Éfeso 3:20—“Maromak bele halo barak liu fali buat hotu neʼebé ita husu ka hanoin”

“Agora Maromak bele halo barak liu fali buat hotu neʼebé ita husu ka hanoin tanba ninia kbiit neʼebé book an iha ita. Entaun, nia merese simu glória.”—Éfeso 3:20, 21, Tradusaun Mundu Foun.

“Gloria ba Nia! Nia kbiit nebe book an iha ita nia laran, halo barak liu fali buat nebe ita bele husu ka hanoin; gloria ba Nia.”​—Efeso 3:20, 21, Liafuan diak ba imi, segunda edisaun.

Signifikadu husi Éfeso 3:20

Apóstolu Paulo fó sai ninia konfiansa katak Maromak bele hatán ba Ninia atan sira-nia orasaun no kumpre sira-nia hakarak iha dalan neʼebé sira sente imposivel, ka iha dalan neʼebé furak liu fali buat neʼebé sira espera.

“Agora Maromak bele halo . . . tanba ninia kbiit neʼebé book an iha ita.” Apóstolu Paulo hakerek kona-ba buat neʼebé Maromak Jeováa bele halo. Iha versíkulu 21, Paulo hakerek: “Nia merese simu glória liuhusi kongregasaun no mós liuhusi Kristu Jesus.” Maromak bele fó ita kbiit ka forsa neʼebé ita presiza atu halo tuir ninia hakarak.​—Filipe 4:13.

Iha versíkulu 20, apóstolu Paulo fó sai buat neʼebé espesiál kona-ba Jeová nia kapasidade atu ajuda Ninia atan sira. Kona-ba liafuan “Maromak bele halo”, livru referénsia ida esplika: “Versíkulu neʼe la dehan katak iha posibilidade ba Maromak atu halo buat ruma, maibé neʼe mak kona-ba Maromak nia kbiit atu kumpre buat ruma.” La hanesan ho ema ida neʼebé hakarak atu ajuda ita, Jeová sempre iha kbiit atu halo buat naran deʼit hodi tau matan ba ninia atan sira no hatán ba sira-nia orasaun. Nia mesak deʼit mak iha podér no autoridade neʼebé la iha limite.​—Isaias 40:26.

“Maromak bele halo barak liu fali buat hotu neʼebé ita husu ka hanoin.” Jeová bele halo “barak liu fali” buat neʼebé ninia atan sira sente barak ona. Nia bele ajuda sira iha dalan neʼebé liu fali buat neʼebé sira imajina.

Fraze “liu fali buat hotu neʼebé ita husu ka hanoin” hanorin ita buat seluk tan. Hodi dehan “liu fali buat hotu neʼebé ita husu ka hanoin”, Paulo hakarak ema Kristaun hotu atu komprende katak Maromak bele ajuda sira iha dalan neʼebé liu fali buat neʼebé sira hein atu simu. Bíblia Kadi Kapasidade tradús parte primeiru husi versíkulu 20: “Agora, ba Nia nebee bele halo barak liu buat hotu nebee ita husu ka hanoin.” Dala ruma, ita bele sente katak ita-nia problema mak boot demais ka susar demais atu rezolve. Karik ita la hatene oinsá atu husu ba Jeová iha ita-nia orasaun. Maibé Jeová nia matenek atu komprende situasaun ida-idak no ninia kapasidade atu ajuda ita la iha limite. Iha tempu neʼebé loos, nia bele rezolve problema naran deʼit, no halo ida-neʼe iha dalan neʼebé ita la imajina. (Job 42:2; Jeremias 32:17) Durante tempu neʼe, nia fó mai ita forsa atu tahan, no bele mós halo ita tahan ho haksolok!​—Tiago 1:2, 3.

Kontestu husi Éfeso 3:20

Livru Éfeso mak apóstolu Paulo nia karta ba ema Kristaun sira neʼebé hela iha sidade Éfeso iha Ázia Menór, agora iha rai-Turkia. Iha ninia karta neʼe, Paulo hakerek kona-ba buat neʼebé nia temi iha orasaun hodi hanoin maluk Kristaun sira-nia diʼak. (Éfeso 3:14-21) Nia husu katak sira no mós ema Kristaun hotu sei hakaʼas an atu banati-tuir Jesus nia hanoin no hahalok neʼebé nakonu ho domin, hodi nuneʼe sira bele komprende liután Kristu nia domin. Paulo remata ninia orasaun hodi fó hahiʼi ba Maromak no hatoʼo liafuan iha Éfeso 3:20, 21.

Haree vídeo badak neʼe hodi komprende kona-ba livru Éfeso.