Talily Soa Nisorate i Matio
11 Naho fa boake nagnomey toromareke i mpiana’e 12 rey ty Jesosy, le nandeha nitory naho nampianatse amy ty tanàgne magnodidigne ey.
2 Faie naho fa naharey i raha natao i Kristy rey ty Jaona tamy ireke nigadray, le nirahe’e mbama’e mbeo i mpiana’e rey, 3 mba hagnontane aze tie: “Irehe vao i Ndaty Ho Avy nilignisagney sa mbe mandigne ndaty hafa zahay?” 4 Le hoe ty navale i Jesosy iareo: “Mandehana atalilio’areo i Jaona ty raha nirei’areo naho nitrea’areo retoa: 5 Nampahatreavegne ty ndaty goa, nampandehanegne ty ndaty maleme, niliovegne ty ndaty voa ty habokagne,* nampahareizegne ty ndaty karegnegne, nivelomegne indraike ty ndaty nimate, le ty ndaty mahantra nirehafagne i talily soay. 6 Sambatse ze ndaty tena matoky ahy.”*
7 Naho fa nandeha i mpiana i Jaona rey, le nirehake ty miomba aze tamy i vahoake rey ty Jesosy tie: “Hagnente ino nandehana’areo niboake tam-patrambey agneo? Bararata raike aviombio o tiokeo vao? 8 Sa niboake mba hagnente ino inareò? Ndaty magnisy akanjo fanjaka vao? Amy ty tragno o mpanjakao agne ro misy ndaty magnisy akanjo fanjaka. 9 Inogne maregne areke o anto’e niboaha’areò? Hagnente mpaminany vao? Eka. Rehafeko ama’areo, fa lahibey lavitse mandikoatse o mpaminanio. 10 Izao ty voasoratse miomba aze: ‘Hiraheko aloha’o eo i irakoy mba hagnomagne ty lalagne homba’o.’ 11 Volagneko ama’areo to vata’e, fa naho amy ze nateran’ampela, le tsy misy lahibey ambone i Jaona Mpanao Badisa. Faie lahibey ambone’e ze ndaty fara’e kidikidy amy i Fanjakà i lagnitsey ao. 12 Nanomboke tamy ty andro i Jaona Mpanao Badisa hatrake amy izao, le i Fanjakà i lagnitsey ty tanjogne ifofora o ndatio mafe. Le ze mifofotse mafe ro mahazo aze. 13 Fa ndra o Mpaminanio ndra o Lalànao, le sambe nirehake faminaniagne iaby, amparake ty nanomboha i Jaona ty fanompoa’e. 14 Ndra inoa’areo ndra tsy inoa’areo, le i Jaona, i Elia mpaminany nirehafegne tie ho avỳ. 15 Ho anareo ze afake mitsanogne, le mitsanogna soa.
16 “Inogne koahe ty hampitovieko amy ty taranake toy? Ajaja mitoboke a bezara ey sady mitokatoka ty nama’e. 17 Hoe iareo tie: ‘Fa nitiofe’ay i solỳ faie tsy mba nitsinjake nareo; fa nanao hira fisaognagne ka zahay faie tsy mba nijerajera ty vata’areo nareo mba hanoroagne ty alahelo’areo.’ 18 Hoe izay ka fa naho fa niavy ty Jaona, le tsy nihinagne sady tsy ninogne. Faie hoe ty reha o ndatio aze: ‘Itoboha ty demonia reke.’ 19 Ie ka i Ana o ndatỳ nihinagne sady ninogne, le hoe o ndatio: ‘Henhenke ty lahy tea hanegne naho mamo lava sady nama o mpitake hetrao naho o mpanotao tike!’ Faie ty fahendrea o ndatio, le hamaregne ty raha atao’e.”
20 Le nanomboke nagnomey tsiny i tanàgne nanoa’e fahagagagne maro rey ty Jesosy, satria tsy mba nibebake iareo. Hoe reke tamy i tanàgney: 21 “Hoazon-doza rehe Korazina! Hoazon-doza ka rehe Betsaida! Satria naho ta Tiro naho ta Sidona agne ty nanoagne i fahagagagne natao tama’o teto rey, le fa ela ty ndaty agne ro ho nibebake, sady ho nagnisy akanjo fisaognagne naho ho nihosotse lavenoke. 22 Faie volagneko ama’areo, fa ndra mbe ho moramora ka ty raha hanjò i Tiro naho i Sidona amy i Andro Fitsaragney naho ampitahaegne amy ty raha hanjò anareo. 23 A ihe ka Kapernaomy, hasondrotse mban-dagnitse mbeo vao rehe? Hizotso mbamy i Kiborỳ mbeo rehe. Naho natao ta Sodoma agne i fahagagagne natao tama’o tao rey, le mbe ho teo o tanàgne iohoe hatrake amy izao. 24 Faie volagneko ama’o, fa ndra mbe ho moramora ka ty raha hanjò ty tanà i Sodoma amy i Andro Fitsaragney naho ampitahaegne amy ty raha hanjò azo.”
25 Hoe ty Jesosy tamy ze fotoagne zay: “O Baba, i Tompo i lagnitsey naho ty tane toỳ, midera azo agnatreha ty ndaty retoagne eto raho, satria naeta’o amo o ndaty mahilalao naho o mahay rahao ze raha rezay, fa nabaribari’o amo o ajajao. 26 Toe izay anio Baba ty zoton’arofo’o!” 27 Le hoe ka ty Jesosy: “Fa nimein-dRaeko ahy iaby ze kila raha. Tsy misy ndaty mahafantatse soa i Anakey naho tsy i Rae avao, le tsy misy ndaty mahafantatse soa i Rae naho tsy i Anakey avao naho ze ndaty tea i Anakey hampibaribariagne aze. 28 Mbamako mbetoa ze miasa mafe naho mavesatse entagne, fa hamelombelogne anareo raho. 29 Ento i baokoy, le mianara amako fa soa fagnahy naho miambane raho, le inareo ka hahazo hery indraike. 30 Satria mora andesegne i baokoy sady tsy mavesatse ty entako.”