Hoahy o Galatianao
1 Izaho Paoly le apostoly, faie tsy boake ama o ndaty ndra tinendre tamy ty alala o ndaty, fa tamy ty alala i Jesosy Kristy naho i Andrianagnahare Rae, i namelogne aze tamy ty matey. 2 Izaho naho ty rahalahy iaby miarake amako, le mampamangy anareo fiangona i Galatia.
3 Lonike abey mba ho ama’areo ty hasoa fagnahy miambake naho ty fiadagnagne boake aman’Andrianagnahare Raentika naho i Jesosy Kristy Tompo! 4 Nagnomey ty fiai’e reke noho ty fahotantika mba hagnavota’e antika amy ty tontolo raty toy, satria izay ty zoton’arofon’Andrianagnahare Raentika. 5 Ho aze nainai’e abey ty voninahitse! Amena.
6 Gaga raho, satria niala’areo sahady, i nitoka anareo tamy ty alala ty hasoa fagnahy miambake naseho i Kristỳ, le nagnorike karazan-talily soa hafa nareo. 7 Faie tsy misy talily soa hafa, fa ndaty te hagnakorontagne anareo naho te hagnova ty talily soa miomba i Kristy ro tena misy. 8 Faie ndra izahay ndra anjely boake an-dagnitse agne ro mitory talily soa ama’areo, ankoatse i fa nitorie’ay ama’areoy, le ho voaozogne. 9 Fa nirehafe’ay taloha teo, faie le mbe ahereko indraike hinane zao tie, ze mitory talily soa hafa, ankoatse i fa neke’areoy, le ho voaozogne.
10 Ndaty vao areke hinane zao ro kezaheko resegne lahatse, sa i Andrianagnahare? Sa raho mikezake mampifale ndaty? Naho mbe nampifale ndaty raho, le tsy ho nimpanompo i Kristy. 11 Teako hohai’areo ry rahalahy, fa tsy boake ama o ndaty i talily soa nitorieko ama’areoy. 12 Ty anto’e, tsy niazoko boake ama o ndaty io, ndra nampianaregne ahy, fa nabaribary tamako tamy ty alala i Jesosy Kristy.
13 Azo antoke fa nirei’areo ty fomba fiaignako taloha, tamy iraho mbe ni-Jodaismay. Nenjeheko mafe o fiangonan’Andrianagnahareo sady rinavaravako. 14 Tena nagnorike soa o fivavahagne jodaismao raho, naho oharegne amy ty nitovy taogne amako tamo o firenena raike amakò. Ty anto’e, fara izay ty tena nafana fo tamy ty fomban-drazako raho. 15 Faie naho fa nivazohon’Agnahare, i nagnambake ahy boake an-tron-dreneko agne naho nikanjy ahy tamy ty alala ty hasoa fagnahi’e miambakey tie, mete ty 16 hampibaribariagne i Ana-dahi’ey amy ty alalako, mba hagnambarako ty talily soa miomba aze amo o firenena hafao, le tsy nagnontane soso-kevetse ama o ndaty hey raho, 17 ndra nandeha nionjogne mba Jerosalema mbeo mba ho amo o apostoly talohakò agne reo, fa le avy le nandeha ta Arabia agne. Ie tafara izay, le niheregne ta Damaskosy agne.
18 Ie telo taogne tafara izay, le nionjogne mba Jerosalema mbeo raho mba hitilike i Kefasy, sady nijanogne agne tagnate ty 15 andro. 19 Faie tsy nahatrea apostoly hafa ankoatse i Jakoba rahalahy i Tompo raho. 20 Magnomey toky anareo agnatrehan’Agnahare eo raho, fa tsy vandeko o raha sorateko ama’areò.
21 Tafara izay raho, le nandeha tamy ty faritse i Siria naho i Kilikia. 22 Faie tsy nihay ty fiangona i Jodia tafaharo amy i Kristy reo raho. 23 Ty raha nirey iareo avao le tihoe: “I lahilahy nite handrava o fivavahantikagneo naho nimpagnenjeke antikagne talohay, le magnambara i talily soay tie amy izao.” 24 Nanomboke nagnomey voninahitse an’Agnahare areke iareo noho ty amako.