Hoahy o Galatianao
4 Rehafeko ama’areo, fa naho mbe ajaja i mpandovay, le tsy misy mampiambake aze amo o mpanompò, ndra tie ireke aza ty tompo ze kila raha. 2 Ambane fahefà ty ndaty miambegne aze naho ty ndaty miandraikitse ty an-tragno amy iareo ao reke, amparake ty iavia ty andro fa tinondro i baba’e ho aze. 3 Hoe izay ka tikagne. Tamy itika mbe niajajay, le nandevoze ty raha fototse amy ty tontolo toy eto. 4 Faie naho fa niavy i fotoagne fa tinondroy, le nirahen’Agnahare i Ana-dahi’ey, sady nateran’ampela naho tambane i lalànay. 5 Amy izay reke ho afake hivily ze ambane i lalànay mba hagnafahagne iareo. Amy izay ka tikagne ho afake hatsangagne ho anake.
6 Satria nareo anake, le nimein’Agnahare i fagnahy i Ana-dahi’eỳ sady natao’e am-pontikagne ao, le io ro mitoka mafe tihoe: “Abba, Rae!” 7 Tsy mpanompo sasa areke nareo fa anake. Le naho anake nareo, le nataon’Agnahare ho mpandova ka.
8 Ndra tie eo zay, tamy inareo mbe tsy nahafantatse an’Agnaharey, le nandevoze o tsy tena andrianagnahareo. 9 Faie fa mahafantatse an’Agnahare nareo amy izao, ndra naho ty tena maregne, le fa fantan’Agnahare nareo. Nagnino areke nareo ro miheregne indraike amo o raha tsy misy vokatsoa’eo naho o raha fototse tsy misy ilagne azeo, sady te handevoze ireo indraike? 10 Inareo zao ohatse mihevetse tie misy andro, vanim-potoagne, naho volagne vaho taogne, miambake noho ty ila’e. 11 Matahotse raho kera ho montso antoke avao ty kezake nataoko mba hagnampeagne anareo.
12 Ry rahalahy, mihalale anareo raho mba hanahake ahy, satria fa nanahake anareo ka raho tie taloha. Tsy nanao raty tamako nareo. 13 Faie hai’areo, fa noho iraho narare ro nahavy ahy hahatrea hirike hagnambaragne i talily soay tama’areo voaloha’e. 14 Ndra tie nifitsapagne ho anareo aza ze tsy fahasalamako zay, le tsy nagnambane ahy nareo, ndra nirihy ahy, fa nirambese’areo manahake ty anjelin’Agnahare naho manahake i Kristy Jesosy raho. 15 Nimbaia i hafalea’areoy? Ty anto’e, afake mijoro ho vavolombelogne raho, fa naho niazo’areo natao, le ho nakatra’areo ty voamaso’areo, le nimea’areo ahy. 16 Nanjare fahavalo’areo vao areke raho, satria mirehake ty maregne ama’areo? 17 Nanao ze niazo iareo natao iareo mba hahazoagne anareo, faie tsy soa ty anto’e nanoa iareo izay. Tea iareo hagnalavitse ahy nareo, amy izay magniry hagnorike iareo. 18 Tsy misy maharaty aze, naho ohatse anto’e soa ty mahavy ty ndaty raike mikezake mafe mba hahazo anareo. Faie tsy tihoe naho fa ama’areo eo avao raho vaho izay reke manao izay. 19 O ry anake, hoe mitsongo manahake o ampela hoterakeo raho, amparake ty niforogna i Kristy ama’areo ao. 20 Mba teako naho tama’areo agne raho tie amy izao, sady mba afake nagnova ty fomba firehako ama’areo, satria lany ty haiko ama’areo.
21 Inao hey, inareo te ho ambane i lalànay io, tsy rei’areo vao ty raha rehafe i Lalànay? 22 Voasoratse ohatse tie, nanagne ana-dahy roe lahy ty Abrahama: Ty raike tamy ty ampela ndevo, le ty raike tamy ty ampela afake. 23 I raike tamy ty ampela ndevoy, le naterake manahake ty ajaja iaby, fa i raike tamy ty ampela afakey, le naterake noho ty fampitamagne. 24 Managne heve’e agn’ohatse o raha rehoe. Ty anto’e, o ampela roe rehoe, le midika ho fifagnekeagne roe. Ty raike tamy i Vohy i Sinaỳ eo, i niterake ajaja hondevoy. Mitovy amy i Hagara io. 25 Sinay ty dika tihoe Hagara, le a Arabia agne ty misy o vohitse raike iohoe. Mifanandrife amy i Jerosalema amy izaoy ty Hagara, satria ndevo reke naho i ana’ey. 26 Fa i Jerosalema ambone agney afake, sady ireke ty renentikagne.
27 Fa voasoratse tie: “Mifalea nareo ampela betsiterakeo. Mikorakoraha noho ty hafaleagne inareo ampela tsy naharey ty fanaintaigna o haterakeò. Ty anto’e, ty ana ty ampela nengam-baly, le maro mandikoatse ty ana ty ampela manambaly.” 28 O ry rahalahy, ana i fampitamagney manahake i Isaka nareo. 29 Faie i ajaja naterake manahake ty ajaja iabỳ, le nagnenjeke i ajaja naterake noho ty fagnahỳ. Le hoe izay ka ty raha misy amy izao. 30 Faie ino ty rehafe ty Soratse Masigne? “Roaho agne o ampela ndevo iohoe naho i ana-dahi’ey. Ty anto’e, ty ana i ampela ndevoy, le tsy ombia hiharo lova amy ty ana i ampela afakey.” 31 Anake areke tika ry rahalahy, faie tsy tamy i ampela ndevoy, fa tamy i ampela afakey.