Taratasy Faharoe Hoahy o Tesalonianao
3 Fara’e ry rahalahy, mivavaha avao ho anay, amy izay i saontsy i Jehovah-y hiparitake malaky naho homeagne voninahitse, manahake ty atao’e ama’areo eo. 2 Mivavaha ka mba hagnafahagne anay amy ze hene ndaty raty, satria tsy ze ndaty iaby ro manam-pinoagne. 3 Fa azo atokisagne ty Tompo sady hagnatanjake anareo naho hiaro anareo amy i ratỳ. 4 Matoky amy i Tompo ao ka zahay naho amy ty miomba anareo, fa ampihare’areo sady mbe hampihare’areo i toromareke boake ama’ay rey. 5 Lonike abey ty Tompo hanohy hitarike ty fo’areo avao ho amy ty hatean’Agnahare naho ho amy ty fiaretagne hoahy i Kristy.
6 Magnomey toromareke anareo amy ty agnara i Jesosy Kristy Tompontikagne zahay ry rahalahy, mba hialà’areo amy ze rahalahy mitangingigne naho tsy manao raha mifagnarake amy i fampianaragne* niazo’areo* boake ama’aỳ. 7 Fa hai’areo tie akore ty fomba hanahafa’areo anay, satria tsy nitangingigne zahay tama’areo teoy, 8 ndra nihinagne hane o ndaty maimaim-poagne. Mifanohetse amy izay, fa niasa mafe handro halegne zahay, amy izay tsy ho enta mavesatse ndra ho an’ia ndra ho an’ia. 9 Tsy noho izahay tsy managne fahefagne mba hanao izay, fa noho izahay te hagnomey fitsikombe hotahafe’areo. 10 Naho ty maregne aza, tamy izahay tama’areo teoy, le mateteke zahay nagnomey anareo ze o lily zao: “Naho misy ndaty tsy te hiasa, le ao reke tsy hihinagne.” 11 Ty anto’e, rei’ay fa misy mitangingigne ty ama’areo eo, tsy mete miasa, fa mizilike amy ty raha tsy mahakasike iareo. 12 Ty ndaty hoe izay o mea’ay o lily iohoe naho fandrisihagne amy ty agnara i Jesosy Kristy Tompò, mba hiasa am-pilaminagne naho hihinagne ze hanegne nipoha ty fana’e.
13 Fa inareo ry rahalahy, ko rokake manao ty soa. 14 Fa naho misy ndaty tsy mankatò ty raha rehafe’ay amy ty taratasy toy ato, le mareho’areo ze ndaty zay sady ko mifagnosehose ama’e sasa, amy izay reke ho megnatse. 15 Faie ndra izay aza, le ko atao’areo manahake o fahavalò reke, fa anaro’areo avao manahake o rahalahio.
16 Lonike abey i Tompo ty fiadagnagney hagnomey fiadagnagne anareo avao amy ty fomba iaby. Lonike abey ty Tompo ho ama’areo iaby.
17 Itoy ty velomako, le ty tagnako izaho Paoly ty nanoratse aze. Io ty famantaragne amy ty taratasiko iaby. Io ty fomba fanorako.
18 Ho ama’areo iaby abey i hasoa fagnahy miambake boake amy i Jesosy Kristy Tompontikagneỳ!