Asa o Apostolio
6 Naho fa nitombo ty isa i mpianatsey tamy ze andro rezay, le nigneogneogne tamo o Jiosy mirehake hebreò o Jiosy mirehake grikeo, satria tsy mba nisy nidare o vantotse tamy iareo eò, tamy i fizaragne hanegne isan’androy. 2 Navory i 12 lahy rey areke i mpianatse rey iaby, le hoe iareo: “Tsy mete naho enga’ay hey i fampianaragne ty saontsin’Agnaharey, le hizara hanegne an-databatse ey zahay. 3 Izao areke ry rahalahy, mijobogna lahilahy fito managne laza soa, feno fagnahy masigne naho feno hilala ama’areo eo mba hiandraikitse ze asa zay. 4 Fa izahay hanokagne ty fotoa’ay mba hifantohagne amy ty vavake naho ty fampianaragne ty saontsin’Agnahare.” 5 Nitea i mpianatse rey iaby ze reha iareo zay, le nijobògne iareo ty Stefana i lahilahy tena manam-pinoagne sady feno fagnahy masigney, i Filipo, i Prokoro, i Nikanora, i Timona, i Paremena, naho i Nikoleo boake a Antioka agney, i nanjare nagnorike ty fivavahagne jiosỳ. 6 Nente iareo tamy i apostoly rey agne o lahilahy rehoe, le nametra-tagnagne tamy iareo i apostoly rey naho fa boake nivavake.
7 Ty voka’e, vao mainke niparitake i saontsin’Andrianagnaharey, hafarà’e tena nihamaro ty mpianatse ta Jerosalema agne. Maro ka ty mpisorogne nanjare mpino.
8 Tena nanohagne i Stefana ty Andrianagnahare, le nimea’e hery bey reke mba hanao fahagagagne naho famantaragne miambake tamo o ndatio eo. 9 Faie nisy lahilahy niavy mba hialy hevetse tamy i Stefana. Ty ila’e boake amy ty Sinagoga o Ndevo Nivotsoragneo, ty ila’e boake a Kirena agne, ty ila’e boake a Aleksandria agne, le ty ila’e boake a Kilikia naho a Azia agne. 10 Faie tsy nivita iareo ty nanohetse i Stefana, satria nitrea tamy ty reha’e tie nifeno hilala naho nifeno fagnahy masigne reke. 11 Nandrese lahatse ndaty tambalimbalike agne ka iareo, mba hirehake tie: “Nirei’ay nanivetive i Mosesy naho an’Andrianagnahare reke.” 12 Natao iareo ka ze hampikorontagne i vahoakey, o androanavio naho o mpampianatse lalànao, hafarà iareo le avy le nifamory tama’e eo. Nitsepahe iareo reke sady nitaritarihe iareo tamo o Fitsaragne Ambone Jiosio agne. 13 Ninday vavolombelogne mavande ka iareo mba hirehake tie: “Tsy nado ty lahy tiagne ty tivetive i tempolin’Agnaharey naho i Lalànay. 14 Nirei’ay ohatse reke nirehake tie, nao horavà i Jesosy te Nazareta i tempolỳ sady hova’e ka i fombafomba nirehafe i Mosesy tamantikagne rey.”
15 Naho fa nagnente aze soa iareo agnisa ty Fitsaragne Ambone Jiosio, le nitrea iareo tie nanahake ty tarehe o anjelio ty tarehe’e.