Marcos 11:24—“Buat hotu neʼebé imi husu iha orasaun, fiar bá katak imi simu ona”

“Tan neʼe mak haʼu hatete ba imi: Buat hotu neʼebé imi husu iha orasaun, fiar bá katak imi simu ona, no imi sei hetan duni.”—Marcos 11:24, Tradusaun Mundu Foun.

“Neʼe duni, Haʼu dehan ba imi: buat nebe imi resa hodi husu, fiar ba katak imi sei simu; nia sei mosu duni ba imi.”—Marcos 11:24, Liafuan diak ba imi, segunda edisaun.

Signifikadu husi Marcos 11:24

Jesus hatudu ba ninia dixípulu sira katak importante tebes atu fiar metin ba kbiit husi orasaun. Maromak laʼós rona deʼit sira-nia orasaun, maibé nia mós hatán ba sira. Ema neʼebé halo orasaun hodi tuir Maromak nia hakarak bele fiar duni katak buat neʼebé sira husu iha orasaun sei sai loos. Neʼe hanesan buat neʼebé sira hatoʼo iha orasaun sai realidade ona.

Jesus hatete katak importante duni atu halo orasaun ho fiar metin. Nia esplika katak ema neʼebé halo orasaun labele “laran-rua” maibé presiza “fiar katak buat neʼebé nia dehan sei sai loos”. (Marcos 11:23) Tanbasá? Tanba ema neʼebé laran-rua “labele hein katak nia sei simu buat ida husi Jeová”.a—Tiago 1:5-8.

Ema neʼebé fiar metin halo orasaun beibeik iha situasaun oioin. (Lucas 11:9, 10; Roma 12:12) Hodi halo nuneʼe, nia hatudu katak nia presiza duni buat neʼebé nia husu no nia fiar metin katak Maromak bele hatán ba ninia orasaun. Klaru, nia mós rekoñese katak karik Maromak sei hatán ninia orasaun iha dalan no tempu neʼebé la hanesan ho buat neʼebé nia espera.—Éfeso 3:20; Ebreu 11:6.

Maibé Jesus nia liafuan neʼe la dehan katak ema hotu bele hein atu simu buat naran deʼit neʼebé sira husu ba Maromak. Jesus koʼalia liafuan neʼe ba ninia dixípulu sira neʼebé hakaʼas an duni atu adora Maromak Jeová iha dalan neʼebé loos. Bíblia dehan katak Jeová rona deʼit ba orasaun neʼebé tuir ninia hakarak. (1 João 5:14) Jeová la rona ba ema neʼebé lakohi halo tuir Ninia mandamentu sira no kontinua halo buat neʼebé aat no la arrepende an. (Isaias 1:15; Miqueias 3:4; João 9:31) Atu aprende liután kona-ba orasaun neʼebé Maromak rona, haree vídeo badak neʼe.

Kontestu husi Marcos 11:24

Loron balu antes Jesus mate, nia hanorin ninia dixípulu sira katak importante tebes atu hatudu fiar metin ba Maromak. Nia fó sai lisaun neʼe hodi uza ilustrasaun ida. Bainhira sira halo viajen ba Jeruzalein, Jesus haree ai-figeira hun ida neʼebé iha tahan barak. Maibé ai-hun neʼe la fó fuan, tan neʼe Jesus haruka ai-hun neʼe atu labele fó fuan tan. (Marcos 11:12-14) Ai-hun neʼebé haree hanesan fó fuan maibé loloos lae mak hanesan ho nasaun Izraél antigu, neʼebé finje adora Maromak, maibé tuir loloos la iha fiar. (Mateus 21:43) Lakleur deʼit, ai-figeira hun neʼe sai maran husi abut. Neʼe hatudu sai buat neʼebé lakleur tan sei akontese ba nasaun Izraél neʼebé la hatudu fiar.—Marcos 11:19-21.

Maski nuneʼe, Jesus la duvida katak ninia dixípulu sira bele haburas sira-nia fiar toʼo bele manán hasoru susar no kumpre buat furak oioin. (Marcos 11:22, 23) Jesus fó konsellu kona-ba orasaun ba ninia dixípulu sira iha tempu neʼebé loos tanba lakleur tan sira-nia fiar sei hetan koko. Jesus sei mate no ema sei fó susar liután ba sira atu hapara serbisu haklaken. (Lucas 24:17-20; Apóstolu 5:17, 18, 40) Nuneʼe mós ho ohin loron, Jesus nia dixípulu sira bele manán hasoru situasaun susar oioin bainhira sira hatudu fiar ba Maromak no kbiit husi orasaun.—Tiago 2:26.

Haree vídeo badak neʼe hodi komprende kona-ba livru Marcos.