Talily Soa Nisorate i Jaona
8 12 Hoe indraike ty Jesosy tamy iareo: “Izaho ty fahazavagne hoahy ty tontolo toy. Ze manonjohy ahy, le tsy handeha agnate ty iegne ao, satria hanagne i hazavà i havelogneỳ reke.” 13 Le hoe o Fariseò tama’e: “Tsy maregne ty raha rehafe’o satria ihe avao ty vavolombelo ty vata’o.” 14 Hoe ty navale i Jesosy iareo: “Ndra tie iraho avao aza ty vavolombelo ty vatako, le maregne ty raha rehafeko. Ty anto’e, fantako tie boake aia raho sady hombaia. Faie inareo tsy mahafantatse tie boake aia raho sady hombaia. 15 Inareo mitsara arake ty nofotse fa iraho tsy mitsara ndra ia ndra ia. 16 Ndra tie mitsara aza raho, le maregne ty fitsarako satria tsy irerike raho, fa miarake amako ty Rae, i nagnirake ahỳ. 17 Izao ka ty voasoratse amy i Lalàna’areoy ao: ‘Maregne ty raha rehafe ty vavolombelogne roe.’ 18 Vavolombelo ty vatako raho, faie vavolombeloko ka ty Rae, i nagnirake ahỳ.” 19 Le hoe iareo tama’e: “Aia ze o Rae’o zao?” Hoe ty navale i Jesosy iareo: “Sambe tsy fanta’areo ndra iraho ndra i Raeko. Naho nahafantatse ahy nareo, le ho nifanta’areo ka ty Raeko.” 20 Tamy ireke nampianatse tamy i tempolỳ aoy ty nirehake o raha rehoe. Tamy i toeragne fagnajariagne raha sarobilỳ ao ty nirehafa’e aze. Faie tsy nisy ndaty nitsepake aze satria mbe tsy niavy i fotoagne fa tinondro ho azey.
21 Hoe indraike ka reke tamy iareo: “Handeha raho, le hipay ahy nareo. Faie homate amy ty fahota’areo ka nareo. Ze ombako, le tsy azo’areo andehanagne.” 22 Le hoe o Jiosio: “Hamono tegna v’irekeo, ie mirehake tie: ‘Ze ombako tsy azo’areo andehanagneo’?” 23 Hoe reke tamy iareo: “Inareo boake ambane etoy, fa iraho boake ambone agne. Inareo boake amy ty tontolo toy, fa iraho tsy boake amy ty tontolo toy. 24 Izay ty nahavy ahy nirehake tama’areo tie: Homate amy ty fahota’areo nareo. Satria nareo tsy nino tie iraho i nirehafegne tie ho avỳ, le homate amy ty fahota’areo nareo.” 25 Hoe areke iareo tama’e: “Ia ireheo?” Le hoe ty navale i Jesosy iareo: “Ino ty handaniako lera hirehafako izay ama’areo? 26 Manan-draha maro horehafegne miomba anareo raho sady maro ty raha hotsarako. Faie naho ty maregne, le maregne i nagnirake ahỳ, sady ze raha nireiko boake ama’e ro rehafeko amy ty tontolo toy.” 27 Tsy nitaka iareo tie mirehake miomba i Rae reke. 28 Hoe ka ty Jesosy: “Naho fa ahanto’areo i Ana o ndatỳ, le hohai’areo tie iraho ro ie sady tsy manao raha arake ze teako avao raho. Ze raha nampianare i Rae ahy avao ro rehafeko. 29 Miarake amako i nagnirake ahỳ. Mbe lia’e naho nienga ahy, satria lava manao ze raha mampifale aze avao raho.” 30 Maro ty ndaty nino aze naho fa nirehake o raha rehoe reke.
31 Hoe ka ty Jesosy tamy i Jiosy nino aze rey: “Naho magnorike ty raha rehafeko avao nareo, le tena mpianako vata’e. 32 Sady hofanta’areo ka ty maregne, le ze maregne zay ro hamotsotse anareo.” 33 Hoe ty navale iareo aze: “Tarana i Abrahama zahay sady mbe lia’ay naho nindevo o ndaty zao. Nagnino areke rehe ro mirehake tihoe tie: ‘Hovotsoragne nareo’?” 34 Hoe ty navale i Jesosy iareo: “Volagneko ama’areo to vata’e, fa ze zatse manota, le ndevo ty ota. 35 Ankoatse izay, le tsy mijanogne an-tragno i tompon-tragnoy ao nainai’e o ndevò. Fa ty ana i tompon-tragnoy ro mijanogne ao nainai’e. 36 Tena hovotsotse vata’e areke nareo naho i Anakey ro mamotsotse anareo. 37 Haiko fa tarana i Abrahama nareo. Faie te hamono ahy nareo satria tsy aore’areo agnate’areo ao ty rehako. 38 Ze raha nitreako tamy iraho mbe niarake taman-dRaekoy ro rehafeko. Fa inareo manao ze raha nirei’areo tamy i rae’areoy.” 39 Hoe ty navale iareo aze: “I Abrahama ty rae’ay.” Hoe ty Jesosy tamy iareo: “Naho niana i Abrahama vata’e nareo, le ho nanao ty asa i Abrahama. 40 Faie te hamono ahy nareo hinane zao, ie amy izao raho nirehake ama’areo ty maregne nireiko boake aman’Agnahare. I Abrahama tsy nanao ze o raha atao’areo zao. 41 Ty asa i rae’areoy o atao’areò.” Le hoe iareo tama’e: “Tsy anake amontogne zahay. Andrianagnahare raike avao ty Rae’ay.”
42 Le hoe ty Jesosy tamy iareo: “Naho i Andrianagnahare ty rae’areo, le ho nitea ahy nareo satria i Andrianagnahare ty nagnirake ahy, sady amy ty alala’e ty niaviako etoy. Tsy nagnira-batagne raho fa Ireke ty nagnirake ahy. 43 Nagnino ro tsy azo’areo ty raha rehafeko? Satria nareo tsy mitsanogne* ty raha rehafeko. 44 Inareo boake amy i Devoly rae’areoy, le ze raha tea i rae’areoy hatao ro atao’areo. Fa mpamono ndaty boake am-boaloha’e agne i rae’areo ignehoe sady tsy nipiteke tamy ty hamaregnagne reke satria tsy misy hamaregnagne ty agnate’e ao. Manoro ty maha ie aze reke amy ireke mavandey satria mpavande reke sady rae ty vande. 45 Tsy inoa’areo areke raho satria mirehake ty maregne ama’areo. 46 Ia ama’areo ty mahavany mirehake tie nanota raho? Naho mirehake ty maregne raho, nagnino areke ro tsy inoa’areo? 47 Ze boake aman’Andrianagnahare, le mitsanogne ty saontsin’Andrianagnahare. Izay ty mahavy anareo tsy mitsanogne satria tsy boake aman’Andrianagnahare.”
48 Hoe ty navale o Jiosio aze: “Tsy maregne vao hinane zay i reha’aỳ tie, ‘Samaritana rehe sady misy demonia’?” 49 Hoe ty navale i Jesosy iareo: “Tsy misy demonia raho fa magnomey voninahitse an-dRaeko fa inareo ro tsy magnomey voninahitse ahy. 50 Faie iraho tsy mipay voninahitse hoahy ty vatako; Misy Raike zay mipay izay naho mitsara. 51 Volagneko ama’areo to vata’e, fa ze magnorike ty rehako, le tsy handia ze o fate zao.” 52 Le hoe o Jiosio tama’e: “Tena misy demonia vata’e rehe. I Abrahama zao nimate, le hoe izay ka o mpaminanio. Faie irehe mirehake tie: ‘Ze magnorike ty rehako, le tsy handia ze o fate zao.’ 53 Lahibey ambone i Abrahama rae’ay, i aze fa nimatey hao iheo? O mpaminanio ka zao nimate. Mihevetse ty tegna’o ho ia iheo?” 54 Hoe ty navale i Jesosy: “Naho magnomey voninahitse ty vatako raho, le tsisy dika’e ty voninahiko. I Raeko ty magnomey voninahitse ahy, i rehafe’areo tie Andrianagnahare’areoy. 55 Faie tsy fanta’areo reke fa iraho mahafantatse aze. Naho izaho mirehake tie tsy mahafantatse aze, le ho mpavande manahake anareo ka. Tena fantako reke sady magnorike ty raha saontsie’e raho. 56 Nagniry mafe ty hahatrea ze o androko zao ty Abrahama rae’areo. Fa nitrea’e zay, le nifale reke.” 57 Hoe o Jiosio tama’e: “Mbe tsy ampe 50 taogne anio rehe, le akore zane ty nahatreava’o i Abrahama?” 58 Hoe ty Jesosy tamy iareo: “Volagneko ama’areo to vata’e, fa mbe tsy nisy ty Abrahama, le fa nisy raho.” 59 Nangalake vato areke iareo hitorahagne aze faie nietake reke, le niakatse boake amy i tempolỳ ao.