Talily Soa Nisorate i Matio
4 Nitarihe i fagnahy masigney tam-patrambey agne ty Jesosy naho fa niavy eo, le nitsapae i Devoly hevetse. 2 Naho fa boake nifaly hanegne tagnate ty 40 handro naho 40 halegne reke, le nikeré. 3 Le nimbama’e mbeo i Mpitsapa Hevetsey sady nirehake tie: “Naho toe anan’Agnahare vata’e rehe, le ampanjareo mofo ty vato retoa.” 4 Faie hoe ty navale’e aze: “Voasoratse* tie: ‘Tsy mofo avao ro paliae o ndatio mba hahavelogne aze fa ze raha saontsie ty falie i Jehovah ka.’”
5 Nente i Devoly amy i tanàgne masigney agne reke naho fa niavy eo, le natao’e amy ty toeragne fara’e abo amy ty manda i tempolỳ eo. 6 Le hoe reke tama’e: “Naho toe anan’Agnahare vata’e rehe, le mitontà ambane agne, satria voasoratse tie: ‘Hagnirake o anjeli’eo reke mba hiaro azo, le hindese iareo an-tagna iareo ey rehe, amy izay tsy hidofotse amo o vatò i tombo’oy.’” 7 Le hoe ty Jesosy tama’e: “Voasoratse ka tie: ‘Ko mitsapa hevetse i Jehovah Andrianagnahare’o.’”
8 Nente i Devoly amy ze vohitse fara’e abo zay reke naho fa niavy eo. Le natoro’e aze ze fanjakagne iaby amy ty tontolo toy eto naho ty voninahy i fanjakagne rey. 9 Le hoe reke tamy i Jesosy: “Homeiko azo iaby o raha rehoe naho miankohoke amako eto indraike avao rehe mba hivavake amako.”* 10 Le hoe ty Jesosy tama’e: “Mberoagne agne rehe Satana! Voasoratse ka tie: ‘I Jehovah Andrianagnahare’o ro tsy maintsy ivavaha’o, le ireke raike avao ka ro tsy maintsy anoa’o fanompoagne masigne.’” 11 Le nenga i Devoly eo reke, faie nisy anjely niavy ama’eo mba hikarakara aze.
12 Naho fa nirey i Jesosy tafara tatoy tie nitsepahegne ty Jaona, le niala ta Galelia agne reke. 13 Tafara ty nialà’e ta Nazareta agne, le nandeha ta Kapernaomy agne reke sady lelia’e nitoboke tao. A moron-driake o tanàgne iohoe, le amy ty faritse misy i Zebolona naho i Naftaly ty misy aze. 14 Tanterake areke tamy izay i raha nampisaontsien’Andrianagnahare i Isaia mpaminany tihoey tie: 15 “O Galelia, tane o firenena hafao, tane i Zebolona naho tane i Naftaly, i mbamy i lalagne mban-driake mbeo sady andafe eroy i Jordanay! 16 Nahatrea fahazavagne lahibey ty ndaty nipetrake tamy ty iegne tao, le nisy fahazavagne nagnilo o nipetrake tamy i faritse alofa ty fatey.” 17 Nanomboke tamy izay ty Jesosy, le nitory tie: “Mibebaha satria fa marine i Fanjakà i lagnitseỳ.”
18 Nandeha ta moron-dria i Galelia agne ty Jesosy tie indraike zay, le nahatrea ndaty mpirahalahy. I Simona i tokavegne tihoe Peteray ty raike, le i Andrea ty faharoe’e. Nandatsake harato an-driake ey iareo, satria mpagnarato ty asa iareo. 19 Hoe ty Jesosy tamy iareo: “Andao hagnorike ahy fa hataoko mpagnarato ndaty nareo.” 20 Le avy le nenga iareo eo i harato iareoy, le nandeha nagnorike i Jesosy iareo. 21 Ie reke niavy alohaloha ao, le nahatrea i Jakoba naho i Jaona. Sambe ana-dahy i Zebedio iareo roe lahy. Tagnate lakagne ao niarake taman-drae’e iareo tamy izay, namboatse ty simba tamy i harato iareoy. Faie naho fa nitokave i Jesosy iareo, 22 le avy le nenga iareo eo i laka iareoy naho i rae iareo, le nandeha nagnorike aze iareo.
23 Nandeha nagneragne i Galelia reke naho fa niavy eo, le nampianatse tamo o sinagogao ao naho nitory ty talily soa i Fanjakagney. Nisitragne’e iaby ka ze karazan’aretegne nahazo o ndatio. 24 Le nalaza nagneragne i Siria reke, hafarà’e nente o ndatio tama’e teo ze nijale naho nanaintaigne mafe noho ty aretegne sambe karaza’e. Nente iareo mbeo ka ze nisy demonia naho nivoa ty biloka* vaho ty ndaty naleme. Nisitragne’e iaby rey. 25 Ty voka’e, maro ty ndaty boake a Galelia, a Dekapolisy, a Jerosalema naho a Jodia vaho tan-dafe eroy i Jordanay nagnorike aze.