Talily Soa Nisorate i Matio

13 Niala tamo o tragno iohoe ao ty Jesosy tamy i andro igne, le nitomboke ta moron-driake ey. 2 Nisy vahoake maro nivory mbama’e mbeo, hafarà’e reke nijogne agnate lakagne ao le nitoboke, fa i vahoakey nitsangagne amy i faseke ta moron-driake eoy. 3 Le nanomboke nampianatse iareo raha maro tamy ty alala ty fagnoharagne reke. Hoe reke: “Nisy mpambole raike nandrarake* tabiry. 4 Ie naho fa nandrarake i tabiry rey reke, le ty ila’e nipoke tan-dalagne ey. Faie naho fa nitrea o vorogneo i tabiry rey, le nihane’e. 5 Ty ila’e amy i tabiry rey ka nipoke amy ty tane be vatovato. Faie le avy le nitiry i tabiry rey satria tsy le nilaleke i tane nisy azey. 6 Ie naho fa nipisagne i tarignandrokey, le nimate iareo satria tsy nisy ho namaharagne i vaha’ey. 7 Ty ila’e amy i tabiry rey ka nipoke amy ty tane feno raha mitiry misy fatipatike. Faie naho fa nitiry i raha misy fatipatike rey, le nandrakoke aze naho namehefehe aze. 8 Fa ty ila’e amy i tabiry rey nipoke amy ty tane soa, le nanomboke namoa. Nisy amy i tabiry rey namokatse, le tena nihoatse ty hamaro i tabiry nambolegney ty vokatse niazo ama’e. Ty ila’e namokatse 100, le ty ila’e namokatse 60, le ty ila’e namokatse 30. 9 Ho anareo ze afake mitsanogne, le mitsanogna soa.”

10 Nimbama’e mbeo areke i mpiana’e rey, le nagnontane aze tie: “Nagnino rehe ie lava mampiasa fagnoharagne avao naho fa mampianatse o ndaty reò?” 11 Le hoe ty navale i Jesosy iareo: “Inareo ro nengagne hahazo ty raha mietake masigne miomba i Fanjakà i lagnitseỳ fa iareo tsy nengagne hahazo izay. 12 Fa ze managne, le vao mainke homeagne maro. Fa ze tsy managne, le ndra i kede anagna’ey aza mbe halaegne ama’e ka. 13 Izay mahavy ahy mampiasa fagnoharagne naho fa mirehake amy iareò, satria magnente iareo faie tsisy raha trea’e, maharey iareo faie tsisy raha rendre’e. Tsy azo iareo ty dika o raha trea iareo naho rey iareò, 14 amy izay hotanterake amy iareo i faminaniagne nisorate i Isaia mpaminany tihoey tie: ‘Haharey nareo faie tsy hoazo’areo ty dika o raha rei’areò. Hahatrea ka nareo faie tsy hofanta’areo ty dika o raha trea’areò. 15 Ty anto’e, nanjare mafe fo ty vahoake toy, le fa naharey ka ty sofy iareo, faie tsy nitaitse iareo, sady akipe iareo ty maso’e, amy izay iareo tsy mahatrea. Izay o mahavy ty fo iareo tsy mahazo ty raha takegne amy iareò, hafarà’e iareo tsy miheregne mba hagnasitragnako iareo.’

16 “Faie sambatse nareo satria mahatrea ty maso’areo, le ty sofi’areo maharey. 17 Volagneko ama’areo to vata’e, fa maro ty mpaminany naho ty ndaty maregne nagniry hahatrea naho haharey ze o raha trea’areo naho rei’areo zao, faie tsy nahatrea naho tsy naharey.

18 “Tsanogno’areo amy izay areke fa izao ty dika i fagnoharagne miomba i lahilahy nandrarake tabirỳ. 19 Ndra ia ndra ia ndaty maharey ty hafatse miomba i Fanjakagney faie tsy mahazo ty dika’e, le ho avy i ratỳ hagnafake i tabiry nambolegne tam-po’e aoy. Izay i tabiry nipoke tan-dalagne eỳ. 20 Le i tabiry nipoke amy ty tane be vatovatoy, le ze maharey i hafatsey, faie le avy le mino* aze sady falefale. 21 Faie tsy namahatse tam-po’e tao i hafatsey, le tsielatsiela avao ty ninoa’e aze. Naho fa nisy raha sarotse areke ndra fagnenjehagne nanjò aze noho ty fagnoriha’e i hafatsey, le nihemotse reke. 22 I tabiry nipoke amy ty tane feno raha mitiry misy fatipatikey, le ze maharey i hafatsey, faie mamehefehe naho mandrakoke i hafatsey ty finekoneko amo ze o fiaignagne zao, naho ty famitaha o harenao,* le hafarà i tabirỳ tsy mamokatse. 23 Le i aze nipoke amy ty tane soay, le ze maharey i hafatsey sady mahazo ty dika’e. Le ty ila’e namokatse 100, ty ila’e namokatse 60, le ty ila’e namokatse 30.”

24 Le nirehake fagnoharagne hafa tamy iareo ka ty Jesosy. Hoe reke: “I Fanjakà i lagnitseỳ, le azo ampitoviegne amy ty lahilahy raike nambole vare tamy i hora’ey ey. 25 Ie naho fa niroro o ndatio, le nisy fahavalo’e niavy mba handrarake tsiparefare tamy i hora’ey ey, le nandeha naho fa niavy eo. 26 Ie nitiry naho namoa i varey, le nitiry ka i tsiparefarey. 27 Naho fa nahatrea izay i mpanompo i lahilahy tompo i horakeỳ rey, le nimbama’e mbeo, le hoe iareo tama’e: “O Ragnandria, tsy vare vao o nambole’o tamy i hora’oy eio, nagnino ie ndra misy tsiparefare ka ty eio?” 28 Le hoe reke tamy i mpanompo’e rey: “Fahavalo ty nanao izay.” Le hoe i mpanompo’e rey: “Tea’o vao naho ombota’ay?” 29 Le hoe reke: “Aha’a, engao’areo avao tsy mone hoazo’areo ombotse reketse aze avao ka i varey. 30 Engao’areo hiarake hitiry ey avao iareo amparake ty hiavia i fotoagne famoriagne vokatsey. Amy izay raho ro hirehake amy i mpamory vokatsey tie: “Omboto’areo hey o tsiparefareo, le avorio’areo, le orò. Ie vita zay vaho izay avorio’areo an-drihako ao i varey.”

31 Le nirehake fagnoharagne hafa tamy iareo indraike reke. Hoe reke tie: “I Fanjakà i lagnitseỳ, le mitovy amy ty voan-tsinapy* raike nambolé ty lahilahy raike tan-tete’e tao. 32 O voa io ty fara’e kidikidy amy ty voan-draha iaby, faie naho fa mitiry reke, le ireke ty fara’e bey amo o folerao iaby sady manjare hatae jabajaba. Hafarà o vorogneo mamboatse tragno amy i sampa’ey ey.”

33 Le nanao fagnoharagne hafa tamy iareo ka ty Jesosy. Hoe reke: “I Fanjakà i lagnitseỳ, le mitovy amy ty lalivay* nalae ty ampela, le nafangaro’e amy ty lafarina intelo o fagnaragnagne beio, amparake ty itomboa i kobay iaby.”

34 Nampiasa fagnoharagne hoe ireo ty Jesosy naho fa nirehake tamy i vahoakey. Ie, lava nampiasa fagnoharagne avao reke naho fa nirehake tamy iareo. 35 Amy izay hotanterake ty raha nampirehafegne o mpaminanio tihoe toy tie: “Hanao fagnoharagne raho; Hagnambara raha naetake nanomboke tamy i famorognagney raho.”

36 Naho fa boake nandrava i vahoakey ty Jesosy, le nizilike tamy ze tragno zay tao. Le nimbama’e mbeo i mpiana’e rey, le hoe iareo: “Mba hazavao ama’ay ty dika i fagnoharagne miomba i tsiparefare tan-korake eỳ.” 37 Le hoe ty navale’e iareo: “I mpambole nambole varey, le i Ana o ndatỳ; 38 i horakey, le ty tontolo toy; i varey, le i ana i Fanjakagney rey, fa i tsiparefare rey, le i ana i ratỳ rey. 39 I fahavalo nandrarake tsiparefarey, le i Devoly; i fotoagne famoriagne vokatsey, le manondro i fotoagne aloha ty hifaragna ty tontolo toỳ. Le o anjelio i mpamory vokatse rey. 40 Satria havory hey i tsiparefare rey vaho izay horoagne, le hoe izay ka ty raha hisy amy ty fotoagne aloha ty hifaragna ty tontolo toy. 41 Hirahe i Ana o ndatỳ o anjeli’eo, mba hagnafake ze ndaty mahavy ty hafa hanota naho hozatse mandika lalàna, soa tie tsy ho agnisa i Fanjakà’ey. 42 Le hatora i anjely rey am-po ty laforo misy afo mirearea agne iareo. Agne iareo ro hangoihoy ty tagny naho hampikodri-nife. 43 Amy ze fotoagne zay, le hamilepiletse manahake i masoandroy amy i Fanjakà i rae iareoy ao o ndaty maregneo. Ho anareo ze afake mitsanogne, le mitsanogna soa.

44 “I Fanjakà i lagnitseỳ, le mitovy amy ty harena sarobily nahaja o ndaty an-teteke agne. Nisy lahilahy nahatrea o harena iohoe, le nagnetake aze indraike. Tena nifale reke, hafarà’e nandeha nivarotse ty fanagna’e iaby mba hivilia’e i tetekey.

45 “I Fanjakà i lagnitseỳ ka, le mitovy amy ty mpitete tsena mipay perla* fara izay ty fanjaka. 46 Ie reke nahatrea perla sarobily raike, le avy le nandeha nivarotse ty fanagna’e iaby, le nivilie’e i perlay.

47 “I Fanjakà i lagnitseỳ ka, le mitovy amy ty harato tarihegne napò ty mpagnarato an-driake agne, le nahazo fiagne sambe karaza’e. 48 Naho fa nifeno i haratoy, le nitarihe iareo a moron-driake ey. Le nitoboke iareo mba hagnambake i fiagney. Ze fiagne soa natao iareo amy i fisiagne azey ao, fa ze fiagne raty naria iareo. Hoe izay ka ty raha hisy amy i vanim-potoagne aloha ty hifaragna ty tontolo toỳ. 49 Ho avy o anjelio, le hagnambake o ndaty raty fagnahio amo o ndaty maregneo. 50 Le hatora iareo agnate ty laforo misy afo mirearea agne o ndaty raty fagnahio. Agne iareo ro hangoihoy ty tagny naho hampikodri-nife.”

51 Le hoe ty Jesosy tamy i mpiana’e rey: “Azo’areo vao ty dika i raha nirehafegne teo iaby rey?” Le hoe iareo: “Eka.” 52 Le hoe reke tamy iareo: “Satria azo’areo ty dika i raha teo rey, le fantaro toy: Ze mpagnanatse* nampianaregne miomba i Fanjakà i lagnitseỳ, le mitovy amy ty lahilahy raike tompon-tragno magnakatse raha vaovao naho raha fa ela boake amy ty tragno fitamiria’e ao.”

53 Niala teo ty Jesosy naho fa boake nanao ze fagnoharagne rezay. 54 Naho fa niavy tamy i tane nahabey azey agne reke, le nanomboke nampianatse o ndatio tamy ze sinagoga zay ao. Le nigaga i ndaty rey sady nirehake tie: “Boake aia ty nahazoa ty lahy tia hilala hoe izao naho ty nahaia’e manao raha mahagaga hoe izao? 55 Tsy i ana-dahy i ndaty mpandrafitseỳ v’io? Tsy i Maria v’ignỳ i agnara i rene’eỳ? Le i Jakoba naho i Josefa naho i Simona vaho i Joda i zai’e lahilahy rey? 56 Tsy amantika etoa avao ka vao ty itoboha i zai’e ampela rey? Hirike aia areke ty nahaia’e o raha rehoe iaby?” 57 Nikalagne iareo tsy hino aze ze raha zay. Faie hoe ty Jesosy tamy iareo: “Amy ty tane niavia’e naho an-tragno’e ao avao o mpaminanio ro tsy hajaegne.” 58 Le tsy nanao fahagagagne maro teo sasa ty Jesosy, satria iareo tsy nino aze.