Taratasy Voaloha’e Hoahy o Korintianao
11 Tahafo’areo raho manahake ty anahafako i Kristy.
2 Midera anareo raho, satria lava misy raha ahatsiarova’areo ahy avao sady tana’areo mafe ka i fampianaragne* nampitaeko tama’areo rey. 3 Faie teako hohai’areo fa i Kristy ty loha ty lahilahy iaby, le ty lahilahy ty loha ty ampela, le i Andrianagnahare ty loha i Kristy. 4 Manao ze hahamegnatse i loha’ey ze lahilahy mivavake ndra maminany faie mifognon-doha. 5 Fa ze ampela mivavake ndra maminany faie tsy mifognon-doha, le manao ze hahamegnatse i loha’ey, satria mitovy amy ty niharatagne reke. 6 Fa naho tsy mifognon-doha ty ampela raike, le toko’e hohitsifagne. Faie naho mahamegnatse ty ampela raike ty hohitsifagne ndra hoharatagne, le toko’e hifognon-doha reke.
7 Tsy toko’e hifognon-doha ty lahilahy, satria vintan’Andrianagnahare reke sady voninahi’e. Fa o ampelao voninahy o lahilahio. 8 Ty anto’e, tsy boake amo o ampelao o lahilahio, fa o ampelao ro boake amo o lahilahio. 9 Ankoatse izay, tsy finorogne hoahy o ampelao o lahilahio, fa o ampelao ro finorogne hoahy o lahilahio. 10 Noho ze anto’e zay naho o anjelio ty mahavy o ampelao mifognon-doha mba ho mareke ty fagnaja’e fahefagne.
11 Faie amo o mpanonjohy ty lia i Tompò, le mifampiankigne o lahilahio naho o ampelao, 12 satria o ampelao, le boake amo o lahilahio, le o lahilahio nateran’ampela. Faie boake aman’Agnahare ze kila raha. 13 Ty vatategna’areo ro mitsarà tie, mete vao naho mivavake aman’Agnahare o ampelao faie tsy mifognon-doha? 14 Tsy fa voajagnahare vao tie naho lava volo o lahilahio, le magnafa-baraka ty vata’e? 15 Fa naho o ampelao ro lava volo, le voninahitse ho aze zay? Ty anto’e, i volo’ey ty nimeagne aze ho fognon-doha’e. 16 Faie naho misy ndaty te hialy hevetse miomba ty fombafomba hafa, le tsy managne fombafomba hafa zahay, ndra o fiangonan’Andrianagnahareo.
17 Faie ndra tie nagnomey o torohevetse rehoe raho, le tsy midera anareo satria tsy mahasoa anareo i fivoria’areoy fa vao mainke manimba anareo. 18 Voaloha’e zao, reiko tie naho fa mivory nareo, le misy fisaratsarahagne ty ama’areo eo. Inoako vata’e zay. 19 Ty anto’e, tena hisy sekta vata’e ty ama’areo eo, amy izay hibaribary tie ia ty ankasitrahagne ama’areo.
20 Naho fa miarake mivory amy ty toeragne raike mba hihinagne i Mahakama Hariva i Tompoy nareo, le tsy ty hihinagne aze tena iavia’areo eo. 21 Ty anto’e, naho fa mihinagne aze nareo, le ty ila’e ama’areo fa nihinagne hariva taloha io, ty ila’e keré, fa ty ila’e mamo. 22 Tsy managne tragno hihinanagne naho hinomagne vao nareo? Sa tsy asia’areo hasi’e o fiangonan’Andrianagnahareo sady atao’areo ka ze hahamegnatse ze tsy managne, le ambanembane’areo ka ze mahantra? Tsy haiko ty hatao anareo? Toko’e hidera anareo vao raho? Tsy hidera anareo amy izay raho.
23 Ty raha niazoko boake amy i Tompo ro ampitaeko ama’areo. Tamy i halegne hamadihagne azey, le nangalake mofo ty Jesosy Tompo. 24 Naho fa boake nisaotse an’Agnahare reke, le nitapahe’e i mofoy sady hoe reke: “Intoy ty vatako, i homeagne anareoy. Anò’areo avao zao ho fahatsiarovagne ahy.” 25 Hoe izay ka ty natao’e tamy i kopey naho fa boake nihinagne i hanegne harivay iareo. Hoe reke: “Ty kope toy i fifagnekeagne vaovaoy, le i liokoy ty hampanan-kery aze. Isake tie minogne amy itoy nareo, le anò’areo avao mba ho fahatsiarovagne ahy.” 26 Fa isake tie mihinagne amy i mofoy naho minogne amy i kopey nareo, le magnambara ty nimateza i Tompo amparake ty iavia’e.
27 Ndra ia ndra ia areke mihinagne amy i mofoy ndra minogne amy i kope i Tompoy, ie amy izao reke tsy fagneva izay, le homelohegne satria tsy magnisy dika’e i vata i Tompoy naho i lio’ey. 28 Toko’e handineke soa ty vata’e hey areke ty ndaty raike tie, mete sa tsy mete ty hihinana’e amy i mofoy naho ty hinomagne amy i kopey, vaho izay reke mihinagne ama’e naho minogne ama’e. 29 Fa ze mihinagne naho minogne faie tsy mandineke i vatagney, le mihinagne naho minogne fagnamelohagne hoahy ty tegna’e. 30 Izay o mahavy ty maro ama’areo maleme naho marareo. Ty ila’e ama’areo aza mate. 31 Faie naho mandineke soa ty vatantikagne tika, le tsy hotsaraegne. 32 Faie naho fa itika tsaraegne, le porofo ty fandilova i Jehovah antikagne zay. Amy izay tikagne tsy homelohegne miarake amy ty tontolo toy. 33 Izao areke ry rahalahy, naho fa mivory mba hihinagne aze nareo, le mifandignisa hey. 34 Naho misy ty keré, le toko’e hihinagne an-tragno’e agne hey. Amy izay naho fa mivory nareo, le tsy homelohegne. Fa ty olagne ila’e mbe halamiko naho fa avy agne raho.