Introdusaun

Livru Eskritura sira neʼebé Ajuda Ita-nia Moris sei halo fasil ba ita atu buka eskritura no istória husi Bíblia neʼebé bele ajuda ita kuandu hasoru susar oioin. Neʼe mós ajuda ita hetan eskritura neʼebé diʼak atu enkoraja ema seluk no ajuda sira halo desizaun neʼebé lori hahiʼi ba Jeová. Kuandu Ita hetan tópiku neʼebé Ita presiza, haree toʼok pergunta sira no ezemplu husi Bíblia. (Haree kaixa “Oinsá atu uza livru neʼe”.) Ita sei hetan eskritura sira neʼebé sai nuʼudar konsellu, matadalan, no fó kmaan ba Ita. Ita mós bele hetan prinsípiu husi Maromak nia Liafuan Bíblia neʼebé Ita bele uza atu enkoraja no ajuda ema seluk.

Oinsá atu uza livru neʼe

Atu hetan tópiku ida, Ita bele uza kaixa “buka”, ka Ita bele haree tuir kategoria sira. Ami fahe lista ba tópiku sira iha kategoria hitu: Susar sira, Ema nia toman, Kongregasaun, Moris loroloron nian, Moris família nian, Relasaun ho Jeová, no Hahalok sira. Hili kategoria ida no haree lista ba tópiku sira. Maibé se Ita la hatene tópiku neʼebé Ita buka mak iha kategoria saida, Ita bele uza lista husi Tópiku hotu hodi nuneʼe Ita bele hetan tópiku neʼebé Ita presiza. Iha tópiku ida-idak, Ita sei hetan subtópiku. Balu mak fraze no balu mak pergunta. Ita bele lee eskritura sira neʼebé hakerek ho letra mahar, no hanoin didiʼak oinsá eskritura ida-idak iha ligasaun ho tópiku ka resposta ba pergunta neʼe. Tópiku balu fahe ba parte oioin hodi halo fasil ba Ita atu hetan informasaun neʼebé Ita presiza. Dala ruma iha mós parte “Haree mós” ho eskritura balu tan. Neʼe mak eskritura sira neʼebé liga ho tópiku. Iha mós parte “Ezemplu husi Bíblia” neʼebé fó sai eskritura no esplikasaun. Neʼe sei ajuda Ita atu medita kona-ba pontu importante ka lisaun husi eskritura neʼebé Ita lee.

Klaru katak livru neʼe la fó sai eskritura barak iha tópiku ida-idak, maibé ita bele halo peskiza hodi uza livru neʼe hamutuk ho publikasaun sira seluk. (Prv 2:1-6) Atu bele keʼe kleʼan liután, ami anima Ita haree referénsia marjinál no nota sira iha Bíblia Sagrada Tradusaun Mundu Foun. Ita mós bele uza Livru atu ajuda Testemuña ba Jeová buka informasaun hodi buka-hatene signifikadu husi eskritura ida no oinsá bele aplika. Hakaʼas an atu komprende esplikasaun neʼebé foun liu kona-ba lia-loos husi Bíblia.

Ami hein katak livru Eskritura sira neʼebé Ajuda Ita-nia Moris sei ajuda ita atu hetan matenek, koñesimentu, no kumpriensaun husi Bíblia. Nuʼudar ita uza livru neʼe, ita-nia fiar sei metin liután katak ‘Maromak nia liafuan mak moris no iha kbiit boot’.—Ebr 4:12.