Talily Soa Nisorate i Matio
17 Enegne andro tafara izay, le nindese i Jesosy tamy ze vohitse abo bey zay agne ty Petera, i Jakoba naho i Jaona rahalahi’e. 2 Le niova tarehe tagnatreha iareo teo ty Jesosy. Nanjare namilepiletse manahake i masoandroy ty tarehe’e, le i akanjo’ey nanjare nifoty bey manahake o hazavagneo. 3 Ie naho fa niavy eo, le nahatrea i Mosesy naho i Elia nifampirehake tamy i Jesosy iareo. 4 Le hoe ty Petera tamy i Jesosy: “O Tompo, soa ho antika ty mitoboke etoa. Naho tea’o, le hanangagne tragnolay telo etoa raho. Ty raike ho azo, le ty raike hoahy i Mosesy, le ty raike hoahy i Elia.” 5 Tamy ireke mbe nirehakey, le nisy rahogne namilepiletse ty nandrakoke iareo. Nisy fiaragnanagne ka ty boake amy i rahogney ao nanao tihoe: “Io i Ana-dahikoy tena teakoy, i ankasitrahakoy. Tsanogno’areo reke.” 6 Naho fa naharey izay i mpianatse rey, le nihohoke amy i taney eo sady tena natahotse. 7 Naho fa niavy eo, le nagnarine iareo ty Jesosy sady nitsapae’e iareo. Le hoe reke: “Mitsangana nareo, le ko matahotse.” 8 Naho fa niandra iareo, le tsy nahatrea ndaty hafa naho tsy i Jesosy raike avao. 9 Naho fa nizotso boake am-bohitse ey iareo, le nandily iareo ty Jesosy tie: “Ko rehafegne ndra amy ia ndra amy ia i fahitagne teoy, amparake ty amelomagne amy ty mate i Ana o ndatỳ.”
10 Faie nagnontane aze i mpianatse rey tie: “Nagnino o mpampianatse lalànao* ro mirehake tie, tsy maintsy ho avy aloha hey ty Elia?” 11 Le hoe ty navale’e: “Ho avy vata’e ty Elia, le hagneregne ze kila raha iaby amy ty toe’e. 12 Faie rehafeko ama’areo, fa fa niavy ty Elia faie tsy nifanta iareo reke, le natao iareo ze raha nitea iareo hatao ama’e. Hoe izay ka fa tsy maintsy hampijaléjalé iareo i Ana o ndatỳ.” 13 Nitaka i mpianatse rey areke tie i Jaona Mpanao Badisa o nirehafe’e amy iareò.
14 Naho fa nimbamy i vahoakey mbeo reke, le nisy lahilahy raike zay nimbama’e mbeo sady nanongaleke taloha’e teo, le nirehake tie: 15 “O Tompo, mba amindrao fo i ana-dahikoy fa voa ty biloka* sady marare! Mateteke reke mitonta agnate afo ao, le mateteke ka reke mitonta agnate rano. 16 Fa nindeseko tamy i mpiana’o rey teo reke faie tsy nivita iareo ty nagnasitragne aze.” 17 Le namale ty Jesosy tie: “Ry taranake tsy manam-pinoagne naho raty fagnahy, hatrake ombia ty tsy maintsy hijanognako ama’areo eto? Hatrake ombia ty tsy maintsy handeferako ama’areo? Indeso’areo mbetoa i ajajay.” 18 Trinevo i Jesosy i demoniay, le niakatse boake amy i ajajay ao. Le avy le nisitragne tamy i fotoagne ignehoe avao i ajajay. 19 Nagnatogne i Jesosy mitokagne i mpiana’e rey, le nagnontane aze tie: “Nagnino ie tsy nivita’ay ty nandroake igneo?” 20 Le hoe ty Jesosy tamy iareo: “Satria nareo kele finoagne. Volagneko ama’areo to vata’e, fa naho manam-pinoagne nareo, ndra tie kidikidy manahake o voan-tsinapio* aza, le mirehake amy ty vohitse tia tie: ‘Mikisaha eroy’, le hikisake ey reke. Sady toe tsy hisy raha tsy hovita’areo.” 21* ——
22 Tamy iareo sambe ta Galelia agney, le hoe ty Jesosy tamy i mpiana’e rey: “Hisy hifotetse i Ana o ndatỳ, le hatolotse an-tagna o ndatio eo, 23 sady hovonoe iareo. Faie hovelomegne indraike reke amy ty andro fahatelo.” Le nalahelo mafe iareo.
24 Naho fa niavy ta Kapernaomy agne iareo, le nimbamy i Petera mbeo i lahilahy mpitake hetra vola roe drakima amy i tempolỳ aoy, sady hoe reke: “Mandoa i hetra roe drakima vao i mpagnanatse anareoio?” 25 Le hoe ty Petera: “Eka.” Faie naho vaho nizilike an-tragno ao ty Petera, le avy le nagnontane aze ty Jesosy tie: “Akore ty heve’o Simona, boake amy ia ty itakea o mpanjaka an-tane etoio i hetra isan-karaza’e rey? Boake amy ty ana iareo vao sa boake amy ty ndaty hafa?” 26 Namale ty Petera tie: “Boake amy ty ndaty hafa.” Le hoe ty Jesosy tama’e: “Tsy mila mandoa hetra areke zane ty ana iareo. 27 Faie mba hahavy iareo tsy ho boseke amantikagne, le akia rehe mandehana an-driake agne, le mamintàgna. Alao ty fiagne azo’o voaloha’e, le sokafo ty vava’e fa hahatrea vola sitatera* raike agnate’e ao rehe. Alao o vola io, le omeo iareo mba ho hetrantika roe.”