Hoahy o Romanao
11 Hoe areke ty ontaneko: Nilieren’Andrianagnahare vao o vahoa’eo? Aha’a, sagnatria zay! Satria Israelita ka raho, tarana i Abrahama boake amy ty foko i Benjamina. 2 Tsy nilieren’Andrianagnahare o vahoa’e jinobo’e voaloha’eo. Tsy fanta’areo vao ty raha rehafe ty Soratse Masigne miomba i Elia naho fa nitaraigne aman’Agnahare miomba o Israelio? 3 Hoe reke: “O Jehovah, nivonoe iareo i mpaminani’o rey, le nahoma iareo ka i alitara’o rey. Iraho raike avao ty sisa, ie amy izao raho mbe kinia iareo hovonoegne ka.” 4 Faie akore ty navalen’Andrianagnahare aze? “Misy ndatiko 7 000 nengako ho ahy, tsy nanongaleke tagnatreha i Bala eo.” 5 Hoe izay ka ty amy izao. Misy sisa’e amy iareo jinobogne noho ty hasoa fagnahy miambake. 6 Noho ty hasoa fagnahy miambake areke ty nijobognagne iareo, fa tsy noho ty raha natao iareo sasa. Fa naho tsy izay, le tsy tena hasoa fagnahy miambake i hasoa fagnahy nasehoy.
7 Ino areke ty horehafentikagne? Tsy niazo o Israelio i raha nirie iareo mafe mba hoazoy, fa ze jinobogne tamy iareo avao ro nahazo aze. Tsy nipaoke ty ila’e tamy iareo. 8 Fa voasoratse tie: “Nataon’Andrianagnahare lagnake ty roro iareo, amy izay tsy hahatrea ty maso iareo, le ty sofy iareo ka tsy haharey hatrake amy izao.” 9 Hoe ka ty Davida: “Lonike abey hanjare fandrike naho vato mamingagne vaho fandilovagne hoahy iareo ty lataba iareo. 10 Lonike hanjare maiegne ty maso iareo, amy izay iareo tsy mahatrea sady anò avao ze hampivokoke i lambosy iareoy.”
11 Le hoe ty ontaneko: Kera iareo nivoafingagne sady lelia’e tsy nitafatsangagne? Aha’a, tsy izay. Faie noho ty hadisoa iareo ty nahavy o ndaty boake amy ty firenena hafao ho voavonje, le nanjare nialogne iareo. 12 A naho midika ho fitahiagne hoahy ty tontolo toy ty hadisoa iareo, sady midika ho fitahiagne hoahy o ndaty boake amy ty firenena hafao ty fihè ty isa iareo, tsy vao mainke hisy fitahiam-bey vao naho fa feno i isa iareoy?
13 Hirehake ama’areo boake amo o firenena hafao ka raho hinane zao. Apostoly hoahy o firenena hafao raho sady meiko voninahitse ty fanompoako, 14 kera hialogne anareo o ndaty firenena raike amakò, amy izay ho voavonje ty ila’e amy iareo. 15 Ty fagnariagne iareo ty nahavy ty tontolo toy hilongo aman’Agnahare. A naho eken’Agnahare indraike iareo, tsy mitovy amy tihoe nivelomegne amy ty mate vao zay? 16 Le izao ka: Naho masigne ty ampaha’e amo o koba atao lohavogneo, tsy masigne ka vao i kobay iaby? Naho masigne ty vaha o hataeo, tsy masigne ka vao i sampa’ey?
17 Faie nitapahegne ty sampa’e ila’e tamy i hataey, le natao grefy tamy i sampa’e sisa’ey eo rehe ndra tie olivan’ala aza. Mandrambe soa boake amy ty rano trohe ty vaha i olivay ka areke rehe. 18 Faie ao rehe tsy hirehareha amy i sampa’e nitapahegney! Naho mirehareha amy iareo rehe, le tadidio fa tsy irehe ty minday i vaha’ey fa i vaha’ey ro minday azo. 19 Hirehake nareo tie: “Nisy sampa’e nitapahegne, amy izay raho atao grefy eo.” 20 Maregne zay! Nitapahegne i sampa’e ila’e rey, satria tsy nanam-pinoagne. Fa irehe natao eo, satria nanam-pinoagne. Ko mirohake areke fa matahora. 21 I sampa’e tena iey aza nafahan’Agnahare, somandrake fa irehe! 22 Soa fagnahy sady hentetse areke ty Andrianagnahare. Hentetse tamy i nipoke rey ty Andrianagnahare, satria iareo tsy nanam-pinoagne. Faie soa fagnahy ama’o ty Andrianagnahare naho mikezake avao mba ho fagneva ty hanehoagne hasoa fagnahy rehe. Fa naho tsy izay, le hotapahe’e ka rehe. 23 Faie iareo ka, naho miala amo o tsy fahampea-pinoa iareò, le haheren’Agnahare hatao grefy, satria vita’e ty magneregne iareo indraike. 24 Irehe aza ndra tie tinapake boake amy ty olivan’ala, le nivitan’Agnahare ty nanao grefy azo tamy i oliva nambolegney ey, ndra tie tsy voajagnahare aza zay. Tsy vao mainke ho mora ama’e vao ty hanao grefy i sampa’e nitapahegney amy i vata i oliva nanapahagne iareoy?
25 Teako hohai’areo ry rahalahy ty raha mietake masigne toy, amy izay nareo tsy hihevetse ty vata’areo ho mahilala: Nanjare mafe loha ty ila’e amo o Israelio, amparake ty nifenoa ty isa i ndaty boake amy ty firenena hafa nampidiregne rey. 26 Izay ty fomba hagnavotagne o Israelio iaby, satria voasoratse tie: “Boake a Ziona ao ty hiakara i mpagnavotse hampiala ty tarana i Jakoba amy ty raha raty fanoe’ey. 27 Le hanao fifagnekeagne amy iareo raho, naho fa afahako ty fahota iareo.” 28 Maregne fa, naho amy i talily soay, le fahavalon’Agnahare iareo sady nahasoa anareo zay. Faie nijobognen’Agnahare iareo, satria tea’e noho ty amy i razambey iareo rey. 29 Tsy hanegnenan’Agnahare ty nagnomey i fagnomezagne nimea’ey naho ty nikanjy i nikanjie’e rey. 30 Tsy nankatò an’Andrianagnahare nareo tie taloha, faie namindra’e fo nareo hinane zao noho ty tsy fankatoava iareo. 31 Hoe izay ka fa tsy nankatò iareo, le ty voka’e namindragne fo nareo, amy izay iareo hamindragne fo ka. 32 Ty anto’e, niarake nahilin’Agnahare tagnate o tsy fankatoavagneo ao iareo iaby, amy izay reke hamindra fo amy iareo iaby.
33 Tsy misy fetra’e* ty harenan’Andrianagnahare, ty hilala’e naho ty fahalala’e! Tsy taka ty saigne ty lilim-pitsara’e sady tsy hay fantaregne ty fomba fanoa’e raha! 34 Faie “ia ty nahafantatse ty agnate ty vetsevetse i Jehovah ao, sady ia ty nanjare mpanoro hevetse aze?” 35 Ndra ka, “ia ty nagnomey aze voaloha’e, le tsy maintsy onera’e ka naho fa niavy eo?” 36 Boake ama’e iaby ze kila raha, le ireke ty nampisy i raha rey sady ho aze iaby rey. Ho aze abey ty voninahitse nainai’e! Amena.