Violénsia ho kilat iha mundu tomak—Saida mak Bíblia dehan?

Iha Jullu 2022, akontese violénsia ho kilat iha mundu tomak:

• “Ema tiru mate polítiku-naʼin ida neʼebé famozu iha Japaun [Eis primeiru ministru naran Shinzo Abe]. Akontesimentu neʼe fó impaktu boot ba nasaun neʼe no mós mundu tomak, liuliu tanba nasaun neʼe ladún mosu krime no lei kona-ba bandu atu uza kilat mak makaʼas tebes.”—10 Jullu 2022, The Japan Times.

• “Nasaun Dinamarka hakfodak tanba mane ida tiru mate ema naʼin-tolu iha loja boot iha Copenhagen.”—4 Jullu 2022, Reuters.

• “Áfrika súl: Mane ida tiru mate ema naʼin-15 iha bar iha área rezidensiál Soweto.”—10 Jullu 2022, The Guardian.

• “Ema naʼin-220 liu mak mate tanba ema tiru ho kilat iha Estadus Unidus durante findesemana primeiru iha fulan-Jullu toʼo data 4 Jullu.”—5 Jullu 2022, CBS News.

Iha ka lae esperansa katak violénsia hanesan neʼe sei la iha tan? Saida mak Bíblia dehan?

Violénsia sei la iha tan

Bíblia bolu ita-nia tempu nuʼudar “loron ikus sira”, durante tempu neʼe ema sei hatudu hahalok “siʼak”, brutál, no hahalok aat oioin. (2 Timóteo 3:1, 3) Violénsia hanesan neʼe halo ema moris iha taʼuk nia laran. (Lucas 21:11) Maibé Bíblia promete katak tempu sei toʼo mai kuandu violénsia sei la iha tan no “povu sei hela iha fatin neʼebé iha dame, sira sei hela iha fatin neʼebé hakmatek no seguru”. (Isaias 32:18) Maibé oinsá mak neʼe bele akontese?

Maromak sei halakon buat aat no harahun armas hotu.

• “Kona-ba ema aat, sira sei lakon husi rai.”—Provérbios 2:22.

• “[Maromak] sei hapara funu sira iha mundu tomak. Nia halo tohar rama no harahun diman; nia sunu kuda-karreta funu nian.”—Salmo 46:9.

Maromak sei halakon violénsia nia hun hodi hanorin ema atu moris ho dame.

• “Sira sei la halo buat aat ida no mós la estraga buat ida iha haʼu-nia foho santu tomak, tanba mundu tomak sei nakonu ho koñesimentu kona-ba Jeová hanesan bee taka tasi tomak.”—Isaias 11:9.

• Agora daudaun Maromak hanorin ninia povu iha mundu tomak atu la halo tan violénsia no la uza armas. Sira sei “tuku sira-nia surik sai xarrua no tuku sira-nia diman sai sabit”.—Miqueias 4:3.

Atu aprende liután Bíblia nia promesa kona-ba moris ho seguru, lee informasaun “Bebas dari Ketakutan—Mungkinkah?”

Atu aprende liután kona-ba solusaun permanente ba violénsia, lee informasaun “Damai di Bumi Akhirnya!”