-feto sira bá. Buka feen ba imi-nia oan-mane sira no buka laʼen ba imi-nia oan-feto sira, atu nuneʼe sira mós bele iha oan-mane no oan-feto sira. Sai barak iha neʼebá, no keta sai menus. 7 Buka dame iha sidade neʼebé imi sai dadur, no harohan ba Jeová kona-ba sidade neʼe, tanba se sidade neʼe iha dame, imi mós sei iha dame.+ 8 Tanba Jeová neʼebé ukun tropa lalehan nian, Izraél nia Maromak, dehan nuneʼe: “Keta husik imi-nia profeta sira no siʼikdór sira neʼebé iha imi-nia leet atu lohi imi,+ no keta rona bainhira sira konta mehi neʼebé sira hetan. 9 Tanba Jeová dehan: ‘Sira hatoʼo profesia bosok ba imi hodi haʼu-nia naran. Haʼu la haruka sira.’”’”+
10 “Jeová dehan nuneʼe: ‘Bainhira tinan 70 iha Babilónia remata ona, haʼu sei tau fali atensaun ba imi,+ no haʼu sei kumpre haʼu-nia promesa hodi lori imi fila fali ba fatin neʼe.’+
11 “Jeová dehan: ‘Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus,+ no haʼu hakarak fó imi futuru kapás no esperansa.+ 12 Imi sei bolu haʼu no hakbesik mai haʼu liuhusi orasaun, no haʼu sei rona imi.’+
13 “‘Imi sei buka haʼu no hetan haʼu,+ tanba imi sei buka haʼu ho imi-nia laran tomak.+ 14 No haʼu sei husik imi hetan haʼu’,+ Jeová mak dehan. ‘Haʼu sei halibur imi-nia ema dadur sira no halibur hamutuk imi husi nasaun hotu no fatin hotu neʼebé haʼu halo ona imi namkari bá’,+ Jeová mak dehan. ‘No haʼu sei lori imi fila husi fatin neʼebé uluk imi sai dadur.’+
15 “Maibé imi dehan: ‘Jeová hili ona profeta sira iha Babilónia ba ami.’
16 “Jeová dehan nuneʼe ba liurai neʼebé tuur iha David nia kadunan+ no ba ema hotu neʼebé hela iha sidade neʼe, katak imi-nia maun-alin sira neʼebé la bá hamutuk ho imi nuʼudar dadur: 17 ‘Jeová neʼebé ukun tropa lalehan nian dehan nuneʼe: “Haʼu sei haruka surik, hamlaha boot no moras-peste* ba sira,+ no haʼu sei halo sira sai hanesan figeira-fuan neʼebé dodok* ona no aat tebes toʼo ema labele han.”’+
18 “‘Haʼu sei duni tuir sira ho surik,+ hamlaha boot no moras-peste, no haʼu sei halo nasaun hotu iha mundu neʼe sai taʼuk tanba haree buat neʼebé haʼu halo ba sira.+ No iha nasaun hotu nia leet neʼebé haʼu halo sira namkari,+ ema sei fó-malisan ba sira, ema sei hakfodak, hakfuʼik,+ no hamoe sira, 19 tanba sira la rona ba haʼu-nia liafuan neʼebé haʼu hatoʼo ona ba sira liuhusi haʼu-nia atan profeta sira.’ Jeová dehan: ‘Haʼu haruka sira fila-fila.’*+
“‘Maibé imi la rona’,+ Jeová mak dehan.
20 “Tan neʼe, rona Jeová nia liafuan bá, imi ema dadur hotu, neʼebé haʼu duni sai husi Jeruzalein hodi bá Babilónia. 21 Kona-ba Kolias nia oan-mane Acab no kona-ba Maseias nia oan-mane Zedequias, neʼebé fó sai profesia bosok ba imi hodi haʼu-nia naran,+ Jeová neʼebé ukun tropa lalehan nian, Izraél nia Maromak, dehan nuneʼe: ‘Haʼu sei entrega sira ba Liurai Nabukodonozór* husi Babilónia nia liman, no nia sei oho sira iha imi-nia oin. 22 Ema Judá hotu neʼebé sai dadur iha Babilónia sei temi buat neʼebé akontese ba sira bainhira sira fó-malisan, hodi dehan: “Jeová sei halo ó sai hanesan Zedequias no hanesan Acab, neʼebé liurai Babilónia sunu ona iha ahi laran!” 23 Tanba sira halo ona hahalok aat iha Izraél,+ hodi halo sala seksuál* ho sira-nia maluk nia feen no koʼalia lia-bosok hodi haʼu-nia naran maski haʼu la haruka sira atu koʼalia.+
“‘Jeová dehan: “Haʼu mak hatene, no haʼu mak sasin.”’”+
24 “Ó tenke hatete ba Semaias+ husi Nehelam: 25 ‘Jeová neʼebé ukun tropa lalehan nian, Izraél nia Maromak, dehan nuneʼe: “Tanba ó hakerek karta sira hodi ó-nia naran no haruka ba ema hotu neʼebé hela iha Jeruzalein, ba Maseias nia oan-mane Sofonias,+ neʼebé serbí nuʼudar amlulik, no ba amlulik sira hotu, dehan: 26 ‘Jeová foti ona ó, amlulik Sofonias, hodi troka amlulik Jeoada, ó mak sai ulun-naʼin iha Jeová nia uma, atu kaer ema bulak neʼebé hatudu hahalok hanesan profeta no xave metin ema neʼe nia ain.*+ 27 Nuneʼe, tanbasá mak ó la korrije Jeremias husi Anatot,+ neʼebé hatudu hahalok ba imi hanesan profeta?+ 28 Tanba nia mós haruka karta mai ami iha Babilónia, dehan: “Imi sei moris nuʼudar dadur ba tempu kleur. Harii uma no hela bá. Halo toʼos no han ninia rezultadu bá,+ . . .”’”’”
29 Bainhira amlulik Sofonias+ lee tiha karta neʼe ba profeta Jeremias, 30 Jeová dehan ba Jeremias: 31 “Hakerek ba ema dadur hotu, dehan: ‘Jeová dehan nuneʼe kona-ba Semaias husi Nehelam: “Tanba Semaias fó sai profesia ba imi maski haʼu la haruka nia, no nia koko atu halo imi fiar lia-bosok,+ 32 tan neʼe, Jeová dehan nuneʼe: ‘Haʼu sei fó kastigu ba Semaias husi Nehelam no ba ninia oan no bei-oan sira. La iha ema ida husi Semaias nia umakain mak sei moris iha povu neʼe nia leet, no nia sei la haree buat diʼak neʼebé haʼu sei halo ba haʼu-nia povu’, Jeová mak dehan, ‘tanba ninia liafuan halo ema kontra Jeová’.”’”
30 Jeová fó sai ninia liafuan ba Jeremias, hodi dehan: 2 “Jeová, Izraél nia Maromak, dehan nuneʼe: ‘Hakerek liafuan hotu neʼebé haʼu hatoʼo ba ó iha livru ida. 3 Tanba Jeová dehan: “Tempu sei toʼo mai bainhira haʼu sei halibur haʼu-nia povu Izraél no Judá neʼebé sai dadur”,+ Jeová dehan, “haʼu sei lori sira fila fali ba rai neʼebé haʼu fó ona ba sira-nia beiʼala, no rai neʼe sei sai fali sira-nian”.’”+
4 Neʼe mak liafuan neʼebé Jeová hatoʼo ba Izraél no Judá.
5 Jeová dehan nuneʼe:
“Imi rona ona ema nia lian nakdedar.
Dame la iha, taʼuk deʼit mak iha.
6 Favór ida husu lai, mane ida bele tuur-ahi ka lae?
Entaun, tanbasá mak haʼu haree mane forte hotu tau sira-nia liman rua iha sira-nia knotak*
Hanesan feto neʼebé atu tuur-ahi?+
Tanbasá mak sira hotu nia oin sai kamutis?
7 Aii, loron neʼebá mak loron neʼebé aat tebes.*+
La iha loron ida mak hanesan loron neʼe,
Neʼe mak tempu neʼebé susar tebes ba Jacob.
Maibé nia sei hetan salvasaun husi susar neʼe.”
8 Jeová neʼebé ukun tropa lalehan nian dehan: “Iha loron neʼebá, haʼu sei halo tohar ai-leba iha ó-nia kabaas, no haʼu sei halo kotu ó-nia tali ba rua, no sei la iha tan ema husi rai seluk* neʼebé halo sira* sai atan. 9 Sira sei serbí Jeová, sira-nia Maromak, no serbí sira-nia Liurai David neʼebé haʼu sei hili ba sira.”+
10 Jeová dehan: “Kona-ba ó, haʼu-nia atan Jacob, keta taʼuk,
Oh Izraél, keta laran nakdedar.+
Tanba haʼu sei salva ó husi fatin dook
No haʼu sei salva ó-nia bei-oan sira husi rai neʼebé sira moris nuʼudar dadur.+
Jacob sei fila fali mai no sei moris hakmatek no iha dame,
Sei la iha ema ida mak halo sira taʼuk.”+
11 Jeová dehan: “Tanba haʼu sei hamutuk ho ó atu salva ó.
Maibé haʼu sei halakon mohu nasaun hotu neʼebé haʼu halo ona ó-nia povu namkari bá.+
Maibé kona-ba ó, haʼu sei la halakon mohu ó.+
12 Tanba Jeová dehan nuneʼe:
“Ó-nia situasaun neʼebé aat labele hadiʼa fali ona.+
Ó-nia kanek labele kura.
13 La iha ema ida mak defende ó-nia kazu,
La iha dalan atu kura ó-nia kanek neʼebé dodok,
No labele kura ona.
14 Ó-nia doben hotu neʼebé kaan ó haluha ona ó.+
Sira la buka tuir tan ó.
Tanba haʼu baku ó hanesan inimigu ida baku ó,+
Haʼu fó kastigu ba ó hanesan ema neʼebé la iha laran-sadiʼa,
Tanba ó-nia sala neʼebé todan no ó halo ona sala barak tebes.+
15 Tanbasá mak ó halerik ba ó-nia terus?
Ó-nia moras neʼe labele kura!
Haʼu halo ida-neʼe ba ó
Tanba ó-nia sala neʼebé todan no ó halo ona sala barak tebes.+
Sira neʼebé hadau ó-nia sasán, ema sei hadau fali sira-nia sasán,
No sira hotu neʼebé naʼok ó-nia sasán, haʼu sei husik ema naʼok fali sira-nia sasán.”+
17 Jeová dehan: “Maibé haʼu sei halo ó sai isin-diʼak fali no haʼu sei kura ó-nia kanek sira,+
Maski sira hotu lakohi simu ó no bolu ó nuʼudar
‘Siaun, neʼebé la iha ema ida mak buka tuir.’”+
18 Jeová dehan nuneʼe:
“Haʼu sei halibur ema dadur sira husi Jacob nia tenda,+
No haʼu sei hatudu laran-sadiʼa ba ninia hela-fatin sira.
Sidade neʼe sei harii fali iha ninia foho-oan nia leten,+
No ninia uma aas* neʼebé seguru sei hamriik iha ninia fatin neʼebé loos.
19 No sira sei fó agradese no hasai lian hodi hamnasa.+
Haʼu sei aumenta sira sai barak, no sira sei la sai menus.+
Haʼu sei halo sira sai barak tebes,*
No sira sei la sai uitoan deʼit.+
20 Jacob nia oan sira sei moris diʼak hanesan tempu uluk,
No ninia povu sei sai forte no metin iha haʼu-nia oin.+
Haʼu sei fó kastigu ba sira hotu neʼebé fó-terus nia.+
21 Ulun-naʼin kmanek ida sei mosu mai husi ninia povu,
No ukun-naʼin ida sei mosu mai husi ninia povu nia leet.
Haʼu sei halo nia mai besik haʼu, no nia sei hakbesik mai haʼu.”
“Tanba se lae, sé mak brani atu mai hakbesik haʼu?” Jeová mak dehan.
22 “Imi sei sai haʼu-nia povu,+ no haʼu sei sai imi-nia Maromak.”+
23 Jeová nia hirus sei huu makaʼas hanesan anin-fuik,+
Anin-fuik neʼebé nakdulas tun ba ema aat sira-nia ulun.
24 Jeová sei la hatún ninia hirus neʼebé lakan makaʼas
Toʼo nia kumpre ona ninia hakarak iha ninia laran.+
Iha loron sira-neʼe nia rohan, imi sei komprende ida-neʼe.+
31 Jeová dehan: “Iha tempu neʼebá, haʼu sei sai Maromak ba Izraél nia umakain hotu, no sira sei sai haʼu-nia povu.”+
2 Jeová dehan nuneʼe:
“Kona-ba ema neʼebé la mate ho surik, haʼu hatudu laran-diʼak ba sira iha rai-fuik
Bainhira Izraél laʼo ba ninia fatin deskansa.”
3 Jeová mosu mai haʼu husi fatin dook, hodi dehan:
“Haʼu hadomi ó ho domin neʼebé ba nafatin.
Tan neʼe mak haʼu dada ó besik mai haʼu ho domin neʼebé laran-metin.*+
4 Dala ida tan, haʼu sei harii ó no ó sei hamriik fali.+
Oh feto virjen Izraél, ó sei foti fali ó-nia tamborín
No dansa ho haksolok.+
5 Ó sei halo fali toʼos-uvas iha foho sira iha Samaria.+
Toʼos-naʼin sira sei kuda no han ninia rezultadu.+
6 Tanba loron sei toʼo mai bainhira guarda neʼebé iha foho sira iha Efraim sei bolu ho lian makaʼas, dehan:
‘Hamriik bá, mai ita saʼe ba Siaun, ba Jeová, ita-nia Maromak.’”+
7 Tanba Jeová dehan nuneʼe:
“Kanta ba Jacob ho haksolok.
Haklalak ho haksolok bá tanba ó mak iha nasaun sira-nia leten.+
Haklaken bá, fó hahiʼi ba Maromak no hatete:
‘Oh Jeová, salva Ita-nia povu, ema restu husi Izraél.’+
8 Haʼu sei lori sira fila fali husi rai neʼebé iha parte norte.+
Haʼu sei halibur sira hamutuk husi fatin sira neʼebé dook liu iha mundu.+
Ema matan-delek no ain-kudeʼik,+
Feto isin-rua no feto neʼebé atu tuur-ahi sei iha sira-nia leet, sira hotu sei laʼo hamutuk.
Sira sei fila fali mai iha neʼe nuʼudar kongregasaun boot.+
9 Sira sei mai ho tanis.+
Haʼu sei dirije sira bainhira sira husu haʼu-nia laran-sadiʼa.
Haʼu sei lori sira ba mota sira neʼebé bee suli,+
Hodi laʼo iha dalan tetuk neʼebé sei la halo sira sidi.
Tanba haʼu mak Aman ba Izraél, no Efraim mak haʼu-nia oan-mane primeiru.”+
10 Imi nasaun sira, rona Jeová nia liafuan bá,
Fó sai ida-neʼe iha illa sira neʼebé dook no dehan:+
“Ida neʼebé halo Izraél namkari sei halibur fali sira.
Nia sei tau matan ba sira hanesan bibi-atan tau matan ba ninia bibi-lubun.+
12 Sira sei mai no haklalak ho haksolok iha fatin aas iha Siaun+
No sira-nia oin nabilan tanba Jeová nia laran-diʼak,*
Tanba iha trigu, tua-uvas foun,+ mina,
Bibi-oan no karau-oan sira.+
Sira sei sai hanesan jardín neʼebé rega ho bee barak,+
No sira sei nunka sai fraku ka laran-susar tan.”+
13 “Iha tempu neʼebá, feto virjen sei dansa ho haksolok,
Nuneʼe mós mane foin-saʼe hamutuk ho katuas sira.+
Haʼu sei troka sira-nia laran-susar sai laran-haksolok.+
Haʼu sei fó kmaan ba sira no halo sira kontente, sira sei la triste tan.+
14 Haʼu sei fó ai-han barak ba amlulik sira,
No haʼu-nia povu sei kontente ho haʼu-nia laran-diʼak”,+ Jeová mak dehan.
15 “Jeová dehan nuneʼe:
‘Iha Ramá,+ ema rona lian halerik no tanis makaʼas.
Raquel tanis ba ninia oan-mane sira.*+
Nia lakohi ema fó kmaan ba nia kona-ba ninia oan-mane sira,
Tanba ninia oan-mane sira la iha ona.’”+
16 Jeová dehan nuneʼe:
“‘Keta tanis tan no keta husik ó-nia matan-been suli,
Tanba ó sei simu kolen ba buat neʼebé ó halo ona’, Jeová mak dehan.
‘Sira sei fila fali husi inimigu nia rai.’+
17 Jeová dehan: ‘No sei iha esperansa ba ó iha futuru,+
Ó-nia oan sira sei fila fali ba sira-nia rai rasik.’”+
18 “Haʼu rona duni Efraim nia lian halerik, hodi dehan:
‘Ita-Boot korrije ona haʼu, no haʼu simu korrije neʼe
Hanesan karau-oan neʼebé seidauk hetan treinu.
Lori haʼu fila fali, no ho laran tomak haʼu sei fila,
Tanba Ita-Boot mak Jeová, haʼu-nia Maromak.
19 Tanba bainhira haʼu fila fali, haʼu arrepende an tebes.+
Bainhira Ita halo haʼu komprende ona, haʼu baku haʼu-nia kelen tanba triste.
Haʼu sente sala no moe+
Tanba hahalok sira neʼebé haʼu halo ona iha haʼu-nia tempu joven.’”
20 Jeová dehan: “Efraim mak haʼu-nia oan-mane neʼebé folin-boot, haʼu-nia oan doben, loos ka lae?+
Tanba maski haʼu koʼalia kontra nia beibeik, maibé haʼu nafatin hanoin-hetan nia.
Tan neʼe mak haʼu sente laran* la hakmatek tanba hanoin nia.+
No haʼu sei hatudu duni laran-sadiʼa ba nia.”+
21 “Tau marka ba ó-nia dalan,
No tau sinál bá hodi sai matadalan ba ó.+
Tau atensaun ba estrada boot neʼebé ó tenke laʼo liu.+
Oh feto virjen Izraél, fila fali mai, fila fali ba ó-nia sidade sira-neʼe.
22 Oh oan-feto neʼebé la hatudu laran-metin, toʼo bainhira loos mak ó sei laran-rua?
Tanba Jeová kria ona buat foun iha mundu neʼe:
Feto ida sei buka namanas mane ida.”
23 Jeová neʼebé ukun tropa lalehan nian, Izraél nia Maromak, dehan nuneʼe: “Bainhira haʼu halibur fali ema dadur sira, sira sei hatete fali liafuan tuirmai neʼe iha rai-Judá no iha ninia sidade sira, dehan: ‘Oh hela-fatin ba hahalok loos,+ oh foho santu,+ Jeová sei haraik bensaun ba ó.’ 24 No ema hotu sei hela hamutuk, toʼos-naʼin no sira neʼebé hein bibi sei hela hamutuk iha neʼebá, iha Judá no ninia sidade sira.+ 25 Haʼu sei fó kmaan ba ema neʼebé la iha kbiit, no haʼu sei halo bosu ema neʼebé fraku no laran-susar.”+
26 Ho ida-neʼe, haʼu hadeer no loke haʼu-nia matan, tanba haʼu toba-dukur ho diʼak.
27 Jeová dehan: “Tempu sei toʼo mai bainhira haʼu sei aumenta umakain Izraél no umakain Judá nia ema. Haʼu mós sei aumenta sira-nia animál-hakiak.”+
28 Jeová dehan: “Hanesan haʼu haree didiʼak sira atu bele fokit, sobu, harahun, halakon no halo aat ba sira,+ nuneʼe mós haʼu sei haree didiʼak sira atu bele harii no kuda fali sira.”+ 29 “Iha tempu neʼebá, sira sei la hatete tan: ‘Aman sira han uvas-fuan neʼebé seidauk tasak, maibé oan sira mak sente nehan siin.’+ 30 Maibé ema ida-idak sei mate tanba ninia sala rasik. Ema neʼebé han uvas-fuan neʼebé seidauk tasak, nia rasik mak sente nehan siin.”
31 Jeová dehan: “Tempu sei toʼo mai bainhira haʼu sei halo aliansa foun ida ho umakain Izraél no ho umakain Judá.+ 32 Aliansa neʼe sei la hanesan ho aliansa neʼebé uluk haʼu halo ho sira-nia beiʼala sira iha loron neʼebé haʼu kaer sira-nia liman no lori sira sai husi rai-Ejitu,+ neʼe mak ‘haʼu-nia aliansa neʼebé sira la halo tuir+ maski haʼu mak sira-nia naʼin* neʼebé loos’, Jeová mak dehan.”
33 Jeová dehan: “Neʼe mak aliansa neʼebé haʼu sei halo ho umakain Izraél liutiha tempu neʼebá: Haʼu sei tau haʼu-nia ukun-fuan iha sira-nia laran,+ no haʼu sei hakerek ukun-fuan neʼe iha sira-nia fuan.+ Haʼu sei sai sira-nia Maromak, no sira sei sai haʼu-nia povu.”+
34 Jeová dehan: “No sira sei la hanorin tan sira-nia maluk no sira-nia maun-alin, hodi dehan: ‘Imi tenke hatene Jeová!’+ Tanba sira hotu sei hatene haʼu, husi povu kiʼik toʼo ema-boot,+ tanba haʼu sei fó perdua ba sira-nia sala no la hanoin-hetan tan sira-nia sala.”+
35 Tuirmai neʼe mak liafuan husi Jeová,
Maromak neʼebé fó loro-matan atu fó naroman iha loron,
No fó lei* ba fulan no fitun sira atu fó naroman iha kalan,
Nia kedok tasi no halo ninia laloran baku bá-mai,
Ninia naran mak Jeová, neʼebé ukun tropa lalehan nian.+
36 “Jeová dehan: ‘Hanesan lei sira-neʼe labele lakon,
Nuneʼe mós Izraél nia bei-oan sira sei la lakon ba nafatin husi haʼu-nia oin nuʼudar nasaun ida.’”+
37 Jeová dehan nuneʼe: “‘Hanesan ema labele sukat lalehan no labele buka-hatene mundu nia hun, nuneʼe mós haʼu labele husik hela Izraél nia bei-oan sira maski sira halo ona buat hotu neʼe’, Jeová mak dehan.”+
38 Jeová dehan: “Tempu sei toʼo mai bainhira ema sei harii fali sidade neʼe+ ba Jeová, husi Uma Aas* Hananel+ toʼo Portaun Sikun.+ 39 Tali sukat nian+ sei dada loos toʼo foho-oan Gareb, no dada fila tali neʼe ba Goa. 40 No iha rai-tetuk neʼebé ema tau mate-isin no ahi-kadesan,* no mós toʼos sira iha Foho-Leet Sedron+ toʼo Portaun Kuda+ nia sikun iha parte leste, fatin sira-neʼe hotu sei sai buat neʼebé santu ba Jeová.+ Sidade neʼe sei nunka harahun ka halakon tan ba nafatin.”
32 Jeová fó sai ninia liafuan ba Jeremias iha tinan 10 husi Liurai Zedequias nia ukun ba rai-Judá, neʼe mak tinan 18 husi Nabukodonozór* nia ukun.+ 2 Iha tempu neʼebá, liurai Babilónia nia tropa halo serku daudaun ba Jeruzalein, no profeta Jeremias sulan hela iha Guarda nia Pátiu+ iha liurai Judá nia palásiu. 3 Neʼe tanba Liurai Zedequias husi Judá kaer Jeremias no sulan nia,+ hodi dehan: “Tanbasá mak ó fó sai profesia hanesan neʼe? Ó hatete: ‘Jeová dehan nuneʼe: “Haʼu sei entrega sidade neʼe ba liurai Babilónia nia liman, no nia sei manán sidade neʼe,+ 4 no Liurai Zedequias husi Judá sei labele halai sees husi ema Kaldeia sira, tanba haʼu sei entrega duni nia ba liurai Babilónia nia liman, no nia sei koʼalia ho liurai neʼe oin ba oin no sira sei hateke malu matan ho matan.”’+ 5 ‘Liurai neʼe sei lori Zedequias ba Babilónia, no Zedequias sei hela nafatin iha neʼebá toʼo haʼu tau fali atensaun ba nia’, Jeová mak dehan. ‘Maski ó nafatin halo funu hasoru ema Kaldeia sira, ó sei la manán.’”+
6 Jeremias hatete: “Jeová fó sai ninia liafuan mai haʼu, hodi dehan: 7 ‘Ó-nia tiu* Salum nia oan-mane Hanamel sei mai hasoru ó no hatete: “Sosa haʼu-nia toʼos iha Anatot,+ tanba ó mak iha direitu primeiru atu sosa fali rai neʼe.”’”+
8 Tuirmai, hanesan Jeová hatete ona mai haʼu, haʼu-nia tiu nia oan-mane Hanamel mai hasoru haʼu iha Guarda nia Pátiu, no nia dehan: “Favór ida, sosa haʼu-nia toʼos iha Anatot, iha rai-Benjamim, tanba ó mak iha direitu atu sai naʼin ba rai neʼe no sosa fali ida-neʼe. Sosa bá.” Rona tiha neʼe, haʼu hatene katak neʼe mak tuir Jeová nia liafuan duni.
9 Nuneʼe haʼu sosa toʼos iha Anatot husi haʼu-nia tiu nia oan-mane Hanamel. Haʼu tetu osan-mutin+ 17* atu selu ba nia. 10 Tuirmai haʼu hakerek dokumentu ida,+ taka ho selus,* bolu sasin sira+ no tetu osan neʼe iha dasin. 11 Haʼu foti dokumentu sosa rai nian neʼebé taka ona ho selus tuir ukun-fuan no lei, no mós dokumentu ida seluk neʼebé la taka ho selus. 12 Tuirmai, haʼu fó dokumentu sosa rai nian neʼe ba Nerias+ nia oan-mane Baruc,+ Maseias nia bei-oan. Haʼu halo ida-neʼe iha haʼu-nia tiu nia oan-mane Hanamel nia oin, no iha sasin sira-nia oin, sira neʼebé asina dokumentu sosa rai nian, no mós iha ema Judeu sira-nia oin, neʼe katak ema Judeu hotu neʼebé tuur iha Guarda nia Pátiu.+
13 Tuirmai, haʼu fó mandamentu ba Baruc iha sira-nia oin, hodi hatete: 14 “Jeová neʼebé ukun tropa lalehan nian, Izraél nia Maromak, dehan nuneʼe: ‘Foti dokumentu sosa rai nian sira-neʼe, dokumentu neʼebé taka ona ho selus no mós dokumentu ida seluk neʼebé la taka ho selus, tau sira iha vazu rai-mean nia laran, atu nuneʼe bele rai dokumentu sira-neʼe ba tempu kleur.’ 15 Tanba Jeová neʼebé ukun tropa lalehan nian, Izraél nia Maromak, dehan nuneʼe: ‘Ema sei sosa fali uma, toʼos no toʼos-uvas sira iha rai neʼe.’”+
16 Bainhira haʼu fó ona dokumentu sosa rai nian ba Nerias nia oan-mane Baruc, haʼu halo orasaun ba Jeová, hodi dehan: 17 “Aii Jeová, Naʼi Ukun-Naʼin Boot Liu! Ita-Boot halo lalehan no rai ho Ita-nia kbiit boot+ no ho Ita-nia liman neʼebé forte. La iha buat ida neʼebé susar liu ba Ita atu halo. 18 Ita mak Maromak neʼebé hatudu domin neʼebé laran-metin ba ema rihun ba rihun, maibé selu fali aman sira-nia sala ba oan sira,*+ Ita mak Maromak neʼebé loos, neʼebé boot no kbiit-waʼin; Ita-nia naran mak Jeová, neʼebé ukun tropa lalehan nian. 19 Ita-nia konsellu* mak kmanek no Ita halo buat barak ho kbiit boot,+ Ita-nia matan haree ema nia hahalok hotu+ atu fó kolen ba ema ida-idak tuir ninia hahalok no tuir buat neʼebé nia halo.+ 20 Ita-Boot halo ona sinál no milagre sira iha rai-Ejitu, neʼebé ema hatene toʼo ohin loron, nuneʼe Ita halo Ita-nia naran boot iha Izraél no iha ema hotu nia leet,+ hanesan ohin loron. 21 No Ita lori Ita-nia povu Izraél sai husi rai-Ejitu, ho sinál, milagre sira, liman neʼebé iha kbiit, liman neʼebé forte no ho hahalok oioin neʼebé halo ema taʼuk.+
22 “Liutiha tempu balu, Ita fó rai neʼe ba sira, rai neʼebé Ita jura ona atu fó ba sira-nia beiʼala,+ rai neʼebé iha susubeen no bani-been barak.+ 23 No sira tama mai no foti rai neʼe nuʼudar sira-nian, maibé sira la halo tuir Ita-nia liafuan no la laʼo tuir Ita-nia ukun-fuan. Buat hotu neʼebé Ita haruka sira halo, sira la halo tuir, tan neʼe mak Ita halo terus hotu neʼe kona sira.+ 24 Ema mai haleʼu sidade neʼe no ateru rai hodi halo aas atu ataka,+ no tanba surik,+ hamlaha boot no moras-peste,*+ sidade neʼe sei monu duni ba ema Kaldeia sira-nia liman, katak ema neʼebé halo funu hasoru sidade neʼe. Buat hotu neʼebé Ita hatete nanis akontese ona, hanesan Ita haree daudaun. 25 Maibé, oh Jeová, Naʼi Ukun-Naʼin Boot Liu, Ita hatete mai haʼu: ‘Sosa toʼos neʼe ho osan no bolu sasin sira bá’, maski sidade neʼe sei monu duni ba ema Kaldeia sira-nia liman.”
26 Tuirmai, Jeová dehan ba Jeremias: 27 “Haʼu mak Jeová, Maromak ba ema hotu. Iha ka lae buat neʼebé susar liu mai haʼu atu halo? 28 Tan neʼe, Jeová dehan nuneʼe: ‘Haʼu sei fó sidade neʼe ba ema Kaldeia sira-nia liman no ba Liurai Nabukodonozór* husi Babilónia nia liman, no nia sei manán sidade neʼe.+ 29 Ema Kaldeia sira neʼebé halo funu hasoru sidade neʼe sei tama mai no sunu sidade neʼe, no ahi sei han uma hotu.+ Iha uma sira-neʼe nia kakuluk mak uluk ema hasaʼe sakrifísiu ba Baal no fui sakrifísiu hemu nian ba maromak sira seluk hodi hakanek haʼu-nia laran.’+
30 “Jeová dehan: ‘Tanba husi tempu joven, ema Izraél no ema Judá halo deʼit buat neʼebé aat tuir haʼu-nia haree.+ Ema Izraél kontinua hakanek haʼu-nia laran ho buat neʼebé sira halo ho sira-nia liman. 31 Loloos, husi tempu neʼebé sira harii sidade neʼe toʼo ohin loron, sidade neʼe halo haʼu hirus no laran-nakali deʼit.+ Sidade neʼe tenke halakon tiha husi haʼu-nia oin,+ 32 tanba hahalok aat hotu neʼebé ema Izraél no ema Judá halo ona hodi hakanek haʼu-nia laran. Sira hotu halo hahalok aat, sira-nia liurai,+ ulun-naʼin,+ amlulik, profeta,+ ema Judá no ema neʼebé hela iha Jeruzalein. 33 Sira sempre fila kotuk deʼit ba haʼu, no la fó oin mai haʼu.+ Maski haʼu koko atu hanorin sira fila-fila,* la iha ema ida mak hakarak rona hodi simu dixiplina.+ 34 Sira tau sira-nia estátua sira neʼebé haʼu hakribi* iha uma neʼebé lori haʼu-nia naran, atu hafoʼer uma neʼe.+ 35 Laʼós neʼe deʼit, sira mós harii fatin aas ba Baal iha Foho-Leet Hinom,*+ hodi sunu sira-nia oan-mane no oan-feto iha ahi* nuʼudar sakrifísiu ba Molec.*+ Neʼe mak hahalok neʼebé haʼu nunka haruka sira atu halo+ no haʼu nunka hanoin* atu halo hahalok aat hanesan neʼe. Nasaun Judá monu ba sala tanba hahalok sira-neʼe.’
36 “Tan neʼe, Jeová, Izraél nia Maromak, koʼalia kona-ba sidade neʼe, neʼebé imi dehan katak sei fó ba liurai Babilónia nia liman liuhusi surik, hamlaha boot no moras-peste: 37 ‘Haʼu sei halibur sira husi rai hotu neʼebé haʼu halo sira namkari ona tanba haʼu-nia hirus, nervozu no laran-nakali,+ no haʼu sei lori sira fila fali mai fatin neʼe no halo sira moris hakmatek.+ 38 Sira sei sai haʼu-nia povu, no haʼu sei sai sira-nia Maromak.+ 39 Haʼu sei fó ba sira laran ida deʼit+ no mós dalan ida deʼit, atu nuneʼe sira sei hamtaʼuk haʼu ba nafatin, tanba neʼe sei lori diʼak ba sira-nia an rasik no ba sira-nia oan no bei-oan sira.+ 40 No haʼu sei halo aliansa ida ho sira, aliansa neʼebé sei iha ba nafatin,+ atu nuneʼe haʼu sei la para atu halo buat diʼak ba sira.+ Haʼu sei halo sira hamtaʼuk haʼu iha sira-nia laran, atu nuneʼe sira sei la fila kotuk ba haʼu.+ 41 Haʼu sei haksolok tanba sira hodi halo buat diʼak ba sira,+ no haʼu sei kuda metin sira iha rai neʼe+ ho haʼu-nia laran tomak no ho haʼu-nia kbiit* tomak.’”
42 “Tanba Jeová dehan nuneʼe: ‘Hanesan haʼu fó ona terus boot hotu ba povu neʼe, nuneʼe mós haʼu sei fó ba sira buat diʼak hotu* neʼebé haʼu promete ba sira.+ 43 No ema sei sosa fali toʼos sira iha rai neʼe,+ maski imi hatete: “Rai neʼe fuik no aat, la iha ema no animál ida mak hela. Rai neʼe sai ona ema Kaldeia sira-nian.”’
44 “Jeová dehan: ‘Ema sei sosa toʼos sira ho osan, sira sei halo dokumentu sosa rai nian, tau selus no bolu sasin-naʼin sira. Sira sei halo nuneʼe iha rai-Benjamim, iha área sira neʼebé haleʼu Jeruzalein,+ iha sidade sira iha rai-Judá,+ sidade sira iha foho, sidade sira iha rai-tetuk+ no sidade sira iha parte súl, tanba haʼu sei lori ema dadur sira fila fali mai rai neʼe.’”+
33 Bainhira Jeremias sulan hela iha Guarda nia Pátiu,+ Jeová fó sai ninia liafuan ba nia ba dala segundu, hodi dehan: 2 “Tuirmai neʼe mak liafuan husi Jeová, Kriadór ba mundu, Jeová neʼebé halo no harii metin mundu neʼe; ninia naran mak Jeová: 3 ‘Bolu haʼu bá, no haʼu sei hatán ba ó no fó-hatene kedas ba ó kona-ba buat kmanek sira neʼebé susar atu komprende, neʼebé ó seidauk hatene.’”+
4 “Neʼe mak liafuan husi Jeová, Izraél nia Maromak, kona-ba uma sira iha sidade neʼe no liurai Judá nia palásiu sira neʼebé inimigu sobu tiha tanba sira ateru rai hodi halo aas atu serku sidade neʼe no tanba sira-nia surik,+ 5 no kona-ba ema sira neʼebé mai atu halo funu hasoru ema Kaldeia no halo nakonu fatin sira-neʼe ho ema nia mate-isin neʼebé haʼu oho ho hirus no laran-nakali, sira neʼebé halo haʼu subar haʼu-nia oin husi sidade neʼe tanba sira-nia hahalok aat: 6 ‘Haʼu sei kura no hadiʼa fali sidade neʼe,+ no haʼu sei fó isin-diʼak ba sira no fó dame barak no hatudu sai lia-loos ba sira.+ 7 Haʼu sei lori fali ema Judá no ema Izraél neʼebé sai dadur,+ no haʼu sei hametin sira hanesan haʼu halo iha tempu uluk.+ 8 Haʼu sei hamoos sira-nia sala hotu neʼebé sira halo kontra haʼu,+ no haʼu sei fó perdua ba sira-nia sala no hahalok kontra hotu neʼebé sira halo hasoru haʼu.+ 9 Haʼu sei haksolok bainhira haʼu rona sidade neʼe nia naran, no sidade neʼe sei lori hahiʼi no glória ba haʼu iha nasaun hotu nia oin iha mundu tomak. Nasaun hotu sei rona kona-ba laran-diʼak hotu neʼebé haʼu hatudu ba haʼu-nia povu.+ No sira sei sai taʼuk no nakdedar+ tanba laran-diʼak hotu no dame neʼebé haʼu sei haraik ba sidade neʼe.’”+
10 “Jeová dehan nuneʼe: ‘Imi sei dehan katak fatin neʼe mak rai-fuik tanba la iha ema no animál-hakiak, maibé iha fatin neʼe no iha rai-Judá nia sidade sira no iha Jeruzalein nia dalan sira neʼebé sai fuik no mamuk ona tanba la iha ema ka animál-hakiak, ema sei rona fali 11 lian haksolok no kontente nian,+ lian husi noivu no lian husi noiva, lian husi ema neʼebé dehan: “Fó agradese ba Jeová neʼebé ukun tropa lalehan nian, tanba Jeová mak diʼak;+ ninia domin neʼebé laran-metin iha ba nafatin!”’+
“Jeová dehan: ‘Sira sei lori sakrifísiu agradese nian ba Jeová nia uma,+ tanba haʼu sei lori fila fali ema husi rai neʼe, neʼebé sai ona nuʼudar dadur hanesan iha tempu uluk.’”
12 “Jeová neʼebé ukun tropa lalehan nian dehan nuneʼe: ‘Iha rai-fuik neʼe, neʼebé la iha ema ka animál-hakiak, no mós iha rai neʼe nia sidade sira hotu, sei iha fali rai ho duʼut matak atu bibi-atan sira husik sira-nia bibi-lubun deskansa.’+
13 “Jeová dehan: ‘Bibi-atan sira sei sura fali sira-nia bibi iha sidade sira iha foho, iha sidade sira iha rai-tetuk, sidade sira iha parte súl, iha rai-Benjamim, iha área sira neʼebé haleʼu Jeruzalein+ no sidade sira iha rai-Judá.’”+
14 “Jeová dehan: ‘Tempu sei toʼo mai bainhira haʼu sei kumpre buat diʼak hotu neʼebé haʼu promete ona kona-ba umakain Izraél no umakain Judá.+ 15 Iha tempu neʼebá, haʼu sei halo moris ai-tubun ida* neʼebé laran-loos husi David nia umakain,+ no nia sei halaʼo justisa no hahalok loos iha rai neʼe.+ 16 Iha tempu neʼebá, Judá sei hetan salvasaun+ no Jeruzalein sei hela ho hakmatek.+ No ema sei hanaran sidade neʼe: Ita-nia Hahalok Loos Mai husi Jeová.’”+
17 “Tanba Jeová dehan nuneʼe: ‘Sei iha nafatin mane ida husi David nia jerasaun neʼebé tuur iha umakain Izraél nia kadunan.+ 18 Nuneʼe mós sei iha nafatin mane ida husi amlulik Levi sira neʼebé sei hamriik iha haʼu-nia oin hodi hasaʼe sakrifísiu sunu nian tomak, no sunu sakrifísiu trigu* nian no hasaʼe sakrifísiu seluk tan.’”
19 Jeová koʼalia tan ba Jeremias, hodi dehan: 20 “Jeová dehan nuneʼe: ‘Hanesan imi labele halakon haʼu-nia aliansa kona-ba loron no kalan hodi hanetik loron no kalan atu la mosu tuir sira-nia oras,+ 21 nuneʼe mós la iha buat ida mak bele halakon haʼu-nia aliansa ho haʼu-nia atan David,+ hodi ninia oan-mane labele tuur iha ninia kadunan atu ukun nuʼudar liurai,+ no la iha buat ida mak bele halakon haʼu-nia aliansa ho haʼu-nia atan amlulik Levi sira.+ 22 Hanesan ema labele sura fitun sira iha lalehan* no labele tetu rai-henek iha tasi, nuneʼe mós haʼu sei aumenta haʼu-nia atan David nia bei-oan sira no ema Levi sira neʼebé serbí haʼu.’”
23 Tuirmai Jeová koʼalia tan ba Jeremias, hodi dehan: 24 “Ó rona buat neʼebé povu neʼe hatete ka lae? Povu neʼe dehan: ‘Jeová sei husik hela umakain rua, neʼebé nia hili ona.’ Sira la hatudu respeitu ba haʼu-nia povu, no sira la haree tan haʼu-nia povu nuʼudar nasaun ida.
25 “Jeová dehan nuneʼe: ‘Hanesan haʼu halo metin ona haʼu-nia aliansa kona-ba loron no kalan,+ no halo metin ona lei sira kona-ba lalehan no rai,+ 26 nuneʼe mós haʼu sei nunka husik Jacob nia bei-oan no haʼu-nia atan David nia bei-oan, no haʼu sei foti ukun-naʼin sira husi ninia bei-oan atu ukun Abraão, Isaac no Jacob nia jerasaun. Tanba haʼu sei halibur fali ema dadur sira+ no haʼu sei hatudu laran-sadiʼa ba sira.’”+
34 Tuirmai neʼe mak Jeová nia liafuan ba Jeremias iha tempu neʼebé Liurai Nabukodonozór* husi Babilónia hamutuk ho ninia tropa hotu halo funu hasoru Jeruzalein no ninia sidade hotu.+ Nia bá funu hamutuk ho nasaun hotu no povu hotu iha mundu tomak neʼebé iha ninia ukun okos:
2 “Jeová, Izraél nia Maromak, dehan nuneʼe: ‘Bá no koʼalia ba Liurai Zedequias+ husi Judá, no fó-hatene nia: “Jeová dehan nuneʼe: ‘Haʼu sei entrega sidade neʼe ba liurai Babilónia nia liman, no nia sei sunu sidade neʼe.+ 3 Ó sei labele halai sai husi ninia liman, tanba ema sei kaer duni ó no sei entrega ó ba nia.+ Ó no liurai Babilónia sei hateke malu matan ho matan, no nia sei koʼalia ba ó oin ba oin, no ó sei bá Babilónia.’+ 4 Maibé, oh Liurai Zedequias husi Judá, rona Jeová nia liafuan bá: ‘Jeová dehan nuneʼe kona-ba ó: “Ó sei la mate ho surik. 5 Ó sei mate ho dame,+ no ema sei halo serimónia sunu insensu nian ba ó hanesan sira halo ona ba ó-nia aman sira, ba liurai sira neʼebé ukun antes ó, no ema sei lelir ba ó, hodi dehan: ‘Aii naʼi!’ tanba ‘Haʼu fó sai ona liafuan neʼe’, Jeová mak dehan.”’”’”
6 Tuirmai, profeta Jeremias hatoʼo liafuan neʼe hotu ba Liurai Zedequias husi Judá neʼebé iha Jeruzalein, 7 iha tempu neʼebé liurai Babilónia nia tropa sira halo daudaun funu hasoru Jeruzalein no mós hasoru rai-Judá nia sidade hotu neʼebé sira seidauk manán,+ neʼe mak sidade Lakis+ no sidade Azeka.+ Husi sidade hotu iha rai-Judá neʼebé iha moru aas, sidade rua neʼe deʼit mak sira seidauk manán.
8 Jeová fó sai ninia liafuan ba Jeremias bainhira Liurai Zedequias halo ona aliansa ho povu hotu iha Jeruzalein atu fó liberdade ba sira-nia atan.+ 9 Ema hotu tenke husik livre ema Ebreu sira neʼebé sai atan-mane no atan-feto, atu nuneʼe la iha ema ida mak bele halo sira-nia maluk Judeu sai atan nafatin. 10 Nuneʼe, ulun-naʼin sira no povu hotu halo tuir. Sira simu aliansa neʼebé dehan katak ema hotu tenke husik livre sira-nia atan-mane no atan-feto sira no labele halo sira sai atan nafatin. Sira halo tuir no husik atan sira livre. 11 Maibé liutiha neʼe, sira lori fali atan-mane no atan-feto neʼebé sira husik livre ona, no obriga sira atu sai fali sira-nia atan. 12 Tan neʼe, Jeová fó sai ninia liafuan ba Jeremias. Jeová dehan:
13 “Jeová, Izraél nia Maromak, dehan nuneʼe: ‘Haʼu halo ona aliansa ho imi-nia beiʼala sira+ iha tempu neʼebé haʼu lori sira sai husi rai-Ejitu, husi uma atan nian,+ hodi dehan: 14 “Iha tinan hitu nia rohan, imi ida-idak tenke husik livre imi-nia maluk Ebreu sira neʼebé faʼan ona ba imi, sira neʼebé sai ona imi-nia atan ba tinan neen. Imi tenke husik sira livre.”+ Maibé imi-nia beiʼala sira la rona no la see tilun ba haʼu. 15 Agora* mak imi foin troka imi-nia hahalok no halo buat neʼebé loos tuir haʼu-nia haree hodi husik livre imi-nia maluk sira, no imi halo aliansa iha haʼu-nia oin iha uma neʼebé lori haʼu-nia naran. 16 Maibé imi troka fali imi-nia hanoin no hafoʼer haʼu-nia naran+ hodi lori fali imi-nia atan-mane no atan-feto sira neʼebé imi husik livre ona tuir sira-nia hakarak, no imi obriga sira atu sai fali imi-nia atan.’
17 “Nuneʼe, Jeová dehan: ‘Imi la halo tuir haʼu hodi la fó liberdade ba imi-nia maun-alin no imi-nia maluk.+ Tan neʼe haʼu sei fó liberdade ba imi, liberdade atu mate ho surik, moras-peste* no hamlaha boot.+ No haʼu sei halo nasaun hotu iha mundu sai taʼuk tanba haree buat neʼebé haʼu halo ba imi’,+ Jeová mak dehan. 18 ‘Neʼe mak buat neʼebé sei akontese ba sira neʼebé la kumpre haʼu-nia aliansa, no la halo tuir liafuan husi aliansa neʼebé sira halo ona iha haʼu-nia oin bainhira sira koʼa karau-oan hodi fahe ba rua, no laʼo liu iha klaran,*+ 19 neʼe katak ulun-naʼin sira iha rai-Judá, ulun-naʼin sira iha Jeruzalein, ema-boot sira iha palásiu, amlulik sira, no povu hotu iha rai neʼe, neʼebé laʼo liu karau-oan neʼebé koʼa fahe ba rua nia klaran: 20 Haʼu sei entrega sira ba sira-nia inimigu no ba ema neʼebé buka atu oho sira, no sira-nia mate-isin sei sai ai-han ba manu sira iha lalehan no ba animál sira iha rai.+ 21 No haʼu sei entrega Liurai Zedequias husi Judá ho ninia ulun-naʼin sira ba sira-nia inimigu neʼebé buka atu oho sira no ba liurai Babilónia nia tropa+ neʼebé hakiduk daudaun husi imi.’+
22 “Jeová dehan: ‘Haʼu sei fó orden ida, no haʼu sei lori sira fila fali ba sidade neʼe. Sira sei halo funu hasoru sidade neʼe. Sira sei manán no sunu sidade neʼe.+ Haʼu sei halo sidade sira iha rai-Judá sai fatin neʼebé fuik no aat, neʼebé sei la iha ema ida mak hela.’”+
35 Iha tempu neʼebé Josias nia oan-mane Jeoquim+ ukun rai-Judá nuʼudar liurai, Jeová dehan ba Jeremias: 2 “Laʼo ba ema Recab sira-nia uma,+ no koʼalia ho sira no lori sira ba Jeová nia uma, ba sala han-fatin nian* ida. Tuirmai fó tua-uvas ba sira atu hemu.”
3 Tan neʼe haʼu lori Jeremias nia oan-mane Jazanias, Habazinias nia bei-oan, hamutuk ho ninia maun-alin sira, ninia oan-mane hotu no ema Recab nia umakain tomak 4 ba Jeová nia uma. Haʼu lori sira ba Hanan nia oan-mane sira-nia sala han-fatin. Hanan mak Igdalias nia oan-mane no Hanan mak Maromak loos nia atan. Sala han-fatin neʼe besik malu ho ulun-naʼin sira-nia sala han-fatin, neʼebé iha Maseias nia sala han-fatin nia leten. Maseias mak Salum neʼebé hein portaun nia oan-mane. 5 Tuirmai haʼu foti kopu no kalis sira neʼebé nakonu ho tua-uvas, no tau iha mane sira-neʼe nia oin, mane sira neʼebé husi ema Recab nia umakain, no haʼu hatete ba sira: “Hemu tua-uvas bá.”
6 Maibé sira dehan: “Ami sei la hemu tua-uvas, tanba ami-nia beiʼala Recab nia oan-mane Jeonadab*+ fó ona mandamentu ba ami, hodi dehan: ‘Imi no imi-nia oan sira hotu labele hemu tua-uvas ba nafatin. 7 Imi mós labele harii uma, labele kari ka kuda fini, no mós labele halo toʼos-uvas. Imi tenke hela iha tenda ba nafatin, atu nuneʼe imi bele moris naruk iha rai neʼebé imi hela nuʼudar ema estranjeiru.’ 8 Tan neʼe, ami halo tuir nafatin mandamentu hotu neʼebé ami-nia beiʼala Recab nia oan-mane Jeonadab hatete. Nuneʼe mak ami hotu nunka hemu tua-uvas, inklui ami-nia feen, oan-mane no oan-feto sira. 9 No ami la harii uma atu hela, ami mós la iha toʼos-uvas, rai-luan ka fini. 10 Ami nafatin hela iha tenda no halo tuir ami-nia beiʼala Jeonadab* nia mandamentu hotu neʼebé nia fó ona ba ami. 11 Maibé bainhira Liurai Nabukodonozór* husi Babilónia mai ataka rai neʼe,+ ami hatete: ‘Mai, mai ita bá Jeruzalein atu bele halai sees husi ema Kaldeia no ema Síria nia tropa’, tan neʼe mak ami mai hela iha Jeruzalein.”
12 Tuirmai Jeová dehan ba Jeremias: 13 “Jeová neʼebé ukun tropa lalehan nian, Izraél nia Maromak, dehan nuneʼe: ‘Bá no hatete ba ema Judá no ema neʼebé hela iha Jeruzalein: “Haʼu husu imi beibeik atu halo tuir haʼu-nia liafuan, loos ka lae?”+ Jeová mak dehan. 14 “Recab nia oan-mane Jeonadab fó mandamentu ba ninia bei-oan sira atu labele hemu tua-uvas, no toʼo ohin loron sira halo tuir ninia liafuan no la hemu tua-uvas, ho ida-neʼe sira halo tuir duni sira-nia beiʼala nia orden.+ Maibé imi fali, maski haʼu koʼalia fila-fila* ba imi, imi la halo tuir haʼu.+ 15 No haʼu nafatin haruka haʼu-nia atan profeta hotu ba imi, haʼu haruka sira fila-fila,*+ hodi dehan: ‘Favór ida, imi ida-idak fila fali husi imi-nia dalan sira neʼebé aat,+ no halo buat neʼebé loos bá! Keta laʼo tuir maromak sira seluk no keta serbí sira. Nuneʼe, imi sei hela nafatin iha rai neʼebé haʼu fó ona ba imi no ba imi-nia beiʼala sira.’+ Maibé imi la see tilun mai haʼu no la rona haʼu. 16 Recab nia oan-mane Jeonadab nia bei-oan sira halo tuir sira-nia beiʼala nia orden,+ maibé povu sira-neʼe la rona haʼu.”’”
17 “Tan neʼe Jeová, Maromak neʼebé ukun tropa lalehan nian, Izraél nia Maromak, dehan nuneʼe: ‘Haʼu sei fó-terus ba Judá no ba ema hotu neʼebé hela iha Jeruzalein, terus hotu neʼebé haʼu fó sai ona ba sira,+ tanba haʼu koʼalia ona ba sira, maibé sira lakohi rona, no haʼu bolu beibeik sira, maibé sira lakohi hatán.’”+
18 Tuirmai Jeremias hatete ba ema Recab nia umakain: “Jeová neʼebé ukun tropa lalehan nian, Izraél nia Maromak, dehan nuneʼe: ‘Tanba imi halo tuir imi-nia beiʼala Jeonadab nia orden, kaer metin nafatin ninia orden hotu, no halo tuir ho loloos buat hotu neʼebé nia hatete ba imi, 19 Jeová neʼebé ukun tropa lalehan nian, Izraél nia Maromak, dehan nuneʼe: “Sei iha nafatin mane ida husi Recab nia oan-mane Jeonadab* nia jerasaun neʼebé serbí haʼu iha haʼu-nia oin.”’”
36 Iha tinan haat husi Josias nia oan-mane Jeoquim+ nia ukun iha rai-Judá nuʼudar liurai, Jeová fó sai ninia liafuan ba Jeremias, hodi dehan: 2 “Foti surat-tahan lulun* ida no hakerek liafuan hotu neʼebé haʼu hatoʼo ona ba ó kona-ba Izraél, Judá+ no nasaun hotu,+ hahú husi loron neʼebé haʼu koʼalia ba ó iha Josias nia tempu toʼo ohin loron.+ 3 Karik bainhira ema husi Judá nia umakain rona kona-ba terus hotu neʼebé haʼu hakarak lori ba sira, sira sei fila fali husi sira-nia dalan neʼebé aat, no haʼu sei fó perdua ba sira-nia sala.”+
4 Tuirmai, Jeremias bolu Nerias nia oan-mane Baruc,+ no hatoʼo liafuan hotu neʼebé Jeová koʼalia ona, no Baruc hakerek liafuan sira-neʼe iha surat-tahan lulun neʼe.+ 5 Depois neʼe, Jeremias fó orden ba Baruc, hodi dehan: “Haʼu labele bá Jeová nia uma. 6 Tan neʼe, ó mak tenke bá no lee ho lian makaʼas Jeová nia liafuan neʼebé haʼu hatoʼo, neʼebé ó hakerek ona iha surat-tahan lulun neʼe. Lee liafuan sira-neʼe iha Jeová nia uma laran iha loron jejún ba ema hotu atu sira bele rona, inklui ema Judá hotu neʼebé mai husi sidade ida-idak. 7 Karik sira sei harohan ba Jeová hodi husu ninia laran-sadiʼa no nia sei rona ba sira, no sira ida-idak sei fila fali husi sira-nia dalan neʼebé aat, tanba Jeová fó sai ona ninia hirus no laran-nakali neʼebé boot hasoru povu neʼe.”
8 Nuneʼe, Nerias nia oan-mane Baruc halo tuir buat hotu neʼebé profeta Jeremias hatete ba nia. Nia lee ho lian makaʼas Jeová nia liafuan neʼebé hakerek ona iha surat-tahan lulun iha Jeová nia uma.+
9 Iha fulan-sia tinan lima husi Josias nia oan-mane Jeoquim+ nia ukun iha rai-Judá nuʼudar liurai, ema hotu iha Jeruzalein no povu hotu husi sidade sira iha rai-Judá neʼebé mai toʼo Jeruzalein, sira hahú halo jejún iha Jeová nia oin.+ 10 Nuneʼe, Baruc lee ho lian makaʼas Jeremias nia liafuan neʼebé hakerek iha surat-tahan lulun atu ema hotu bele rona. Nia lee neʼe iha Jeová nia uma, iha eskriba Safan+ nia oan-mane Gemarias+ nia sala han-fatin,* iha pátiu* parte leten, iha portaun foun nia oin iha Jeová nia uma.+
11 Bainhira Gemarias nia oan-mane Micaias, Safan nia bei-oan, rona Jeová nia liafuan hotu neʼebé hakerek ona iha surat-tahan lulun, 12 nia laʼo tun ba liurai nia palásiu, ba sala sekretáriu nian. No iha neʼebá, ulun-naʼin sira hotu tuur hela. Ulun-naʼin sira-neʼe mak sekretáriu Elisama;+ Semaias nia oan-mane Delaias; Akbor+ nia oan-mane Elnatan;+ Safan nia oan-mane Gemarias; Hananias nia oan-mane Zedequias, no mós ulun-naʼin seluk hotu. 13 Tuirmai Micaias konta ba sira liafuan hotu neʼebé nia rona bainhira Baruc lee surat-tahan lulun neʼe ho lian makaʼas ba ema hotu.
14 Tuirmai ulun-naʼin sira-neʼe hotu haruka Jeudi bá hasoru Baruc. Jeudi mak Netanias nia oan-mane, Netanias mak Selemias nia oan-mane, no Selemias mak Kusi nia oan-mane. Jeudi hatoʼo liafuan tuirmai neʼe ba Baruc, dehan: “Mai no lori mós surat-tahan lulun neʼebé ó lee ona ba ema hotu.” Nuneʼe, Nerias nia oan-mane Baruc lori surat-tahan lulun neʼe iha ninia liman no bá hasoru ulun-naʼin sira. 15 Sira hatete ba nia: “Favór ida, tuur lai, no lee ho lian makaʼas liafuan iha surat-tahan lulun neʼe ba ami.” Nuneʼe, Baruc lee ba sira.
16 Rona tiha liafuan hotu neʼe, sira hateke malu ho taʼuk, no dehan ba Baruc: “Ami tenke fó-hatene liafuan hotu neʼe ba liurai.” 17 No sira husu ba Baruc: “Favór ida, fó-hatene ami, oinsá mak ó hakerek liafuan hotu neʼe? Jeremias mak koʼalia hanesan neʼe ba ó ka?” 18 Baruc hatán ba sira: “Nia mak koʼalia liafuan hotu neʼe mai haʼu, no haʼu hakerek liafuan sira-neʼe ho tinta iha surat-tahan lulun neʼe.” 19 Ikusmai, ulun-naʼin sira-neʼe hatete ba Baruc: “Bá no subar, ó no mós Jeremias, no keta halo ema ida hatene fatin neʼebé imi subar.”+
20 Tuirmai, sira bá hasoru liurai iha pátiu, maibé sira rai surat-tahan lulun neʼe iha sekretáriu Elisama nia sala sekretáriu nian, no sira hatoʼo ba liurai buat hotu neʼebé sira foin rona.
21 Nuneʼe liurai haruka Jeudi+ bá foti surat-tahan lulun neʼe, no Jeudi foti ida-neʼe husi sekretáriu Elisama nia sala sekretáriu nian. Jeudi hahú lee ho lian makaʼas liafuan sira neʼebé hakerek iha surat-tahan lulun neʼe ba liurai no ba ulun-naʼin hotu neʼebé hamriik iha liurai nia sorin. 22 Liurai tuur hela iha ninia palásiu tempu malirin nian. Tempu neʼebá mak fulan-sia* no iha ninia oin, iha ahi-matan neʼebé lakan atu nia bele haneruk. 23 Bainhira Jeudi lee tiha ona parte tolu ka haat iha surat-tahan, liurai foti sekretáriu nia tudik no koʼa sai parte neʼebé Jeudi foin lee iha surat-tahan no soe ba ahi laran. Nia kontinua halo nuneʼe toʼo surat-tahan lulun tomak neʼe ahi han hotu. 24 Sira la sente taʼuk. Liurai no ninia atan hotu neʼebé rona liafuan hotu neʼe, sira la lees sira-nia roupa. 25 Maski Elnatan,+ Delaias+ no Gemarias+ husu makaʼas ba liurai atu labele sunu surat-tahan lulun neʼe, maibé nia la rona sira. 26 Liután neʼe, liurai bolu Jerameel neʼebé mak liurai nia oan-mane,* Azriel nia oan-mane Seraias, no Abdeel nia oan-mane Selemias. No nia haruka sira bá kaer sekretáriu Baruc no profeta Jeremias, maibé Jeová subar tiha sira.+
27 Bainhira liurai sunu tiha ona surat-tahan lulun neʼe, neʼebé Baruc hakerek hodi tuir liafuan neʼebé Jeremias hatoʼo, Jeová fó sai tan ninia liafuan ba Jeremias,+ hodi dehan: 28 “Foti surat-tahan lulun ida seluk, no hakerek fali liafuan hotu neʼebé hakerek ona iha surat-tahan lulun ida uluk nian, neʼebé Liurai Jeoquim husi Judá sunu tiha ona.+ 29 No ó tenke hatete ba Liurai Jeoquim husi Judá: ‘Jeová dehan nuneʼe: “Ó sunu tiha surat-tahan lulun neʼe no dehan: ‘Tanbasá mak ó hakerek: “Liurai Babilónia sei mai duni no halakon rai neʼe, halo rai neʼe sai fatin mamuk, no la iha ema no animál ida mak hela”?’+ 30 Tan neʼe, Jeová dehan nuneʼe kona-ba Liurai Jeoquim husi Judá: ‘Sei la iha oan-mane ida husi ninia jerasaun neʼebé tuur iha David nia kadunan,+ no ema sei husik ninia mate-isin kona loron manas iha loron no mahobeen malirin iha kalan.+ 31 Haʼu tenke haruka nia, ninia bei-oan sira no ninia atan sira atu hatán ba sira-nia sala, no haʼu sei fó-terus ba sira no ba ema neʼebé hela iha Jeruzalein no mós ba ema Judá, terus hotu neʼebé haʼu dehan tiha ona ba sira+ maibé sira la rona.’”’”+
32 Nuneʼe, Jeremias foti surat-tahan lulun seluk no fó ba Nerias nia oan-mane Baruc, neʼebé serbí nuʼudar sekretáriu.+ No Baruc hakerek fali Jeremias nia liafuan hotu neʼebé hakerek ona iha surat-tahan lulun ida uluk neʼebé Liurai Jeoquim husi Judá sunu tiha.+ Iha surat-tahan lulun neʼe hakerek liafuan barak liután hanesan ho liafuan sira neʼebé uluk hakerek ona.
37 Josias nia oan-mane Zedequias+ hahú ukun nuʼudar liurai hodi troka Jeoquim nia oan-mane Konias*+ tanba Liurai Nabukodonozór* husi rai-Babilónia mak hili nia sai nuʼudar liurai ba rai-Judá.+ 2 Maibé Zedequias ho ninia atan sira no povu iha rai neʼe la rona ba Jeová nia liafuan neʼebé hatoʼo liuhusi profeta Jeremias.
3 Tuirmai, Liurai Zedequias haruka Selemias nia oan-mane Jeucal,+ no amlulik Maseias nia oan-mane Sofonias+ hodi bá hasoru profeta Jeremias, no dehan ba nia: “Favór ida, harohan lai ba ita-nia Maromak Jeová ba ami-nia diʼak.” 4 Iha tempu neʼebá, Jeremias laʼo livre hela iha povu nia leet, tanba ema seidauk hatama nia ba komarka.+ 5 Iha tempu neʼebá, ema Kaldeia sira halo serku daudaun ba Jeruzalein, maibé sira rona katak Faraó nia tropa sai husi rai-Ejitu+ no mai daudaun Jeruzalein, tan neʼe ema Kaldeia sira hakiduk fali.+ 6 Tuirmai, Jeová dehan ba profeta Jeremias: 7 “Jeová, Izraél nia Maromak, dehan: ‘Imi tenke hatete nuneʼe ba liurai Judá, neʼebé haruka imi atu husu haʼu-nia ajuda: “Faraó nia tropa neʼebé mai daudaun atu ajuda imi, sira sei fila fali ba sira-nia rai, iha Ejitu.+ 8 No ema Kaldeia sira sei fila fali mai no halo funu hasoru imi no manán sidade neʼe, no sira sei sunu sidade neʼe.”+ 9 Jeová dehan nuneʼe: “Keta lohi imi-nia an, hodi dehan: ‘Ema Kaldeia sira sei la mai tan atu ataka ita’, tanba sira sei mai duni. 10 Maski karik imi manán ema Kaldeia nia tropa tomak neʼebé funu hasoru imi, no hela deʼit tropa sira neʼebé kanek todan, maibé sira sei hamriik fali, no sira sei sai husi sira-nia tenda hodi sunu sidade neʼe.”’”+
11 Bainhira ema Kaldeia nia tropa hakiduk ona husi Jeruzalein tanba Faraó nia tropa,+ 12 Jeremias sai husi Jeruzalein atu laʼo ba rai-Benjamim,+ atu simu ninia rai neʼebé iha ninia povu sira-nia leet. 13 Maibé bainhira nia toʼo tiha iha Portaun Benjamim, Selemias nia oan-mane Jerias, Hananias nia bei-oan, neʼebé nuʼudar xefe ba guarda sira, kaer profeta Jeremias no dehan: “Ó atu halai ba ema Kaldeia sira ka?” 14 Maibé Jeremias dehan: “Neʼe la loos! Haʼu la halai ba ema Kaldeia sira.” Maibé Jerias la rona nia. Tan neʼe, Jerias kaer Jeremias no lori nia ba ulun-naʼin sira. 15 Ulun-naʼin sira-neʼe sai hirus tebes ba Jeremias,+ no sira baku nia no sulan metin nia*+ iha sekretáriu Jeonatan nia uma, neʼebé sira halo nuʼudar komarka. 16 Ema hatama Jeremias iha kadeia iha rai-okos,* no sira sulan nia iha neʼebá ba loron barak.
17 Tuirmai Liurai Zedequias haruka ema bolu Jeremias, no liurai neʼe husu subasubar ba Jeremias iha liurai nia palásiu,+ hodi dehan: “Ó iha liafuan ruma husi Jeová ka lae?” Jeremias hatán: “Iha!” Nia hatutan tan: “Ema sei entrega Ita-Boot ba liurai Babilónia nia liman!”+
18 Jeremias mós hatete ba Liurai Zedequias: “Haʼu halo ona sala saida hasoru Ita-Boot, hasoru Ita-nia atan sira no hasoru povu neʼe, toʼo Ita-Boot hatama haʼu ba komarka? 19 Imi-nia profeta sira neʼebé uluk fó-hatene ba imi, dehan: ‘Liurai Babilónia sei la mai atu halo funu hasoru imi no hasoru rai neʼe’, sira agora iha neʼebé?+ 20 Oh haʼu-nia naʼi liurai, favór ida, rona lai. Rona haʼu bá, haʼu husu Ita-Boot atu hatudu laran-sadiʼa mai haʼu. Keta haruka haʼu fila fali ba sekretáriu Jeonatan nia uma,+ tanba se haʼu bá fali, haʼu sei mate iha neʼebá.”+ 21 Rona tiha neʼe, Liurai Zedequias haruka ninia ema atu sulan Jeremias iha Guarda nia Pátiu,+ no loroloron Jeremias simu paun fuan ida husi dalan padeiru nian+ toʼo paun hotu iha sidade laran la iha tan ona.+ No Jeremias hela nafatin iha Guarda nia Pátiu.
38 Matão nia oan-mane Sefatias, Pasur nia oan-mane Gedalias, Selemias nia oan-mane Jucal,+ no Malquias nia oan-mane Pasur+ rona liafuan neʼebé Jeremias hatoʼo ba povu tomak, neʼebé dehan: 2 “Jeová dehan nuneʼe: ‘Ema neʼebé hela nafatin iha sidade neʼe sei mate ho surik, hamlaha boot no moras-peste.*+ Maibé ema neʼebé rende an* ba ema Kaldeia sira sei moris nafatin, no ema neʼe sei salva ninia moris.’+ 3 Jeová dehan nuneʼe: ‘Sidade neʼe sei entrega duni ba tropa Babilónia nia liman, no liurai Babilónia sei manán sidade neʼe.’”+
4 Ulun-naʼin sira dehan ba liurai: “Favór ida, oho tiha mane neʼe,+ tanba nia halo tropa sira neʼebé sei hela iha sidade neʼe sente taʼuk,* nia mós halo povu tomak sente taʼuk, hodi hatoʼo liafuan neʼe ba sira. Tanba mane neʼe hakarak povu hetan terus, laʼós dame.” 5 Nuneʼe Liurai Zedequias hatán: “Mane neʼe iha ona imi-nia liman, tanba liurai labele halo buat ida atu hapara imi.”
6 Tan neʼe, sira lori Jeremias no soe nia ba Malquias nia tanke* iha Guarda nia Pátiu.+ Malquias mak liurai nia oan. Sira hatún Jeremias ho tali ba tanke neʼe. Tanke neʼe la iha bee, maibé iha tahu barak, no Jeremias komesa mout iha tahu laran.
7 Ema Etiópia ida naran Ebed-Melec+ neʼebé serbí nuʼudar ema-boot* iha liurai nia palásiu, rona katak ulun-naʼin sira hatama ona Jeremias ba tanke. Iha tempu neʼebá, liurai tuur hela iha Portaun Benjamim nian,+ 8 nuneʼe Ebed-Melec sai husi liurai nia palásiu no koʼalia ba liurai, dehan: 9 “Oh haʼu-nia naʼi liurai, buat neʼebé ema sira-neʼe halo ba profeta Jeremias mak aat tebes! Sira soe tun nia ba tanke laran, nia sei mate hamlaha iha neʼebá, tanba la iha tan ai-han iha sidade laran.”+
10 Liurai fó orden ba ema Etiópia naran Ebed-Melec, hodi dehan: “Bá, lori mane naʼin-30 husi fatin neʼe hamutuk ho ó, no dada sai profeta Jeremias husi tanke laran antes nia mate.” 11 Nuneʼe Ebed-Melec lori mane sira-neʼe hamutuk ho nia no tama ba liurai nia palásiu, ba kuartu rai rikusoin nia okos,+ no foti hena tuan no hena rohan balu, tuirmai sira hatún hena sira-neʼe hamutuk ho tali ba Jeremias iha tanke laran. 12 Tuirmai, ema Etiópia naran Ebed-Melec dehan ba Jeremias: “Favór ida, tau hena tuan no hena rohan sira-neʼe iha ó-nia kalilin, atu tali labele hakanek ó.” Jeremias halo tuir, 13 no mane sira-neʼe dada sai Jeremias husi tanke laran ho tali neʼe. No Jeremias hela nafatin iha Guarda nia Pátiu.+
14 Tuirmai, Liurai Zedequias haruka ema lori profeta Jeremias atu hasoru nia iha odamatan terseiru iha Jeová nia uma, no liurai husu Jeremias: “Haʼu hakarak husu buat ruma ba ó. Keta subar buat ida husi haʼu.” 15 Jeremias hatán ba Zedequias: “Se haʼu fó-hatene ba Ita-Boot, Ita-Boot sei oho haʼu. No se haʼu fó konsellu ba Ita-Boot, Ita-Boot sei la rona haʼu.” 16 Nuneʼe Liurai Zedequias jura ba Jeremias ho subasubar, hodi dehan: “Haʼu jura hodi Jeová neʼebé moris, Maromak neʼebé fó moris mai ita, katak haʼu sei la oho ó, no haʼu sei la entrega ó ba ema sira neʼebé buka atu oho ó.”
17 Tuirmai, Jeremias dehan ba Zedequias: “Jeová, Maromak neʼebé ukun tropa lalehan nian, Izraél nia Maromak, dehan nuneʼe: ‘Se ó rende an ba ulun-naʼin sira husi liurai Babilónia, ó sei la lakon ó-nia moris,* no sira sei la sunu sidade neʼe, ó no mós ó-nia umakain sei moris nafatin.+ 18 Maibé se ó la rende an ba ulun-naʼin sira husi liurai Babilónia, sidade neʼe sei monu ba ema Kaldeia nia liman, no sira sei sunu sidade neʼe,+ no ó sei labele halai sai husi sira-nia liman.’”+
19 Liurai Zedequias hatete ba Jeremias: “Haʼu taʼuk tebes ba ema Judeu sira neʼebé halai ona ba ema Kaldeia sira, tanba se ema entrega haʼu ba ema Judeu sira-neʼe, sira sei halo aat ba haʼu.” 20 Maibé Jeremias dehan: “Ema sei la entrega Ita-Boot ba ema Judeu sira. Favór ida, halo tuir Jeová nia liafuan bá, liafuan neʼebé haʼu foin hatoʼo ba Ita-Boot, no buat hotu sei sai diʼak ba Ita-Boot no Ita-Boot sei kontinua moris. 21 Maibé se Ita-Boot lakohi rende an ba ema Kaldeia sira, Jeová hatudu ona mai haʼu kona-ba saida mak sei akontese: 22 Ema sei kaer feto hotu neʼebé sei hela iha liurai Judá nia palásiu, no lori sira ba ulun-naʼin sira husi liurai Babilónia,+ no feto sira-neʼe sei hatete:
Sira halo ona ó-nia ain mout iha tahu laran.
Agora, sira hakiduk no fila kotuk ona ba ó.’
23 Sira sei kaer no lori Ita-Boot nia feen no oan-mane sira hotu ba ema Kaldeia sira, no Ita-Boot sei labele halai sai husi sira-nia liman, maibé liurai Babilónia mak sei kaer Ita-Boot,+ no tanba Ita-Boot, sira sei sunu sidade neʼe.”+
24 Rona tiha neʼe, Zedequias dehan ba Jeremias: “Keta fó-hatene ba ema ida kona-ba neʼe, atu nuneʼe ó sei la mate. 25 No se ulun-naʼin sira rona katak haʼu koʼalia ona ho ó no sira mai husu ó, hodi dehan: ‘Fó-hatene lai mai ami, saida mak ó koʼalia ona ba liurai? Keta subar buat ida husi ami, no ami sei la oho ó.+ Saida mak liurai dehan ba ó?’, 26 ó tenke hatán ba sira: ‘Haʼu husu ba liurai atu nia labele haruka haʼu fila fali ba Jeonatan nia uma atu nuneʼe haʼu sei la mate iha neʼebá.’”+
27 Lakleur, ulun-naʼin sira hotu mai hasoru Jeremias no husu ba nia. Nia hatete ba sira liafuan hotu neʼebé liurai haruka nia atu koʼalia. Tan neʼe, sira sai nonook deʼit, tanba la iha ema ida mak rona buat neʼebé liurai koʼalia ho Jeremias. 28 Jeremias hela nafatin iha Guarda nia Pátiu+ toʼo loron neʼebé inimigu sira manán Jeruzalein. Nia sei hela iha neʼebá bainhira Jeruzalein monu.+
39 Iha fulan-sanulu tinan sia husi Liurai Zedequias nia ukun iha rai-Judá, Liurai Nabukodonozór* husi Babilónia ho ninia tropa hotu mai halo serku ba sidade Jeruzalein.+
2 Iha loron sia fulan-haat tinan 11 husi Zedequias nia ukun, sira konsege sobu moru balu iha sidade neʼe.+ 3 No ulun-naʼin hotu husi liurai Babilónia tama iha sidade laran no tuur iha portaun neʼebé hanaran Portaun Klaran.+ Ulun-naʼin sira-neʼe mak Sangar* Nergal-Sarezer, Rabsaris* Nebo-Sarsekim,* Rabmage* Nergal-Sarezer, no mós ulun-naʼin sira seluk husi liurai Babilónia.
4 Bainhira Liurai Zedequias husi Judá, no tropa sira hotu haree ema Babilónia sira-neʼe, sira halai sai+ husi sidade iha kalan, liuhusi liurai nia jardín, liuhusi portaun neʼebé iha moru rua nia leet, no sira kontinua halai liuhusi dalan Araba nian.+ 5 Maibé ema Kaldeia nia tropa duni tuir sira, no kaer toman Zedequias iha rai-tetuk maran Jerikó nian.+ Tuirmai tropa kaer Zedequias no lori nia ba sidade Ribla+ iha rai-Hamat,+ no iha neʼebá Liurai Nabukodonozór* husi Babilónia tesi-lia no fó sai ninia desizaun ba Zedequias. 6 Iha sidade Ribla mak liurai Babilónia oho Zedequias nia oan-mane sira iha Zedequias nia oin, no oho mós ema-boot hotu husi rai-Judá.+ 7 Tuirmai, nia halo Zedequias sai matan-delek, depois neʼe, nia kesi Zedequias ho korrente riti no lori nia ba Babilónia.+
8 Ema Kaldeia sira sunu liurai nia palásiu no povu hotu nia uma,+ no sira mós harahun moru sira neʼebé haleʼu Jeruzalein.+ 9 Nebuzaradan,+ xefe ba guarda sira, kaer povu restu neʼebé sei iha sidade laran, no nia mós lori ema neʼebé rende an ona ba nia, no mós ema restu seluk hotu neʼebé iha sidade nia liʼur hodi sai dadur* iha Babilónia.
10 Maibé kona-ba povu balu neʼebé kiak liu no la iha buat ida, neʼebé sei hela iha rai-Judá, Nebuzaradan, xefe guarda neʼe, husik sira hela nafatin iha rai-Judá. Iha loron neʼebá, nia mós fó toʼos-uvas no toʼos ba sira atu sira bele halo serbisu.*+
11 Liurai Nabukodonozór* husi Babilónia fó orden kona-ba Jeremias ba Nebuzaradan, xefe guarda neʼe, hodi dehan: 12 “Lori nia no tau matan ba nia, no keta halo aat ba nia, fó nia buat hotu neʼebé nia husu ba ó.”+
13 Tan neʼe, Nebuzaradan, xefe guarda neʼe, Rabsaris* Nebusazban, Rabmage* Nergal-Sarezer, no ema-boot hotu husi liurai Babilónia haruka ema 14 atu hasai Jeremias husi Guarda nia Pátiu+ no entrega nia ba Ahikam+ nia oan-mane Gedalias,+ Safan+ nia bei-oan, no haruka Gedalias lori Jeremias ba Gedalias nia uma. Nuneʼe Jeremias hela iha povu sira-nia leet.
15 Bainhira Jeremias sulan hela iha Guarda nia Pátiu,+ Jeová fó sai ninia liafuan ba nia, hodi dehan: 16 “Bá no fó-hatene ema Etiópia naran Ebed-Melec:+ ‘Jeová neʼebé ukun tropa lalehan nian, Izraél nia Maromak, dehan nuneʼe: “Haʼu sei kumpre haʼu-nia liafuan kona-ba sidade neʼe, no haʼu sei halo sidade neʼe hetan terus, laʼós buat diʼak. Iha loron neʼebá, ó sei haree ida-neʼe sai loos duni iha ó-nia oin.”’
17 “‘Maibé iha loron neʼebá, haʼu sei salva ó’, Jeová dehan, ‘no ema sei la entrega ó ba sira neʼebé halo ó taʼuk’.
18 “Jeová dehan: ‘Tanba haʼu sei fó duni dalan ba ó atu halai sees, no ó sei la mate ho surik. Ó sei moris nafatin,+ tanba ó tau fiar ba haʼu.’”+
40 Jeová fó sai ninia liafuan ba Jeremias liutiha tempu neʼebé Nebuzaradan,+ xefe ba guarda sira, husik Jeremias sai livre no haruka nia sai husi sidade Ramá.+ Antes neʼe, Nebuzaradan kesi metin Jeremias nia liman ho korrente, no lori nia bá toʼo Ramá hamutuk ho ema dadur* sira hotu husi Jeruzalein no rai-Judá, neʼebé atu lori ba Babilónia. 2 Tuirmai xefe guarda neʼe lori Jeremias no hatete ba nia: “Jeová, ó-nia Maromak, fó-hatene nanis ona kona-ba susar neʼebé agora kona daudaun fatin neʼe, 3 no Jeová mak halo susar sira-neʼe mosu hanesan buat neʼebé nia dehan tiha ona, tanba imi halo ona sala hasoru Jeová no la halo tuir ninia liafuan. Tan neʼe mak susar neʼe kona imi.+ 4 Iha loron neʼe, haʼu kore korrente neʼebé kesi metin ó-nia liman no halo ó livre. Se ó hakarak tuir haʼu bá Babilónia, tuir haʼu bá, no haʼu sei tau matan ba ó. Maibé se ó lakohi bá Babilónia hamutuk ho haʼu, ó lalika tuir haʼu. Haree bá! Rai tomak iha ó-nia oin. Bá fatin naran deʼit neʼebé ó hakarak bá.”+
5 Bainhira Jeremias seidauk fila, Nebuzaradan hatete ba nia: “Ó fila fali bá hamutuk ho Ahikam+ nia oan-mane Gedalias,+ Safan+ nia bei-oan, neʼebé liurai Babilónia hili ona atu toma konta sidade sira iha rai-Judá. Bá hela ho nia iha povu sira-nia leet. Se lae, ó mós bele bá fatin naran deʼit neʼebé ó hakarak bá.”
Tuirmai, xefe ba guarda neʼe fó ai-han balu no prezente ba Jeremias, no husik nia bá. 6 Nuneʼe Jeremias bá hasoru Ahikam nia oan-mane Gedalias neʼebé iha sidade Mizpa,+ no hela ho nia iha povu sira-nia leet, povu sira neʼebé sei hela iha rai neʼe.
7 Liutiha tempu balu, xefe tropa nian hotu neʼebé iha rai-luan hamutuk ho sira ida-idak nia tropa, rona katak liurai Babilónia hili ona Ahikam nia oan-mane Gedalias atu toma konta ba rai-Judá no liurai mós hili Gedalias atu sai ulun-naʼin ba mane, feto no labarik sira neʼebé moris kiak iha rai-Judá, sira neʼebé la bá Babilónia nuʼudar dadur.+ 8 Nuneʼe, sira bá hasoru Gedalias iha sidade Mizpa.+ Sira mak Netanias nia oan-mane Ismael;+ Karea nia oan-mane sira, Joanan+ ho Jonatan; Tanumet nia oan-mane Seraias; Efai ema Netofa nia oan-mane sira; no Jezanias+ husi ema Maaka nia jerasaun, hamutuk ho sira-nia tropa. 9 Ahikam nia oan-mane Gedalias, Safan nia bei-oan, jura ba sira no sira-nia tropa, hodi dehan: “Keta taʼuk atu serbí ema Kaldeia sira. Hela iha rai neʼe no serbí liurai Babilónia bá, atu nuneʼe buat hotu sei sai diʼak ba imi.+ 10 Kona-ba haʼu, haʼu sei hela iha Mizpa atu reprezenta imi* iha ema Kaldeia sira-nia oin, sira neʼebé mai hasoru ita. Maibé imi tenke halibur tua-uvas, ai-fuan oioin* no mina, no tau buat hotu neʼe iha imi-nia sanan-rai, no imi tenke hela metin iha imi ida-idak nia sidade neʼebé imi foti ona.”+
11 Ema Judeu hotu neʼebé hela iha Moab, Ammon no Edom, no mós sira neʼebé hela iha rai seluk rona katak liurai Babilónia husik ona ema restu neʼebé sei moris atu hela nafatin iha rai-Judá no rona mós katak nia hili ona Ahikam nia oan-mane Gedalias, Safan nia bei-oan, nuʼudar ulun-naʼin ba sira. 12 Tan neʼe, ema Judeu hotu hahú fila fali husi fatin oioin neʼebé sira namkari bá, no sira mai toʼo rai-Judá, no hasoru Gedalias iha Mizpa. Sira halibur tua-uvas no ai-fuan oioin* neʼebé barak tebetebes.
13 Karea nia oan-mane Joanan hamutuk ho xefe tropa nian hotu neʼebé iha rai-luan mai hasoru Gedalias iha Mizpa. 14 Sira dehan ba Gedalias: “Ita-Boot hatene ona ka lae, katak ema Ammon+ nia liurai Baalis haruka ona Netanias nia oan-mane Ismael atu oho Ita-Boot?”+ Maibé Ahikam nia oan-mane Gedalias la fiar ba buat neʼebé sira hatete.
15 Tuirmai, Karea nia oan-mane Joanan koʼalia subasubar ba Gedalias iha Mizpa, hodi dehan: “Haʼu hakarak bá oho Netanias nia oan-mane Ismael no sei la iha ema ida mak hatene. Tanbasá mak nia tenke oho Ita-Boot? Tanbasá mak nia tenke halo namkari povu Judá hotu neʼebé mai halibur iha Ita-Boot nia ukun okos? Tanbasá mak nia tenke halakon ema restu hotu husi povu Judá?” 16 Maibé Ahikam nia oan-mane Gedalias+ dehan ba Karea nia oan-mane Joanan: “Keta halo nuneʼe, tanba buat neʼebé ó koʼalia daudaun kona-ba Ismael mak la loos.”
41 Iha fulan-hitu, Netanias nia oan-mane Ismael,+ Elisama nia bei-oan, neʼebé moris husi liurai nia jerasaun no sai liurai nia ema-boot ida, nia mai hamutuk ho mane naʼin-sanulu hodi hasoru Ahikam nia oan-mane Gedalias iha sidade Mizpa.+ Bainhira sira han hamutuk hela iha Mizpa, 2 Netanias nia oan-mane Ismael ho mane naʼin-sanulu neʼebé hamutuk ho nia, hamriik no foti surik hodi oho Ahikam nia oan-mane Gedalias, Safan nia bei-oan. Nuneʼe mak Ismael oho tiha ema neʼebé liurai Babilónia hili nuʼudar ulun-naʼin ba rai-Judá. 3 Ismael mós oho ema Judeu hotu neʼebé hamutuk ho Gedalias iha Mizpa, no oho mós tropa Kaldeia sira neʼebé iha neʼebá.
4 Liutiha loron ida depois Gedalias mate, no bainhira ema ida seidauk hatene kona-ba neʼe, 5 mane naʼin-80 mai husi Siquém,+ Silo+ no Samaria.+ Mane sira-neʼe koi ona sira-nia hasarahun, lees ona sira-nia roupa no hakanek ona sira-nia isin,+ no mós iha sira-nia liman iha sakrifísiu trigu* nian no olíbanu+ neʼebé sira atu lori ba Jeová nia uma. 6 Tan neʼe, Netanias nia oan-mane Ismael sai husi sidade Mizpa. Nia tanis nuʼudar nia laʼo hela atu bá hasoru sira. Bainhira Ismael hasoru mane sira-neʼe, nia hatete ba sira: “Mai ita bá hasoru Ahikam nia oan-mane Gedalias.” 7 Maibé bainhira sira tama tiha iha sidade laran, Netanias nia oan-mane Ismael no ema neʼebé laʼo hamutuk ho nia, oho tiha mane sira-neʼe no soe sira-nia mate-isin ba tanke* laran.
8 Maibé husi mane sira-neʼe, iha mane naʼin-sanulu neʼebé dehan ba Ismael: “Keta oho ami, tanba ami iha trigu, sevada, mina no bani-been neʼebé ami subar ona iha rai-luan.” Tan neʼe, Ismael la oho mane sira-neʼe hamutuk ho sira-nia maun-alin. 9 Ismael soe mane hotu neʼebé nia oho ba tanke laran neʼebé boot tebes. Liurai Asa mak keʼe tanke neʼe bainhira Liurai Baasa+ husi rai-Izraél ameasa nia atu halo funu. Iha tanke neʼe mak Netanias nia oan-mane Ismael hatama mate-isin barak toʼo nakonu.
10 Tuirmai, Ismael kaer toman ema restu hotu iha Mizpa,+ inklui liurai nia oan-feto sira no mós povu hotu neʼebé sei moris hela iha Mizpa, sira neʼebé Nebuzaradan, xefe ba guarda sira, husik ba Ahikam nia oan-mane Gedalias atu ukun.+ Netanias nia oan-mane Ismael lori sira nuʼudar dadur no hahú laʼo ba ema Ammon sira-nia rai.+
11 Bainhira Karea nia oan-mane Joanan+ no xefe tropa nian hotu neʼebé hamutuk ho nia rona kona-ba buat aat hotu neʼebé Netanias nia oan-mane Ismael halo ona, 12 sira halibur mane hotu atu bá halo funu hasoru Netanias nia oan-mane Ismael no sira hetan Ismael besik bee neʼebé barak* iha sidade Gibeão.
13 Bainhira ema dadur hotu neʼebé hamutuk ho Ismael haree Karea nia oan-mane Joanan no xefe tropa nian hotu neʼebé hamutuk ho nia, sira haksolok tebes. 14 Tuirmai, ema dadur hotu neʼebé Ismael lori sai ona husi Mizpa+ fila fali hamutuk ho Karea nia oan-mane Joanan. 15 Maibé Netanias nia oan-mane Ismael ho mane naʼin-ualu neʼebé hamutuk ho nia halai husi Joanan no bá ema Ammon nia rai.
16 Karea nia oan-mane Joanan no xefe tropa nian hotu neʼebé hamutuk ho nia halibur ema restu husi Mizpa, ema neʼebé sira salva ona husi Netanias nia oan-mane Ismael bainhira nia oho tiha Ahikam nia oan-mane Gedalias.+ Sira lori sai mane, tropa, feto, labarik no ema-boot sira husi sidade Gibeão. 17 Tuirmai, sira bá no hela iha fatin ba ema laʼo-rai nian iha Kiman, besik Belein,+ atu nuneʼe sira bele bá rai-Ejitu+ 18 tanba taʼuk ema Kaldeia sira. Sira taʼuk ema Kaldeia sira tanba Netanias nia oan-mane Ismael oho tiha Ahikam nia oan-mane Gedalias neʼebé liurai Babilónia hili ona nuʼudar ulun-naʼin ba rai-Judá.+
42 Tuirmai, xefe tropa nian hotu, ho Karea nia oan-mane Joanan,+ no Osaias nia oan-mane Jezanias hamutuk ho ema hotu, husi povu kiʼik toʼo ema-boot, sira hakbesik 2 profeta Jeremias, hodi dehan: “Favór ida, rona lai ba buat neʼebé ami husu, no harohan ba Jeová, Ita-Boot nia Maromak, ba ami hotu nia diʼak, ba ema restu,+ tanba ami uitoan deʼit mak sei moris, hanesan Ita-Boot haree daudaun. 3 Ami hein katak Jeová, Ita-Boot nia Maromak, sei fó-hatene ami dalan neʼebé ami tenke laʼo no buat neʼebé ami tenke halo.”
4 Profeta Jeremias dehan ba sira: “Haʼu rona ona imi-nia liafuan, no haʼu sei harohan ba Jeová, imi-nia Maromak, tuir buat neʼebé imi husu. Haʼu sei hatoʼo ba imi liafuan hotu neʼebé Jeová dehan. Haʼu sei la taka liafuan ida ba imi.”
5 Tuirmai, sira dehan ba Jeremias: “Se ami la halo tuir ho loloos liafuan hotu neʼebé Jeová haruka ami atu halo liuhusi Ita-Boot, Ita-Boot nia Maromak Jeová mak sei sai sasin neʼebé loos no laran-metin hodi kontra ami. 6 Maski diʼak ka la diʼak ba ami, ami sei halo tuir ita-nia Maromak Jeová nia liafuan hotu, Maromak neʼebé ami haruka daudaun Ita-Boot atu harohan, atu nuneʼe buat hotu sei laʼo ho diʼak iha ami-nia moris tanba ami halo tuir ita-nia Maromak Jeová nia liafuan.”
7 Ikusmai, liutiha loron sanulu, Jeová fó sai ninia liafuan ba Jeremias. 8 Tan neʼe, Jeremias bolu Karea nia oan-mane Joanan no xefe tropa nian hotu neʼebé hamutuk ho nia no mós ema hotu, husi povu kiʼik toʼo ema-boot.+ 9 Jeremias hatete ba sira: “Neʼe mak liafuan husi Jeová, Izraél nia Maromak, neʼebé imi haruka ona haʼu atu husu ninia laran-sadiʼa. Nia dehan: 10 ‘Se imi hela metin iha rai neʼe, haʼu sei harii imi no haʼu sei la sobu imi, no haʼu sei kuda imi no haʼu sei la fokit sai imi, tanba haʼu sei sente triste* ba terus neʼebé haʼu fó ona ba imi.+ 11 Keta taʼuk ba liurai Babilónia neʼebé halo imi taʼuk.’+
“Jeová dehan: ‘Keta taʼuk ba nia, tanba haʼu hamutuk ho imi, atu salva imi no hasai imi husi ninia liman. 12 Haʼu sei hatudu laran-sadiʼa ba imi,+ no nia sei iha laran-sadiʼa ba imi no lori imi fila fali ba imi-nia rai rasik.
13 “‘Maibé se imi dehan: “Lae, ami lakohi hela metin iha rai neʼe!” no imi la halo tuir imi-nia Maromak Jeová nia liafuan 14 hodi hatete: “Lae, ami sei bá rai-Ejitu,+ iha neʼebá ami sei la haree tan funu no la rona tan dikur nia lian, no sei la iha ema ida mak hamlaha tanba falta ai-han. Ami sei hela metin iha neʼebá”, 15 se hanesan neʼe, rona Jeová nia liafuan bá, oh imi ema restu husi povu Judá. Jeová neʼebé ukun tropa lalehan nian, Izraél nia Maromak, dehan nuneʼe: “Se imi hakarak duni bá rai-Ejitu no imi bá hela iha neʼebá,* 16 surik neʼebé imi taʼuk mak sei toman imi iha rai-Ejitu, no hamlaha boot neʼebé halo imi taʼuk mak sei duni tuir imi toʼo rai-Ejitu, no imi sei mate iha neʼebá.+ 17 No ema hotu neʼebé hakarak bá hela iha rai-Ejitu sei mate ho surik, hamlaha boot no moras-peste.* Sei la iha ema ida mak moris ka halai sees husi terus neʼebé haʼu sei fó ba sira.”’
18 “Tanba Jeová neʼebé ukun tropa lalehan nian, Izraél nia Maromak, dehan nuneʼe: ‘Hanesan haʼu fakar ona haʼu-nia hirus no haʼu-nia laran-nakali ba ema neʼebé hela iha Jeruzalein,+ nuneʼe mós haʼu sei fakar haʼu-nia hirus ba imi se imi bá rai-Ejitu, no imi sei hetan malisan no sai buat neʼebé halo ema taʼuk, ema sei hatún no hamoe imi,+ no imi sei nunka haree fali fatin neʼe.’
19 “Oh ema restu husi povu Judá, Jeová koʼalia ona ba imi. Keta bá rai-Ejitu. Imi tenke hatene ho loloos katak haʼu fó ona avizu ba imi iha loron neʼe 20 katak imi sei lakon imi-nia moris tanba imi-nia sala. Tanba imi haruka haʼu atu husu ba imi-nia Maromak Jeová, hodi dehan: ‘Harohan lai ba Jeová, ita-nia Maromak, ba ami-nia diʼak, no fó-hatene ba ami buat hotu neʼebé ita-nia Maromak Jeová hatete, no ami sei halo tuir.’+ 21 Haʼu fó-hatene ona ba imi iha loron neʼe, maibé imi sei la halo tuir imi-nia Maromak Jeová nia liafuan, no imi sei la halo tuir buat hotu neʼebé Maromak haruka haʼu atu fó-hatene ba imi.+ 22 Tan neʼe, hatene didiʼak bá, katak iha rai neʼebé imi hakarak bá no hela, imi sei mate ho surik, hamlaha boot no moras-peste.”+
43 Jeremias hatoʼo liafuan hotu husi sira-nia Maromak Jeová ba ema hotu, nia hatoʼo liafuan ida ba ida neʼebé sira-nia Maromak Jeová haruka nia atu fó-hatene ba sira. Liutiha neʼe, 2 Osaias nia oan-mane Azarias, Karea nia oan-mane Joanan+ no mane hotu neʼebé foti an* dehan ba Jeremias: “Ó koʼalia bosok! Jeová, ita-nia Maromak, la haruka ó atu dehan ba ami: ‘Keta bá rai-Ejitu no keta hela iha neʼebá.’ 3 Maibé Nerias nia oan-mane Baruc+ mak tau lia ba ó atu koʼalia hanesan neʼe ba ami hodi entrega ami ba ema Kaldeia sira, nuneʼe sira bele oho ami ka lori ami ba rai-Babilónia nuʼudar dadur.”*+
4 Tan neʼe, Karea nia oan-mane Joanan ho xefe tropa nian no povu hotu la halo tuir Jeová nia liafuan atu hela metin iha rai-Judá. 5 Duké halo tuir, Karea nia oan-mane Joanan no xefe tropa nian hotu lori povu restu hotu husi Judá neʼebé fila ona ba rai-Judá husi nasaun hotu neʼebé sira namkari bá.+ 6 Sira lori mane, feto, labarik, liurai nia oan-feto sira, no ema* hotu neʼebé Nebuzaradan,+ xefe ba guarda sira, husik ona atu hamutuk ho Ahikam+ nia oan-mane Gedalias,+ Safan+ nia bei-oan. Sira mós lori profeta Jeremias ho Nerias nia oan-mane Baruc 7 hodi bá rai-Ejitu, tanba sira la halo tuir Jeová nia liafuan, no sira toʼo iha sidade Tafnes.+
8 Tuirmai, Jeová fó sai ninia liafuan ba Jeremias iha sidade Tafnes, hodi dehan: 9 “Foti fatuk boot sira, no lori ba Faraó nia uma iha Tafnes, subar fatuk sira-neʼe iha bloku* laran besik ninia portaun oin no taka ho simente. Halo ida-neʼe iha mane Judeu sira-nia oin. 10 Tuirmai, ó tenke hatete ba sira: ‘Jeová neʼebé ukun tropa lalehan nian, Izraél nia Maromak, dehan nuneʼe: “Haʼu sei bolu haʼu-nia atan Nabukodonozór,* liurai Babilónia,+ mai iha fatin neʼe, no haʼu sei tau ninia kadunan iha fatuk sira-neʼe nia leten, iha fatuk sira neʼebé haʼu subar ona, no liurai neʼe sei halo ninia tenda furak iha fatuk sira-neʼe nia leten.+ 11 Nia sei mai duni no ataka rai-Ejitu.+ Sira neʼebé atu mate ho moras-peste, mate ho moras-peste* bá, no sira neʼebé atu sai dadur, sai dadur bá, no sira neʼebé atu mate ho surik, mate ho surik bá.+ 12 No haʼu sei sunu Ejitu nia maromak sira-nia templu,+ no liurai neʼe sei sunu sira no lori sai sira nuʼudar dadur. Hanesan bibi-atan ida falun ninia an ho ninia unuk, nuneʼe mós liurai neʼe sei falun ninia an ho rai-Ejitu, no nia sei sai husi rai neʼe no la hetan kanek.* 13 Nia sei harahun fatuk-riin sira iha Bet-Semes* iha rai-Ejitu, no nia sei sunu Ejitu nia maromak sira-nia templu.”’”
44 Neʼe mak Maromak nia liafuan ba Jeremias, liafuan neʼebé Jeremias hatoʼo ba ema Judeu hotu neʼebé hela iha rai-Ejitu,+ sira neʼebé hela iha Migdol,+ Tafnes,+ Nof,*+ no iha rai-Patros,+ hodi dehan: 2 “Jeová neʼebé ukun tropa lalehan nian, Izraél nia Maromak, dehan nuneʼe: ‘Imi haree ona terus hotu neʼebé haʼu fó ba Jeruzalein+ no sidade hotu iha rai-Judá toʼo ohin loron, sidade sira-neʼe rahun tiha ona, no la iha ema ida mak hela.+ 3 Buat sira-neʼe akontese tanba imi-nia hahalok aat neʼebé imi halo hodi hakanek haʼu-nia laran, no imi bá hasaʼe sakrifísiu+ no adora maromak sira seluk neʼebé uluk imi la hatene, maromak sira neʼebé imi no imi-nia beiʼala sira mós la hatene.+ 4 Haʼu haruka nafatin haʼu-nia atan profeta hotu ba imi, haʼu haruka sira fila-fila,* atu fó-hatene imi, hodi dehan: “Favór ida, imi keta halo buat aat sira-neʼe, neʼebé haʼu hakribi.”+ 5 Maibé imi la rona no la see tilun, imi la fila fali husi imi-nia dalan neʼebé aat no kontinua hasaʼe sakrifísiu ba maromak sira seluk.+ 6 Tan neʼe, haʼu fakar ona haʼu-nia laran-nakali no haʼu-nia hirus neʼebé lakan makaʼas. Haʼu fó kastigu ba sidade sira iha Judá no dalan sira iha Jeruzalein, toʼo halo fatin sira-neʼe sai fuik no aat, hanesan ohin loron.’+
7 “Agora Jeová, Maromak neʼebé ukun tropa lalehan nian, Izraél nia Maromak, dehan nuneʼe: ‘Tanbasá mak imi lori terus boot neʼe ba imi-nia an rasik, hodi halakon ema hotu, mane, feto, labarik no bebé hotu husi rai-Judá, toʼo la iha tan ema ida mak moris? 8 Tanbasá mak imi tenke hakanek haʼu-nia laran ho buat neʼebé imi-nia liman mak halo no hasaʼe sakrifísiu ba maromak sira seluk iha rai-Ejitu, fatin neʼebé imi hela? Imi sei mate mohu, no nasaun hotu iha mundu neʼe sei temi imi nuʼudar malisan no hamoe imi.+ 9 Imi haluha ona ka? Imi-nia beiʼala, liurai Judá, sira-nia feen, no mós imi no imi-nia feen sira halo ona hahalok aat+ iha rai-Judá no iha Jeruzalein nia dalan sira. 10 Toʼo ohin loron mós imi* la haraik an,* la hamtaʼuk haʼu,+ no la laʼo tuir haʼu-nia lei no haʼu-nia ukun-fuan neʼebé haʼu fó ona ba imi no ba imi-nia beiʼala sira.’+
11 “Tan neʼe, Jeová neʼebé ukun tropa lalehan nian, Izraél nia Maromak, dehan nuneʼe: ‘Haʼu deside ona atu fó-terus ba imi, no atu halakon povu Judá hotu. 12 Haʼu sei foti povu restu husi Judá neʼebé hakarak duni atu bá rai-Ejitu hodi hela iha neʼebá, sira hotu sei mate iha rai-Ejitu.+ Sira sei mate ho surik no hamlaha boot. Husi povu kiʼik toʼo ema-boot, sira sei mate ho surik no hamlaha boot. No sira sei hetan malisan, sira sei sai buat neʼebé halo ema taʼuk, no ema sei hatún sira no hamoe sira.+ 13 Hanesan haʼu fó kastigu ona ba Jeruzalein, haʼu mós sei fó kastigu ba ema neʼebé hela iha rai-Ejitu, haʼu sei fó kastigu ba sira ho surik, hamlaha boot no moras-peste.*+ 14 No povu restu husi Judá neʼebé bá ona hodi hela iha rai-Ejitu sei mate, sira labele halai sees ka fila fali ba rai-Judá. Sira sei hakarak tebes atu fila no hela fali iha rai-Judá, maibé sira labele, ema uitoan deʼit mak bele halai sai husi rai-Ejitu.’”
15 Tuirmai, mane hotu neʼebé hatene katak sira-nia feen hasaʼe ona sakrifísiu ba maromak sira seluk, no mós sira-nia feen hotu neʼebé hamriik hamutuk ho sira iha neʼebá nuʼudar ema-lubun boot, no ema hotu neʼebé hela iha rai-Ejitu+ iha sidade Patros,+ dehan ba Jeremias: 16 “Ami sei la rona liafuan neʼebé ó koʼalia mai ami hodi Jeová nia naran. 17 Maibé ami sei kumpre liafuan hotu neʼebé sai ona husi ami-nia ibun, hodi hasaʼe sakrifísiu ba Liurai-Feto Lalehan nian* no fui sakrifísiu hemu nian ba nia,+ hanesan ami, ami-nia beiʼala, ami-nia liurai no ulun-naʼin sira halo ona iha tempu uluk iha sidade sira iha Judá no iha dalan sira iha Jeruzalein iha tempu neʼebé ami han ai-han toʼo bosu no moris diʼak, tempu neʼebé ami la hetan susar. 18 Maibé husi tempu neʼebé ami la hasaʼe tan sakrifísiu ba Liurai-Feto Lalehan nian* no la fui tan sakrifísiu hemu nian ba nia, ami falta buat hotu no ami barak mak mate ona ho surik no hamlaha boot.”
19 Feto sira mós hatutan tan: “Iha tempu uluk bainhira ami hasaʼe sakrifísiu ba Liurai-Feto Lalehan nian* no fui sakrifísiu hemu nian ba nia, ami-nia laʼen fó lisensa ba ami atu halo dose sakrifísiu nian neʼebé modelu hanesan Liurai-Feto neʼe no ami fui sakrifísiu hemu nian ba nia, loos ka lae?”
20 Tuirmai, Jeremias hatete ba ema hotu, mane sira no sira-nia feen, no povu hotu neʼebé koʼalia ba nia, hodi dehan: 21 “Jeová hanoin-hetan sakrifísiu sira neʼebé imi, imi-nia beiʼala, imi-nia liurai ho ulun-naʼin sira, no povu iha rai neʼe hasaʼe iha sidade sira iha Judá no iha dalan sira iha Jeruzalein+ no nia rai hela ida-neʼe hotu iha ninia laran! 22 Ikusmai Jeová labele tahan ona hodi haree imi-nia hahalok aat sira no buat neʼebé imi halo neʼebé nia hakribi tebes. Nuneʼe imi-nia rai sai fatin neʼebé fuik no aat, fatin neʼebé halo ema taʼuk no ema temi fatin neʼe nuʼudar malisan, fatin neʼebé la iha ema ida mak hela, hanesan ohin loron.+ 23 Tanba imi hasaʼe ona sakrifísiu sira-neʼe no tanba imi halo ona sala hasoru Jeová hodi la halo tuir Jeová nia liafuan no la halo tuir ninia lei, ninia ukun-fuan no ninia avizu sira, tan neʼe mak susar boot neʼe kona imi, hanesan imi hasoru ohin loron.”+
24 Jeremias koʼalia tan ba povu hotu no feto hotu: “Imi ema Judá hotu neʼebé hela iha rai-Ejitu, rona Jeová nia liafuan bá. 25 Jeová neʼebé ukun tropa lalehan nian, Izraél nia Maromak, dehan nuneʼe: ‘Buat neʼebé imi ho imi-nia feen sira koʼalia sai ona husi imi-nia ibun, imi halo ona ho imi-nia liman. Imi dehan: “Ami sei halo tuir ami-nia juramentu neʼebé ami halo ona atu hasaʼe sakrifísiu ba Liurai-Feto Lalehan nian* no atu fui sakrifísiu hemu nian ba nia.”+ Imi feto sira sei halo tuir duni imi-nia juramentu no sei kumpre imi-nia juramentu.’
26 “Tan neʼe, imi ema Judá hotu neʼebé hela iha rai-Ejitu, rona Jeová nia liafuan bá: ‘Jeová dehan: “Haʼu jura hodi haʼu-nia naran neʼebé boot, katak iha rai-Ejitu tomak sei la iha tan ema Judá ida+ mak temi haʼu-nia naran bainhira sira halo juramentu, hodi dehan: ‘Haʼu jura hodi Jeová, Naʼi Ukun-Naʼin Boot Liu, Maromak neʼebé moris!’+ 27 Agora haʼu haree didiʼak sira atu fó-terus, laʼós atu fó buat diʼak ba sira.+ Ema Judá hotu iha rai-Ejitu sei mate ho surik no hamlaha boot, toʼo sira hotu la iha tan.+ 28 Ema uitoan deʼit mak bele halai sees husi surik, no sira sei sai husi rai-Ejitu hodi fila fali ba rai-Judá.+ Nuneʼe, povu restu hotu husi Judá neʼebé mai hela iha rai-Ejitu sei hatene duni sé-nia liafuan mak sai loos, haʼu-nian ka sira-nian!”’”
29 “Jeová dehan: ‘Neʼe mak sinál neʼebé hatudu katak haʼu sei fó kastigu ba imi iha rai neʼe, atu nuneʼe imi bele hatene liafuan neʼebé haʼu dehan ona atu fó-terus ba imi sei sai loos duni. 30 Jeová dehan nuneʼe: “Haʼu sei entrega Faraó Hofra, liurai Ejitu, ba ninia inimigu sira neʼebé buka atu oho nia, hanesan haʼu entrega ona Liurai Zedequias husi Judá ba ninia inimigu Liurai Nabukodonozór* husi Babilónia, neʼebé buka atu oho nia.”’”+
45 Iha tinan haat husi Josias nia oan-mane Jeoquim nia ukun+ nuʼudar liurai iha rai-Judá, profeta Jeremias hatoʼo liafuan+ ba Nerias nia oan-mane Baruc,+ no Baruc hakerek liafuan sira-neʼe iha livru ida. Jeremias hatete ba Baruc:
2 “Jeová, Izraél nia Maromak, dehan nuneʼe kona-ba ó, Baruc: 3 ‘Ó dehan: “Susar ba haʼu, tanba Jeová aumenta tan haʼu-nia terus! Haʼu kole ona tanba haʼu-nia halerik, no la iha fatin hakmatek ida ba haʼu.”’
4 “Ó tenke hatete ba Baruc: ‘Jeová dehan nuneʼe: “Buat neʼebé haʼu harii ona, haʼu sei sobu, no buat neʼebé haʼu kuda ona, haʼu sei fokit. Haʼu sei halo nuneʼe iha rai neʼe tomak.+ 5 Maibé ó buka nafatin* buat boot sira ba ó-nia an. Keta buka tan buat sira-neʼe.”’
“‘Tanba haʼu sei fó-terus ba ema hotu,+ no iha fatin neʼebé deʼit ó bá, haʼu sei salva ó-nia moris.’ Jeová mak dehan.”+
46 Tuirmai neʼe mak liafuan neʼebé Jeová fó sai ba profeta Jeremias kona-ba nasaun sira.+ 2 Ba rai-Ejitu,+ kona-ba Faraó Neco+ nia tropa. Neco mak liurai Ejitu. Iha tinan haat husi Josias nia oan-mane Jeoquim nia ukun+ nuʼudar liurai ba rai-Judá, Faraó Neco halo funu hasoru Liurai Nabukodonozór* husi rai-Babilónia iha sidade Karkemis, besik Mota Eufrates, no nia lakon iha funu neʼe:
3 “Prepara imi-nia eskudu kiʼik* no eskudu boot,
No bá halo funu.
4 Imi tropa neʼebé saʼe kuda, kesi kuda-talin ba kuda no saʼe bá.
Taka kapasete no hamriik iha imi-nia fatin ida-idak.
Kose nabilan imi-nia diman no hatais roupa funu nian bá.
5 Jeová dehan: ‘Tanbasá mak haʼu haree sira sai taʼuk tebes?
Sira-nia funu-naʼin sira hakiduk daudaun, tanba sira lakon funu.
Sira-nia funu-naʼin sira halai ho taʼuk, no la hateke ba kotuk.
Fatin hotu nakonu ho taʼuk.’
6 ‘Ema neʼebé halai lalais mós la biban atu halai sees, no funu-naʼin sira mós labele halai sai.
Sira sidi no monu+
Iha Mota Eufrates ninin, iha parte norte.’
7 Sé mak saʼe mai daudaun hanesan Mota Nilo,
Hanesan mota neʼebé suli makaʼas?
8 Ejitu mak saʼe mai daudaun hanesan Mota Nilo,+
Hanesan mota neʼebé suli makaʼas,
Nia dehan: ‘Haʼu sei saʼe bá no taka rai tomak.
Haʼu sei halakon sidade no ema hotu iha sidade neʼe.’
9 Imi kuda sira, halai ba oin!
Imi kuda-karreta sira, halai lalais bá!
Imi funu-naʼin sira, hakat ba oin:
Ema Kus no ema Put, neʼebé kaer eskudu,+
10 “Loron neʼe mak Naʼi Ukun-Naʼin Boot Liu nian, Jeová neʼebé ukun tropa lalehan nian, loron neʼebé nia selu fali ninia inimigu sira-nia hahalok aat. Surik mak sei han sira no hemu sira-nia raan toʼo bosu, tanba Naʼi Ukun-Naʼin Boot Liu, Jeová neʼebé ukun tropa lalehan nian, sei halo sakrifísiu ida* iha rai parte norte besik Mota Eufrates.+
11 Oh Ejitu nia oan-feto virjen,
Bá Gilead no foti mina-bálsamu.+
Maski ó koko ai-moruk barak, maibé neʼe saugati deʼit,
Tanba la iha ai-moruk ida mak bele kura ó.+
12 Nasaun sira rona ona kona-ba buat aat neʼebé hamoe ó,+
No rai neʼe nakonu ona ho ó-nia lian halerik.
Tanba funu-naʼin ida halo funu-naʼin seluk sidi,
No sira naʼin-rua monu hamutuk.”
13 Tuirmai neʼe mak liafuan neʼebé Jeová hatoʼo ba profeta Jeremias kona-ba Liurai Nabukodonozór* husi rai-Babilónia neʼebé sei mai ataka rai-Ejitu:+
14 “Fó sai liafuan neʼe iha rai-Ejitu, habelar liafuan neʼe iha Migdol.+
Habelar liafuan neʼe iha Nof* no iha Tafnes.+
Hatete ba sira: ‘Imi hamriik iha imi ida-idak nia fatin no prepara imi-nia an bá,
Tanba surik sei halakon ema hotu neʼebé iha imi-nia sorin-sorin.
15 Tanbasá mak imi-nia kbiit-naʼin sira lakon mohu ona?
Sira labele hamriik ona,
Tanba Jeová mak dudu monu sira.
16 Sira barak tebes mak sidi no monu.
Sira koʼalia ba malu, hodi dehan:
“Hamriik bá! Mai ita fila fali ba ita-nia povu no ita-nia rai
Atu bele halai sees husi surik neʼebé siʼak tebes.”’
17 Sira fó sai ona iha neʼebá, hodi dehan:
‘Faraó, liurai Ejitu, koʼalia mak barak, nia la halo buat ida,
18 Liurai neʼebé naran Jeová, neʼebé ukun tropa lalehan nian, dehan: ‘Haʼu jura hodi haʼu-nia moris rasik katak,
Nia* sei mai ho kmanek boot hanesan Foho Tabor+ iha foho sira-nia leet
No hanesan Foho Karmel+ neʼebé besik tasi.
19 Oh oan-feto neʼebé hela iha rai-Ejitu,
Prepara ó-nia sasán neʼebé ó atu lori bainhira ó bá rai seluk nuʼudar dadur,*
Tanba Nof* sei sai fatin neʼebé halo ema taʼuk.
Ahi sei han mohu fatin neʼe* no sei la iha ema ida mak hela iha fatin neʼe.+
20 Ejitu mak hanesan karau-inan ida neʼebé furak tebes,
Maibé susuk sira sei mai husi rai iha parte norte atu tata nia.
21 Tropa sira neʼebé ema Ejitu selu mak hanesan karau-oan neʼebé bokur,
Maibé sira mós hakiduk hodi halai hamutuk.
Sira labele hamriik metin iha sira-nia fatin,+
Tanba sira-nia loron terus nian toʼo mai ona,
Neʼe mak tempu ba sira atu hetan kastigu.’
22 ‘Ninia lian hanesan lian husi samea neʼebé dolar lalais,
Tanba inimigu sira sei duni tuir nia ho forsa no uza baliu
Hanesan mane sira neʼebé tesi ai.’*
23 Jeová dehan: ‘Sira sei lere hotu ai-laran maski susar ba ema atu tama.
Tanba sira barak liu fali gafañotu sira, barak tebes toʼo sura labele.
24 Ejitu nia oan-feto sei hetan moe.
Nia sei monu ba povu husi parte norte nia liman.’+
25 “Jeová neʼebé ukun tropa lalehan nian, Izraél nia Maromak, dehan: ‘Agora, haʼu sei fó kastigu ba Amon+ neʼebé husi sidade Nó,*+ ba Faraó, ba Ejitu, ba ninia maromak sira+ no ba ninia liurai sira. Loos, haʼu sei fó kastigu ba Faraó no ba ema hotu neʼebé fiar nia.’+
26 “‘Haʼu sei entrega sira ba ema neʼebé buka atu oho sira, ba Liurai Nabukodonozór* husi rai-Babilónia+ no ba ninia atan sira. Maibé liutiha neʼe, ema barak sei hela fali iha rai-Ejitu hanesan tempu uluk’, Jeová mak dehan.+
27 ‘Kona-ba ó, haʼu-nia atan Jacob, keta taʼuk,
Oh Izraél, keta laran nakdedar.+
Tanba haʼu sei salva ó husi fatin dook
No haʼu sei salva ó-nia bei-oan sira husi rai neʼebé sira moris nuʼudar dadur.+
Jacob sei fila fali no sei moris hakmatek no iha dame,
Sei la iha ema ida mak halo sira taʼuk.+
28 Tan neʼe, keta taʼuk, haʼu-nia atan Jacob’, Jeová dehan, ‘tanba haʼu sei hamutuk ho ó.
Haʼu sei halakon mohu nasaun hotu neʼebé haʼu halo ona ó-nia povu namkari bá,+
Maibé kona-ba ó, haʼu sei la halakon mohu ó.+
47 Tuirmai neʼe mak Jeová nia liafuan ba profeta Jeremias kona-ba ema Filístia sira,+ antes Faraó ataka sidade Gaza. 2 Jeová dehan nuneʼe:
“Haree bá! Bee sei saʼe husi parte norte,
No suli tun makaʼas hanesan mota neʼebé boot.
Bee neʼe sei taka rai tomak no halo mout buat hotu iha rai neʼe,
Sidade no mós ema neʼebé hela iha sidade neʼe.
Mane sira sei tanis hakilar,
No ema hotu neʼebé hela iha rai neʼe sei halerik makaʼas.
3 Sira sei rona lian husi kuda nia ain neʼebé halai makaʼas,
Lian barullu husi kuda-karreta funu nian
No lian makaʼas husi kuda-karreta nia roda,
Aman sira sei la hateke ba kotuk atu ajuda sira-nia oan-mane,
Tanba sira-nia liman sai kbiit-laek,
4 Tanba loron sei toʼo mai atu harahun ema Filístia hotu,+
No atu halakon ninia ajuda-naʼin hotu husi Tiro+ no Sidon+ neʼebé sei moris hela.
5 Ema Gaza sei sai ulun-molik* tanba triste.
Ema Askelon labele koʼalia tan buat ida.+
Oh imi ema restu sira neʼebé iha rai-tetuk Gaza no Askelon,
Toʼo bainhira mak imi sei nafatin koʼa kanek imi-nia an rasik?+
6 Oh Jeová nia surik!+
Toʼo bainhira mak ó la hakmatek?
Tama fali ba ó-nia fatin.
Hakmatek no nonook bá.
7 Se Jeová mak haruka ona surik neʼe,
Oinsá mak surik neʼe bele hakmatek?
Nia haruka surik neʼe
Atu ataka Askelon no área besik tasi-ibun.”+
48 Jeová neʼebé ukun tropa lalehan nian, Izraél nia Maromak, dehan nuneʼe kona-ba Moab:+
“Susar ba Nebo,+ tanba ema harahun tiha sidade neʼe!
Ema hamoe ona Kiriataim+ no hadau tiha sidade neʼe.
Ema hamoe ona no harahun tiha Moab nia fatin protesaun* neʼebé seguru.+
2 Sira la hahiʼi tan Moab.
Inimigu sira halo planu aat iha Hesbon+ kona-ba Moab, hodi dehan:
‘Mai ita halakon Moab atu nia labele sai tan nasaun ida.’
Oh Madmen, ó mós tenke nonook deʼit,
Tanba surik mak duni tuir hela ó.
3 Iha lian halerik husi Horonaim,+
Tanba ema estraga no halo nia monu toʼo uut.
4 Ema harahun tiha ona Moab.
Labarik sira iha rai-Moab tanis hakilar.
5 Ema tanis la para bainhira sira laʼo daudaun iha dalan atu saʼe ba Luíte.
No bainhira sira laʼo tun husi Horonaim, sira rona ema tanis ho neon-susar tanba dezastre boot neʼe.+
6 Halai bá, salva imi-nia moris!
Imi tenke sai hanesan ai-juníperu iha rai-fuik.
7 Oh Moab, ó tau fiar ba buat neʼebé ó halo no ba ó-nia rikusoin sira,
Tan neʼe, ema sei kaer ó.
8 Inimigu neʼebé atu ataka ó sei tama sidade hotu,
No sira sei estraga tiha sidade hotu.+
Sira sei halakon tiha foho-leet* sira,
No sei estraga tiha rai-tetuk sira, tuir buat neʼebé Jeová fó-hatene nanis ona.
9 Tau sinál atu hatudu dalan ba ema Moab,
Tanba bainhira Moab rahun daudaun, ninia povu sira sei halai sai.
Ninia sidade sira sei sai fatin neʼebé halo ema taʼuk,
No la iha tan ema ida mak hela iha neʼebá.+
10 Malisan ba ema neʼebé la halo didiʼak ninia knaar neʼebé Jeová fó!
Malisan ba ema neʼebé la uza ninia surik atu fakar ema nia raan!
11 Ema Moab sira moris hakmatek husi tempu neʼebé sira sei joven toʼo ohin loron,
Sira hakmatek hela hanesan ho tua-uvas moos neʼebé ninia teen tun ona.
Ema seidauk fui tua neʼe husi fatin ida ba fatin seluk,
Nuneʼe mós seidauk iha ema ida mak lori sira ba dadur.
Tan neʼe mak sira-nia gostu hanesan nafatin,
No sira-nia morin mós la troka.
12 “Jeová dehan: ‘Tan neʼe, tempu sei toʼo mai bainhira haʼu sei haruka ema atu baku fila tua-fatin sira-neʼe. Sira sei baku fila toʼo halo tua-uvas sira-neʼe nakfakar no halo tua-fatin sira-neʼe sai mamuk, no sira mós sei baku rahun sanan-rai boot pedasuk ba pedasuk. 13 Ema Moab sei sente moe tanba Kemos, hanesan ho umakain Izraél neʼebé sente moe tanba Betel, fatin neʼebé uluk sira tau fiar.+
14 Oinsá mak imi brani dehan: “Ami mak funu-naʼin kbiit boot neʼebé prontu atu halo funu”?’+
15 ‘Ema harahun tiha Moab,
Ema mós hadau tiha ninia sidade sira,+
No oho tiha ninia mane joven sira neʼebé diʼak liu’,+
Liurai neʼebé naran Jeová, neʼebé ukun tropa lalehan nian,+ dehan nuneʼe.
16 Terus boot besik ona atu kona ema Moab,
No sira-nia susar boot sei toʼo mai lalais.+
17 Ema hotu neʼebé hela haleʼu sira,
No ema hotu neʼebé hatene sira-nia naran sei hanoin tebes sira.
Hatete ba sira: ‘Oh ai-tonka neʼebé forsa boot tohar tiha ona, ai-tonka furak neʼe!’
18 Oh oan-feto neʼebé hela iha Dibon,+ husik tiha ó-nia glória
No tuur ho hamrook bá,*
Tanba inimigu neʼebé atu ataka Moab mai ona hodi kontra ó,
No nia sei harahun ó-nia fatin sira neʼebé seguru.+
19 Oh imi neʼebé hela iha Aroer,+ hamriik iha dalan ninin no hateke didiʼak bá.
Husu ba mane sira neʼebé halai daudaun no feto sira neʼebé halai sees daudaun, hodi dehan: ‘Saida mak akontese?’
20 Moab hetan ona moe no sai taʼuk tebes.
Tanis halerik no hakilar makaʼas bá.
Imi hotu fó sai bá iha Arnon+ katak ema harahun ona Moab.
21 “Maromak fó ona kastigu ba rai-tetuk+ iha Holon, Jahaz+ no Mefaat;+ 22 iha Dibon,+ Nebo+ no Bet-Diblataim; 23 iha Kiriataim,+ Bet-Gamul no Bet-Meon;+ 24 iha Keriot+ no Bozra; no mós iha sidade hotu iha rai-Moab, sidade neʼebé dook no sidade neʼebé besik.
25 ‘Moab nia kbiit* kotu ona,
No ninia liman tohar ona’, Jeová mak dehan.
26 ‘Imi hotu, halo nia lanu bá,+ tanba nia foti an ona hasoru Jeová.+
Moab duir an iha ninia muta laran,
No ema sei hamoe nia.
27 Uluk ó mós hamoe ona Izraél,+ loos ka lae?
Tanbasá mak ó doko ulun no koʼalia aat hasoru nia?
Ó hetan nia iha naʼok-teen sira-nia leet ka?
28 Oh imi neʼebé hela iha Moab, sai tiha husi sidade sira no bá hela iha fatuk boot sira-nia leten,
No sai hanesan manu-pombu neʼebé halo ninia knuuk iha fatuk aas nia ninin.’”
29 “Ami rona ona kona-ba Moab nia hahalok foti an, nia loko an tebetebes
Kona-ba ninia hahalok gaba an, foti an, loko an no fó glória ba ninia an.”+
30 “Jeová dehan: ‘Haʼu hatene ninia hirus,
Maibé ninia liafuan folin-laek sira sei sai saugati deʼit.
Ema Moab sira-neʼe sei la halo buat ida.
31 Tan neʼe, haʼu sei tanis halerik ba Moab,
Haʼu sei tanis hakilar tanba ema Moab hotu
No haʼu sei lelir ho laran-triste ba ema iha Kir-Heres.+
Ó-nia dikin nurak sira neʼebé buras daudaun, nani toʼo tasi sorin.
Sira toʼo ona tasi sorin iha Jazer.
33 Ema la haksolok no kontente tan iha toʼos ai-fuan nian
No mós iha rai-Moab.+
Haʼu hapara ona tua-uvas atu labele suli tan husi fatin sama uvas nian.
Sei la iha tan ema ida mak sama uvas-fuan ho lian haksolok.
Ema sei hasai lian, maibé laʼós lian haksolok nian.’”+
34 “‘Sira hasai lian halerik husi Hesbon+ toʼo Eleale.+
Sira-nia lian neʼebé boot mós toʼo iha Jahaz,+
Lian halerik husi Zoar toʼo Horonaim,+ no toʼo iha Eglat-Selisia.
Bee iha Ninrim mós sei sai maran.+
35 Haʼu sei hapara ema atu la lori tan sakrifísiu ba fatin aas
No haʼu sei hapara ema atu la hasaʼe tan sakrifísiu ba sira-nia maromak
Iha Moab’, Jeová mak dehan.
36 ‘Tan neʼe mak haʼu sei halerik iha haʼu-nia laran* hanesan flauta* nia lian tanba Moab,+
No haʼu sei halerik iha haʼu-nia laran* hanesan flauta* nia lian tanba ema iha Kir-Heres.
Tanba Moab nia rikusoin sei la iha tan.
37 Tanba sira hotu nia ulun koi molik ona,+
No sira hotu nia hasarahun koi tiha ona.
38 “‘Ema tanis halerik deʼit
Iha uma nia kakuluk hotu iha rai-Moab
No iha fatin públiku hotu.
Tanba haʼu harahun ona Moab
Hanesan sanan-rai neʼebé soe tiha ona’, Jeová mak dehan.
39 ‘Nia sai taʼuk tebes! Imi hotu, tanis halerik bá!
Moab hakiduk ho moe boot!
Ema hamoe Moab,
No ema hotu neʼebé hela haleʼu Moab sai taʼuk tebes.’”
40 “Tanba Jeová dehan nuneʼe:
41 Ema sei hadau Moab nia sidade kiʼik sira,
No ema sei foti ninia fatin sira neʼebé seguru.
Iha loron neʼebá, funu-naʼin sira husi Moab sei laran-susar
Hanesan feto ida neʼebé atu tuur-ahi.’”
43 Oh povu neʼebé hela iha rai-Moab,
Taʼuk, rai-kuak no lasu mak hein hela ó’, Jeová mak dehan.
44 ‘Ema neʼebé halai husi taʼuk sei monu ba rai-kuak,
No ema neʼebé sai husi rai-kuak sei monu ba lasu.’
‘Tanba tinan sei toʼo mai bainhira haʼu fó kastigu ba Moab’, Jeová mak dehan.
45 ‘Ema neʼebé halai sees, sira sei para no hamriik ho kbiit-laek iha Hesbon nia lalatak okos.
Tanba ahi sei sai husi Hesbon
No ahi sei lakan husi Sihon nia laran.+
Ahi neʼe sei han mohu Moab nia reen-toos
No han funu-naʼin siʼak-teen sira-nia ulun-ruin.’+
46 ‘Oh Moab, susar ba ó!
Kemos+ nia povu lakon mohu ona.
Tanba ema kaer ona ó-nia oan-mane sira,
No ema mós lori ona ó-nia oan-feto sira ba dadur.+
47 Maibé iha loron sira-neʼe nia rohan, haʼu sei halibur fali ema Moab sira neʼebé sai ona dadur’, Jeová mak dehan.
‘Liafuan kastigu nian ba Moab mak toʼo iha neʼe deʼit.’”+
49 Jeová dehan nuneʼe kona-ba ema Ammon:+
“Izraél nia oan-mane la iha ka?
Ninia oan neʼebé atu simu liman-rohan la iha ka?
Tanbasá mak Malkam*+ hadau Gad nia rai?+
Tanbasá mak Malkam nia povu hela iha Izraél nia sidade sira?”
2 “Jeová dehan: ‘Tan neʼe, tempu sei toʼo mai
Bainhira haʼu sei halo ema Ammon+ rona lian funu nian* husi ema neʼebé ataka sidade Rabá.+
Sidade neʼe sei sai fuik, sei sai fatuk rahun butuk boot,
No ninia sidade kiʼik sira* mós sei sunu tiha.’
‘Izraél sei hadau fali rai neʼebé ema sira-neʼe hadau tiha ona’,+ Jeová mak dehan.
3 ‘Oh Hesbon, tanis halerik bá, tanba ema harahun ona sidade Ai!
Tanis hakilar bá, oh Rabá nia sidade kiʼik sira.
Hatais hena karón* bá.
Halerik bá no laʼo bá-mai iha bibi-luhan nia leet,*
Tanba ema sei lori Malkam nuʼudar dadur,
Hamutuk ho ninia amlulik no ulun-naʼin sira.+
4 Tanbasá mak ó loko an kona-ba rai-tetuk sira,
Kona-ba ó-nia rai-tetuk neʼebé iha bee barak? Oh oan-feto neʼebé la hatudu laran-metin,
Ó neʼebé tau fiar ba ó-nia rikusoin sira
No dehan: “Sé mak sei mai atu ataka haʼu?”’”
5 “Naʼi Ukun-Naʼin Boot Liu, Jeová neʼebé ukun tropa lalehan nian, dehan: ‘Haʼu sei lori buat neʼebé halo ó taʼuk
Husi fatin hotu neʼebé iha ó-nia sorin-sorin.
Imi sei halai namkari ba fatin hotu,
No sei la iha tan ema ida mak halibur fali imi neʼebé halai namkari ona.’”
6 “‘Maibé liutiha neʼe, haʼu sei halibur fali ema Ammon sira neʼebé sai ona dadur’, Jeová mak dehan.”
7 Kona-ba Edom, Jeová neʼebé ukun tropa lalehan nian, dehan nuneʼe:
“La iha tan ema matenek iha Teman ka?+
Ema matenek-naʼin sira-nia konsellu diʼak lakon mohu ona ka?
Sira-nia matenek sai dodok ona ka?
8 Halai no hakiduk bá!
Oh imi hotu neʼebé hela iha Dedan,+ bá hela iha fatin sira neʼebé kleʼan!
Tanba haʼu sei lori susar boot ba Esaú
Iha tempu neʼebé haʼu atu fó kastigu ba nia.
9 Se karik ema sira neʼebé kuʼu uvas-fuan mai iha imi-nia leet,
Sira sei husik uvas-fuan balu ba ema seluk atu foti, loos ka lae?
Se karik naʼok-teen sira mai iha kalan,
Sira sei estraga no naʼok deʼit buat neʼebé sira hakarak.+
10 Maibé haʼu sei halo Esaú sai isin-tanan.
Haʼu sei loke tiha ninia subar-fatin sira,
Atu nia labele subar tan.
11 Husik hela ó-nia oan-kiak sira* ho haʼu,
No haʼu sei tau matan ba sira-nia moris,
No ó-nia feto-faluk sira sei tau fiar ba haʼu.”
12 Tanba Jeová dehan nuneʼe: “Se ema neʼebé seidauk hetan tesi-lia mós tenke hemu husi kopu hirus nian, sá tan ho ó, ó bele halai sees duni husi kastigu ka lae? Ó sei labele halai sees husi kastigu, tanba ó tenke hemu duni husi kopu neʼe.”+
13 Jeová dehan: “Tanba haʼu jura ona hodi haʼu-nia an rasik, katak sidade Bozra sei sai fatin neʼebé estraga ona, fatin neʼebé hetan malisan no halo ema taʼuk,+ ema sei fó-malisan no hamoe sidade neʼe. Ninia sidade hotu sei sai fuik ba nafatin.”+
14 Haʼu rona lia-menon husi Jeová,
Nia haruka ona ema ida atu lori lia-menon ba nasaun sira-nia leet, hodi dehan:
“Imi halibur hamutuk bá, no mai hasoru nia,
Prepara imi-nia an bá atu halo funu.”+
15 “Tanba haʼu halo ona ó sai kiʼik tebes iha nasaun sira-nia leet,
No ema sei hakribi ó.+
16 Oh, ó neʼebé hela iha fatuk boot nia leet,
Ó neʼebé hela iha fatin aas liu iha foho leten,
Taʼuk neʼebé ó hamosu
No ó-nia laran neʼebé foti an* no fiar an demais mak lohi ona ó.
Maski ó halo ó-nia knuuk iha fatin aas hanesan manu-makikit,
Maibé haʼu sei hatún ó husi neʼebá”, Jeová mak dehan.
17 “Edom sei sai fatin neʼebé halo ema taʼuk.+ Ema hotu neʼebé laʼo liu sei hateke ba fatin neʼe ho taʼuk no hakfuʼik tanba haree susar hotu neʼebé kona ona rai neʼe. 18 Hanesan Sodoma ho Gomorra no ninia knua sira neʼebé lakon mohu tiha ona,+ nuneʼe mós sei la iha tan ema ida mak hela iha rai-Edom. Ema ida mós sei la hela metin iha neʼebá”,+ Jeová mak dehan.
19 “Hanesan leaun+ neʼebé sai husi ai-laran iha Mota Jordaun nia ninin, ema ida sei mai ataka rai-Edom neʼebé seguru, maibé lakleur deʼit haʼu sei halo sira* halai sai husi rai neʼe. No haʼu sei fó knaar ba ema neʼebé haʼu hili atu ukun rai neʼe. Tanba sé mak hanesan haʼu? Sé mak bele kontra hasoru haʼu? Bibi-atan ida-neʼebé mak bele hamriik iha haʼu-nia oin?+ 20 Tan neʼe, oh imi hotu, rona ba desizaun* neʼebé Jeová halo ona kona-ba ema Edom no buat neʼebé nia hanoin ona kona-ba ema neʼebé hela iha Teman:+
Inimigu sei rasta duni bibi-oan sira ba dook.
Nia sei estraga sira-nia hela-fatin tanba ema Edom sira.+
21 Bainhira sira monu, sei iha tarutu makaʼas toʼo halo rai nakdoko.
Sira hasai lian halerik!
Lian neʼe makaʼas tebes toʼo ema neʼebé dook iha Tasi Mean mós bele rona.+
Iha loron neʼebá, funu-naʼin sira husi Edom sei laran-susar
Hanesan feto ida neʼebé atu tuur-ahi.”
23 Tuirmai neʼe mak liafuan ba Damasku:+
“Hamat+ no Arpad hetan ona moe,
Tanba sira rona ona lia-menon neʼebé aat.
Sira sai taʼuk tebes.
Sira laran-susar hanesan tasi neʼebé labele hakmatek.
24 Damasku lakon ona ninia aten-brani.
Nia fila kotuk ona atu halai, maibé taʼuk mak domina nia.
Nia labele hasees an husi terus no moras
Hanesan feto neʼebé atu tuur-ahi.
25 Tanbasá mak ema seidauk husik sidade kmanek neʼe,
Sidade neʼebé fó ksolok?
26 Iha loron neʼebá, ninia mane joven sira sei mate iha sidade nia fatin públiku,
No ema sei halakon tropa hotu”, Jeová neʼebé ukun tropa lalehan nian mak dehan.
28 Kona-ba Kedar+ no kona-ba ukun sira iha rai-Hazor, neʼebé Liurai Nabukodonozór* husi Babilónia ataka ona, Jeová dehan nuneʼe:
“Hamriik bá, saʼe ba Kedar,
No halakon tiha oan-mane sira husi área Leste.
29 Foti sira-nia tenda no sira-nia bibi-lubun,
Foti mós sira-nia hena tenda nian no sira-nia sasán hotu.
Lori mós sira-nia kuda-kamelu,
No ema sei tanis hakilar, hodi dehan: ‘Fatin hotu nakonu ho taʼuk!’”
30 “Halai bá, halai tiha ba fatin dook!
Oh imi hotu neʼebé hela iha Hazor, bá hela iha fatin sira neʼebé kleʼan”, Jeová mak dehan.
“Tanba Liurai Nabukodonozór* husi Babilónia hanoin ona planu aat kona-ba imi,
No nia halo ona planu ida atu ataka imi.”
31 “Hamriik bá, saʼe bá hodi halo funu hasoru nasaun neʼebé moris iha dame laran,
Nasaun neʼebé hela ho hakmatek!” Jeová mak dehan.
“Nasaun neʼe la iha portaun no la iha mós ai-lolon atu xave portaun; sira moris ketak husi ema seluk.
32 Ema sei hadau sira-nia kuda-kamelu,
No sei lori mós sira-nia animál-hakiak barak.
Haʼu sei halo sira namkari iha fatin* hotu,
Sira neʼebé tesi badak ona sira-nia fuuk iha tilun-hun.+
No haʼu sei lori dezastre boot ba sira husi sorin-sorin”, Jeová mak dehan.
33 “Hazor sei sai asu-xakál sira-nia hela-fatin,
No sei sai fatin neʼebé fuik ba nafatin.
Sei la iha tan ema ida mak hela iha fatin neʼe,
No ema ida mós sei la hela metin iha neʼebá.”
34 Tuirmai neʼe mak liafuan neʼebé Jeová fó sai ba profeta Jeremias kona-ba Elam+ iha tempu neʼebé Liurai Zedequias+ hahú ukun rai-Judá: 35 “Jeová neʼebé ukun tropa lalehan nian dehan nuneʼe: ‘Haʼu sei halo tohar Elam nia rama-inan,+ neʼebé hun ba sira-nia forsa. 36 Haʼu sei lori anin haat ba Elam husi lalehan nia sorin haat, no haʼu sei halo sira namkari iha fatin* hotu. Ema Elam sei hela namkari iha nasaun hotu.’”
37 “Haʼu sei harahun ema Elam iha sira-nia inimigu nia oin, inimigu neʼebé buka atu oho sira. Haʼu sei lori susar boot ba sira, katak haʼu-nia hirus neʼebé lakan makaʼas”, Jeová mak dehan. “Haʼu sei haruka surik duni tuir sira toʼo haʼu halakon mohu sira.”
38 “Haʼu sei tau haʼu-nia kadunan iha Elam,+ no haʼu sei halakon liurai no ulun-naʼin sira husi neʼebá”, Jeová mak dehan.
39 “Maibé iha loron sira-neʼe nia rohan, haʼu sei halibur fali ema Elam sira neʼebé sai ona dadur”, Jeová mak dehan.
50 Tuirmai neʼe mak liafuan neʼebé Jeová hatoʼo liuhusi profeta Jeremias kona-ba Babilónia,+ kona-ba ema Kaldeia sira-nia rai:
2 “Fó sai ida-neʼe iha nasaun sira-nia leet no haklaken bá.
Tau sinál* no haklaken bá.
Keta subar buat ida!
Koʼalia sai bá, hodi dehan: ‘Ema hadau ona Babilónia.+
Bel hetan ona moe.+
Merodak* sai taʼuk tebes.
Ema hamoe ona ninia imajen sira.
Ema halo taʼuk ona ninia estátua sira neʼebé haʼu hakribi.’*
3 Tanba nasaun ida mai ona ataka Babilónia husi parte norte.+
Nasaun neʼe halo rai-Babilónia sai fatin neʼebé halo ema taʼuk,
Toʼo la iha ema ida mak hela iha rai neʼe.
Ema no animál hotu halai sai tiha ona;
Sira hotu halai dook ona.”
4 Jeová dehan: “Iha tempu neʼebá, povu Izraél no povu Judá sei mai hamutuk.+ Sira sei laʼo ho tanis,+ no sira hamutuk sei buka Jeová, sira-nia Maromak.+ 5 Sira sei husu dalan atu bá Siaun, no hateke ba fatin neʼebé sira laʼo bá,+ hodi dehan: ‘Mai, mai ita sai fali Jeová nia povu hodi halo tuir aliansa neʼebé sei iha ba nafatin, neʼebé sei nunka haluha.’+ 6 Haʼu-nia povu sai ona hanesan bibi-lubun neʼebé lakon dalan.+ Sira-nia bibi-atan mak halo sira laʼo sala dalan.+ Bibi-atan sira-neʼe lori sira ba foho sira neʼebé dook, halo sira laʼo-lemo husi foho ida ba foho-oan seluk. Povu neʼe haluha ona sira-nia fatin deskansa. 7 Ema hotu neʼebé hetan sira han mohu ona sira,+ no sira-nia inimigu dehan: ‘Ami la sala, tanba sira mak halo ona sala kontra Jeová neʼebé mak hun* ba hahalok loos, no kontra Jeová neʼebé mak sira-nia beiʼala nia esperansa.’”
8 “Imi hotu, halai sai husi Babilónia bá,
Sai husi ema Kaldeia sira-neʼe nia rai,+
No sai hanesan bibi sira neʼebé laʼo uluk liu fali bibi-lubun.
9 Tanba haʼu sei book nasaun boot sira iha rai parte norte+ no lori sira mai nuʼudar grupu boot ida
Atu ataka Babilónia.
Sira-nia tropa sei forma atu ataka Babilónia,
No sira sei manán duni Babilónia.
Sira-nia rama-oan hanesan funu-naʼin nia rama-oan
Neʼebé halo inan-aman lelir tanba lakon sira-nia oan.+
Sira sei la fila fali ba sira-nia rai antes sira manán Babilónia.
10 Kaldeia sei sai hanesan sasán neʼebé ema hadau.+
Ema hotu neʼebé hadau ninia rikusoin sei sente kontente”,+ Jeová mak dehan.
Imi haksolok hanesan karau-inan neʼebé haksoit bá-mai iha duʼut matak laran,
No imi hasai lian hanesan kuda-aman.
12 Imi-nia inan hetan ona moe.+
Nia neʼebé tuur-ahi ba imi sai laran-triste tebes.
Nasaun neʼe sai kiʼik liu iha nasaun sira seluk nia leet,
Nia sai rai-fuik neʼebé la iha bee, no rai neʼebé maran-dekor.+
13 Ema sei la hela tan iha Babilónia tanba Jeová nia hirus,+
Sidade neʼe sei sai fatin neʼebé fuik no mamuk.+
Ema hotu neʼebé laʼo liu Babilónia sei hateke ba fatin neʼe ho taʼuk
No hakfuʼik tanba haree susar hotu neʼebé kona fatin neʼe.+
14 Mai, imi hotu neʼebé prepara rama,*
Forma didiʼak bá, atu ataka Babilónia husi sorin-sorin.
15 Hakilar lian funu nian hasoru nia husi sorin-sorin.
Nia rende an ona.
Ninia riin sira monu namtate ona, ninia moru sira mós sobu rahun ona,+
Tanba neʼe mak Jeová nia kastigu ba nia.+
Selu fali ninia hahalok aat sira.
Halo ba nia hanesan buat neʼebé uluk nia halo ona.+
16 Halakon tiha ema sira neʼebé kari fini husi Babilónia,
No mós ema neʼebé uza sabit iha tempu koʼa nian.+
Tanba surik neʼebé siʼak sei halo sira hotu fila fali ba sira ida-idak nia povu,
Sira hotu sei halai fila fali ba sira ida-idak nia rai.+
17 “Povu Izraél mak bibi-malae neʼebé halai namkari ona.+ Leaun sira mak halo povu neʼe namkari.+ Primeiru, liurai Asíria mak han mohu sira,+ tuirmai liurai Nabukodonozór* husi Babilónia mak ruun rahun sira-nia ruin.+ 18 Tan neʼe, Jeová neʼebé ukun tropa lalehan nian, Izraél nia Maromak, dehan nuneʼe: ‘Haʼu sei fó kastigu ba liurai Babilónia no ninia rai hanesan ho kastigu neʼebé uluk haʼu fó ba liurai Asíria.+ 19 No haʼu sei lori Izraél fila fali ba ninia rai neʼebé nakonu ho duʼut matak,+ no nia sei han duʼut iha Karmel no iha Basan.+ Nia sei han toʼo bosu iha foho sira iha Efraim+ no iha Gilead.’”+
20 Jeová dehan: “Iha tempu neʼebá,
Ema sei buka Izraél nia sala,
Maibé sira-nia sala la iha ona.
No ema mós buka Judá nia sala, maibé la hetan,
Tanba haʼu sei fó perdua ba ema sira neʼebé haʼu husik moris.”+
21 “Saʼe bá, ataka rai-Merataim no ema neʼebé hela iha Pekod.+
Oho sira hotu no halakon sira toʼo mohu”, Jeová mak dehan.
“Halo tuir buat hotu neʼebé haʼu haruka ona ba ó.
22 Iha lian funu nian iha rai neʼe,
No dezastre neʼebé boot tebes.
23 Marreta boot neʼebé baku rahun mundu tomak tohar tiha no rahun ona!+
Babilónia sai ona fatin neʼebé halo nasaun hotu taʼuk!+
24 Oh Babilónia, haʼu tau ona lasu ba ó, no ó monu ona ba lasu neʼe,
Maibé ó la hatene ida-neʼe.
Ema hetan ó no kaer tiha ó,+
Tanba ó kontra hasoru Jeová.
25 Jeová loke ona ninia armazén,
No nia foti sai ninia armas hirus nian.+
Tanba Naʼi Ukun-Naʼin Boot Liu, Jeová neʼebé ukun tropa lalehan nian, iha buat ruma neʼebé nia tenke halo
Ba ema Kaldeia sira-nia rai.
26 Imi hotu, mai ataka nia husi fatin dook.+
Loke ninia armazén neʼebé nia rai ai-han.+
Butuk ninia rikusoin sira hanesan butuk trigu.
Halakon nia toʼo mohu.+
Keta husik ema ida moris.
27 Oho tiha ninia karau-aman hotu.+
Lori sira atu bá oho.
Susar ba sira, tanba sira-nia loron toʼo mai ona,
Tempu ba sira atu hetan kastigu!
28 Iha lian husi ema neʼebé halai,
Sira neʼebé halai sai husi rai-Babilónia
Sei fó sai iha Siaun kona-ba ita-nia Maromak Jeová nia kastigu,
Nia selu fali buat neʼebé ema halo ona ba ninia templu.+
Harii tenda haleʼu sidade neʼe; keta husik ema ida halai sai.
Selu fali ba nia tuir buat neʼebé nia halo ona.+
Halo ba nia hanesan buat neʼebé nia halo ona.+
Tanba nia hatudu hahalok foti an hasoru Jeová,
Nia kontra hasoru Izraél nia Maromak neʼebé Santu.+
30 Tan neʼe iha loron neʼebá, ninia mane joven sira sei mate iha sidade nia fatin públiku,+
No ema sei halakon* ninia tropa hotu”, Jeová mak dehan.
31 “Ó neʼebé kontradór,+ haʼu sei kontra ó”,+ Naʼi Ukun-Naʼin Boot Liu, Jeová neʼebé ukun tropa lalehan nian, dehan,
“Tanba ó-nia loron sei toʼo mai, katak tempu neʼebé haʼu sei fó kastigu ba ó.
32 Ó neʼebé kontradór, ó sei sidi no monu,
No la iha ema ida mak sei ajuda ó hamriik fali.+
Haʼu sei sunu ó-nia sidade sira,
No ahi neʼe sei han mohu buat hotu neʼebé haleʼu ó.”
33 Jeová neʼebé ukun tropa lalehan nian, dehan:
“Ema haterus povu Izraél no povu Judá,
No ema hotu neʼebé lori sira nuʼudar dadur,
Ema sira-neʼe kaer metin sira+ no lakohi husik sira.+
34 Maibé Ida neʼebé Sosa Fali sira, nia iha kbiit boot.+
Ninia naran mak Jeová, neʼebé ukun tropa lalehan nian.+
Nia sei defende duni sira-nia kazu,+
Atu bele halo rai neʼe hakmatek+
No atu lori susar ba ema neʼebé hela iha Babilónia.”+
35 Jeová dehan: “Iha surik neʼebé ataka ema Kaldeia sira,
No ataka ema neʼebé hela iha Babilónia, no mós ninia ulun-naʼin no matenek-naʼin sira.+
36 Iha surik neʼebé ataka profeta falsu sira,* no sira sei hatudu hahalok beik.
Iha surik neʼebé ataka ninia funu-naʼin sira, no sira sei sai taʼuk.+
37 Iha surik neʼebé ataka sira-nia kuda no sira-nia kuda-karreta funu nian,
No ataka ema husi rai oioin neʼebé hela iha Babilónia,
No sira sei sai hanesan feto.+
Iha surik neʼebé ataka ninia rikusoin, no ema sei hadau rikusoin sira-neʼe.+
38 Ema sei estraga tiha ninia bee, no ninia bee sei sai maran.+
Tanba rai neʼe nakonu ho estátua,+
No sira sei hatudu nafatin sira-nia hahalok beik tanba haree vizaun neʼebé halo sira taʼuk tebes.
39 Tan neʼe, animál sira iha rai-fuik maran sei hela hamutuk ho animál sira neʼebé hatenu,
No manu-avestrús sira sei hela iha neʼebá.+
Ema sei nunka hela iha Babilónia,
No Babilónia sei nunka sai ema nia hela-fatin husi jerasaun ba jerasaun.”+
40 “Hanesan Sodoma ho Gomorra+ no knua sira neʼebé Maromak halakon mohu tiha ona,+ nuneʼe mós sei la iha tan ema ida mak hela iha Babilónia, no ema ida mós sei la hela metin iha neʼebá”,+ Jeová mak dehan.
41 “Povu ida sei mai husi parte norte.
Nasaun ida neʼebé boot no liurai sira neʼebé kbiit boot+ sei hamriik hodi mai
Husi rai neʼebé dook liu iha mundu neʼe.+
42 Sira uza rama no diman.+
Sira siʼak tebes no sei la hatudu laran-sadiʼa.+
Bainhira sira saʼe sira-nia kuda,
Sira-nia lian hanesan laloran tasi nia lian neʼebé makaʼas,+
Oh Babilónia nia oan-feto, sira sei forma hodi sai ida deʼit atu halo funu hasoru ó.+
Laran-taridu mak domina nia,
Nia sente moras tebes hanesan feto neʼebé atu tuur-ahi.
44 “Hanesan leaun neʼebé sai husi ai-laran iha Mota Jordaun nia ninin, ema ida sei mai ataka sidade Babilónia neʼebé seguru, maibé lakleur deʼit haʼu sei halo sira* halai sai husi rai neʼe. No haʼu sei fó knaar ba ema neʼebé haʼu hili atu ukun rai neʼe.+ Tanba sé mak hanesan haʼu? Sé mak bele kontra hasoru haʼu? Bibi-atan ida-neʼebé mak bele hamriik iha haʼu-nia oin?+ 45 Tan neʼe, oh imi hotu, rona ba desizaun* neʼebé Jeová halo ona kona-ba ema Babilónia+ no buat neʼebé nia hanoin ona kona-ba ema Kaldeia nia rai.
Inimigu sei rasta duni bibi-oan sira ba dook.
Nia sei estraga sira-nia hela-fatin tanba ema Kaldeia sira.+
46 Bainhira inimigu manán Babilónia, sei iha tarutu makaʼas toʼo halo rai nakdoko,
No nasaun sei rona sira-nia lian halerik neʼebé makaʼas tebes.”+
51 Jeová dehan nuneʼe:
2 Haʼu sei haruka ema ba Babilónia,
No sira sei halo nia namkari hanesan ema haliri* trigu no halo rai neʼe sai mamuk.
Iha tempu terus boot, sira sei mai ataka rai neʼe husi sorin-sorin.+
3 Babilónia nia hanadór sira sei la uza* sira-nia rama-inan.
No ninia tropa mós sei la hamriik ho roupa funu nian.
Imi labele hatudu laran-sadiʼa ba ninia mane joven sira.+
Oho tiha ninia tropa hotu.
4 Tropa sira-neʼe sei mate duni iha ema Kaldeia nia rai,
Ema sei sona borus sira iha Babilónia nia dalan sira.+
5 Tanba Maromak Jeová neʼebé ukun tropa lalehan nian la husik Izraél no Judá sai hanesan feto-faluk.+
Maibé Izraél nia Maromak neʼebé Santu haree katak ema Kaldeia nia rai nakonu ho sala.
6 Imi hotu, halai sai husi Babilónia
No salva imi-nia moris bá.+
Keta mate mohu tanba ninia sala sira.
Tanba neʼe mak tempu ba Jeová atu fó kastigu ba nia.
Maromak sei fó kastigu ba nia tuir buat neʼebé nia halo ona.+
7 Uluk Babilónia mak hanesan kopu osan-mean iha Jeová nia liman.
Babilónia halo ona mundu tomak sai lanu.
8 Derrepente deʼit Babilónia monu ona no rahun tiha.+
Tanis halerik bá tanba nia!+
Foti mina-bálsamu atu kose ba ninia moras, karik nia bele sai diʼak fali.”
9 “Ami koko ona atu kura Babilónia, maibé nia la sai diʼak.
Husik tiha nia, no mai ita bá fali ita-nia rai ida-idak.+
Tanba ninia sala sira sai barak tebes toʼo lalehan
No ninia sala sira aas tebes toʼo kalohan.+
10 Jeová lori ona justisa ba ita.+
Mai, mai ita fó sai iha Siaun, buat neʼebé ita-nia Maromak Jeová halo ona.”+
11 “Kose nabilan imi-nia rama-oan.+ Foti imi-nia eskudu kabuar bá.*
Jeová book ona liurai Média sira-nia laran atu ataka Babilónia,+
Tanba nia hakarak halakon rai neʼe.
Neʼe mak Jeová nia kastigu ba Babilónia. Nia selu fali buat neʼebé sira halo ona ba ninia templu.
12 Hiʼit saʼe sinál*+ ida hodi ataka Babilónia nia moru.
Aumenta guarda sira bá, haruka guarda sira hamriik iha sira ida-idak nia fatin.
Prepara ema neʼebé atu halo funu hasoru Babilónia.
Tanba Jeová halo ona planu ida,
No nia sei halo tuir buat neʼebé nia promete ona kontra povu neʼebé hela iha Babilónia.”+
13 “Oh feto neʼebé hela iha bee barak nia leten,+
Ó neʼebé iha rikusoin barak,+
Ó-nia rohan toʼo mai ona, ó labele aumenta tan ó-nia rikusoin.+
14 Jeová neʼebé ukun tropa lalehan nian jura ona hodi ninia an* rasik, dehan:
‘Haʼu sei halo ó-nia rai nakonu ho tropa barak tebes hanesan gafañotu,
No sira sei haklalak ho lian manán nian tanba sira manán ó.’+
15 Nia mak Kriadór neʼebé halo mundu ho ninia kbiit,
Ida neʼebé hametin rai ho ninia matenek+
No Ida neʼebé nahe lalehan hanesan hena ho ninia kbiit atu komprende.+
16 Bainhira nia hasai lian,
Bee iha lalehan sai siʼak,
No nia halo kalohan* sira saʼe husi rai neʼebé dook tebes.
17 Ema hotu hatudu hahalok beik no la iha koñesimentu.
Badaen-besi hotu sei hetan moe tanba estátua neʼebé sira halo,+
Tanba sira-nia estátua besi mak falsu,
18 Estátua hotu neʼebé badaen halo mak folin-laek+ no merese atu ema hatete aat.
Bainhira sira-nia loron kastigu nian toʼo mai, sira sei lakon mohu.
19 Maibé Jacob nia Maromak la hanesan ho estátua sira-neʼe,
Tanba nia mak Ida neʼebé kria buat hotu-hotu,
Ninia naran mak Jeová, neʼebé ukun tropa lalehan nian.”+
20 “Ba haʼu, ó mak haʼu-nia marreta, armas neʼebé haʼu uza atu halo funu,
Tanba haʼu sei uza ó atu baku rahun nasaun sira.
Haʼu sei uza ó atu harahun ukun sira.
21 Haʼu sei uza ó atu baku mate kuda no ema neʼebé saʼe kuda neʼe.
Haʼu sei uza ó atu baku rahun kuda-karreta funu nian no ema neʼebé lori kuda-karreta neʼe.
22 Haʼu sei uza ó atu baku mate mane no feto sira.
Haʼu sei uza ó atu baku mate katuas no labarik-mane sira.
Haʼu sei uza ó atu baku mate mane no feto joven sira.
23 Haʼu sei uza ó atu baku mate bibi-atan no ninia bibi-lubun sira.
Haʼu sei uza ó atu baku mate toʼos-naʼin no ninia animál sira.
Haʼu sei uza ó atu baku mate governadór no administradór sira.
24 No haʼu sei fó kastigu ba Babilónia no ba ema hotu neʼebé hela iha Kaldeia
Tanba buat aat hotu neʼebé sira halo ona iha imi-nia oin iha Siaun”,+ Jeová mak dehan.
Haʼu sei foti liman hasoru ó no duir tun ó husi fatuk boot sira-nia leten
No haʼu sei halo ó sai foho neʼebé ahi han motuk.”
26 “Ema sei la foti fatuk husi ó atu sai fatuk prinsipál* ka fatuk fundasaun,
Tanba ó sei sai fatin neʼebé fuik ba nafatin”,+ Jeová mak dehan.
27 “Hiʼit saʼe sinál* ida iha rai neʼe.+
Huu dikur iha nasaun sira-nia leet.
Hili* nasaun sira atu halo funu hasoru nia.
Haruka nasaun sira iha Ararat,+ Mini no Askenaz+ atu ataka nia.
Fó knaar ba tropa nia ulun-naʼin ida atu hili tan tropa sira neʼebé sei ataka nia.
Lori sai kuda sira hanesan gafañotu lubun boot.
28 Hili* nasaun sira atu halo funu hasoru nia,
Hili liurai sira husi rai-Média,+ ninia governadór no administradór sira hotu
No rai hotu neʼebé iha sira ida-idak nia ukun okos.
29 No rai sei nakdoko no nakdedar,
Tanba Jeová nia hakarak kona-ba Babilónia sei sai loos,
Nia sei halo rai-Babilónia sai fatin neʼebé halo ema taʼuk, fatin neʼebé la iha ema ida mak hela.+
30 Babilónia nia funu-naʼin sira la halo tan funu.
Sira tuur deʼit iha sira-nia fatin seguru.
Sira-nia kbiit lakon tiha ona.+
Sira sai ona hanesan feto.+
Ahi han mohu ona uma sira iha Babilónia.
Ai-lolon neʼebé xave portaun tohar tiha ona.+
31 Ema ida neʼebé lori lia-menon halai atu hasoru ema seluk neʼebé lori lia-menon,
No ema ida halai atu hatoʼo liafuan ba ema seluk,
Atu bele lori lia-menon ba liurai Babilónia katak ema manán ona ninia sidade iha fatin hotu,+
32 Katak inimigu sira hadau ona dalan atu hakur mota sira,+
No sunu ona bero hotu neʼebé halo ho duʼut-papiru,
No tropa sira sai taʼuk tebes.”
33 Tanba Jeová neʼebé ukun tropa lalehan nian, Izraél nia Maromak, dehan nuneʼe:
“Babilónia nia oan-feto mak hanesan fatin sama trigu nian.
Tempu neʼe mak tempu atu sama nia.
Lakleur tan, ninia tempu koʼa nian sei toʼo mai.”
Nia halo haʼu sai hanesan sanan-rai neʼebé mamuk.
Nia tolan tiha haʼu hanesan samea boot ida;+
Nia halo ninia kabun bosu ho haʼu-nia sasán neʼebé diʼak.
Tuirmai nia soe tiha haʼu.*
35 Ema neʼebé hela iha Siaun dehan: ‘Haʼu hein katak violénsia neʼebé Babilónia halo ona ba haʼu no ba haʼu-nia isin-lolon kona fali nia!’+
No Jeruzalein dehan: ‘Haʼu hein katak ema neʼebé hela iha Kaldeia mak lori todan tanba haʼu-nia raan!’”
36 Tan neʼe, Jeová dehan nuneʼe:
Haʼu sei hamaran ninia tasi no halo ninia bee-posu sira sai maran.+
37 Babilónia sei sai fatuk butuk boot,+
No sai asu-xakál sira-nia hela-fatin,+
Ema sei sai taʼuk no hakfuʼik bainhira haree fatin neʼe,
No la iha ema ida mak hela iha neʼebá.+
38 Sira hotu sei hasai lian makaʼas hanesan leaun-aman,
Sira sei hasai lian siʼak hanesan leaun-oan sira.”
39 “Bainhira sira sai manas ona, haʼu sei halo festa ba sira no halo sira lanu,
Atu bele halo sira kontente;+
Tuirmai sira sei toba ba nafatin,
No sira sei la hadeer tan”,+ Jeová mak dehan.
40 “Haʼu sei lori sira hanesan lori bibi-malae oan atu bá oho,
Hanesan lori bibi-malae aman hamutuk ho bibi-timur.”
Babilónia sai ona fatin neʼebé halo nasaun sira taʼuk!
42 Tasi saʼe no taka ona Babilónia tomak.
Tasi nia laloran sira halo nia mout.
43 Ninia sidade sira sai fatin neʼebé halo ema taʼuk, rai-fuik, rai neʼebé maran-dekor.
Rai neʼebé sei la iha ema ida mak hela no la iha ema ida mak laʼo liu iha neʼebá.+
44 Haʼu sei tau atensaun hodi tesi-lia ba Bel+ iha Babilónia,
No haʼu sei hasai buat neʼebé nia tolan ona husi ninia ibun.+
Nasaun sira sei la laʼo nadodon tan ba nia,
No Babilónia nia moru mós sei monu.+
45 Haʼu-nia povu, sai husi ninia leet!+
Halai sai husi nia atu salva imi-nia moris+ husi Jeová nia hirus neʼebé lakan makaʼas!+
46 Keta sai nakdedar ka taʼuk kona-ba lia-menon neʼebé imi rona iha rai neʼe.
Iha tinan ida nia laran, lia-menon neʼe sei toʼo mai,
No tinan tuirmai, lia-menon ida seluk mós sei toʼo mai,
Lia-menon kona-ba violénsia iha rai neʼe no kona-ba ukun-naʼin ida ataka ukun-naʼin seluk.
47 Tan neʼe, tempu sei toʼo mai
Bainhira haʼu tau atensaun hodi tesi-lia ba Babilónia nia estátua sira.
Ninia rai tomak sei hetan moe,
No ninia ema hotu neʼebé inimigu oho sei latan iha ninia leet.+
48 Lalehan no rai no buat sira hotu neʼebé iha laran
Sei haklalak ho haksolok bainhira Babilónia monu,+
Tanba ema sira neʼebé atu halakon Babilónia sei mai husi parte norte”,+ Jeová mak dehan.
49 “Laʼós ema Izraél deʼit mak Babilónia oho,+
Maibé mós ema husi mundu tomak mate iha Babilónia.
50 Imi neʼebé halai sees husi surik, halai nafatin bá, keta para!+
Husi fatin dook, hanoin-hetan nafatin Jeová,
No hanoin fali Jeruzalein iha imi-nia laran.”+
51 “Ami hetan ona moe, tanba ami rona liafuan neʼebé hatún ami.
52 Jeová dehan: “Tan neʼe, tempu sei toʼo mai
Bainhira haʼu tau atensaun hodi tesi-lia ba Babilónia nia estátua sira,
No ema sira neʼebé hetan kanek sei halerik iha ninia rai tomak.”+
53 “Maski karik Babilónia saʼe ba lalehan,+
Ka maski nia hametin ninia uma aas* neʼebé seguru,
Maibé haʼu sei haruka ema bá ataka nia no harahun nia”,+ Jeová mak dehan.
54 “Rona bá! Ema hasai lian halerik iha Babilónia,+
No lian husi dezastre boot iha ema Kaldeia nia rai,+
55 Tanba Jeová sei halakon Babilónia,
No nia sei hamate sira-nia lian neʼebé boot.
Sira-nia inimigu nia lian sei boot hanesan laloran tasi nia lian.
Ema sei rona inimigu sira-neʼe nia lian.
56 Tanba inimigu sira sei mai ataka Babilónia.+
Sira sei kaer Babilónia nia funu-naʼin sira,+
No harahun sira-nia rama-inan,
Tanba Jeová mak Maromak neʼebé fó kastigu.+
Nia sei selu fali duni ema nia hahalok aat.+
57 Haʼu sei halo ninia ulun-naʼin no matenek-naʼin sira lanu,+
Nuneʼe mós ho ninia governadór, administradór no funu-naʼin sira.
Sira sei toba ba nafatin,
No sira sei la hadeer tan”,+ Liurai neʼebé naran Jeová, neʼebé ukun tropa lalehan nian, mak dehan.
58 Jeová neʼebé ukun tropa lalehan nian dehan nuneʼe:
“Maski moru Babilónia nian mak mahar, maibé neʼe sei rahun toʼo uut,+
No maski ninia portaun sira mak aas, maibé ahi sei han.
Maski povu serbisu makaʼas, maibé neʼe saugati deʼit;
Nasaun sira hakole sira-nia an, maibé ahi sei han mohu buat hotu.”+
59 Neʼe mak mandamentu neʼebé profeta Jeremias fó ona ba Nerias+ nia oan-mane Seraias, Masea nia bei-oan, bainhira Seraias bá Babilónia hamutuk ho Liurai Zedequias iha tinan haat husi ninia ukun iha rai-Judá. Seraias mak ema neʼebé tau matan ba liurai nia sasán. 60 Tuirmai, Jeremias hakerek iha livru ida kona-ba terus hotu neʼebé sei akontese ba Babilónia, liafuan hotu neʼebé hakerek iha livru laran neʼe kona-ba Babilónia. 61 Liután neʼe, Jeremias hatete ba Seraias: “Bainhira ó toʼo tiha iha Babilónia no haree ona sidade neʼe, ó tenke lee liafuan sira-neʼe hotu ho lian makaʼas. 62 Tuirmai, ó tenke dehan: ‘Oh Jeová, Ita-Boot dehan ona kona-ba fatin neʼe katak fatin neʼe sei rahun tiha no ema ho animál sira sei la hela tan iha neʼe, no katak sidade neʼe sei sai fatin neʼebé fuik ba nafatin.’+ 63 Bainhira ó lee hotu tiha livru neʼe, ó tenke kesi fatuk ba livru neʼe no soe ba Mota Eufrates. 64 Tuirmai ó tenke hatete: ‘Nuneʼe mak Babilónia sei mout no nunka mosu fali+ tanba susar neʼebé haʼu fó ba nia, no ninia povu sei sai fraku.’”+
Liafuan neʼebé Jeremias hatoʼo mak toʼo iha neʼe deʼit.
52 Zedequias+ tinan 21 bainhira nia sai liurai, no nia ukun iha Jeruzalein durante tinan 11. Ninia inan naran Hamutal,+ Jeremias husi Libna nia oan-feto. 2 Nia kontinua halo buat neʼebé aat tuir Jeová nia haree, hodi halo tuir Jeoquim nia hahalok aat hotu.+ 3 Buat sira neʼebé akontese iha Jeruzalein no iha Judá halo Jeová hirus toʼo soe sira husi ninia oin.+ No Zedequias kontra hasoru liurai Babilónia.+ 4 Ikusmai, iha loron sanulu fulan-sanulu tinan sia husi Zedequias nia ukun, Liurai Nabukodonozór* husi Babilónia ho ninia tropa hotu mai atu ataka Jeruzalein. Sira halo serku ba sidade no harii moru haleʼu sidade.+ 5 Sira kontinua halo serku ba sidade neʼe toʼo tinan 11 husi Liurai Zedequias nia ukun.
6 Iha loron sia fulan-haat,+ ema iha sidade neʼe sai hamlaha tebes tanba la iha tan ai-han ba povu.+ 7 Ikusmai tropa Babilónia sobu moru iha sidade neʼe, no iha kalan bainhira tropa Kaldeia haleʼu hela sidade neʼe, tropa Judá hotu halai sai husi sidade liuhusi portaun neʼebé iha moru rua nia leet besik liurai nia jardín, no sira kontinua halai liuhusi dalan Araba nian.+ 8 Maibé tropa Kaldeia sira duni tuir Liurai Zedequias,+ no sira toman nia iha rai-tetuk maran Jerikó nian, no ninia tropa hotu halai namkari hodi husik hela nia. 9 Tuirmai, tropa Kaldeia sira kaer liurai neʼe no lori nia ba liurai Babilónia iha sidade Ribla iha rai-Hamat, no liurai Babilónia tesi-lia ba Zedequias. 10 No liurai Babilónia oho Zedequias nia oan-mane sira iha Zedequias nia oin, no oho mós rai-Judá nia ulun-naʼin sira hotu iha sidade Ribla. 11 Tuirmai, liurai Babilónia halo Zedequias nia matan sai delek,+ kesi nia ho korrente riti, lori nia ba Babilónia, no hatama nia iha dadur laran toʼo nia mate.
12 Iha loron sanulu fulan-lima tinan 19 husi Liurai Nabukodonozór* nia ukun ba rai-Babilónia, Nebuzaradan, xefe ba guarda sira, neʼebé mós nuʼudar liurai Babilónia nia atan, mai toʼo Jeruzalein.+ 13 Tuirmai, nia sunu Jeová nia uma,+ liurai nia palásiu no uma hotu iha Jeruzalein laran. Nia mós sunu uma boot hotu. 14 No tropa Kaldeia tomak neʼebé hamutuk ho xefe guarda neʼe harahun moru sira neʼebé haleʼu Jeruzalein.+
15 Nebuzaradan, xefe guarda neʼe, kaer povu kiʼik balu no povu restu neʼebé sei hela iha sidade laran, no lori sira hotu nuʼudar dadur* ba Babilónia. Nia mós lori badaen hotu no ema neʼebé rende an ona ba liurai Babilónia.+ 16 Maibé Nebuzaradan, xefe guarda neʼe, husik povu balu neʼebé kiak liu hela iha rai neʼe atu halo serbisu iha toʼos-uvas no mós halo serbisu todan seluk.+
17 No tropa Kaldeia harahun Jeová nia uma nia riin sira neʼebé halo husi riti,+ karrosa riti sira,+ no mós tanke riti neʼebé hanaran Tasi+ iha Jeová nia uma, no sira lori riti hotu ba Babilónia.+ 18 Sira mós foti ahi-kadesan fatin, kanuru boot, besi atu hamate ahi, manko,+ kopu+ no sasán seluk hotu neʼebé halo husi riti, neʼebé uza ba adorasaun iha templu. 19 Xefe guarda neʼe mós foti basia,+ ahi-anar fatin, manko, ahi-kadesan fatin, ahi-oan fatin,+ kopu no manko sira neʼebé halo husi osan-mean no osan-mutin neʼebé moos.+ 20 Maibé kona-ba riin rua neʼebé halo husi riti, tanke neʼebé hanaran Tasi, karau-aman riti 12+ neʼebé iha tanke Tasi nia okos, no karrosa riti sira neʼebé Liurai Salomão halo ona atu uza iha Jeová nia uma, riti sira-neʼe todan demais toʼo tetu mós labele.
21 Kona-ba riin sira, riin ida-idak aas metru 8,* no bainhira sukat haleʼu riin ida-idak neʼe ho tali, ninia naruk metru 5 ho balu;*+ riin neʼe nia laran mamuk maibé ninia riti mahar maizumenus sentímetru 7.* 22 Buat neʼebé enfeita besi-riin nia ulun mós halo husi riti, ninia aas metru 2 ho sentímetru 22,*+ no rede ho romaun-fuan neʼebé enfeita haleʼu riin nia ulun mós halo husi riti. Nuneʼe mós ho besi-riin segundu no ninia romaun-fuan sira neʼebé haleʼu. 23 Iha romaun-fuan 96 neʼebé haleʼu besi-riin nia ulun;* maibé loloos iha romaun-fuan hamutuk 100 mak haleʼu rede neʼe.+
24 Tuirmai, xefe guarda neʼe mós kaer amlulik boot Seraias,+ amlulik segundu naran Sofonias,+ no mós guarda naʼin-tolu neʼebé hein odamatan.+ 25 Nia mós kaer ema-boot ida neʼebé serbisu iha palásiu, neʼebé mak ulun-naʼin ba tropa sira, no mós liurai nia konsellu-naʼin naʼin-hitu neʼebé nia hetan iha sidade laran. Nia mós kaer xefe tropa nia sekretáriu neʼebé iha knaar atu halibur povu, ho mane baibain naʼin-60 neʼebé nia hasoru iha sidade laran. 26 Nebuzaradan, xefe guarda neʼe, kaer ema sira-neʼe no lori ba liurai Babilónia iha sidade Ribla. 27 Tuirmai liurai Babilónia oho ema sira-neʼe iha sidade Ribla+ iha rai-Hamat. Nuneʼe mak ema lori povu Judá sai husi sira-nia rai nuʼudar dadur.+
28 Tuirmai neʼe mak ema neʼebé Nabukodonozór* lori ona nuʼudar dadur: iha tinan hitu husi ninia ukun nuʼudar liurai, ema Judeu naʼin-3.023 mak sai dadur.+
29 Iha tinan 18 husi Nabukodonozór* nia ukun nuʼudar liurai,+ ema lori povu* naʼin-832 husi Jeruzalein nuʼudar dadur.
30 Iha tinan 23 husi Nabukodonozór* nia ukun nuʼudar liurai, Nebuzaradan, xefe guarda neʼe, lori ema Judeu hamutuk naʼin-745 nuʼudar dadur.+
Ema sira-neʼe hotu sura hamutuk naʼin-4.600 mak sai dadur.
31 Ikusmai, iha loron 25 fulan-12 tinan 37, husi tempu neʼebé Liurai Joaquim+ husi rai-Judá sai dadur, Liurai Evil-Merodak, neʼebé sai liurai ba rai-Babilónia iha tinan neʼe, nia halo Liurai Joaquim husi rai-Judá sai livre* hodi hasai nia husi komarka laran.+ 32 Liurai Evil-Merodak koʼalia ho laran-diʼak ba Joaquim, no fó nia pozisaun* aas liu fali liurai seluk neʼebé hamutuk ho nia iha Babilónia. 33 Nuneʼe, Joaquim hasai ninia roupa dadur nian, no iha ninia moris tomak, nia han iha liurai nia meza. 34 Iha Joaquim nia moris tomak, loroloron nia simu ai-han husi liurai Babilónia, toʼo loron neʼebé nia mate.
Karik naran neʼe katak “Jeová foti saʼe aas”.
Haree “Ezíliu” iha Glosáriu.
Ka “hili”.
Orj., “antes ó sai husi knotak”.
Ka “haʼu halo santu ona ó”. Haree “Halo santu” iha Glosáriu.
Ka “labarik”.
Orj., “ida neʼebé hadeer hela”.
Orj., “huu bá”. Neʼe katak ahi neʼebé kehe hela iha okos.
Ka “sunu sakrifísiu hodi halo suar”.
Orj., “kesi ó-nia knotak”.
Ka “ó-nia domin neʼebé laran-metin”.
Ka “ídolu”. Haree Glosáriu.
Ka “no rai neʼebé iha lalatak metan”.
Ka “rai sira besik tasi”.
Haree Glosáriu.
Ka “Menfis”.
Neʼe mak mota ida neʼebé suli husi Mota Nilo.
Orj., “Mota”.
Ka “prostituta”.
Ka “álkali”.
Ka “ba ema neʼebé haʼu la koñese”.
Orj., “oan-mane”.
Ka “hena neʼebé kesi iha ninia hirus-matan”.
Ka “saia”.
Haree “Nefes” iha Glosáriu.
Ka “Ó halo prostituisaun ho”.
Orj., “ema Arábia ida”.
Ka “hahalok prostituisaun”.
Orj., “reen-toos”.
Haree Glosáriu.
Karik neʼe refere ba Izraél.
Haree Glosáriu.
Ka “maromak husi rai seluk”.
Ka karik “imi-nia laʼen”.
Orj., “nia maluk”.
Ka “buat”.
Ka “ó-nia ídolu sira neʼebé foʼer tebes”.
Ka “sei hetan bensaun ba sira-nia an”.
Haree Glosáriu.
Ka “halo sirkunsizaun ba”.
Ka “Harii ai-riin sinál nian”.
Haree “Hena karón” iha Glosáriu.
Ka “Baku imi-nia hirus-matan”.
Ka “surik toʼo ona ami”. Haree “Nefes” iha Glosáriu.
Liafuan “oan-feto” uza iha poezia atu hatudu sentimentu kuitadu ba povu.
Haree Glosáriu.
Neʼe refere ba ema sira neʼebé hafuhu sidade hodi deside bainhira mak tempu diʼak atu ataka.
Orj., “haʼu-nia tee-oan”. Neʼe refere ba emosaun neʼebé kleʼan liu.
Ka karik “hakilar funu nian”.
Ka “ai-riin sinál nian”.
Ka “la sente triste”.
Orj., “sira la sai fraku”.
Neʼe mak animál neʼebé siʼak no han animál seluk.
Haree Glosáriu.
Ka “prostituta”.
Haree “Nefes” iha Glosáriu.
Ka karik “Nia la iha”.
Neʼe katak sai hanesan sira-nia liafuan neʼebé mamuk.
Ka “maromak husi rai seluk”.
Udan primeiru komesa maizumenus iha fulan-Outubru nia klaran no udan ikus komesa maizumenus iha fulan-Abríl nia klaran. Haree Ap. B15.
Ka “labarik neʼebé la iha aman”.
Orj., “oan-mane”.
“Siaun nia oan-feto” mak liafuan poezia neʼebé baibain refere ba sidade Jeruzalein ka povu neʼebé hela iha Jeruzalein.
Orj., “Halo santu funu”.
Ka “torre”. Haree Glosáriu.
Haree Glosáriu.
Ka “fresku”.
Haree “Nefes” iha Glosáriu.
Orj., “Sira-nia tilun seidauk hetan sirkunsizaun”.
Ka “haʼu-nia povu nia kanek; tohar”.
Ka “kura bosok deʼit”.
Ka “hanorin”.
Ka “hadeer”.
Orj., “moras”.
Haree “Hena karón” iha Glosáriu.
Neʼe katak Jeremias.
Haree Glosáriu.
Orj., “Sira mak”. Neʼe refere ba uma hotu neʼebé iha templu.
Ka “labarik neʼebé la iha aman”.
Ka “husi uluk kedas toʼo la iha rohan”.
Haree Glosáriu.
Ka “sunu sakrifísiu ba Baal hodi halo suar”.
Orj., “sempre hadeer sedu iha dadeer no koʼalia”.
Neʼe katak Jeremias.
Neʼe mak títulu ba maromak-feto ida neʼebé ema Izraél adora hodi husik tiha Maromak Jeová. Karik sira fiar maromak-feto neʼe mak fó bensaun ba sira atu iha oan barak.
Ka “sadik; halo laran-kanek”.
Ka “konsellu sira”
Orj., “loroloron hadeer sedu iha dadeer no haruka”.
Neʼe refere ba Siaun, ka Jeruzalein.
Ka “fuuk neʼebé sai símbolu ba ó-nia dedikasaun”.
Ka “knananuk lelir nian”.
Ka “sira-nia ídolu sira neʼebé foʼer tebes”.
Haree “Fatin aas” iha Glosáriu.
Orj., “Foho-Leet Hinom nia Oan-Mane”. Haree “Gehena” iha Glosáriu.
Ka “nunka tama iha haʼu-nia laran”.
Orj., “Foho-Leet Hinom nia Oan-Mane”. Haree “Gehena” iha Glosáriu.
Orj., “tropa lalehan nian”.
Ka “estrume”.
Ka “tempu neʼebé deside ona”.
Ka karik “manu-grou”.
Ka “halo migrasaun”.
Ka “hanorin”.
Ka “sekretáriu”.
Haree Glosáriu.
Ka “bosok”.
Ka “haʼu-nia povu nia oan-feto nia kanek; tohar”.
Ka “kura bosok deʼit”.
Ka “tempu veraun”.
Ka “mina neʼebé halo kmaan”.
Haree Glosáriu.
Neʼe refere ba uza ahi hodi halo besi nabeen atu hasai foʼer.
Ka “knananuk lelir nian”.
Ka “hanorin”.
Ka “knananuk lelir nian”.
Ka “knananuk lelir nian”.
Ka “torre”.
Ka “estrume”.
Haree Glosáriu.
Ka “bahat”.
Neʼe refere ba boneka neʼebé ema tau iha toʼos atu halo taʼuk manu sira.
Iha testu orijinál, ver. 11 neʼe hakerek iha lian Aramaiku.
Ka “bee suar”.
Ka karik “Nia halo odamatan ba”.
Ka “iis”. Haree “Ruah” iha Glosáriu.
Ka “tuda”.
Ka “haʼu-nia kanek; tohar”.
Ka “podér; direitu”.
Ka “podér; direitu”.
Liafuan neʼe karik koʼalia ba Jeremias.
Ka “Sai nuneʼe bá”.
Orj., “sempre hadeer sedu iha dadeer no hanorin”.
Ka “sunu sakrifísiu hodi halo suar”.
Ka “buat”.
Neʼe katak Jeremias.
Neʼe katak sakrifísiu neʼebé hasaʼe iha templu.
Ka “sentimentu neʼebé kleʼan”. Orj., “rins”.
Ka “sentimentu neʼebé kleʼan”. Orj., “rins”.
Ka “kór riska-riska”.
Ka karik “Nia halerik”.
Ka “dalan hotu neʼebé uza beibeik ona”.
Ka “ba señora”.
Ka “tuur iha fatin neʼebé iha kraik”.
Ka “Ema halo serku ona ba sidade sira iha parte súl”.
Haree “Ezíliu” iha Glosáriu.
Ka “Etiópia”.
Haree Glosáriu.
Ka “halo prostituisaun”.
Ka “lori moe”.
Ka “kiʼikoan”.
Ka “tanke; bee-matan”.
Neʼe bele refere mós ba sevada. Haree “Sakrifísiu trigu nian” iha Glosáriu.
Haree Glosáriu.
Haree “Nefes” iha Glosáriu.
Haree “Nefes” iha Glosáriu.
Ka karik “tesi-lia oin haat”. Orj., “família haat”.
Ka karik “kontinua laʼo ba kotuk”.
Ka “Haʼu sente kole ona atu hanoin ó”.
Haree Glosáriu.
Orj., “portaun”.
Haree “Nefes” iha Glosáriu.
Ka karik “Ninia loro-matan sente sala no sai moe ona”.
Ka “Haʼu sei halo diʼak ba ó”.
Ka “liafuan tesi-lia nian”.
Ka “sai hanesan haʼu-nia ibun rasik”.
Ka “estrume”.
Nasaun seluk tuir kostume sira-neʼe bainhira ema mate no ema Izraél mós halo tuir tanba fila kotuk ona ba Maromak.
Orj., “haree sira-nia dalan hotu”.
Orj., “ho estátua nia mate-isin”.
Ka “ídolu sira neʼebé foʼer tebes”.
Orj., “lia-bosok; buat falsu”.
Haree Glosáriu.
Neʼe mak fatuk-murak ida neʼebé toos liu fatuk sira seluk.
Haree “Ai-riin lulik” iha Glosáriu.
Ka karik “Tanba haʼu-nia hirus mak imi sunu lakan ona hanesan ahi”.
Ka “mane forte”.
Ka “mane forte”.
Ka “lohidór”.
Ka karik “kura labele”.
Ka “sentimentu neʼebé kleʼan”. Orj., “rins”.
Ka “la tuir justisa”.
Ka “Sira neʼebé sai apóstata hodi kontra haʼu”. Liafuan “haʼu” karik refere ba Jeová.
Ka “halakon sira ba dala rua”.
Orj., “portaun ba povu nia oan-mane sira”.
Ka “parte súl”.
Neʼe bele refere mós ba sevada. Haree “Sakrifísiu trigu nian” iha Glosáriu.
Ka “torre”.
Ka “sei sente triste”.
Ka “sei sente triste”.
Ka “forma”.
Ka “sunu sakrifísiu hodi halo suar”.
Ka “seidauk ateru”.
Ka “hanorin”.
Haree “Nefes” iha Glosáriu.
Orj., “Foho-Leet Hinom nia Oan-Mane”.
Orj., “ema hotu nia tilun neʼebé rona kona-ba neʼe sei makili”.
Ka “no nunka tama iha haʼu-nia laran”.
Orj., “Foho-Leet Hinom nia Oan-Mane”.
Orj., “tropa lalehan nian”.
Haree Glosáriu.
Haree “Ezíliu” iha Glosáriu.
Ka “sentimentu neʼebé kleʼan”. Orj., “rins”.
Ka “ninia oan-fatin”.
Orj., “Nabukodorozór”.
Ka “fila fali ba”.
Haree Glosáriu.
Orj., “Nabukodorozór”.
Orj., “haʼu see oin atu kontra sidade neʼe”.
Ka “labarik neʼebé la iha aman”.
Orj., “halo santu”.
Ninia naran seluk mak Jeoacaz.
Haree “Ezíliu” iha Glosáriu.
Ver. 13-17 refere ba Jeoquim, liurai ba rai-Judá.
Karik Jeremias hatoʼo orden neʼe ba Jeruzalein.
Orj., “Moras”.
Ninia naran seluk mak Joaquim no Jeconias.
Haree “Kadeli selus” iha Glosáriu.
Orj., “Nabukodorozór”.
Ka “bei-oan ida”.
Ka “ema neʼebé la laran-metin ba Maromak”. Haree “Adultériu” iha Glosáriu.
Ka “sai apóstata”.
Haree Glosáriu.
Orj., “Sira halo ema aat nia liman sai forte”.
Ka “ema hotu iha rai neʼe sai apóstata”.
Ka “Sira halo imi-nia laran nakonu ho esperansa neʼebé mamuk”.
Ka “Lia-menon neʼebé halo todan”. Liafuan Ebraiku neʼe bele signifika “lia-menon neʼebé todan husi Maromak” ka “buat neʼebé todan”.
Orj., “Nabukodorozór”.
Ninia naran seluk mak Joaquim no Konias.
Ka karik “badaen neʼebé harii moru”.
Haree “Ezíliu” iha Glosáriu.
Neʼe mak figeira-fuan neʼebé ema kuʼu primeiru, bainhira tinan komesa.
Haree Glosáriu.
Orj., “Nabukodorozór”.
Ka “ba”.
Orj., “sempre hadeer sedu iha dadeer no koʼalia”.
Orj., “sempre hadeer sedu iha dadeer no haruka sira”.
Orj., “família”.
Orj., “Nabukodorozór”.
Neʼe mak títulu ba liurai sira iha rai-Ejitu.
Karik neʼe mak naran-kódigu ba Babel, ka Babilónia.
Ka “estrume”.
Orj., “bibi-lubun”.
Orj., “bibi-lubun”.
Orj., “bibi-lubun”.
Haree Glosáriu.
Ka “ba”.
Ka “hakruʼuk ba”.
Ka “sei sente triste”.
Ka “hanorin”.
Orj., “sempre hadeer sedu iha dadeer no haruka ba imi”.
Ka “sei sente triste”.
Haree Glosáriu.
Ka “templu”.
Ka “koko atu halo mamar Jeová nia oin”.
Ka “sente triste”.
Neʼe katak oho Jeremias.
Haree Glosáriu.
Haree Glosáriu.
Orj., “deskansa”.
Neʼe katak tanke riti atu rai bee iha templu.
Haree “Ezíliu” iha Glosáriu.
Haree “Ezíliu” iha Glosáriu.
Ka “Sai nuneʼe bá!”
Ka “ba ó-nia tilun no ba povu hotu nia tilun”.
Haree Glosáriu.
Ka “ai-leba husi besi”.
Ka “ai-leba husi besi”.
Haree “Ezíliu” iha Glosáriu.
Ka “señora”.
Ka karik “badaen neʼebé harii moru”.
Haree Glosáriu.
Ka karik “nakfera”.
Orj., “sempre hadeer sedu iha dadeer no haruka sira”.
Orj., “Nabukodorozór”.
Ka “halo adultériu”. Haree “Adultériu” iha Glosáriu.
Ka “kabun”.
Orj., “loron neʼebé boot”.
Ka “ema oin-foun”.
Ka “nia”.
Ka “korrije”.
Ka “torre”.
Ka karik “halo ema respeitu sira”.
Ka “haʼu kontinua hatudu domin neʼebé laran-metin ba ó”.
Ka “foti fali buat neʼebé ninian”.
Ka “tanba Jeová fó buat neʼebé diʼak”.
Ka “oan sira”.
Orj., “haʼu-nia tee-oan”. Haree nota iha Jer 4:19.
Ka karik “sira-nia laʼen”.
Ka “ukun-fuan”.
Ka “Torre”.
Neʼe mak ahi-kadesan neʼebé kahur ona ho mina husi naʼan bokur husi sakrifísiu sira.
Orj., “Nabukodorozór”.
Neʼe katak tiu husi ninia aman nia família.
Orj., “siklo 7 no osan-mutin 10”. Haree Ap. B14.
Haree Glosáriu.
Orj., “ba oan-mane sira-nia hirus-matan”.
Ka “hakarak”.
Haree Glosáriu.
Orj., “Nabukodorozór”.
Orj., “sempre hadeer sedu iha dadeer no hanorin”.
Ka “sira-nia ídolu sira neʼebé foʼer tebes”.
Orj., “Foho-Leet Hinom nia Oan-Mane”. Haree “Gehena” iha Glosáriu.
Orj., “halo sira-nia oan-mane no oan-feto liu husi ahi”.
Haree Glosáriu.
Ka “nunka tama iha haʼu-nia laran”.
Haree “Nefes” iha Glosáriu.
Ka “hatudu laran-diʼak”.
Ka “bei-oan ida”.
Neʼe bele refere mós ba sevada. Haree “Sakrifísiu trigu nian” iha Glosáriu.
Orj., “tropa lalehan nian”.
Orj., “Nabukodorozór”.
Orj., “Ohin loron”.
Haree Glosáriu.
Neʼe mak toman iha tempu antigu atu legaliza aliansa.
Ka “kuartu”.
Orj., “Jonadab”. Neʼe mak naran badak ba Jeonadab.
Orj., “Jonadab”. Neʼe mak naran badak ba Jeonadab.
Orj., “Nabukodorozór”.
Orj., “sempre hadeer sedu iha dadeer no koʼalia”.
Orj., “sempre hadeer sedu iha dadeer no haruka sira”.
Orj., “Jonadab”. Neʼe mak naran badak ba Jeonadab.
Ka “livru”. Haree “Surat-tahan lulun” iha Glosáriu.
Ka “kuartu”.
Haree Glosáriu.
Neʼe katak husi fulan-Novembru nia klaran toʼo fulan-Dezembru nia klaran. Haree Ap. B15.
Karik nia husi liurai nia umakain.
Ninia naran seluk mak Joaquim no Jeconias.
Orj., “Nabukodorozór”.
Orj., “hatama nia iha uma korrente nian”.
Orj., “uma tanke bee nian”.
Haree Glosáriu.
Orj., “neʼebé sai”.
Orj., “halo fraku tropa sira-nia liman”.
Haree Glosáriu.
Ka “eunuku”. Haree Glosáriu.
Haree “Nefes” iha Glosáriu.
Ka “mane sira neʼebé iha dame ho ó”.
Orj., “Nabukodorozór”.
Neʼe mak títulu.
Ka “xefe ba ema-boot sira iha palásiu”.
Tuir testu Ebraiku bele mós fahe hanesan tuirmai “Nergal-Sarezer, Sangar-Nebo, Sarsekim, Rabsaris”.
Ka “xefe ba matan-dook sira (sira neʼebé estuda astrolojia)”.
Orj., “Nabukodorozór”.
Haree “Ezíliu” iha Glosáriu.
Ka karik “serbisu neʼebé nia obriga sira atu halo”.
Orj., “Nabukodorozór”.
Ka “xefe ba ema-boot sira iha palásiu”.
Ka “xefe ba matan-dook sira (sira neʼebé estuda astrolojia)”.
Haree “Ezíliu” iha Glosáriu.
Orj., “atu hamriik”.
Liuliu figeira-fuan no karik mós palmeira-fuan.
Liuliu figeira-fuan no karik mós palmeira-fuan.
Neʼe bele refere mós ba sevada. Haree “Sakrifísiu trigu nian” iha Glosáriu.
Haree Glosáriu.
Ka karik “kolan boot”.
Ka “hanoin fali”.
Ka “hela duni ba tempu badak iha neʼebá”.
Haree Glosáriu.
Haree nota iha Núm 14:44.
Haree “Ezíliu” iha Glosáriu.
Haree “Nefes” iha Glosáriu.
Neʼe refere ba tijolu neʼebé halo husi duʼut-maran kahur ho tahu ka rai-mean.
Orj., “Nabukodorozór”.
Haree Glosáriu.
Orj., “sai husi neʼebá ho dame”.
Ka “Uma (Templu) ba Loro-Matan”, neʼe katak Heliópolis.
Ka “Menfis”.
Orj., “sempre hadeer sedu iha dadeer no haruka sira”.
Orj., “sira”.
Ka “la sente triste”.
Haree Glosáriu.
Neʼe mak títulu ba maromak-feto ida neʼebé ema Izraél adora hodi husik tiha Maromak Jeová. Karik sira fiar maromak-feto neʼe mak fó bensaun ba sira atu iha oan barak.
Neʼe mak títulu ba maromak-feto ida neʼebé ema Izraél adora hodi husik tiha Maromak Jeová. Karik sira fiar maromak-feto neʼe mak fó bensaun ba sira atu iha oan barak.
Neʼe mak títulu ba maromak-feto ida neʼebé ema Izraél adora hodi husik tiha Maromak Jeová. Karik sira fiar maromak-feto neʼe mak fó bensaun ba sira atu iha oan barak.
Neʼe mak títulu ba maromak-feto ida neʼebé ema Izraél adora hodi husik tiha Maromak Jeová. Karik sira fiar maromak-feto neʼe mak fó bensaun ba sira atu iha oan barak.
Orj., “Nabukodorozór”.
Ka “hein nafatin ba”.
Orj., “Nabukodorozór”.
Neʼe mak eskudu neʼebé baibain hanadór sira uza.
Orj., “sama”.
Ka “sei oho”.
Orj., “Nabukodorozór”.
Ka “Menfis”.
Orj., “tempu neʼebé deside tiha ona”.
Neʼe katak ema neʼebé sei manán rai-Ejitu.
Haree “Ezíliu” iha Glosáriu.
Ka “Menfis”.
Ka karik “fatin neʼe sei sai fuik no aat”.
Ka “hili ai”.
Neʼe katak Tebas.
Orj., “Nabukodorozór”.
Ka “korrije”.
Neʼe katak Kreta.
Neʼe katak sira sei koi sira-nia fuuk tanba moe no triste.
Ka “fatin aas”.
Haree Glosáriu.
Ka “rai-tetuk”.
Ka karik “tuur iha rai neʼebé maran”.
Orj., “dikur”.
Liuliu figeira-fuan no karik mós palmeira-fuan.
Ka “haʼu-nia laran la hakmatek”.
Neʼe katak flauta neʼebé ema huu iha mate-uma.
Ka “haʼu-nia laran la hakmatek”.
Neʼe katak flauta neʼebé ema huu iha mate-uma.
Haree “Hena karón” iha Glosáriu.
Haree Glosáriu.
Ka karik “hakilar funu nian”.
Ka “sidade kiʼik sira neʼebé haleʼu”.
Haree “Hena karón” iha Glosáriu.
Ka “iha luhan neʼebé halo husi fatuk”.
Ka “labarik sira neʼebé la iha aman”.
Haree nota iha Núm 14:44.
Karik neʼe refere ba ema Edom.
Ka “konsellu”.
Orj., “torre sira neʼebé seguru”.
Orj., “Nabukodorozór”.
Orj., “Nabukodorozór”.
Orj., “anin”.
Orj., “anin”.
Ka “Harii ai-riin sinál nian”.
Haree Glosáriu.
Ka “ninia ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
Orj., “hela-fatin”.
Orj., “imi hotu neʼebé sama rama-inan”.
Orj., “Nabukodorozór”.
Orj., “Imi hotu neʼebé sama rama-inan”.
Orj., “sei halo nonook”.
Ka “ema neʼebé koʼalia liafuan mamuk”.
Karik neʼe refere ba ema Babilónia.
Ka “konsellu”.
Karik neʼe mak naran-kódigu ba Kaldeia.
Haree Glosáriu.
Orj., “sama”.
Ka karik “halo nakonu rama-fatin”.
Ka “ai-riin sinál nian”.
Haree “Nefes” iha Glosáriu.
Ka “abuabu”.
Ka karik “Nia halo odamatan ba”.
Ka “iis”. Haree “Ruah” iha Glosáriu.
Ka karik “Nia kria ai-tonka husi ninia liman-rohan”.
Ka “fatuk neʼebé tau iha uma nia lidun”.
Ka “ai-riin sinál nian”.
Orj., “Halo santu”.
Orj., “Halo santu”.
Orj., “Nabukodorozór”.
Iha neʼe, Jeremias koʼalia hodi reprezenta Jeruzalein no Judá.
Ka “hasai haʼu ho bee”.
Karik neʼe mak naran-kódigu ba Babel, ka Babilónia.
Ka “ema oin-foun”.
Ka “torre”.
Orj., “Nabukodorozór”.
Orj., “Nabukodorozór”.
Haree “Ezíliu” iha Glosáriu.
Orj., “kóvado 18”. Haree Ap. B14.
Orj., “kóvado 12”.
Orj., “liman-fuan haat nia luan”. Haree Ap. B14.
Orj., “kóvado 5”.
Ka “neʼebé ema bele haree iha besi-riin nia ulun”.
Orj., “Nabukodorozór”.
Orj., “Nabukodorozór”.
Haree “Nefes” iha Glosáriu.
Orj., “Nabukodorozór”.
Ka “nia hiʼit saʼe Liurai Joaquim nia ulun”.
Ka “fó nia kadunan neʼebé”.