Tanbasá ita presiza Jesus nia sakrifísiu?

1-2. Ita presiza livre husi saida, no tanbasá? (Roma 7:​22-24) (Haree mós dezeñu.)

IMAJINA toʼok, uma monu no hanehan mane ida. Nia sei moris hela, maibé presiza ema atu ajuda nia. Buat neʼebé nia bele halo mak hakilar hodi husu ajuda no hein katak ema ruma bele salva nia.

² Ita hotu hasoru situasaun neʼebé hanesan. Bainhira Adão kontra Jeová, nia sai ema sala-naʼin. Tuirmai nia hadaʼet sala neʼe ba ninia oan no bei-oan sira. Rezultadu mak ita hotu sai atan ba sala, hanesan mane neʼebé uma mak hanehan no la iha kbiit atu salva ninia an. Apóstolu Paulo temi ita-nia kondisaun nuʼudar sala-naʼin iha ninia karta ba ema Kristaun iha Roma. (Lee Roma 7:​22-24.) Nia husu: “Sé mak sei salva haʼu husi isin neʼebé lori haʼu ba mate neʼe?” Paulo hetan sala husi Adão, neʼebé ikusmai lori nia ba mate. (Rom 6:23) Ita mós hasoru situasaun neʼebé hanesan. Ita presiza ema ruma atu salva ita!

3. Jesus nia sakrifísiu loke dalan mai ita atu hetan saida deʼit?

³ Paulo laʼós deʼit temi kona-ba situasaun susar neʼebé nia hasoru, maibé nia mós fó sai esperansa. Depois husu tiha “Sé mak sei salva haʼu?”, nia hatete: “Obrigadu ba Maromak liuhusi Jesus Kristu ita-nia Naʼi!” (Rom 7:25) Paulo refere ba Jesus nia sakrifísiu. Jesus nia sakrifísiu loke dalan mai ita atu (1) hetan perdua ba ita-nia sala, (2) iha esperansa atu sai perfeitu fali, no (3) bele sai Maromak nia belun. Bainhira ita aprende kona-ba pontu sira-neʼe, neʼe bele ajuda ita atu haburas liután ita-nia domin ba Jeová, “Maromak neʼebé fó esperansa”. (Rom 15:13) Ita mós sei hafolin liután Jesus neʼebé fó ninia moris nuʼudar ‘sakrifísiu atu sosa fali ita hodi ita sai livre’.—Kol 1:14.

LIUHUSI JESUS NIA SAKRIFÍSIU ITA HETAN PERDUA

4-5. Tanbasá ita hotu presiza Jesus nia sakrifísiu? (Eclesiastes 7:20)

⁴ Ita presiza Jesus nia sakrifísiu atu bele hetan perdua ba ita-nia sala. Ema hotu halo sala liuhusi liafuan no hahalok. (Lee Eclesiastes 7:20.) Sala balu mak sériu tebes. Porezemplu, tuir Moisés nia Ukun-Fuan, ema neʼebé halo adultériu no oho ema tenke hetan kastigu-mate. (Lev 20:10; Núm 35:​30, 31) Klaru katak sala barak laʼós sériu, maski nuneʼe hahalok sira-neʼe mak nafatin sala. Porezemplu, David hatete: “Haʼu sei kuidadu haʼu-nia hakat atu la halo sala ho haʼu-nia nanál.” (Sal 39:1) Neʼe katak ita mós bele halo sala liuhusi ita-nia liafuan.—Tgo 3:2.

⁵ Hanoin toʼok kona-ba buat neʼebé ita hatete ka halo ona. Ita koʼalia ona liafuan ruma ka halo buat ruma neʼebé ikusmai ita arrepende ka lae? Klaru katak resposta ba pergunta neʼe mak sin. Bíblia hatete: “Se ita dehan: ‘Ita la iha sala’, ita bosok ita-nia an no lia-loos la hela iha ita.”—1 João 1:8.

6-7. Saida mak sai nuʼudar razaun ba Jeová atu perdua ita-nia sala? (Haree mós dezeñu.)

⁶ Jesus nia sakrifísiu mak sai nuʼudar razaun ba Jeová atu perdua ita-nia sala. (Éf 1:7) Maski Jeová bele perdua ita, maibé neʼe la dehan katak nia taka matan deʼit ba ita-nia sala. Jeová la gosta bainhira ita halo sala. (Isa 59:2) Tanba ninia justisa, nia presiza halo buat ruma hodi bele iha razaun atu perdua ita-nia sala.

⁷ Tuir Moisés nia Ukun-Fuan, ema Izraél presiza fó animál nuʼudar sakrifísiu atu hamoos sira-nia sala. (Lev 4:​27-31; 17:11) Sakrifísiu sira-neʼe sai nuʼudar lalatak ba Jesus nia sakrifísiu neʼebé boot liu no lori bensaun barak. Jesus nia sakrifísiu mak sai nuʼudar razaun ba Jeová atu perdua ita-nia sala. Paulo komprende katak Jesus nia sakrifísiu mak importante. Tan neʼe, iha ninia karta ba ema Kristaun iha Korinto, depois fó sai tiha kona-ba sira-nia hahalok uluk neʼebé aat, Paulo hatete: “Maibé agora Maromak fase moos ona imi, halo santu ona imi, no Maromak haree ona imi nuʼudar ema laran-loos hodi Naʼi Jesus Kristu nia naran no hodi ita-nia Maromak nia espíritu.”—1 Kor 6:​9-11.

8. Antes tuir Memoriál ba tinan neʼe, diʼak atu hanoin kona-ba saida?

⁸ Antes tuir Memoriál ba tinan neʼe, uza tempu atu hanoin kona-ba oinsá Ita-nia moris sai diʼak liu tanba Jeová perdua Ita. Porezemplu, tanba Jesus nia sakrifísiu, Ita la presiza hanoin barak kona-ba sala sériu neʼebé uluk Ita halo se Ita arrepende an ona. Oinsá se Ita sente susar atu fiar ida-neʼe? Karik Ita hatete ba Ita-nia an: ‘Haʼu komprende katak Jeová perdua haʼu, maibé haʼu labele perdua haʼu-nia an.’ Se Ita sente hanesan neʼe, hanoin-hetan bá katak Jeová mak ida neʼebé fó perdua ba Ita, no nia fó ona podér ba ninia Oan-Mane atu tesi-lia. Jeová la fó podér ba Ita ka ema ruma atu deside sé mak sei simu ka la simu ninia laran-sadiʼa. Bíblia hatete: “Se ita laʼo iha naroman laran hanesan [Jeová] mós hela iha naroman laran, . . . ninia Oan-Mane Jesus nia raan bele hamoos ita-nia sala hotu.” (1 João 1:​6, 7) Ita bele fiar katak neʼe mak loos, hanesan ita fiar ba Bíblia nia hanorin seluk. Jesus nia sakrifísiu mak sai nuʼudar razaun ba Jeová atu hatudu laran-sadiʼa mai ita, no Bíblia hatete katak nia “prontu atu fó perdua”.—Sal 86:5.

LIUHUSI JESUS NIA SAKRIFÍSIU ITA IHA ESPERANSA

9. Tuir Bíblia, liafuan “sala” refere ba saida? (Salmo 51:5 no nota)

⁹ Iha Bíblia, liafuan “sala” refere ba asaun no mós kondisaun nuʼudar ema sala-naʼin husi moris mai kedas. (Lee Salmo 51:5 no nota.) Entaun, ita laʼós deʼit iha hanoin no hahalok neʼebé sala, maibé ita-nia isin la halaʼo funsaun tuir dalan neʼebé Jeová kria, no ita sai moras, idade, no mate. Tan neʼe, bebé neʼebé foin moris no seidauk halo sala mós bele moras no mate. Neʼe mós ajuda ita komprende tanbasá ema diʼak no aat hasoru susar no mate. Tanba Adão nia sala, ita hotu hasoru situasaun susar neʼe.

10. Adão no Eva sente oinsá depois sira halo tiha sala?

¹⁰ Hanoin kona-ba saida mak Adão no Eva sente depois sira halo tiha sala. Sala neʼe halo sira sente la diʼak. Depois kontra tiha Maromak, Adão no Eva sente kedas konsekuénsia tanba kontra Maromak nia ukun-fuan, katak ukun-fuan neʼebé “hakerek ona iha sira-nia laran”. (Rom 2:15) Sira sente buat ruma la loos iha sira-nia laran, tan neʼe sira presiza taka sira-nia isin parte balu no subar husi sira-nia Kriadór hanesan kriminozu ida. (Gén 3:​7, 8) Ba dala primeiru, Adão no Eva sente sala, moe, no laran-taridu. Sira tenke tahan hasoru sentimentu neʼe toʼo sira mate.—Gén 3:​16-19.

11. Tanba ita hotu sala-naʼin, neʼe afeta ita iha dalan oinsá?

¹¹ Tanba ita hotu sala-naʼin, dala ruma ita mós sente sala, moe, no laran-taridu, no neʼe lori susar mai ita. Maski ita hakaʼas an atu hadiʼa ita-nia moris no hasees an husi problema, sei iha nafatin problema neʼebé ita rasik labele rezolve. Tanbasá? Bíblia hatete: “Tanba kriasaun sira entrega tiha ona ba moris neʼebé folin-laek.” (Rom 8:20) Neʼe laʼós deʼit kona ita rasik, maibé kona ema hotu. Porezemplu, hanoin kona-ba ema nia hakaʼas an atu hadiʼa ambiente, kontrola krime, halakon kiak, no kria dame entre nasaun sira. Karik sira hetan susesu iha buat balu, maibé labele rezolve problema hotu. Maski nuneʼe, tanba Jesus nia sakrifísiu, ita iha esperansa neʼebé loos. Esperansa neʼe mak saida?

12. Jesus nia sakrifísiu fó ita esperansa saida?

¹² Tanba Jesus nia sakrifísiu, ita iha esperansa atu “sai livre husi atan ba isin neʼebé dodok”. (Rom 8:21) Neʼe katak bainhira ita sai perfeitu ona iha paraízu, ita sei la hetan tan moras ka sente depresaun. Ita mós sei la sente tan sala, moe, ka laran-taridu. Liután neʼe, Jesus Kristu neʼebé sosa fali ita mak sei ukun nuʼudar “Ulun-Naʼin Dame nian”. Nia sei ajuda ema moris ho dame hodi rezolve problema hotu neʼebé sira rasik labele rezolve.—Isa 9:​6, 7.

13. Antes tuir Memoriál ba tinan neʼe, diʼak atu hanoin kona-ba saida tan?

¹³ Hanoin kona-ba Ita-nia moris mak oinsá kuandu Ita perfeitu ona. Ita sei hadeer iha dadeer hodi iha sentimentu neʼebé diʼak, no Ita sei nunka hanoin barak katak Ita ka ema neʼebé Ita hadomi sei hamlaha, moras, ka mate. Ohin loron mós Ita bele sente dame nuʼudar Ita “kaer metin ba esperansa . . . hanesan ankor neʼebé loos no metin ba ita-nia moris”. (Ebr 6:​18, 19) Hanesan ankor neʼebé halo ró estavel, Ita-nia esperansa bele halo Ita-nia fiar estavel no ajuda Ita atu tahan susar naran deʼit agora. Ita bele fiar metin katak Jeová sei “fó kolen ba sira neʼebé buka nia ho laran”. (Ebr 11:6) Liuhusi Jesus nia sakrifísiu deʼit mak ita bele sente kmaan agora no iha esperansa neʼebé loos kona-ba futuru.

LIUHUSI JESUS NIA SAKRIFÍSIU ITA BELE SAI MAROMAK NIA BELUN

14. Oinsá mak sala afeta ita-nia relasaun ho Maromak, no tanbasá?

¹⁴ Husi tempu neʼebé Adão no Eva halo sala, ema labele iha tan relasaun diʼak ho Jeová. Bíblia hatete katak ema hotu dook ona husi Maromak. (Rom 8:​7, 8; Kol 1:21) Tanbasá? Tanba Jeová mak perfeitu no nia labele taka matan deʼit ba sala sira. Bíblia hatete kona-ba Jeová: “Ita-nia matan mak santu liu atu hateke ba buat neʼebé aat, no Ita la simu hahalok aat.” (Hab 1:13) Sala halo kotu ita-nia relasaun ho Jeová. Atu bele iha fali relasaun ho Jeová, presiza iha buat ruma atu bele liga fali. No Jesus nia sakrifísiu mak hanesan ponte neʼebé bele liga fali ita ho Maromak nuʼudar belun.

15. Oinsá mak Jesus nia sakrifísiu ajuda ema atu hadame malu fali ho Maromak?

¹⁵ Bíblia hatete katak Jesus mak “sakrifísiu neʼebé hasaʼe ona ba ita-nia sala”. (1 João 2:2) Liafuan Gregu neʼebé tradús nuʼudar “sakrifísiu neʼebé hasaʼe ona” fó ideia kona-ba buat neʼebé halo Jeová sente kalma. Klaru katak Jeová la sente kalma kuandu Jesus mate. Maibé, neʼe halo Jeová sente satisfás tanba iha ona razaun neʼebé justu atu hadame malu fali ho ita ema. (Rom 3:​23-26) Jeová mós haree ninia atan sira iha tempu uluk nuʼudar ema laran loos maski Jesus seidauk mate. (Gén 15:​1, 6) Tanbasá? Tanba Jeová fiar metin katak ninia Oan-Mane Jesus sei fó duni ninia moris nuʼudar sakrifísiu. (Isa 46:10) Sakrifísiu neʼe loke dalan ba ema atu hadame malu fali ho Maromak.

16. Antes tuir Memoriál ba tinan neʼe, diʼak atu hanoin tan kona-ba saida? (Haree mós dezeñu.)

¹⁶ Hanoin kona-ba oinsá Ita iha moris neʼebé kontente agora tanba iha relasaun diʼak ho Jeová. Porezemplu, Ita bele bolu Jeová nuʼudar “Aman” hanesan buat neʼebé Jesus hanorin. (Mt 6:9) Ita mós bolu Jeová nuʼudar “Belun”. Bainhira ita uza liafuan “Aman” ka “Belun”, ita tenke hatudu respeitu kleʼan no haraik an. Tanbasá? Tanba ita sala-naʼin no labele iha relasaun diʼak ho Jeová ho ita-nia hakaʼas an rasik. Tuir loloos, Jeová mak ida neʼebé fó ninia Oan-Mane atu ita bele sai belun fali ho nia. Jeová mak “halo dame fali buat hotu ba ninia an . . . liuhusi raan neʼebé [Jesus] fakar iha ai-riin terus nian.” (Kol 1:​19, 20) Tan neʼe mak ita bele sai belun ho Jeová maski agora ita mak sala-naʼin.

JESUS NIA SAKRIFÍSIU PROVA KATAK JEOVÁ MAK LARAN-SADIʼA

17. Oinsá mak Jesus nia sakrifísiu prova katak Jeová “riku ho laran-sadiʼa”? (Éfeso 2:​4, 5)

¹⁷ Jesus nia sakrifísiu prova katak Jeová “riku ho laran-sadiʼa”. Nia “fó ona moris ba ita . . . maski ita mate tanba ita-nia sala”. (Lee Éfeso 2:​4, 5.) Hanesan mane ida neʼebé uma hanehan, ema neʼebé haraik an rekoñese katak sala mak hanehan hela sira no presiza sai livre. Sira husu makaʼas atu hetan ajuda. (Após 13:48) Jeová ajuda ema sira-neʼe liuhusi liafuan diʼak kona-ba ninia Ukun, atu nuneʼe sira bele koñese nia no ninia Oan-Mane Jesus. (João 17:3) Satanás sala duni bainhira nia hanoin katak Adão no Eva nia sala bele hapara Maromak atu kumpre Ninia hakarak.

18. Bainhira hanoin kleʼan kona-ba Jesus nia sakrifísiu, ita presiza hanoin-hetan saida?

¹⁸ Bainhira hanoin kleʼan kona-ba benefísiu neʼebé ita hetan husi Jesus nia sakrifísiu, ita mós presiza hanoin-hetan razaun prinsipál tanbasá Jeová fó ida-neʼe. Nia fó Jesus nia sakrifísiu laʼós deʼit atu salva ita, maibé mós atu kumpre buat neʼebé importante liu, neʼe mak atu hatán ba lia neʼebé Satanás hasaʼe iha jardín Eden. (Gén 3:​1-5, 15) Liuhusi Jesus nia sakrifísiu, Jeová hatudu katak buat neʼebé Satanás dehan kona-ba nia mak la loos. Nia mós salva ita husi sala no mate, neʼe prova katak nia mak Maromak neʼebé domin. No tanba Jeová nia laran-diʼak neʼebé boot, maski ita mak sala-naʼin, Jeová fó ita priviléjiu atu prova katak lia neʼebé Satanás fó sai kona-ba Nia mak bosok. (Prov 27:11) Oinsá mak Ita bele hatudu agradese ba Jesus nia sakrifísiu? Ita sei hatán ba pergunta neʼe iha lisaun tuirmai.