Hoahy o Romanao
14 Rambeso soa ty ndaty maleme finoagne, fa ko mitsaratsara aze naho fa tsy mitovy hevetse ama’o reke. 2 Misy ndaty managne finoagne matanjake, le tsy mampagnino aze ty mihinagne ze kila raha, fa ty ndaty maleme finoagne legima avao ty hane’e. 3 Ze ndaty mihinagne areke, le tsy toko’e hagnambanembane ty tsy mihinagne. Le ze ndaty tsy mihinagne, tsy toko’e hitsaratsara ze mihinagne. Ty anto’e, fa nirambesen’Agnahare soa reke. 4 Ia rehe ro hitsara ty mpanompo ty ndaty hafa? I tompo’ey ro hitsara aze, ndra reke hahatsangagne agnatreha’e eo ndra hotonta. Hahatsangagne agnatreha i Jehovah eo reke, satria afake mampitsangagne aze reke.
5 Misy ndaty mihevetse tie misy andro raike ambone ty andro ila’e. Fa ty ndaty ila’e mihevetse tie mitovy iaby avao naho fa andro. Mila rese lahatse tanterake amy ze raha an-tsai’e ao ty ndaty tsikiraidraike. 6 Ze mihevetse ty andro raike ho ambone ty andro ila’e, le manao izay noho ty amy i Jehovah. Ze mihinagne, le mihinagne noho ty amy i Jehovah, satria misaotse an’Agnahare iareo noho i hanegney. Ze tsy mihinagne, le tsy mihinagne noho ty amy i Jehovah, satria misaotse an’Agnahare avao ka iareo. 7 Tsy misy amantika naho ty maregne, velogne hoahy ty vata’e avao zao, sady tsy misy ndaty mate hoahy ty vata’e avao. 8 Fa naho velogne tika, le velogne hoahy i Jehovah. Naho mate tika, le mate hoahy i Jehovah. Ndra velogne areke tika ndra mate, le ahy i Jehovah. 9 Izay ty nahavy i Kristy nimate naho nivelomegne indraike, mba hahavy aze ho Tompo ty mate naho ty velogne.
10 Faie nagnino rehe ro mitsaratsara o rahalahi’ò? Ndra ka, nagnino rehe ro magnambanembane o rahalahi’ò? Ty anto’e, sambe hitsangagne agnatreha i seza fitsaran’Agnaharey eo tikagne iaby. 11 Voasoratse tie: “‘Naho mbe velogne raho’, hoe ty Jehovah, ‘le hanongaleke agnatrehako eo ty ndaty iaby, sady hagneke ahy ho Andrianagnahare ze lela iaby.’” 12 Sambe hotsaraen’Agnahare mifagnarake amy ty raha atao’e ty ndaty tsikiraidraike.
13 Ko mifampitsaratsara sasa areke tika, fa mikezaha ho tapa-kevetse mba tsy hametrake vato ndra raha mamingagne aloha o rahalahio eo. 14 Amy ty maha mpanonjohy ty lia i Jesosy Tompo ahy, le fantako fa tsy misy hanegne maloto hoe aze amy izao avao. Tena rese lahatse amy izay raho. Fa naho misy ndaty mihevetse tie maloto ty raha raike, le ama’e igne ro maloto. 15 Ty anto’e, naho ty hanegne hane’o ro hahavy ty rahalahi’o ho boseke, le tsy maneho hatea sasa rehe. Nimate hoahy o rahalahi’o iohoe ty Kristy, le ko simbaegne amy i hane’oy ty finoa’e. 16 Ko engagne hisy hagnaraty ty raha soa atao’o. 17 Fa tsy midika ho raha hanegne naho raha inomegne i Fanjakàn’Agnaharey, fa midika ho hamaregnagne naho filongoagne vaho hafaleagne boake amy i fagnahy masigney. 18 Ty anto’e, ze manompo i Kristy managne o toetse reo, le mampifale an’Agnahare sady ankasitraha o ndatio.
19 Andao areke tika hanao ze azontikagne atao, mba hampisy filongoagne sady hifampahery. 20 Ko simbaegne amy ty hanegne sasa ty asan’Agnahare. Maregne fa malio ze kila raha, faie tsy mete naho mihinagne izay ty ndaty raike naho mahavy ty hafa haleme finoagne.* 21 Tena soa areke ty tsy mihinan-kena ndra tsy minogne divay ndra tsy manao raha hafa va’e hahavy ty rahalahi’o haleme finoagne. 22 Ze raha inoa’o areke, le tano ho azo naho ho an’Andrianagnahare avao. Sambatse ty ndaty tsy magnameloke ty tegna’e amy ty raha hevere’e tihoe mete. 23 Naho misalasala reke faie mihinagne i hanegney, le fa voaheloke reke, satria tsy nihane’e am-pinoagne i rahay. Fahotagne ze kila raha atao naho tsy atao am-pinoagne.