Talily Soa Nisorate i Jaona

5 Niavy i fete o Jiosioy tafara izay, le nandeha nionjogne mba Jerosalema mbeo ty Jesosy. 2 Nisy godobogne raike misy rano zay ty ta Jerosalema ao. Tamy i Vavahadin’agnondrỳ eo ty nisy aze. Betizata ty agnara’e amy ty rehake hebreo. Misy lalagne dime misy tafo’e ty magnodidigne aze. 3 Maro ty ndaty narare, goa, naleme tomboke vaho ty nanan-kandra nandrenandre tamo o lalagne rehoe. 4* —— 5 Faie nisy lahilahy raike teo zay, fa tagnate ty 38 taogne ty nararea’e. 6 Naho fa nitrea i Jesosy o lahilahy iohoe nandre teoy sady nihai’e ka tie fa ela ty nararea’e, le hoe reke tama’e: “Te ho sitragne vao rehe?” 7 Hoe i lahilahy nararey tama’e: “Tsy mba misy ndaty anio Ragnandria mampijogne ahy agnate rano ao naho fa mihetseke i ranoy. Fa isake tie handeha mbeo raho, le misy ndaty hafa mandeha alohako eo avao.” 8 Hoe ty Jesosy tama’e: “Mitsangana, le indeso i fandrea’oy sady akia mandehana!” 9 Le avy le nisitragne i lahilahỳ, le nindese’e i fandrea’ey sady nandeha reke.

Sabata i androy tamy izay. 10 Le hoe o Jiosio tamy i lahilahy nisitragney: “Sabata o andrò, le tsy azo’o atao ty minday i fandrea’oy.” 11 Faie hoe i lahilahỳ tamy iareo: “I ndaty nagnasitragne ahikey anio ro nirehake tamako tie, ‘Mitsangana, le indeso i fandrea’oy sady akia mandehana!’” 12 Le nagnontenea iareo reke tie: “Ia o lahilahy nirehake ama’o tie, ‘indeso o fandrea’ò, le akia mandehanao’? 13 Faie tsy nihay i lahilahỳ ty Jesosy, satria fa niala ty eo reke, le nandeha tagnate i vahoakey ao.

14 Faie tafara izay, le nitrea i Jesosy tamy i tempolỳ ao i lahilahy nararey sady hoe reke tama’e: “Fa sitragne rehe hinaneo. Ko manota sasa, tsy mone hoazo ty raha raty ambone igne!” 15 Nandeha i lahilahỳ, le nirehafe’e tamo o Jiosio tie i Jesosy o nagnasitragne azeo. 16 Ty voka’e, nenjehe o Jiosio ty Jesosy satria nanao o raha rehoe tamy ty andro Sabata. 17 Faie hoe reke tamy iareo: “Miasa avao ty Raeko hatrake amy izao, le iraho ka miasa avao.” 18 Vao mainke nite hamono aze o Jiosio naho fa naharey izay. Ty anto’e, tsy vita tihoe tsy nagnorike i lalàna miomba ty Sabatay avao reke, fa nitoka an’Agnahare ho Rae’e ka, le nanao ty vata’e ho mitovy aman’Agnahare.

19 Hoe areke ty navale i Jesosy iareo: “Volagneko ama’areo to vata’e, fa tsy ze raha tea i Anakey hatao avao ro atao’e, fa ze raha trea’e tie ataon-dRae’e, le izay avao ka ro atao’e. Mitovy amy ty fomba fanoan-dRae’e raha ka ty fanoa i Anakey raha. 20 Ty anto’e, tea i Rae i Anakey, le atoro’e aze iaby ze kila raha atao’e. Mbe hotoroa’e asa lahibey ambone ireo aza reke, amy izay nareo ho daban-draha. 21 Manahake ty ameloma i Rae o ndaty mateo, ty hameloma i Anakey ka ze ndaty tea’e hovelomegne. 22 Tsy mitsara ndra ia ndra ia ty Rae, fa i Anakey ty nagnankigna’e iaby ze fitsaragne zay. 23 Amy izay hagnomey voninahitse i Anakey ty ndaty iaby, manahake ty agnomea iareo voninahitse i Rae. Ze tsy magnomey voninahitse i Anakey, le tsy magnomey voninahitse i Rae’e nagnirake azey ka. 24 Volagneko ama’areo to vata’e, fa ze mitsanogne ty rehako sady mino i nagnirake ahỳ, le hahazo i havelogne nainai’ey. Tsy hotsaraegne ka reke, satria fa nimate faie nivelogne indraike.

25 “Volagneko ama’areo to vata’e, fa ho avy ty fotoagne hahareiza o ndaty mateo ty feo i Anan’Agnaharey, le hovelogne ze mitsanogne aze. Fa manomboke amy izao ze fotoagne zay. 26 Managne fahefagne hagnomey fiaignagne ty Rae.* Nimea’e fahefagne ka areke i Anakey mba hagnomey aigne. 27 Ankoatse izay, le nimea’e fahefagne hitsara reke, satria ireke i Ana o ndatỳ. 28 Ko atao’areo mahalatsa anareo zay, satria ho avy ty fotoagne hahareiza ze an-kibory agne* ty feo’e, 29 le hiboake iareo. Ze nanao ty soa, le hovelomegne mba hahazo fiaignagne. Fa ze zatse nanao raty, le hovelomegne mba hotsaraegne.* 30 Tsy afake manao ze raha teateako avao raho, ndra ino zay ndra ino. Mifagnarake amy ty raha saontsie i Rae amako ty itsarako o ndatio. Ara-drare’e areke ty fitsarako, satria tsy mitsara arake ze trea ty masoko ndra arake ze teako raho, fa arake ze tea i nagnirake ahỳ.

31 “Naho iraho avao ro mitsangagne ho vavolombelo ty vatako, le tsy maregne ty raha ambarako. 32 Faie misy hafa ka misaontsy ty miomba ahy, sady maregne ty raha saontsie’e miomba ahy. 33 Nagnirake ndaty tamy i Jaona agne nareo sady toe tena maregne ka ty raha rehafe’e. 34 Faie iraho tsy mipay ndaty ho vavolombeloko. Fa ndra izay aza, le rehafeko avao o raha rehoe mba hahavoavonje anareo. 35 Manahake o jiro velogne naho mamilepiletseo o lahilahy iohoe, le fotoagne fohe ty nagniria’areo tena hifale amy i hazava’ey ao. 36 Faie iraho managne porofo lahibey mandikoatse ty raha nirehafe i Jaona. Ty anto’e, i asa nampanoe i Rae ahikey o ataoko hinaneo, le irey ty magnaporofo fa nirahe i Rae vata’e raho. 37 Ty vatategna i Rae ka ro nagnomey porofo ty miomba ahy. Mbe lia’areo naho naharey ty fiaragnana’e ndra nahatrea ty endre’e. 38 Tsy mitagne ty saontsi’e am-po’areo ao ka nareo, satria tsy mino i nirahe’ey.

39 “Mikaroke agnate Soratse Masigne ao nareo, satria mino tie izay ty hagnampe anareo hahazo i havelogne nainai’ey. Faie tena magnomey porofo miomba ahy ka o Soratse Masigneo naho ty maregne. 40 Ndra tie eo zay, le mbe tsy te hagnantogne ahy avao nareo, amy izay hahazo i havelogney. 41 Tsy mipay voninahitse boake ama o ndaty raho. 42 Fa inareo haiko tie tsy misy hatea an’Andrianagnahare ty am-po’areo ao. 43 Niavy tamy ty tahina i Raeko raho, faie tsy nirambese’areo. Fa naho nisy ndaty niavy amy ty agnara’e avao, le ho nirambese’areo. 44 Akore areke ty hinoa’areo, ie amy izao nareo mipay voninahitse boake ama o ndaty fa tsy mipay voninahitse boake amy i Andrianagnahare tokagney? 45 Ao nareo tsy hieretseretse tie horehafeko amy i Rae tie manao raha tsy mete nareo. I Mosesy, i nitamae’areoy, ro mirehake tie nanao raha tsy mete nareo. 46 Faie naho toe nino i Mosesy vata’e nareo, le ho nino ahy ka, satria reke nanoratse raha miomba ahy. 47 Faie akore moa ty hinoa’areo ty raha rehafeko, ty raha nisorate’e aza tsy inoa’areo?”