Ita bele luta hasoru sentimentu negativu

1-2. Dala ruma apóstolu Paulo sente oinsá, no tanbasá ninia ezemplu bele ajuda ita? (Roma 7:​21-24)

KUANDU Ita hanoin kona-ba apóstolu Paulo, karik Ita hanoin katak nia mak ema neʼebé haklaken ho aten-brani, hanorin ho matenek, no hakerek karta barak husi Bíblia. Maibé dala ruma nia mós sente triste, laran-kraik, no laran-susar. Hanesan ho ita barak, nia mós luta hasoru sentimentu negativu.

² Lee Roma 7:​21-24. Iha Paulo nia karta ba ema Kristaun iha Roma, nia fó sai ninia sentimentu neʼebé ita barak mós sente. Maski nia mak ema Kristaun neʼebé laran-metin no hakarak halo tuir Maromak, maibé nia tenke luta hasoru hakarak neʼebé sala. Dala ruma nia mós iha sentimentu negativu kona-ba ninia pasadu, no presiza tahan hasoru ninia problema neʼebé nunka sai diʼak.

3. Iha lisaun neʼe, ita sei aprende kona-ba saida? (Haree mós “Esplikasaun ba fraze”.)

³ Dala ruma Paulo iha sentimentu negativu,a maibé nia la husik ida-neʼe atu domina ninia hanoin. Iha lisaun neʼe, ita sei aprende kona-ba saida mak halo Paulo sente triste? Saida mak ajuda Paulo atu tahan hasoru sentimentu negativu? No oinsá mak ita bele luta hasoru sentimentu negativu?

BUAT NEʼEBÉ HALO PAULO IHA SENTIMENTU NEGATIVU

4. Saida mak halo Paulo iha sentimentu negativu?

⁴ Ninia pasadu. Antes sai ema Kristaun, ema koñese Paulo nuʼudar Saul no nia halo buat barak neʼebé la diʼak. Porezemplu, nia apoia bainhira ema tuda mate Estevão. (Após 7:58; 8:1) Saul mós fó-terus ba ema Kristaun barak no trata sira iha dalan neʼebé aat tebes.—Após 8:3; 26:​9-11.

5. Paulo sente oinsá kona-ba ninia pasadu?

⁵ Bainhira Paulo sai ona ema Kristaun, nia sente triste tebes kona-ba buat neʼebé uluk nia halo. Nuʼudar tempu liu daudaun, karik ninia sentimentu neʼe kontinua aumenta. Porezemplu, maizumenus iha tinan 55 EC kuandu nia hakerek karta primeiru ba ema Korinto, nia hatete: “Haʼu la merese atu bolu nuʼudar apóstolu ida, tanba uluk haʼu fó-terus ba Maromak nia kongregasaun.” (1 Kor 15:9) Maizumenus tinan lima liu tiha, Paulo mós hatete iha ninia karta ba ema Éfeso katak nia mak “kiʼik liu fali ema neʼebé kiʼik liu husi ema santu hotu”. (Éf 3:8) Bainhira hakerek karta ba Timóteo, Paulo hatete katak uluk nia ‘koʼalia aat Maromak no fó-terus ba ninia povu no foti an’. (1 Tim 1:13) Imajina toʼok Paulo nia sentimentu bainhira nia vizita kongregasaun ida no hasoru ema neʼebé uluk nia fó-terus ka ema neʼe nia família.

6. Saida tan mak halo Paulo sente susar? (Haree mós nota-rodapé.)

⁶ Ai-tarak iha isin. Paulo kompara buat neʼebé lori susar ba nia hanesan ‘ai-tarak iha ninia isin’. (2 Kor 12:7) Nia la esplika saida mak halo nia sente susar tebes. Karik neʼe mak kona-ba problema saúde ka problema seluk neʼebé halo nia laran-taridu.b

7. Tanbasá Paulo sente susar atu halo buat neʼebé loos? (Roma 7:​18, 19)

⁷ Ninia fraku. Paulo sente susar atu manán ninia fraku sira. (Lee Roma 7:​18, 19.) Maski nia hakarak halo buat neʼebé loos, dala barak ninia fraku mak manán fali nia. Paulo hatete katak nia presiza luta hasoru ninia hakarak neʼebé sala no hakaʼas an tebes atu halo buat neʼebé loos. (1 Kor 9:27) Klaru katak nia sente laran-kraik bainhira ninia fraku mosu fali!

SAIDA MAK AJUDA PAULO ATU MANÁN SENTIMENTU NEGATIVU?

8. Paulo halo saida atu manán ninia fraku sira?

⁸ Liuhusi Paulo nia karta sira, ita bele komprende katak nia hanoin kleʼan kona-ba oinsá Maromak nia espíritu bele ajuda nia no ema Kristaun seluk atu kontrola hakarak neʼebé sala no hadiʼa sira-nia hahalok. (Rom 8:13; Gal 5:​16, 17) Paulo fó sai ho klaru kona-ba hanoin no hahalok aat neʼebé sira tenke hasees an. (Gal 5:​19-21, 26) Neʼe hatudu katak Paulo hanoin kleʼan kona-ba ninia fraku sira, buka konsellu husi Eskritura, no buka-hatene oinsá atu manán ninia fraku sira. Ita bele fiar katak Paulo rasik mós aplika buat neʼebé nia hanorin ba ema seluk.

9-10. Saida mak ajuda Paulo atu manán sentimentu negativu? (Éfeso 1:7) (Haree mós dezeñu.)

⁹ Maski dala ruma Paulo sente laran-kraik, maibé nia nafatin bele iha hanoin pozitivu. Porezemplu, nia kontente bainhira rona relatóriu diʼak husi ninia maluk sira. (2 Kor 7:​6, 7) Nia mós sente kontente bainhira ransu ho maluk Kristaun sira. (2 Tim 1:4) No nia serbí Jeová “ho konxiénsia neʼebé moos” tanba hatene katak Jeová simu nia, no neʼe halo nia kontente. (2 Tim 1:3) Maski ikusmai Paulo sai dadur iha Roma, maibé nia anima maluk fiar-naʼin sira atu ‘haksolok iha Naʼi’. (Flp 4:4) Kuandu ita lee Paulo nia liafuan sira, ita bele komprende katak nia laʼós sempre hanoin kona-ba ninia problema no sala sira. Klaru, bainhira sentimentu negativu mosu, nia lalais hanoin kona-ba buat neʼebé ajuda nia atu iha hanoin pozitivu.

¹⁰ Paulo mós bele manán ninia sentimentu negativu tanba nia fiar katak Jesus nia sakrifísiu mak hanesan prezente ba nia rasik. (Gal 2:20; lee Éfeso 1:7.) Rezultadu mak nia bele fiar katak Jeová perdua nia liuhusi Jesus nia sakrifísiu. (Rom 7:​24, 25) Buat sira-neʼe hotu ajuda Paulo atu “halaʼo serbisu sagradu ba Maromak” ho kontente.—Ebr 9:​12-14.

11. Tanbasá Paulo nia ezemplu bele anima ita?

¹¹ Hanesan Paulo, karik ita mós sente katak ita tenkesér luta hasoru ita-nia fraku atu la hanoin, koʼalia, ka halo buat neʼebé Jeová la gosta. Tan neʼe, dala ruma ita sente ita mak ema neʼebé “kuitadu loos!” Irmán ida naran Elizac neʼebé tinan 26 esplika kona-ba buat neʼebé nia sente hodi dehan: “Haʼu hetan anima hodi hanoin kona-ba Paulo nia situasaun. Haʼu kontente tanba laʼós haʼu deʼit mak sente hanesan neʼe. Neʼe fó-hanoin haʼu katak Jeová hatene susar neʼebé ninia atan sira hasoru.” Hanesan Paulo, saida mak ita presiza halo atu bele iha konxiénsia neʼebé moos no sente kontente maski dala ruma sentimentu negativu mosu?

OINSÁ ITA BELE LUTA HASORU SENTIMENTU NEGATIVU?

12. Oinsá mak toman espirituál neʼebé diʼak bele ajuda ita manán sentimentu negativu?

¹² Mantein toman espirituál neʼebé diʼak. Bainhira ita haburas toman espirituál neʼebé diʼak, neʼe bele ajuda ita atu fokus ba buat neʼebé pozitivu. Ita bele kompara ida-neʼe ho mantein toman atu iha saúde neʼebé diʼak. Bainhira ita han ai-han neʼebé saudavel, halo ezersísiu beibeik, no toba natoon, baibain ita sei sente diʼak. Nuneʼe mós, lee beibeik Maromak nia Liafuan, prepara no hola parte iha reuniaun sira, no mós haklaken sei lori rezultadu diʼak ba ita. Se ita kontinua halo buat sira-neʼe, neʼe sei ajuda ita atu manán hasoru ita-nia sentimentu negativu.—Rom 12:​11, 12.

13-14. Benefísiu saida mak irmaun-irmán balu hetan tanba halaʼo toman espirituál nian?

¹³ Haree toʼok ezemplu husi irmaun ida naran João, neʼebé hetan moras kankru bainhira nia tinan 39. Foufoun, nia sente taʼuk no laran-taridu. Nia hanoin: ‘Oinsá mak haʼu bele hetan moras iha idade hanesan neʼe?’ Iha tempu neʼebá, nia iha oan-mane ida neʼebé foin tinan tolu. Saida mak ajuda João atu manán ninia sentimentu negativu? Nia hatete: “Maski haʼu kole tebes, haʼu hakaʼas an atu ami-nia família tuir reuniaun, haklaken, no halaʼo adorasaun família nian semana-semana. Ami halo buat sira-neʼe maski la fasil.” João mós hatete: “Foufoun ami sente triste tebes, maibé lakleur deʼit haʼu bele haree katak Jeová fó ami forsa neʼebé ami presiza no oinsá nia hadomi tebes ami. Jeová mós bele ajuda Ita, hanesan nia mós ajuda ona haʼu.”

¹⁴ Eliza neʼebé temi ona, hatete: “Dala ida-idak neʼebé haʼu tuir reuniaun no halaʼo estudu pesoál, neʼe fó-hanoin haʼu katak Jeová rona mai haʼu no hadomi tebes haʼu. Neʼe halo haʼu kontente.” Katuas área ida iha Áfrika Súl naran Nolan konta kona-ba buat neʼebé ajuda nia no ninia feen Diane, hodi dehan: “Ami kontinua halaʼo ami-nia toman espirituál maski ami sente laran-kraik. Jeová sempre ajuda ami atu iha hanoin neʼebé pozitivu. Ami koko atu hanoin-hetan katak Jeová sempre ajuda no haraik bensaun mai ami. Ami la hatene oinsá nia halo nuneʼe, maibé ami hatene duni katak nia sei ajuda ami.”

15. Saida mak ita bele halo atu manán sentimentu negativu? Fó toʼok Ezemplu.

¹⁵ Se ita kontinua sente triste, iha buat balu tan neʼebé ita bele halo atu ajuda ita. Porezemplu, imajina toʼok Ita sente kotuk moras. Atu halakon moras neʼe, karik la toʼo atu laʼo deʼit loroloron. Ita presiza buka-hatene moras neʼe nia hun hodi halo peskiza ka koʼalia ho doutór. Hanesan neʼe mós, ita presiza halo peskiza husi Bíblia no ita-nia publikasaun sira no karik koʼalia ba ema Kristaun neʼebé maduru hodi bele hatene oinsá atu tahan hasoru sentimentu negativu. Haree toʼok sujestaun balu tan neʼebé bele ajuda.

16. Saida mak bele ajuda Ita atu buka-hatene buat neʼebé halo Ita iha sentimentu negativu? (Salmo 139:​1-4, 23, 24)

¹⁶ Husu Jeová ajuda Ita atu hatene buat neʼebé Ita presiza. Liurai David rekoñese katak Jeová hatene didiʼak nia. Tan neʼe, nia husu Jeová atu ajuda nia buka-hatene saida mak halo nia “neon-susar”. (Lee Salmo 139:​1-4, 23, 24.) Ita mós bele halo orasaun ba Jeová atu ajuda Ita buka-hatene saida mak halo Ita iha sentimentu negativu no oinsá atu manán ida-neʼe. Karik Ita mós bele husu pergunta ba Ita-nia an, hanesan: ‘Saida mak halo haʼu neon-susar? Iha buat balu neʼebé sempre halo haʼu hanoin negativu ka lae? Kuandu sentimentu negativu mosu, haʼu koko atu hanoin kona-ba buat neʼebé halo haʼu kontente ka lae?’

17. Ita bele estuda kona-ba tópiku saida atu bele hanoin kona-ba buat neʼebé fó kmaan ba Ita? (Haree mós foto.)

¹⁷ Estuda tópiku sira neʼebé bele ajuda Ita iha Ita-nia situasaun. Dala ruma diʼak atu estuda kona-ba Jeová nia hahalok ida neʼebé bele hametin Ita. Porezemplu, apóstolu Paulo sente domin no agradese bainhira nia hanoin kleʼan kona-ba Jeová nia laran-sadiʼa. Ita mós bele halo nuneʼe. Uza Livru atu ajuda Testemuña ba Jeová buka informasaun, Eskritura sira neʼebé Ajuda Ita-nia Moris, ka publikasaun seluk neʼebé iha ita-nia língua atu buka-hatene tópiku sira hanesan Maromak nia laran-sadiʼa, prontu fó perdua, no domin neʼebé laran-metin. Bainhira Ita hetan informasaun sira neʼebé bele ajuda Ita, halo lista kona-ba neʼe. Rai lista neʼe iha fatin neʼebé Ita bele haree, no estuda fali informasaun sira husi Ita-nia lista bainhira sente triste fali. Koko atu aplika buat neʼebé Ita lee hodi tuir Ita-nia situasaun.—Flp 4:8.

18. Ema Kristaun balu estuda kona-ba tópiku saida?

¹⁸ Eliza neʼebé temi ona halaʼo estudu pesoál kona-ba Job. Eliza hatete: “Haʼu hasoru susar barak iha tempu hanesan. Tan neʼe haʼu estuda kona-ba Job nia ezemplu. Nia hasoru susar barak no sente laran-kraik tebes. Nia la hatene tanbasá nia hasoru susar, maibé nia kontinua sadere ba Jeová.” (Job 42:​1-6) Diane neʼebé temi ona hatete: “Haʼu no haʼu-nia laʼen estuda hodi uza livru Mendekatlah kepada Yehuwa. Ami agradese tanba Jeová ajuda ami. Kuandu ami sente laran-kraik tanba ami-nia fraku, ami hanoin-hetan katak Jeová hanorin ami no ajuda ami atu sai ema neʼebé diʼak liután. Neʼe halo ami sente besik liután ba nia.”—Isa 64:8.

HATEKE BA FUTURU HO KONFIANSA

19. Dala ruma ita sente oinsá, no ita bele fiar kona-ba saida?

¹⁹ Maski ita iha toman espirituál no estudu pesoál neʼebé diʼak, neʼe la dehan katak ita-nia hanoin no sentimentu negativu sei lakon iha dalan neʼebé kompletu. Karik dala ruma ita sente katak ita mak kuitadu loos! Maibé, ho Jeová nia ajuda, ita bele luta hasoru sentimentu negativu bainhira neʼe mosu fali. Ita fiar katak ita bele moris haksolok tanba iha relasaun diʼak ho Jeová no hatene katak nia kontente ho buat neʼebé ita halo ba nia.

20. Ita deside metin atu halo saida?

²⁰ Mai ita deside metin atu luta hasoru sentimentu negativu kona-ba ita-nia pasadu, problema, no fraku sira. Ho Jeová nia ajuda, ita bele kontrola ita-nia sentimentu negativu. (Sal 143:10) Ita bele hein ba moris iha mundu foun, no iha neʼebá ita sei hanoin deʼit kona-ba buat neʼebé halo ita kontente. No ita sei hadeer iha dadeer ho sentimentu kontente tanba serbí Maromak Jeová neʼebé nakonu ho domin!