Fulan-Agostu mak fulan espesiál tebes!
Iha tratu foun neʼebé sei fahe iha mundu tomak
1. Kampaña espesiál saida mak ita sei halaʼo iha mundu tomak?
1 Iha fulan balu tan, Maromak nia Governu ukun ona ba tinan 100! Tan neʼe, atu fó hahiʼi ba Maromak Jeová, ita sei halaʼo kampaña espesiál ida. Iha fulan-Agostu, ita sei hola parte atu fahe ba ema iha mundu tomak tratu ho títulu: Iha neʼebé mak ita bele hetan resposta ba pergunta sira kona-ba moris? Tratu neʼe sei book lee-naʼin sira atu buka resposta husi Bíblia no hatudu oinsá sítiu jw.org bele ajuda sira.
2. Oinsá mak ita bele hola parte atu “hakilar ho lian makaʼas hodi hahiʼi Jeová” iha fulan-Agostu?
2 Hakilar ho lian makaʼas hodi hahiʼi Jeová: Tanba fulan-Agostu mak fulan espesiál, haklaken-naʼin sira iha oportunidade atu aumenta sira-nia serbisu haklaken hodi serbí nuʼudar pioneiru estra. Iha fulan neʼe, haklaken-naʼin sira neʼebé hetan ona batizmu bele foti pioneiru estra no hili atu hatama oras 30 iha relatóriu. Fulan-Agostu sei iha loron-sesta, sábadu, no domingu lima. Tan neʼe, maski haklaken-naʼin sira neʼebé serbisu no sei eskola hela, sira mós bele foti pioneiru estra. Se Ita iha estudante Bíblia ida neʼebé laʼo ba oin ka oan neʼebé hakarak sai haklaken-naʼin, koʼalia kedas ho koordenadór ba grupu katuas nian kona-ba ida-neʼe. Ita sei kontente atu haklaken hamutuk ho haklaken-naʼin foun sira-neʼe iha fulan espesiál neʼe! Baibain, pioneiru regulár barak foti feriadu iha fulan-Agostu tanba hatama ona sira-nia oras ba tinan nian. Maibé karik sira bele halo mudansa uitoan ba sira-nia programa hodi bele hola parte iha kampaña espesiál neʼe. Agora mak tempu ba família sira atu halo planu oinsá mak sira bele hola parte atu “hakilar ho lian makaʼas hodi hahiʼi Jeová” iha fulan-Agostu.—Esdras (Ezra) 3:11; Provérbios (Amsal) 15:22.
3. Saida mak ita-nia hakarak kona-ba kampaña espesiál neʼe?
3 Maski uluk ita hola parte ona iha kampaña espesiál hanesan neʼe, maibé ami hein katak kampaña ida-neʼe sei sai espesiál liután. Ita bele ka lae, aumenta liután haklaken-naʼin, pioneiru estra, no oras neʼebé ita uza iha serbisu haklaken? Nuʼudar ita ramata tinan serbisu nian ba 2014, ita hein katak Jeová sei haraik bensaun ba ninia povu iha mundu tomak tanba sira hakaʼas an atu aumenta sira-nia serbisu haklaken iha fulan-Agostu!—Mateus 24:14.