Taratasy Voaloha’e Hoahy o Korintianao
1 Ty taratasy toy le boake amy i Paoly, i tinoka ho apostoly i Kristy Jesosy noho ty zoton’arofon’Agnaharey, naho i Sostena rahalahintika. 2 Hoahy ty fiangonan’Agnahare a Korinto agne toy, i nihamasignegne mba ho tafaharo amy i Kristy Jesosỳ. Tokavegne tihoe ndaty masigne nareo naho ze mitoka ty agnara i Tompontikagney, ndra i Jesosy Kristy, ndra aia ndra aia ty misy aze. Ireke ty Tompo iareo naho Tompontikagne.
3 Ho ama’areo abey i hasoa fagnahy miambake naho i fiadagnagne boake aman’Agnahare Raentikagney naho i Jesosy Kristy Tompoy!
4 Misaotse i Andrianagnaharekoy lognandro raho naho fa mahatsiaro anareo, noho ty hasoa fagnahy miambake naseho’e tama’areo tamy ty alala i Kristy Jesosy. 5 Tafaharo amy i Kristy nareo, le nanjare nanan-karena tamy ze kila raha. Agnisa izay ty fahaiagne mitory ty saontsin’Agnahare naho ty fanagnagne fahalalagne feno. 6 Ty anto’e, fa nimafe oregne ama’areo eo ty fitoriagne miomba i Kristy. 7 Tsy misy fagnomezagne tsy anagna’areo areke, amy inareo mandigne mafe ty hampibaribariagne i Jesosy Kristy Tompontikagneỳ. 8 Hagnamafe oregne anareo hatrake am-para’e ka reke, amy izay tsy hisy hirehake anareo tie nanao raha raty, naho fa amy i andro i Jesosy Kristy Tompontikagney ao. 9 Tsy mivalike i Andrianagnahare nikanjy anareo mba hifandrambe marine* amy i Ana-dahi’eỳ, ndra i Jesosy Kristy Tompontikagne.
10 Mandrisike anareo amy ty agnara i Jesosy Kristy Tompontikagne raho ry rahalahy, mba hifagnarake amy ty raha rehafe’areo nareo iaby sady tsy hisy fisaratsarahagne ka ty ama’areo eo, fa hiharo saigne naho hiharo hevetse tanterake nareo. 11 Ty anto’e, nisy ndaty boake amy ry Kloa ao ry rahalahiko, nirehake tamako miomba anareo tie, nao misy fifandiedieragne ty ama’areo eo. 12 Ty teako horehafegne le izao: Misy ama’areo mirehake tie, ‘Izaho ahy i Paoly’, ‘Izaho ahy i Apolosy’, ‘Izaho ahy i Kefasy’,* ‘Izaho ahy i Kristy.’ 13 Voazarazara vao ty Kristy? Tsy raha i Paoly anio o nipehegne tamy ty boda-katae ho anareò, sa tsy izay? Sa natao badisa tamy ty agnara i Paoly nareo? 14 Misaotse an’Agnahare raho, fa tsy nisy nataoko badisa nareo, naho tsy i Krispo vaho i Gaio avao, 15 amy izay tsy hisy hirehake tie natao badisa tamy ty agnarako nareo. 16 Ie aloha, nataoko badisa ka ze tan-tragno i Stefanasy ao. Fa ty ankoatse izay, le tsy fantako naho mbe nisy ndaty hafa nataoko badisa. 17 Tsy raha hanao badisa ty nagniraha i Kristy ahy, fa hitory i talily soay. Tsy nampideradera ty hilala o ndatio* raho naho fa nirehake i talily soay, tsy mone hanjare tsy misy ilagne aze i hazo fijalea i Kristỳ.
18 Amy ze hozamagne, le hagegeagne ty fitoriagne miomba i hazo fijaleagney. Faie amantikagne havotagne, le herin’Agnahare io. 19 Ty anto’e, voasoratse tie: “Hofoagnako ty hilala o ndaty mahilalao, le holiereko* ty fahaian-draha o mahira-tsaigneo.” 20 Nimbaia areke o ndaty mahilalao? Nimbaia o mpampianatse lalànao?* Nimbaia o mpialy hevetse amy ty tontolo toy etò? Tsy novan’Andrianagnahare ho hagegeagne vao ty hilala ty tontolo toy? 21 Tsy mahafantatse an’Agnahare ty tontolo toy, satria miantehetse amy ty hilala’e. Faie nasehon’Agnahare ty hilala’e, le i raha heveregne ho hagegeagne torie’aỳ ro nampiasae’e mba hagnavotagne ze mino.
22 O Jiosio mangatake famantaragne, le o Grikeo mipay hilala, 23 fa itika mitory miomba i Kristy, i nipehegne tamy ty boda-kataey. Amo o Jiosio zay, le raha sarotse ekegne,* fa naho amo o firenena hafao, le hagegeagne. 24 Faie amy ze tinoka, ndra Jiosy zay ndra Grike, le herin’Agnahare naho hilalan’Agnahare ty Kristy. 25 Ty anto’e, ty raha heveregne ho hagegeagne boake aman’Agnahare, le mbe mahilala ambone o ndatio. Le ty raha heveregne ho maleme boake aman’Agnahare, le mbe mahery ambone o ndatio.
26 Faie hita’areo ry rahalahy, naho fa kinanji’e nareo, le tsy maro ty ndaty mahilala arake ty nofotse* ama’areo, tsy maro ty mahery, sady tsy maro ka ty ana o ndaty manan-kaja.* 27 Faie nijobogne o raha heveregne ho gege amy ty tontolo toy etò ty Andrianagnahare, mba hahamegnatse o ndaty mahilalao. Nijobognen’Agnahare ka o raha heveregne ho maleme amy ty tontolo toy etò, mba hahamegnatse o raha maherio. 28 Nijobogne o raha tsy misy dika’e amy ty tontolo toy etò naho o raha ambanembanegneo ty Andrianagnahare, le o raha tsy misio mba hagnafoagnagne o raha misio, 29 amy izay tsy misy ndaty* hirehareha agnatrehan’Agnahare eo. 30 Fa noho ty ama’e ty nahavy anareo ho tafaharo amy i Kristy Jesosy, i nampahafantatse antikagne ty hilalan’Agnahare naho ty hamaregna’e naho nagnampe antika ho masigney vaho nagnavotse antika tamy ty alala i solovoigneỳ. 31 Amy izay mifagnarake amy ty voasoratse toy tie: “Ze mirehareha, le i Jehovah ro toko’e hatao’e rehareha’e.”