Mantein ksolok maski idade aumenta

1-2. Jeová sente oinsá kona-ba ferik-katuas sira neʼebé laran-metin? (Salmo 92:​12-14; haree mós foto.)

EMA balu iha hanoin pozitivu kona-ba idade aumenta. Maibé iha mós ema neʼebé koko atu halo buat oioin atu la haree hanesan ema neʼebé idade ona. Porezemplu, bainhira sira haree fuuk-mutin, sira fokit kedas. Maibé realidade mak neʼe la hapara sira atu sai ferik-katuas.

² Oinsá Aman Jeová nia hanoin kona-ba ninia atan sira neʼebé ferik-katuas ona? (Prov 16:31) Nia haree sira hanesan ai-hun neʼebé furak. (Lee Salmo 92:​12-14.) Neʼe katak sá? Ai-hun barak neʼebé moris ba tempu naruk mak furak tebes tanba iha tahan no funan barak. Porezemplu iha Japaun, iha ai-hun sakura balu neʼebé moris ba tinan rihun ida liu no nafatin fó funan barak. Hanesan ai-hun sira-neʼe, Jeová nia atan sira neʼebé idade ona mós furak tebes no folin-boot ba nia. Jeová haree ema nia laran, laʼós ba idade. No Jeová hafolin ferik-katuas sira-nia hahalok furak, inklui sira-nia laran-metin no tahan hasoru susar oioin ba tinan barak.

3. Fó toʼok ezemplu kona-ba oinsá Jeová uza ferik-katuas sira atu kumpre ninia hakarak.

³ Jeová kontinua hafolin ita maski idade aumenta.a Tuir loloos, dala barak Jeová uza ema neʼebé idade ona atu kumpre Ninia hakarak. Porezemplu, bainhira Sara ferik ona, Jeová fó-hatene katak nia sei sai inan ba nasaun boot no Mesias nia beiʼala. (Gén 17:​15-19) No Moisés idade ona bainhira Jeová fó knaar ba nia atu lori ema Izraél sai husi Ejitu. (Éx 7:​6, 7) Apóstolu João mós idade ona bainhira Jeová dirije nia atu hakerek livru lima iha Bíblia.

4. Tuir Provérbios 15:​15, saida mak bele ajuda ferik-katuas sira atu tahan hasoru susar oioin? (Haree mós foto.)

⁴ Bainhira idade aumenta, ita sei hasoru susar oioin. Irmán ida koʼalia halimar dehan: “Ema neʼebé aten-brani deʼit mak bele sai ferik-katuas.” Maibé Jeová bele ajuda ita atu mantein ksolok,b no neʼe sei halo fasil ba ita atu tahan susar oioin. (Lee Provérbios 15:15.) Iha lisaun neʼe, ita sei koʼalia kona-ba buat balu neʼebé ferik-katuas sira bele halo atu mantein sira-nia ksolok no oinsá mak ema seluk bele ajuda ferik-katuas sira iha kongregasaun. Maibé ulukliu, mai ita koʼalia kona-ba tanbasá mak susar atu mantein ksolok bainhira idade aumenta.

IDADE AUMENTA LORI SUSAR SAIDA?

5. Saida deʼit mak bele halo ferik-katuas sira laran-kraik?

⁵ Se Ita mak ferik ka katuas ona, saida mak bele halo Ita laran-kraik? Karik Ita sente triste tanba labele halo ona buat neʼebé uluk Ita halo. Karik Ita hanoin fali kuandu Ita sei joven no iha saúde diʼak. (Ecle 7:10) Porezemplu, irmán ida naran Ruby hatete: “Difisil ba haʼu atu hatais roupa tanba sente moras no susar atu book an. Hiʼit ain atu hatais meias mós arraska. Haʼu-nia liman-fuan moras, tan neʼe atu halo buat kiʼik deʼit mós susar.” Irmaun Harold neʼebé uluk serbí iha Betel hatete: “Dala ruma haʼu estrese tanba labele halo ona buat neʼebé uluk haʼu gosta halo. Uluk haʼu iha isin neʼebé forte. Haʼu gosta joga baseball. Ema sempre dehan: ‘Pasa bola ba Harold tanba nia sei halo ita manán.’ Maibé agora soe bola deʼit mós susar.”

6. (a) Razaun saida tan mak bele halo ferik-katuas sira laran-kraik? (b) Oinsá mak ferik-katuas sira bele deside kona-ba para atu lori karreta? (Haree informasaun ho títulu “Haʼu presiza para atu lori karreta ka lae?”)

⁶ Karik Ita sente laran-kraik tanba presiza sadere ba ema seluk nia ajuda. Karik Ita presiza ema ruma atu ajuda tau matan ba Ita ka presiza muda atu hela hamutuk ho Ita-nia oan. Ka karik Ita labele ona lori karreta, bisikleta, ka bá fatin oioin mesak tanba Ita-nia saúde ladún diʼak ka matan malahuk. Neʼe bele halo Ita triste tebes! Maibé diʼak atu hanoin-hetan katak Jeová no ema seluk nafatin hafolin Ita, no neʼe la depende ba Ita-nia kbiit atu tau matan ba Ita-nia an, hela mesak, ka lori karreta. No Ita bele fiar metin katak Jeová komprende Ita-nia sentimentu. Buat neʼebé importante ba Jeová mak Ita-nia laran, no nia hafolin ninia atan neʼebé hadomi tebes nia no maluk fiar-naʼin sira.—1 Sam 16:7.

7. Saida mak bele ajuda sira neʼebé triste tanba hanoin katak sira sei mate antes Armagedon?

⁷ Karik Ita triste tanba hanoin katak Ita sei mate antes Armagedon. Saida mak bele ajuda Ita se Ita sente hanesan neʼe? Koko atu hanoin-hetan katak Jeová iha razaun diʼak atu la halakon kedas mundu aat neʼe. (Isa 30:18) Jeová nia pasiénsia fó oportunidade ba ema rihun ba rihun atu aprende kona-ba nia no serbí nia. (2 Ped 3:9) Entaun kuandu Ita sente laran-kraik, hanoin kona-ba oinsá Jeová nia pasiénsia lori benefísiu ba ema barak, karik inklui Ita-nia família rasik.

8. Se ferik-katuas sira iha kondisaun la diʼak, neʼe bele fó impaktu saida ba sira?

⁸ Maski joven ka idade, kuandu ita-nia kondisaun mak la diʼak, ita bele koʼalia ka halo buat neʼebé ikusmai ita arrepende. (Ecle 7:7; Tgo 3:2) Porezemplu, bainhira Job hetan terus, nia “koʼalia liafuan arbiru deʼit” maski nia mak ema neʼebé fiar metin. (Job 6:​1-3) Ferik-katuas sira mós karik sei koʼalia ka halo buat neʼebé la baibain tanba moras ka impaktu husi ai-moruk. Klaru katak Ita lakohi uza moras ka idade nuʼudar razaun atu hatudu hahalok la diʼak ka espera ema seluk atu halo buat ruma ba Ita. Se Ita sente katak Ita koʼalia liafuan neʼebé la diʼak ba ema ruma, keta demora atu husu deskulpa.—Mt 5:​23, 24.

OINSÁ ATU MANTEIN KSOLOK

9. Tanbasá diʼak atu simu ema seluk nia ajuda? (Haree mós foto.)

⁹ Simu ema seluk nia ajuda. (Gal 6:2) Foufoun, karik Ita sente susar atu halo nuneʼe. Irmán ida naran Gretl hatete: “Dala ruma haʼu sente susar atu simu ema seluk nia ajuda tanba haʼu lakohi hatodan sira. Liutiha tempu balu mak haʼu foin troka haʼu-nia hanoin no ho haraik an rekoñese katak haʼu presiza ema nia ajuda.” Bainhira Ita simu ema seluk nia ajuda, neʼe sei halo sira kontente. (Após 20:35) No Ita mós sei kontente tanba haree katak ema seluk hadomi no hanoin Ita.

10. Tanbasá importante atu hatudu agradese? (Haree mós foto.)

¹⁰ Hatudu agradese. (Kol 3:15; 1 Tes 5:18) Bainhira ema ruma halo buat diʼak ba ita, ita sente agradese maibé karik haluha atu hatudu sai ida-neʼe. Maibé se ita oin-midar no hatete obrigadu, sira sei sente katak ita hafolin buat neʼebé sira halo. Irmán Leah neʼebé tau matan ba ferik-katuas iha Betel hatete: “Irmán ida neʼebé haʼu tau matan sempre fó nota kiʼik mai haʼu atu hatoʼo agradese. Liafuan sira badak deʼit maibé furak. Haʼu kontente simu ida-neʼe tanba nia hafolin haʼu-nia ajuda.”

11. Oinsá mak Ita bele ajuda ema seluk? (Haree mós foto.)

¹¹ Hakaʼas an atu ajuda ema seluk. Bainhira Ita uza Ita-nia tempu no forsa ba ema seluk, neʼe bele ajuda Ita atu la hanoin demais kona-ba Ita-nia problema rasik. Lia-dadolin ida husi Áfrika hatete katak ferik-katuas sira mak hanesan biblioteka ho livru barak neʼebé nakonu ho matenek. Maibé livru sira neʼebé rai deʼit sei la ajuda ema seluk. Hanesan neʼe mós ema neʼebé idade kiʼik sei la aprende husi Ita se Ita la fahe Ita-nia esperiénsia ka matenek. Tan neʼe, hakaʼas an atu koñese liután sira neʼebé idade kiʼik hodi husu pergunta no rona ho didiʼak. Tuirmai, konta ba sira oinsá Jeová nia matadalan ajuda ona Ita no mós bele ajuda sira atu moris kontente. Kuandu Ita anima no fó korajen ba belun neʼebé idade kiʼik, Ita mós sei sente kontente.—Sal 71:18.

12. Tuir Isaias 46:​4, Jeová promete atu halo saida ba ferik-katuas sira? (Haree mós foto.)

¹² Halo orasaun atu hetan forsa. Dala ruma Ita sente kole ka laran-kraik, maibé Jeová “nunka sai kole ka fraku”. (Isa 40:28) Oinsá mak Jeová uza ninia forsa neʼebé la iha limite? Dalan ida mak hodi fó forsa ba ferik-katuas sira neʼebé laran-metin. (Isa 40:​29-31) Jeová promete atu ajuda Ita. (Lee Isaias 46:4.) No Jeová sempre kumpre ninia promesa. (Jos 23:14; Isa 55:​10, 11) Kuandu Ita halo orasaun no sente Jeová nia ajuda no domin, neʼe halo Ita kontente.

13. Tuir 2 Korinto 4:​16-18, ita presiza hanoin-hetan saida? (Haree mós foto.)

¹³ Hanoin-hetan katak Ita-nia situasaun mak temporáriu deʼit. Hodi hanoin-hetan katak Ita-nia susar mak temporáriu deʼit, neʼe sei halo fasil liu ba Ita atu tahan. Bíblia promete katak iha futuru ema sei la sai ferik-katuas no moras. (Job 33:25; Isa 33:24) Tan neʼe, Ita bele sente kontente hodi hatene katak situasaun furak mak iha futuru, laʼós iha pasadu. (Lee 2 Korinto 4:​16-18.) Maibé saida deʼit mak ema seluk bele halo atu fó ajuda?

OINSÁ MAK EMA SELUK BELE AJUDA

14. Tanbasá importante atu vizita no telefone ferik-katuas sira?

¹⁴ Vizita no telefone beibeik ferik-katuas sira. (Ebr 13:16) Dala barak ferik-katuas sira sente mesamesak. Irmaun ida neʼebé katuas ona hatete: “Haʼu iha deʼit uma laran loron tomak no neʼe halo haʼu sai baruk no estrese. Haʼu sente hanesan leaun neʼebé idade, fraku, no sulan deʼit iha luhan.” Kuandu ita vizita ferik-katuas sira, ita hatudu katak ita hafolin no hadomi sira. Karik ita hakarak vizita ka telefone ferik-katuas sira iha kongregasaun maibé la konsege halo nuneʼe. Ita hotu okupadu ho buat oioin. Entaun saida mak bele ajuda ita atu “buka-hatene loloos buat sira neʼebé importante liu”, inklui vizita ferik-katuas sira? (Flp 1:10) Karik halo nota iha kalendáriu hodi fó-hanoin Ita atu haruka mensajen ka telefone ferik-katuas sira iha Ita-nia kongregasaun. Ita mós bele halo planu hodi hili loron espesífiku atu vizita sira.

15. Saida deʼit mak ita bele halo hamutuk ho ferik-katuas sira?

¹⁵ Karik Ita neʼebé idade ladún boot hanoin barak kona-ba saida mak Ita sei koʼalia ka halo ba ferik-katuas sira. Maibé keta hanoin barak. Importante mak sai sira-nia belun. (Prov 17:17) Koʼalia ho sira antes ka depois reuniaun. Ita bele husu sira atu fahe sira-nia eskritura favoritu ka konta istória komik bainhira sira sei kiʼik. Ita bele haree JW Broadcasting^® hamutuk ho sira. Ita mós bele ajuda atu halo buat ruma neʼebé sira rasik labele halo, porezemplu download publikasaun neʼebé foun liu ba sira. Irmán ferik ida naran Carol hatete: “Konvida ferik-katuas atu halo hamutuk buat neʼebé Ita rasik gosta. Maski idade ona, haʼu nafatin hakarak goza moris. Haʼu gosta kompras, han iha liʼur, no bá pasiar atu haree Jeová nia kriasaun.” No irmán ida naran Maira hatete: “Haʼu-nia belun ida mak tinan 90. Nia boot liu haʼu tinan 57. Maibé dala barak haʼu haluha kona-ba neʼe tanba ami hamnasa hamutuk no haree filme hamutuk. No kuandu ami hasoru problema, ami ajuda malu.”

16. Tanbasá diʼak atu akompaña ferik-katuas sira bainhira bá konsulta?

¹⁶ Akompaña sira bainhira bá konsulta. Ita bele lori sira ba ospitál ka hasoru doutór, no ita mós bele akompaña sira atu haree katak doutór ka enfermeiru sira trata sira ho didiʼak. (Isa 1:17) Karik ita bele ajuda sira hodi hakerek nota kona-ba buat neʼebé doutór hatete. Irmán ferik ida naran Ruth hatete: “Dala barak kuandu haʼu bá konsulta mesak, doutór la fiar buat neʼebé haʼu hatete. Dala ruma doutór dehan: ‘Ita la moras ida, Ita mak hanoin barak deʼit.’ Maibé kuandu ema ruma akompaña haʼu, doutór sei trata haʼu ho didiʼak. Haʼu agradese ba irmaun-irmán sira neʼebé fahe sira-nia tempu atu akompaña haʼu.”

17. Ita bele halo saida deʼit atu haklaken hamutuk ho ferik-katuas sira?

¹⁷ Haklaken hamutuk ho sira. Ferik-katuas balu sente susar atu haklaken husi uma ba uma. Se nuneʼe, karik Ita bele konvida sira atu haklaken hamutuk hodi hein karrosa. Ita bele prepara kadeira atu nuneʼe sira bele tuur besik karrosa. Ka Ita mós bele konvida sira atu tuir Ita-nia estudu Bíblia, ka lori estudante ba sira-nia uma. Katuas kongregasaun bele halo arranju atu halaʼo grupu haklaken iha ferik ka katuas ida nia uma hodi halo fasil ba nia atu tuir. Buat hotu neʼebé ita halo ba ferik-katuas sira mak folin-boot ba Jeová.—Prov 3:27; Rom 12:10.

18. Iha lisaun tuirmai, ita sei aprende kona-ba saida?

¹⁸ Lisaun neʼe fó-hanoin ita katak Jeová hadomi no hafolin tebes ferik-katuas sira. No ita hotu iha kongregasaun mós hadomi sira! Ferik-katuas sira, maski Ita hasoru susar barak, Jeová sei ajuda Ita atu nafatin sente haksolok. (Sal 37:25) No Ita bele sente kmaan tanba hatene katak situasaun furak mak iha futuru, laʼós iha pasadu! Maibé, oinsá ho sira neʼebé tau matan ba oan, família neʼebé idade, ka belun neʼebé moras? Oinsá mak sira bele mantein sira-nia ksolok? Ita sei aprende kona-ba neʼe iha lisaun tuirmai.