Taratasy Faharoe Hoahy o Korintianao
1 Ty taratasy toy le boake amy i Paoly, i tinendre ho apostoly i Kristy Jesosy noho ty zoton’aforon’Agnaharey naho i Timoty rahalahintikagne. Hoahy ty fiangonan’Agnahare a Korinto agne toy, agnisa izay ty ndaty masigne iaby magneneke i Akaia.
2 Lonike abey ty Andrianagnahare Raentikagne naho i Jesosy Kristy Tompo mba haneho hasoa fagnahy miambake ama’areo naho hagnomey fiadagnagne anareo!
3 Hoderaegne abey ty Andrianagnahare Rae i Jesosy Kristy Tompontikagne, i Rae ty fiferegnesagne naho Andrianagnahare ty fampionognagne iabỳ. 4 Mampionogne antikagne amy ze raha sarotse manjò antikagne reke, amy izay hohaintikagne ty hampionogne ty hafa, ndra inogn’ino raha sarotse atrehe’e, noho itika mahazo fampionognagne boake aman’Andrianagnahare. 5 Manahake ty iaretantikagne raha maro noho ty amy i Kristy, ro ahazoantikagne fampionognagne maro ka amy ty alala i Kristy. 6 Naho miatreke raha sarotse zahay, le fampionognagne anareo naho fagnavotagne anareo zay. Naho fa ampionognegne ka zahay, le fa fampionognagne ho anareo zay. Ze fampionognagne zay, ro magnampe anareo hiaretse raha sarotse manahake o atrehe’ay zao. 7 Tena matoky anareo zahay, satria hai’ay fa mijale manahake anay nareo, le hampionognegne manahake anay ka.
8 Tea’ay hohai’areo ry rahalahy, fa niatreke haoreagne zahay tamy ty faritse i Azia agne. Niatreke haoreagne fara izay ty mafe zahay. Ie, mihoatse ty zaka’ay amy ty heri’ay manokagne, hafarà’ay tsy nitamà ty hovelogne sasa. 9 Naho ty maregne, le manahake o ndaty nivoaheloke mba hovonoegneo ty nifahatsapa’ay ty tegna’ay. Niseho zay, amy izay zahay tsy miantehetse amy ty vata’ay fa miantehetse amy i Andrianagnahare mamelogne ty matey. 10 Nagnavotse anay tamy i loza fa ho namono anaỳ reke, sady mbe magnavotse anay, le matoky ka zahay fa hanohy hagnavotse anay avao reke. 11 Magnampe anay ka nareo naho fa mihalale ho anay, amy izay maro ty hisaotse an’Agnahare noho ty fagnampeagne azo’ay* boake amy ty vavake atao ty maro.
12 Izao ty raha irehareha’ay sady ty feo ty fieretsereta’ay ro mirehake tie, masigne ty findesam-bata’ay sady tsy nanao soa miatreke zahay tagnatrehan’Agnahare eo, naho tamy ty tontolo toy eto, lohotsie fa tama’areo. Tsy miantehetse amy ty hilala o ndatio zahay* fa amy ty hasoa fagnahy miambake asehon’Agnahare. 13 Ze raha ho mora ama’areo ty mamaky aze naho hotaka’areo ro sorate’ay ama’areo. Matoky raho fa vao mainke hotaka’areo soa o raha rehoe, 14 manahake ty fa nahatakara ty ila’e ama’areo aze. Ie, nahatakatse ty ila’e ama’areo fa rehareha’areo zahay, le inareo ka rehareha’ay amy ty andro i Jesosy Tompontikagney.
15 Noho ty fatokisako izay ro nahavy ahy nieretseretse ty handeha ama’areo agne voaloha’e, amy izay ho fale indraike nareo naho fa miheregne agne fagnindroe’e raho. 16 Ty anto’e, nieretseretse ty hitilike anareo raho tamy iraho tan-dalagne ho a Makedonia atoỳ, le avy eo ka naho fa miheregne a Makedonia atoy. Amy izay mba ho natetere’areo lavidavitse raho naho fa handeha a Jodia agne. 17 Nisolesole vao raho naho fa nirehake ze fagniriako zay tama’areo? Sa ze teako avao ro ataoko naho fa misy raha teako hatao, le naho fa mirehake raho tie, “eka, eka”, ie naho fa avy eo ka, “aha’a, aha’a”? 18 Azo atokisagne ty Andrianagnahare, le azo’areo atokisagne ka ty raha rehafe’ay ama’areo, satria tsy hirehake zahay tie, “eka” ie naho fa avy eo “aha’a.” 19 Ty anto’e, i Anan’Andrianagnaharey, ndra i Jesosy Kristy, i nitorieko naho i Silvano vaho i Timoty tama’areoy, le tsy nirehake tihoe “eka”, ie naho fa avy eo “aha’a.” Fa naho fa nirehake tihoe “eka” reke, le “eka.” 20 Fa ndra fire ndra fire raha nampitamaen’Andrianagnahare, le nanjare “eka” iaby zay, tamy ty alala’e. A naho izay areke, le amy ty alala’e ka ro anoa’ay tihoe “Amena” aman’Agnahare, mba hagnomeagne voninahitse aze. 21 Fa i Andrianagnahare ro nagnomey antoke anareo naho anay tie, ahy i Kristy tikagne sady ireke ty nagnosotse antikagne. 22 Nasia’e tampò ka tikagne sady nimea’e i fagnahy masigne am-pontikagne aoy, mba ho antoke amy i valesoantikagne amy ty ho avỳ.
23 I Andrianagnahare ty vavolombelogne fa noho ty fiheverako ty hahasoa anareo ro mbe tsy niaviako ta Korinto agne. 24 Tsy tompo ty finoa’areo zahay, fa mpiara-miasa avao mba hahafale anareo, satria ty finoa’areo ro ioregna’areo.