Kopa Mundiál bele duni lori unidade ba ema ka lae?—Saida mak Bíblia dehan?

Maizumenus ema biliaun lima mak nonton FIFA Kopa Mundiál neʼebé hahú ona husi 20 Novembru toʼo 18 Dezembru 2022. Ema barak espera katak desportu hanesan neʼe laʼós deʼit halo ema neʼebé nonton sente unidade, maibé mós bele lori buat diʼak seluk tan.

• “Desportu iha kbiit atu lori mudansa ba mundu, atu fó inspirasaun, no atu halo ema unidade liuhusi dalan neʼebé úniku.”—Nelson Mandela, eis prezidente Áfrika Súl.

• “Tebe-bola bele lori unidade ba ema tanba neʼe halo sira sente iha esperansa, kontente, hadomi malu, no halo ema husi rasa no kultura oioin bele iha unidade.”—Gianni Infantino, prezidente FIFA.a

Kopa Mundiál ka desportu naran deʼit bele kumpre duni buat sira-neʼe ka lae? Iha esperansa kona-ba dame no unidade ka lae?

Neʼe lori duni unidade ba ema?

Kopa Mundiál tinan neʼe laʼós deʼit kona-ba desportu tebe-bola. Eventu neʼe hamosu ona debate kona-ba problema sosiál no polítiku neʼebé envolve direitus umanus, rasizmu, no ekonomia.

Maski nuneʼe, ema barak nafatin sente kontente atu nonton eventu internasionál sira hanesan Kopa Mundiál. Maibé eventu sira-neʼe labele lori unidade ba nafatin tanba tuir loloos neʼe hatudu hahalok no asaun neʼebé haketak malu iha tempu neʼebé Bíblia temi nuʼudar “loron ikus sira”.—2 Timóteo 3:1-5.

Esperansa neʼebé loos kona-ba unidade iha mundu

Bíblia fó sai esperansa neʼebé loos kona-ba unidade iha mundu. Bíblia promete katak ema hotu iha mundu sei moris ho unidade iha governu ida neʼebé ukun husi lalehan, neʼebé Bíblia temi nuʼudar “Maromak nia Ukun”.—Lucas 4:43; Mateus 6:10.

Jesus Kristu nuʼudar liurai ba Ukun neʼe sei lori duni dame mai mundu. Bíblia dehan:

• “Ema laran-loos sei buras, no dame sei sai barak.”—Salmo 72:7.

• “Nia sei salva ema kiak neʼebé halerik atu husu ajuda . . . Nia sei salva sira husi ema neʼebé hanehan sira no husi violénsia.”—Salmo 72:12, 14.

Agora daudaun mós Jesus nia hanorin sira lori ona unidade ba ema millaun ba millaun iha rai hamutuk 239. Sira aprende atu la odi malu. Atu hatene liután, lee informasaun ho títulu “Hapara siklu odi malu”.