Olimpíada bele duni halo ema iha unidade ka lae?—Saida mak Bíblia dehan?

Durante Olimpíada 2024, maizumenus ema billaun lima sei haree atleta husi rai 206 neʼebé sei partisipa iha jogu oioin. Thomas Bach, prezidente ba Komisaun Olimpíada Internasionál hatete: “Ita sai parte ba eventu ida neʼebé lori dame no unidade ba mundu. Mai ita hafolin ideia husi olimpíada neʼe katak ema hotu presiza halaʼo moris ho dame no unidade, maski ita hotu la hanesan.”

Olimpíada neʼe bele kumpre objetivu furak neʼe ka lae? Ita bele duni iha dame no unidade neʼebé loos ka lae?

Olimpíada bele lori dame no unidade ka lae?

Olimpíada tinan neʼe nian halo ema hanoin katak eventu neʼe laʼós kona-ba desportu deʼit. Jogu sira-neʼe hatudu sai ho klaru problema sosiál no polítiku neʼebé haketak ema. Problema sira-neʼe inklui kona-ba ema nia direitu, rasizmu, diskriminasaun ba relijiaun oioin, no problema kona-ba jéneru.

Eventu internasionál kona-ba desportu hanesan olimpíada lori kontente ba ema. Maibé, eventu sira-neʼe mós hatudu sai katak ema iha atitude no hahalok neʼebé halo ema haketak malu no anima ema atu kontinua iha hanoin no hahalok hanesan neʼe, duké hatudu hahalok neʼebé lori dame no unidade.

Bíblia fó sai nanis katak ema sei hatudu hahalok oioin neʼebé halo susar atu iha unidade. (2 Timóteo 3:1-5) Atu aprende liután kona-ba Bíblia nia profesia neʼe, lee informasaun “Bíblia fó sai nanis kona-ba ema sira-nia hahalok ohin loron ka lae?”

Esperansa neʼebé loos kona-ba dame no unidade

Bíblia fó esperansa neʼebé ita bele tau fiar kona-ba dame no unidade iha mundu tomak. Bíblia promete katak “Maromak nia Ukun” ka governu neʼebé harii iha lalehan sei lori unidade ba ema hotu iha mundu.—Lucas 4:43; Mateus 6:10.

Jesus Kristu nuʼudar Liurai ba Ukun neʼe, sei lori dame ba mundu tomak. Bíblia hatete:

• “Ema laran-loos sei buras, no dame sei sai barak.”—Salmo 72:7.

• “Nia sei salva ema kiak neʼebé halerik atu husu ajuda . . . Nia sei salva sira husi ema neʼebé hanehan sira no husi violénsia.”—Salmo 72:12, 14.

Ohin loron, Jesus nia hanorin halo ona ema millaun ba millaun husi rai 239 iha unidade. Nuʼudar ema Kristaun, Testemuña ba Jeová iha mundu tomak aprende ona atu moris ho dame. Atu buka-hatene liután, lee informasaun husi Livru Haklaken ho títulu “Hapara siklu odi malu”.