Hoahy o Romanao
12 O ry rahalahy, satria niferenaigne anareo ty Andrianagnahare, le mihalale ama’areo raho mba hanolotse ty vata’areo ho sorogne velogne, masigne sady eken’Agnahare. Ampiasao’areo soa ty sai’areo naho fa manao fanompoagne masigne ho aze. 2 Ko magneke hobokobokoe ty tontolo toy sasa ka fa miovà, le havaozo ty sai’areo, amy izay hohai’areo ty hamantatse i zoton’arofon’Agnahare soa naho ankasitraha’e vaho voririkey.
3 Noho ty hasoa fagnahy miambake naseho tamako ty mahavy ahy mandrisike anareo iaby mba tsy hihevetse ty vata’areo mihoatse ty toko’e ho ie. Fa mikezaha hisaigne soa, le tadidio’areo fa Andrianagnahare ty nagnomey* finoagne anareo tsikiraidraike. 4 Misy ratsambatagne maro ty amy ty vatantikagne, faie tsy mitovy ty asa iareo tsikiraidraike. 5 Maro tikagne faie vatagne raike avao, satria tafaharo amy i Kristy. Mifampiankigne manahake o ratsambatagneo areke tikagne tsikiraidraike. 6 Tsy mitovy ty fahaiagne* nimeagne antika, arakarake ty hasoa fagnahy miambake naseho tamantikagne. Naho nimeagne fahaiagne maminany tika, le toko’e haminany arakarake ty finoagne anagnantikagne; 7 naho fanompoagne ty niazontika, le toko’e hanao izay lognandro tika; ze mampianatse, le toko’e hampianatse lognandro; 8 ze mampahery, le toko’e hampahery lognandro; ze magnomey, le toko’e hatarike lognandro; ze mitarike, le toko’e hazoto naho fa manao izay; ze mamindra fo, le toko’e hanao izay am-pifaleagne.
9 Ko manao soa miatreke naho fa maneho hatea. Malaigna ty raha raty, le ipiteho ty raha soa. 10 Mikezaha hifankatea manahake ty mpirahalahy naho hifandrambe am-po. Mikezaha nareo mba ho voaloha’e amy ty fifagnomeagne voninahitse. 11 Mikezaha hazoto hiasa,* fa ko kamo.* Engao hampirehetse anareo i fagnahỳ. Manompoa i Jehovah. 12 Mifalea amy ty fanantenagne. Miareta haoreagne. Mahareta amy ty vavake. 13 Omeo o ndaty masigneo ze fagnampeagne paliae iareo. Mikezaha hotea mandrambe ambahiny. 14 Isalalao mba hahazo fitahiagne ze magnenjeke anareo, fa ko ozognegne. 15 Miharoa hafaleagne amy ze mifale, le mitagnia miarake amy ze mitagny. 16 Ampanahafo ty fihevera’o ty vata’o ty fihevera’o ty hafa. Ko magnambone tegna fa mikezaha hiambane. Ko mihevetse ty vata’o ho mahilala.
17 Ko mamale raty ty raty ndra amy ia ndra amy ia. Eretsereto avao ze raha hevere ze kila ndaty ho fanjaka. 18 Naho mete sady mbe miankigne ama’areo avao, le mikezaha hilongo soa amy ty ndaty iaby. 19 Ko mamale fate ry ragnetse, fa Andrianagnahare ro engao hanoro ty havignera’e. Ty anto’e, voasoratse tie: “‘Ahy ty famaleagne; Izaho ro hamale’, hoe ty Jehovah.” 20 Faie “naho keré ty fahavalo’o, le omeo hanegne; naho marandrano, le omeo raha hinome’e, satria naho fa manao izay rehe, le hoe mamory vaen’afo an-doha’e ey.” 21 Ko magneke horese ty raty fa reseo lognandro amy ty soa ty raty.