Koʼalia lia-loos ho laran-diʼak

1. Saida mak ita tenke halo atu bele sai parte ba Jeová nia família?

BAINHIRA ba dala primeiru ita hasoru malu ho maluk fiar-naʼin ida, pergunta ida neʼebé ita husu ba malu mak, “Oinsá mak Ita aprende lia-loos?” Ema balu hatete katak sira “boot iha lia-loos”. Balu fali hatete katak sira foin mak “tama lia-loos”. Ita hatán iha dalan hanesan neʼe tanba lia-loos husi Bíblia fó influénsia ba ita-nia moris tomak. Ita hatene katak ita bele sai parte ba Jeová nia família só deʼit kuandu ita prova katak ita hadomi lia-loos no moris tuir ida-neʼe. Neʼe inklui hatudu laran-moos liuhusi ita-nia liafuan no hahalok.—Sal 15:​1-3.

2. (a) Ema hanoin saida kona-ba Jesus? (b) Ema nia reasaun kona-ba Jesus nia mensajen mak oinsá?

² Jesus sempre koʼalia lia-loos. Ninia inimigu sira hatete katak nia mak onestu maski sira la gosta buat neʼebé nia koʼalia. (Mt 22:16) Kona-ba ema nia reasaun ba buat neʼebé Jesus hanorin, nia hatete: “Haʼu mai atu haketak ema: oan-mane sei kontra ninia aman, oan-feto sei kontra ninia inan, no feto-foun sei kontra ninia banin-feto.” (Mt 10:35) Jesus lakohi atu ema hatudu reasaun negativu ba mensajen neʼebé nia no ninia dixípulu sira fó sai, maibé nia hatene katak neʼe sei akontese duni. (Mt 23:37) Nia hatene katak ema sei hatudu reasaun iha dalan rua neʼebé diferente. Ema balu sei simu ninia mensajen no balu lae.—2 Tes 2:​9-11.

3. Iha lisaun neʼe, ita sei koʼalia kona-ba saida?

³ Hanesan Jesus, ita koko atu onestu no koʼalia lia-loos iha tempu hotu maski dala ruma ema la gosta. Ita haklaken no hanorin lia-loos husi Bíblia maski ema balu la kontente ho ita. Maibé, neʼe la dehan katak ita la presiza hanoin kona-ba oinsá no bainhira mak ita koʼalia lia-loos! Iha lisaun neʼe, ita sei hatán ba pergunta: Iha neʼebé mak ita bele hetan lia-loos? Tanbasá, oinsá, no bainhira mak ita presiza koʼalia kona-ba lia-loos husi Bíblia? Resposta ba pergunta sira-neʼe sei ajuda ita aumenta liután ita-nia abilidade atu koʼalia kona-ba lia-loos ho respeitu, matenek, no iha tempu neʼebé loos.

IHA NEʼEBÉ MAK ITA BELE HETAN LIA-LOOS?

4. Tanbasá ita bele dehan katak Jeová mak Hun ba lia-loos?

⁴ Jeová mak Hun ba lia-loos. Buat hotu neʼebé nia koʼalia mak loos. Porezemplu, ninia liafuan kona-ba saida mak loos no sala mak realidade duni. (Sal 19:9; 119:​142, 151) Buat hotu neʼebé nia hatete kona-ba futuru sei sai loos. (Isa 55:​10, 11) Nia sempre kumpre ninia promesa. (Núm 23:19) Tuir loloos, Jeová nunka bosok! (Ebr 6:18) Sin, Jeová mak “Maromak lia-loos nian”.—Sal 31:5.

5. Tanbasá la susar atu buka-hatene “Maromak lia-loos nian”? Esplika toʼok. (Apóstolu 17:27)

⁵ Ema balu hanoin katak susar atu buka-hatene kona-ba Jeová, “Maromak lia-loos nian”. Maibé hanoin neʼe la loos. Kriasaun hotu fó prova katak Maromak iha. (Rom 1:20) Bainhira apóstolu Paulo koʼalia ba ema Atenas sira neʼebé matenek, nia hatete katak Maromak hakarak ita atu “buka nia” no “nia la dook husi ita ida-idak”. (Lee Apóstolu 17:27.) Tuir loloos, Jeová mak dada ema neʼebé ho haraik an buka lia-loos kona-ba nia.—João 6:44.

6. Lia-loos balu saida mak hakerek iha Bíblia, no tanbasá Ita agradese hodi hatene kona-ba neʼe?

⁶ Dalan ida atu buka-hatene Jeová mak hodi estuda Bíblia. Maromak mak uza ninia espíritu santu hodi dirije ema atu hakerek Bíblia. (2 Ped 1:​20, 21) Tan neʼe, buat hotu neʼebé hakerek iha Bíblia mak lia-loos no ita bele tau fiar. Porezemplu, ita bele fiar saida mak Bíblia hatete kona-ba oinsá universu no moris hahú. (Gén 1:​1, 26) Ita bele fiar Bíblia nia esplikasaun kona-ba tanbasá ita hotu halo sala, hasoru susar barak, no mate. (Rom 5:12; 6:23) Ita fiar duni katak Jeová sei uza ninia Oan-Mane atu hadiʼa problema hotu neʼebé mosu tanba Satanás, “lia-bosok nia aman”. (João 8:44; Rom 16:20) No ita bele fiar kona-ba Bíblia nia promesa katak Jesus sei halakon buat aat hotu, fó moris-hiʼas ba ema mate, halo mundu sai paraízu, no ajuda ema atu sai perfeitu. (João 11:​25, 26; 1 João 3:8) Jeová fó ona mai ita priviléjiu neʼebé furak! Nia hanorin ita lia-loos, no fó ita oportunidade atu hanorin fali ema seluk.—Mt 28:​19, 20.

TANBASÁ ITA KOʼALIA LIA-LOOS?

7-8. Tanbasá ita-nia motivu atu koʼalia lia-loos mak importante? Fó toʼok ezemplu. (Marcos 3:​11, 12) (Haree mós foto.)

⁷ Hanesan temi ona antes neʼe, ita tenke koʼalia lia-loos se ita hakarak sai parte ba Jeová nia família. Maibé atu halo kontente Jeová, la toʼo atu koʼalia deʼit ho onestu. Razaun tanbasá ita koʼalia lia-loos mak importante ba Jeová. Hanoin toʼok saida mak akontese durante Jesus haklaken iha rai. (Lee Marcos 3:​11, 12.) Bainhira Jesus haklaken hela besik Tasi Galileia, ema-lubun boot mak haleʼu nia. Sira balu anju aat mak domina no hakneʼak iha Jesus nia oin no koʼalia ho lian makaʼas ba nia: “Ita mak Maromak nia Oan.” Tanbasá anju aat sira koʼalia lia-loos kona-ba Jesus? Karik tanba sira hakarak atu ema-lubun tau fiar ba sira no hapara ema-lubun neʼe atu la serbí Jeová. Buat neʼebé anju aat sira koʼalia mak loos, maibé sira halo nuneʼe ho motivu neʼebé la diʼak. No Jesus hatene kona-ba neʼe. Tuir loloos, Jesus haruka anju aat sira-neʼe atu la fó sasin kona-ba nia.

⁸ Lisaun saida mak ita bele aprende? Ita-nia motivu atu koʼalia lia-loos mak importante. Ita hanorin lia-loos tanba domin ba Jeová, no se ema ruma koko atu gaba ita kona-ba mensajen neʼebé ita hatoʼo, ita hakarak fó glória ba Jeová, laʼós ba ita-nia an rasik.—Mt 5:16; kompara ho Apóstolu 14:​12-15.

9. Ita presiza kuidadu kona-ba saida, no tanbasá?

⁹ Hanoin toʼok kona-ba situasaun ida neʼebé ita presiza kuidadu atu la buka glória ba ita-nia an. Imajina toʼok irmaun ida neʼebé iha responsabilidade mak fó-hatene segredu ruma ba ita, no ita fó-hatene fali ida-neʼe ba ema seluk. Se ema neʼe ikusmai hatene katak buat neʼebé ita hatete mak loos, karik nia sei gaba ita kona-ba neʼe no hanoin katak ita hatene segredu barak. Karik neʼe bele halo ema seluk sente katak ita mak ema neʼebé importante, maibé neʼe la halo kontente Maromak. (Prov 11:13) Tanbasá? Tanba maski buat neʼebé ita hatete mak loos, maibé ita la iha direitu atu fó sai ida-neʼe no ita-nia motivu mak la loos.

OINSÁ MAK ITA KOʼALIA LIA-LOOS?

10. Oinsá mak ita bele koʼalia ho “laran-diʼak”? (Koloso 4:6)

¹⁰ Lee Koloso 4:6. Apóstolu Paulo fó-hanoin ema Kristaun iha Koloso atu “sempre koʼalia ho laran-diʼak”. Liafuan Gregu neʼebé uza ba eskritura neʼe signifika katak buat neʼebé ita koʼalia laʼós deʼit atu lori diʼak ba ema seluk maibé mós presiza koʼalia iha dalan neʼebé kona ema nia laran.

11-12. Tanbasá ita presiza kuidadu kona-ba dalan neʼebé ita hanorin lia-loos? Fó toʼok ezemplu. (Haree mós foto.)

¹¹ Ita presiza aplika Paulo nia konsellu hodi hatudu laran-diʼak kuandu hanorin lia-loos ba ema seluk. Bíblia kompara lia-loos hanesan surik neʼebé kroʼat neʼebé bele haketak ema nia moris husi ema nia laran. Neʼe katak Bíblia bele hatudu sai buat neʼebé iha ita-nia laran no motivu. (Ebr 4:12) Maibé se ita la uza Bíblia ho matenek, neʼe bele halo ema seluk la kontente no hamosu diskute malu. Oinsá neʼe bele akontese?

¹² Hanoin toʼok situasaun neʼe. Bainhira haklaken, ita hasoru mane laran-diʼak ida neʼebé halo orasaun beibeik ba imajen, no selebra Natál no Páskua hamutuk ho ninia família. Karik ita sei uza Bíblia atu hatudu ba mane neʼe katak sala atu halo orasaun ba imajen sira no prova ba nia katak Natál no Páskua mak selebrasaun neʼebé kontra Maromak nia hakarak. (Isa 44:​14-20; 2 Kor 6:​14-17) Maibé, se ita halo nuneʼe durante ita-nia vizita ba dala primeiru, ita la uza Bíblia ho matenek maski buat neʼebé ita koʼalia mak loos.

13. Oinsá mak ita bele koʼalia hodi tau masin uitoan?

¹³ Paulo mós hatete katak ita presiza koʼalia hodi tau masin uitoan. Nia la dehan katak ita presiza halo lia-loos diferente ka subar ida-neʼe. Maibé nia haruka ita atu hanorin lia-loos husi Bíblia iha dalan neʼebé kona ema ida-idak nia laran. (Job 12:11) Neʼe la fasil. Hanesan hahán, dala ruma ita hanoin katak hahán neʼebé ita gosta, ema seluk mós sei gosta. Hanesan neʼe mós, karik ita bele hanoin katak dalan neʼebé ita koʼalia sei kona ema hotu nia laran. Maibé neʼe la loos. Porezemplu, ema husi kultura balu koʼalia sai deʼit buat neʼebé sira hanoin, maski koʼalia ba ema neʼebé idade boot liu. Maibé ema husi kultura seluk hanoin katak dalan hanesan neʼe mak la hatudu respeitu. Paulo hatete katak ita tenke hatene oinsá atu “hatán ba ema ida-idak”. Neʼe katak ita presiza halo mudansa kona-ba saida mak ita koʼalia, laʼós tuir deʼit ita rasik nia hakarak ka ita-nia kultura, maibé tuir rona-naʼin nia hakarak.

BAINHIRA MAK KOʼALIA LIA-LOOS?

14. Bainhira iha rai, Jesus hanorin dixípulu sira buat hotu neʼebé nia hatene ka lae? Esplika toʼok.

¹⁴ Jesus sempre koʼalia ho laran-diʼak ba ninia dixípulu sira, no hanorin sira kona-ba buat barak. (Mc 6:34) Maibé sei iha buat barak tan mak sira presiza aprende. Jesus la koko atu hanorin buat hotu neʼebé nia hatene ba sira. Nia komprende sira-nia limitasaun no hatene katak neʼe laʼós tempu ba sira atu aprende kona-ba lia-loos balu. Tuir loloos, nia hatete katak sira seidauk bele komprende ho didiʼak lia-loos sira-neʼe. (João 16:12) Neʼe hanorin saida mai ita?

15. Ita presiza hanorin estudante Bíblia buat hotu neʼebé ita hatene iha tempu ida deʼit ka lae? Esplika toʼok. (Provérbios 25:11) (Haree mós foto.)

¹⁵ Jesus nia ezemplu hatudu katak maski ita hatene lia-loos husi Bíblia, maibé neʼe la dehan katak ita presiza hanorin kedas buat hotu neʼebé ita hatene iha tempu ida deʼit. Oinsá mak ita bele banati-tuir Jesus nia ezemplu? Ita tenke hanoin kona-ba ema nia situasaun. Hanoin fali kona-ba mane ida neʼebé selebra Natál no Páskua ho ninia família. Ita hatene selebrasaun sira-neʼe mai husi adorasaun falsu no Maromak la simu ida-neʼe. Maibé imajina toʼok, Ita foin komesa estuda ho mane neʼe semana ida ka rua antes Natál. Diʼak ka lae, se Ita hatudu ba nia husi Bíblia kona-ba selebrasaun sira-neʼe no hein katak nia sei para kedas atu selebra Natál? Klaru katak estudante balu lalais atu aplika buat neʼebé nia aprende husi Bíblia. Maibé, balu fali presiza tempu atu halo mudansa ba sira-nia hanoin no hahalok. Ita bele ajuda estudante Bíblia halo mudansa, se ita fó-hatene nia saida mak nia presiza hatene tuir tempu neʼebé loos, katak tempu neʼebé nia prontu ona atu simu ida-neʼe.—Lee Provérbios 25:11.

16. Oinsá mak ita bele ajuda estudante Bíblia “kontinua laʼo iha lia-loos”?

¹⁶ Ita sente kontente duni kuandu ita ajuda ema seluk atu aprende lia-loos kona-ba Jeová. Ita bele ajuda sira atu “kontinua laʼo iha lia-loos” se ita halo buat tuirmai: Kontinua hatudu ezemplu diʼak ba sira. (3 João 3, 4) Halaʼo Ita-nia moris iha dalan neʼebé hatudu katak Ita tau fiar ba promesa sira iha Bíblia. Koʼalia lia-loos ho motivu neʼebé diʼak. Bainhira hanorin lia-loos husi Bíblia, koʼalia ho laran-diʼak, respeitu, no iha tempu neʼebé loos. No fó glória ba Jeová kuandu ema ruma gaba Ita. Se Ita halo nuneʼe, Ita sei prova katak Ita serbí Jeová, Maromak lia-loos nian.