Asa o Apostolio

9 Faie mbe tsy niafake ty helo i Saoly, hafarà’e reke le mbe nagnorohoro naho nite hamono i mpiana i Tompo rey sady nandeha amy i mpisorombeỳ agne, 2 mba hangatake taratasy fahazoan-dalagne handehana’e amy i sinagoga a Damaskosy agney. Amy izay horohiza’e ze trea’e magnorike i Lalagney ndra lahilahy ndra ampela, le hoente’e mba Jerosalema mbeo.

3 Ie naho fa narine i Damaskosy reke, le nisy hazavagne tampoke ty boake an-dagnitse agne sady namilepiletse nagnodidigne aze. 4 Nitonta an-tane eo reke sady naharey feo nirehake tama’e tihoe: “O Saoly, Saoly, nagnino rehe ro magnenjeke ahy?” 5 Le hoe ty niontane’e: “Ia ireheo Ragnandria?” Le hoe reke: “Iraho o Jesosy enjehe’ò. 6 Faie mitsangana rehe, le miziliha an-tanàgne ao fa horehafeko ama’o ty raha tsy maintsy hatao’o.” 7 Tsy naharehake i lahilahy niarake tama’e rey fa nitsangagne avao. Naharey feo iareo, faie tsy nahatrea i ndaty nirehakey. 8 Niaregne boake an-tane eo areke ty Saoly. Nagnente i maso’ey faie tsy nahatrea ndra inogn’ino. Nitana iareo i tagna i Saolỳ, le nitarihe iareo mba Damaskosy mbeo reke. 9 Tsy nahatrea ndra inogn’ino reke tagnate ty telo andro sady tsy nihinagne ro tsy ninon-drano.

10 Nisy mpianatse raike atao tihoe Ananiasy zay ty ta Damaskosy ao. Nirehake tama’e tamy ty fahitagne ty Tompo tie: “O Ananiasy!” Le hoe reke: “Intoy raho Tompo.” 11 Le hoe ty Tompo tama’e: “Mitsangana rehe, le mandehana amy i lalagne atao tihoe Mahitsỳ, le paliao an-tragno i Jodasy ao, i lahilahy atao tihoe Saoly boake a Tarsosy agney. Mivavake reke tie amy izao, 12 le nitrea’e amy ty fahitagne rehe Ananiasy tie nizilike tan-tragno ama’e ao nametra-tagnagne ama’e, amy izay reke mahatrea indraike.” 13 Faie hoe ty navale i Ananiasy: “O Tompo, maro anio ty ndaty reiko nirehake ty raha raty natao ze lahilahy zay tamo o ndati’o masigne a Jerosalema agneo! 14 Eto ka reke hinane zao, satria fa nahazo alalagne boake amo o lahibey ty mpisorogneo mba hitsepake ze ndaty mitoka ty agnara’o.” 15 Faie hoe ty Tompo tama’e: “Mandehana rehe, satria fanake jinobogne ho ahy ze lahilahy zay mba hinday ty agnarako amo o ndaty boake amy ty firenena hafao naho amo o mpanjakao vaho amy ty tarana o Israelio. 16 Ty anto’e, hatoroko aze soa ty raha maro tsy maintsy hiareta’e noho ty agnarako.”

17 Nandeha areke ty Ananiasy, le nizilike tan-tragno ao. Nametra-tagnagne tamy i Saoly ka reke sady nirehake tie: “O Saoly rahalahiko, i Jesosy Tompo, i niseho tama’o tan-dalagney tamy ihe ho mbetoay o nagnirake ahy mbama’o mbetoao. Amy izay rehe hahatrea indraike sady ho feno fagnahy masigne.” 18 Nisy raha manahake o kiram-piagneo rezay le avy le niala tamy i maso’e rey ey, le nahatrea indraike reke. Nitsangagne reke naho fa niavy eo, le natao badisa. 19 Nihinagne ka reke, le nahazo hery.

Nijanogne tamy i mpianatse ta Damaskosy agne rey tagnate ty andro tsiampeampe reke. 20 Le avy le nitory ty miomba i Jesosy tamo o sinagogao agne ka reke. Nitorie’e tie Anan’Agnahare ty Jesosy. 21 Faie nidaban-draha ze naharey izay, le nirehake tie: “Tsy ty ndaty tia vao i nandravarava ze ndaty manognogne ze agnaragne zay ta Jerosalema agney? Le tsy ty hitsepake iareo naho hinday iareo amy ty lahibey o mpisorogneo agne ka vao o niavia’e etoa hinaneo?” 22 Faie vao mainke nihanitombo avao ty hery niazo’e, hafarà’e nivalike ty loha o Jiosy nitoboke ta Damaskosy agneo, satria nagnomey porofo tsy hay lieregne reke tie i Jesosy o Kristio.

23 Ie andro maromaro tafara izay, le niharo hevetse o Jiosio fa hamono aze. 24 Faie nihay i Saoly i heve-draty iareoy. Nambena iareo soa ka ty vavahady i tanàgney ndra handro ndra halegne mba hahafaha iareo mamono aze. 25 Nalae i mpiana’e rey areke ty Saoly naho fa nihalegne, le najo iareo agnate vaha sady najotso iareo tamy i lafinete tamy i manday eoy.

26 Naho fa niavy a Jerosalema agne reke, le nikezake mafe mba hiarake amy i mpianatse rey. Faie natahotse aze iareo iaby, satria tsy nino tie fa nanjare mpiana i Jesosy ka reke. 27 Le niavy ty Barnabasy mba hagnampe aze sady ninday aze tamy i apostoly rey agne. Nirehafe’e tamy iareo tamy ty pitsopitso’e ka ty nahatreava i Saoly i Tompo tan-dalagney naho ty nirehafa’e tama’e. Nirehafe’e ka fa nahavany nirehake ty agnara i Jesosy ty Saoly tamy ireke ta Damaskosy agney. 28 Nijanogne niarake tamy iareo areke ty Saoly sady nandeha amy ze tea’e handehanagne ta Jerosalema ao. Nahavany nitory ty agnara i Tompo ka reke. 29 Nirehake naho nialy hevetse tamo o Jiosy mirehake grikeo reke, faie ndra nitea iareo hovonoegne ka. 30 Naho fa nihay i rahalahy rey ze raha zay, le nente iareo nizotso mba Kaisaria mbeo ty Saoly, le avy eo nalefa iareo ta Tarsosy agne.

31 Nilamigne naho nihanatanjake areke ty fiangonagne nagneneke i Jodia naho i Galelia vaho i Samaria satria tsy nisy nanohetse. Natahotse i Jehovah naho nampahereze i fagnahy masigney ka iareo, le nihamaro avao.

32 Tamy i Petera nitsoeke i faritsey iabỳ, le nandeha tamo o ndaty masigne nitoboke ta Lida agneo. 33 Nahatrea ze lahilahy raike atao Enea zay reke tie tagne. Nandre tam-pandreagne eo avao reke tagnate ty valo taogne, satria naleme. 34 Hoe ty Petera tama’e: “O Enea, magnasitragne azo ty Jesosy Kristy. Mitsangana rehe, le ahorogno o fandrea’ò.” Teo naho eo avao, le avy le nitsangagne reke. 35 Naho fa nahatrea izay ze ndaty nitoboke ta Lida tao naho tamy ty Tane Mira i Sarona, le niova sady nanjare nino i Tompo.

36 Nisy mpianatse tokavegne tihoe Tabita zay ty ta Jopa tao, “Dorkasy” ty dika o agnaragne iohoe amy ty rehake grike. Nanao asa soa maro reke sady nanao fagnomezagne ka mba hiferegnesagne o mahantrao. 37 Faie narare reke tamy ze andro zay, le nimate. Nampandroa iareo i fate’ey naho fa niavy eo, le napetra iareo tamy i efetse ambone etazey ao. 38 Satria marine i Lida ty Jopa, le nirey i mpianatse ta Jopa agne rey tie tamo o tanàgne iohoe ao ty Petera, le hafarà iareo nagnirake roe lahy mba hirehake ama’e tie: “Mba miavia ama’ay agne malaky rehe ajafady.” 39 Le nitsangagne ty Petera sady nandeha niarake tamy iareo. Naho fa niavy reke, le nente iareo tamy i efetse ambone etaze agney. Nandeha mbama’e mbeo iaby ze ampela vantotse tamy i tanàgney eo. Nitagny iareo sady nanoro i Petera i akanjo maro naho roby nizaire i Dorkasy hoahy iareo tamy ireke mbe nivelogneỳ. 40 Nampiakare i Petera areke ze ndaty tao, le nitongaleke reke sady nivavake. Nitolike mbamy i fatey mbeo reke naho fa niavy eo sady nirehake tihoe: “O Tabita, mifohaza!” Le nisokafe i Tabita i maso’ey, le nitoboke reke naho fa nahatrea i Petera. 41 Nitana i Petera tamy i tagna’ey reke, le natsanga’e. Nitokave’e ka i ndaty masigne naho i ampela vantotse rey, le natoro’e iareo tie velogne reke. 42 Nalaza nagneneke i Jopa o raha niseho iohoe, hafarà’e maro ty ndaty nanjare nino i Tompo. 43 Le nijanogne ta Jopa tao tagnate ty andro tsiampeampe hey ty Petera, le tan-tragno i Simona, i mpamboatse holitsey tao ty nisy aze.