Hoahy o Efesianao
5 Manahafa an’Agnahare areke nareo amy ty maha anak’iso’e anareo, 2 le manehoa hatea lognandro, manahake ty niteava i Kristy antika naho ty nanolora’e ty vata’e ho antikagne, mba ho fagnatetse naho ho sorogne magnitse mandrifondrifogne ho an’Agnahare.
3 Ao tsy hotognontognonegne ama’areo eo ty fijangajangagne naho ze karazam-pahalotoagne, ndra ty fagniriagne tsy mete afa-po, fa tsy mete amo o ndaty masigneo o raha rehoe. 4 Ao ka tsy hotognontognonegne ama’areo eo ty findesam-batagne mahamegnatse naho ty rehake fahatanetane vaho ty somonga vetaveta, satria tsy mete o raha rehoe, fa ndra aleo misaotse an’Agnahare. 5 Ty anto’e, hai’areo, ndra naho ty maregne, le fanta’areo soa fa ty ndaty mpijangajanga, ty ndaty maloto ndra tsy mete afa-po, ty dika izay, o ndaty mpanompo sampio, le tsy managne lova amy i Fanjakà i Kristỳ ao naho amy i Fanjakàn’Andrianagnaharey ao.
6 Ao tsy hisy ndaty henga’areo hamitake anareo amy ty rehake fahatanetane, satria ty raha hoe izay, le hahavy an’Andrianagnahare ho vignetse amo o ana ty tsy fankatoavagneo. 7 Ko manao ty raha atao iareo areke.* 8 Ty anto’e, ni-iegne nareo tie taloha, faie fahazavagne nareo amy izao, satria tafaharo amy i Tompo. Mandehana manahake ty ana o fahazavagneo areke, 9 satria ty voka i fahazavagney, le toetse soa sambe karaza’e, fanoagne ty maregne naho hamaregnagne. 10 Fantaro lognandro ze raha mampifale i Tompo, 11 sady ko atao sasa o asa ty iegne tsy minday vokatsoao. Ty mampibaribary ty haratia’e aza ty toko’e hatao’areo. 12 Ty anto’e, ndra ty manognogne i raha atao iareo amy ty mietaketake aoy aza, le mahamegnatse. 13 Ze kila raha mibaribary, le i hazavagney ty mampibaribary aze. Ty anto’e, manjare mazava ze raha abaribary. 14 Izay ty nahavy aze nirehake tie: “Mifohaza ze miroro, sady mitsangana amy ty mate, le hagnazava azo ty Kristy.”
15 Mitaoa lognandro areke nareo mba tsy handeha manahake o ndaty gegeo, fa hanahake o ndaty mahilalao, 16 le ampiasao soa ty fotoa’areo* satria raty ze o andro zao. 17 Ko misare gege sasa areke, fa fantaro lognandro ze zoton’arofo i Jehovah. 18 Ao nareo tsy homamo o divaio, satria mitarike anareo amy ty raha tena raty zay, fa mikezaha ho feno fagnahy masigne avao. 19 Mampiasà salamo naho fa mirehake, miderà an’Agnahare, mihirà hira masigne, sady mihirà amy ty fo hoahy i Jehovah miarake amy ty mozike. 20 Misaora i Andrianagnahare Raentikagney lognandro amy ze kila raha, amy ty agnara i Jesosy Kristy Tompontikagne.
21 Mifagnekea nareo noho ty fatahora’areo i Kristy. 22 Inareo ampela manambaly, le magnekea ty vali’areo, manahake ty agnekea’areo i Tompo, 23 satria ty lahilahy ro loha ty vali’e, manahake i Kristy loha o fiangonagneo, sady ireke ty mpagnavotse o vatagne iohoe. 24 Manahake ty agnekea o fiangonagneo i Kristy, ro toko’e hagnekea ty ampela manambaly ty vali’e amy ze kila raha. 25 Ry lahilahy manambaly, teavo’areo lognandro ty vali’areo, manahake ty niteava i Kristy o fiangonagneo naho ty nanolora’e ty vata’e ho aze. 26 Amy izay reke ho afake hagnamasigne aze, amy ty alala ty fagnaliovagne iareo amy ty rano fiandroagne, ndra ty saontsy. 27 Nanao izay reke, satria tena tea’e ho soa agnatreha’e eo o fiangonagneo, tsy hisy tasy,* tsy hisy kentrogne, ndra raha hafa mitovy amy ireo, fa ho masigne naho tsy hisy tsiny.
28 Hoe izay ka, fa inareo lahilahy manambaly, le toko’e hoteave’areo manahake ty vata’areo ty vali’areo. Ze lahilahy tea ty vali’e, le tea ty vata’e. 29 Ty anto’e, mbe tsy nisy ndaty nalaigne ty vata’e, fa ty atao’e le ty mamahagne aze naho ty mikarakara aze, manahake ty atao i Kristy amo o fiangonagneo, 30 satria tika ratsam-bata’e. 31 “Izay ty anto’e mahavy o lahilahio hienga ty rae’e naho ty rene’e, le hiharo amy ty vali’e sady hanjare ho nofotse raike avao iareo.” 32 Lahibey o raha mietake masigne iohoe. I Kristy naho o fiangonagneo ze o rehafeko zao. 33 Ndra izay aza, le tsy maintsy tea ty vali’e manahake ty vata’e ty lahilahy tsikiraidraike, fa ty ampela toko’e hagnaja ty vali’e amy ty fo’e.