Talily Soa Nisorate i Jaona
1 Tam-boaloha’e tagne, le fa teo ty Saontsy.* Niarake taman’Andrianagnahare ty Saontsy, sady andrianagnahare ka o Saontsy iohoe. 2 Nanomboke tam-boaloha’e tagne reke, le fa niarake taman’Andrianagnahare. 3 Tamy ty alala’e ty nampisy ze kila raha, sady naho tsy tamy ty alala’e, le tsy ho nisy ndra raike o raha reo.
Ty raha nisy tamy ty alala’e, 4 le o fiaignagneo, sady i fiaignagney ro fahazavagne hoahy o ndatio. 5 Mamilepiletse agnate i iegney ao i fahazavagney, faie tsy naharese i fahazavagney i iegney.
6 Nisy lahilahy raike zay nirahen’Agnahare hisolontegna aze. I Jaona ty agnara’e. 7 Niavy o lahilahy iohoe mba ho vavolombelogne hagnambara i fahazavagney, amy izay ze kila ndaty hino aze. 8 Tsy ireke i fahazavagney, fa vavolombelogne hagnambara i fahazavagney avao reke.
9 Fa narine ho avy amy ty tontolo toy eto, i tena fahazavagne hagnazava ze kila ndatỳ. 10 Naho ty maregne, le fa tamy ty tontolo toy teo reke sady tamy ty alala’e ty nampisy o ndatio. Faie tsy nifanta ty tontolo toy. 11 Niavy tan-tanendraza’e agne reke, faie niliere ty ndaty tagne. 12 Faie ze tena nandrambe aze, le nimei’e alalagne mba hanjare ho anan’Agnahare, satria naneho finoagne ty agnara’e. 13 Naterake iareo, faie tsy nofotse naho lio ty niterake iareo, ndra naterake noho ty sitrapo ty rae olombelogne, fa nateran’Agnahare.
14 Nanjare nofotse areke ty Saontsy sady niarake nitoboke tama’ay. Nitrea’ay ka ty voninahi’e. Ty voninahi’e, le manahake ty voninahitse omey ty rae ty ana’e bakotokagne. Tena nankasitrahan’Agnahare* reke sady lava nirehake ty maregne avao. 15 (Nirehake ty miomba aze tamo o ndatio ty Jaona. Ie, ireke i nikoike tihoey tie: “Io i nirehafeko tihoey tie: ‘I ndaty ho avy afarakoy, le fa nanjare alohako eo satria reke fa nisy talohako.’”) 16 Feno hasoa fagnahy miambake reke, le mahazo hasoa fagnahy miambake lognandro tika. 17 Nimeagne tamy ty alala i Mosesy i Lalànay fa i hasoa fagnahy miambakey naho i hamaregnagney, niazontika boake amy i Jesosy Kristy. 18 Mbe tsy nisy ndaty ndra raike nahatrea an’Agnahare. Fa i andrianagnahare bakotokagne tagnila i Rae’e teoy avao ro nagnazava ty miomba Aze.
19 Izao ty fagnambaragne natao i Jaona naho fa nirahe o Jiosio mbama’e mbeo i mpisorogne naho i Levita boake a Jerosalema agne rey mba hagnontane aze tihoe tie: “Ia ireheo?” 20 Tsy nisalasala reke ty namale tie: “Tsy i Kristy raho.” 21 Le hoe iareo tama’e: “A vaho ia areke iheo? I Elia?” Le namale reke tie: “Aha’a, tsy ie raho.” “A ihe vao i Mpaminany ho avỳ?” Le hoe reke: “Aha’a!” 22 Hoe areke iareo tama’e: “Ia zane iheo? Rehafo ama’ay mba hambara’ay i nagnirake anay rey. Ambarao anay ty miomba azo.” 23 Le hoe reke: “Izaho i feo o ndaty mikoike am-patrambey agne tihoey tie: ‘Anò mahitsy ty lala i Jehovah’, arake i nirehafe i Isaia mpaminanỳ.” 24 O Fariseò ty nagnirake i ndaty rey. 25 Nagnontane i Jaona iareo tie: “Nagnino areke rehe ro manao badisa, ie amy izao rehe tsy i Kristy ndra i Elia ndra i Mpaminanỳ?” 26 Le hoe ty navale i Jaona iareo: “Iraho manao badisa amy ty rano. Faie misy ndaty raike mitsangagne ama’areo eo zay tsy fanta’areo. 27 Ireke i ho avy afarakoy, le ndra iraho aza tsy fagneva hagnafake ty kapa’e.” 28 Ta Betania* agne, ta moro’e raike amy i Renerano i Jordanay ey, amy i nanoa i Jaona badisay agne ty nisehoa o raha rehoe.
29 Ie nihamaray igne, le nitrea’e nagnantogne aze ty Jesosy sady hoe reke: “Igne i Anak’agnondrin’Andrianagnaharey, i hagnafake ty fahotà ty tontolo toy! 30 Ireke i nirehafeko tihoey tie: ‘I ho avy afarakoy, le nanjare alohako eo satria reke fa nisy talohako.’ 31 Ndra izaho aza tsy nahafantatse aze. Faie nanao badisa amy ty rano raho mba hampahafantaragne o Israelio tie ia reke.” 32 Hoe ka ty nambara i Jaona: “Nitreako nizotso boake an-dagnitse agne manahake o voromahilalao i fagnahy masigney, le nipetake ama’e eo. 33 Ndra izaho aza tsy nahafantatse aze, fa i nagnirake ahy hanao badisa amy ty ranoy ro nisaontsy tamako tie: ‘Ze trea’o izotsoa i fagnahy masigney sady ijanogna’e, le ireke i hanao badisa amy ty fagnahy masigney.’ 34 Le ty masoko ty nahatrea ze raha zay. Izay ty nahavy ahy nijoro ho vavolombelogne tie, ie i Anan’Agnaharey.”
35 Ie nihamaray i andro ignehoe ka, tamy i Jaona nitsangagne niarake tamy i mpiana’e roe lahy reỳ, 36 le nitrea’e nandriogne ty Jesosy sady hoe reke: “Igne i Anak’agnondrin’Andrianagnaharey!” 37 Naho fa naharey izay i mpianatse roe lahy rey, le norihe iareo ty Jesosy. 38 Nitolike areke ty Jesosy, le nahatrea iareo nagnorike aze sady hoe reke tamy iareo: “Ino o paliae’areò?” Le hoe iareo tama’e: “O Raby (“Mpagnanatse” ty dika o rehake iohoe), mitoboke aia iheo?” 39 Le hoe reke tamy iareo: “Andao fa hotrea’areo.” Nandeha nagnorike aze areke iareo, le nitrea iareo ty nisy aze. Nijanogne niarake tama’e tao iareo tamy i andro ignehoe. Tokotoko’e ho tamy lera fahafolo* teo ho eo tamy izay. 40 I Andrea rahalahy i Simona Petera ty raike amy i mpianatse naharey i reha i Jaonaỳ sady nagnorike i Jesosỳ. 41 Le avy le nandeha tamy i Simona rahalahi’e agne reke sady nirehake tama’e tie: “Nitrea’ay i Mesiay” (“Kristy” ty dika o rehake iohoe). 42 Nente’e mbamy i Jesosy mbeo ka ty Petera. Naho fa nagnente i Petera ty Jesosy, le hoe reke tama’e: “O Simona ana i Jaona, manomboke androany rehe, le hotokavegne tihoe Kefasy” (“Petera” ty dika o rehake iohoe”).
43 Nite handeha ho a Galelia agne ty Jesosy naho fa nihamaray igne. Nahatrea i Filipo reke, le nirehake tama’e tie: “Andao hagnorike ahy.” 44 A Betsaida agne ty niavia i Filipo, amy i tanàgne niavia i Andrea naho i Peteray agne. 45 Nahatrea i Natanaela ty Filipo, le nirehake tama’e tie: “Nitrea’ay i ndaty nirehafegne amy i Lalà i Mosesy aoy naho i nisorate o Mpaminanioy. Kay toe i Jesosy, i ana i Josefa boake a Nazareta agney.” 46 Faie hoe ty Natanaela tama’e: “Mba misy raha soa avao vao kahe ty boake a Nazareta agne?” Le hoe ty Filipo tama’e: “Andao moa rehe hagnente aze.” 47 Naho fa nahatrea i Natanaela nandeha mbama’e mbeoy ty Jesosy, le izao ty raha nirehafe’e miomba aze: “Israelita vata’e zao sady tsy misy fitake.” 48 Hoe ty Natanaela tamy i Jesosy: “Akore ty nahaia’o ahy?” Le hoe ty navale i Jesosy aze: “Taloha i nitokava i Filipo azoy, le fa nitreako irehe nitoboke tambane i fihamỳ* eoy.” 49 Le hoe ty Natanaela: “O Raby, Anan’Agnahare vata’e rehe, ihe i Mpanjaka o Israelioy.” 50 Le hoe ty navale i Jesosy aze: “Iraho nirehake tama’o tie nitreako nitoboke ambane i fihamỳ eo rehey vao o mahavy azo mino ahio? Mbe hahatrea raha ambone izay aza rehe.” 51 Hoe ka ty Jesosy naho fa niavy eo: “Volagneko ama’areo iaby to vata’e, fa hahatrea i lagnitsey misokake nareo, le hahatrea o anjelin’Agnahareo hizotso amy i Ana o ndatỳ eo, sady hahatrea iareo hiakatse mban-dagnitse mbeo.”