Taratasy Voaloha’e Hoahy o Korintianao
9 Tsy afake manao ze teako vao raho? Tsy apostoly vao raho? Tsy fa nahatrea i Jesosy, i Tompontikagney vao raho? Tsy inareo vao ty porofo fa niasa hoahy i Tompo raho? 2 Ndra tie tsy apostoly raho amy ty hafa, le tena apostoly raho ama’areo. Inareo ty tampò magnamaregne fa apostoly i Tompo raho.
3 Izao ty fiarovan-tegnako amo o ndaty mitsaratsara ahio: 4 Tsy manan-jo* hihinagne naho hinogne vao zahay? 5 Tsy manan-jo hanambaly ampela mpino naho hinday aze miarake ama’ay manahake ty atao o apostoly ila’eo naho o rahalahy i Tompo reo vaho i Kefasy* vao zahay? 6 Sa izahay amy i Barnabasy avao ro tsy maintsy miasa mba hiveloma’ay? 7 Aia ka hisy maramila mianto-batagne zao? Ia moa ty mambole voaloboke faie tsy hihinagne ty voa’e? Ndra, ia ty mpiarake tsy hinogne amy ty ronono ty biby andraze’e?
8 Heve o ndaty vao o raha rehafeko rehoe? Sa tsy mirehake izay vao i Lalànay? 9 Izao ty voasoratse amy i Lalà i Mosesỳ ao: “Ko fehegne ty vava o agnombeo naho fa miasa amo o tane famofoham-bareo ey.” I agnombey vao anehoan’Agnahare fiheveragne amy izaio? 10 Sa noho ty amantika o nahavy aze nisaontsy izaio? Nisorategne zay mba hahasoa antikagne. Satria i ndaty mambole an-tetekeỳ naho i ndaty mamofoke i vokatseỳ, le sambe mitama ty hahazo anjara amy i vokatsey.
11 Naho nitongy raha ara-pagnahy tama’areo eo zahay, diso vao zahay naho mitama hahazo* fanohagnagne ara-nofo boake ama’areo? 12 Naho misy ndaty hafa manan-jo hitake izay ama’areo, le tsy hanan-jo ambone izay vao zahay? Faie ndra tie teo zay, le tsy nampiasa ze zo’ay zay zahay. Izahay aza niaretse ze kila raha, mba tsy ho izahay ro ho kalagne amy ty fiparitaha i talily soa miomba i Kristỳ. 13 Tsy fanta’areo vao fa ty ndaty manao fanompoagne masigne, le mihinagne amy ty raha amy i tempolỳ ao? Le ze manao fanompoagne tsy tapake amy i alitaray eo, mahazo anjara amy ze raha atolotse amy i alitaray eo? 14 Hoe izay ka, fa nandily ze mitory i talily soay ty Tompo mba hivelogne amy i talily soay.
15 Faie tsy misy nampiasaeko ndra raike o zo rehoe. Naho ty maregne aza, le tsy ty hahavy anareo hanao raha ho ahy ty nanoratako o raha rehoe. Fa ndra aleoko mate ta tie... Tsy misy ndaty hahavita hagnafake ty anto’e ireharehako! 16 Naho mitory i talily soay raho, le tsy misy anto’e toko’e hireharehako, fa raha tsy maintsy ataoko zay. Naho ty maregne aza, loza ho ahy naho tsy mitory i talily soay raho! 17 Naho an-tsitrapo ty anoako izay, le managne valesoa raho fa naho tsy an-tsitrapo ty anoako aze, le mbe misy andraikitse lahibey* nankinegne tamako. 18 Ino areke ze valesoako zay? Ty valesoako, le ty mitory i talily soay maimaim-poagne. Tsy magnararaotse ty tombotsoako* manokagne raho naho fa mitory i talily soay.
19 Ndra tie ndaty afake aza raho, le nataoko ho mpanompo o ndatio iaby ty vatako, amy izay raho mahazo ndaty maro arake ze vitako. 20 Tamo o Jiosio, le nanjare Jiosy raho mba hahazoako o Jiosio. Tamy ze tambane ty lalàna, le nanjare tambane ty lalàna raho ndra tie tsy tambane ty lalàna aza mba hahazoako ze tambane ty lalàna. 21 Tamy ze tsy managne lalàna, le nanjare tsy managne lalàna raho ndra tie managne ty lalàn’Agnahare aza sady ambane ty lalà i Kristy mba hahazoako ze tsy managne lalàna. 22 Tamy ze maleme, le nanjare maleme raho mba hahazoako ze maleme. Nanao ze raha azoko natao iaby raho mba hagnampeagne ze kila ndaty, kera mba hisy ho voavonjeko ty ila’e amy iareo. 23 Nanao ze raha iaby azoko natao raho noho i talily soay mba hagnambarako aze amy ty hafa.
24 Tsy fanta’areo vao fa lomay iaby iareo mpanao korsa laio naho fa misy fifaninanagne, ie amy izao ty raike amy iareo avao ty mahazo lokay? Milaisa manahake izay ka mba hahazoa’areo i lokay. 25 Mifehe tegna amy ze kila raha ze mandrambe anjara amo o fifaninanagne iohoe. Manao izay iareo mba hahazoagne i satro-boninahitse mete simbay fa itika manao izay mba hahazoagne i tsy mete simbay. 26 Naho fa lomay areke raho, le tsy lomay fahatane avao. Mikendre soa ka raho naho fa mikomondro, amy izay tsy mikomondro tioke. 27 Jeraeko* ty vatako sady andevozeko, tsy mone iraho ka ro hanjare tsy hankasitrahagne, ie amy izao raho fa nitory tamy ty hafa.