Galásia 6:9—“Ita labele rende an atu halo buat neʼebé diʼak”

“Ita labele rende an atu halo buat neʼebé diʼak, tanba se ita la sai kole, ita sei koʼa iha tempu neʼebé loos.”—Galásia 6:9, Tradusaun Mundu Foun.

“Ita keta kole halo hahalok diak sira; ita la baruk karik hodi ba oin nafatin, loron sei toʼo mai wainhira ita sei halibur fuan sira.”—Galasia 6:9, Liafuan diak ba imi, segunda edisaun.

Signifikadu husi Galásia 6:9

Apóstolu Paulo enkoraja ema Kristaun sira atu kontinua halo buat neʼebé diʼak hodi tuir Maromak nia hakarak. Se sira halo nuneʼe, sira bele fiar metin katak Maromak sei fó kolen ba sira.

“Ita labele rende an.” Fraze neʼe bele mós tradús nuʼudar “mai ita la sai kole”. Liafuan orijinál bele mós fó ideia katak labele laran-kraik ka lakon laran-manas. Hodi uza liafuan “ita”, apóstolu Paulo fó sai katak nia rasik mós dala ruma presiza luta hasoru sentimentu laran-kraik.—Roma 7:21-24.

“Buat neʼebé diʼak” refere ba buat hotu neʼebé ema Kristaun presiza halo nuʼudar sira serbí Maromak. Neʼe inklui serbisu atu ajuda maluk Kristaun no ema seluk.—Galásia 6:10.

“Se ita la sai kole, ita sei koʼa iha tempu neʼebé loos.” Paulo fó-hanoin lee-naʼin sira katak presiza tempu balu atu bele haree rezultadu diʼak husi sira-nia hahalok diʼak, hanesan toʼos-naʼin presiza hein ba tempu balu atu koʼa buat neʼebé sira kuda. Kuandu Paulo temi kona-ba koʼa, nia hanoin nafatin lia-loos báziku neʼebé nia foin temi iha versíkulu 7: “Buat naran deʼit neʼebé ema kari, nia mós sei koʼa ida-neʼe.” Neʼe katak, bainhira ema Kristaun ida halo buat neʼebé diʼak tuir Maromak nia haree, nia sei hetan kolen boot, inklui moris rohan-laek.—Roma 2:6, 7; Galásia 6:8.

Kontestu husi Galásia 6:9

Apóstolu Paulo hakerek karta neʼe ba ema Kristaun iha Galásia maizumenus iha tinan 50-52 EC. Ninia objetivu mak atu proteje ema Kristaun hodi la simu influénsia husi ema neʼebé temi sira-nia an nuʼudar Kristaun maibé hanorin buat neʼebé la loos kona-ba Jesus. (Galásia 1:6, 7) Mestre falsu sira-neʼe dehan katak ema Kristaun presiza halo tuir Moisés nia Ukun-Fuan neʼebé Maromak fó ba nasaun Izraél antigu. (Galásia 2:15, 16) Paulo esplika katak Ukun-Fuan kumpre ona ninia objetivu no Maromak nia atan sira la iha tan Ukun-Fuan neʼe nia okos.—Roma 10:4; Galásia 3:23-25.

Bainhira Paulo anima ema Kristaun atu kontinua “halo buat neʼebé diʼak”, nia la koʼalia kona-ba halo tuir Moisés nia Ukun-Fuan. Tuir loloos, nia anima sira atu “kumpre Kristu nia ukun-fuan”, neʼe inklui Jesus nia hanorin hotu kona-ba halo buat diʼak ba ema seluk.—Galásia 6:2; Mateus 7:12; João 13:34.

Haree vídeo badak neʼe hodi komprende kona-ba livru Galásia.